سر ڪلياڻ

داستان پھريون

بيت - 1

اَوَلِ اَللهُ عَلِيمُ، اَعلى، عالَمَ جو ڌَڻِي،
قادِر پَھجِي قَدرتَ سِين، قائِم آہِ قَدِيمُ،
والِي، واحِدُ، وَحدَہُ، رازِق رَبُّ، رَحِيمُ،
سو ساراہِ سچو ڌڻِي، چَئِي حَمدُ حَڪِيمُ،
ڪَري پاڻَ ڪَرِيمُ، جوڙُون جوڙَ جھانَ جِي.

بيت - 2

وَحۡدَہٗ لَاشَرِيۡڪَ لَهٗ، جان ٿو چئٖين اِيُّ،
تان مَڃِ مُحَمَّدُ ڪارَڻِي، نِرتُون مَنجهان نِيهَ،
تان تون وڃِئو ڪِيَّ، نايٖين سِرُ ٻئنِ کي

بيت - 3

وَحۡدَہٗ لَاشَرِيۡڪَ لَهٗ، جَڏِھۡ چَيو جَنِّ،
تَن مَڃِئو محمّد ڪارَڻِي، ھٖيجا ساڻُ ھِيَنِّ،
تَڏِھۡ مَنجها تَنِّ، اَوَتَڙِ ڪونَہ اولِئو.

بيت - 4

وَحۡدَہٗ لَاشَرِيۡڪَ لَهٗ، جَن اُتو سٖين اِيمانَ،
تَن مَڃِئو محمّد ڪارَڻِي، قَلبَ ساڻُ لِسانَ،
اُوء فائِقَ ۾ فَرمانَ، اَوَتَڙِ ڪِھۡ نہ اولِئا.

بيت - 5

اَوَتَڙِ ڪِهۡ نہ اولِئا، سُتَڙِ وِئا سالِمَ،
ھيڪائِي ھيڪُ ٿِئا، اَحَدَ سٖين عالِمَ،
بي بَھا بالِمَ، آگٖي ڪِئا اَڳِھِمۡ.

بيت - 6

آگي ڪِئا اَڳِھِمۡ، نِسوروئِي نُورُ،
لَاخَوۡفٌ عَلَيۡھِمۡ وَلَاھُمۡ يَحۡزَنُوۡنَ، سَچَنِ ڪونِه سُورُ،
مولٖي ڪِئو مَعمُورُہ، اَنگُ اَزَلَ ۾ اُنِ جو.

بيت - 7

وَحۡدَہٗ جٖي وَڍِئا، اِلَّا اللہَ سٖين اورِينِ،
ھِيُون حَقيقتَ گڏئو، طريقتَ تورِينِ،
مَعرفَتَ جِيَ مانِ سٖين، ڏيساندَرُ ڏورِينِ،
سُکِہ نہ سُتا ڪَڏِھِمۡ، ويھِي نہ ووڙِينِ،
ڪُلَنِئُون ڪورِينِ، عاشقَ عبداللطيف چٖي.

بيت - 8

وَحۡدَہٗ جٖي وَڍِئا، اِلَّا اللہَ اڌَ ڪِئا،
مُحَمَّدٌ رَسُوۡلُ چئِي، مُسلمانَ ٿِئا،
عاشقَ عبداللّطيفُ چٖي، اِنَھِمۡ پَهِ پِئا،
تٖيلاہَ ڌڻِي ڌُئا، جٖيلاہَ وِئا وَحدتَ گڏجِي.

بيت - 9

وَحۡدَہٗ جٖي وَڍئا، ڪِئا اِلَّا اللہَ اڌَ،
سي ڌَڙَ پَسِي سَڌُ، ڪِهۡ اَڀاڳِيَ نہ ٿِيٖي.

بيت - 10

سِرُ ڍُونڍِيان، ڌڙُ نہ لھان، ڌڙُ ڍُونڍِيان، سِرُ ناہِ،
ھَٿَ ڪَرايُون آڱِريُون، وِئا ڪَپجِي ڪانهِ،
وَحدتَ جٖي وِھانء، جٖي وِئا سي وڍِئا.

بيت - 11

وَحۡدَہٗ لَا شَرِيۡڪَ لَهٗ، ٻُڌء نہ ٻوڙا،
ڪِ تو ڪَنٖين نہ سُئا، جٖي گهَٽَ اندر گهوڙا،
ڳاڙِيندِہۡ ڳوڙھا، جِت شاھدَ ٿِندَء سامُھا.

بيت - 12

وَحۡدَہٗ لَاشَرِيۡڪَ لَهٗ، اِيُ وِھائِجِ وِيُّ،
کَٽٖين جٖي ھارائيٖين، ھَنڌُ تُھجو ھِيُّ،
پاڻا چُندء بِيُّ، ڀَرٖي جامُ جَنَّتَ جو.

بيت - 13

وَحۡدَہٗ لَاشَرِيۡڪَ لَهٗ، اِيُ ھيڪَڙائِيَ حَقُّ،
ٻئائِيَ کي ٻَکُ، جَن وِڌو سي وِرَسِئا.

بيت - 14

عاشقُ چَؤُ مَ اُنَ کي، مَ ڪِين چَؤُ معشُوقُ،
خالِقُ چَؤُ مَ خامَ تون، نہ ڪِين چَؤُ مخلوقُ،
سَلِج تَھِين سُلوڪُ، جو ناقِصۡئا نِڱئِو.

بيت - 15

وَحۡدَتا ڪَثرتَ ٿِي، ڪثرتَ وحدتَ ڪُلُّ،
حقُّ حقيقِي ھيڪَڙو، ٻولِيِ ٻِيَ مَ ڀُلُّ،
ھُو ھُلاچو ھُلُّ، بِاللہِ سندو سَڄَڻٖين.

بيت - 16

پاڻِهۡ جَلَّ جَلَالُهٗ، پاڻِهۡ جانِ جمالُ،
پاڻِه صُورتَ پِريَ جِي، پاڻِه حسنُ ڪمالُ،
پاڻِه پِيرُ مُرِيدُ ٿيٖي، پاڻِه پاڻَ خيالُ،
سڀِ سڀوئِي حالُ، منجهائِي معلومُ ٿيٖي.

بيت - 17

پاڻِه پَسٖي پاڻَ کي، پاڻِه ئِي محبوبُ،
پاڻِه خلقٖي خوبُ، پاڻِه طالبُ تَن جو.

بيت - 18

سو ھِيُ، سو ھُو؛ سو اَجَلُ، سو اَللهُ؛
سو پرِين، سو پساھُ، سو ويرِي، سو واھَرُو.

بيت - 19

پَڙاڏو سو سڏُ، وَرُ وائِيَ جو جٖي لھٖين،
ھُئا اَڳِھِمۡ گڏُ، ٻُڌڻَ ۾ ٻہ ٿئا.

بيت - 20

ايڪُ قَصَرُ، دَرَ لَکَ، ڪوڙِين ڪَڻسِ ڳِڙکيُون،
جيڏاہَ ڪريان پَرَکَ، تيڏاہَ صاحبُ سامهُون.

بيت - 21

ڪوڙٖين ڪايائُون تُھجيُون، لِکَنِ لَکَ ھزارَ،
جِيُ سَڀڪِهۡ جِيَ سٖين، دَرَسَنُ ڌارو ڌارَ،
پِريَمِ تُھجا پارَ، ڪِھڙا چئِي ڪِيَ چُئان.

وائي - 1

سَڀَڪا پِريان ڪُون پُوڄٖي،
نِيهُ نٖيڻٖين، ڳُڻُ ڳالِ وو.
جا چِتايم چِتَ ۾، سڄڻُ سا ٿو ٻُجهي،
نِيهُ نٖيڻٖيڻ ڳُڻُ ڳالِ وو.
لاتِ جا لطيفَ جِي، سڏُ تِھجو سُڄٖي،
نِيهُ نٖيڻٖين ڳُڻُ ڳالِ وو.

بيت - 29

اَصلِ عاشقَ پاھجِي، سِسِي نہ سانڍِينِ،
لاھيو سِرُ لطيفُ چٖي، ساھُ سَلاڙِئو ڏِين،
ڪُلَنِئُون ڪاٽِينِ، پُڇَنِ پوءِ پِريتَڻُون.

داستان ٻيون

بيت - 1

اَگهِي اَگهائِي، رنجُ پِريان کي رسئو،
چَکِيَم چَڱائِي، سورانگهٖي سُورِيَ تان.

بيت - 2

اَنڌا اُونڌا وٖيڄَ! کَلَ ڪُڄاڙِئا کانئِيٖين؟
اسان ڏُکٖي ڏِيلَ ۾، تون پِياريٖين پٖيڄَ!
سُورِي جَنِين سٖيڄَ، مرڻُ تَن مُشاھِدو.

بيت - 3

سُورِيَ سڏُ ٿِئو، ڪا ھلندِي جيڏِيُون؟
وڃڻُ تَن پِئو، نالو نِيهَ ڳِنَنِ جي.

