سر کلیان

پہلی داستان

1

تیری ہی ذات اول و آخر تو ہی قائم ہے اور تو ہی قدیم
تجھ سے وابستہ ہر تمنا ہے تیرا ہی آسرا ہے ربّ کریم
کم ہے جتنی کریں تیری توصیف تو ہی اعلیٰ ہے اور تو ہی علیم
والیِ شش جہات واحد ذات رازقِ کائنات، ربِ رحیم

2

اگر اللہ پر رکھتے ہو ایماں رسول اللہ سے بھی لو لگائو
سمائے جس میں ان دونوں کا سودا کسی در پر نہ اس سر کو جھکائو

3

جنہوں نے دل سے اس یکتا کو مانا محمد کو بصد اخلاص جانا
نہ ان کو کوئی گمراہی کا خطرہ نہ ان سے دور ہے ان کا ٹھکانا

4

کامل ایماں کے ساتھ جس نے بھی دل سے مانا زبان سے مانا
جس کی خاطر بنی ہے یہ دنیا اس محمد کا مرتبہ جانا
فوقیت اس کو دوسروں پہ ملی اپنی ہستی کو اس نے پہچانا
جس نے اس قادر حقیقی کو وحدہٗ لا شریک گردانا

5

ہیں ازل ہی سے بے نیازِ الم راز دارانِ جلوہٗ معبود
گمراہی دور ہی رہی ان سے مل گئی ان کو منزلِ مقصود
واقفِ وحدتِ احد ہو کر ہو گئے ایک شاہد و مشہود

6

پرتو حسنِ دوست ہے جن پر ان کے دل روشنی سے ہیں معمور
اپنی دنیا الگ بسائی ہے خوف و رنج و غم و الم سے دور

7

قتیل ذکرِ الااللہ ہیں وہ ہوئے جو واقفِ اسرار وحدت
حقیقت آشنا ہے روح ان کی بذات خود ہیں وہ خضر طریقت
سکوتِ معرفت اُن کے لبوں پر نگاہوں میں مسافت ہی مسافت
ہمیشہ بے نیازِ عیش و عشرت "لطیف" ان عاشقوں پرحق کی رحمت

8

مقامِ کشتگانِ تیغ وحدت کمالِ آدمیت اوجِ ایماں
"لطیف" اس راستے پر جو چلے ہیں وہی ہیں صاحبِ ایمان و عرفان

9

کشتۂ "وحدہٗ" ہوئے جو لوگ ان کو ’’اِلاّ" نے کردیا دو نیم
خوف سے جرأت آزما نہ ہوا پھر کسی اور کا سرِ تسلیم

10

جسم موجود ہے تو سر غائب سر اگر مل گیا تو جسم نہیں
کچھ بھی اس کے سوا نہیں معلوم منزلِ دوست میں ہیں اہل یقیں

11

وحدہٗ لا شریک کے عاشق سن سکا تو نہ اپنے دل کی پکار
جب ترے سامنے وہ آئیں گے ضبط ہو جائیگا تجھے دشوار

12

وحدہٗ لا شریک کا سودا فکرِ سود و زیاں سے برتر ہے
ہے یہی تیری منزلِ مقصود اور تو خود ہی اپنا رہبر ہے
کاش وہ تشنگی ملے تجھ کو جس کا انعام حوضِ کوثر ہے

13

وحدہٗ لا شریک شرطِ وفا رہِ ہموارِ منزلِ توحید
جس کسی نے دوئی کو اپنایا اپنی منزل سے ہو گیا وہ بعید

14

ہو گئے ایک مل کے ذات و صفات مٹ گیا فرق عاشق و معشوق
ہم ہی کوتاہ بیں رہے ورنہ وہی خالق ہے اور وہی مخلوق

15

کبھی وحدت کی تنہائی میں کثرت کبھی کثرت کے ہنگاموں میں وحدت
مگر ان سارے ہنگاموں کی تہ میں بس اک محبوب ہے اور اس کی صورت

16

غیر محدود ہے جلال اس کا دھر آئینۂ جمال اس کا
آپ رہبر ہے آپ ہی راہی ختم خود اس پہ ہے کمال اس کا
اس کا احساس ہر جگہ ہر وقت کہ ہمہ گیر ہے خیال اس کا
روح انساں میں جلوہ فرما ہے پر تو حسنِ بے مثال اس کا

17

خالقِ حسن کائنات ہے خود خود ہی اس کائنات کا محبوب
آپ ہی اپنا آئینہ ہے وہ خود ہی طالب ہے اور خود مطلوب

18

آپ ہی دوست آپ ہی دشمن آپ آغاز آپ ہی انجام
اصل میں اک حقیقت من و تو درمیاں لاکھ پردۂ اوہام
زندگی، موت، سانس، دل کی پھانس کون جانے ہیں تیرے کتنے نام

19

یہ صدا اور بازگشت صدا اصل دونوں کی ایک جیسی ہے
اپنی آواز کی دوئی پہ نہ جا کہ سماعت فریب دیتی ہے

20

قصر ہے ایک اور در لاکھوں ہر طرف بے شمار ہیں روزن
مجھ کو ہر سمت سے نظر آیا جلوہ گر ایک ہی رخِ روشن

21

مظہر حسنِ ذاتِ باقی ہے اے محبت ترا ہجومِ صفات
جلوہٗ حسن یار ہر شے میں جلوہٗ حسنِ یار کی کیا بات

وائي

ہر کوئی اپنے ساجن کی کرتا رہتا ہے پوجا
گن ہیں جس کے بول بول میں نینوں میں ہے نیہا
ساجن پہلے جان گئے جو میں نے چت میں سوچا
گن ہیں جس کے بول بول میں نینوں میں ہے نیہا
سنو ’’لطیف‘‘ کی لے کو اس میں بھید ہے اس کے من کا
گن ہیں جس کے بول بول میں نینوں میں ہے نیہا

دوسری داستان

1

وہ عیادت کو چل کے آئے ہیں آگئی راس مجھ کو بیماری
دیکھ کر مجھ کو ایسی حالت میں رنج و غم ان پہ ہو گیا طاری
برسرِ دار ہوکے دیکھی ہیں میں نے ان کی بھلائیاں ساری

2

نہیں ان چارہ سازوں میں بصیرت کہو ان سے نہ میرا جی جلائیں
اذیت ہے مسلسل چارہ سازی پلاتے ہیں دوائوں پر دوائیں
جو سولی ہی کو اپنی سیج سمجھیں وہ کیوں مرنے سے آخر جی چرائیں

3

دیکھیں چلتا ہے کون اے سکھیو ہم کو سولی نے پھر پکارا ہے
انہیں جانا پڑے گا آخر کار جنہیں ساجن کا نام پیارا ہے

4

کہہ رہی ہے پکار کر سولی دیکھنا اب قدم نہ پیچھے ہٹے
عاشقو! دعویٰ وفا ہے غلط گر رہِ دوستی میں سر نہ کٹے

5

سر سے پا تک خلوصِ عزم شعار جلوۂ بے نقاب سے دو چار
سولی ہے ایسے عاشقوں کا سنگھار سر بریدہ رہیں گے سارے یار
یہی روز ازل سے ہے اقرار سولی ہے ایسے عاشقوں کا سنگھار
تیز نیزوں کی دیکھ کر یلغار مانتے ہیں ’’لطیف‘‘ کب وہ ہار
سولی ہے ایسے عاشقوں کا سنگھار

6

دار و دیدار کی نوید سنی مرحبا کشتگان جلوہٗ یار
اوج کی انتہا پہ جا پہنچے مطمئن ہوگئے خلوص شعار

7

بر سر دار طالبِ دیدار اور کہتے ہیں کس کو اوج مقام
مڑ کے دیکھا نہیں کبھی پیچھے آگے بڑھتے رہیں گے گام بہ گام

8

تمنا دار کی دل سے نہ جائے کہ ہوگا دار سے دیدار حاصل
محبت ہرقدم پر رہنما ہو تو پھر کچھ بھی نہیں ہے تجھ کو مشکل

9

چھری پیوست ہو جانے دو پہلے ابھی پوچھو نہ انجام محبت
ہم آہنگ سرود زیست کر لو غم محبوب و آلام محبت

10

کسی کے ہاتھ میں ہے اس کا قبضہ نہیں خود موردِ الزام خنجر
رخِ محبوب کی نظارگی سے لرز جاتا ہے یہ لوہا بھی اکثر

11

اس کے خنجر کو کند رہنے دو دھار اس کی نہ تیز ہوپائے
جب چلانے لگے مرا محبوب ہاتھ کچھ دیر کو ٹھہر جائے

12

خنجر اس شاہدِ حقیقی کا گوشت کیا ہڈیوں کو چیر گیا
خنجرِ شاہدِ حقیقی سے تنِ عاشق کا بند بند جدا

13

رہِ محبوب ہے شمشیر کی دھار دمِ شمشیر سے ہر گز نہ ڈرنا
بہت کمیاب ہے یہ دولتِ عشق تم اپنے زخم کا چرچا نہ کرنا

14

تمہیں بھی جان دینا ہے تو آئو کہ مشتاقِ شہادت صف بہ صف ہیں
یہاں سے کون گذرا ہے سلامت کہ سب اس دیس میں خنجر بکف ہیں

15

محبت ہے مجھے ان قاتلوں سے جو رکھتے ہیں کفِ نازک میں خنجر
رواں ہوں سوئے میدانِ شہادت کہ اک مدت سے بارِ دوش ہے سر

16

جو آگے بڑھ گئے جاں دے چکے ہیں کئی سر آچکے ہیں زیرِ خنجر
جو پیچھے رہ گئے ہیں بڑھ رہے ہیں کہ ان کو بھی شہادت ہو میسر
نہ اس منزل کو تم آساں سمجھنا بڑھے آگے تو سر ہو گا زمیں پر
یہ ہے وہ میکدہ بہتا ہے جس میں لہو بھی بادۂ گلرنگ بن کر

17

اگر ہے جرعۂ مے کی تمنا تو اس پیر مغاں کے در پہ جائو
قریبِ ہر خمِ مے عاجزی سے تم اپنے کاسۂ سر کو جھکائو
اگر ہو سر فروشِ مے پرستی تو بہر جرعہ یہ بازی لگائو
یہ مستی سر کے بدلے میں ہے سستی اٹھو آگے بڑھو ساغر اٹھائو

18

اگر ہے جرعۂ مے کی تمنا تو اس پیر مغاں کے در پہ جائو
جو کہتا ہے "لطیف" اس کو سنو تم سر اپنا کاٹ کر خم سے ملائو
خریدو اسکے بدلے تم یہ سودا نہ خالی ہاتھ جام مے اٹھائو

19

جہاں بکتی ہے، اس کوچے میں جائو اگر ہے جرعۂ مے کی تمنا
رموز مے فروشی ہیں نرالے کوئی سمجھا انہیں کوئی نہ سمجھا
خمار چشم جاناں کی، قسم ہے یہ سودا، سر کے بدلے بھی ہے سستا

20

جہاں بکتی ہے، اس کوچے میں جائو اگر ہے جرعۂ مے کی تمنا
ملامت، تہمت ہستی، شہادت عجب دستور ہے اس مے کدے کا
اگر اک کوزۂ مے تم کو مل جائے تو ہر قیمت پہ یہ سودا ہے سستا

21

وہاں دولت نہ کام آئے گی "سید" جہاں کونین ہے جرعے کی قیمت
قریبِ خم پہنچ کر جان دیدو یہی اک کامرانی کی ہے صورت

22

غذائے عاشقاں ہے، زہر قاتل اسے وہ دیکھ کر، ہوتے ہیں شاداں
فدائے ہر ادائے قاتلانہ نثارِ جنبشِ زنجیرِ زنداں
چھپائے ہیں دلوں میں زخم کاری تبسم ریز ہیں لب ہائے خنداں

23

جو تیرا دل مصائب سے، ہے خائف نہ کر بادہ پرستی کی تمنا
رگوں سے کھینچ لے جو، روح ساری مبارک ہے مزہ اس جام مے کا
جو سر کو کاٹ کر بھٹی پہ رکھ دیں انہیں کو راس آتا ہے یہ سودا

24

نہیں ہے جرأت رندانہ جن میں انہیں زیبا نہیں مے کی تمنا
وہ ساقی آئے گا خنجر بکف جب تو فوراً رنگ اڑ جائیگا ان کا
انہیں زیبا ہے شغلِ جرعہ نوشی جنہیں منظور اپنے سر کا سودا

25

ہوا ہے پارہ پارہ جسم ان کا الگ ہے دیگ میں ایک ایک ٹکڑا
ہتھیلی پر جو سر کو لے کے اٹھے انہی کو زیب دیتی ہے تمنا

26

ابلتے ہیں یہاں دیگوں میں ٹکڑے کھڑکتی ہے یہاں ہر دم کڑھائی
جہاں یہ حال ہو اہل طلب کا وہاں کیا چارہ سازوں کی رسائی

27

طلب گار سر رنداں ہے ساقی
نہ جانے مغبچے کیا مانگتے ہیں

28

بہر عنواں تمنائے محبت بہر صورت جنونِ سرفروشی
’’لطیف" ان عاشقوں کی جاں نثاری لطیف اِن عاشقوں کی گرم جوشی

29

نہیں ان عاشقوں کو سر کی پروا خلوص دل ہے بارِ سر سے بہتر
کہیں اچھی ہے جلدو استخواں سے محبت کی شمیمِ روح پرور

30

فقط سر دے کے کب ہوتا ہے سودا نہ سمجھو اتنا ارزاں عاشقی کو
یہ نعمت اے ہجوم سر فروشاں مقدر ہی سے ملتی ہے کسی کو

31

گراں ہے عاشقوں کا قطرہٗ خوں ٹپکنے میں ہے اس کی قدر و قیمت
نگاہ ناز جاناں جلوہٗ دوست محبت کرنے والوں کی عبادت

وائي

مدھہ پی کے میں نے اپنے پیارے ساجن کو پہچان لیا
یہ پریت کا ناتا کرکے میں نے جانے کیا کیا جان لیا
ساجن کو پہچان لیا
اس پار کی اگنی ہے من میں، جس پار سے میں نے گیان لیا
ساجن کو پہچان لیا
یہ جگ ہے دو دن کی مایا، ساجن ہم نے یہ مان لیا
ساجن کو پہچان لیا
کہے ’’لطیف‘‘ کہ تو ہی تو ہے، یہ سارا جگ چھان لیا
ساجن کو پہچان لیا

تیسری داستان

1

آگ دل میں لگا کے چھوڑ گئے تابِ غم آزما کے چھوڑ گئے
چارہ سازوں سے اب کسے امید تم ہی اپنا بنا کے چھوڑ گئے

2

ایک تیرے سوا مرے قاتل
کون ہے جس کو چارہ ساز کہیں

3

میرا ہادی مرا حبیب ہوا مل گیا ایک مہرباں مجھ کو
لے گیا اپنے ساتھ درد مرا دے کے آرامِ جسم و جاں مجھ کو

4

درد اس کا شدید تر ہو جائے جس کا محبوب چارہ گر ہو جائے
اور کوئی ہو چارہ ساز اگر چارۂ درد بے اثر ہو جائے
اس کو حاجت نہیں مسیحا کی جس پہ محبوب کی نظر ہو جائے

5

جب سے محبوب چارہ ساز ہوا ہو گیا دور دل کا ہر آزار
وہی غمخوار بن کے آیا ہے ہم سمجھتے رہے جسے قہار
ایک انعام ہے دلِ پر خوں ایک نعمت ہے زخم خنجر یار
ہاتھ اس کا رگوں پہ رہتا ہے آشنائے نفس ہے وہ ہشیار

6

کیا تڑپنا کراہنا کیسا نغمہ زن ہیں رگیں مثالِ رباب
وہی مرہم عطا کرے گا مجھے جس نے دل کو کیا جلا کے کباب
اس کا شکوہ کریں کہ شکر کریں خود ہی راحت ہے اور خود ہی عذاب

7

رہ عزت ہو یا رہِ ذلت میں ہوں اور شوقِ جادہ پیمائی
کرے گمراہ یا بنے رہبر سر فرازی ملے کہ رسوائی

8

راز دارانہ طور پر اس نے عاشقی کے رموز سمجھائے
دولت صبر دی کہ درد مرا چارۂ درد خود ہی بن جائے
لے کے بیٹھا ہوں جنس عجزو نیاز آج تک خود نہ سامنے آئے

9

اس کے در پر جھکی ہے جس کی جبیں اور در ہوگئے سب اس پر حرام
تو بھی اس کے حضور سر کو جھکا دل میں کب تک یہ آرزوئے سلام

10

اس قدر بھی وہ بے نیاز نہیں ہر نظر میں پیام ہوتا ہے
لب جاناں خموش رہ کر بھی کتنا شیریں کلام ہوتا ہے

11

تو کرم کو سمجھ رہا ہے ستم یہ ہے تیرا قصورِ کم بینی
تو نے تلخی کہا اسے ورنہ اس کی ہر بات عین شیرینی

12

جو دانستہ تجھے اپنا بنائے
کہاں وہ شکوۂ غم لے کے جائے

13

تجھ کو جس کی بڑی تمنا ہے آپ ہے وہ ترا تمنائی
ذکر جس کا تری زباں پر ہے خود ترے ذکر کاہے شیدائی
دشنہ در دست اور قند بلب ہائے اے دوست تیری خود رائی

14

مسکرا کر کبھی پکارا تھا میرے محبوب نے مجھے اک بار
پھر مرے دل میں عمر بھر کے لئے رہ گیا اس کا درد بے آزار

15

میں نے صبحِ الست دیکھی تھی تابش جلوہٗ رخِ جاناں
چٹکیاں لے رہا ہے رگ رگ میں آج تک اس کا دردِ بے درماں

16

جنہیں تیری محبت کی لگن ہے انہیں شکوہ نہیں رنج و بلا کا
وہ سب سے پوچھتے ہیں مسکرا کر کہاں ہے ہاتھ اپنے دلربا کا
دلیلِ قرب ہے ان کی شہادت یہی جینا ہے بس اہلِ وفا کا

17

نویدِ قتل شیوہ دلربا کا ترا مسلک تہِ شمشیر رہنا
اجل کا سامنا کر، یہ کہاں تک خودی سے پائے در زنجیر رہنا

18

خوف کیسا عتابِ جاناں سے اس کی نفرت میں بھی محبت ہے
مہرباں ہو کہ بدگماں ہوجائے جو تعلق ہے وہ غنیمت ہے

19

قتل کے بعد قتل سے پہلے اپنے مقتول کی نگہداری
کیوں نہ ہو اس کے زخم خوردہ کو راحتِ روح ایسی دلداری

20

خود نگہدار اور خود قاتل کیوں مرے چارہ ساز، یہ کیا ہے؟
پیار کرنا عتاب بھی کرنا ناز ہے یا نیاز، یہ کیا ہے؟

21

کیسی دوری کہاں کی نزدیکی رمزِ محبوب دیکھتے جائو
رفعتِ دار یا فراقِ یار جو بھی حصے میں آئے اپنائو

وائي

وہی بپتا میں کام آئے میرا روگ مٹائے
وہی دیالو اپنی دیا سے میری دھیر بندھائے
نیارے روپ دکھائے میرا روگ مٹائے
وہی نردھن کا رکھوالا دیکھ ریکھ کو آئے
دکھیا من بہلائے میرا روگ مٹائے
وہی آئے دکھ لے جائے تو جیون سکھ پائے
پھر جی مرا گھبرائے میرا روگ مٹائے
کہے "لطیف" کہ مجھ کو سکھیو چنچل پریتم بھائے
نینوں سے برمائے میرا روگ مٹائے

سر یمن

پہلی داستان

1

تو میرا دردِ، میری دوا، میرا چارہ ساز
تجھ سے چھپا نہیں مری درماندگی کا راز

2

میں جانتا ہوں مرے چارہ گر کہ تیرے سوا
نہ راس آئے گی دل کو کسی کی چارہ گری
مرے حبیب، مرے چارہ گر، مرے مالک
علاج ہے مرے غم کا تیری ہی چارہ گری

5

دیکھتے کیا ہو خنجر مارو اپنا ہاتھ اٹھائو
گھائل کردو، جان بھی لے لو، میری آن بڑھائو

6

ہاتھ اٹھائو خنجر مارو، مجھ کو موت گوارا ہے
کہہ نہ سکوں گی میں یہ کسی سے تم نے مجھ کو مارا ہے

7

کھینچو تیر کماں سے فوراً مارو ہاتھ اٹھا کر
صرف تمہاری ہو جائوں گی میں فتراک میں آکر

8

ناوک افگن جہاں وہ ہوتا ہے
ہوش ہر چارہ ساز کھوتا ہے

9

ہو بڑا ہی کرم مرے محبوب تو اگر خود کرے مجھے گھائل
عمر بھر زخم کھائے اور نہ ہو دل کسی چارہ ساز پر مائل

11

آہنی تیر جسم میں اُترے اور عشاق ہوگئے گھائل
چار سو زخم خوردہ جسم ہی جسم خون آلودہ ہر طرف بسمل
اپنے زخموں کے آپ ہی مرہم چارہ سازوں سے بے نیاز ہے دل
کاش ان سربریدہ لوگوں سے اک شبِ قرب ہو مجھے حاصل

12

قرب ان زخمیوں کا ہو اک رات درد بھی جن کا جاں نواز ہوا
خلوتِ روح میں بسا اوقات عشق خود ان کا چارہ ساز ہوا

13

زخمیوں کا یہ کلبۂ خاموش اور مسلسل کراہنے کی صدا
شام ہی سے ہر ایک بسمل کو مرہمِ زخم ِ دل کا فکر رہا

14

آج پھر زخمیوں کے مسکن سے آئی اندوہ ناک ایک صدا
چارہ سازوں نے اپنے ہاتھ بڑھائے اور ہر زخم کھول کر دیکھا

15

ہائے یہ زخم خوردگانِ وفا شکر فرما بصد شکیبائی
قرب منزل نہیں انہیں درکار ان کا مسلک ہے جادہ پیمائی

16

تذکرے کشتگانِ شوق میں ہیں درد کی دلنواز لذت کے
لبِ خاموش اس کے شاہد ہیں ہیں وہ راز آشنا محبت کے

17

جس کی فطرت میں ہو تن آسانی جس کی آرام سے گذرتی ہے
کیا خبر اس کو خستہ حالی پر بے بسی کتنے وار کرتی ہے
ایک کروٹ بھی لے نہیں سکتا ٹیس زخموں کی جب ابھرتی ہے
رات اس با وفا کی رو رو کر یادِ محبوب میں گذرتی ہے

18

زخمِ دل سے جنہیں فراغت ہے درد رہتا ہے ان کے دل سے دور
کیا خبر ان کو کس اذیت سے لوٹتے ہیں زمیں پر رنجور
دائمی کرب، مستقل آزار جسم زخموں کی یورشوں سے چور
پھر بھی ثابت قدم محبت میں رات بھر اشکباریاں دستور

19

مری ماں! یہ آرائشِ اشکباری یہ بہرِ نمائش غم و بے قراری
نہیں نام اس کا محبت شعاری کجا یادِ جاناں کجا آہ و زاری

وائي

کیا اس کو کوئی مٹائے یہ روگ ہے میرے من کا
مرے دل میں درد سجن کا
اے چارہ سازو! جائو لیجائو دوائیں اپنی یہ گھائو ہے مجھ برھن کا
مرے دل میں درد سجن کا
وہ جی کا جیارا آئے جیون کا روگ مٹائے دن آئے پریت ملن کا
میرے دل میں درد سجن کا

دوسری داستان

1

اے چارہ گر تجھے مرے غم کی خبر کہاں
جو چارۂ فراق ہے وہ چارہ گر کہاں
میرے ہر ایک درد کا درماں ہے وہ حبیب
اس کے بغیر چارہ گری میں اثر کہاں

2

ہم درد مند چارہ گروں سے الجھ پڑے
جتنے بھی تھے علاج کے در بند ہو گئے
آخر کہیں سے ڈھونڈ کے لائے اُسے یہاں
وہ آئے، اہل درد تنومند ہو گئے

3

بے اعتدالیوں سے نحیف و نزار ہیں
خود سر ہیں اور چارہ گری کے شکار ہیں

4

بے اعتدالیاں ہوں تو کیا چارہ گر کرے
پرہیز ہی نہ ہو تو دوا کیا اثر کرے

5

کیا ان اپاہجوں کو کسی چارہ گر سے کام
ان کو دوا سے اور نہ دوا کو اثر سے کام

6

وہ آئے درد و رنج و الم خواب ہو گئے
ناقابل شفا تھے شفایاب ہو گئے

7

افسوس! چارہ گر مرا درماں نہ کر سکے
یعنی علاج دیدۂ حیراں نہ کر سکے

8

ہر بو الہوس فریبِ ہوس میں جو آگیا
وہ ترکِ اعتدال سے نقصان اُٹھا گیا
فطرت سے جس کو روحِ توانا عطا ہوئی
وہ خوش نصیب ہر غمِ ہستی پہ چھا گیا

9

اپنے محبوب سے اگر ہے پیار سیکھ لے پہلے چور کے اطوار
رات بھر جاگنا ہو کام ترا نیند کا سکھ نہ ہو تجھے درکار
تھک بھی جائے جو دوڑ دھوپ سے تو دل نہ ہو دوڑ دھوپ سے بیزار
اک ترے دل میں اک زباں پر ہو خوفِ تعزیر، جرم سے انکار
ٹکڑے ٹکڑے ترے اگر اُڑ جائیں نہ کرے ان کے راز کا اظہار

10

اپنے گھر سے نکال کر مجھ کو چارہ سازوں نے جب کیا مطعون
جس نے بھی دیکھا مجھ کو ٹال دیا اس قدر بہہ چکا تھا زخم سے خون
اس نے آکر مجھے بحال کیا اس کے لطف و کرم کا ہوں ممنون

11

چارہ گر آکے بیٹھے ہی تھے ا بھی کہ وہ صورت بھی سامنے آئی
بازوئوں میں سکت ہوئی محسوس اور دل میں نئی توانائی
میرا دکھ درد ہوگیا سب دور میں نے دیدار سے شفا پائی

12

آپ زخمی کیا مرے دل کو آپ زخموں کا اِند مال کیا
غمزدہ روح، ناتواں دل کو دولتِ قرب سے بحال کیا

13

بن گئی میری جان پر آخر یہ نہ سمجھے مری پریشانی
جا کے محبوب کو بتائوں گا اپنے چارہ گروں کی نادانی

14

چارہ گر رایگاں ہے چارہ گری جا، بگڑنے دے میری حالت کو
درد جس نے عطا کیا ہے مجھے شاید آجائے وہ عیادت کو

15

چارہ سازوں میں بیٹھنا سیکھو پھر نہ ہوگا کبھی کوئی آزار
راس آئے گا ان کا قرب تمہیں جو بدلتے ہیں فطرتِ بیمار

16

چارہ سازوں میں رات دن رہنا ہائے یہ بے بسی یہ بوالعجبی
ذلتِ اہل درد چارۂ غم ننگِ اہلِ وفا دوا طلبی

17

داغ کر جسم اور تڑپایا کن نگہبانیوں سے مارا ہے
مجھ کو نادان چارہ سازوں نے اپنی نادانیوں سے مارا ہے

18

ہو گئیں چارہ سازیاں ناکام وہی محبوب دکھ مٹائے گا
ہاتھ رکھے گا جب مرے دل پر دل کو آرام آہی جائے گا
اس نے جس کی مزاج پرسی کی دکھ نہ پھر اسکے پاس آئے گی

19

کر چکے اہل درد جب فریاد مہرباں چارہ گر نظر آیا
پڑ گئی جان ناتوانوں میں وہ جہاں جلوہ گر نظر آیا

وائي

کرنا میری رکھوالی اے پیارے ساجن میرے
مرتی ہوں درد سے تیرے
نردوش ہے جیون میرا بپتا ہے مجھ کو گھیرے
مرتی ہوں درد سے تیرے
بیٹھی ہوں آس لگائے مرے دن اب تو ہی پھیرے
مرتی ہوں درد سے تیرے

تیسری داستان

1

مسلسل بے کلی فریاد پیہم بڑی سفاک ہے یہ یادِ خوباں
جلا کر راکھ کردیتی ہے دل کو یہ چنگاری ہے کتنی شعلہ ساماں
مری اس بات کے شاہد ہیں دونوں یہ جوے اشکِ گرم و آہِ سوزاں

2

لبوں پرنالہ ہائے جانستان ہیں تو دل میں شعلۂ سوزِ محبت تمہیں اس کا یقین آئے نہ آئے تم آکر دیکھ لو خود میری صورت

3

نہ پوچھو التہابِ سوزِ ہجراں کبابِ سیخ، دل ہو یا جگر ہو
اسے امید کیا چارہ گروں سے تمہارے لطف پر جس کی نظر ہو

4

لیا جس وقت کہنی کا سہارا مرے محبوب نے اک تیر چھوڑا
کمر میں ہو گیا پیوست پھر وہ پروں کے ساتھ میرے تن میں اُترا
گذر کر قلب سے پہنچا جگر تک مرے قلب و جگر کو اس نے چیرا
نہیں امید کچھ چارہ گروں سے سہارا رہ گیا ہے اب اسی کا

5

وہ اس کا سنسناتا تیر توبہ وجود اپنا دگرگوں میں نے پایا
یہ پوچھے جا کے اس دلبر سے کوئی کہ اب ہاتھوں کو کچھ آرام آیا

6

دوبارہ سنسناتا زنزناتا جگر کے پار اسی کا تیر پہنچا
بالآخر یوں ہوا پیوست دل میں کہ پھر کھینچے سے بھی باہر نہ آیا

7

کچھ ایسا کس کے تو نے تیر مارا کہ لگتے ہی جگر کے پار پہنچا
تجھے میں نے مرے بھولے شکاری بڑا مشّاق تیر انداز پایا

8

کبابِ سیخ اک مدت سے ہوں میں رگ و پے میں ہے اب تک سنسنی سی
مرے محبوب تو نے پھونک دی ہے کلیجے میں میرے ایک دھونکنی سی

9

پسند ان کو ہے کیوں سوزِ محبت یہ رازِ عشق پروانوں سے پوچھو
مزا آتا ہے کیا جلنے میں آخر ذرا انِ سوختہ جانوں سے پوچھو

10

اگر تم بھی ہو پروانوں میں شامل تو آئو اور یہ شعلہ بجھائو
ہزاروں، آنچ پر اس کی جلے ہیں مزا جب ہے کہ تم اس کو جلائو
کہیں ظاہر نہ ہوجائیں کسی پر رموزِ عاشقی دل میں چھپائو

11

اگر تم بھی ہو پروانوں میں شامل تو اِن شعلوں میں آکر کود جائو
جلو اس آگ میں جب تک ہے جینا لگی اپنی نہ غیروں کو دکھائو

12

اگر تم بھی ہو پروانوں میں شامل تو شعلے دیکھ کر واپس نہ آئو
یہ جلتی آگ اس محبوب کی ہے ججھکتے کیوں ہو فوراً کود جائو
یہ بے نوری یہ بے سوزی کہاں تک بڑھو سب خامیاں اپنی مٹائو

13

ابھی کچھ جمع پروانے ہوئے تھے وصالِ شمع کی ٹھانے ہوئے تھے
کوئی ان سوختہ جانوں سے پوچھے رخِ تاباں پہ دیوانے ہوئے تھے

14

شباہت زرد پھولوں کی طرح ہے دہکتی آگ پر منڈلا رہے ہیں
صلائے عام ہے یہ شمع کی لو پتنگے راستہ دکھلا رہے ہیں

15

بجھائو آنسوئوں سے آتشِ تن نہیں ان کے سوا غمخوار کوئی
میسر ہو اگر عزلت نشینی تو پھر منزل نہیں دشوار کوئی
یہاں اہلِ جہاں سے دل لگا کر نہ پائے گا سراغِ یار کوئی

16

بشر کو تو نے اے تنوّر عرفاں سراپا سوختہ ساماں بنایا
کسی کو بھی ترے ایندھن سے میں نے کبھی مل کر جدا ہوتے نہ پایا
بہر عنوان اے محبوب تو نے محبت کرنے والوں کو جلایا

17

رہِ عرفان میں جو سالک دلِ فولاد رکھتے ہیں
انہیں اے دوست! آہنگر ہمیشہ یاد رکھتے ہیں

18

کان میں پھر ہے دھونکنی کی صدا برسرِ کار ہے وہ آہن گر
اُٹھ رہے ہیں مجاز کے شعلے ڈالتا جا رہا ہے وہ اخگر
مجھ سے اے میرے دھونکنی والے اب نہ جانا کہیں جدا ہو کر
پارہ پارہ نہ ہو کے رہ جائے خام لوھا دہکتے شعلوں پر

19

ڈر گئے شعلۂ محبت سے آگ سے دور ہی رہے اکثر
حیف صد حیف دھونکنی والو کون کہتا ہے تم کو آہن گر

20

کچھ تعجب نہیں بنا دے وہ تمہیں فولاد سے بھی محکم ترپہلے سر کو بنائو تم سنداں پھر بتائیں نشانِ آہن گر

21

جذبۂ جاں کنی بڑھائے جا
تو کہ سنداں ہے چوٹ کھائے جا

22

ادھر دھونکنی ہے وہ چنگاریاں ہیں
محبت کی سب شعبدہ کاریاں ہیں

23

دیکھ یہ شعلۂ محبت ہے جل کے بجھتا ہے، بجھ کے جلتا ہے
کیسے ہر آرزوے ہستی کو مسکراتے ہوئے نگلتا ہے

24

آج پھر آگئے وہ صیقل گر
آب آنے لگی ہے تیغوں پر

25

صیقل گرِ عشق آگئے جب
فولاد سے زنگ اُڑ گیا سب

26

زنگ اترتا ہے جل کے لوہے سے دھونکنی اپنی چال چلتی ہے
دیکھ کر صورتیں ہتھوڑوں کی جیسے سنداں کو چوٹ کھلتی ہے
بھیڑ آہن گروں کی ایندھن پر دیکھئے کتنے رخ بدلتی ہے

27

نہ ہونگی ان کی تیغیں زنگ خوردہ
یہ صیقل گر ہیں اپنے فن میں پختہ

وائي

مٹ جائے نراشا میری آجائے پریتم پیارا
وہ میرے جی کا جیارا
دیجائے دکھیا من کو جیون کا سکھ دوبارا
وہ میرے جی کا جیارا
آتا ہے یاد وہ ساجن روتا ہے من بے چارا
وہ میرے جی کا جیارا
مرے پیاسے من کو اس کی آشا ہے امرت دھارا
وہ میرے جی کا جیارا
روگی کا روگ مٹائے ساجن کا ایک اشارہ
وہ میرے جی کا جیارا
چمکیلی چھب دکھلا کر چمکاتا ہے جگ سارا
وہ میرے جی کا جیارا
سب دور ہوئیں بپتائیں جب اس نے مجھے پکارا
وہ میرے جی کا جیارا

چوتھی داستان

1

بیک جام دو طالبِ کیف و مستی
نہیں ہے یہ دستورِ بادہ پرستی
وہی ہے سزاوار قرب الستی
رہا جس کے دل میں نہ احساسِ ہستی

2

بیک جام دو تشنہ کا مانِ الفت
یہ دستور ہے مانعِ وصلِ جاناں
بجز جانگدازی بجز جاں نثاری
میسر نہیں اتصال محبّاں

3

بیک جام دو تشنہ کا مانِ مستی طریقہ نہیں ہے یہ اہلِ وفا کا
شریکِ صراحی مغنی و شاعر مگر فرق کتنا ہے صوت و غنا کا
محبت میں تفریقِ ہستی نہیں ہے محبت میں تقسیم مستی نہیں ہے

4

بڑے فتنہ گر ہیں حریفانِ کثرت
انہیں دیکھ کر مجھ کو ہوتی ہے حیرت
مرے ہمنشیں ہیں وہ سرشار فطرت
جنہیں زندگی ہے تمنائے وحدت

5

مرا دل وہاں ہے جہاں جلوہ گر ہیں
حدیں جزو وکل کی مٹا دینے والے
ذرا سی نگاہِ محبت کی خاطر
سروں کو خوشی سے کٹا دینے والے

6

یقینا ہیں وہ ہستیاں برگزیدہ
جنہیں زہر کا گھونٹ بھی انگبیں ہے
بڑے شوق سے پی، ملے تجھ کو جو کچھ
کہ ہر جام ان کا خمار آفریں ہے

7

بفیضِ طریقت بحسنِ عقیدت
بڑھے ساقیا تیرے کوچے کی عزت
پلانا ذرا تشنہ لب راہیوں کو
چھپا کر نہ رکھنا شرابِ محبت

8

پلا تشنہ لب راہ گیروں کو ساقی
چھپا کر نہ رکھ یہ شرابِ محبت
وہ جرعے جو تو ان غریبوں کو دے گا
غمِ زندگی بھی نہیں ان کی قیمت

9

تشنج سا ہے ان کے کام و دہن میں
مگر زہر پینے سے ہے کتنی رغبت
وہ ان چند جُرعوں سے کب سیر ہوں گے
خموں سے نہ بھرتی ہو جنکی طبیعت
سرور ان کو آتا نہیں دختِ زر سے
یہ ہیں ساقیا تشنہ کامانِ الفت

10

خموں میں بھری ہے شرابِ بہاراں
فضا کیف پرور ہوئی جارہی ہے
بلا نوش ہیں سربکف آج ساقی
بلانے کو بادِ شمال آرہی ہے

11

صبوحی کو آتا رہے جوش ساقی
بہکتے رہیں صاحبِ ہوش ساقی
برستی رہے بادہ آلود شبنم
سحر خیز ہیں تیرے مے نوش ساقی

12

بلا نوش رندوں سے پالا پڑا ہے
ہوس جاوداں میرے ساقی رہے گی
یہ پی جائیں گے جس قدر پی سکیں گے
مگر تشنگی پھر بھی باقی رہے گی

13

جان لیوا تھا اذنِ عام ان کا کیا خطا اس میں بادہ نوشوں کی
بادہ نوشوں پہ آگیا الزام رہ گئی بات مے فروشوں کی

14

یہ بلا نوش مر بھی جائیں اگر بات آئے نہ کوئی اس کے سر
کون جانے بغیر ساقی کے کیسی گذرے غریب رندوں پر

15

وہ بلا نوش مر گئے آخر آزمائے گی اب شراب کسے
وہ وفا کیش دوست ہی نہ رہے اب تری خود سری کی تاب کسے

16

ان بلانوش مے پرستوں کو یہ نہ سمجھو شراب نے مارا
ہائے اس کا کلام زہرہ گداز ان کو جس کے خطاب نے مارا

17

اپنے ساقی کا اے بلا نوشو! راس آئے گا آسرا تم کو
خم ہے مینا ہے جام و ساغر ہیں اب ہے درکار اور کیا تم کو

18

زیر خنجر بھی نائو و نوش میں گم جاں نثارانِ مے پرستی ہیں
کیا کمی ان کو کیف و مستی کی واقفِ رازِ کیف و مستی ہیں

19

زہر نوشی سے جو نہ گھبرائے خوش رہے ان سے اہلِ میخانہ
سید ان کا ہجومِ طوفان خیز اور ساقی کا ایک پیمانہ
موت کے بعد بھی بسا اوقات تشنہ رہتی ہے روحِ رندانہ

20

سرفروشی ہے شیوۂ رنداں اتنے مانوس ہیں شہادت سے
ان کے نزدیک قیمت ساغر کہیں افزوں ہے سر کی قیمت سے

21

شراب ہر اک خم میں منفرد ہے جدا ہر ساغرِ مے کی ہے رنگت
تری چشمِ کرم کو جانتے ہیں بخوبی مے کشانِ حسنِ فطرت
"لطیف" اس خم کدے میں کا سۂ سر فقط اک جرعۂ مے کی ہے قیمت

22

ملو ان برگزیدہ ہستیوں سے سبق آموز مے خواروں کو دیکھو
سراپا شعلۂ جان سوز ہیں یہ محبت کے خریداروں کو دیکھو

23

بجائے ساغرِ مے چشم پُرنم عطا کرتے ہیں شب بیدار ساقی
مگر اس فیض سے محروم ہوں میں مری تشنہ لبی اب تک ہے باقی

وائي

مرا انگ انگ مسکائے، مرے دوارے ساجن گائے
دن پریت ملن کے آئے
دن ڈھلتے ہی مرے ساجن، کتنی سندرتا لائے
دن پریت ملن کے آئے
پھر بھاگ نے کایا پلٹی، برھا کے روگ مٹائے
دن پریت ملن کے آئے
وہ پاس ہے میرے من کے، جگ جس کو دور بتائے
دن پریت ملن کے آئے
کہتا ہے "لطیف" کوی، یہ دیالو کی دیا سہائے
دن پریت ملن کے آئے

پانچویں داستان

1

بے نیازِ ہجوم راہگذار رازدارانِ منزلِ مقصود
رہ روان طریقِ عشق و وفا جاوداں ان کا سایۂ مسعود
اے خوشا پاکبازی و رندی ہوگئے ایک شاہد و مشہود

2

ذکرِ حق سے جو بھید ان پہ کھلے کب کسی اور کو بتاتے ہیں
سانس جیسے رگوں میں پھرتی ہے جزو وکل میں وہ یوں سماتے ہیں

3

پاگئے کچھ تو ہوگئے غمگیں کچھ نہ پایا تو شاد کام رہے
بس وہی اہلِ معرفت کہلائے خود سے بیگانہ جو مدام رہے

4

کیا کہوں رمزِ صاحبِ عرفاں کوئی اس کے رموز کیا جانے
اپنی ہستی سے جنگ ہو جس کی دشمنوں کو جو دوست گردانے

5

مرد عارف وجود خاکی کو کسوتِ آئینہ بناتا ہے
پھر اس آئینے میں رخِ محبوب اپنا جلوہ انہیں دکھاتا ہے

6

نذرِ آتش کریں کلاہ خودی ورنہ اہلِ صفا نہ کہلائیں
اہلِ دل کے لئے نہیں ہوتیں حسرتیں، خواہشیں، تمنائیں

7

سر پہ رکھتے ہو تم کلاہ اگر آئو اپنائو عارفوں کی آن
ڈھونڈ لائو وہ ساغرِ زہر اب جس کے پینے سے کچھ ملے وجدان

8

اسم اعظم ہو یا ہو ذکرِ جلی ہے بہر طور ایک ہی مفہوم
جیسے ہوتا ہے سیپ میں موتی ہے یونہی دل میں ذاتِ نامعلوم
غیر کے در سے کچھ نہ پائے گا اس کے در سے جو ہوگیا محروم

9

رقص میں، محورِ خودی پر ہے فہم و ادراکِ ابنِ آدم کیا؟
اک تری شعبدہ گری کے سوا میرے مولا! بساطِ عالم کیا

10

موجزن چشمۂ حقیقت ہے محو طالب شعورِ کثرت میں
مجھے اقوالِ پیر رومی اور ڈالتے جا رہے ہیں حیرت میں
کیوں یہاں رونما ہوا انسان اک معما کہ خواب ہے یہ جہاں

11

موجزن چشمۂ حقیقت ہے اور طالب شکار کثرت ہیں
پیر رومی کے جاودان اقوال رہنمائے رہِ حقیقت ہیں
دیکھ کر اپنی منزل مقصود کتنے خاموش اہلِ حیرت ہیں

12

محو طالب شعورِ کثرت میں موجزن چشمۂ حقیقت ہے
بے حجاب آئیں سامنے تو کہوں کیا ہیں وہ اور کیسی صورت ہے

13

دوستو! خوب دلنشیں کرلو قولِ رومی کہ بیش قیمت ہے
محو طالب فریبِ کثرت میں موجزن چشمۂ حقیقت ہے
ختم اپنے وجود کو کر دے گر طلب گارِ حسنِ وحدت ہے

14

دوستو! خوب دل نشیں کرلو قول رومی پیامِ راحت ہے
محو طالب فریبِ کثرت میں موجزن چشمۂ حقیقت ہے
جس نے دیکھی وہ ہستیٔ مطلق وہ مجسم سکوتِ حیرت ہے

15

ذکر اس کا ہے بزمِ رومی میں ذات جس کی دلیل وحدت ہے
محو طالب فریبِ کثرت میں موجزن چشمۂ حقیقت ہے
توڑ دے ہجر کے در و دیوار گر تجھے آرزوئے خلوت ہے

16

جو بظاہر ہیں ننگ اہلِ جہاں ان کا باطن ہے چشمۂ عرفاں
ان کے لب پر ہے وردِ حقانی اور سینے میں عشق کا پیکاں

17

لب سراسر سکوتِ بے پایاں دل ہی دل میں کسی کا ذکر بھی ہے
صرف دکھ درد کی کتاب نہیں ان کے حصے میں لوحِ فکر بھی ہے

18

وادیٔ بے نہایت عرفاں تنگنائے حیات کی منزل
عرفانِ خدا کو دنیا میں جز الف کچھ نہ ہو سکا حاصل

19

درمیاں پردۂ دوئی نہ رہا مل گئی جس کو قربتِ رحماں
رہروِ تنگنائے ہستی پر راہِ دشوار ہو گئی آساں

20

کیوں ہو تم رات دن ورق گرداں وہ سبق یاد کیوں نہیں کرتے
حرفِ آغاز ہے الف جس کا ورد سے جس کے جی نہیں بھرتے

21

بد نصیبی کی انتہا ہے یہ علم کچھ نہ ہوسکا حاصل
راہِ الفت نہ مل سکی تجھ کو اور خود گم ہے عقل کی منزل
جز عزازیل کوئی کیا جانے لذتِ سوز و عشرتِ غمِ دل

22

وہ عزازیل عاشقِ صادق سرخرو کر گیا جسے انکار
آپ اپنی ہی آگ میں سوزاں آپ اپنی شراب سے سرشار

23

وہ سبق جو پڑھا تھا روز اوّل ایک بھی سطر اس کی یاد نہیں
یہ اسی بھول کا ہے خمیازہ کوئی مجھ سا بھی بے سواد نہیں

24

حاصلِ فکر و غور کچھ بھی نہیں
تو ہی تو ہے بس اور کچھ بھی نہیں

25

نہ رہا کوئی پردۂ حائل صلۂ جستجوئے حق پایا
راز دارِ ازل سے ہوں دو چار یاد بھولا ہوا سبق آیا

26

بات وہ جس سے قلبِ انساں کو گمرہی سے نجات ہوتی ہے
ہیچ ہر بات سامنے اس کے بس وہی بات بات ہوتی ہے

27

دل میں سوزِ نہاں نہیں رکھتے زہر ہستی پیئے ہی جاتے ہیں
ہائے یہ خود فریب اہلِ خرد ظلم دل پر کئے ہی جاتے ہیں

28

لازمی امتیازِ میم و الف گمرہی کی دلیل اس سے گریز
خلوتِ فکر میں رہے لب پر بس یہی ایک لے ترنم ریز

29

وہی لوگ کہلائے روشن سواد
الف کے سوا کچھ نہیں جن کو یاد

30

خود فریبی ہے لذت گفتار جذبِ کامل ہے رفعتِ کردار
گمرہی کے قریب جو لے جائے دور اس سے وہ علم ہے بیکار

31

اس میں ہو کر میں غرق مٹ ہی گیا
لا و اِلاّ کا فرق مٹ ہی گیا

32

روشنائی کا مصرفِ بیجا کاغذوں پر یہ نقش فرمائی
منزلِ شاہدِ حقیقت دور راہزن یہ عبارت آرائی

33

کیوں لگایا ہے سامنے ناداں تہ بہ تہ کاغذوں کا یہ انبار
فائدہ کیا ورق الٹنے سے ایک ہی لفظ ہے تجھے درکار
صرف چلہ کشی سے کب ہو گا حسنِ محبوب کا تجھے دیدار

وائي

جیون آشا من کو کھینچے، ساجن آئو راہ دکھانے
روک ٹوک سے جیا نہ مانے، میں ساجن کی بنوں دُلاری
ہم دونوں کے بیچ میں کوئی، بادھا پائے نہ آنے
روک ٹوک سے جیا نہ مانے، تکوں سہارا کیوں میں کسی کا
کیا لینا ہے اب اوروں سے، پریتم جب پہچانے
روک ٹوک سے جیا نہ مانے، کیا اچھا ہو پیا کی ہو کر
انگ انگ کو کروں نچھاور، آئے پیا منانے
روک ٹوک سے جیا نہ مانے، مرنے سے کب ڈرتی ہوں میں
پریت کی ریت پرمر تی ہوں میں، ملن کے روپ سہانے
روک ٹوک سے جیا نہ مانے،۔

وائي

میرا کہنا بھول نہ جا، جوبن دو دن کی مایا
بھور بھئے ہر پاپن کی، درگت ہوتے دیکھ دشا
جوبن دو دن کی مایا، نندیا کا جو میت ہوا
پریتم کو اس نے کھویا، جوبن دو دن کی مایا
سکھیو یہ جھوٹا بندھن، نیند کا نینوں سے ناتا
جوبن دو دن کی مایا، کوری آنکھوں کاٹے رین
میت وہی میرے تن کا، جوبن دو دن کی مایا
آدھی رات ہے دور ہٹا، نیند کی نینوں سے چھایا
جوبن دو دن کی مایا۔

چھٹی داستان

1

ہم غریبوں کی بے نوائی کو لحنِ دائود ہے نوا اس کی
زیرِ پائے سمندِ ناز ہیں ہم شہسواری ہے باد پا اس کی

2

لحن دائود ہے فضائوں میں دیدنی کیفیت ہماری ہے
زیرِ پاے سمند ناز ہیں ہم خود نگر اس کی شہ سواری ہے

3

میرے قابیل تیرا تیرِ نظر اپنے مستوں پہ ظلم ڈھاتا ہے
کرکے گھائل نہ جانے کتنوں کو جرأت شوق آزماتا ہے

4

میرے قابیل تیرا تیرِ نظر ہم فقیروں کو کر گیا گھائل
ہمیں اک تیر کی بھی تاب نہ تھی دوسرا مارنے سے کیا حاصل

5

تیر ہائے نظر ترے قابیل کر رہے ہیں “لطیف” کو گھائل
کیا خبر ان کو درد کیا شئے ہے جن کو تیری رضا نہیں حاصل

6

میں نے دیکھا ہے اے مرے قابیل تو نے تیکھی نظر سے تیر چلائے
دوسرے تیر کی ضرورت کیا وار پہلا ہی جب نہ خالی جائے

7

تیر جب وہ کمان میں کس لیں اپنا سینہ سپر بنائو تم
ناوک افگن ہے عشوۂ خوباں سامنے آ کے زخم کھائو تم
منزلِ دار حاصلِ دارین آئو کامل یقیں سے آئو تم

8

جب وہ اپنی کماں میں تیر کسیں اپنا سینہ سپر بنا لینا
ناوک افگن ہے جنبشِ مژگاں صبر سے زخم دل پہ کھا لینا
رہ کے ثابت قدم محبت میں مدعائے حیات پا لینا

9

وہ کسی نے کماں میں تیر کسا آگے آ جائو تان کر سینہ
جب درِ دوست پر پہنچ جائو دل میں رکھنا نہ تم کوئی کینہ

10

کہیں ایسا نہ ہو مرے محبوب مجھ پر تو وار کرکے پچھتائے
میری ہستی میں ہے تیرا پرتو تیر تیرا تجھے نہ لگ جائے

11

ہائے اس نازنیں کی تیر کشی جس میں ہمت نہ تھی وہ ہار گیا
آگئی راس جن کو مہر و وفا اُن کو پہلا ہی تیر مار گیا

12

تیر لرزا ہوا میں اور لگا میں بھی اپنی جگہ سے ہل نہ سکا
کاش اک بار وہ جری محبوب پھر مرے دل پہ ہو کرم فرما

13

ہدف تیر بن گئے عاشق خیر ہو عرصۂ محبت کی
سامنے جو بھی آ گیا "سید" تیر نے دی صدا ہلاکت کی
بر درِ دوست خاموش بر لب کوئی حد چاہئے تھی حیرت کی

14

کار زارِ وفا میں کٹ جانا عاشقوں کا سنگار ہوتا ہے
کس تمنا سے سر بریدۂ عشق قاتلوں پر نثار ہوتا ہے

15

نعرہ زن عرصۂ محبت میں اس طرح ہو کہ باز گشت رہے
برسر دار بھی اگر جائے پھر بھی اپنی زباں سے کچھ نہ کہے
عشقِ افعی مزاج کے انداز وہی سمجھے گا جو گزند سہے

16

آئے وہ عرصۂ محبت میں جو نصیحت “لطیف” کی مانے
قاتلوں کی خوشی اسی میں ہے پیش کر دیں سروں کے نذرانے
عشق افعی مزاج کے انداز کوئی کیا جانے مبتلا جانے

17

دوستو! عرصۂ محبت ہے اپنے سر کی نہ تم کرو پروا
باطلِ کم نگاہ کیا جانے ہے سرِ دار راہِ دارِ بقا
سانپ ہے عشق یہ وہی جانے جو اسے جسم سونپ دے اپنا

18

بڑھو آگے بشانِ لاہوتی کود کر عرصۂ محبت میں
ختم کر دو فسانۂ ہستی کیا ہے اب زندگی کی الفت میں
عشق ہے سانپ یہ وہی جانے زہر اس کا ہو جس کی قسمت می

19

جسم اور روح کے تعلق کو لازمی ہے قریب تر ہونا
کھیل سمجھو نہ عشق کو یارو شرط ہے صاحبِ نظر ہونا
سر بہ نیزہ ہیں رہروانِ طلب طالبِ دوست سوچ کر ہونا

وائي

برھا کی ریت کٹھن ہے، میں پاپن ہوں میں پاپن
جو سیج پہ بھی نا سوئیں، نینوں سے نندیا کھوئیں
بے چین رہیں جو تجھ بن، میں پاپن ہوں میں پاپن
پریمی کو نیند نہ آئے، ساجن کی یاد ستائے
وہ جاگے تارے گن گن، میں پاپن ہوں میں پاپن
کیا بات سمجھ میں آئے، جب پریت کی ریت سہائے
دوبھر ہو جائے جیون، میں پاپن ہوں میں پاپن

ساتویں داستان

1

ہر تمنائے طالبِ وحدت ذکرِ اللہ سے مچلتی ہے
روح ان کی بس ایک آہ کے ساتھ جسدِ خاک سے نکلتی ہے

2

عمر بھر بے قرار رہتے ہیں عاشقوں کے لئے کہاں آرام
کبھی محبوب نے جو شکوہ کیا پھر نہ آسودگی کا لیں گے نام

3

تم تنومند اور توانا ہو عاشقوں کی ہے کیا یہی پہچان
وصل محبوب کے لئے بے تاب ان کا دل، ان کی روح، ان کی جان
اور اک شاہد ازل کے سوا ان کی نظروں میں ہر حسیں انجان

4

موجزن ہے اگر رگوں میں لہو دعوی عشق سر بسر بے کار
زرد چہرہ ہے طالبوں کا نشاں زیب و زینت انہیں نہیں درکار
سیم و زر راہِ عشق میں حائل سرفروشی ہے عشق کا معیار

5

درد سے آشنا جو لوگ نہیں
عاشقی ان کے بس کا روگ نہیں

6

دیکھنا چھپ کے جلوہٗ محبوب طالبوں کے لئے ہے نازیبا
ان کا شیوہ ہے یہ تن آسانی جن کو رہنی ہو جان کی پروا

7

آرزو مثل دار ہے گویا انتہا موت سے عبادت ہے
عمر بھر اس کا منتظر رہنا رہ رو شوق تیری فطرت ہے

8

خود تمنا کرے کوئی ورنہ ان کو دیکھے جو ہیں تمنائی
نا شناس غمِ وفا ہے تو حیف تجھ کو طلب نہ راس آئی

9

راہِ خوباں میں بیٹھ جا عاشق ہو نہ تو ان کے در سے روگرداں
ان سے وابستہ تیری ہر تقدیر اور وہی تیرے درد کا درماں
ان کے در کے بغیر ناممکن عرصۂ زندگی میں امن و اماں

10

راہ خوباں میں بیٹھ جا عاشق ہوں گے وہ تیرے حال کے پرساں
ان کا یمن قدم ہی رہبر ہے ان کی چشم کرم ہے فیض رساں

11

منزل عشق ہے درِ محبوب سجدہ ریزی کرو عقیدت سے
کیا عجب تم پہ مہرباں ہو جائے اور نوازے تمہیں محبت سے
کاش مل جائے خوب وزشت کاراز تمہیں اس رہبر حقیقت سے

12

جسم کو پارہ پارہ کر لینا جب نظر آئے صورتِ خوباں
سرخرو تو بھی ہو محبت میں تجھے حاصل ہو قربِ محبوباں

13

تجھے اس راہ میں ملیں گے بہت ساقیانِ حسین سبو بردوش
سر کی بازی لگا کے حاصل کر جام مے جو کرے تجھے مدہوش

14

تم سر راہِ انتظار کرو خود پلائیں گے وہ شراب تمہیں
شرط یہ ہے نہ ہو کسی عنوان ان حسینوں سے اجتناب تمہیں

وائي

یہ بات کبھی نہ بھولوں، سندر ہیں میرے ساجن
جب پیار کسی سے کرنا، بپتائوں سے مت ڈرنا
پریتم کے دوارے جا کر، سو بار چڑھوں سولی پر
سکھ پائے میرا جیون، سندر ہیں میرے ساجن
جو پریت کی ریت کو مانے، بھید اس کا کوئی نہ جانے
ٹکڑے ٹکڑے ہو جائوں، پھر بھی نا بھید بتائوں
میں ہاروں اپنا تن من، سندر ہیں میرے ساجن

آٹھویں داستان

1

ٹھیس اپنے وقار کو نہ لگا ان کے کوچے میں بار بار نہ جا
رہگزاروں میں تو دیے نہ جلا راہ گیروں کو داغِ دل نہ دکھا
لب خاموش و حیرت ابدی راز کیف و مسرّت ابدی

2

ذکر بے سود ہے دوائوں کا چارہ سازوں کی فکر ہے بے جا
چارہ سازوں کی فکر ہے اس کو جس کے دل کو کسی کا درد ملا

3

جس کے دل کو کسی کا درد ملا اس کی حالت ہوئی نحیف و نزار
شہد سے بڑھ کے ہے مگر اے دوست درد مندوں کو تلخیٔ آزار

4

بس و ہی چارہ سازِ قلب و نظر جس نے بخشی ہے درد کی اکسیر
تیری ہر بات اے مرے محبوب میرے حق میں نوشتۂ تقدیر
جب بھی کوئی امید بر آئی تیرے بیمار نے شفا پائی

5

مثلِ ناقہ بقدرِ تشنہ لبی تم بھی پی لو کہ خود پلاتا ہے
فیض اس کی سبیل سے ورنہ کون اپنی رضا سے پاتا ہے

6

جو رموز نفی نہیں سمجھا رازِ اثبات کیا وہ سمجھے گا
وہ تو اظہر ہے پر جو ناداں ہے غیب کی بات کیا وہ سمجھے گا

7

مہرباں ہو وہ جوہری جن پر
چمک اٹھیں وہ مثلِ لعل و گہر

8

اپنے کوزے کو کوزہ گر جیسے آزماتا ہے دل کو وہ دلبر
جو بھی اس نے عطا کیا مجھ کو میں نے سمجھا اسی کو شیر و شکر

9

ظاہرا بے رخی ہوئی تو کیا رشتۂ روح ٹوٹ سکتا ہے!
زیست مشقِ ستم سہی لیکن دامنِ صبر چھوٹ سکتا ہے!