بيت - 4

سُورِي سڏَ ڪري، اُڀِي عاشِقَنِ کي،
جي اٿئِي سَڌَ سِڪڻَ ۾، تہ ڪَؤُ م پيرُ پري،
سِسِي ڌارَ ڌَري، پُڇجِ پوءِ پِريَتَڻُون.

بيت - 5

سُورِي آھِ سِنگارُ، اَڳِھِين عاشقن جو،
مُڙڻُ، موٽڻُ مِيھَڻُون، ٿِئا نِظارٖي نِروارُ،
ڪُسڻُ جو قرارُ، اَصلِ عاشقن کي.

بيت - 6

سُورِي سِنگارٖي، اَصلِ عاشقن کي،
لُڏِئا ڪِينَ لطيفُ چٖي، ٿِئا نٖيزٖي نِظارٖي،
ڪوٺِئو ڪِنارٖي، آڻِئو چاڙھٖي اُنِ کي.

بيت - 7

سُورِيَ مَٿي سٖيڻَ، ڪِھڙي لٖيکٖي سَنَرا؟
جٖيلَه لَڳا نيڻَ، تٖي سُوريائِي سٖيڄَ ٿِي.

بيت - 8

سُورِيَ چڙھڻُ، سيڄ پَسڻُ، اِيُ ڪمُ عاشقنِ،
پاھُون ڪِينَ پَسنِ، سائُو ھلنِ سامُھا.

بيت - 9

سُورِيَ جٖي سُؤُ وارَ، ڏِيھاڙئو چَنگِ چڙھٖين،
جِمَ وِرِچي ڇڏيٖين، سِڪڻَ جِي پچارَ،
پِرتِ نہ پسٖين پارَ، نِيهُ جِئائِين نِڱِئو.

بيت - 10

پِھرِين ڪاتِي پاء، پُڇجِ پوءِ پِريَتَڻُون،
ڏُکُ پِريان جو ڏِيلَ ۾، واڄَٽَ جِيَ وڄاءِ،
سِيخُنِ ماھُ پچاء، جٖي نالو ڳِيڙُءِ نِيهَ جو.

بيت - 11

ڪاتِيَ ڪونِه ڏوھُ، ڳَنُ وَڍِندَڙَ ھٿَ ۾،
پَسئو پَرِ عجيبَ جِي، لِچِئو وڃي لوھُ،
عاشقنِ اَندوھُ، سدا معشوقنِ جو.

بيت - 12

ڪاتِي تِکِي مَ ٿيٖي، مَرُ مُنِيائِي ھوءِ،
مانَ وِرمَنِ توءِ، مون پرِيان جا ھَٿَڙا.

بيت - 13

ڪاتِي جا قريبَ جِي، سا ھَڏۡ چِيري چَمُ،
عاشقن پَھجو اَڱُ، لِلہِ ڪارڻِ وَڍِئو.

بيت - 14

جٖي تون سِڪڻُ سِکئو، تہ ڪاتِيَ پَئِيَ ۾ ڪُنجُهہ،
سُپٖيريان جي سُورَ جو، ماڙُھنِ ڏجي نہ مَنجهُہ،
اندرِ اِيُ اَھنجُ، سانڍجِ سُکائُون ڪري.

بيت - 15

جان وَڍٖين تان ويھُ، نہ تہ وٺئو واٽَ وانءُ تون،
ھِيُ تنِين جو ڏيھُ، ڪاتي جَنِين ھَٿَ ۾.

بيت - 16

ڪاتِي جَنِ ڳرٖي، مان لنؤُ لڳو تَن سٖين،
محبتَ جي ميدانَ ۾، وڃان پيرَ ڀَرٖي،
اَڏِيَ سِرُ ڌَرٖي، مانَ ڪُھَنِھُون سُپرين.

بيت - 17

اَڳِيان اَڏِنِ وَٽِ، پويَنِ سِرَ سَنڀاھِيا،
ڪاتِ تہ پوءِ قَبُولَ ۾، مَڇُڻ ڀاييٖن گهَٽِ،
مَٿا مُھايَنِ جا، ٻئا نہ ڏِسٖين پَٽِ؟
ڪلاڙَڪٖي ھَٽِ، ڪُسڻَ جو ڪوپُ وَھٖي.

بيت - 18

جي اَٿِي سِڪَ سُرڪَ جِي، تہ وَنءُ ڪلاڙَنِ ڪاٽٖي،
لاھي رَکُ لطيفُ چٖي، مَٿو وٽِ ماٽٖي،
تِڪَ ڏيئِي پِڪَ پِيُ تون، گهوٽ مَنجها گهاٽٖي،
جو وَرنَهُ وھاٽٖي، سو سِرَ وٽِ سَرو ساھَنگو.

بيت - 19

جي اَٿِي سُڌَ سُرڪَ جِي، تہ وَنءُ ڪَلاڙَڪٖي ھَٽِ،
لاھي رَکُ لطيفُ چٖي، مَٿو ماٽٖي وَٽِ،
سِرُ ڏيئِي ۾ سَٽِ، پِيِج ڪي پِيالِيُون.

بيت - 20

جي اَٿِي سَڌُ سُرڪَ جِي، تہ وَنءُ ڪلاڙَڪٖي ڪُوءِ،
مَھيسَرَ جي مَدَ جِي، ھُتِ ھَڏِھِين ھُوءِ،
جان رَمزَ پَرُوڙِيَم رُوءِ، تان سِرَ وٽِ سُرڪِي سَڳُڻِي.

بيت - 21

جي اَٿِي سَڌُ سُرڪَ جِي، تہ وَنءُ ڪلاڙَڪٖي ڳَرِ،
وَڍَڻُ، چِيرَڻُ، چِچِرَڻُ، پَھتِ اُٺِينۡ جِي پَرِ،
جي وَٽِي پويِيء وَرِ، تہ سَھَنگِي آھ سَيِّدُ چٖي.

بيت - 22

ناڻي ناھِ ڪَڪُوھ، ڪِينۡ مُلِ مَھنگو مَنڌُ؟
سَنباھِج سيّد چٖي، ڪاٽڻَ ڪارڻِ ڪَنڌُ،
ھِيُ تَنِين جو ھَنڌُ، مَٽَنِ پاسِ مَرَنِ جي.

بيت - 23

عاشقَ زھرَ پياڪَ، وِھُ پَسئو، وِھۡسَنِ گهَڻُون،
ڪَڙٖي ۽ قاتِلَ جا، ھَميشَه ھيراڪ،
لَڳيَنِ لَنؤُ لطيفُ چٖي، فَنا ڪِئا فِراقَ،
توڻٖي چِڪَنِ چاڪَ، تَپِ آھَ نہ سَلَنِ عامَ کي.

بيت - 24

مَ ڪرِ سڌُ سَريٖ جِي، جٖي تون ٽارِيٖين ٽُوھُ،
پِيتٖي جِه پاسي ٿِيٖي، منجها رَڳُن رُوحُ،
ڪاٽٖي چَکُ ڪَڪُوھُ، لاھٖي سِرُ لطيفُ چٖي.

بيت - 25

سَڌَڙِيا سَري جِيُون، ڪُه پَچارُون ڪنِّ؟
جُہ ڪاتَ ڪُلاڙَنِ ڪڍئا، تہ موٽِئو پوءِ وڃنِّ،
پِڪُون سي پِيَنِّ، سِرَ جَنِين جا سَتِ ۾.

بيت - 26

سِرَ جُدا، ڌڙَ ڌارَ، دوڳَ جَنِين جا ديڳِ ۾،
سي مَرُ ڪن پَچارَ، ھَڪيا جَن جي ھٿَ ۾.

بيت - 27

ديڳيٖين دوڳَ ڪَڙھنِّ، جِت ڪَڙِيٖين ڪَڙَڪو نہ لھي،
تِتي طَبِيبنِّ، چاڪَ چِڪندا ڇَڏئا.

بيت - 28

سِسِي سي گهُرَنِ، جٖي واٽِندَڙَ وِچَـ۾،
اُوء ڪِينۡ ٻِئو پُڇَنِ، سَرو جَن سَنباھِيو؟

بيت - 30

اَصلِ عاشقن جو، سِرُ نہ سانڍڻُ ڪمُ،
سَؤَ سِسِنِئا اَڳَرو، سَندو دوسان دمُ،
ھِيُ ھڏو ۽ چمُ، پِڪَ پِريان جِيَ نہ پَڙٖي.

بيت - 31

جي مٿي وٽِ مِڙَنِ، تہ سڀڪَھِم سڌَ ٿيٖي،
سِرَ ڏِنٖي سَٽِ جُڙيٖ، تہ عاشقَ اِيَ اچنِ،
لِڌا تٖي لَڀَنِ، مُلِ مَھَنگا سُپِرِين.

بيت - 32

مُلِ مَھَنگو قَطَرو، سِڪَڻُ شَھادتَ،
اَسان عِبادتَ، نَظَرُ نازُ پِريَنِ جو.

وائي - 1

مَندُ پِئندي مون، ساڄَنُ سھِي سُڃاتو.
پِي پِيالو عشقَ جو، سَڀُڪِي سمجهو سُون، ساڄَنُ سھِي سُڃاتو.
پِريان سندي پارَ جِي، اندرِ آڳِ اَٿُون، ساڄَنُ سھِي سُڃاتو.
جِئَڻُ ناھي جَڳَ ۾، ڏيھَ مِڙيئِي ڏُون، ساڄَنُ سھِي سُڃاتو.
اَلا عبدالّلطيفُ چي، آھيِن تُونھِين تُون، ساڄَنُ سھِي سُڃاتو.