10

گر وہ ترکِ تعلقات کرے پاس تم کو رہے محبت کا
جوڑ لو اس کو رشتۂ جاں سے ٹوٹ جائے جو تار الفت کا
وہ اذیت بھی دے اگر کوئی تم سمجھنا پیام راحت کا

11

صبر کیا ہے دلیلِ رحمت ہے قہر آلودگی قیامت ہے
بھر لے دامن میں عجز کی دولت عجز ہی جوہر شرافت ہے

12

اپنی نظریں جھکاکے دیکھ ذرا قہر آلودگی قیامت ہے
جادہ پیمائے معرفت کے لئے عجز ہی پاے استقامت ہے
بردباری ہے مشک کی مانند یہ ضمیرِ بشر کی نکہت ہے

13

ذائقہ شیوۂ تحمل کا خوگرِ آہ و نالہ چکھ نہ سکا
متکبر شکست سے دو چار منکسر فاتحِ ضمیر رہا

14

عجز کو جس نے اختیار کیا اس کی گذری سدا فراغت میں
شکوہ سنج غمِ جہاں کو مگر ہاتھ آیا نہ کچھ شکایت سے

15

گر کسی نے برا کہا بھی تمہیں تم رہو اپنی خاموشی میں مگن
فتنہ پرور فگندہ سر آخر کینہ پرور سدا تہی دامن

16

گر کسی نے برا کہا بھی تمہیں تم رہو اپنی خامشی میں مگن
قول “سید” کا جس کو یاد رہا بن گیا موم اس کا تن اور من

17

بات کہنے سے کچھ نہیں حاصل دل میں رکھنا ہی اس کا اچھا ہے
جس قدر بھی کمان کھینچو گے اتنا ہی ٹوٹنے کا خطرہ ہے

18

شکوے سن کر بھی تو رہے خاموش تیرے ہادی کی یہ ہدایت ہے
سرخروئی ہوئی اسے حاصل اپنے پر آپ جس کو قدرت ہے

19

لاکھ شکوے ہوں تم سے دنیا کو دل میں رکھو زباں سے کچھ نہ کہو
اہل دنیا سے کیا تمہیں امید کچھ بھی تم سے کہیں خموش رہو

20

کچھ کہے کوئی تم سے یا نہ کہے تم ادب کوش ادب نواز رہو
بس اسی میں ہے شان استغنا آپ ہی اپنا احترام کرو
دوسروں کی سند سے کیا حاصل خود نگہدار و خود شناس بنو

21

چشمہ زندگی نے یاد کیا ختم ہونے لگی ہے تیرہ شبی
جا کے ساحل پہ ڈال دے ڈیرا تاکہ باقی رہے نہ تشنہ لبی

22

جن کو صحبت ہے باعثِ آزار ان کی محفل میں تو نہ ہو شامل
ان سے حاصل نہیں کچھ اس کے سوا کہ تجھے کچھ نہ ہو سکے حاصل

23

عمر بھر میں انہیں کے پاس رہو جن کی صحبت میں عین راحت ہے
خیمہ زن ہو وہاں تنِ خاکی سایہ افگن جہاں محبت ہے

وائي

ساجن پہ جائوں واری، میں ہوں برھا کی ماری
پریتم کے دوارے ہوں گے، کتنے ہی پریم پجاری
میں ہوں برھا کی ماری، تم سندر ہو ساجن
کہتی ہے دنیا ساری، میں ہوں برھا کی ماری
میں نینوں سے لگائوں، چرنوں کی دھول تمہاری
میں ہوں برھا کی ماری، کہتا ہے “لطیف” کوی یہ
پریتم کی شوبھا نیاری، میں ہوں برھا کی ماری

سر کھمبات

پہلی داستان

1

مکمل اس کا فیضِ عام سب پر مگر ہوتی رہی مجھ سے برائی
وہ شرمندہ کرے آکر نہ مجھ کو ہمیشہ جس نے کی مجھ سے بھلائی

2

صبحِ روشن ہے تیری پیشانی اور دل چشمۂ محبت ہے
تیرے آنے کی منتظر ہوں میں تو جو آئے تو عین راحت ہے
ہیچ ہے تیرے سامنے خورشید مہ و انجم کی کیا حقیقت ہے

3

میرے محبوب کو ذرا اے چاند مجھ پہ بیتی ہے جو بتا دینا
جو ٹپکتا ہے دیدۂ تر سے جا کے پیغام وہ سنا دینا
کاش خلوت میں ایک بارِ آئے اور نہ پھر چھوڑ کر مجھے جائے

4

پیار سے مجھ کو دیکھنے والے ہر شکایت تیری گوارا ہے
میری خلوت میں آکے جا نہ کہیں تو مری روح کا سہارا ہے

5

اے مری ناقۂ صبا رفتار تجھ کو در پیش ہے طویل سفر
چاندنی رات اور بسیط فضا کتنی پرکیف ہے یہ راہگذر
مڑ کے پیچھے نہ دیکھنا ہر گز سوئے محبوب گامزن ہو کر
مجھ کو جانا ہے اس کے پاس ابھی حرف آئے نہ عہد و پیماں پر

6

چاندنی رات راستہ ہموار زورِ ہمت ہے اب فقط درکار
اے مری راز دار تیز قدم ہو کسی پر نہ راز کا اظہار
سوئے محبوب گامزن ہو جا اے مری ناقۂ صبا رفتار

7

کیف پرور ہے یہ شبِ مہتاب اور پھر تیری راہ بھی ہموار
کوئی تیرے سوا نہیں ہمدم اولیں عشق، دور منزلِ یار
دیدہ دل میں جس کے جلوے ہیں اس کی فرقت ہے باعثِ آزار
اس قدر تیز چل کہ لوٹ آئیں رونما جب ہوں صبح کے آثار
کوئی تیرے سوا نہیں ہمدم اے مری ناقۂ صبا رفتار

8

آج پھر چودھویں کا چاند ابھرا منتظر ہوں کسی کے آنے کی
دل مسرت سے لہلہاتا ہے کوئی پروا نہیں زمانے کی

9

آج پھر چودھویں کا چاند ابھرا شام سے انتظار تھا اس کا
صبحِ نو کی نوید دینے کو وہ حسیں دوست میرے گھر آیا

10

محرمیّت صلائے عام نہیں درمیاں ایک حدِّ فاصل ہے
لوگ جس کو ہلال کہتے ہیں درحقیقت وہ ماہِ کامل ہے

11

کہاں وہ اور کہاں تو! ماہِ کامل ترے حق میں قیامت اس کا جلوہ
کہ حسنِ جاودانی کے مقابل ٹھہر سکتا نہیں حسنِ دو روزہ
ترے اس عمر بھر کے ماحصل سے کہیں بڑھ کر ہے اس کا ایک لمحہ

12

ضیائیں لاکھ ہوں شمس و قمر کی
بغیر اس کے وہی تیرہ شبی ہے

13

نہیں اے چاند تو اس کے برابر کہاں تو اور کہاں محبوب میرا
دوامِ حسن اس کا روئے روشن رہینِ منتِ شب نور تیرا

14

یہ تیری روشنی اے چاند مجھ کو نہ ہونے دیگی حاصل قربِ دلبر
ہمیں تو راس آتی ہیں وہ راتیں ملیں ہم جن کی تاریکی میں چھپ کر

15

مرے دل کو تھی امیدِ ملاقات کیا تھا جسم کو اپنے معطّر
مگر یہ انتظارِ شوقِ پیہم کہ خوشبو اُڑ گئی کافور بن کر

16

برا ہو اے مہ شب تاب تیرا نہ دیکھوں شام ہی سے تیری صورت
ملوں محبوب سے تاریکیوں میں میسر ہو مجھے قربت ہی قربت

17

مرے محبوب کو دیکھا ہے تو نے کہاں وہ اور کہاں تو! ماہِ کامل
بہت دیکھے ہیں مدو جزر تیرے تغیر ہے تری فطرت میں داخل
تو اک شعلہ دہن اور شعلہ رو ہے مگر نظَّارہ اس کا سیر حاصل

18

کچھ اس انداز سے ہر سمت دیکھا خمار آلودہ آنکھ اس نے اٹھا کر
مہ و خورشید و انجم تھر تھرائے ہوئی حیرت سی طاری کہکشاں پر
رخِ جاناں کے جلوئوں کے مقابل مری نظروں میں ہے ہر جلوہ کمتر

19

جب آدھی رات کو اس نے دکھایا نقابِ رخ اٹھا کر اپنا چہرہ
قمر نے کہکشاں کو ساتھ لے کر لگایا نیلگوں دریا میں غوطہ

20

رخِ محبوب کی صباحت دیکھ جیسے روشن ہو صبح کا تارا

21

جدھر ہے نور افشاں وہ ستارہ
ادھر محبوب میرا جلوہ گر ہے
نہیں اس کی رواداری میں تلخی
وہ روحِ انگبیں و نیشکر ہے
ستاروں کی طرح ہیں خال اس کے
رخِ تابندہ مانندِ سحر ہے
بغیر اس کے مری شب زندہ داری
فقط بے کیفیِ۔ٔ قلب و نظر ہے

وائي

سکھی میں جائوں اس کے دوار
جی کو پیا بن چین نہ آئے
کب تک بیٹھی سوگ منائوں
تڑپے آٹھ پہر گھبرائے
جی کو پیا بن چین نہ آئے
بیکل ہیں اب تیرے میت
سینے میں گھٹ کر رہ جائے
جی کو پیا بن چین نہ آئے
کالے کوسوں اس کا دیس
کوئی کیسے پیدل جائے
جی کو پیا بن چین نہ آئے
ابلاکھا ہے من میں یہی
جا کر اس کا دیس بسائے
جی کو پیا بن چین نہ آئے

وائي

میں یاد جنہیں کرتی تھی
میرے آنگن میں آئے
پھولوں کی مہک سانسوں میں
خوشبو میں جسم بسائے
میرے آنگن میں آئے
میں ہوں اک پریم پجارن
چھب پریتم ہی کی بھائے
میرے آنگن میں آئے
کتنے سندر ہیں ساجن
یہ بات اب کون بتائے
میرے آنگن میں آئے
کہتا ہے “لطیف” کوی یہ
پریتم کی پریت سُہائے
میرے آنگن میں آئے

وائي

میں اپنے پیا کو منائوں
اے رات اگر تو ٹھہرے
اس اندھیاری میں جل کر
جیون کی جوت جگائوں
اے رات اگر تو ٹھہرے
دھونی پیارے پریتم کی
تن من میں آج رمائوں
اے رات اگر تو ٹھہرے
دکھ میرا کوئی نہ جانے
کیا دنیا کو سمجھائوں
اے رات اگر تو ٹھہرے
کوئی کھوٹ رہے نا مجھ میں
اس کی داسی بن جائوں
اے رات اگر تو ٹھہرے
کہتا ہے “لطیف” کوی یہ
جیتے جی پریت نبھائوں
اے رات اگر تو ٹھہرے
ہے مرگھ ترشنا جیون
میں پریت سے پیاس بجھائوں
اے رات اگر تو ٹھہرے
آشا کے سپن سہانے
بیاکل من کو بہلائوں
اے رات اگر تو ٹھہرے
اس پاپ کی نگری سے میں
اب پیا ملن کو جائوں
اے رات اگر تو ٹھہرے

دوسری داستان

1

فلک پر فروزاں ہو اے چاندجب تو
نظر ڈالنا پہلے اس مہ لقا پر
بتانا اسے حال ہم عاجزوں کا
یہ کہنا کہ جیتے ہیں تیری رضا پر
نہیں جسم و جاں میں وہ تاب و تواں اب
مگر پھر بھی قائم ہیں عہدِ وفا پر
تجھے بھیجتے ہیں سلامِ محبت
نگاہیں جمائیں ہیں حسن رجا پر

2

گذر میرے محبوب کے بام و در سے
جو محرم مرے شوقِ بے تاب کا ہے
سنا اس کو اے چاند پیغام میرا
کہ تو واقفِ حال اہلِ وفا ہے
نہیںکوئی دنیا میں میرا سہارا
جدائی کے ماروں کا تو آسرا ہے

3

ہکتی ہوئی زلفِ خواب شبستان
فضائیں خنک، بوئے کافور پرّاں
یہ خوشبو میں لپٹا شبابِ زمستاں
سماں کیا سہانا ہے اے ماہِ تاباں
یہاں درد رنجوری و رنج دوری
وہاں اضطراب اور پہلوے جاناں

4

کوئی ناقۂ تیز رفتار یا رب
کہ ہو اس کے در تک میسر رسائی
مجھے اس سے محروم رکھے گی کب تک
یہ دشواریٔ راہ و بے دست و پائی

5

مجھے لذتِ قرب سے آشنا کر
تری انجمن سے بہت دور ہوں میں
غمِ ہجر کا کوئی آخر مداوا
غمِ ہجر سے سخت رنجور ہوں میں

6

تڑپتے ہیں دل میں رموزِ معانی
کہاں ہے مرا رازدارِ محبت
مری خانہ ویرانیوں کی قسم ہے
کبھی آ بھی جا اے بہارِ محبت

7

ادھر اس کی ضد کا یہ عالم کہ توبہ
ادھر پے بہ پے شورشِ باد و باراں
اِدھر سینے میںدل ٹھہرتا نہیں ہے
ادھر ہے کجاوے سے ناقہ گریزاں
جدھر ہمسفر ہو چکے ہیں روانہ
ادھرتک رہی ہے بصد یاس و حرماں

8

کوئی ناقہ نہ راہوار کوئی
کیسے چل کر تمہارے پاس آئوں
کوئی صورت کہ میں ترے در تک
رات ہی رات میں پہنچ جائوں

9

اے مری ناقۂ صبا رفتار
مجھ کو پہنچا دے ان کے پاس ابھی
ورنہ تجھ کو بھی راکھ کر دے گی
لب پہ آتے ہی آہِ نیم شبی

10

دوسروں کے لئے خس و خاشاک
اور کھلاتا رہوں تجھے چندن
اے مری ناقۂ صبا رفتار
دور ہے میرے دوست کا مسکن
رات ہی رات میں وہاں پہنچ
ہے جہاں روے یار جلوہ فگن

11

اب تامل نہ ہو ذرا اس میں
دیکھ اے میری ناقۂ غمخوار
سامنے ہے رہِ دیارِ حبیب
رات پر کیف راستہ ہموار

12

تجھ کو جس خاندان سے نسبت ہے
فرض اس خاندان کی عزت ہے
فرق آئے نہ چال میں تیری
تو وفا کیش و نیک طینت ہے

13

میں نے اس کو درخت سے باندھا
تاکہ یہ اسکی کونپلیں کھائے
حیف یہ خوگر خس و خاشاک
خس و خاشاک ہی اسے بھائے
اس کی ضد کا کوئی ٹھکانا ہے
ایسے ضدی کو کون سمجھائے

14

حرف آئے نہ باد پائی پر
اے مری ناقۂ صبا رفتار
چل! کہ اس کارواں سے مل جائیں
میرا محبوب جس کا ہے سالار

15

اے مری ناقۂ صبا رفتار
بیش قیمت مہار لائوں گی
زر و لعل و گہر کے ہاروں سے
تیری گردن کو میں سجائوں گی
ڈالیاں نرم نرم، مہندی کی
اور چند تجھے کھلائوں گی
شرط یہ ہے کہ پاس ساجن کے
رات ہی رات میں پہنچ جائے

16

یہ مری رازدار رنج والم
میری خوددار و خودنگر ناقہ
جو نہ کھاتی ہے اور نہ پیتی ہے
اور جس کو پسند ہے فاقہ

17

جا رہی ہے وہ جانب محبوب
خوگر رنج و فقر و فاقہ ہے
سر کی پروا نہ تن کا ہوش اسے
میری ناقہ عجیب ناقہ ہے

18

ساتھیوں کا یہ مجمع خورسند
اور یہ شاخہائے خوشبودار
اپنے گلّے میں خرم و شاداں
اور دل میں وہی غم دلدار
ریت پر نقشِ پا نہ چھوڑے گی
یہ مری ناقۂ صبا رفتار
ماں! تجھے بد گمانیاں کیوں ہیں
خوف افشائے راز ہے بیکار

19

بور ہو یا درخت کی کونپل
اب کوئی چیز یہ نہ کھائے گا
میرے محبوب کے تحائف کو
اتنی جلدی یہ بھول جائے گا؟
رات کھاتا رہا جہاں چندن
وہ چمن اس کو یاد آئے گا
یہ مرا اشترِ وفا طینت
گن اسی باغبان کے گائے گا

20

کیا ہوا آج میری ناقہ کو
اپنی حالت یہ کیا بنائی ہے
شاید اس نے روا روی میں کہیں
کوئی زہریلی چیز کھائی ہے

21

کھیت کی لہلہاتی بیلوں میں
اس نے دانستہ اپنا منہ ڈالا
مشتعل ہو کے آگئے دہقان
اور وہ ڈرپورک بھاگ بھی نہ سکا
آخر کار اُشتر نادان
اپنی وارفتگی کو بھول گیا

22

شہد جس کو سمجھ رہا ہے تو
درحقیقت وہ بیل ہے مسموم
کہیں ایسا نہ ہو اسے کھا کر
تجھ کو رہنا پڑے سدا مغموم

23

ناقۂ دل کو ہے یہی درکار
کوئی مضبوط سی بنائو مہار
لہلہاتی ہیں ہر طرف بیلیں
کتنی خوش رنگ کیسی خوشبودار
لگ گئی اس کو ان کی چاٹ اگر
ہاتھ آئے گی پھر نہ یہ زنہار

24

ناقۂ بے مہار پر عائد
لاکھ پابندیاں ہوں سب بیکار
ایسی بیلوں کی اس کو عادت ہے
زہر جن کا ہے باعث آزار

25

اس سے پہلے کہ اے مری ناقہ!
میرے ہاتھوں میں تازیانہ ہو
گامزن ہو مرے اشارے پر
تو رہ راست پر روانہ ہو

26

یہی “کھمبات” کا جزیرہ ہے
ڈالو چاروں طرف نظر، دیکھو
ہر طرف دعوت تماشا ہے
حسنِ مطلق کو جلوہ گر دیکھو

27

دیکھ اے میری ناقۂ ناداں
مجھے تجھ سے بڑی شکایت ہے
ہر طرف ڈالیاں ہیں چندن کی
“آک” سے کیوں تجھے یہ رغبت ہے
جس نے اونٹوں کو کردیا مسموم
تجھ کو اس بیل سے محبت ہے!

28

میری ناقہ ہے تند و شوخ و شریر
دوستو کردو اس کو پا بہ رسن
اسے کھانے کو جب بھی دیتی ہوں
ہوتی ہے اس کو دیکھ کربدظن
لاد دو اس پہ کوئی بار گراں
ورنہ اس کا یہی رہے گا چلن

29

سینہ زنجیر سے جکڑ ڈالو
اور پیرں میں رسیاں باندھو
میرے قابو میں یہ نہیںاے ماں!
دوں کہاں سے میں تازہ پھل اس کو
بات کس کی بھلا وہ مانے گی
اپنے آقا کا جس کو پاس نہ ہو

30

لگ گئی کس کی بددعا تجھ کو
اے مری ناقۂ سبک ساماں
بند آنکھیں کئے ہوئے اپنی
کیوں ہے کولہو کے گرد تو گرداں

31

پابہ زنجیر کر دیا میں نے
پھر بھی مجھ سے گریز پاہی رہی
توڑ کر قید و بند کو ناقہ
سوئے محبوب تیز پاہی رہی

32

میں نے کیں لاکھ کوششیں لیکن
اس نے چھوڑی نہ اپنی خود رائی
ہوگئے میرے سب جتن بیکار
جانے کس دلربا کی یاد آئی

33

سخت نفرت ہے اس کو چندن سے
اور بیکار ہیں گلِ مشکیں
اس کو بھاتے ہیں جنگلی پودے
عود و عنبر سے کوئی انس نہیں

34

میں تو حیراں ہوں کہ یہ ناقہ
صاف پانی پئے نہ چند ن کھائے
جنگلی بوٹیاں اگر مل جائیں
عود و عنبرکے بھی قریب نہ جائے

35

دل نشیں خوشہ ہائے رنگا رنگ
اور وہ شاخہائے بیش بہا
ایک پتا بھی جس کا ہو انمول
کیا ہو اندازہ اس کی قیمت کا
جا کے اس باغ میں میری ناقہ!
کتنا نقصان ہائے تو نے کیا

36

دولت بے شمار کے بدلے
مدعا میں نے اپنا پایا ہے
اشترِ لاجواب و لاثانی
ہاتھ خوش قسمتی سے آیا ہے

37

یہ کجاوے کو جب اٹھائے گا
رشک بادِ صبا کو آئے گا
راز دارانہ مخلصانہ مجھے
اپنے محبوب سے ملائے گا
کوئی اس کی نہیں مثال کہیں
بھید کیا اس کا کوئی پائے گا

38

اس کو مرغوب الائچی ہے بہت
کتنا خوش ہو کے ان کو کھاتا ہے
اور پھر مجھ کو آن واحد میں
جا کے محبوب سے ملاتا ہے

وائي

ماں! بھید ہے یہ مرے من کا
رکھتی ہوں سجن سے آشائیں
تڑپائین جو مجھ برھن کو
راتیں نہ وہ لوٹ کے پھر آئیں
رکھتی ہوں سجن سے آشائیں
جو اپنے پیا کے ساتھ کٹیں
اے کاش مجھے پھر مل جائیں
رکھتی ہوں سجن سے آشائیں
جھانکوں میں جھروکوں سے من کے
چھب اپنی پریتم دکھلائیں
رکھتی ہوں سجن سے آشائیں
کس طرح “لطیف” کی رات کٹے
وہ یاد آکر جب تڑپائیں
رکھتی ہوں سجن سے آشائیں

وائي

کب آئے سندیسوں پر ساجن
کب آشائوں سے ملے پیا
راتوں کو لہو کے چھینٹوں سے
نینوں میں من کی جوت جگا
کب آشائوں سے ملے پیا
دکھلائی نہ جس نے پیٹھ کبھی
رن برھا کا اس نے جیتا
کب آشائوں سے ملے پیا
ساجن ہوں جس کے پردیس
وہ کیوں نہ سنائے نیر کتھا
کب آشائوں سے ملے پیا

وائي

دھتکارو یا للکارو
آئی ہوں سرن تمہاری
تم سیدھے منہ بھی نہ بولو
میں جائوں واری واری
آئی ہوں سرن تمہاری
جگ چھان لیا ہے میں نے
ہے تو ہی تو گردھاری
آئی ہوں سرن تمہاری

سر سورٹھ

پہلی داستان

1

چنگ آراستہ کئے “چارن‘
منتظر تھا کہ رائے “ڈیاچ‘ آئے
اور یہ اس کے موہ لینے کو
راگ عہدِ الست کا گائے

2

مانگتا کب ہے درہم و دینار
اس کا مطلوب ہے سر سردار
دور ہے دیس اس مغنّی کا
آ رہی ہے صدائے پراسرار
کاٹ لے نے نواز اگر چاہے
اب تو سر سے رہا نہیں سروکا

3

مجھ غریب الدیار سائل کو
تیرے نام و نشاں سے کیا نسبت
میں کہاں اور کہاں ترا رتبہ
خاک کو آسمان سے کیا نسبت
پھر بھی کچھ عرض حال کرنا ہے
تجھ سے سر کا سوال کرنا ہے

4

سن لے “سورٹھہ‘ کے خوبرو سرتاج
اک انوکھا سوال لایا ہوں
نرغۂ دشمناں میں ہوں لیکن
تیرا سر مانگنے کو آیا ہوں
جلد سائل کو سرخرو کردے
ورنہ محروم آرزو کردے

5

سردیاں قہر ہیں مرے نزدیک
گرمیاں بھی نہیں ہیں مجھ کو ٹھیک
سن لے میرے رباب کی فریاد
اور دے دے جو مانگتا ہوں بھیک
کچھ تو آجائے میری جھولی میں
ڈال دے منہ سے پان ہی کی پیک

6

اپنے دریوزہ گر مغنّی کو
جسم اور جان کی اماں دینا
والیِ جنّت عدن مجھ کو
نار دوزخ سے تو بچا لینا
دور سے تیرے پاس آیا ہوں
سرخروئی کی آس لایا ہوں

7

اضطراب آفریں صدائوں میں
آرزوئے قرار لایا ہوں
چھوڑ کر میں ہر ایک در پیارے
آج تیرے حضور آیا ہوں

8

بھاڑ میں جائیں اور دروازے
لو لگائے ہوں میں ترے در سے
میرے پیارے “کماچ‘ کا آہنگ
تیرے دیوار و در سے جب بر سے
کاش تو بھی ہو گوش بر آواز
ہو عیاں راز ساز مضطر سے

9

پیاری ’سورٹھ‘کے خوبرو سرتاج
میری جھولی کی بھی رہے کچھ لاج
چھوڑ کر میں ہر ایک دروازہ
سر جھکائے ہوں تیرے در پر آج

وائي

راج پاٹ کو بھینٹ چڑھایا
’ڈیاچ‘ نے سیس کٹایا
راجہ نے ہر رانی چھوڑی
سارا راج گنوایا
’ڈیاچ‘ نے سیس کٹایا
ہاتھ میں جب ’کماچ‘ لئے
پردیسی ’چارن‘ آیا
ایسا رنگ جمایا
’ڈیاچ‘ نے سیس کٹایا
دور دور تک پھیل گیا
دیالو راجہ کا نام
بن گیا اس پریمی کے ہاتھوں
’بیجل‘ کا بھی کام
سب کچھ دان میں پایا
’ڈیاچ‘ نے سیس کٹایا

دوسری داستان

1

دور سے ’جونا گڑھ‘ میں آیا ہے
اک عجیب و غریب موسیقار
مضطرب شہر ہوگیا سارا
سن کے اس کے رباب کی جھنکار
ہوگئی سب پہ بیخودی طاری
نغمے کی لے سے ہوگئے سرشار
کون جانے وہ ایک قاتل ہے
صرف راجا کے سر کا سائل ہے

2

گونج اٹھا ہے نشہ آور ساز
دیکھ ’بیجل‘ ہے زمزمہ پرداز
خود فراموش ہو گیا راجا
سن کے سائل کی سرمدی آواز
اور آخر طلب کیا اس کو
خلوتِ خاص میں بصد اعزاز
مٹ گیا فرق ما و تو یکسر
سوزِ نغمہ ہوا اثر انداز
بھید کیا تھا کسی کو کیا معلوم
کس طرح دونوں ہوگئے ہمراز

3

رنگ محلوں سے آگیا راجا
سن کے اس نے نواز کا نغمہ
خلوت خاص میں طلب کر کے
آخر کار اس نے حکم دیا
اسپ تازی و زینِ پرجوہر
میری جانب سے دو اسے تحفہ
کیا خبر تھی کہ ساز گار نہیں
کوئی سوغات اس کو سر کے سوا

4

ہو کے خوش نے نواز ’چارن‘ کو
بخشے راجہ نے قیمتی انعام
لیکن اس نے کہا کہ اے سلطان
مجھ کو ہے صرف تیرے سر سے کام
مال و زر کی کمی نہیں مجھ کو
ان سے کوئی خوشی نہیں مجھ کو

5

تھیلیوں کی نہیں مجھے حاجت
ہوں مبارک یہ تجھ کو اے سردار
اپنے اس مال و زر کو واپس
مجھ کو ہے صرف تیرا سر درکار

6

میں فقط تیرے سر کا طالب ہوں
ہاتھی گھوڑے مجھے نہیں درکار
مانگتے ہیں جو ہاتھ پھیلا کر
وہ کوئی اور ہوں گے موسیقار

7

فطرۃٔ تو ہے ایک موسیقار
تو نے پایا ہے فن وراثت میں
مائل ارتعاش کردے آج
کوئی نغمہ مری سماعت میں

8

گم ہوں اس سوچ میں کہ اے ’بیجل‘
کیا ہے یہ ساز اور یہ آواز
کس لئے اتنی دور سے آیا
کاش معلوم ہو مجھے یہ راز

9

دور سے تیرے پاس آیا ہوں
اب نہیں واپسی کے امکانات
مال و زر کی ہوس نہیں مجھ کو
اور ہی کچھ ہیں میرے احساسات
پیاری ’سورٹھ‘ کے خوبرو سرتاج
کاش سمجھے تو میرے دل کی بات

10

وہ نہیں ملک و مال کا سائل
اس کے دل میں ہے اور ہی کچھ بات
چاہتا ہے ’ڈیاچ‘ سے کرنا
خلوتِ خاص میں بسر اوقات

11

کیا امیر اور کیا غریب یہاں
وہ تو سب کا ہی جان لیوا ہے
اس کی زد سے بچے کوئی کب تک
صبح و شام اس کو سر کا سودا ہے

12

آگئے جب گرفت میں تیری
ہوگئے خاک اہلِ تخت و تاج
کاش پھر آئے تو نہ اے سائل
تیری آمد ہے یا اجل کا راج

وائي

اے البیلے چارن تو نے کیسا راگ سنایا
مجھ کو مست بنایا
جو تو میرا سیس نہ مانگے دے دوں لاکھوں دان
اے البیلے چارن تو نے میرا من برمایا
مجھ کو مست بنایا
کہتا ہے یہ ’لطیف‘ ہمیشہ دیکھو ںتیری اور
اے البیلا چارن تو نے اپنا رنگ جمایا
مجھ کو مست بنایا

تیسری داستان

1

صبحدم باکمال ’بیجل‘ نے
جانے کس دھن میں راگ اک گایا
جب سنا کاخ و کو میں راجہ نے
اس کو یہ راگ اس قدر بھایا
بے حجابانہ اس مغنی کو
شوق سے اپنے پاس بلوایا
بولا اے میرے اجنبی مہماں
ایک کیا تجھ پہ لاکھ سر قرباں

2

بیٹھ ڈولی میں اور اوپر چل
صبحدم یہ پیام آیا ہے
تجھ کو اونچے محل میں راجہ نے
دیکھ کس شوق سے بلایا ہے
عین ممکن ہے وہ کرم کردے
آپ ہی اپنا سر قلم کر دے

3

جا رہا ہے محل میں وہ سائل
چھیڑنے ہی کو ہے پھر اپنا ساز
ڈر ہے کردے نہ بام و در مسمار
اس کے نغموں کا فتنہ زا اعجاز
سر اٹھائے نہ شور و شر بن کر
دفعتاً سحر آفریں آواز
مٹ ہی جائے گا شہر جونا گڑھ
اس کو ہونے دو زمزمہ پرداز
چال ایسی چالے گا وہ ’بیجل‘
سر ہی لے کر ٹلے گا وہ ’بیجل

4

درمیاں سائل اور سخی کے ہے
اور کیا چیز ماورائے ساز
گونجتی ہے جو تار میں اکثر
ان کی روحوں میں ہے وہی آواز
کہہ رہا ہے کوئی سلام تجھے
تو کہ سائل ہے آج اس در کا
تجھ کو کیا ہو گیا بتا ’بیجل‘
کیوں تقاضا ’ڈیاچ‘ کے سر کا
اور اگر ہے یہی ترا ارماں
تیرے ارمان پر یہ سر قرباں

5

کیسے کیسے سخی ملے مجھ کو
زخم دل کا نہ بھر سکا کوئی
چھان مارا ہے میں نے ’گربیلہ‘
سر کا وعدہ نہ کر سکا کوئی

6

سر تو اپنے ہی بس میں تھا ورنہ
اور اگر کچھ طلب کیا ہوتا
ہو کے اپنے سوال سے محروم
ہم کو بدنام کر دیا ہوتا

7

سر کو تجھ پر نثار کرتا ہوں
لے یہ ناچیز استخواں لے جا
نہیں ایفائے عہد میں تاخیر
تو جہاں چاہے اب وہاں لے جا
یہ ترے کام آسکے شاید
جان حاضر ہے جانِ جاں لے جا

8

ہو سکے کیا برابری تیری
میں کہاں اور کہاں ترا اعجاز
سر ہے حاضر کہ ہیں کہیں بہتر
میری رگ رگ سے تار ہائے ساز
اور کیا دوں میں تجھ کو نذرانہ
سن کے یہ تیری سرمدی آواز
سر مجھے بارِ دوش ہے لے جا
ہے نہیں مجھ کو یار دوش پہ ناز

9

ایک سر کیا جو لاکھ سر ہوتے
وہ بھی قربان ساز پر ہوتے
لاکھ سر دے کے اے مغنی ہم
تیرے ممنون کس قدر ہوتے

10

سر کا نذرانہ اس کو کیا دشوار
جو فدائے کمال ہو جائے
کوئی ایسی عطا ہو سائل پر
جو عدیم المثال ہو جائے

11

لاکھ مشکل سہی مگر اے ’ڈیاچ‘
وہ عطا کر جو چاہتے ہیں تار
کر چکا ہوں سوال اب سر کا
لوٹ کر جائوں گا نہ میں زنہار
دیکھنا چاہتا ہوں اے فیاض
آج میں تیرے فیض کا معیار

12

سر بھی دینا قبول تھا اس کو
بڑھ کے ’خادم‘ سے تھی سخا اس کی
پوچھتا تھا ’ڈیاچ‘ ’بیجل‘ سے
درحقیقت جو تھی رضا اس کی
نیستی ہے کہ رازِ ہستی ہے
دل کی مستی عجیب مستی ہے

13

شہر میں جب ’ڈیاچ‘ کے آیا
وہ مغنی لئے ہوئے اک چنگ
دونوں عالم تھے گوش بر آواز
ہر طرف تھی صدائے خوش آہنگ
رائے سے سر طلب کیا اس نے
دے دیا اس نے بے دریغ و درنگ
مسکراتی ہے آج اس کی ماں
ناز کرتے ہیں اس پہ نام و ننگ

وائي

سیس تو تیرا ہو چکا اے ’چارن‘ مہمان
دینا ہے کچھ اور بھی بن مکھ مانگے دان
اے چارن مہمان
’بیجل‘ اب نہ چھپائیو مجھ سے من کی بات
جونا گڑھ میں لے چلوں تجھ کو اپنے سات
واروں لاکھوں سیس میں سن کر تیری تان
اے چارن مہمان
لاج نہ جائے پریم کی چاہے سر کٹ جائے
سب کچھ تجھ پہ واروں پھر بھی چین نہ آئے
کہتا ہے جو ’لطیف‘ ہمیشہ رکھیو اس کا دھیان
اے چارن مہمان
دینا ہے کچھ اور بھی بن مکھ مانگے دان

چوتھی داستان

1

کتنی پرنور ان کی آنکھیںہیں
بام و درجن سے جگمگاتے ہیں
کون جانے کہ مصلحت کیا ہے
جویہ سائل محل میں آتے ہیں
بادشاہانِ وقت کس کے لئے
سر جھکاتے ہیں سر کٹاتے ہیں

2

تو کہ ہے سائل خجستہ قدم
تیری آمد پیام رحمت ہے
بسکہ ہوں راز داں ترے فن کا
مجھ پہ ظاہر تری حقیقت ہے
جو بھی پڑ جائے تیری جھولی میں
جانتا ہوں بہت غنیمت ہے

3

تیرا مضراب تار ساز پہ تھا
رگِ گردن پہ چل رہی تھی چھری
چھین لی سحر آفریں ہو کر
تیرے نغموں نے زندگی میری
اے مغنی مگر تری فطرت
مطمئن ہی رہی، چہ بوالعجبی

4

نغمہ زن ہے یہ تار کی آواز
یا ہے در پردہ اور کوئی راز
خود مغنی ہے صاحب اعجاز
ورنہ کس کام کے یہ تار یہ ساز

5

میرے دل میں اتر گئی ہر تان
ایک سر کیا ہزار سر قربان
لیکن ایسی عطا سے کیا حاصل
اور کچھ مانگتا مرے مہمان
بے بضاعت ہے ٹوٹنے کے بعد
آب و گل کا مجسمہ، انسان

6

جسم کے ساتھ یا جدا کرکے
بول کس طرح اپنا سر دوں میں
مجھ کو تیرا خیال ہے سائل
یوں تو دینے کو بحروبر دوں میں
میں کہاں اور کہاں ترا اعجاز
کاش ہو جائوں تیرا مونسِ راز

7

کچھ سمجھ کر ہی برمحل اس نے
چھیڑ دی اک بڑی سریلی تان
جانے کیا چاہتا تھا وہ ’چارن‘
سر کا ملنا تو تھا بہت آسان

8

تجھ پہ سب کچھ نثار اے ’جاجک‘
تیرا نغمہ عدوے حرص و آز
کاٹ لے سر کو اور خوش ہو جا
پھر نہ آنا تو اپنا لے کر ساز
پھر رہی ہے اجل تعاقب میں
کھل گیا مجھ پہ تیرے فن کا راز

9

اب یہ گردن ہے اور یہ خنجر ہے
اور ترے روبرو مرا سر ہے
جس کی خاطر سفر کیا تو نے
کوئی ایثار اس سے بڑھ کر ہے
ملک مانگا نہ مال و زر مانگا
جانے کیوں تو نے صرف سر مانگا

10

دستِ ’بیجل‘ میں اک انوکھا ساز
اور اس ساز کی عجب آواز
ہوگیا رائے ’ڈیاچ‘ پر ظاہر
سائل خوش گلو کے فن کا راز
اس کو اپنا بنا کے چین آیا
سر کی بازی لگا کے چین آیا

11

چل بسا رات وہ مہاراجہ
سوگوار اس کی راجدھانی ہے
ایک سورٹھ پہ ہی نہیں موقوف
اشکبار آج ہر جوانی ہے
جوناگڑھ میں بلا کا ماتم ہے
نوحہ خوانی ہی نوحہ خوانی ہے
جانے کیا کر گیا وہ موسیقار
خاک میں مل گیا گلِ ’گرنار‘

12

ہاتھ ملتا ہے لے کے سر ’چارن‘
کچھ نہ لیتا تو سب سے بہتر تھا
اس سخی ’ڈیاچ‘ نے دیا جو کچھ
صرف پاسنگ کے برابر تھا
لے کے آیا ہے سر کو اب واپس
حوصلہ دیکھئے تو ’بیجل‘ کا
بڑھ گیا ’ڈیاچ‘ کی سخاوت سے
اور بھی اشتیاق سائل کا

13

کہہ رہے ہیں کہ مر گئی سورٹھ
اب نہ وہ انتظار ہے نہ عذاب
سب نشیب و فراز گونج اٹھے
ہو گئے نغمہ ریز چنگ و رباب
نغمہ و حسنِ جاوداں باقی
ورنہ سب کچھ خیال ہر شے خواب

14

راگ باقی رہا نہ رنگ کوئی
’ڈیاچ‘ کے بعد مرگئی سورٹھ
اس جہانِ فریب ساماں سے
دل گرفتہ گذر گئی سورٹھ
پائے گا آکے کیا ادھر ’بیجل‘
کس کو لوٹائے گا یہ سر ’بیجل‘

وائي

تو جدا ہوگیا ہائے ہائے
کیسے تجھ کو یہ سورٹھ بھلائے
آج خاموش ہیں ساز تیرے
تو ہی ساز حقیقت بجائے
جو محبت کے نغمے سنائے
کیسے تجھ کو یہ سورٹھ بھلائے
کر گیا کیسا جادو وہ ’بیجل‘
جو سپوتوں کے بھی ہوش اُڑائے
کون تھا جو ترا سر کٹائے
کیسے تجھ کو یہ سورٹھ بھلائے
چھاتیاں کوٹتی ہیں اب اپنی
کون سکھیوں کو قابو میں لائے
پیار سے انکے جی کو لبھائے
کیسے تجھ کو یہ سورٹھ بھلائے

سر آسا

پہلی داستان

1

ابتدا ہے نہ انتہا کوئی
کیا لگائے ترا پتا کوئی
بے شریک و عدیل و بے ہمتا
تجھ سا پایا نہ دوسرا کوئی

2

خواہش وصل جان ہستی ہے
نہ خودی ہے نہ خود پرستی ہے
روئے جاناں سے مثلِ پرتو گل
عالم رنگ و بو میں مستی ہے
صد صنم خانۂ خیال اب تک
سجدہ گاہ فریب ہستی ہے
پھر بھی حسن و جمال سے ہر سو
اس کی وحدانیت برستی ہے
نظر مشرکانہ کیا جانے
زندگی جلوۂ الستی ہے

3

خود کو سمجھا ہے شرک سے خالی
اور پھر بھی یہ خود پرستی ہے
کچھ خبر بھی ہے تجھ کو اے ناداں
اس کی ہستی سے تیری ہستی ہے
اہلِ عرفان کا ہر نفس غافل
محرم جلوۂ الستی ہے

4

عبد و معبود کے تعلق میں
ابتداء ہے نہ انتہا کوئی
وہ ہمیشہ کو گم ہوا آخر
کر سکا اس کی جو رضا جوئی

5

کرئی تکریم ہے نہ اب تعظیم
وہ کہاں اور کہاں جبیں سائی
عارفوں نے وہ جلوہ گاہِ جمال
ماورائے دل و نظر پائی

6

میں ترا عبد ہوں مرے معبود
شرک و الحاد سے مجھے کیا کام
خلش انگیز آرزو تیری
میرے قلب و نظر میں صبح وشام

7

تجھ میں جب تک ہے ذوق خود بینی
تیرا شوقِ نماز بے توقیر
بھول جا اپنے آپ کو پہلے
زیب دے گی زباں کو پھر تکبیر

8

وہ وظیفے نہ وہ نمازیں ہیں
خود فراموش سی طبیعت ہے
جب سے دل پر ہے عشق کی یورش
کتنی بے کیف ہر عبادت ہے

9

گر نہیں دل میں شوقِ وارفتہ
تیرے کس کام یہ جبیں سائی
کیا کسی نے کبھی شرر کے بغیر
صرف پھونکوں سے آگ بھڑکائی

10

بانی۔ٔ جلوہ زار ہست و بود
اس کو شاہد کہوں میں یا مشہود
چشم خود بیں حجاب ہے ورنہ
وہ ہے ہر ایک شکل میں موجود
اس کا عرفاں سہل ہو جائے
فہم و ادراک ہوں اگر مفقود
بے خودی کے بغیر ناممکن
بختِ بیدار و طالع مسعود
ماورائے خرد ازل سے ہے
نوع انسان کی منزلِ مقصود

وائي

موہے اکیلے چین نہ آئے
برھن رین نہ کاٹی جائے
برھا کے دکھ کیسے جھیلے
کوئی کب تک نیر بہائے
برھن رین نہ کاٹی جائے
کس پربت چت چور چڑھے ہیں
مجھ کو کوئی راہ سجھائے
برھن رین نہ کاٹی جائے
انجانے سے آس نہ ٹوٹے
جیون جب تک بھی بھٹکائے
برھن رین نہ کاٹی جائے
من میتوں کی یاد ہی من میں
پریت ملن کی آس جگائے
برھن رین نہ کاٹی جائے

دوسری داستان

1

یہی بہتر نکال دو آنکھیں
نذر زاغ و زغن کروں آنکھیں
تاکہ وقت سحر نہ دیکھ سکیں
جلوۂ یارِ پرفسوں آنکھیں
تابہ حد نظر اسے دیکھا
جب ہوئیں مائلِ دروں آنکھیں

2

صبح دم آب و دانہ سے پہلے
جس نے پائی نویدِ جلوۂ یار
اس کو ہر آرزو سے بہتر ہے
اس عدیم المثال کا دیدار
جسم و جاں جس کے روبرو ہوکر
بھول جاتے ہیں زیست کا پندار

3

ہائے آنکھوں کی حسرت دیدار
صبح سے پہلے ہوگئیں بیدار
منتظر ہیں بہ آرزوئے دوام
کب نظر آئے حسنِ جلوۂ یار
خوب تھا اس کا جلوۂ بے رنگ
کتنی رنگینیاں ہوئیں بے کار

4

مستی۔ٔ چشمِ جاوداں سی ہے
کوئی وارفتگی نہاں سی ہے
کششِ عشق اور کیا ہو گی
ہر تمنّا جواں جواں سی ہے
کس کو دیکھا کہ آج آنکھوں میں
اک چمک جیسے ارغواں سی ہے
کون جانے کہ ان کی بیتابی
اک پراسرار داستاں سی ہے
کیا بتائوں ’لطیف‘ اس کا راز
نگہ دوست مہرباں سی ہے

5

صرف دکھ درد کی رفاقت ہے
ان کی عادت عجیب عادت ہے
دوسروں کے لئے ان آنکھوں میں
جانے کیوں اتنی جاذبیت ہے
بے سنان و سپر انہیں درپیش
کار زار غمِ محبت ہے

6

سوچتا ہوں کہ دیدۂ حیراں
ایک آتشکدہ ہے یا حمام
لاکھ پرنم سہی مگر اس میں
سوز ہی سوز ہے بہر ہنگام
تجھے دیکھے بغیر اے محبوب
مل سکے گا نہ اب مجھے آرام

7

تیری آنکھیں ہیں تیغ کے مانند
جو کئی زخم ڈال دیتی ہیں
لیکن اکثر دلوں پہ پڑتے ہی
سارے دکھ درد ٹال دیتی ہیں
سرمگیں اور سرمے سے خالی
تیری آنکھوں کا ہے عجب دستور
اپنے مدہوش جاں نثاروں پر
ان کا ہر ایک وار ہے بھرپور

8

تیری آنکھوں کی مسکراہٹ میں
ہم نے چاندی کی سی چمک دیکھی
تو جو آیا ہماری آنکھوں ن
تیرے قدموں کی چاپ تک دیکھی
تو جو سویا تو خوب ہم جاگے
تیرے چہرے پہ کیا دمک دیکھی

9

تیری آنکھوں نے میری آنکھوں کو
عشوۂ و ناز بھی سکھایا ہے
عشق نے روٹھنے کا یہ انداز
میرے پیارے تجھی سے پایا ہے

10

لاکھ روکا مگر ان آنکھوں نے
میرے پیارے تجھی سے پیار کیا
اپنے راز و نیاز کی خاطر
ہائے بے موت مجھ کو مار دیا

11

یہ جھگڑنے کو ہیں سدا تیار
ان کے لڑنے کے ہیں عجب اطوار
ان پہ ساون کو رشک آتا ہے
جب لرزتے ہیں آنسوئوں کے تار
نت نئی آن بان سے دیکھا
میں نے آنکھوں کو برسرِ پیکار

12

بے ادب ہوگئی ہیں کیا آنکھیں
منتہاے نظر سے پیار نہیں
غیر سے جن کی آشنائی ہو
ایسی آنکھوں کا اعتبار نہیں

13

عید کیسی بغیر آنکھوں کے
عید آنکھوں سے ہی عبارت ہے
یہ نہ ہوتیں تو کون کہہ سکتا
زندگی کتنی پرمسرت ہے

14

جس میں رہتا ہے جان کا خطرہ
وہی انداز اختیار کیا
مجھ سے پوچھے بغیر آنکھوں نے
جانے کس کس کا اعتبار کیا
جہاں چلتی نہیں کسی کی بات
پھر اسی رہ گذر سے پیار کیا
ہائے کس راہ گیر کی خاطر
روح کو وقف انتظار کیا

15

وہ بلا نوش حسنِ ہستی ہیں
رات دن غرقِ کیف و مستی ہیں
کوئی دیکھے تو میری آنکھوں کو
جو گھٹا کی طرح برستی ہیں
جو کئی بار سیر ہو کر بھی
جلوۂ یار کو ترستی ہیں

16

تو ہی مجھ پر اگر ترس کھائے
آرزو میرے دل کی بر آئے
گوہرِ دل کی قدر جانے کون
کاش تیری نگاہ پڑ جائے
جس کے پرتو سے زندگی میری
تیری احسان مند کہلائے
ہائے کس منہ سے روبرو تیرے
مدعا اپنا کوئی دہرائے
عقل گم ہے کہ تیری رحمت کو
دلِ وارفتہ کیسے اپنائے
یہ بھی کیا کم ہے گر تصور میں
تجھ کو محو خرام سا پائے

17

تو نے چھوڑا انہیں جہاں پیارے
محوِ حیرت رہیں وہی آنکھیں
تجھے دیکھا تھا پہلی بار جہاں
ڈھونڈھتی ہیں تجھے وہیں آنکھیں
نذر زاغ و زغن انہیں کرتی
اور پڑتیں اگر کہیں آنکھیں

18

جس طرف دیکھتی ہے یہ دینا
تو ادھر چشم شوق وا نہ کرے
تیرے راز و نیاز ہیں کچھ اور
کیوں کرے تو بھی جو زمانہ کرے

19

میری آنکھوں میں تازگی آئے
ان کا دیدار ہی غنیمت ہے
اور اگر وہ ہوں مجھ سے رو گرداں
پھر بھی ان سے بڑی محبت ہے
دل کی آنکھوں سے کوئی دیکھے تو
ہر ادا ان کی خوبصورت ہے
کوئی ان کے سوا کسے دیکھے
کب کسی غیر میں وہ غیرت ہے

20

عشق کے مشورے سے آنکھوں نے
میرے دل کو وہاں پھنسایا ہے
جس جگہ عارفوں نے حیرت سے
نطق کو سربمہر پایا ہے

وائي

کہاں رہیں گے تجھ بن ساجن یہ دکھیارے نین
تو ہی پالن ہار ہے، ان کا تجھ سے ہے سکھ چین
پائوں بنا کر ان کو پریتم ڈھونڈوں گی دن رین

وائي

پیا ملن کو چلی ہوں سکھیو رکھیو میرا دھیان
کیسے ہانکوں اونٹ کو اپنے باگ ہے ان کے ہاتھ
مڑ جاتے ہیں پائوں ادھر کو چاہیں جدھر کو ناتھ
بھاگ میں ہے سو بھوگ رہی ہوںمیں برھن انجان
رکھیو میرا دھیان
ان کے دوار کی داسی ہوںمیں، ٹوٹ نہ جائے آس
کہے ’لطیف‘ وہ آجائیں گے، کبھی تو میرے پاس
ان پہ بھروسہ ان کا سہارا جب تک جان میں جان
رکھیو میرا دھیان

تیسری داستان

1

بند کرلے یہ ظاہری آنکھیں
سر خوشِ بادۂ مجاز نہ ہو
جس حقیقت کا نام ہے عرفاں
اس حقیقت سے بے نیاز نہ ہو
چشم و دل معتبر نہیں جب تک
ان کے پردے میں کوئی راز نہ ہو

2

اشکِ گلگوںسے پہلے دھو آنکھیں
اے طلبگار حسنِ جلوۂ یار
سدِ راہِ طلب ہے گرد مجاز
سیر حاصل ہو کس طرح دیدار

3

اپنی سانسوں کو مشکبار کروں
اپنے سینے کو جلوہ زار کروں
انتظار وصال یار کیا
اہتمام وصال یار کروں

4

وہ سپیدی ہو یا سیاہی ہو
مجھے دونوں ہی سے محبت ہے
میرے پیارے تیری حضوری میں
نہ کوئی رنگ ہے نہ صورت ہے

5

عشق آنکھوں میں جب ہوا پیدا
خواہشِ وصل ہوگئی مقبول
عاشقوں کے لئے نہیں ہوتے
اہتماماتِ علت و معلول

6

بھول کر شاہد حقیقی کو
آرزوئے مجاز کرتی ہے
آہ نیرنگیٔ مجاز تجھے
عشق سے بے نیاز کرتی ہے
دیکھ تو ان کی بے ثباتی کو
جن حسینوں پہ ناز کرتی ہے

7

کتنا بے حس بنا کے چھوڑ گیا
حسنِ عشوہ طراز تو دیکھو
روئی کی طرح دھن رہی ہے تجھے
آرزوے مجاز تو دیکھو

8

ایک ہی ضربِ لاالہ میں بس
جسم سے جان کو جدا پایا
میرے پیارے ترے بغیر یہاں
اور کوئی نہ آسرا پایا
جھانک کر جس نے روح میں دیکھا
صرف تجھ کو ہی اے خدا پایا

9

محوِ حیرت ہوں بام و در سارے
حشر برپا ہو مرغزاروں میں
اس حقیقت کا ہو اگر اظہار
آگ لگ جائے کوہساروں میں

10

دل وہیں ہے جہاں ہے وہ پیارا
اب نفی ہے، نہ ہے کوئی اثبات
چشم حیراں اسے کہاں پائے
دیدنی کب ہے اس خدا کی ذات
اس کے راز و نیاز کا عالم
سربسر ماورائے امکانات
میری سعی و طلب سے بالاتر
اس عدیم المثال کی ہر بات
بے خودی آرزو کا شیرازہ
اور خودی انتشارِ احساسات

11

دیکھئے اس کے حسن کا فیضان
جس نے آنکھوں کو کردیا حیران
ایسی حیرت یہاں نصیب کسے
جان و دل اس کی دین پر قربان

12

ہر تگ و دو ہے جن کی ناہموار
ایسے قلب و نظر سے کس کو پیار
وہ نہ سمجھے کسی اشارے کو
پھر رہے ہیں ادھر ادھر بیکار
خس و خاشاک سے جنہیں نسبت
کیا وہ دیکھیں گے حسن جلوۂ یار

13

بس اسی جان نثار عاشق کو
اپنی آنکھوں سے وہ لگائے گا
غم جاناں سے مضمحل ہو کر
جو سلائی سا تن بنائے گا

14

آکے آنکھوں میں بیٹھ جا پیارے
بس مجھے تو ہی تو نظر آئے
بند کر لوں میں اس طرح آنکھیں
اور کوئی نہ پھر تجھے پائے

15

اے مرے آشنائے راز وفا
مفسدوں کو بتا نہ کوئی بات
عین ممکن ہے بات بڑھ جائے
بیت جائے یہ مختصر سی رات

16

تیری باتوںکا اے دلِ مشتاق
مفسدوں کو کوئی پتا نہ لگے
تو ہو خود اپنے راز کا محرم
اس دبی آگ کو ہوا نہ لگے

17

آج پھر روبرو ہے جلوۂ یار
ہمنشیں جرم تو نہیں دیدار
مفسدوں کو پتا بھی چل جائے
فکر پھر بھی نہیں مجھے زنہار
سر بسر زخم خوردہ قلبِ حزیں
سخت بے تاب دیدۂ خونبار

18

شر پسندوں کو ایسی عبرت ہو
پھر کبھی سر نہ وہ اٹھا پائیں
دوسرے کے لئے جو کھودا ہے
آپ ہی اس گڑھے میں گرجائیں
دیکھ کر تجھ کو اے مرے پیارے
اپنی کوتاہیوں پہ شرمائیں
اور پھر گھٹ کے اس ندامت میں
آپ ہی اپنی موت مرجائیں

19

شرپسندوں سے ان کو خطرہ ہے
عشق جن کا بجھا بجھا سا ہے
جس کے دل میں لگی رہے یہ آگ
وہ تو خود ان کو مار دیتا ہے

20

اسے ڈس لے نکل کے کالا ناگ
ایسے مفسد پہ ہو خدا کی مار
سن رہا ہے ہماری باتوں کو
چپ کھڑا ہو کے جو پسِ دیوار

21

اے جفا پیشہ مفسدِ بدکار
تو ہمیشہ رہے ذلیل و خوار
ہو کے حائل مری محبت میں
تو نہ پھولے پھلے کبھی زنہار
تو نے رسوا کیا مجھے ناحق
روسیہ! تجھ پہ ہو خدا کی مار

22

میرے پیارے ترے قرینے کو
کب وہ خانہ خراب سمجھے ہیں
اپنی کوتاہی۔ٔ نگاہ سے جو
رحمتوں کو عتاب سمجھے ہیں

23

عقل و فہم و خرد سے بالاتر
یوں تو کتنے ہی حادثات ہوئے
جو کبھی سننے میں نہ آتے تھے
چند ایسے بھی واقعات ہوئے

24

برتر از طول و عرج و صورت ہے
اس کی قدرت عجیب قدرت ہے
ہر اشارے میں کیا محبت ہے
وہی سمجھے جو محوِ حیرت ہے
ہر فسانے میں اک حقیقت ہے
کون جانے جو اس کی ندرت ہے
جلوۂ حسنِ یار دیکھ سکیں
اہلِ ظاہر میں کب یہ ہمت ہے
وہی دیکھے گا اس کے جلوے کو
جو ذرا صاحبِ بصیرت ہے۔

25

اس کی پہچان ہے بڑی مشکل
دیدۂ دل کو کھول کر دیکھیں
کوئی ہاتھی نہیں جسے اندھے
ہر طرف سے ٹٹول کر دیکھیں

وائي

چہرہ تو خلیل سا ہے لیکن حالت ترے دل کی ابتر ہے
اصنام خیالی ہیں دل میں تو آزر ہے تو آزر ہے
کہتا ہے ’لطیف‘ کہ دنیا میں ہر سو وہی حسنِ وحدت ہے
مائل بہ دوئی ہے کیوں ناداں، کیا اس کو دوئی سے نسبت ہے
ہر جلوہ اسی کا جلوہ ہے ہر صورت اسی کی صورت ہے
شاید تجھے یہ معلوم نہیں، رب تیرا سب سے بڑھ کر ہے
تو آزر ہے۔ تو آزر ہے

وائي

خدایا جدا ہو نہ مجھ سے وہ پیارا
اسی سے امیدیں اسی سے سہارا
بہت دور ہیں اس کی وہ شاہراہیں
جنہیں دیکھ آئی ہیں میری نگاہیں
اگر مائلِ لطف اس کا قلم ہو
تو لوحِ دل و جاں پہ کیا کچھ رقم ہو
نہ ہو میری قسمت میں کوئی خسارا
اسی سے امیدیں اسی سے سہارا

وائي

موت کھڑی ہے تاک میں یارو
آئو کئے پر پچھتائو
ایک ہی لاٹھی سے یہ بیرن
ہانکے گی سب کے جگ جیون
زیادہ پائوں نہ پھیلائو
آئو کئے پر پچھتائو
سن لو غفلت کے متوالو
شیش محل میں رہنے والو
اتنا بھی مت اترائو
آئو کئے پر پچھتائو
جائے گا جب پیا ملن کو
پہنے گا ہر ایک کفن کو
کہے ’لطیف‘ کوی آئو
آئو کئے پر پچھتائو

وائي

وہ فوق البشر رہنما مل گیا ہے
وسیلے سے جس کے خدا مل گیا ہے
مسیحائے ہر دوسرا مل گیا ہے
مجھے اپنا درد آشنا مل گیا ہے
ہوا اس کا دیدار آنکھوں کو جب سے
سمجھتا ہوں ہر مدعا مل گیا ہے
مرا مقصدِ زیست جس کی طلب تھی
وہ سرتاجِ مہر و وفا مل گیا ہے
مرے دیدہ و دل میں ہے جس کا پرتو
وہ خورشید صدق و صفا مل گیا ہے

چوتھی داستان

1

دیکھ کر بھی اسے نہ پہچانے
ہائے یہ ناشناس فرزانے
فکر یوم الحساب کیا کہیے
سن رہا ہوں ہزار افسانے
محرمِ راز بھی ہیں سکتے میں
مصلحت کیا ہے کوئی کیا جانے
درسِ عبرت ہے ان کی محرومی
حکمِ رب سے رہے جو بیگانے
آدمی زادہ ہو کہ ہو حیواں
سب اسی کے ہیں تابع فرماں

2

آدمی کی بساط ہی کیا ہے
جیسے کوئی حباب پھوٹ گیا
یا کسی طائرِ پر افشاں سے
دفعتاً آشیانہ چھوٹ گیا
وائے محرومیِ۔ٔ دلِ ناکام
سانس کا سلسلہ بھی ٹوٹ گیا

3

بے نیازِ حیات ہو جانا
اک ثبوت ثبات ہو جانا
جس کو سن کر ہو بیخودی طاری
وہ انوکھی سی بات ہو جانا
دل کی گہرائیوں میں گم ہو کر
آپ اک کائنات ہو جانا
مدعائے طلب ہے دل سے محو
فرقِ ذات و صفات ہو جانا

4

گر ہے تحقیقِ حسن کا ارمان
دست و پا کا نہ سر پہ لے احسان
یہ ہے اک رہ گزارِ پرُاسرار
کام آتے نہیں یہاں اوسان
یہ ترے چشم و گوش کیا جانے
اس سراپا جمال کی پہچان