داستان ٽيون

بيت - 1

اُٿِياري اُٿِي وِئا، مَنجها مون آزارَ،
حبيبَ ئِي ھَڻِي وِئا، پِيڙا جِي پَچارَ،
طَبِيبن تَوارَ، ھَڏِ نہ وڻٖي ھاڻِ مون.

بيت - 2

ھَڏِ نہ وڻٖي ھاڻِ مون، وٖيڄنِ جِي وِصالَ،
ھِنَ مُھنجٖي حالَ، حبِيبُ ئِي ھادِي ٿِئو.

بيت - 3

حَبِيبُ ئِي ھادِي ٿِئو، رَھنُما راحتَ،
پِيڙا نِيائِين پاڻَ سٖين، لائٖي ڏيئِي لتَ،
سُپيرِيان صِحَتَ، ڏِنِيَمَ مَنجها ڏُکندٖي.

بيت - 4

اورِ ڏُکَندو اُو ٿِيٖي، ھادِي جِھ حَبِيبُ،
تِرُ تَفاوَتُ نہ ڪري، تِھ کي ڪو طَبِيبُ،
رَھَنُما رَقِيبُ، ساٿَرِ صِحَتَ سُپِرين.

بيت - 5

ساٿَرِ صِحَتَ سُپِرِين، آھي نہ آزارُ،
مجلسَ ويرَ مِٺو ٿِيٖي، ڪوٺِيندي قَھارُ،
خَنجرُ تِھ خوبُ ھڻي، جِھ سٖين ٿِيٖي يارُ،
صاحبُ رَبُّ سَتَّارُ، سوجهٖي رَڳُون ساھَ جِيُون.

بيت - 6

رَڳُون ٿيُون رَبابُ، وَڄَنِ ويلَ سَڀَڪَھِمۡ،
لُڇَڻُ، ڪُڇَڻ نہ ٿِئو، جانبُ رٖي جَبابُ،
سوئِي سنڌِيندُم سُپِرِين، ڪِيَسِ جِھ ڪَبابُ،
سوئي عينُ عَذابُ، سوئي راحَتَ رُوحَ جِي.

بيت - 7

سوئي راھَ رَدِّ ڪري، سوئي رَھَنُماءُ،
وَتُعِزُّ مَنۡ تَشَآءُ وَ تُذِلُّ مَنۡ تَشَآءُ.

بيت - 8

پَرِ ۾ پُڇيائون، عشقَ جي اَسبابَ کي،
دارُون ھِنَ دردَ جو، ڏاڍو ڏَسِيائُون،
آخِرُ وَالۡعَصۡر جو، اِيَھِم اُٿائُون،
تِھان پوءِ آئُون، سِڪان ٿِي سَلامَ کي.

بيت - 9

سِڪٖين ڪُھ سلامَ کي، ڪَرٖين ڪُھ نہ سَلامُ؟
ٻئا درَ تَن حرامُ، اِيُ دَرُ جَنِين دٖيکئو.

بيت - 10

مِٺايا مِٺو گهڻُون، ڪَڙو ناھِ ڪَلامُ،
سُڪُوتُ ئِي سلامُ، پِريان سَندٖي پارَ جو.

بيت - 11

پِريان سندي پارَ جِي، مِڙَئِي مِٺائِي،
ڪانِھ ڪَڙائِي، چَکٖين جٖي چيٖتُ ڪري.

بيت - 12

ڄاڻِي ٻُجهِي جَنِ، توسٖين سُورَ سَڃَ ڪِي،
تون ڪِيَ سنديُون تَنِ، پَرَ مٖين پَچارُون ڪَرٖين.

بيت - 13

تو جَنِين جِي تاتِ، تَن پُڻِ آھي تُھجِي،
فَاذکُرُنِيۡ اَذۡکُرۡکُمۡ، اِيَ پَرُوڙِج باتِ،
ھَٿِ ڪاتِي ڳُڙُ واتِ، پُڇَڻُ پَرِ پِريَنِ جِي.

بيت - 14

حَبِيبَنِ ھيڪارَ، مَنجها مِھرَ سڏُ ڪِئو،
سو مون سڀَ ڄمارَ، اورڻُ اُھوئِي ٿئو.

بيت - 15

پاٻوھٖي ھيڪارَ، مُونھان پُڇئو سَڄَڻٖين،
اَلَسۡتُ بِرَبِّکُمۡ، چَيائُون جِھ وارَ،
سندِي سورَ ڪِنارَ، تَنَ تَڏاھَڪُون نہ لھي.

بيت - 16

پاٻوھِيو پُڇَنِّ، ڪِٿي ھَٿُ حبيبَ جو؟
نيزي ھيٺا نِيھَ جي، پاسٖي پاڻُ نہ ڪَنّ،
عاشقَ اَجَلَ سامُھا، اُنچٖي ڳاٽِ اَچَنِّ،
ڪُسَڻُ قُربُ جَنِّ، مَرَڻُ تَنِّ مُشاھِدو.

بيت - 17

ڪوٺٖي ڪُھٖي سُپِرِين، ڪوٺٖي ڪُھڻَ ساڻُ،
نٖيزٖي ھيٺا نِيھَ جي، پاسٖي ڪرِ مَ پاڻُ،
ڄُلُ، وِڃائي ڄاڻُ، عاشقَ اَجَلَ سامُھِمۡ.

بيت - 18

ڪوٺڻُ قَرِيبَنِ جو، عينُ تَڙڻُ آھِ،
اِيَ اُلٽِي ڳالَڙِي، سِڪَ وَرندِي ساھِ،
آسَرَ ھَڏِ مَ لاھِ، ڇِنَڻُ ڳَنڍَڻُ اُنِ جو.

بيت - 19

ڪُھَنِ تان ڪَرَ لَھَنِ، ڪَرَ لَھَنِ تان ڪُھَنِّ،
سٖيئِي ماء مُھنِّ، سيئِي راحتَ رُوحَ جِي.

بيت - 20

ڪُھٖي سو ڪَرَ لَھٖي، ڪوٺٖي سو قَريبُ،
اِھا عادتَ سِکئو، ھَر زَمان حبيبُ،
تِڇٖي سو طبيبُ، سو ئي راحتَ رُحَ جِي.

بيت - 21

ڪُھَنِ ۽ ڪوٺِينِ، اِيَ پَرِ سندِي سَڄَڻٖين،
سُورِيَ چاڙھئو سُپِرِين، ڏنڀَ ڏِيھاڻِي ڏِينِ،
ويٺا وِرھُ وَٽِينِ، آءُ واڍوڙِئا وِھاء تون.

وائي - 1

ٿيندو تَنَ طبيبُ، دارُون مُھجٖي دردَ جو.
ٻُڪِي ڏيندُمِ ٻاجهَہ جِي، اَچِي شالَ عجيبُ،
دارُون مُھجٖي دردَ جو.
پِريَنِ اچِي پاڻُ ڪِئو، سندو غورُ غريبَ،
دارُون مُھجٖي دردَ جو.
ڏُکندو سڀوئِي ڏُورِ ڪِئو، مَنجهُون تَنَ طبيبَ،
دارُون مُھجٖي دردَ جو.
اديُون عبداللطيفُ چٖي، ھاتِڪُ آھِ حبيبُ،
دارُون مُھجٖي دردَ جو.

سر يمن ڪلياڻ

داستان پھريون

بيت - 1

تون حبيبُ تون طبيبُ، تون دردَ جِي دَوا،
جانِبَ مُهجٖي جِيَ ۾، اَزَرَ جا اَنوا،
صاحَب! ڏي شفا، مِيان! مريضنِ کي.

بيت - 2

تون حبيبُ، تون طبيبُ، تون دردَ جو دارُون،
دَوا آھِنِ دِل کي، تُهجيُون تَوارُون،
ڪَرِيان ٿِي ڪارُون، جِنۡ ٻُڪِي ٻِئَنِئُون نہ ٿيٖي.

بيت - 3

تون حبيبُ، تون طبيبُ، تُنهِم ڊَٺَنِ ڊَبُّ،
تون ڏِيٖين، تون لاھيٖين، تُنهِم ھادِي رَبُّ،
آھِمۡ اِيُ عجبُ، جِنۡ وارِئو ويڄَ وِھاريٖين.

بيت - 4

تون حبيبُ، تون طبيبُ، تون دارُون کي دردَنِ،
تون ڏِيٖين، تون لاھيٖين، ڏاتَرَ! کي ڏُکندَنِ،
تَڏِہ ڦَڪِيُون فَرَقُ ڪَنِ، جَڏِہ اَمرُ ڪَرھِو اُنِ کي.

بيت - 5

جان ڪٖي ڪَري طبيبُ، داروُن ھِنَ دردَ جا،
ھَڻِئو سي حبيبُ، اُکوڙِئو اَڌَ ڪَري.

بيت - 6

ھَڻُ حبيبَ ھٿُ کڻِي، ٿيڪِ مَ، ٿورو لاءِ،
پِريَم تُهجٖي گهاءِ، مَران تہ مانُ لَهان.

بيت - 7

ھَڻُ حبيبَ ھٿُ کڻِي، دِل ۾ ڌِيرِي دانهَ،
ڪُڇان تان ڪُوڪَ ٿِيٖي، صبرُ آئُون نہ سَهان،
ڪِه کي اِيَ چُوئان، تہ مُونکٖي مارئو سَڄَڻٖين.

بيت - 8

ھَڻُ حبيبَ ھٿُ کڻِي، ٻَنگا لهِي ٻاڻُ،
ماڳِهِين مون مِنهُ ٿيٖي، جهولِيَ وجهان پاڻُ،
اِنَ پَرِ ساڄَنَ ساڻُ، مانَ مُقابلو مون ٿيٖي.

بيت - 9

جِت حبيبَ ھڻنِ، نائُڪَ ڀَرٖي نِيهَ جِي،
تِتٖي طبيبنِ، وِڄا وڃٖي وِسَرِي.

بيت - 10

ھَڻٖين جٖي حبيبَ! مَحبتِي مَيا ڪري،
پُڇان ڪِينَ طبيبَ ھُندَ گهائَنِ سيٖن ٿِي گهارِيان.

بيت - 11

چورٖي چَنگُ، ٻَنگُ لهِي، حبيبنِّ ھَنيوسِ،
ٻُجهان ٻاڻُ لڳوسِ، ڪانارِئو ڪَرَ کڻٖي.

بيت - 12

ڪانارِئا ڪُڻِڪَنِ، جَنِين لوہُ لِڱَنِ ۾،
محبتَ جي ميدانَ ۾، پِئا لالَ لُڇَنِ،
پاڻِه ٻَڌنِ پَٽِيون، پاڻِه چِڪِئا ڪَنِ
وَٽا واڍوڙِئَنِ، رھيِ اچجٖي راتَڙِي.

بيت - 13

رھِي اچجٖي راتَڙِي، تَنِ واڍوڙِئن وَٽاءَ،
جَنِ کي سُورُ سريِرَ ۾، گَهٽَ مَنجهارا گهاءَ،
لِڪائٖي لوڪاءَ، پاڻِه ٻَڌنِ پَٽيُون.

بيت - 14

اَڄ پُڻ ڪَنجهو ڪَنجهَہ، واڍوڙَڪِيَ مَنَهِيَ،
جُہ پُڻ پيٖيَنِ سَنجَهہ ھُوءِ پِنِيُون ھُوءِ پَٽِيُون.

بيت - 15

اَڄ پڻ ڪِهَڙِي دانهَ، واڍوڙَڪِيَ مَنَهِيَ؟
ويڄَ ورائٖي ٻانهَ، چورٖي چاڪَ نِهارِئا.

بيت - 16

ويچارا واڍوڙَ، سَدا شاڪِرَ سُورَ سيٖن،
تاڻِينِ مٿي توڙَ، اورٖي ڪَنِ نہ اَسرو.

بيت - 17

سَدا آھي سُورَ جِي، واڍوڙِئَنِ وائِي،
جيڪا اَٿِنِ مَنَ ۾، سَلَنِ نہ سائِي،
اوڙَڪِ اُھائِي، ڳولِئو لهنِ ڳالَڙِي.

بيت - 18

سَگَهنِ سُڌِ نہ سُورَ جِي، گهايَلَ ڪِيَ گهارِينِ؟
پئَلَ پاسو پَٽَ تان، واڍوڙَ نہ وارِينِ،
پَرِ ۾ پَچَنِ پِريَ لَيءِ، ھَيءِ! ھَنجُون ھاريِنِ،
سڄڻُ جٖي سارِينِ، تَنِ رويو وِھامٖي راتَڙِي.

بيت - 19

سَگَهنِ سُڌِ نہ سُورَ جِي، ٿا رُنڪَنِ رَنجوُرِي،
پِئا آھنِ پَٽَ ۾، مَٿنِ مامُورِي،
لَڳيَنِ لَنؤُ لطيفُ چٖي، سَدا جِي سُورِي،
پِرتِ جَنِ پُورِي، تَنِ رويو وِھامٖي راتَڙِي.

بيت - 20

آيَلِ اُنِ نہ وِسَهان، ھَنجُون جٖي ھارِينِ،
آڻِئو آبُ اَکِنِ ۾، ڏِہَ کي ڏيکارِينِ،
سَڄَڻُ جٖي سارِينِ، سٖي نہ ڪِينۡ رُونِ نہ چُونِ ڪِينۡ.

وائي - 1

وِرسِئا ويڄَ ويچارا! دِل ۾ دردُ پِريَنِ جو.
اُٿِيو ويڄا! مَ وھو وڃَو ڊَبَ کڻِي،
دِل ۾ دردُ پِريَنِ جو.
ٻُڪِي ڏِيندا ٻاجَهہ جِي، آيا سُورَ ڌڻِي،
آيا جِيَ جِيارا،
دل ۾ دردُ پِريَنِ جو.

داستان ٻيون

بيت - 1

تَنَ طبيبُ نہ تون، سُڌِ نہ لَهِم سُورَ جِي،
سانڍِ پَهجا ڊَبَڙا، کَڏَ کڻِي ۾ ڀُون،
ڪانَ گُهرجي مُون، حَياتِي ھوتَنِ رٖي.

بيت - 2

ويڄنِ سٖين وائِيَ پِئا، ڪِرِي نہ ڪِئائُون،
جٖي پَندِ پارئائُون، تہ سِگهائِي سَگها ٿئا.

بيت - 3

ويڄنِ سٖين وائِي پِئا، ڪِرِي ڪَنِ نہ پاڻِ
اَگها اِنَ اُھڃاڻِ، پَسو! سُورَ سِجهائِيا.

بيت - 4

آھي گَهڻُون اَگَهنِ جو، تَرَسُ طبيبنِّ،
ڪِئو وَسُ وِيڄنِّ، تان ڪِرِيَ رٖي ڪِينَ ٿيٖي.

بيت - 5

تَرَسُ طبيبن جو، جَڏَنِ ڪئِو نہ جات،
جو ويڄن جٖي واتِ، دارُونئا تهِ دُورِ ٿِئا.

بيت - 6

اَگهائِي سَگها ٿِئا، جٖي ويٺا وٽِ ويڄنِّ،
تَرَسِي طبيبنِّ، چيٺي ھوندَ چڱا ڪِئا.

بيت - 7

پاڙٖي ويڄَ ھُئامِ، تان مون مُورِ نہ پُڇئا
تٖيلاھين پئامِ مورٖيسَرَ اَکِيَنِ ۾.

بيت - 8

ھارِئا تو ھِرِي، ڪُپَڇُ ڪايا سٖين ڪِئو،
ڪَرِيٖين جٖي ڪِرِي، تہ تون تَوانُون ٿيٖين.

بيت - 9

جي ڀائِيٖين پِرِيَ مِڙان، سِکُ چوران ڪيِ ڌاتِ،
جاڳَڻُ جَشنُ جَنِ کي، سُکُ نہ سارِي راتِ،
اُڄِي ٻُڄِي آئِيا، وائِي ڪَنِ نہ واتِ
سَلٖي سُورِيَ چاڙھئا، بَيان ڪَنِ نہ باتِ
توڻٖي ڪُسنِ ڪاتِ، ساڳِي سَلَنِ ڪينَ ڪِين.

بيت - 10

تڙٖي طبيبّنِ، گهايلُ گُهراء ڪَڍئو،
چِڪئا چاڪَ چِهُون ڪرٖي، ڪَڙيُون مورِ نہ ڪَنِّ،
دوستَ جي درسَن سٖين، پُئٖي ٺارُ ٺَپَنِّ،
وِرچِئو ويڄَ وڃّنِ، آءُ تہ پرِيَمِ اُبَهان.

بيت - 11

ويڄنِ ويٺٖيئِي، دوسُ پيهِي درِ آئيو،
صِحَتَ جِي سَرِيرَ ۾، ڪَلَّ ڪَرٖين پيئِي،
پِيڙَ پَرٖي ويئِي، اچڻَ ساڻُ عجيبَ جٖي.

بيت - 12

وَڍٖي جَنِ وِڌياسِ، وَرِي ويڄَ ئِي سي ٿِئا،
تُرتُ ٻَڌائُون پَٽيوُن، روزِ ڪِئائُون راسِ،
ھِيڙا! تَنِين پاسِ، گهارِ تہ گهايَلُ نہ ٿيٖين.

بيت - 13

ھارِئا ويڄَ! مُياسِ! سُڌِ نہ لَهِم سُورَ جِي،
پِريان کي چُندِياسِ، تہ تَرَسُ طبيبنِ ڇَڏئو.

بيت - 14

ويڄَ! مَ ٻُڪِي ڏٖي! اَلا چَڱِي مَ ٿِيان!،
سَڄَڻُ مانَ اچٖي، ڪَرَ لاھُو ٿِي ڪَڏِھِم.