5

حسبِ معمول دن گزارے جا
ہو ہی جائے گا اس کا نظارا
غور سے دیکھ سامنے تیرے
ہو نہ ہو آگیا وہی پیارا

6

جس کے جلوئوں کے ہم ہیں شیدائی
خود ہمیں میں وہ جلوہ آرا ہے
کہہ دو وہم و گماں سے اب جائیں
میرے دل میں مکیں وہ پیارا ہے
جس نے اک حسن بے نیازی سے
اپنے شہکار کو سنوارا ہے

7

دیکھنا ہے جو حسن جلوۂ یار
اپنے ہی دل میں بے حجابانہ
پہلے جمعیتِ حواس ہو پھر
ترک ہو جائے اب اور دانہ

8

ان کے ہی حق میں امن و راحت ہے
جن میں کچھ باطنی بصیرت ہے
اک مجسم مشاہدہ ہیں وہ
دور رس جن کی محرمیت ہے
سرِ افعی بھی ان کے آگے خم
سہمی سہمی سی جن کی فطرت ہے
حق نگر ہیں سب اولیائے کرام
ان پہ بے شک خدا کی رحمت ہے

9

دل کی آنکھیں جو کھول کر دیکھے
روبرو اس کو جلوہ گر دیکھے
پھر نہ کہلائے تو کبھی مشرک
ہر طرف حسنِ معتبر دیکھے

10

جس کو گرداب راس آجائے
ہر کنارہ اسے کھٹکتا ہے
اپنے ہی دل میں دیکھ لے اس کو
کس لئے جا بجا بھٹکتا ہے

11

اس طرح تو نفی کو اپنائے
شرکِ اثبات دل سے مٹ جائے
اس کے نزدیک کچھ نہیں من و تو
راس جس کو یہ بیخودی آئے
خود پرستی کا عارضی پندار
آپ ہی آپ دور ہو جائے

12

سفر زیست میں بسا اوقات
پیش آتے ہیں نت نئے حالات
نور و ظلمت میں دائم آویزش
کفر و ایماں میں کشمکش دن رات
لیکن اک حق نگر موحد کو
درحقیقت ہے ایک ہی سی بات
شرک پروردہ قلب آزر میں
پائے جاتے ہیں ایسے احساسات
جن کی تہ میں دوئی نے رکھے ہیں
وصل جاناں کے چند امکانات

13

کلمہ پڑھنے ہی سے ارے نادان
پختہ ہوتا نہیں کبھی ایمان
تو ہے مانندِ آزرِ مشرک
حق پرستی کی تجھ کو کیا پہچان
پیشِ حق خم سر نیاز ترا
دل میں موجود ہے مگر شیطان

14

صرف ظاہر پرستیاں کب تک
اے منافق رضائے دل پہچان
تو کسی بات پر نہیں قائم
کفر تجھ میں نہ تجھ میں ہے ایمان

15

تیری صورت کلیم جیسی ہے
اور سیرت میں سربسر شیطان
ایک ہو جائیں صورت و سیرت
تابکے یہ حماقت اے ناداں

16

چہرہ آئینہ سے بھی روشن تر
اور دل میں بھری کدورت ہو
ایسے ظالم کے دل میں ناممکن
پرتو راز محرمیت ہو

17

جن کے دل آشنائے وحدت ہیں
وہ سمجھتے ہیں اس کا ہر انداز
ہر طرف وادیٔ محبت میں
سن رہے ہیں اسی کی وہ آواز

18

نت نیا حسن تیری قدرت کا
کس کو دعویٰ ہو محرمیّت کا
وہ بھی سمجھے نہ اس تغیر کو
فخر ہے جن کو تیری قربت کا

19

جو عزازیل کی طرح ’سید‘
خود پسندی ہی میں نہ کھو جائے
اس خوش اعمال کو نہیں کچھ فکر
اس پہ دوزخ حرام ہو جائے

20

دیدہ و دل سے تو گواہی دے
یہ مسلمان کی عبادت ہے
رخنہ اندازیٔ دوئی کب تک
تو پرستار حسنِ وحدت ہے

21

سرمہ ہوتا ہے عورتوں کے لئے
مرد ہو کر تو کیوں لگاتا ہے
اس کی آنکھوں میں ڈال دے آنکھیں
جو انہیں ارغواں بناتا ہے
ہر سپیدی میں ہے اسی کا نور
جو نظر میں تری سماتا ہے

22

پیٹ کی فکر جن کو لاحق ہے
کیسے ان کا خواص میں ہو شمار
فارسی سیکھ لی غلاموں سے
ہائے پھر بھی نہ بن سکے سردار

23

جانِ جاں کے قریب تر جانا
درد کی راہ سے گذر جانا
کیسا امروز اور کیا فردا
نام روشن جہاں میں کر جانا

24

جس نے لاکھوں کو کردیا اندھا
اس اندھیرے سے کچھ فراغ نہیں
جستجو کس طرح کرے گا تو
پاس جب تک کوئی چراغ نہیں

25

تو نے جس کو چراغ سمجھا ہے
وہ تو ہے صف جلوۂ خورشید
کیسے اندھوں کو اس اندھیرے میں
اس سراپائے راز کی ہو دید

26

کیوں لئے پھر رہا ہے تو اس کو
تیرے حق میں چراغ ہے بیکار
ڈھونڈہ اس کو نہ جا کے اور کہیں
خود ترے دل میں ہے جمال یار

27

روبرو ان کے روے جاناں ہے
کون جانے جو عہد و پیماں ہے
تک رہی ہیں اسی طرف آنکھیں
جس طرف وہ بہار ساماں ہے

28

یوں تو بھیگی ہوئی سی ہے ہر آنکھ
غور کیجئے تو شعلہ افشاں ہے
بیر آپس میں ہے پسِ پردہ
پھر بھی آنکھوں کا ایک ارماں ہے

29

شرم رکھ لی مری ندامت نے
ورنہ بے فیض تھے مرے اعمال
جن کو میں نے ثواب سمجھا تھا
بن گئے ہیں گناہ وہ افعال
مجھ سے روٹھا ہوا تھا وہ پیارا
زندگی بن گئی تھی اک جنجال
آگئی کام خود فراموشی
اس کا لطف و کرم ہے شاملِ حال

30

اپنے دل سے جسے چھپایا تھا
تو نے وہ راز آشکار کیا
میرے بس میں نہیں دلِ بیتاب
کیا ستم اے فراقِ یار کیا

31

دشمنِ جاں یہ زرد چہرہ تھا
اب تو آنکھیں بھی بن گئیں غماز
مفسدوں کو کہاں خبر ہوتی
گر ترے غم کا راز رہتا راز

32

وہم کثرت کو غرقِ وحدت کر
مان لے خود پرستیوں کی ہار
راز ہے تیری کامیابی کا
بیخودی ہی میں اے تلاشِ یار

33

جستجو وہ کریں گی اس کی خاک
کرسکے جو نہ اس کا نظارا
ڈھونڈھنا کیا ادھر ادھر اس کو
خود مرے دل ہی میں ہے وہ پیارا
جس طرف بھی نگاہ اٹھتی ہے
مسکراتا ہے وہ جہاں آرا

34

ساری دنیا پہ ’میں‘ کا جادو ہے
’میں‘ کے عرفان سے مگر محروم
یہ خداناشناس کیا جانے
جو قضا و قدر کا ہے مفہوم
لا و ا۔لاّ کے درمیان کیا ہے
اس کو یہ راز ہی نہیں معلوم
حق ہے الحق ہمہ صفت موصوف
چند روزہ ہے یہ دوئی کی دھوم

35

جاننا ان کا سخت مشکل ہے
جز غمِ عشق کوئی کیا جانے
ماورائے عدم ہیں کیا کیا راز
ان کو جانے تو بس خدا جانے

36

جو بھی اپنی خودی مٹائے گا
دوست اس کے قریب آئے گا
تجھ سے وہ جان جاں جدا تو نہیں
اپنے ہی دل میں اس کو پائے گا

37

میری قسمت کہ اس کو کھو بیٹھی
میری ہر سانس میں تھا جو موجود
میں ناحق اِدھر اُدھر دیکھا
خود مرے دل میں ہے مرا مشہود

38

دل نہ پرسوز ہو تو کیسا عشق
دور کی بات ہے وصالِ یار
جیسے ہوتا ہے گوشت کا پکنا
صرف بھوسے کی آگ پر دشوار

39

سوچتا ہی رہے گا ہر عاشق
راز اپنا نہیں بتائے گا
کب تک اشکوں کو اور آہوں کو
اہل دنیا سے وہ چھپائے گا

40

دل میں رکتی نہیں سجن کی بات
خود بہ خود یہ زباں پہ آتی ہے
کچھ سہارا نہیں ہے یہ مشکیزہ
موج طغیانیوں کو لاتی ہے

41

رگ و پے میں ہیں موجزن یا رب
جانے کتنے ہی بحرِ تند و تیز
کاش ہو جائے نذر سوزِ دروں
اُن کی طغیانیوں کی جست و خیز

42

وصلِ جاناں کی راہ میں حائل
دیدہ و دل کی خود پرستی ہے
تجھ پہ طاری ہے نشۂ اثبات
تیری ہستی بھی کوئی ہستی ہے

43

مجھ میں جب تک شعور ہستی ہے
شاملِ حال خود پرستی ہے
سوچتا ہوں کہ پھر کہاں جائوں
جب بلندی کا نام پستی ہے

44

اس کی ہستی ہے سر خوشِ وحدت
ذاتِ حق کا جسے ہوا ادراک
شرط یہ ہے سرور جاں کے لئے
دل ہو آلائش خودی سے پاک

45

اپنی ہستی سے ہوگئے بیزار
آپ ہی بن گئے جمالِ یار
اے غم عشق یہ کرم ہے ترا
مٹ گئے ہیں خودی کے سب آثار

46

آئینہ ہے اسی کا ہر انسان
لیکن اس کو عوام کیا جانیں
جو ہیں خاصانِ حق فنا فی اللہ
وہ انا الحق کا مدعا جانیں

47

سر بسر ناقبول ہیں اعمال
گر نہ اس کی رضا ہو شاملِ حال

48

جو چراتا ہے کب بتاتا ہے
کس کو معلوم کیا چراتا ہے
راز ہے اس کی زندگی کا یہی
چور خود کو سدا چھپاتا ہے

49

کیا کرے کوئی ڈھونڈھنے والا
لاکھ ڈھونڈھے مگر نہ پائے گا
کہہ رہا ہے کھڑا ہوا اک چور
کون میرا پتا لگائے گا

50

خود پرستوں کا کفر یا اسلام
کچھ نہیں ہے بجز خیال خام
اس دل درد مند کے قرباں
جس نے سمجھا ہو درد کو آرام

51

قعرِ دریا میں چھوڑ کر مجھ کو
یہ کہے جا رہا ہے وہ پُر فن
کہیں ایسا نہ ہو کہ غفلت میں
بھیگ جائے تیرا سر دامن

52

قعر دریا میں پھنس گئی ہوں میں
میرے دامن کی لاج رکھ لینا
کوئی تیرے سوا نہیں جس کا
اس ابھاگن کی لاج رکھ لینا

53

جو شریعت کا راہبر بن جائے
اس طریقت کی شرط لازم ہے
جلوۂ شیخِ معرفت درکار
نورِ وحدت کی شرط لازم ہے
تو جو چاہے کہ تر نہ ہو دامن
استقامت کی شرط لازم ہے

54

جھوٹ کا پھل کسے ملا اب تک؟
کہ یہ سوکھی ہوئی سی ڈالی ہے
دیکھ سنیاسیوں نے اے غافل
غیرتِ آرزو بچالی ہے
جس سے گذرے ہیں بے نیازانہ
راہ ایسی بھی اک نکالی ہے

55

اہلِ دل کی جہاں رسائی ہے
اس جگہ عشق کی خدائی ہے
جانے کتنا عمیق ہے گرداب
جس کی تہ عرش کبریائی ہے
اب نہ حمد و ثنا نہ وہ تعظیم
ہر طرف بے خودی سی چھائی ہے

56

تو ہے محروم لذت آزار
تجھ کو حاصل ہو کیا وصال یار
جس میں اس کی رضا نہ ہو شامل
وہ تمنّا وہ آرزو بے کار

57

وصل کی آرزو نہیں زیبا
جن کا مسلک ہے طاعتِ رحماں
زیب و زینت انہیں مبارک ہو
جن کا اس کی رضا پہ ہے ایماں

58

زحمت انتظار سے چھوٹے
دور ہر ایک اضطراب ہوا
جن کی آنکھوں میں بس گیا پیارا
خواب ان کے لئے ثواب ہو

59

جسم تسبیح اور دل موتی
نیند ان کے لئے عبادت ہے
وحدہٗ لا شریک کی خاطر
جن کی رگ رگ میں سازِ وحدت ہے

60

وہ کہاں ہے رضا و رغبت میں
بدگمانی میں جو لطافت ہے
عشق کا بھید کھل نہ سکتا تھا
یہ کسی غیر کی شرارت ہے
اس پہ بھی مطمئن ہے دل میرا
روح پرور غمِ محبت ہے

وائي

وہ مقبول ہیں اس کے در پر، ہیچ ہیں جو انسانوں میں
کوئی تو ہوگی بات انوکھی، فرسودہ خس خانوں میں
وہ اس کے نزدیک ہیں، ان سے راضی انکا پیارا ہے
جن لوگوں کو دنیا والے، گنتے ہیں بے گانوں میں
فرسودہ خس خانوں میں
چھوڑ دے اے غافل من مانی خلقِ خدا کی خدمت کر
تو بھی ہو جائے گا شامل پھر اس کے پروانوںمیں
فرسودہ خس خانوں میں
اس کا راج ’لطیف‘ جہاں میں،جو کچھ ہے سو اس کا ہے
محلوں میں ایوانوں میں، صحرائوں میں ویرانوں میں
فرسودہ خس خانوں میں

سر پربھاتی

پہلی داستان

1

کہے گا کون پھر تجھ کو مغنی
نہ رکھے ساتھ گر تو ساز اپنے
نہیں ’بھانو‘ کا یہ طور و طریقہ
کہ ٹانگے کیل پر تو ساز اپنے
نہ جانے آج تجھ کو کیا ہوا ہے
سحر کے وقت چپ بیٹھا ہوا ہے

2

تجھے او نیند کے مارے ہوا کیا؟
نہ تو ہوگا نہ یہ اعجاز ہوگا
جو گانا ہو تو گالے آج کی رات
کہ کل ٹوٹا ہوا یہ ساز ہوگا

3

نہیں ہے ’جاجکوں‘ کا یہ طریقہ
ارے غافل یہ تجھ کو کیا ہوا ہے
سرہا نے رکھ کے اپنا ساز ناداں
سحر کے وقت بھی سویا ہوا ہے
تجھے بھی خوں رلائے گی یہ غفلت
کہ غفلت سے بھلا کس کا ہوا ہے

4

سکھاتے ’جاجکوں‘ کا جو سلیقہ
گئے منہ موڑ کر وہ یار سارے
خطا سے در گذر کر میرے راجہ
میں بھولوں گا نہ تیرا نام پیارے

5

اٹھا کر دوش پر بربط چلا ہے
سرابوں میں بھٹکتا پھر رہا ہے
ہمیشہ سے یہی ہے اس کا عالم
کبھی آرام ’چارن‘ کو ملا ہے

6

اٹھا کر ساز سورج ڈوبتے ہی
ہوئے جانے کدھر ’جاجک‘ روانہ
ترے سازوں کے زنگ آلودہ ہیں تار
لٹکتے رہ گئے چنگ و چغانہ
ترے ہم قوم شرماتے ہیں تجھ سے
کہ تیری زندگی ہے سائلانہ

7

کہیں گے کیا ترے ہم قوم تجھ کو
مغنی ہے مگر تو بے ہنر ہے
ندامت سے مری جاتی ہے ’لنگھی‘
جو دکھیا تیری منظور نظر ہے

8

مسافت دور کی ہے کیسے آئوں
شکستہ پا مغنی ہوں تمہارا
یہیں تم بھیج دو، دینا ہے جو کچھ
کہ تم ہو بے سہاروں کا سہارا

9

چھپا کر سب سے مجھ سے بے ہنر کو
دیئے ہیں تو نے اکثر جو سہارے
اگر اہل ہنر وہ جان لیتے
تو فوراً توڑ دیتے ساز سارے

10

جو ان کے در سے وابستہ رہے ہیں
نہیں ان سائلوں کی ایسی عادت
کہ راتیں پائوں پھیلا کر گزاریں
رہے ان پر مسلط خوابِ غفلت

11

وہ تیرے کاتنے کے دن کہاں ہیں
گئی بیکار سب تیری جوانی
کہا تھا میں نے چرخے سے لگا دل
مگر تو نے نہ میری بات مانی

12

نہ جانے کل تو اے سائل کہاں تھا
نظر آتا ہے آج اتنا پریشاں
یہاں اب گھومنے پھرنے سے حاصل
وہیں ہے تیرے دردِ دل کا درماں
سخی کی سامنے جا اے سوالی
اسی در سے ہے کچھ ملنے کا امکاں

13

اسے معلوم ہے سب حال تیرا
وہ تیرے دل کی باتیں جانتا ہے
وہ بن مانگے عطا کرتا ہے سب کو
تو اپنے منہ سے کیوں کچھ مانگتا ہے

14

بھریں دم بھر میں سارے خشک نالے
اگر اس کو کچھ ان کا دھیان آئے
سخی ہے وہ ’سپڑ‘ جنکی عطا سے
ہوئے ہیں شاد سب اپنے پرائے
’لطیف‘ اس کے خزانے میں کمی کیا
جو پانی کی طرح موتی لٹائے

15

تو اپنے ساز کو تیار کرکے
اسی سردار سے کچھ مانگنے جا
سہارا عجز کا لیکر مغنّی
خلوصِ دل سے اس کے سامنے جا

16

امیدیں بھی ہیں اس سے خوف بھی ہے
مغنّی کو مگر ہے یہ سہارا
میں کیسابھی ہوں لیکن اپنے در سے
نہ لوٹائیگا خالی ہاتھ پیارا

17

تو سائل ہے بھروسا کر سخی پر
اٹھا سر کو نہ اس کے آستاں سے
لگالے سینہ سے چنگ و چغانہ
کہ یہ بہتر ہیں ہر اک ارمغاں سے

18

جو دانستہ کہے انجان ہوں میں
در جاناں پہ ہے اس کی رسائی
وہی مقبول ہے اس کی نظر میں
جسے ہو اعترافِ بے نوائی

19

اٹھو آگے بڑھو اے بے نوائو!
بلاتا ہے وہ انجانوں کو، جائو
نہیں ہیں تار ان کے زنگ آلود
بجائو بربط و دف کو بجائو
بجائو گائو تم سے خوش ہے راجہ
طریق اس کا ہے جو مانگو سو پائو

20

اسے نام و نسب سے واسطہ کیا
کہ اس کی دین کا باعث ہنر ہے
سنا ہے میں نے انجانوں پہ اس کی
محبت ریز اور گہری نظر ہے

21

جو گہری نیند میں سوئے ہوئے تھے
انہیں اس پیارے مطرب نے جگایا
جو نغمہ حاصلِ مضرابِ جاں تھا
وہی نغمہ زمانے کو سنایا

22

مغنّی نے کہیں نزدیک آکر
اچانک نغمۂ صحرا سنایا
ہوا محظوظ جب بیلے کا راجہ
اسے لینے کو ڈولی لے کے آیا
سخی نے اس کے دل کی بات سن کر
کرشمہ جوشِ رحمت کا دکھایا
گذشتہ رات اس مطرب نے ’سید‘
خدا جانے وہاں کیا کیا نہ پایا

23

’سپڑ‘ سائل سے کتنا خوش ہوا ہے
سمجھ میں اس کی جب یہ بات آئی
کہ اس انجان کے قلب و نظر پر
مصیبت بن گئی ہے بے نوائی
’سپڑ‘ نے اس کی باتیں مان لیں سب
سحر آسودگی کا دور لائی

24

کمی کیا ہے اسے نغموں کی مطرب
ترا نغمہ وہ کیا خاطر میں لائے
وہ پارس اور ہم سب جیسے لوہا
جسے چاہے اسے سونا بنائے

25

صدا ایسی ہی نہ اے سائل لگانا
عیاں جس سے تری حرص و ہوا ہو
سخی بھر دے ترے دامن کو، لیکن
ہمیشہ کے لئے تجھ سے خفا ہو

26

اسے محبوب ہیں انجان سائل
کہ اپنے آپ کو پہچانتے ہیں
بہت خوش ان سے ہے بیلے کا مالک
نہ وہ کہتے نہ وہ کچھ جانتے ہیں
عطا اس نے کئے رہوار ان کو
تہِ دل سے جو اس کو مانتے ہیں

27

صبحدم آکے نے نوازوں نے
اس کے در پر وہاگ گایا ہے
اور پھر اس سخی کے ہاتھوں سے
زندگی کا سہاگ پایا ہے
کون ہم بے کسوں کا داتا ہے
تیرے پیاروں سے دل لگایا ہے

28

ہاتھ میں جن کے اس کی قسمت ہے
اس گدا کو انہیں سے ہے سروکار
کس قدر خوش نصیب ہے چارن
کہ وہ کہلا رہا ہے موسیقار

29

بے غم یار، بے نوا، بے کار
اور کہلا رہا ہے موسیقار
کس توقع پہ ساتھ دے تیرا
وہ وفا آشنا سخی سردار
ان کی قسمت میں اس کی ڈولی ہے
جن کو محبوب لذت آزار

30

میں فرومایہ اور تو پارس
میں گدا پیشہ تو سخی سردار
تیری خاطر یہ ساز اٹھا یا ہے
یہ سمجھ کر کہ تو ہے پالنہار
مجھ سے انجان کے لئے پیارے
اشتیاق آفریں ہے تیرا پیار

31

نیند میں بیتی جارہی ہے رات
اے مغنّی کھلی ہے راہِ نجات
ماہ و انجم لٹا رہا ہے کوئی
نہ رہا کوئی صاحبِ حاجات
وہ کھلا ہے خزینۂ فطرت
موتیوں سے بھرے ہیں سب کے حات
ساز اٹھا، ساز اٹھا، مغنّی! ساز
دے ہی دیگا سخی تجھے سوغات

32

ٹھیس کھا کر بذاتِ خود اس نے
سائلوں کو دیا ہے یہ پیغام
جب سبھی کچھ ہے میری قدرت میں
غیر کے در سے پھر تمہیں کیا کام
بے سلیقہ تری گدائی ہے
میرے جود و سخا پہ کیا الزام

33

کل اسے کیسے منہ دکھائیگا
آج اگر اس کے در سے پیار نہیں
مانگ اسی سے جو روز دیتا ہے
غیر کے در کا اعتبار نہیں

34

بھول جانا نہ اس کو اے مطرب
جانِ جاناں ہے وہ سخی سردار
عجز سے کورنش بجا لانا
اپنے بربط پہ کس کے سیمیں تار

35

نہ کسی نے یہ ان کو سمجھایا
نہ یہ ان کی سمجھ میں آیا ہے
گرد آلودہ سائلوں کو بھی
اس نے کس پیار سے بلایا ہے

36

تجھ سے بیچاری کو گلا کیا ہے!
اے مغنّی، تری خطا کیا ہے!
تیری ہر لے فریب سے معمور
تیرا ہر ساز روح فرسا ہے
کیا ہوئی تیری شانِ استغنا
اے مغنّی تجھے ہوا کیا ہے

37

جن سے راضی ہوا سخی سردار
وہ ہوئے راگ رنگ سے بیزار
کوئی آواز ہی نہیں آتی
زمزمے ہیں نہ اب وہ موسیقار
چل دیئے لے کے اپنے اپنے ساز
کون جانے کہاں ہیں منگنہار

38

پیٹ بھرنا بھی اس کو دوبھر تھا
وقت ایسا بھی اس پہ آیا ہے
جس کو معتوب جانتے تھے سب
آج اعزاز اس نے پایا ہے
کہ سخی نے اسے بہ لطف و کرم
اپنی ڈولی میں خود بلایا ہے

39

میں ہوں لوہا تری نظر پارس
تو غنی میں ہوں سائلِ نادار
سونا بن جائے پل میں لوہا بھی
تو اگر چاہے اے سخی سردار

40

میں فرومایہ ہی سہی لیکن
تیرے ہی ہاتھ میں ہے میری لاج
لطف تیرا شریکِ حال رہے
تو سخی اور ہم سبھی محتاج

41

اٹھ کے محبوب کو وھاگ سنا
ڈوب جائے نہ صبح کا تارا
ہر طرح سے پرکھتا رہتا ہے
مطربوں کے دلوں کو وہ پیارا

وائي

اگر آسرے پہ ہے جام کے، کسی اور در پہ نہ جا کبھی
تجھے مانگنا ہے جو مانگ لے،کہ گدا نواز ہے وہ سخی
یہی چارنوں کا سہاگ ہے، کبھی اس کی لے کو نہ توڑنا
کہ سخی ’سپڑ‘ کی انیسِ جاں ہے یہی وھاگ کی راگنی
جسے چاہے جان سے مار دے، جسے چاہے پار اتار دے
نہ کسی سے اس کو ہے دشمنی، نہ کسی سے اس کی ہے دوستی
ترا راز داں ہے وہ حق نگر، تجھے اس کے راز کی کیا خبر
بجز ایک حسنِ صفات کے نہیں کوئی بات بھی راز کی
یہ سنو تو بات لطیف کی، کہ اسی کے لطف و کرم سے ہے
ترے حال پر یہ نگاہ بھی، ترے ساز دل میں یہ نغمہ بھی

وائي

وہی ایک شایانِ جود و سخا ہے
ہر اک آدمی اس کے در کا گدا ہے
کوئی بے ہنر یا اپاہج ہو کوئی
بہرحال بندوں پہ اس کی عطا ہے
وہ چاہے تو عزت، وہ چاہے تو ذلت
جسے جو ملا ہے اسی سے ملا ہے
عدم سے کیا اس نے تخلیق سب کچھ
وہی خالق بزمِ ہر دوسرا ہے
وہ قادر ہے، ہر شے پہ قدرت ہے اس کو
اسی کے لئے ساری حمد و ثنا ہے
انہیں پر ہوا ہے عتاب اس کا نازل
جنہیں حرصِ دولت نے بہکا دیا ہے
لطیف ایسے آقا کی تعریف کیا ہو
مقدم بہرطور اس کی رضا ہے

وائي

اسی گدا کی سخی سے ہوئی شناسائی
کہ جس کی نغمہ سرائی اسے پسند آئی
نہیں کسی کو بھی بے قدریٔ جہاں کا گلہ
دکھا رہا ہے وہ سردار شان یکتائی
نہ رہ سکے گا کوئی اس کے فیض سے محروم
کہ سب نے اسکے کرم سے مرادِ دل پائی

سر رامکلی

پہلی داستان

1

تیرے یوگی، جہانِ تیرہ و تار
جلوہٗ نور ہیں کہ شعلۂ نار
بزم ہستی پہ ضوفگن ہیں وہ
ان سے دنیا ہوئی ہے پر انوار
وہ نہیں جب تو زندگی کیسی
زندگی سے میں ہوگئی بیزار

2

در بدر مانگنے سے بہتر تھا
ایک ہی در تلاش کر لیتے
یہ گدایانِ کوچہ گرد اے کاش
کوئی جوہر تلاش کرلیتے

3

چھوڑ کر جس نے عیش و عشرت کو
آزمایا غمِ محبت کو
میں نے دیکھا اسی گدا گر میں
جلوہ گر نورِ حسن فطرت کو

4

ان کے ناقوس میں ہے یہ آواز
سرنگوں جس کے سامنے ہر ساز
میں تو ان کے بغیر جی نہ سکوں
ان کا غم میری زندگی کا راز
یہ حقیقت شناس لاہوتی
باعث درد اور درماں ساز

5

سن کے کوئی صدائے پر اسرار
میں چلی پھاند کر در و دیوار
میرے ہوش و حواس پر طاری
اک خوش آیندہ لہجۂ گفتار
کون جانے کدھر گئے جوگی
جستجو میں ہیں طالبِ دیدار
گریۂ انتظار نے مجھ کو
زندگانی سے کردیا بیزار

6

ان کے نقشِ قدم کو پا لینا
عجز سے اپنا سر جھکا لینا
دور افتادہ ہیں وہ بیراگی
رفتہ رفتہ پتا لگا لینا
ان کے قدموں میں عالم لاہوت
ان کے دامن میں بے بہا یاقوت

7

ان کے ناقوس میں جو نغمہ ہے
سامنے ان کے سیم و زر کیا ہے
اب نظر میں کوئی نہیں جچتا
میں نے بیراگیوں کو دیکھا ہے
جانے کس وقت کوچ کر جائیں
پائوں مشرق کی سمت اٹھا ہے

8

تیرتھوں کو چلے گئے جوگی
ہاتھ مل مل کے رہ گئی میں ہائے
لے گئے اپنے ساتھ دل کا چین
اب مرے دل کو چین کیوں کر آئے

9

مست ہیں اپنے حال میں ہر وقت
اور ہر قیل و قال سے بالا
ان کے ناقوس کی صدائے بلند
طلب مال و جاہ سے بالا
جان و دل میں سما گئے وہ لوگ
سو رہی تھی ، جگا گئے وہ لوگ

10

ان کے ناقوس میں ہے سوز و گداز
جن سے آتی ہے سرمدی آواز
رسنِ شوق کھینچتی ہے مجھے
جس طرف ہیں وہ زمزمہ پرداز
جانتی ہوں کدگھر گئے وہ لوگ
مجھ پہ ظاہر ہیں جوگیوں کے راز
جی سکوں گی نہ اب میں ان کے بغیر
کاش آجائیں پھر وہی دمساز

11

اک صدائے رحیل و بانگ جرس
صبحدم تھی یہاں ترنم ریز
بھر نہ جانے کدھر گئے جوگی
دے کے مجھ کو پیامِ دل آویز
ڈھونڈھتی ہوں مگر نہیں ملتے
جانے ان کے قدم تھے کتنے تیز
یاد آتے ہیں اب وہ بیراگی
ان کی ہر بات ہے خیال انگیز
میں فراموش کر نہیں سکتی
وہ فضا وہ ہواے عنبر بیز
میری ہستی پہ چھا گئے ہیں وہ
کب ملیں گے وہ مجھ سے کم آمیز