بيت - 15

وِھَڻُ ويڄنِ وَٽِ، جي سِکٖين تَہ سَگهو ٿِيٖين،
اَڳِين عادتَ مَٽِ، تہ اَگها! عاجِزُ نہ ٿيٖين.

بيت - 16

ھُئٖين تہ ويڄنِ وَٽِ، تون ڪِيَ جِيَ جَڏو ٿيٖين؟
سِرُ ڏيئِي ۾ سَٽِ، ڪُھ نہ ڪِيَيءِ ڊَبَڙا؟

بيت - 17

ڪُٺِيسَ ڪُويٖڄَنِّ، تَنَ طبيبَ نہ گڏئا
ڏيئِي ڏنڀَ ڏَڏَنِّ، پاڻا ڏِيلُ ڏکوئِيو

بيت - 18

دارُون ۽ ڪاروُن، جان ڪٖي ڪِئا ويڄَ مون!
ٻُڪِي ڏِيندا ٻاجهَہ جِي، نِهارٖي ناڙُون،
جَنِ جِيُون سيٖڻَ لهنِ سارُون، تَن تان ڏُکَندو ڏُورِ ٿيٖي.

بيت - 19

اَگَهنِ مِڙِي اَڄُ، ڪئِو سَڏُ صِحَتَ کي
ڏُورِ ڏُکندا ڀَڄُ، مِهرِيَ مُه ڏيکاريو.

وائي - 1

اَچِي سارَ لَهيجِ، ساڄَنَ سُورَ تُمارٖي آئُون مارِي!
سُورَ تُمارٖي جي مَران، تان مُون ڏوہُ نہ ڏيجِ.
ساڄَنَ سُورَ تُماري آئُون ماري!
ڊَبَنِ ڀَرٖي ھَٿَڙا، دارُون دوستَ ڪَريجِ،
ساڄن سُورَ تُمارٖي آئُون مارِي!

داستان ٽيون

بيت - 1

ھَيءِ ھَيءِ! وَھٖي ھاءِ، مَنَ م محبوبنِ جِي!
جيرا جوشَ جَلائيا، بُڪِنِ ٻَرٖي باھِ!
پَسو مَچَ مَٿاءِ، جٖي ويساہِ نہ وِسَهو!

بيت - 2

ھَيءِ ھَيءِ! وَھٖي ھُوءِ، مَنَ ۾ محبوبنِ جِي!
جيرا جوش جَلائِيا، بُڪِن مُڪِي بُوءِ!
اچِي پَسو رُوءِ، جي ويساہِ نہ وِسَهو!

بيت - 3

ڪانڊٖين ٽانڊٖين ٻاٻُرٖين، پَچان مَرُ پيئِي!
جيرا جِڳِرَ بُڪِيوُن، سِيخُنِ م ٽيئيِ!
ويڄنِئوُن ويئِي! ٿِي وھِيڻِي سَڄَڻٖين!

بيت - 4

سَرُ جو سَڃِئو سَڄَڻٖين، ڀَرُ ڀٖيڏِيَ ڏيئِي
ڪانَ ڪَرِنگَرُ ڪَپِئو، پَکَنِ سِرِ پيهِي!
جيرا جِڳِرَ بُڪيِوُن، پاساڙا ٻيئِي!
ويڄنِئُون ويئِي! ٿِي وھيِڻِي سَڄَڻٖين!

بيت - 5

سَرُ جو سَڃِئو سَڄَڻٖين، ٻَنگا ٻاڻُ ڀَريٖ،
وِئو وُجُودا نِڪَرِي، ڪَڙ ڪَڙ ڪانُ ڪَرٖي!
پُڇو پيرَ ڀَرٖي، تہ ڪِ ٺَرئِو ھَٿُ حبيبَ جو؟

بيت - 6

سَرُ جو سَڃِئو سَڄَڻٖين، ٻِيهَرَ ٻاڻُ ڀَرٖي
ڇَمَڪِئو سو چوہَ مان، ڪَڙ ڪَڙ ڪانُ ڪَرٖي،
جيرا جِڳِرَ بُڪِيوُن، لنگهٖي پِيو پَرٖي
لڳو جِيَ جَڙيٖ، تاڻِيان تِيرُ نہ نِڪَرٖي!

بيت - 7

سَرُ جو سَڃِئو سَڄَڻٖين سِينڱَ منجها سِيلو
ٽِنگَرُ ٽِڪِئو ڪِينَ ڪِينۡ، پارِ لنگهئو پِيلو،
ھڻَڻ سيٖن حيِلو، جانِبَ جٖيڏوئِي ڪئِو!

بيت - 8

ڌَڳايومِ ڌَئِين، ڄٖيرو اَندرِ ڄِندَڙٖي!
لڳِي سِيخَ وُجُودَ ۾، سندِي نِيه نَئِين!
مُشاھدٖي تَهين، مونکي وِڌو مَچ ۾!

بيت - 9

پُڇُ پَتنگنِ کي، سندِيوُن کامَڻَ خَبَروُن،
آڻِئو وِجهَنِ آڳِ ۾، جِيُ پَهجو جٖي،
جٖيرٖي جَنينِ جٖي، لَڳا نيزا نِيهَ جا!

بيت - 10

پَتنگُ چايٖين پاڻَ کي، تہ اچِي آڳِ اُجھاءِ!
پَچڻَ گهڻا پَچائِيا، تون پچڻَ کي پَچاءِ!
واقفُ ٿِي وِساءِ، آڳِ نہ ڏِجٖي عاَم کي.

بيت - 11

پَتنگُ چايٖين پاڻَ کي، تہ ڄٖيرٖي پَؤُ ڄاڻِي!
تان تان تاڻِجِ تَوَ ڏٖي، جان آڳِ نہ اُجهاڻِي!
وِسَ‏هُ وِھاڻِي! آڳِ نہ ڏِجٖي عاَم کي!

بيت - 12

پَتنگُ چايٖين پاڻَ کي، پَسِي مَچُ مَ موٽُ!
سَهائٖي سُپٖيريَن جٖي، گِهڙُ تہ ٿيٖين گهوٽُ!
اَڃا تون اَروٽُ! کُورٖي خبرَ نہ لَهِم!

بيت - 13

پَتنگنِ پَهُ ڪِئو، مِڙئا مَٿٖي مَچَّ،
پَسِي لَ‏هسَ نہ لِچئا، سَڙِئا مَٿي سَچَّ،
سندا ڳِچيَنِ ڳَچَّ، ويچارِن وِڃائِيا.

بيت - 14

چَڙھئو چَڪاسِن چاءِ، آڳِ ٻَرندٖي آئيا
وِھُسَنِ واڙِيَ ڦُلَ جِنءَ، مَحبتِي مَچَ لاءِ
آڻٖي پاڻُ اَڙاءِ، کِڻي کُورٖي وِچَ ۾.

بيت - 15

جي تَتو تَنُ تَنُورَ جِنءَ، تہ ڇَنڊٖي ساڻُ ڇَماءِ،
آڻٖي آڳِ اَدبَ جِي، ٻارٖي جانِ جَلاءِ
بُرقِئا اندرِ بازيُون، پَ‏هجِيُون سڀِ پَچاءِ،
لُڇَڻُ، لَنؤُ لطيفُ چٖي، پَڌَرِ ھَڏِ مَ پاءِ،
مَتان لوڪَ لَکاءِ، وِصالا وِچُ پَئٖي!

بيت - 16

اَڃا تَنُوراءِ، ڪالَ ڪڍياسُون سَڄڻٖين
پُڻ تايائُون تَڪڙو، وَحدتَ جٖي وَڌاءِ
مَحَبَتِيَنِ مَٿاءِ، مَچُ مُورائيِن نہ لهي!

بيت - 17

پَچائٖي پَهاڻُ، جَن رساڻِئو رُڪَ کي،
تَنِين سندو ڄاڻُ، آھي آڳَڙِيَنِ کي.

بيت - 18

ڌَنءُ ڌنءُ ڌمڻَ وارَ، اڄُ پُڻ اَڳَڙِيَن جيِ،
ٻارٖي مَچُ مَجارَ جو، اوتِيائُون اَڱارَ،
ڌُوڌِئا ٿِيُ مَ ڌارَ جِمَ ڪَچو رُڪُ ڪَڻيوُن ٿيٖي.

بيت - 19

ڌُوڌا تون نہ ڌنئٖين! آڳِ اوڏو نہ وَڃٖين!
اُلا جي عشقَ جا، سي تان تُون نہ سَهٖين!
اُڀو اِيَ چُئٖين، تہ آئُون آڳَڙِيون آھيان!

بيت - 20

سِرُ سانداڻِ ڪَرٖي، پُڇِجِ گَهرُ لُهارَ جو!
ڌَڪَنِ ھيٺِ ڌَرٖي، مانَ گَڏيِنِيءِ رُڪَ سٖين!

بيت - 21

سَهٖين جِنءَ سانداڻِ، ڌَڪَنِ مَٿٖي ڌَڪَڙا!
وَہِ وِڃائٖي پاڻِ، ذٖي ڏَٻائُون ڏُڱَريٖن!