12

وہ جہاں دھونیاں رماتے ہیں
نفس کی ہر خودی جلاتے ہیں
اپنے ناقوس جب بجاتے ہیں
جانے کتنے سرور پاتے ہیں
وہی جینے سے کرتے ہیں بیزار
وہی جینا مجھے سکھاتے ہیں

13

مشغلہ جن کا آہ و زاری ہے
میں نے ان جوگیوں سے پیار کیا
ان کی دلکش قیام گاموں نے
دیدہ و دل کو بے قرار کیا
ان کے ناقوس کی صدائوں نے
بارہا مجھ کو اشک بار کیا
مجھ کو بیراگیوں کی صحبت نے
مائل عجز و انتظار کیا

14

چل دیئے وہ قلات کی جانب
میں تڑپتی رہی جدائی میں
ہائے اب کیسے جی سکوں گی میں
اس جنوں خیز بے نوائی میں

15

ان کے ہمسایوں میں رہی لیکن
نہ میسر ہوا مجھے دیدار
پھر بھی طاری ہے دیدۂ و دل پر
ان کے حسن و جمال کا پندار
ہائے ان شوخ جوگیوں کے بغیر
میرا جینا ہے کس قدر دشوار

16

ہر خودی کو مٹاکے بیراگی
منہ کسی اور سمت موڑ گئے
عشق کی وسعتوں میںگم ہو کر
رشتۂ آب و گل کو توڑ گئے
اپنی پرکیف گوشہ گیری کا
سلسلہ میرے دل سے جوڑ گئے
کون جانے وہ میرے دل آرام
کیوں مجھے بے قرار چھوڑ گئے
اب مجھے زندگی سے کیا حاصل
آرزوے حیات لا حاصل

17

سوئے، نانی، چلے گئے سوامی
اب یہاں کون ہے مرا ہمراز
صبحدم آج کل نہیں ہوتے
ان کے ناقوس زمزمہ پرداز
جی سکوں گی نہ اب میں ان کے بغیر
تھے وہی میرے مونس و دمساز

18

چل دیئے ہنگلاج سے وہ لوگ
جن کو نانی کی سمت جانا ہے
یہ سنا ہے کہ دوارکا جا کے
انہیں دل کی مراد پانا ہے

19

چھوڑ کر مجھ کو چل دیئے جوگی
دیدنی میری بے قراری ہے
جی رہی ہوں اگرچہ ان کے بغیر
ایک لمحہ بھی مجھ پہ بھاری ہے
ان پہ قربان جسم و جاں میرے
ان کی ہر ایک بات پیاری ہے

20

سونی سونی ہر ایک بیٹھک ہے
اب وہ جوگی رہے نہ ان کا جوش
جی سکوں گی نہ اب میں ان کے بغیر
اب نہ دل میں سکوں، نہ صبر، نہ ہوش

21

پوچھتے کیا ہو مجھ سے ان کا نشاں
راز سربستہ ہیں وہ خوش اطوار
توڑ کر سب سے رشتہ و پیوند
ہوگئے محوِ جستجوے یار
بے خودی میں رواں دواں پیہم
انہیں رختِ سفر نہیں درکار
جی سکوں گی نہ اب میں ان کے بغیر
چشم پرنم ہے طالبِ دیدار

22

جسم پر خاک ہاتھ میں ناقوس
اور ہی کچھ ہیں جوگ کے آداب
سمتِ نانی چلے ہیں سنیاسی
کوئی دیکھے تو ان کی آب و تاب
میرے دل کا قرار ہیں وہ لوگ
رحمتِ کردگار ہیں وہ لوگ

23

تیرتھوں کی لگن لگی من میں
دل کہیں اور کیا لگائیں گے
مجھ سی معذور جوگنوں کو وہ
ساتھ لے کر کبھی نہ جائیں گے

24

کب روانہ ہوئے یہاں سے وہ
مجھ پر ظاہر نہ ہو سکی یہ بات
کر رہے تھے یہاں وہ بیراگی
راز دارانہ ہی بسر اوقات
سوچتی ہوں میں اب کہ ان کے بغیر
کیا رہے زندگی کے امکانات

25

اس سماعت میں بھی تھا کوئی راز
میرے جوگی تھے گوش بر آواز
ان کے چہرے تھے مضمحل لیکن
ان کی روحیں تھیں زمزمہ پرداز
جی سکوں گی نہ اب میں ان کے بغیر
نغمہ زن دل میں ہے انہیں کاساز

26

مٹ گئی جز و کل کی ہر تفریق
جوگیوں نے عدم کو اپنایا
اپنے ناقوس کی صدائوں کو
ماورائے غمِ جہاں پایا
دور ہر ایک رہگزر سے دور
جادۂ حق انہیں نظر آیا
ان سے آباد دل کی بستی ہے
ان سے وابستہ میری ہستی ہے

وائي

کتنی دلکش ہے تار کی آواز
سرنگوں جس کے سامنے ہر ساز
اس کے نغموں کی دلکشی مت پوچھ
منفرد ہے وہ زمزمہ پرداز
ماورائے صفات ہے شاید
اس مغنی کے سحر فن کا راز
’سوہنی‘ اور ’ڈیاچ‘ کیا معنی
ہر نفس کے لئے ہے وہ دمساز
جس کو چاہے جلائے یا مارے
اس کی بانگِ رحیل کا اعجاز
سننے والوں پہ بے خودی چھائی
نت نئی دھن ہے نت نیا انداز
اس کی ہر لے میںدل کی بیتابی
اس کی ہر تان رح کی غمّاز
زہر سمجھو کہ انگبین جانو
کبھی ایسی سنی کوئی آواز
سندھ اور ہند ہی پہ کیا موقوف
کون سے دیس میں ہے ایسا ساز

دوسری داستان

1

ان کے دکھ درد کوئی کیا جانے
وہ ہوا خواہِ کنجِ خلوت ہیں
جانتی ہوں میں جوگیوں کا حال
وہ سراپا گمِ محبت ہیں

2

سن لیا پاس بیٹھ کر میں نے
جوگیوں سے تمام دل کا حال
ہائے ان کا لباس گرد آلود
اور سر پہ وہ لمبے لمبے بال
جسم و جاں کی خبر نہیں ان کو
زندگی کو سمجھتے ہیں جنجال
اہل دنیا سے چھپ کے چلتے ہیں
کوئی دیکھے تو جوگیوں کی چال

3

کچھ خس و خار ساتھ لاتے ہیں
اور پھر دھونیاں رماتے ہیں
میں نے دیکھا ہے جا کے ان کے پاس
کیا بتائوں وہ کیا جلاتے ہیں
اپنے قلب و نظر کے شعلوں کو
دوسروں سے سدا چھپاتے ہیں

4

کون ہے جس کے درد نے مارا
کس نے گھائل کیا خدا جانے
ان کے جوش و خروش کا عالم
جز غم عشق کوئی کیا جانے
وہ شب و روز کیوں تڑپتے ہیں
جوگ کا درد لا دوا جانے
محو ہیں کس خیال میں جوگی
کس طرح کوئی دوسرا جانے
فکر و اندیشہ کیا اسے ’سید‘
جو محبت کو رہنما جانے

5

اپنے سوز و گداز کا عالم
جانے کیوں خلق سے چھپاتے ہیں
کوچۂ شوق کی گدائی میں
مدعاے حیات پاتے ہیں
یہ خدا دوست اپنے تن من کو
آتشِ عشق میں جلاتے ہیں

6

ہاتھ میں کاسۂ گدائی ہے
دل کی ہر آرزو چھپائی ہے
دور افتادہ منزلِ جاں ہے
رازدارانہ لو لگائی ہے
دمبدم اس کا نام جپتے ہیں
روح کو جس سے آشنائی ہے
شاد ہیں یہ نجات کے طالب
اپنے دل کی مراد پائی ہے

7

جابجا پھر رہے ہیں یہ جوگی
ان سے قائم ہے جوگ کا دستور
رام ہی رام ان کے لب پر ہے
دل میں اسی اک لگن سے ہے معمور
سب میں شامل بھی اور سب سے الگ
اتنے نزدیک اور اتنے دور

8

خلوتِ شب نے دیدہٗ و دل کو
حسنِ باطن کی دلکشی بخشی
ہائے وہ دل کا مرشدِ کامل
جس نے پرسوز زندگی بخشی
ان کی جلوتِ میں حسن خلوت ہے
والہانہ سی محرمیت ہے

9

دشمن رہگزار ہیں جوگی
کتنے خلوت شعار ہیں جوگی
مل گئی ان کو منزل مقصود
سرخوشِ وصلِ یار ہیں جوگی
یاترا سے سکون دل پایا
ان کی تقدیر یک بیک جاگی
دیکھ کر جلوۂ خدا اوصاف
دم بخود ہوگئے ہیں بیراگی

10

خواہشیں ان کی ہوگئیں پوری
آبِ گنگا سے شاد کام ہوئے
کوئی سمجھانہ ان کے دل کا راز
گرچہ لاکھوں سے ہم کلام ہوئے

11

صبح دم یہ غریب بیراگی
روح پرور صدا لگاتے ہیں
اٹھ کے اپنی قیامگاہوں سے
دور کی بستیوں میں جاتے ہیں
عہد و پیماں کا پاس ہے کتنا
دل کی وارفتگی چھپاتے ہیں

12

یہ لنگوٹے یہ خوشنما کشکول
بھید ان کا کسی کو کیا معلوم
سوے کابل چلے ہیں لاہوتی
کس کے طالب ہیں یہ خدا معلوم

13

اپنے کشکول کر لئے تیار
ہورہی ہے کدھر کی تیاری
دیکھتی ہوں کہ پھر مرے سوامی
کر رہے ہیں سفر کی تیاری
راز ان کا کسی کو کیا معلوم
جارہے ہیں کہاں خدا معلوم

14

دل ہے سوزو گداز سے معمور
نغمہ خوانی سے ان کو رغبت ہے
رات رو رو کے کاٹ دیتے ہیں
رنج بھی ان کو عین راحت ہے
ان فقیروں کا مقصد ہستی
رات دن دور کی مسافت ہے

15

وہ کہیں جھونپڑی بناتے ہیں
اور نہ اس کو بنا کے ڈھاتے ہیں
جانتے ہیں نوشتۂ تقدیر
حسب توفیق سر جھکاتے ہیں
ان کو عرفانِ محرمیت ہے
وہ محبت کے گیت گاتے ہیں
بھید ان جوگیوں کا جانے کون
اپنے دل کی لگی چھپاتے ہیں

16

اپنے دل کے حصار میں محصور
ان سے کیسے ہو باخبر کوئی
بھید زمّار کا نہ کھولیں گے
پوچھنا چاہے بھی اگر کوئی
منزل معرفت سے جب لوٹے
دور تک تھا نہ ہم سفر کوئی

17

جانے کیوں جوگیوں کو شوق سفر
سوے گنگا ہے جانبِ گرنار
اور لنکا انہیں خدا جانے
لے گیا کس کے عشق کا آزار
کس کو معلوم کیوں یہ لاہوتی
ہوتے جاتے ہیں اتنے پراسرار

18

چل دیے ہنگلاج کی جانب
جانے کس نے انہیں بلایا ہے
کون ناوک فگن ہے پردے میں
زخم کس کا جگر پہ کھایا ہے
سرخرو ہوگئے ہیں بیراگی
من کو کس آگ میں تپایا ہے
آپ اک راز بن گئے ورنہ
پردہ ہرراز سے اٹھایا ہے

19

چشم پرنم ہے اور دل پرسوز
ایسے آتے ہیں جیسے دل میں راز
ان کو جوگی بھی یاد رکھتے ہیں
جو اٹھاتے ہیں جوگیوں کے ناز

20

آج پھر ایک شور و غوغا ہے
کون جانے کہاں کا سودا ہے
دفعتا اشتیاقِ جاناں میں
ذکر پھر سے سفر کا چھیڑا ہے

21

کردیا ان کی یاد نے بے چین
آہ پھر میری آنکھ بھر آئی
پوربی جوگیوں کی فرقت میں
پھر مری روح تن میں گھبرائی

22

کھول دیتے ہیں سر کے بالوں کو
اور تن پر بھبوت ملتے ہیں
دور آبادیوں سے جنگل میں
جانے کیا ڈھونڈھنے نکلتے ہیں
جوگیوں کے وہ پرمحن ناقوس
غم ہستی کا راز اگلتے ہیں

23

راکھ ملتے ہیں جسم پر جوگی
اور شب و روز دکھ اٹھاتے ہیں
چند کشکول، گدڑیاں، ناقوس
یہی سامان لے کے آتے ہیں
کس قدر حق شناس ہیں یہ لوگ
جوگ کے راز کو چھپاتے ہیں

24

جوگیوں میں سفر کا ذکر چھڑا
اپنے سازوں کے کس رہے ہیں تار
ہر برائی سے دور رہتے ہیں
یہ خدا دوستانِ خوش اطوار
راز دارانِ حسنِ وحدت ہیں
ہر ادا ان کی عالم اسرار

25

یہ شہیداں حسن جلوۂ یار
طالبان تجلی۔ٔ دیدار
عزم ہیں ان حسینیوں کے بلند
واصل یار ہوں گے آخر کار
شادماں دشت دشت پھرتے ہیں
ان کی نظروں میں ہے جمال نگاہ

26

ابتدا جذب شوق، ذوق طلب
انتہا وصلِ شاہد و مشہود
ان پہ طاری ہے عالمِ لاہوت
مل گئی ان کو منزل مقصود

27

ان کی آنکھوں میں ایک مدت سے
نظر آتے ہیں خون کے آنسو
گیسوئوں پر ہے بارِ گرد و غبار
دوش پر بارِ جاوداں گیسو
درد ان جوگیوں کی فطرت ہے
اور سوز و گداز ان کی خو
اس جہاں سے انہیں تعلق کیا
ذاتِ واحد میں گم ہیں یہ حق جو

28

عمر اس طرح کیوں گزرتی ہے
غم فزا کیوں ہیں ان کے ماہ و سال
بے دلی کیوں ہے بیخودی کیسی
دوش پر کیوں ہیں الجھے الجھے بال
کوئی ان جوگیوں سے پوچھے تو
کون سے غم میں ہوگیا یہ حال

29

جانے ان جوگیوں نے کیوں آخر
عمردکھ درد میں گزاری ہے
میں کہ روتی ہوں یاد کرکے انہیں
مجھ سے بھی ان کی پردہ داری ہے
ماں انہیں جا کے اب کہاں ڈھونڈوں
ایک وحشت سی مجھ پہ طاری ہے

وائي

اپنے لئے کانٹے بوتاہے
جو غافل وقت کو کھوتا ہے
کیوں اس کو ملے ساجن پیارا
جو گہری نیند میں سوتا ہے
دل اس کو بھلا کر شاداں تھا
اب خون کے آنسو روتا ہے
اللہ کو جس نے یاد کیا
اللہ اسی کا ہوتا ہے

وائي

آئے ہیں پیارے بیراگی
میں ان کے ساتھ ہی جائوں گی
وہ مایا لوبھ کو چھوڑ چکے
جگ جیون سے منہ موڑ چکے
ہر سکھ سے ناتا توڑ چکے
بیراگ سے آس لگائوں گی
میں ان کے ساتھ ہی جائوں گی
گھر بار لٹا کے آئے ہیں
لاہوت سے دھیان لگائے ہیں
گدڑی میں لعل چھپائے ہیں
بن دیکھے چین نہ پائوں گی
میں ان کے ساتھ ہی جائوں گی

تیسری داستان

1

سوئے مشرق وہ روشنی کیا ہے
کس کے جلوے نظر میں رہتے ہیں
تیر کس درد آفریں کے نہاں
ان کے قلب و جگر میں رہتے ہیں
آئو ان جوگیوں کو دیکھ آئیں
جو ہمیشہ سفر میں رہتے ہیں
ان کی باتوں سے کچھ پتہ نہ چلا
کس جہانِ دگر میں رہتے ہیں
منزلِ معرفت نظر میں ہے
اجنبی رہ گذر میں رہتے ہیں

2

تجھے اپنا نہ کوئی ہوش رہے
زندگی بے خودی بدوش رہے
محرمانہ شعور لاہوتی
ساز وحدت کا پردہ پوش رہے
کاپڑی ہو کہ ہو کوئی سوامی
خود فراموش و سرفروش رہے

3

کس کے حلقہ بگوش ہیں جوگی
آئو معلوم تو کریں یہ بات
بے خودی ہو کہ فاقہ مستی ہو
والہانہ ہیں ان کے احساسات
ان کی دھونی کے شعلوں سے یکسر
خاک خس خانۂ فریب صفات
نہ ہوا و ہوس نہ حرص و آز
اپنی دھن میں مگن ہیں وہ دن رات
نہ طلبگار نان و خواب و لباس
نہ ہراسان گردش حالات
انس ہے ہنگلاج سے ایسا
کہ بسر ہوتے ہیں وہیں اوقات

4

آو سکھیو! چلو انہیں دیکھیں
جو چھداے ہوئے ہیں اپنے کان
میں ہوں ان کے نیاز مندوں میں
مجھ پہ ان جوگیوں کا ہے احسان

5

کردیا ان کی یاد نے بے تاب
بند حجروں کو کر گئے جوگی
رام کی جستجو میں نکلے تھے
کون جانے کدھر گئے جوگی

6

دل ہے بیگانۂ گناہ و ثواب
آتشِ عشق میں جگر ہے کباب
رات رو رو کے کاٹ دیتے ہیں
روح کرتی ہے جب انہیں بے تاب
ان سے پوچھے تو کوئی کیا پوچھے
جن کے لب کو نہیں مجالِ جواب

7

سوئے کابل کبھی مسافت ہے
بتکدوں میں کبھی عبادت ہے
لے کے چلتے ہیں دوش پر ناقوس
رنج و غم سے انہیں محبت ہے

8

توشۂ رنج و غم ہے ان کے ساتھ
کون جانے کہاں کہاں ہیں وہ
عہد و پیماں کا پاس ہے ان کو
محرم حسنِ جاوداں ہیں وہ
اپنے ناقوس کی صدائوں پر
صبحدم پھر رواں دواں ہیں وہ

9

اب کھٹکتا ہے خار کی مانند
جس سے کل تک بڑی محبت تھی
کوچ کرنا ہی تھا جب اے سوامی
پھر یہ حجرے کی کیا ضرورت تھی

وائي

ہے جس کے من میں مالا
وہ جوگی ہے متوالا
وہ سوامی ہے وہ سوامی
ہے جس کے کان میں بالا
وہ جوگی ہے متوالا
میں ساتھ چلی مندر میں
پگ پگ ہوا اُجالا
وہ جوگی ہے متوالا

چوتھی داستان

1

جس کسی کو ہو جوگ کا سودا
ہر تعلق کو خیرباد کہے
ترکِ دنیا ہے رمزِ لاہوتی
بس الف اور میم یاد رہے

2

یہ صنم خانے اور یہ ناقوس
کاش ہٹ جائیں تیری راہوں سے
دیکھ ساجن تجھے بلاتا ہے
کن نفاست بھری نگاہوں سے
گر یہ چاہے کہ تو بنے جوگی
اپنا دامن بچا گناہوں سے

3

گر یہ چاہے کہ تو بنے جوگی
اے بشر فکر این و آں سے بھاگ
تجھے نور ازل بلاتا ہے
بھاگ ہر اک غمِ جہاں سے بھاگ

4

گر یہ چاہے کہ تو بنے جوگی
تجھے لازم ہے نفس کا ایثار
جسم مندر ہے اور دل حجرہ
جوگ میں ہیں یہی ترے گھر بار
در بدر ڈھونڈھتا ہے تو جس کو
جلوہ گر تیرے دل میں ہے وہ نگار

5

چھوڑ دے وہم کے صنم خانے
بھول جا آرزو کے افسانے
تیری راہ طلب میں حائل ہیں
بستیاں، شہر، دشت ویرانے
در بدر اس کی جستجو تجھ کو
اس سے روشن دلوں کے افسانے

6

گر یہ چاہے کہ تو بنے جوگی
اپنی ہستی کو غرقِ وحدت کر
عشق کی دھونیاں رما دل میں
نفس کو بیخ و بن سے غارت کر
یاد رکھ مدعائے ذکر خفی
صرف اسی ایک سے محبت کر

7

گر یہ چاہے کہ تو بنے جوگی
محرم حسنِ جاوداں ہو جا
نہ رہے فرقِ آستان و جبیں
سر بسر خاکِ آستاں ہو جا

8

وہ ابلتے ہیں نور کے چشمے
سوئے مشرق رواں دواں ہو جا
بن کے راز آشنائے ذکر خفی
خلوتِ خاص میں نہاں ہو جا
تیری منزل ہے عالمِ لاہوت
بے نیازِ غمِ جہاں ہو جا
تیرا مسلک غمِ محبت ہے
اپنے مسلک کا پاسباں ہو جا
مستقل اپنے دل کی آگ میں جل
آپ ہی اپنا امتحاں ہو جا

9

اجنبی بستیوں سے تو منہ موڑ
آئے دن کا یہ رونا دھونا چھوڑ
جوگ لے اس کے گائوں میں جا کر
توڑ دنیا سے اپنے ناتے توڑ

10

جوگ لینا ہے تو زمانے سے
ہر تعلق کو توڑ لے پہلے
جسم کو چھوڑ، روح کا رشتہ
ذات واحد سے جوڑ لے پہلے
جس طرف منزلِ محبت ہے
رخ ادھر اپنا موڑ لے پہلے

11

گر یہ چاہے کہ تو بنے جوگی
تہِ دل سے ہو قائلِ توحید
تیرے صوم و صلوٰۃ ہیں بے کار
دل نہیں ہے جو مائلِ توحید
جوگ لینے کی آرزو ہے اگر
رب کو پہچان سائلِ توحید

12

گر یہ چاہے کہ تو بنے جوگی
تیرِ غم قلب میں اتر جائے
جسم ہو جائے نذر سوزِ دروں
آتشِ شوق کام کر جائے
کیوں نہ بن جائیں اس کے سارے کام
جس کی اللہ پر نظر جائے

13

گر یہ چاہے کہ تو بنے جوگی
اور دل آشنائے وحدت ہو
چھوڑ دے کوچہ گردیٔ شب و روز
گوشہ گیر سکونِ خلوت ہو
کیا خبر تجھ کو تیری خاموشی
محرمِ راز محرمیت ہو

14

گر یہ چاہے کہ تو بنے جوگی
اپنے مالک سے لو لگائے جا
من کی مالا نہ ہاتھ سے چھوٹے
اور یہ سنکھ بھی بجائے جا
دھول تن پر نہ ڈال اے سوامی
صبر کی گڈریاں سلائے جا

15

گر یہ چاہے کہ تو بنے جوگی
جا بڑے پیار سے گرو کی اور
ڈھونڈے لے ہنگلاج میں جا کر
کہ وہیں ہیں کہیں ترے چت چور

16

کل وہ حلقہ بگوش بیراگی
کر گئے کوچ کیوں خدا جانے
کیوں گئے ہیں وہ جانبِ مشرق
کوئی ان کے رموز کیا جانے
کیسے آئے قرار اس دل کو
جو انہیں اپنا آسرا جانے
سرخ و معصوم و مشکبو چہرے
چھپ گئے ہیں کہاں خدا جانے
کتنی سنسان ان کی راہیں ہیں
کتنی ویراں قیامگاہیں ہیں

17

گر یہ چاہے کہ تو بنے جوگی
لوحِ لاہوت پر ہو تیرا نام
چھوڑ حرص و ہوا کی دنیا کو
اور بن اس کا بندۂ بے دام
پیر و مرشد کے پاس جا کر سن
محرمیت کا نت نیا پیغام
سفر ہنگلاج ہے درپیش
اس سفر میں ہیں سنگِ رہ اوہام
گھر تری پاشکستگی کی دلیل
زہرِ قاتل ترے لئے آرام
کوئی گل رنگ منتظر ہے ترا
سمتِ مشرق سے آرہے ہیں پیام
عیش و عشرت کی آرزو بے سود
جوگ کی شرط ہیں غم و آلام

18

راز دارِ رضائے حق ہو کر
اپنی ہستی کو تو مٹائے جا
گر یہ چاہے کہ تو بنے جوگی
عشق کی دھونیاں رمائے جا

19

تو ازل ہی سے طالبِ حق ہے
بھول کر بھی نہ لے خودی کا نام
گر یہ چاہے کہ تو بنے جوگی
بادۂ نیستی کا پی لے جام

20

گر یہ چاہے کہ تو بنے جوگی
کرلے اپنی ضرورتیں محدود
دل نہ جب تک ہو مائل ایثار
تیری حلقہ بگوشیاں بے سود

21

میری حالت ہے قابل افسوس
مجھ میں پیدا نہ ہوسکا ایثار
جوگ ان جوگیوں کو زیبا ہے
جن کا دستور بن گیا ایثار

22

دیکھ ان سوامیوں کی آنکھوں سے
اشکِ خوں گر رہے ہیں گام بہ گام
جوگ تیرے لئے نہیں موزوں
جوگ کا لے رہا ہے ناحق نام
جب سفر ہی کی ٹھان لی دل میں
سر زمینِ وطن سے پھر کیا کام

23

جن کا مسلک ہی بے نیازی ہو
ان کو اپنے وجود سے کیا کام
جوگ لیتے ہی مرگئے جوگی
لے نہ اب تو بھی زندگی کا نام
نغمۂ غم سے آشنا کر دے
تیرے کانوں کو بھی وہی پیغام

24

جس کو سمجھے ہیں زندگی جوگی
وہ سراسر غمِ محبت ہے
سن میری بات عازمِ مشرق
درد ہی تیرے دل کی راحت ہے

25

گڈریوں اور سنکھ سیلوں سے
ہوسکے گی نہ جوگ کی تعمیل
قصر باطن کو ریزہ ریزہ کر
تاکہ ہو جذب و شوق کی تکمیل
دل ہو مانند شعلۂ بے دود،
ورنہ ہر رسمِ ظاہری بے سود

26

تیری حلقہ بگوشیاں بے سود
کوششِ رائیگاں سے کیا حاصل
سخت مشکل ہے جوگ کی منزل
جوگ کے امتحان سے کیا حاصل
تو ہے سردی سے لرزہ بر اندام
جوگ کا لے رہا ہے ناحق نام

27

جانے کس جستجو میں رہتے ہیں
سوئے مشرق رواں دواں جوگی
اک سراپا جمال ہے دل میں
جسے کہتے ہیں جانِ جاں جوگی
سرخروے غمِ محبت ہیں
بے نیاز غمِ جہاں جوگی

28

میری غفلت سے گم ہوئے جوگی
کس طرف ان کو ڈھونڈنے جائوں
وہ مکٹ ان کے اور وہ چکرے
اب میں کس شے سے دل کو بہلائوں
کہیں ان کا نشاں اگر مل جائے
کرکے منت انہیں بلا لائوں
جھونپڑی چھوڑ کر کسی دھن میں
وہ گئے ہیں جہاں وہیں جائوں
پہلے اپنا وجود گم ہوجائے
پھر یہ ممکن ہے کچھ نہ کچھ پائوں

29

اب کہاں جائوں اب کسے پوجوں
کیا کروں اب یہ دھوپ اور دھانی
جا کے مندر میں دیکھتی کیا ہوں
تیرتھوں کو چلے گئے گیانی

30

شکم آسودہ جوگ کیا جانیں
جوگیوں میں وہ ہو گیا بد نام
راہ گم کردہ وہ تہی داماں
ایسے جوگی کو جوگ سے کیا کام

31

جوگ دل سے قبول کر جوگی
یوں دکھاوے کو اختیار نہ کر
ترک کردے دروغ گوئی بھی
راست بازی بھی اختیار نہ کر
فکرِ روزِ جزا رہے دل میں
اس کی رحمت کو شرمسار نہ کر

32

تو نے چھدوا لئے ہیں اپنے کان
اب نبھانا ہے جوگیوں کی آن
جان لیوا ہے یہ لگن پیارے
اور جو تجھ کو کہیں عزیز ہو جان
کیوں ہے گونگوں کی طرح اب چپ چاپ
بھید پیارے کا پوچھ لے انجان
عجز کو پیشوا بنا اپنا
عجز ہی سے ملے گا تجھ کو گیان
چھوڑ یہ احتیاط لاہوتی
عشق کا تیر دل پہ کھا نادان

33

جس سے بن جائے آگ بھی پانی
کاش مل جائے تجھ کو ایسا گیان
پریم کی دھونیاں رما دل میں
ڈال دے اس چتا میں اپنی جان

34

کاپڑی! کان کس لئے چھدوائے
تجھ کو زیبا نہیں زنانہ جوگ
فرق ہے جوگ جوگ میں جوگی
کم ہی پہچانتے ہیں اس کو لوگ
اس کو دھوکے میں ڈالتا ہے رام
جو نہ سمجھے کہ پیڑ ہے یا پھوگ

35

سن سکے یہ نہ گیان کی باتیں
کان تیرے ہیں یا گدھے کے کان
بیچ کر ان کو دوسرے لے آ
جن کو ہو بات بات کی پہچان
دل نہ جب تک ہو گوش بر آواز
کس طرح مل سکے گا تجھ کو گیان

36

سوئے نانی چلا ہے کیوں نانگا
تیری منزل یہیں کہیں ہوگی
جس حقیقت کو ڈھونڈتا ہے تو
تیرے ہی دل میں وہ مکیں ہوگی
ایک ہوجائیں تیرے دیدہ و دل
پھر کوئی جستجو نہیں ہوگی

وائي

ٹھیرے نا رات کو ساجن
آیا سنسان سویرا
سجنی اب کون ہے تیرا
وہ جوگی ہیں وہ جوگی
کیا ناتا آن سے تیرا
سجنی اب کون ہے تیرا
لائے تھے چھرا لاہوتی
جو جگ جیون پہ پھیرا
سجنی اب کون ہے تیرا