بيت - 22

ھَيءِ! ٻَرِ! اَڱارَنِ، ٻَڏاھِين ٻَرنِ جٖي،
ھِڪُ کُورٖي کانئِيا، ٻئو ڌُوڌٖي مَنجهِہ ڌَڳَنِ
پاڻا لُهارَنِ ميڙٖي رَکِئا مَچَ لَيءِ!

بيت - 23

ٻارِيو اُجهائِينِ، پِريِن اُجهايو ٻارِينِ!
موُن کٖي ٿا مارِينِ، لُئا لُهارَنِ جا!

بيت - 24

اَڄُ آڳَڙِيا ائِيا، سُوڌا سِراڻِي،
پِيارٖي پاڻِي، تيٖغُون ڪندا تِکيوُن.

بيت - 25

اَڄُ آڳَڙِيا آئِيا، سائُو، ڪٖي سُڄاڻَ
لاھِندا موُرِياڻَ، رُڪُ ڪَرِيندا پَڌَرو.

بيت - 26

ڪَٽُ ڪَڙھٖي، لوہُ ٻَرٖي، ڌُوڌا جِت ڌَڳَنِ!
مَتَرِڪَنِ مُهَ ڪَڍئا سانداڻيوُن سَڪَنِ!
اَڄُ پُڻ آڳَڙِيَنِ، ميڙو آھي مَچَ تي!

بيت - 27

سَرَھا ڏِٺَم سي، جَن ساڃاءِ سِراڻِ سٖين،
تيغَ تَنيِن جٖي کي، ڪَٽُ نہ لڳٖي ڪَڏِھِمِ!

وائي - 1

جِيُ جِيارئو، جِيُ جِيارئو، ڪِينَ مُهجَڙو ھارِئو،
مُهجو جِيُ جِيارئو.
پِريَنِ جِيَ پَچارَ، سيڻَنِ جِيَ سَنڀارَ، جَڏَڙو جِيُ جيارئو،
مُهجو جِيُ جِيارِئو.
اُڃِئو تَنُ عَمِيقَ مان، پِريَنِ پُوڄَ پِيارِئو،
مُهجو جِيُ جِيارِئو.
مَرَضُ مَرِيضَنِ تان، اِشاريٖ ساڻُ اُتارِئو، مُهجو جِيُ جِيارِئو.
ڪَرَمَ ڪرِيمَنِ جي مُون کٖي، اَھُکِيَ مان اُڪارئِو، مُهجو جِيُ جِيارِئو.
سَئوُن مُه ڪَري سُپِريِن، اَئِين نِرمَلَ نُورَ ن‏هارِئو، مُهجو جِيُ جِيارِئو.
سائِلَنِ جِنءَ سَڏَ ڪَري، اَئِين طالِحَنِ کي تارِئوا، مُهجو جِيُ جِيارئو

داستان چوٿون

بيت - 1

ايڪُ پِيالو! ٻہ ڄَڻا! عشقُ نہ ڪري اِيَّ!
ليکِيا جي لِکَڻَ ۾، سي قُربِ رَسندا ڪِيَّ؟
ھُئڻَ ڪِئا ھِيَّ، وانجِئا پَسُ! وِصالَ کان.

بيت - 2

ايڪُ پِيالو! ٻہ ڄَڻا! عشقُ نہ اِيَّ ڪَرٖي
آٽِي سي ايڪُ ٿِئا، جي گَتا نِيھَ ڳَرٖي
دُئِي ڌارَ ڌَرٖي، خُلَّتَ خَنجَرُ آئيو.

بيت - 3

ايڪُ پِيالو! ٻہ ڄَڻا! عشقُ نہ ڪري اَڌَ!
اِيَ تان ساعِرَ سَڌَ، ڪِيَيءِ جا قَوالَ سٖين!

بيت - 4

جيڏاہَ قاتِلَ ڪوڙَ، اکيُون اوڏاھمِ کَڻٖي
وِہُ تَنِين جِي ووڙَ، جَنِين سانگُ نہ ساہَ جو.

بيت - 5

اَکِيُون اوڏاھِم کَڻٖي، جيڏاہَ قاتِلَ ڪُلِّ،
مَٿو ڪَنِ نہ مُلِّ، پِڪَ برابر پاھِجو.

بيت - 6

قاتِلَ ڪمائِي ڪَري، وِہُ ماکِي جٖي ڪَنِ،
وَٽا ويهِي تَنِ، پِيِجِ ڪٖي پِيالِيوُن.

بيت - 7

ھُندو ھَڏِ مَ سَنڌِ، لاءِ پِيا ڪَنِ پاھِجو
پُوڄَ پِيارِج پَنهِيَڙا، وِيندا وِٺِئو ڪنڌِ،
تہ ھَٽَ تُهجٖي ھنڌِ، موکِي! ڪو مانُ لَهٖي.

بيت - 8

ھُندو ھَڏِ مَ رَکُ، لاءِ پِياڪَنِ پاھِجو
وٽِي واٽاڙُئَنِ کي، تان پيارٖي پَرَکُ
سا لِکَ لهي ٿِي لَکُ، جا تو اِيندِي اُنِ سٖين.

بيت - 9

گَهٽَنِ م گُهٽِڪَنِ وَٽِيوُن پِيَنِ وِہَ گاڏُيوُن،
برخيز بِدہ ساقِي، پِيارِ کي پِريَنِ،
پِڪٖين نَہ پَرچَنِ، مَٽَ تَڪِيائُون مَنجِهيان.

بيت - 10

آڻٖي اُتَرَ واءَ موکِيَ مَٽَ اُپَٽِئا،
مَتارا تِه ساءَ، اَچَنِ سِرَ سَنباھِئو.

بيت - 11

وِجِهجِ واٽاڙُئَنِ تي، مَيخانٖي جِي ماڪَ،
ٿِندِي سُڌِ سَڀَڪَهِم، ھنڌِ ھنڌِ پُندِي ھاڪَ،
پِرہَ جا پِياڪَ، جُه سي اَڱَڻِ آئِيا.

بيت - 12

جُه سي اَڱَڻِ آئِيا، تہ سَرو ڪَندا سُڃَ
سائِي ٿِنديَنِ اُڃَ، ھِي پِيتو! ھُو آڻِ ڪِين!

بيت - 13

موکِي چوکِي نہ ٿيَي، اَصلِ اوڇِي ذاتِ،
وَٽيُون ڏيئي واتِ، مَتارا جِه مارِئا.

بيت - 14

مَتارا مَرِي وِئا، موکِي تون نہ مَرٖين!
ڪٖيهِيَ پَرِ پَرٖين، ڏُکِي ڏاتارَنِ رٖي؟

بيت - 15

مَتارا مَرِي وِئا، موکِي، تُون ڀِي مَرُ!
تُهجو ڏوسُ ڏَمَرُ، ڪونَ سَهَندو اُنِ رٖي!

بيت - 16

سَرٖي ڪِينَ ڪِئون، ويڻَ موکِيَ جي مارِئا!
ڪو جو سُخنُ ڪَلاٰڙَ جو، پِتٖي تي پِئونِ!
تِهان پوءِ ٿِئون، مَرَڻُ مَتارنِ کي!

بيت - 17

اَڃا کُورٖي ماڳَ! مَٽَ ڪُٽِڪا، ڪَٽَ گَهڻان،
لاھٖي وِہُ مَ لاڳَ، موکِي مَتارنِ جا.

بيت - 18

ڪَنڌِ ڪَٽارو، مُهِ وَٽِي، عادتَ جَنِين اِيَّ،
تَنيِن تِڪُون ڏِٺيُون، جُنبِي مَنجها جِيَّ،
سَرو تَنِ سَبِيَّ، جَن حاصُلُ ڪِئو حالَ کي.

بيت - 19

موکِيَ مَٺو نہ گُهرِئا، وِہَ نہ وِھاٽِئا
سُرڪِيَ ڪاڻِ سَيِّدُ چٖي، اُتٖي ٿِي آٽِئا
جٖي ڳالِنَ ڳَنڱاٽِئا، تَنِ بَٺَنِ پاسي بُٺِيُون.

بيت - 20

سِرُ ڏيئِي سَٽِ جوڙِ، ڪِه پَرِ ڪَلاڙَنِ سيٖن!
ڪاتِي ڪَرٽُ ڪَپار ۾، خَنجرُ آڻٖي کوڙِ!
مَرَڻا مُه مَ موڙِ، وَٽِي ٿِي وَڌِ لهٖي!

بيت - 21

وَٽَ وَٽَ وَٽِيَ ۾، مَٽَ مَٽَ مَندُ ٻِئو،
قَدرُ ڪيفَ ڪلاڙَا جو پِياڪَنِ پِئو،
اَچن دُرسُ دُڪانَ تي، ڪَنڌَ قَبول ڪِئو،
سُرَھا سِرُ ڏِئو، چَکَنِ سُرِڪَ سَيِّدُ چٖي.

بيت - 22

آٽِي ٿِيُ اَڱارَ، کامِي کِردارَنِ سٖين!
پَسٖين سي ڀَتارَ، پُرِ پِيتوءِ جَن سٖين.