پانچویں داستان

1

طور سینا ہے ان کو ہر اک گام
محوِ نظارہ ہیں وہ صبح و شام
رازدارِ یقین وحدت ہیں
دور ہے ان سے کثرتِ اوہام
زیر پایہ جہانِ فانی ہے
ان کو پیارا ہے بس خدا کا نام
مثل موسیٰ ہوئے نہ وہ بے ہوش
ان کا ذوقِ نظر ہے خوش انجام
ان کے سجدوں کی محرمیت نے
سن لیا کوئی دلنشین پیغام
دل ہے راز نشاط سے آگاہ
دیکھنے میں ہیں سر بسر آلام
یہ ہیں نور ازل کے گرویدہ
اب کسی اور سے انہیں کیا کامڀ

2

جسم مسجد ہے اور دل قبلہ
ساز گار ان کو بزم خلوت ہے
آپ محراب آپ ہی منبر
اُن پر روشن ہر اک حقیقت ہے
موجزن ان کے دیدہ و دل میں
نورِ سرچشمۂ ہدایت ہے
ہر گناہ و ثواب سے بالا
اے ازل تیری محرمیّت ہے
حسنِ والا صفات کی تحقیق
جوگیوں کی یہی عبادت ہے

3

بزم لاہوت سے گزر آئے
اب ہے دل میں اُلوہیت کی دھوم
دیکھ کر ان کو کچھ پتہ نہ چلا
راز دل کا کسی کو کیا معلوم

4

ان کے ننگے بدن پہ خاکستر
روح میں آتش محبت ہے
عیش و عصیان سے دور رہتے ہیں
پارسائی ہی ان کی فطرت ہے
آپ ہی اپنی آگ میں جلنا
سوزِ دل اُن کو عین راحت ہے

5

چھوڑ یہ جوگیوں کے جاگوٹے
اور ان دھونیوں سے ہو بیزار
آتشِ عشق میں جلا دل کو
اے طلبگار حسن جلوۂ یار
لگ گئی جس کو معرفت کی آنچ
مل گئی اس کو دولت دیدار

6

صرف حلقہ بگوشیوں سے کیا
لطف تو جب ہے سر قلم ہو جائے
نورِ عرفاں ہو راہبر تیرا
جوگیوں میں ترا بھرم ہو جائے
مہرباں ہو وہ جانِ جاں تجھ پر
دور سب فکر بیش و کم ہو جائ

7

ڍکر گئے کوچ جانبِ مشرق
ساری دنیا کو چھوڑ کر جوگی
ان کے دل نے جدھر اشارہ کیا
گامزن ہوگئے ادھر جوگی
جانے پھر اس طرف سے کب گزریں
ہائے یہ صاحب نظر جوگی

8

کون جانے کہ یہ روش جوگی
کس لئے اختیار کرتے ہیں
کفر و ایماں سے ہو کے بیگانہ
ذاتِ واحد سے پیار کرتے ہیں
ذکرِ جنت نہ فکرِ دوزخ ہے
خواہش وصلِ یار کرتے ہی

9

زالِ دنیا قبیح صورت ہے
اس سے ترکِ تعلقات کرو
دردِ ہستی نہ دردِ سر بن جائے
حاصل اس درد سے نجات کرو
نفس کو پہلے سرنگوں کر لو
پھر کوئی معرفت کی بات کر

10

اپنے ناقوس کی صدائوں سے
مجھ پہ یہ جادو سا کر گئے جوگی
سونے سونے سے ان کے حجرے ہیں
کیا بتائوں کدھر گئے جوگی

11

جوگ میں پیروِ شریعت ہیں
ان کے دل عارف حقیقت ہیں
بزمِ ملکوت و عالمِ جبروت
اس تفکر کی قدر و قیمت ہیں
جس کے فیضان سے یہ لاہوتی
سرخوش بزمِ محرمیّت ہیں

12

چھوڑ کر آج عالمِ ناسوت
جا رہے ہیں وہ جانبِ ملکوت
ان کے ناقوس کی صدائوں سے
گونج اٹھی ہے محفلِ جبروت

13

قابلِ داد ہے دروں بینی
جا کے دیکھے نہ کابل و کشمیر
دھونڈھتے تھے وہ جا بجا جس کو
اپنے ہی دل میں مل گیا وہ پیر
چشم و دل کی یگانگت دیکھو
کھل گئی ان کے جسم کی زنجیر
گامزن تھے رہِ صداقت میں
جانے کب سے یہ کاپڑی رہگی

14

یاس و حسرت سے آشنا ہیں وہ
اپنی قسمت سے آشنا ہیں وہ
بحر و بر سے گذر گئے بے باک
ہر صعوبت سے آشنا ہیں وہ
ان کے لب پر نہیں کوئی شکوہ
رازِ وحدت سے آشنا ہیں وہ

15

سر خوشِ وصل یار ہیں جوگی
کیا سراپا بہار ہیں جوگی
بحرِ عرفاںمیں غوطہ زن ہو کر
خود یمِ بے کنار ہیں جوگی
عارفانہ ہیں ان کے پیچ و تاب
کیا انہیں فکرِ موجہ و گرداب

16

نامرادی مراد میں بدلی
جب عدم آشنا ہوئے جوگی
اب کسی چیز کا سوال نہیں
تاجدار رضا ہوئے جوگی

17

غمِ فردا نہ فکرِ دوش انہیں
اک ہوا خواہ دم کے ساتھ رہا
سخت دشوار تھی رہ عرفاں
جانِ جاں ہر قدم کے ساتھ رہ

18

ناسمجھ ہیں ’لطیف‘ وہ رہرو
جو تکبّر کے ساتھ چلتے ہیں
ان کی تقدیر میں ہے گمراہی
گھر سے بے راہبر نکلتے ہیں

وائي

دلنشین ان کا ہر اشارا ہے
مجھ کو ان جوگیوں نے مارا ہے
موت بھی کوچۂ گدائی میں
ان کی خاطر مجھے گوارا ہے
کیسے بھائے دوئی کی بات انہیں
جن کو وحدت کا نام پیارا ہے
اڑ گئی نیند میری آنکھوں سے
جانے کس نے مجھے پکارا ہے
کس کے رازِ فرار نے اکثر
دل میں اک تیر سا اتارا ہے
ان خدا آشنا فقیروں نے
میرا ذوقِ طلب نکھارا ہے
تیری رحمت ’لطیف‘ پر یا رب
ایک تو ہی مرا سہارا ہے

چھٹی داستان

1

درد کی ٹیس دل میں اٹھتی ہے
رات دن بے قرار رہتے ہیں
کس نے ان پر چھری چلائی ہے
جانے کیوں سوگوار رہتے ہیں

2

ان کے لب پر ہیں گرچہ کیا کیا نام
ان کے دل میں فقط رام ہی رام
جادہ پیماے معرفت جوگی
پی چکے ہیں مئے ازل کے جام
کوئی ان سامیوں سے پوچھے تو
ان کی تقدیر میں ہیں کیوں آلام
بال کیوں اس قدر بڑھائے ہیں
بن گئے کس کے بندۂ بے دام
یاد کرتا ہوں میں انہیں ’سید‘
دل کی گہرائیوں سے صبح و شام

3

عالم بے خودی میں آئے ہوئے
پیچ و تاب خودی مٹائے ہوئے
کچھ سفیدی سیاہ بالوں میں
غمِ فرقت کے دکھ اٹھائے ہوئے
اور ہر وقت پیار کے آنسو
ان کی آنکھوں میں ڈبڈبائے ہوئے
ایک مدت یوں ہی بیٹھے ہیں
گرد آلودہ سر جھکائے ہوئے
من کی دنیا میں ہیں مگن جوگی
پریت کی دھونیاں رمائے ہوئے
کیا سروکار بزم ہستی سے
وہ خدا سے ہیں لو لگائے ہوئے

4

ان کا دل ہے خزینۂ عرفان
آپ ہی اپنے کارساز ہوئے
بس گیا ان کی روح میں بھگوان
پیرو مرشد سے بے نیاز ہوئے

5

گرم و سردِ زمانہ نے ان کو
کیا کہوں کس قدر ستایا ہے
خود بھی بیراگیوں نے تن من کو
آتش عشق میں جلایا ہے
کس نے اس شان دلبری سے انہیں
دربدر مانگنا سکھایا ہے
کس ادب سے کھڑے ہیں اسکے حضور
حرفِ مطلب زباں پہ آیا ہے
فکرِ اہل و عیال سے ان کو
مطلقاً بے نیاز پایا ہے

6

دھیان ہر نام سے لگاتے ہیں
اعتبار خودی مٹاتے ہیں
یہ خدا دوست اپنے ظاہر کو
نورِ باطن سے جگمگاتے ہیں
سعی۔ٔ پیہم کے بعد بیراگی
ناتھ کو اپنے دل میں پاتے ہیں

7

ان خدا آشنا فقیروں میں
باہمی ربط و ضبط ہوتے ہیں
رچ گیا رام ان کی روحوں میں
راہ چلتے ہوئے بھی روتے ہیں
جاگتے رہتے ہیں یہ ساری رات
جب کہ اہلِ زمانہ سوتے ہیں

8

زیر خرقہ ہے یوں بدن ان کا
خار و خس میں چھپا ہو جیسے گلاب
گنجِ عرفاں ہے بوریا ان کا
اس میں پنہاں ہے گوہر نایاب

9

ہاتھ میں سبحہ دوش پر زنار
یوں ہوئے جلوہ گر سر بازار
ہائے وہ صورتیں خمار آگیں
دیکھنے والے ہوگئے سرشار

10

ان کے ناقوس کی صدائوں نے
یاد آکر مجھے ستایا ہے
گرد آلودہ جوگیوں نے مجھے
آتشِ ہجر میں جلایا ہے

وائي

آنکھوں نے مجھے الجھایا ہے
سپنوں کا جال بچھایا ہے
اب دوش کسے دوں اے سکھیو
پھل میں نے پریت کا پایا ہے
بیکار دوائوں نے اکثر
برھن کا روگ بڑھایا ہے
من میت سمجھتی ہوں اس کو
جس نے سکھ چین مٹایا ہے
کہتا ہے ’لطیف‘ سنو سکھیو
پلٹی پریتم نے کایا ہے

ساتویں داستان

1

جانے کس کے اسیر ہیں جوگی
آپ اپنی نظیر ہیں جوگی
فاقہ مستی کے راز دار ہیں یہ
کتنے روشن ضمیر ہیں جوگی
کوئی ان کا، نہ یہ کسی کے یار
رنج و غم کی نفیر ہیں جوگی
کنجِ خلوت ہیں ان کو ویرانے
دم بخود گوشہ گیر ہیں جوگی
کوئی اس کے سوا نہیں دل میں
جس کے در کے فقیر ہیں جوگی
کیا غرض ان کو پیرو مرشد سے
آپ ہی اپنے پیر ہیں جوگی

2

شام ہی سے وہ کیوں نہ سوجائیں
جاگنا جن کو اک مصیبت ہے
ہاں مگر وہ غریب لاہوتی
جاگتے رہنا جن کی عادت ہے
کس طرف اپنے پائوں پھیلائیں
ہر طرف قبلہ۔ٔ حقیقت ہے

3

صبح کے وقت یا کبھی سرِ شام
یوں ہی کچھ دیر کو وہ سوتے ہیں
اور پھر اٹھ کے اپنے چہروں کو
دھول سے بار بار دھوتے ہیں
فاقہ مستی میں بھی یہ بیراگی
بھیک سے بے نیاز ہوتے ہیں
کون جانے کہ رات بھر چپ چاپ
وہ کسے یاد کرکے روتے ہیں

4

اپنی دھن میں ہیں مست بیراگی
ان کی روحوں میں رام کا گھر ہے
نہ انہیں بھوک پیاس کا احساس
اور نہ کوئی لباس تن پر ہے
ایسی باندھی ہیں رسیاں کس کر
سخت مجروح جسمِ لاغر ہے
ان کی خاکِ بدن کا ہر ذرہ
اک عدیم المثال جوہر ہے
گامزن ہیں رہِ طریقت میں
کیا خبر کون ان کا رہبر ہے

5

نوبنو جوگیوں کے جلوے ہیں
اب کسی اور بھیس میں ہوں گے
وہ یہاں سے چلے گئے افسوس
جانے کس دور دیس میں ہوں گے

6

حرص سے بے نیاز رہتے ہیں
با ادب پاکباز رہتے ہیں
خلوتِ روح میں خدا سے یہ
محوِ راز و نیاز رہتے ہیں
بے تعلق جہاں سے ہیں پھر بھی
کتنے در ان پہ باز رہتے ہیں

7

جھیل ان کے لئے سبھی دکھ درد
دل اگر جوگیوں پہ وارا ہے
یہ لنگوٹی یہیں اتارے جا
ان کو ننگا بدن ہی پیارا ہے

8

سجدۂ شوق میں جھکی ہے جبیں
انہیں پابندیٔ وضو بھی نہیں
سن چکے ہیں وہی اذاں جوگی
قبلِ اسلام جو ہوئی تھی کہیں
اور کوئی رہا نہ ان کے ساتھ
مل گئے جب سے پیارے گورکھناتھ

9

جسم کو رسیوں سے باندھے ہیں
اور ان کے سروں پہ صافے ہیں
ہائے یہ رازدارِ غم جوگی
ان کے انداز کتنے اچھے ہیں

10

کیوں نہ پیارے ہوں مجھ کو بیراگی
ان کے پیغام دل بڑھاتے ہیں
لائیو ان کو میرے گھر یا رب!
جن سے دکھ درد بھاگ جاتے ہیں

11

ہائے یہ ان کا دیدۂ خونبار
اشک آلودہ سرخیٔ رخسار
چھید کانوں میں زخم کی مانند
اور تن پر ردائے گرد و غبار
دم بخود، زندگی سے بے پروا
وہ کسی کے نہ کوئی ان کا یار

12

ان خدا آشنا فقیروں کو
جُز غمِ عشق کچھ نہیں درکار
زندگی ان کی اک ازل کی آگ
جسم و جاں صبح و شام شعلہ بار
کون جاکر کہے کہ ان کے بغیر
ہوگئی میری زندگی دشوار
کون جانے کہاں گئے جوگی
توڑ کر رشتہ ہائے قرب و جوار

13

بے نیازی پہ حرف آتا ہے
خلق کو اپنا رازداں نہ بنا
تیری ہستی گراں بہا ہے اسے
ہر کہہ و مہ کا آستاں نہ بنا
وصل منظور ہے تو دل کے لئے
حرص کو باعث زیاں نہ بنا
کوئی منزل نہیں تمنا کی
جادۂ عمر بے نشاں نہ بنا

14

کیوں کراتا ہے بندگی اپنی
تجھ کو اس برتری سے کیا حاصل
ڈھونڈھ لے روح کی توانائی
ہو کے دکھ درد کی طرف مائل
بے خودی کے بغیر اے جوگی
مل سکے گا نہ مرشدِ کامل

وائي

وہ کاپڑی گئے کہاں
کبھی یہاں کبھی وہاں
رواں دواں رواں دواں
وہ تن بدن دھواں دھواں
نفس نفس شرر فشاں
وہ کاپڑی گئے کہاں
وہ قلب و جاں کے راز داں
غم و الم کے پاسباں
کب ان کو پائے گی یہاں
یہ میری چشمِ خونفشاں
وہ کاپڑی گئے کہاں
نہ ان میں کوئی قلبہ راں
نہ ان کو فکرِ جسم و جاں
بہ فیضِ عشق بے اماں
رواں دواں رواں دواں
وہ کاپڑی گئے کہاں

آٹھویں داستان

1

آج تجھ پر ہیں مہرباں جوگی
کل نہ جانے ہوں پھر کہاں جوگی
ان کی صحبت بڑی غنیمت ہے
روز آتے ہیں کب یہاں جوگی
صبح سے پہلے ہی نہ ہو جائیں
اور جانب کہیں رواں جوگی
ڈھونڈھنے والوں کو بتاتے ہیں
منزلِ شوق کا نشاں جوگی
سوئے ہنگلاج جانے والے ہیں
چھوڑ کر اب یہ بستیاں جوگی
پھر یہ لمحے نصیب ہوں کہ نہ ہوں
تو کہاں اور پھر کہاں جوگی
لوٹ کر پھر نہ آسکیں شاید
ہر طرف ہیں رواں دواں جوگی

2

ان کی صحبت کو تو غنیمت جان
تجھ پہ جب تک ہیں مہرباں جوگی
ان کی منزل ہے عالمِ لاہوت
تو کہاں اور پھر کہاں جوگی
آئے ہیں اس سراب ہستی میں
مثلِ آھو رواں دواں جوگی
لذتِ وصل کے تمنائی
دردِ فرقت کے راز داں جوگی
زندگی ان کی جاودانہ سفر
بے وطن اور بے اماں جوگی

3

دیکھ تو ہیں کہاں وہ لاہوتی
اب نہ ہوں گی یہ بیٹھکیں آباد
بیٹھ کر دل ہی دل میں رولینا
جب بھی آجائیں تجھ کو جوگی یاد

4

اب نہ وہ بیٹھکیں نہ وہ باتیں
سُونی سُونی فضائے قرب و جوار
کتنی ویراں ہے رہِ پر پیچ
کتنے سنسان ہیں در و دیوار
یہ چپ و راست ڈھیر یادوں کے
یہ بھٹکتا سا دیدۂ خوں بار
یہ خموشی یہ رات کے سائے
کون جانے کہاں گئے وہ یار

5

سامنے میرے آگئے جوگی
اپنا جلوہ دکھا گئے جوگی
اس طرح مسکرا گئے جوگی
مست و بے خود بنا گئے جوگی

6

مجھے اپنا بنا گئے جوگی
دیدہ و دل پہ چھا گئے جوگی
جا کے پھر یاد آگئے جوگی
کچھ نئے گل کھلا گئے جوگی

7

نہ صدائے جرس نہ نغمۂ ساز
چار سو اک سکوت بے آواز
دھونیاں ہیں نہ وہ خس و خاشاک
ہوگئے سرد کاخ و کوئے مجاز
کر گئے کوچ پوربی جوگی
اب نہ شعلے نہ شمعِ محفلِ راز
نہ چراغِ طلب نہ دودِ چراغ
نہ وہ خلوت نشیں نہ خلوتِ ناز
دفعتاً دل میں ہوک سی اٹھی
پھر مجھے یاد آگئے دمساز
ہائے وہ خود شناس سنیاسی
اہلِ عرفان و صاحبِ اعجاز

8

گر یہاں میرے راز داں ہوتے
کیوں یہ مندر وبال جاں ہوتے
بندگی کی مراد بر آتی
وہ مرے دل پہ مہرباں ہوتے
ان کے چرنوں میں جان دے دیتی
کاش وہ آج کل یہاں ہوتے

وائي

وہ کان چھدائے بیراگی
کیوں مجھ سے ناتا توڑ گئے
دکھ درد دیا سکھ چین لیا
مجبور کیا منہ موڑ گئے
وہ سنکھ بجاتے آئے تھے
اک ٹیس سی دل میں چھوڑ گئے

نویں داستان

1

فاقہ مستی ہی فاقہ مستی ہے
ان کی ہستی عجیب ہستی ہے
زندگی تشنہ کامیٔ پیہم
دل ہوا خواہِ مے پرستی ہے
دلِ ویراں کی تہ میں پوشیدہ
خوبصورت سی کوئی بستی ہے
ہر خودی کی سزا شکستِ خودی
ہر بلندی کے بعد پستی ہے

2

نہ بدن کو ہے پیرہن درکار
نہ سفر میں عزیز توشہ ہے
گھرکو ویران کرکے نکلے ہیں
اور معمور دل کا گوشہ ہے

3

آب و دانہ کی جستجو کیسی
دل خدا سے لگالیا ہوتا
خانہ بردوش جوگیوں نے کاش
راہِ عرفاں کو پالیا ہوتا

4

کوئی کاسہ نہ کوئی گدڑی ہے
جھولیاں ہیں سو وہ بھی خالی ہیں
خانہ بردوش جوگیوں نے اب
دشت میں دھونیاں رما لی ہیں

5

راحت جاں غمِ محبت ہے
احتیاطً جسے چھپائے ہیں
بے سروکار لوٹ جائیں گے
بے سروکار جیسے آئے ہیں

6

تشنگی میں عجیب راحت ہے
فاقہ مستی میں طرفہ لذت ہے
یہ شکم پروری و تن پوشی
جوگ سے ان کو خاک نسبت ہے
تیرے ساتھی ہیں واصل منزل
تو غبارِ رہِ ندامت ہے
تجھ سے اللہ دور ہے اب تک
ان کے حق میں نوید رحمت ہے
آج ہی مر کے دیکھ لے ورنہ
کل کو مرنا تو سب کی قسمت ہے

7

گائوں گنجے پہاڑ کا تج کر
پھر روانہ ہوئے کہیں جوگی
جان دی اس گرو کے چرنوں میں
ہو گئے جس کے ہم نشیں جوگی
مل گئے رام آگیا آرام
اتنے مایوس بھی نہیں جوگی

8

رات بھر بے کلی سی رہتی ہے
نیند اکثر اڑی سی رہتی ہے
پیارے آدیسیوں کی آنکھوں میں
آنسوئوں کی نمی سی رہتی ہے

9

شعلۂ جذب و شوق بھڑکالے
دل میں دھونی فنا کی سلگالے
ابھی زندہ ہیں صاحبِ ناقوس
ان کا سوز و گداز اپنا لے

10

ذات واحد کو یاد رکھتے ہیں
اور مرنے کو ہر گھڑی تیار
راحت خواب جوگیوں پہ حرام
انکو رہنا ہے تا ابد بیدار

11

خوئے مہر و وفا نہیں جس میں
معتبر ہو سکی نہ اس کی بات
بے حجابانہ جو نظر آئے
بے نیازِ صفات ہے وہ ذات

12

بہر نظارہ بند کر آنکھیں
کاوشِ جستجو سے کیا ہوگا
شعلۂ آرزو میں جلتا رہ
طلبِ رنگ و بو سے کیا ہوگا
ڈھونڈ اسے ہنگلاج میں جا کر
گردش کوبکو سے کیا ہوگا

13

فائدہ کیا تلاشِ پیہم سے
جب غم زیست سے فراغ نہیں
راہ میں چار سو اندھیرا ہے
پاس تیرے کوئی چراغ نہیں
اپنے حجرے سے تو نکل باہر
منزلِ زیست بے سراغ نہیں

14

کھل گیا ہے بھرم بھی آخر کار
سفرِ ہنگلاج تھا بے کار
جلوۂ آفتاب کیا جانیں
جو اندھیروں ہی سے رہیں دو چار
جوگیو! تم وہاں نہ دیکھ سکے
جلوہ گر تھا جہاں جہاں رخِ یار

15

جانتے تھے کہاں ہے اس کا گھر
پھر بھی شوقِ سفر نے اکسایا
کتنے خوش اعتقاد تھے جوگی
ناتھ کو ہنگلاج میں پایا

16

کون جانے یہ جوگیوں کے سوا
کہ گدائی میں بادشاہت ہے
چھوڑنا مت سلوک کو سوامی
شوقِ ہجرت نویدِ رحمت ہے

17

سہل اندیش لوگ کیا جانیں
اس عدیم المثال کی پہچان
در بدر جو صدا لگاتے ہیں
ان کو ملتا ہے عشق سے فیضان
تا ابد ہو گئے سکوت بہ لب
جب ودیعت ہوا انہیں عرفان

18

کیسی دھونی کہاں کے جا گوئے
دل میں سوز و گداز پیدا کر
بڑھ کے لاہوت سے بھی کچھ آگے
سیر حاصل کوئی نظارا کر
قرب و دوری فریب ہیں جوگی
اپنے سینے کو طور سینا کر
نیستی ہی ثبوتِ ہستی ہے
مر کے شانِ ثبات پیدا کر

19

خیمہ زن دل میں ہیں وہ بیراگی
خوب عالم ہے دل کا عالم بھی
آئو ان کے الائو پر چل کر
آگ کچھ دیر تاپ لیں ہم بھی

20

لوگ ہوتے ہیں دیکھ کر حیراں
جسم پر ان کے ہے عجب پوشاک
بھوک ہے بھیک جوگیوں کے لئے
’دھوپ‘ ہے ان کو دربدر کی خاک

21

یہ صدائے درا و بانگِ راحیل
گمرہوں کو فریب منزل ہیں
عار ہے بھیک مانگنے سے انہیں
جوگ میں جو فقیر کامل ہیں
راہ گنگا کی پوچھتا کیوں ہے
دل کے نظارے سیر حاصل ہیں

22

شہر لاہوت کی فضا سے وہ
رشتۂ زیست جوڑ دیتے ہیں
حسرت و یاس ہوں کہ وہم و گماں
سب صنم خانے توڑ دیتے ہیں
جانے کیوں پھینک دیتے ہیں ناقوس
اور کشکول چھوڑ دیتے ہیں

23

جائیں یہ گدڑیاں جہنم میں
کاسے بھی ان کے خاک ہو جائیں
جوگ کی راہ میں قدم ہے تو کیا
دیدہ و دل بھی راہ پر آئیں
کون جانے کہ جوگ کی خاطر
سنکھ کیا کیا مصیبتیں لائیں

24

زندگی دے رہی ہے تجھ کو فریب
زندگی سے فریب کرنا سیکھ
آخرِ شب بسوز لاہوتی
آگ سی جسم و جاں میں بھرنا سیکھ

25

سنکھ کے ساتھ باندھنے کے لئے
بٹ رہے تھے وہ درد کے دھاگے
پھر وہ بل کھولتے ہوئے اٹھے
کون جانے کہ کیا ہوا آگے

26

پھینک مت اپنی گدڑیاں جوگی
اپنے کاسے بھی آگ میں نہ جلا
ایک نعمت ہے سنکھ کی سنگت
جوگ ہی جوگ جسم و جاں میں رچا

27

زیب تن کی ہے جس نے یہ گدڑی
مہرباں اس پہ ذاتِ باری ہے
کیا بتائوں میں خوبیاں اس کی
کہ یہ ملبوس خاکساری ہے
بے بہا لعل اس کے اندر ہیں
دیدنی اس کی رازداری ہے

28

گدڑی والے غریب بیراگی
قابلِ احترام ہوتے ہیں
جن کے تن اجلے اور من میلے
وہ گدھوں کے غلام ہوتے ہیں

29

دیکھنے میں توگل ہیں رنگا رنگ
سوچیے تو ہے ایک ہی سی بات
ہم نہ اس کی صفات کو سمجھے
خالقِ رنگ و بوہے جس کی ذات

30

کیا کہیں اپنے سنکھ اور کاسے
کیوں یہ درویش چھوڑ آئے ہیں
ترکِ اسبابِ ظاہری کرکے
حسنِ باطن سے لو لگائے ہیں
خاکساروں کے دیدۂ تر نے
کون جانے جو گل کھلائے ہیں

31

گدڑیوں کو کبھی نہیں دھوتے
دل مگر پاک صاف ہوتے ہیں
درد ہی درد ہیں یہ لاہوتی
روز و شب دل ہی دل میں روتے ہیں

32

جوگیوں کی عجیب باتوں کو
راز سربستۂ جہاں کہئے
فہم و ادراک محوِ حیرت ہیں
وہ زباں ہے کہ چیستاں کہئے

33

معنی۔ٔ زیست تک کبھی اے کاش
کوئی امکان ہو رسائی کا
گردشِ ماہ و سال تا بہ ابد
سلسلہ ہے شبِ جدائی کا

34

اک معما ہے زندگی ان کی
نہ وہ کھاتے ہیں اور نہ پیتے ہیں
ہم تو اس بات کو سمجھ نہ سکے
کس طرح سے یہ لوگ جیتے ہیں

35

وہ رہ و رسم چھوڑ دیں اپنی
حق شناسی سے تو نہ پھر جانا
چھپ گئے ہیں یہیں وہ پردیسی
تجھے لازم ہے ڈھونڈھ کر لانا

36

رات کو رام سے لگائیں دھیان
بھور ہوتے ہی وہ کریں اشنان
اور پھر موسمی پھلوں کی بانٹ
یہ ہے دیوانے جوگیوں کی آن

37

ابھی بیٹھے تھے سرنگوں سارے
اب زمیں میں گڑے ہیں کیوں جوگی
کچھ تو دیکھا ہے ان کی آنکھوں نے
محو حیرت کھڑے ہیں کیوں جوگی

38

جھولیوں میں تھا کچھ نہ گدڑی میں
ان کو دیکھا تھا میں نے خالی ھات
پھر بھی قسمت سے مل گئی مجھ کو
ان کے در سے نہ جانے کیا سوغات

39

جھے زیبا ہے معتکف جوگی!
چھوڑ کر ظاہری لباس آئے
لذت درد پر قناعت کر
بھوک کا غم نہ تیرے پاس آئے
سانس لے تو فضا مہک اٹھے
چار سو دور دور باس آئے

40

ان ستاروں کے کارواں سے دور
ماہ و خورشید و کہکشاں سے دور
کارفرمائی مکاں سے دور
شعبدہ کاریٔ زماں سے دور
منزل عمر بے نشاں سے دور
اعتباراتِ جسم و جاں سے دور
اس زمیں اور آسماں سے دور
خلوتِ حسنِ جاوداں سے دور
حق نگر جوگیوں کا مسکن ہے
جن سے وابستہ میرا دامن ہے

سی حرفی

سر کھاہوڑی

پہلی داستان

1

حاصلِ مدعا کو ڈھونڈ لیا
بندگی نے خدا کو ڈھونڈ لیا
کرکے کھاہوڑیوں نے ذکرِ خفی
عشق کی انتہا کو ڈھونڈ لیا
وسعت لا مکاں میں گم ہو کر
جانِ ہر دوسرا کو ڈھونڈ لیا

2

عشق جن کا خدا رسیدہ ہے
میں نے ان عاشقوں کو دیکھا ہے
ان کے اسرار کا بتائے کوئی
جن کے سر دروں پہ پردہ ہے