بيت - 23

ڪَلاڙنِئُون ڪاءِ، مَتِ نہ سِکٖين مُون ھِيان!
رُندٖي راتِ وِھاءِ چِڪائِندٖي بَٺِيُُون!

وائي - 1

دوسُ پيهِي دَرِ آئِيو، ٿِئو مِلَڻَ جو ساعِيو،
ڏِيهِين پُڄاڻوُن آڻٖي اسان کي، مولٖي مُحِبُ مِلائِيو،
ٿِئو مِلَڻ جو ساعِيو.
وئو وِڇوڙو ٿِئو ميلاپو، واحِدَ واءُ ورائِيو،
ٿِئو مِلَڻَ جو ساعِيو.
ھو جِهِين جو ڏَسُ ڏُوراڏو، اوڏو اَڄُ سو آئِيو،
ٿِئو مِلَڻَ جو ساعِيو.
عَبۡدُالّلَطِيفُ چٖي، اَچِي عَجِيبن پاڻَ فَضلُ فَرمائِيو،
ٿِئو مِلَڻ جو ساعِيو.

داستان پنجون

بيت - 1

صُوفِي سالُمِ وِئا، جي اَڪثَرَ سٖين اَڏيارَ،
بازِي بازِندَنِ کي، آھي اَوٖيسارَ،
پِريان سٖين پَهَڪارَ، رِندِيَ رَساڻٖي ڪِئا.

بيت - 2

صُوفِيَ سيرُ سَڀَنِ ۾، جِنۡ رَڳُنِ ۾ پَساہُ،
سا نَہ ڪَري ڳالَڙِي، جِنۡ پَرِيُون پَروڙٖي پَساہُ،
اھِسِ اِيُ گُناہُ، جي ڪا ڪَري پَڌَرِي.

بيت - 3

ڏِٺٖي ڏُکويا، اَڻَ ڏِٺٖي راضِي ٿِئا،
صوُفِي تٖي ٿِئا، جِنۡ ڪِينَ کَيائُون پاڻ سٖين.

بيت - 4

صوُفِي لاڪُوفِي، ڪونَ ڀائِسِ ڪٖيرُ،
مَنجهائِي مَنجهہ وِڙھٖي، پَڌَرِ نَہ آھِسِ پٖيرُ،
جَنيِن ساڻُسِ وٖيرُ، ٿيٖي تَنِين جو واھَرُو.

بيت - 5

صوُفِيَ صافُ ڪِئو، ڌوئِي وَرَقُ وُجُودَ جو،
تِهان پوءِ ٿِئو، جِيَرٖي پَسَڻُ پِرِيَ جو.

بيت - 6

صوُفِي چائٖين سَڌَ ڪَرٖين! صُوفِنِ اِيَ نہ صَلاحَ،
ڪاٽٖي رَکُ ڪُلاہَ، وِجُهہ، اُڇَلٖي آڳِ ۾.

بيت - 7

جي ڪُلاہَ رَکٖين ڪَنڌَ تي، تہ صُوفِي سالِمُ ٿِيُّ،
وِہَ وَٽِي ھَٿِ ڪري، پُرِ پِيالو پيُّ،
ھَنڌُ تَنِين جو ھِيُّ، جَن حاصُلُ ڪِئو حالَ کي.

بيت - 8

جُسٖي ۾ جَبَّارَ جو، خَفِي خِيمُون کوڙِ،
جَلِّي تون زَبانَ سيٖن، چارَئِي پَهرَ چورِ،
فِڪرَ سٖين فُرقانَ ۾، اِسمُ اَعظمُ ڏورِ،
ٻِئا دَرَ وَڃِي مَ ووِڙ، اِيُ اَمُلُ اِئائِين سَپَڄٖي.

بيت - 9

عالَمُ آئُون ساڻُ، ڀَرئو ٿو ڀيٖرَ ڪري،
پاڻَ نہ آھي ڄاڻُ، مانڊِيَ مَنڊُ پَکيڙِئو.

بيت - 10

طالِبُ ڪَثَرَ، سُنهَ سَرُ، اَندرِ رُومِيَ راءِ،
ماڙھُو اِتِ ڪئاءِ، مَنڊُ نہ پَسٖين مَنڊِئو!

بيت - 11

طالِبُ ڪَثَرَ، سُنَه سَرُ، اِيَ رُومِيَ جيَ روُءِ،
جَنِين ڏِٺِي جُوءِ، تَنِين ڪُڇِئو ڪِينَ ڪِين.

بيت - 12

طالِبُ ڪَثَرَا، سُنَه سَرُ، رُومِيَ چو آھٖي،
تاڙِي جي لاھٖي، تہ مَنجِهِم مُشاھِدو ٿيٖي.

بيت - 13

طالِبُ ڪَثَرَ، سُنهَ سَرُ، اِيَ روُمِيَ جيِ رِھاڻِ،
پِهرِين وِڃائِڻُ پاڻِ، پَسَڻُ پوءِ پِريَنِ کي.

بيت - 14

طالِبُ ڪَثَرَا، سُنهَ سَرُ، اِيَ رومِيَ جِي راحَت،
جَنِين ڏِٺِي مَتَ، تَنِين ڪُڇِئو ڪِينَ ڪِيۡن.

بيت - 15

طالِبُ ڪَثَرَا، سُنهَ سَرُ، اِيَ رُومِيَ جِي اوطاقَ،
جٖي ڀَڄٖي دَرُ فِراقَ، تہ مَنجِهِم مُشاھِدو ٿِيٖي.

بيت - 16

ظاھِرَ۾ زانِي، فِڪرَ منجهہ فَنا ٿِئا،
تَنِينَ کي تَعلِيمَ جِي، ڪُڙِہ اندرِ ڪانِي،
حَرَفُ حَقّانِي دَورُ ڪِئائُون دِل ۾.

بيت - 17

جَن کي دَورُ دَردَ جو، سبقُ سُورَ پڙَھنِّ،
فِڪرَ ڦرَھِي ھَٿَ ۾، ماٺِ مُطالِع ڪَنِّ،
پَنُو سو پَڙھنِّ، جِه م پَسَنِ پِرِيَ کي.

بيت - 18

سا سِٽَ سارِيائُون، اَلِفُ جِه جٖي اَڳِ ۾،
لاَ مَقۡصُوۡدَ فِي الدَّارَيۡنِ، اِنَ پَرِ اُتائُون،
سَڳَرُ سوٺائُون، ٿِئا رَسِيلا رَحمانَ سيٖن.

بيت - 19

ٿِئا رَسِيلا رَحمانَ سٖين، سَڳَرُ سُونهِين جي،
آئِيوُن تَنِين کي، واڌايُون وِصالَ جِيوُن.

بيت - 20

سا سِٽَ نہ سارِينِ، اَلِفُ جِه جي اَڳَ ۾،
ناحَقُ نِهارِينِ، پَنان ٻِئا پِرِيَ لَيءِ.

بيت - 21

اَکَرَ پَڙھِي اَڀاڳِئا! قاضِي ٿِه ڪِئاء؟
ڀيرِيٖين ۽ ڀائِييٖن، ايڏا اِيَ نہ آءُ!
اِنَ سُرڪِيَ سندو ساءُ پُڇجِ عَزازِيلَ کي.

بيت - 22

عاشِقُ عَزازِيلُ، ٻِئا مِڙَئِي سَڌَڙِيا،
مَنجها سِڪَ سَبِيلَ، لَعنَتِي لالُ ٿِئو.

بيت - 23

وِسَرِئومِ سَبَقُ! پِهرِين سِٽَ نہ سَنڀَران!
اَڃا ھِيُ وَرَقُ، ھَيءِ! مُطالِع نہ ٿِئوا!

بيت - 24

ڪِئو مُطالِع مون، ھوجو وَرَقُ وِصالَ جو،
تِه ۾ تُنھِين تون، ٻِي لاتِ نہ لَحظٖي جيتَرِي.

بيت - 25

جُه مون پَڙھئو پاڻَ لَيءِ، سبقُ سابِقُ جو،
پِهرِين سُڃاتُم پاھجٖي، نَفسَ جو نِهو،
جِت عِرفانُ اَصلَ ۾، ٿٖي روُحَنِ روزُ ڪِئو،
وَرِي وَرَقُ پِئو، گَڏيُم وَڍُ وِصالَ جو.

بيت - 26

اَکَرَ ڇُٽٖي ھيڪَڙٖي، ٻَهُون جي نہ ٻُجهَنِّ،
ڪوہُ ڪِبو کي تَنِّ، سَڄِي سُڻائٖي ڳالَڙِي.

بيت - 27

پڙَھئو ٿا پَڙھنِّ، ڪَڙھنِ ڪِينَ قُلُوبَ ۾،
پاڻا ڏوہَ چڙھنِّ، جِيَ وَرَقَ وَرائنِ وِتَرا.

بيت - 28

پَڙھئو پَڙھيٖجاہُ، سبقُ اِنَهِم سُورَ جو
مِيمُ رَکِجاہُ مَنَ ۾، اَلِفُ تِه اَڳياہُ،
چِتا چورٖيجاہُ، اِھا لاتِ لطيفُ چٖي.