3

جن کو دیکھا ہے میں نے محو شہود
ان کی صحبت عجیب صحبت ہے
ان کے ساتھ ایک شب بسرہو جائے
وصل جاناں جنہیں ودیعت ہے
موج و طوفاں سے پار کرتے ہیں
قرب ان کا بہت غنیمت ہے

4

سوے کہسار گامزن پایا
بھید ان’ڈوتھیوں‘ کا کیا معلوم
محو نظارہ ہیں سرابوں میں
کس لئے روز و شب خدا معلوم

5

پوچھ لے راز آشنائوں سے
ان خوش آواز ڈوتھیوں کا راز
کس طرح ڈُتھ تلاش کرتے ہیں
دشت و کہسار میں بصد اعجاز

6

دور افتادہ ڈُتھ ملے کیسے
دل تن آسانیوں پہ مائل ہے
صبح سے رہ نورد ہیں ڈوتھی
اور تو شام کو بھی غافل ہے

7

وادیٔ کوہسار میں اکثر
تپشِ آفتاب ہوتی ہے
جل رہے ہیں، انہیں نہ جانے کیوں
آرزوے عذاب ہوتی ہے
اے محبت تری لگن شاید
التہاب التہاب ہوتی ہے

8

اک مسلسل نجات کی دھن میں
ماوراے حیات جاتے ہیں
اور چمکتے ہوئے سرابوں میں
راحتِ بے حساب پاتے ہیں
ہم سفر کی غنودگی پر وہ
پیچ کھاتے ہیں سٹ پٹاتے ہیں
راز کی بات ہے کوئی اس میں
ڈوتھی کیوں اتنے دکھ اٹھاتے ہیں

9

دیکھتے ہیں کسی کو جب غافل
دفعتاً پیچ و تاب کھاتے ہیں
کس کو معلوم ان سرابوں میں
کس لئے اتنے دکھ اٹھاتے ہیں
جانتے ہیں رموز عشق مگر
احتیاطاً انہیں چھپاتے ہیں

10

جسم ان کے غبار آلودہ
دشتِ غم میں رواں دواں ہیں وہ
راز افشا کیا نہیں کرتے
اہلِ دنیا سے بدگماں ہیں وہ

11

عشق کھاہوڑیوں کی فطرتِ ہے
درد ان ڈوتھیوں کی راحت ہے
ان کا سرمایۂ حیات ہے کیا
دردِ الفت غمِ محبت ہے

12

آئی آواز کوہساروں سے
کوئی کھاہوڑی ہو تو آ جائے
منتظر بزمِ محرمیت ہے
سرگذشت وفا سنا جائے

13

ان کو ڈتھ کی کمی نہیں کوئی
حسب توفیق مل ہی جاتے ہیں
راز داران معرفت ہیں جہاں
دور وہ منزلیں بتاتے ہیں

14

مقصد زندگی ہے ڈتھ کی تلاش
سہل ان کا اصول ہوتا ہے
ڈوتھی بن کر پہاڑ پر جانا
صرف ان کو قبول ہوتا ہے
جن خدا آشنا فقیروں پر
رحمتوں کا نزول ہوتا ہے

15

مرمٹے ہیں خداے واحد پر
ڈتھ کا ملنا ہے اب انہیں آساں
وہ گھروں میں کبھی نہیں رہتے
چھان مارے ہیں سیکڑوں میداں
چشم پرنم نگاہِ غم آلود
ڈوتھیوں کی ہے بس یہی پہچاں

16

بال بکھرائے پیٹھ پر مشکیں
ان کا عالم عجیب عالم ہے
کوئی دیکھے تو ان کی جست و خیز
ڈتھ ہی ڈتھ کی صداے پیہم ہے
کہہ رہے ہیں کہ جا رہی ہے رات
دور ’ڈونرے‘ ہیں وقت بھی کم ہے

17

ڈتھ کی دھن میں مگن ہیں صبح و شام
ڈوتھیوں پر حرام ہے آرام
دشت، کہسار، وادیاں، میدان
جادہ پیمائی ہے بس ان کا کام
زندگی ہے رواں دواں ہر وقت
محوِ نظارہ ہیں بہر ہنگام
محرمِ لامکاں ہیں کھاہوڑی
کہ سمجھتے ہیں عشق کا انجام
محرمِ رازِ زندگی ہیں وہ
سہل ہی ان پہ زیست کے آلام

18

تشنہ کام سراب عشق ہیں وہ
ان کی راہیں ہیں ریگزاروں میں
سنگ ریزوں سے پیر چھلنی ہیں
جادہ پیما ہیں کوہساروں میں
ایک تیرے سوا مرے پیارے
کون ہے ان کے غم گساروں میں

19

جانتے ہیں وہ منتاے طلب
زحمت انتظار سے واقف
ہر سحر ہے انہیں پیام سفر
سختیِ کوہسار سے واقف

20

سر بسر دشمن تن آسانی
کس کو معلوم کب وہ سوتے ہیں
ان کو ڈتھ کی تلاش رہتی ہے
کب وہ بیکار وقت کھوتے ہیں
چھوڑ کر اپنی دھونیاں ڈوتھی
ننگے پاؤں روانہ ہوتے ہیں
سعیِ پیہم سے پیار ہے ان کو
نت نیا انتظار ہے ان کو

21

پائوں میں ہیں شکسہ چاکھڑیاں
اور چہرے نہ جانے کیوں مغموم
اشک آنکھوں میں آرزو دل میں
بھید ان کا کسی کو کیا معلوم
ان کو حاصل وہ محرمیت ہے
جس سے ہر آگہی رہی محروم

وائي

میں برکھا رت بن جائوں
نینوں سے نیر بہائوں
جب پیا ملن کو جائوں
کاٹوں دن رات سفر میں
انجانی پریت ڈگر میں
میں لوٹ کے پھر نہ آئوں
جب پیا ملن کو جائوں
ہر وقت ’لطیف‘ ہے کہتا
مجھ کو ہے دھیان اسی کا
گن اس کے ہی میں گائوں
جب پیا ملن کو جائوں

دوسری داستان

1

جن کو گنجے پہاڑ کی آواز
دے گئی ہے پیامِ پراسرار
ہوگئے ہیں وہ لوگ لاہوتی
چھوڑ کر اپنے سارے کاروبار

2

اڑ گئی نیند ان کی آنکھوں سے
بس گیا جن میںانتظار اس کا
ہوگئے بے نیاز سود و زیاں
پڑ گیا جن پہ بھی غبار اس کا

3

ہوگئے سر بسر وہ لاہوتی
مل گئی جن کے دل کو بینائی
جانے کس جستجو میں کھوئے گئے
چھوڑ کر جسم و جاں کی خود رائی
حرصِ دنیا پہ آگئی غالب
عزمِ راسخ کی ہمت افزائی
راز سربستہ کر گئی ظاہر
ان کے قلب و نظر کی یکتائی
دے رہی ہے پیام جست و خیز
عشق پروردہ کوہ پیمائی

4

ہر جھلک سنگلاخ کی ان کو
دفعتاً بے قرار کرتی ہے
وسعت کوہ کو نظر ان کی
کس تمنا سے پیار کرتی ہے
لیکن اے دوست جستجو ایسی
دل کو پر انتشار کرتی ہے
ہر شکست غرور انساں کو
کس قدر کامگار کرتی ہے

5

کھینچتا ہے وہ کوہِ پراسرار
جس کو بھی اس کا ہو گیا دیدار
اس کی راہوں پہ چلنے والو بڑھو
اب یہاں سے ہے لوٹنا دشوار

6

فہم و ادراک سانپ کے مانند
پیدا کرتے ہیںدل میں اک ہیجان
ہاںمگر اس نے انگبیں پایا
جو بھی اس راہ میں ہوا حیران

7

محرم لا مکاں ہیں کھاہوڑی
اپنی دھن میں رواں ہیں کھاہوڑی
دم بخود ہیں یہاں پرندے بھی
کیا بلند آشیاں ہیں کھاہوڑی
شعلۂ عشق آتش افشاں ہےl
حسن کے رازداں ہیں کھاہوڑی

وائي

میں برھن جیسی بھی ہوں
پر اس کی ہی داسی ہوں
اس آری جام سجن کے
چرنوں کی دھول بنی ہوں
انجانی کیچ ڈگر میں
میں ساری رات پھری ہوں
کہتا ہے ’لطیف‘ ہمیشہ
میں اس کی پریت لڑی ہوں
یہ جیون دین ہے اس کا
میں داسی جو اس کی ہوں
جس پردیسی کے کارن
پربت پربت بھٹکی ہوں

تیسری داستان

1

محو آہ و فغاں ہیں کھاہوڑی
کیا ہوا ہے انہیں خدا معلوم
جب سے یہ ہو گئے ہیں لاہوتی
دل میں ہے کوئی دردِ نامعلوم
بند ہیں ان کے چشم و گوش و زبان
راز ان کا کسی کو کیا معلوم

2

رسم و راہ زمانہ سے بیزار
کوئی منزل نہیں انہیں درکار
پائوں کی گرد کوہ و صحرا ہیں
سنگ ریزوں سے پاؤں خوں افشار
جن کی منزل ہے عالمِ لاہوت
ان کو آساں ہے جادۂ دشوار
راہ پیماے معرفت ہیں وہ
ان کو معراج عشق ہے سرِ دار

3

دل کے سوز و گداز میں جلنا
ہر ثوابِ عظیم سے بہتر
محرمانہ غلط روی اکثر
جادۂ مستقیم سے بہتر

4

رہ رووں کا ہجوم گھبرا کر
لوٹ آیا رہِ حقیقت سے
طے کئے جا رہے ہیں دیوانے
جادۂ دوست کو عقیدت سے
ان کو فکر تعینات نہیں
آشنا ہیں رموزِ وحدت سے

5

گامزن جادۂ یقین پر ہیں
ان کا دل ہے امین سوز و گداز
چاہے کس سمت سے پکارے کوئی
وہ ہمیشہ ہیں گوش بر آواز

6

ان کے اونٹوں کی خاک پا سے پوچھ
کن کڑی منزلوں سے آئے ہیں
ان حقیقت شناس لوگوں نے
دور دیسوں سے دل لگائے ہیں

7

ساری دنیا کو چھان مارا تھا
تھک کے اب سو گئے ہیں وہ تہِ خاک
روندتے جا رہے ہیں لوگ انہیں
ہائے یہ اختتامِ عبرتناک

8

میں نے پوچھا تو بولے وہ بیباک
یہ سفر ہے بڑا ہی عبرتناک
ان کڑی منزلوں کی وحشت کا
چند لوگوں کو ہو سکا ادراک
راہ میں خشمگیں شکاری ہیں
جو بھی تنہا گیا ہوا وہ ہلاک

9

جانتے ہیں کہ گمرہی کیا ہے
رہبری کیا ہے رہزنی کیا ہے
تارک دوجہاں ہیں کھاہوڑی
اب انہیں کوئی خوف ہی کیا ہے

10

لگ گئی آگ اس بیاباں میں
وہ کمیں گاہِ رہزناں نہ رہی
ہو گئے ایک طالب و مطلوب
کوئی دیوار درمیاں نہ رہی

11

نوحہ خواں ہیں اداس ویرانے
وہ شکاری کہاں گئے جانے
اب نہ وہ جال ہیں نہ کتے ہیں
صرف باقی ہیں چند افسانے
جانے پھر کب یہاں سے گذریں گے
وہ بیاباں نورد دیوانے

12

ایسے لوگوں سے دور رہنا تم
جن کا مسلک دروغ گوئی ہو
بیٹھ ایسوں میں جن کی صحبت میں
حسن و حق کے سوا نہ کوئی ہو

13

کاش باقی رہے نہ کوئی یار
حسرت کوے یار مٹ جائے
کتنی دل کش ہے وہ اندھیری رات
جس میں ہر رہ گزار مٹ جائے

14

فطرت حسن حسنِ فطرت ہے
نہ کوئی رنگ ہے نہ صورت ہے
ظلمت شب سپیدۂ سحری
اس دوئی میں بھی رازِ و حدت ہے

15

طلب حسن میں گناہِ عظیم
روح پر چشم و گوش کا احساں
آہ یہ رہگزارِ پراسرار
جس میں ہو جاتے ہیں خطا اوساں
پا نشینانِ کوے جاناں کو
میں نے دیکھا ہے سر بسر حیراں
سہل اندیش لوگ کیا جانیں
حسنِ مشکل پسند کی پہچان

16

جستجوے دوام سے پیدا
روح میں ارتعاش کرتے ہیں
کوہساروں پہ خیمہ زن ہو کر
ڈوتھی ڈتھ کی تلاش کرتے ہیں

17

کون جانے کب آئیں گے ڈوتھی
ڈتھ کی خاطر ادھر بصد ارماں
جن میں کل خیمہ زن تھے کھاہوڑی
آج وہ کوہسار ہیں ویراں

وائي

اپنا کے انہیں تو نے نادان، کب اپنے آپ کو پہچانا
اب ڈھونڈہ رہی ہے کیا اس میں بیکار ہے تیرا کاشانہ
گر ان کے ساتھ چلی جاتی ،تجھ پر یہ مصیبت کیوں آتی
تو ان کے الائو سے لوٹ آئی، لازم تھا اسی میں جل جانا
دل ریت کی صورت بیٹھ گیا، اب سانسیں آہیں بھرتی ہیں
رگ رگ میں چبھن سی ہوتی ہے اف تیرا تڑپنا تڑپانا
تو سمجھی تھی وہ اپنے ہیں چھوٹے گا نہ ان کا ساتھ کبھی
لیکن تری چاہت سے ان کو پایا ہے میں نے بیگانہ

وائي

جو گہری نیند میں سوتی ہے
وہ ناداں سب کچھ کھوتی ہے
دکھ دیکھو تو اس برھن کا
جو پیا سے بچھڑ کر روتی ہے
جو دیکھو نیند سے بوجھل ہیں
کب ان میں من کا موتی ہے
وہ ساجن کو کیا دیکھیں گی
یہ غفلت جن میں ہوتی ہے
ان ہوتوں ہی کے ساتھ گئی
جو تیری جیون جوتی ہے
اب یاد انہیں کرکے پیاری
تو خون کے آنسو روتی ہے
کہتا ہے ’لطیف‘ کہ مل جائے
جو تیرے من کا موتی ہے

سر پورب

پہلی داستان

1

عجز سے اس کے پاس جا کاگا
پیارے ساجن کے پانو پڑجانا
اس کی دیوار ہی پہ دم لینا
راستے میں نہ دل کو بہلانا
میں نے جو راز تجھ کو سونپا ہے
وہ کسی اور کو نہ سمجھانا
بیٹھ کر اس کے پاس اے کاگا
تم اسے بار بار دہرانا
اور پھر لے کے وصل کا پیغام
میری جانب خوشی سے لوٹ آنا
جو بظاہر ہے دور افتادہ
اس کو مجھ سے قریب تر لانا

2

میرا پیغام لے کے جا کاگا
زیب دیتا ہے تجھ کو بس یہ کام
بیٹھ کر شاخ پر سنا کاگا
میرے پیارے کا پھر کوئی پیغام
جو گئے تھے قلات کی جانب
آنے والے ہیں پھر وہ دل آرام
جا انہیں اپنے ساتھ ہی لے آ
تجھ کو پہچانتے ہیں وہ گلفام

3

کون جانے چلے گئے کس دیس
سوے محبوب پرفشاں ہو جا
اے وفادار و دل نشیں قاصد
تو ہی میرا خبر رساں ہو جا
جو برستی نہیں ترستی ہیں
تو ان آنکھوں کا ہم زباں ہو جا

4

میرے پیارے چلے گئے پردیسی
کاگا جالے کے آ کوئی پیغام
اپنے زردوز سے کرادوں گی
میں پروں پر ترے سنہرا کام

5

بیٹھ کر اس درخت پر کاگا
اپنی بولی میں کچھ سنائے جا
بول کس حال میں ہیں وہ پیارے
ان کی باتیں مجھے بتائے جا
ہر گھڑی جن کی راہ تکتی ہوں
ان سندیسوں سے دل بڑھائے جا

6

میرے آنگن میں بیٹھ کر کوا
مجھ کو پہنچا رہا ہے تیرا سلام
دل کا آرام ہیں تیری باتیں
روح کی ہے غذا ترا پیغام

7

جھونپڑی پر جو آکے بیٹھا تھا
بولو کس نے اسے اڑایا ہے
تم نے سوچا نہ یہ مری سکھیو!
کس کا پیغام لے کے آیا ہے
ہائے تم نے اڑا کے کوے کو
مجھ ستم کش پہ ظلم ڈھایا ہے

8

آ تجھے دل نکال کر دے دوں
جا کے تم اس کے سامنے کھانا
جب وہ دیکھیں تو یہ کہیں پیارے
ہو گا ایسا بھی کوئی دیوانہ

9

بائیں جانب کی شاخ پر کوا
رازدارانہ کہہ گیا اک بات
کاتنے بیٹھی تھی جو دکھیاری
پھینک کر پونی مل رہی ہے ہات

10

تمہیں غارت کرے خدا سکھیو
بھاڑ میں جائے کاتنے کا کام
چپ تو ہو جائو تاکہ میں سن لوں
جانے کس حال میں ہیں دل آرام
بائیں جانب کی شاخ سے کوا
دینے آیا ہے پھر کوئی پیغام

11

کون ایسے میں کات سکتی ہے
چھا گئے صحن پر غم و آلام
بائیں جانب کی شاخ پر کوا
دے گیا آکے جانے کیا پیغام

12

آکے بیٹھا ہے شاخ پر کوا
پھر سجن کا سلام لایا ہے
اب نہ کاتے کوئی سکھی چرخہ
سن تو لوں جو پیام لایا ہے

13

جھوٹ کب بولتے ہیں وہ کوّے
جو ساجن کے وطن سے آتے ہیں
بیٹھ کر اونچی اونچی شاخوں پر
اس کی باتیں مجھے بتاتے ہیں
میں سمجھتی ہوں ان کی فریادیں
اور وہ پیغام جو سناتے ہیں
باوفا ہیں ’لطیف‘ یہ پنچھی
جو مرے رنج و غم مٹاتے ہیں

14

تیری آوز سنتے ہی کاگا!
روح دکھ درد بھول جاتی ہے
نافۂ مشک ہے زباں تیری
تجھ سے بوے بہار آتی ہے
تیری دلدوز و دلنشین آواز
جانِ جاں کا پیام لاتی ہے
اپنے پیارے کی بات سن سن کر
آرزو تازگی سی پاتی ہے
دفعتاً عالم تصور میں
بزمِ محبوب جھلملاتی ہے

15

کیوں پڑا ہے زمین پر کاگا!
کچھ بتا یہ تجھے ہوا کیا ہے
جو تجھے ناگوار تھی ابتک
اب وہ گرمی تجھے گوارا ہے
دیکھ کر تیری مردنی پیارے
سارے کوّوں نے غل مچایا ہے

16

راستے سے نہ لوٹ آنا تھا
تجھے ساجن کے پاس جانا تھا
میں نے تجھ کو دیا تھا جو پیغام
یاد کرکے اسے سنانا تھا

17

میرے کاگا یہ تیری جست و خیز
دل نشیں، غم ربا، خیال انگیز
دیکھ کر تجھ کو اس دو شاخے پر
ہوگئی میرے دل کی دھڑکن تیز
تو جو پیغام لے کے جاتا رہے
آتا جاتا رہے وہ کم آمیز

18

جاکے پیارے سے یہ کہو کاگا!
کیوں یہ پردیس تم کو بھائے یں
کونسی ہے وہ ایسی مجبوری
جو یہاں اتنے دن لگائے ہیں
اس دکھی دل کی بھی خبر ہے کچھ
دن مصیبت کے جس پہ آئے ہیں

19

آج پھر مجھ کو دینا ہے کاگا!
ایک خط اپنے جانِ جاں کے نام
چھپ چھپا کر تم اس کو دے دینا
خود پڑھائے کسی سے وہ گلفام
دل یہ کہتا ہے آئیگا وہ ضرور
سن کے دردِ فراق کا پیغام

20

کیوں نہ اترا زمین پر کوا
آخر اس میں تھی راز کی کیا بات
اڑتے اڑتے یہ کہہ گیا مجھ سے
آنے والے ہی ہیں وہ خوش اوقات

21

آ مرے پاس بیٹھ جا کاگا!
میں سنوں تیرے میٹھے میٹھے بول
حال ہے کیا وطن میں پیاروں کا
لا یہاں لا کے ان کے خط کو کھول

22

خط جو لایا ہے آج تو کاگا
اس نے کتنی تسلیاں دی ہیں
میں انہیں بار بار پڑھتی ہوں
جتنی باتیں بھی اس نے لکھی ہیں

23

کب وہ قاصد ادھر کو آئیں گے
اور خوشی کی خبر سنائیں گے
راہ پیارے کی تک رہی ہوں میں
کب وہ آکر گلے لگائیں گے
یہ جدائی کا درد یہ پردیس
مجھ کو کب تک یوں ہی رلائیں گے

24

تیرے کنبے کا مجھ پہ احساں ہے
اس مصیبت میں میرے کام آنا
دیس پیارے کا ہے جدھر کاگا!
صبحدم تو ادھر کو اڑ جانا
ادب و عجز و انکسار کے ساتھ
اس کو یہ بات جا کے سمجھانا
اور تجھ سا نہیں کوئی محبوب
جانتا ہے تو سب کے دل کو خوب

25

جانے کیا کیا پیام لایا ہے
آج پھولا نہیں سمایا ہے
میری آنکھوں میں بیٹھ جا آکر
کیوں سر شاخ مسکرایا ہے
جو کسی سے نہ ہوسکا کاگا
تو نے وہ کام کر دکھایا ہے

26

میں نے کوے سے جب کہا آنا
حال پیارے کا کچھ سنا جانا
بولا کوّا کہ وہ نہیں غافل
ہاں جدائی میں تم نہ گھبرانا

27

کوئی کتا ہو یا کوئی کوّا
حال اس کا مجھے سنا جائے
اس پہ قربان جاؤں میں سو بار
جو بھی پیارے کے دیس سے آئے

28

پیٹ کی فکر میں ہے وہ کوّا
مردہ لاشیں تلاش کرتا ہے
کیا وہ پہنچائے گا مرا پیغام
جو تن آسانیوں پہ مرتا ہے

وائي

توڑوں گی نہ جوگ سے میں ناتا
جوگی کی بات نبھائوں گی
یہ کہہ گئے پیارے آدیسی
میں ہنگلاج کو جائوں گی
رہتے ہیں وہیں وہ بیراگی
پورب میں کھوج لگائوں گی
جس تیرتھ کو کل دیکھا تھا
میں آج بھی دیکھ کے آئوں گی

دوسری داستان

1

شوق وارفتہ لے چلا مجھ کو
دل میں اک آرزوے دید لئے
جانے کب وہ نگاہ پڑ جائے
پھر رہا ہوں یہی امید لئے

2

سوامیوں کو ہے عشق کا آزار
درد و غم نے انہیں گھلایا ہے
نہ کوئی غم نحیف ہونے کا
نہ انہیں بھوک نے ستایا ہے
دلنشیں ہیں وہ بولتی آنکھیں
جنہیں ہنستے ہوئے اٹھایا ہے
ایک ہی بار دیکھ کر مجھ کو
جو بھی دکھ درد تھا مٹایا ہے

3

جو تن آسانیوں کا عادی ہے
اس کو کیا حق ہے سوامی کہلائے
کیا ملے گا گرو سے اس کو گیان
دو قدم بھی جو چل کے تھک جائے
چند دانوں کی بھیک کی خاطر
اس نے بیکار کان چھدوائے
خوش مقدر وہی ہے آدیسی
موت سے پہلے ہی جو مرجائے

4

صبحدم جن کے ذکر سے اکثر
دلِ پر شوق ہو گیا مسرور
آخرِ شب وہ پوربی جوگی
بیٹھکیں چھوڑ جا بسے ہیں دور
کس طرح اب ملے گا ان کا سراغ
وہ ہیں مختار اور میں مجبور

5

صبح ہوتے ہی پوربی جوگی
چل دئے سوے منزلِ مقصود
اب نہیں بیٹھکوں میں آدیسی
مشک بو ہے فضائے لامحدود

6

سوے مشرق وہ رہروانِ طلب
کس عقیدت سے بڑھتے جاتے ہیں
ننگ ہے ان کو مستقل آرام
نت نئی بیٹھکیں بناتے ہیں

7

جاکے پورب میں جا بجا میں نے
لاکھ ان کا پتا لگایا ہے
لیکن ان جوگیوں کی منزل کا
کس نے اب تک سراغ پایا ہے

8

کیوں مجھے ان سے ہو گیا ہے عشق
میں کہاں اور کہاں وہ لاثانی
عشق سے سب کو منع کرتی تھی
ہائے نکلی میں آپ دیوانی
سوے مشرق رواں دواں سی ہے
دیدہ و دل کی خانہ ویرانی
جان لیوا ہے دل کی بے تابی
اب کہاں جائوں اے گراں جانی

وائي

چھوڑ حلال کی روزی کو جو روز حرام کی کھاتے ہیں
سورج ڈوبتے ہی وہ کوّے کاں کاں کرتے آتے ہیں
یہ آنکھوں کے اندھے پنچھی خاک سندرتا کو جانیں
سڑی گلی اور مردہ لاشیں جھپٹ جھپٹ کر لاتے ہیں
ہد ہد اور ہما کو سمجھیں چونچ کٹی چمگادڑیں کیا
دیکھ کے ہنج اور مور کو اکثر یہ بیری جل جاتے ہیں
کوئی انہیں سمجھائے کیسے وہ مورکھ کب سمجھیں گے
کوڑے کرکٹ ہی میں رہ کر جانے کیا سکھ پاتے ہیں
ان کو اپنے حال پہ چھوڑو جاننے والا جانتا ہے
دیکھیں کب تک اس جیون پر وہ یوں ہی اتراتے ہیں

وائي

اسی کی یہ تخلیق ارض و سما ہے
وہی ان میں شامل وہی ماورا ہے
جدا اس سے بے تاب ہیں دیدہ و دل
وہ پیارا جو رگ رگ میں میری بسا ہے
فریبِ نظر ہے یہ دو دن کی دنیا
وہی ابتدا ہے وہی انتہا ہے
جو سمجھے اسے جو محمدؐ کو مانے
یہ سمجھو کہ اس کا بھلا ہو گیا ہے

سر بلاول

پہلی داستان

1

جن کو صدق و صفا سے نسبت ہے
اُن پہ اس جانِ جاں کی رحمت ہے
جمع ہوتی ہیں گرسنہ روحیں
سب کو عزم و یقیں کی دعوت ہے

2

مفسدوں کو نکال کر گھر سے
کرو سلطاں سے امن و صلح کی بات
جاں فروشوں نے پائے ہیں اکثر
اس کے در سے وفا کے انعامات

3

تیری تشنہ لبی پہ حرف نہ آئے
تجھے مل جائے گر شرابِ طہور
سب اسی کے حضور سے لینا
غیر کے سائے سے بھی رہنا دور

4

اے سما! تو ہے تاجدار زماں
ورنہ یوں توبہت سے ہیں سردار
جوق در جوق میں نے دیکھے ہیں
تیرے در پہ ہزاروں خدمتگار
ہر کسی کا ہے اپنا پنا ظرف
تیرے جود و سخا سے کیا انکار

5

تیرے کس کام آئیں گے پیارے
آپ ہی توڑ دے یہ نقارے
اسے غیروں کے در سے کیا سروکار
جس کا حامی ہو ہاشمی سردار

6

اس سے بغض و عناد تھا جن کو
پھر ’سما‘ نے انہیں کو دی آواز
کون ہے ہم پناہ گیروں کا
یار وغمخوار و مونس و دمساز
گر وہ امداد پر ہو آمادہ
مجھ پہ کھل جائیں مغفرت کے راز

7

چھا رہا ہے سکوت کا عالم
متبسم وہ روے زیبا ہے
خوف کیا ہم پناہ گیروں کو
بے وسیلوں کا وہ وسیلہ ہے

8

لاکھ یورش کیا کریں اغیار
پھر بھی ثابت قدم ہے وہ سردار
لائو لشکر سے وہ نہیں ڈرتا
قابل داد ہے وہ خوش اطوار
اے ’لطیف‘ اس کا حوصلہ تو دیکھ
روند ڈالی ہے اس نے ہر یلغار
مہربان ہے پناہ گیروں پر
وہ بہادر وہ مالکِ ہالار

9

جابجا خیمہ زن نہ ہو اے دوست
کوئی اچھا سا ڈھونڈھ لے تالاب
کاش اس ملک میں چلا جائے
جلوہ گر ہے جہاں وہ خوش آداب
جو ہے تیری ہی قوم کا سردار
جس کا پرتو ہے عالم اسباب
دیکھ لے وہ جسے محبت سے
اس پہ کھل جائیں رحمتوں کے باب

10

جو بھی اس کی پناہ میں آیا
نہ رہا اس کو خطرۂ اغیار
وہ غضب ناک ہو کے آیا ہے
بھاگ نکلا ہے لشکرِ جرّار
سر کی بازی لگائی ’ابڑو‘ نے
فوج سلطاں سے ہو گیا دو چار
اور پھر جس طرف نگاہ گئی
زیرِ لب تھا تبسم پندار

11

کتنا خوف و ہراس تھا ہر سو
دفعتاً ’بھج‘ پہ جب ہوئی یلغار
چڑھ کے ہاتھی پہ جب علاء الدین
ساتھ لایا تھا لشکرِ جرار
اس کے حملے کی تاب تھی کس کو
ہاں مگر وہ مرا جری سردار
اپنی مہمان عورتوں کے لئے
کھینچ لی جس نے دفعتاً تلوار
حشر ساماں تھا جنگ کا میدان
ہو گیا جب سمہ ستیزہ کار

12

سائلو! تم اسی کے در پہ چلو
’جکھرے‘ جیسا نہیں کوئی سردار
اس کے جود و سخا کا کیا کہنا
صاحب حلم، پیکر ایثار

13

تابعِ شاہ ہو گئے فوراً
سارے قرب و جوار کے سردار
لیکن ابڑو کو کب گوارا تھا
وہ حریصانہ غلبۂ اغیار