بيت - 29

اَکَرُ پَڙہُ اَلِفَ جو، وَرَقَ سَڀِ وِسارِ،
اَندرُ تون اُجارِ، پَنا پَڙھندِہ ڪيتَرا.

بيت - 30

جِنءَ جنءَ وَرَقَ وَرائِيٖين، تِنءَ تِنءَ ڏِٺو ڏوہُ،
تِه ڪَهڻِيَ ڪِبو، ڪوہُ؟ جي رَھڻِيَ رَھيو نہ سُپِرِين.

بيت - 31

ڪاتِبَ! لِکٖين جِنءَ، لايو لامُ اَلِفَ سيٖن،
اَسان سَڄَڻُ تِنءَ، رَھيو آھي رُوحَ ۾.

بيت - 32

ڪو ٿو ڪاڳَرَ ڪورِيٖين؟ ويٺو وِڃايٖين مَسُ،
ڏورِ، تِئائِين ڏَسُ، اَکَرَ جِئائِين جُڙيا.

بيت - 33

تِهَڙا چالِيها نہ چالِيهَ، جِهَڙو پَسَڻُ پِرِيَ جو،
ڪِهَڙِي ڪاتِبَ! ڪَرِيٖين، مَٿي پَنَنِ پِيهَ،
جي وَرَقَ واريٖن وِيهَ، تہ اَکَرُ اُھوئِي ھيڪَڙو.

بيت - 34

تَنُ کُڏِي، مَنُ حُجِرو، ڪِيمَ چالِيهاَ رکُ،
ڪُه نہ پُوڄئو پُوڄِيٖين، اَٺَئي پَهرَ اَلَکُ؟
تان تون پاڻُ پَرَکُ! سَڀَڪِه ڏاہَ سامُهُم.

بيت - 35

سَڀَڪِه ڏاہَ سامُهُم، ڪو ھَنڌُ خالِي ناہِ،
اَحَدا جي اَرَکَ ٿِئا، سي ڪائِرَ ڪِبا ڪاہِ؟
مُحِبُّ مَنجهِين مَنَ ماہِ، مُون اَڄاڻندِيَ اُجِهئو.

وائي - 1

وَٺَڙِئو ھوتَ وَڃنِ، وو! جَهلِيان پَلِيان، ھِيَڙو نَرَھٖي!
آئُون جَنِين جِي آھِيان، ڪَڙِي مَ ٿِيان تَنِ،
جَهلِيان پَلِيان، ھِيَڙو نَرَھٖي!
گهورِيانگَهڻٖين ڀَتِيٖين، سندِي ٻاجهَہ ٻِئَنِ، جَهلِيان پَلِيان، ھِيَڙو نہ رَھٖي!
مَرُ مَران مارِينِ مُون، پُرزا پُرزا ڪَنِ، جَهلِيان پَلِيان، ھِيَڙو نہ رَھٖي!
آئوُن مُيائِي گهورِيئِي، جي مان مُحِبَ مِلَنِ، جَهلِيان پَلِيان، ھِيَڙو نہ رَھٖي!

وائي - 2

وِسارِجِ مَ وٖيڻَ، جو ڀَنَ ٻہ ٽٖي ڏِيهَڙا،
لوٺيُو سَهَنِ لوڪَ جا، وِھَاڻِيَ ٿِيون ويَڻ،
جوڀَنَ ٻہ ٽٖي ڏِيهَڙا.
اَصلِ اَسارِنِ جا، سُتٖي وِئَڙا سيڻَ،
جوڀَنَ ٻہ ٽٖي ڏِيهَڙا.
جيڏِيون جي مان وِسَهو، نِنڊَ مَ ھيرِيو نيڻَ،
جوڀَنَ ٻہ ٽي ڏِيهَڙا.
راتَڙِيُون جاڳَنِ جي، سي آئُون ڪَندَڙِي سيڻَ،
جوڀَنَ ٻہ ٽٖي ڏِيهَڙا.
آڌِيَ راتَ اُٿِي ڪَرٖي، جَهلِ تُُون نِنڊا نيڻَ،
جوڀَنَ ٻہ ٽٖي ڏِيهَڙا.

داستان ڇھون

بيت - 1

دائُودِي دَيُون ڪَرٖي، رَڪَنِ ڪونهِ رَنگُ،
گهوڙِيَ ھيٺِ اَيَنگُ، ڪاھِيو پاکَرِيٖين ھَڻٖي.

بيت - 2

دائوُدِي دَيوُن ڪَري، رَڪَنِ ڪونِه چيٖتُ،
گهوڙِيَ ھيٺِ سُچٖٖيتُ، ڪاھِيو پاکَرِيٖين ھَڻٖي.

بيت - 3

اوقابِيلَ! اَکِنِ ۾، توکي بارِي بانَ،
اُڀو اَڳَرايُون ڪَريٖين، ماڳِ ھَڻِئو مَستانَ،
جانِبَ! تُُون زِيانَ، اَکِنِ سٖين ايڏا ڪَريٖن!

بيت - 4

اوقابِيلَ! اَکِن ۾، توکي تِکا تِيرَ،
ساڄَنَ! اِلَهِم سِيڱَ سٖين، ڦَٽِيَيءِ گَهڻان فَقِيرَ،
ٻِئو مَ مارِجِ مِيرَ!تُهجو پِهروئِي پُورو ٿِئو.

بيت - 5

او قابِيلَ! اَکِنِ م، تِيرَ تِکا توکي
ساڄَنَ! اِنَهِم سُورَ جِي، ڪَلَ نہ اَڪِه کي،
مارٖين ٿو مُون کي! چاڙھٖي لوہَ لطيفُ چٖي.

بيت - 6

او قابِيلَ! اَکِنِ سيٖن، تِيرَ چَلايا تو،
ٻئو مَرُ مارٖي سو، جِه جو پِهرو پُورو نہ ٿيٖي.

بيت - 7

جي ھو پائِنِ ڪانُ ڪَمانَ م، تہ سِينُو سِپَرَ رکُ،
مُهَ ۾ معشوقنِ جا، چاڪَ چَٽَڪا چَکُ،
سُورِي ڀاءِ مَ شڪُ، عاشِقُ ٿِيُ تہ اُبَهٖين.

بيت - 8

جي ھو پائِنِ ڪانُ ڪَمانَ ۾، تہ سِينُو سِپَرَ ڏيج،
مُهَ ۾ معشوقنِ جا، جهالُو ٿِي جَهليجِ،
پاھا پَڳَ مَ ڏيجِ، عاشقُ ٿِيُ تہ اُبَهٖين.

بيت - 9

جي ھو پائِنِ ڪانُ ڪَمانَ ۾، تہ نَئِي ڏِجِ سِينوُن،
ڪِٖجي نَہ ڪِينُو، وَڃِي دَرِ دوستنِ جي.

بيت - 10

پائٖي ڪانُ ڪَمان ۾، مِيان! مارِ مَ مُون،
موُن ۾ آھيٖين توُن، مَتان تُهجوئِي توکي لڳٖي.

بيت - 11

ڪَيو ڇَڏِينِ ڪانُ، ھَڏِ نہ ھَڻائِينِ ٿا،
ٿِئا جي نِيشانُ، تہ پِهرٖي سان پُورا ھُئا.

بيت - 12

لورِي جِت لَڳومِ، اُتِ اُڀوئِي آھِيان
سورِہُ پِرِين سَندومِ، مانَ ٻاجهائٖي ٻئو ھَڻٖي!

بيت - 13

مَحبتَ جي ميدانَ ۾، عاشقَ! ٿِيُ آچامُ،
سَمُها سَلَ سَيِّدُ چٖي، ڪَندَءِ تِيرَ تمامُ،
ڪَهِجِ ڪومَ ڪَلامُ، جِمَ دوسَنِئُون دُورِ ٿِيٖين.

بيت - 14

مُحبّتَ جي ميدانَ ۾، اچِي پيرَ پِئانِ،
سِرَ وَڍَڻُ، ڌڙَ ڌارَ ڌرَڻُ، اِي سيِنگارَ سَندانِ،
ڏِيندا مُون ڏِٺانِ، مَٿا محبُوبَنِ، لَيءِ.

بيت - 15

مَحبّتَ جي ميدانَ م، ڪَرِ پَڙاڏو پَٽُ
سِرُ سُورِيَ، ڌَڙُ ڪُنگِريٖن، متان ڪُڇيٖين ڪَٽُ!
عشقُ نانگُ نِپَٽُ، خبرَ کاڌنِ کي پَوي.

بيت - 16

مَحبّتَ جي ميدانَ ۾، سِرَ جو سانگُ مَ ڪَرِ
لاھٖي سِرُ لطيفُ چٖي، دوسَنِ اَڳِيان ڌرِ،
عِشقُ نانگُ اَپَرِ، خبر کاڌنِ کي پَوي.

بيت - 17

مَحبّتَ جي ميدانَ م، سِرَ جو ڪَرِ مَ سانگُ،
سُورِيَ سُپيرِيَنِ جي، چَڙہُ تہ ٿِيٖيئن چانگُ،
عشِقُ آھي نانگُ، خبرَ کاڌنِ کي پَوي.

بيت - 18

مَحبّتَ جي ميدانَ ۾، ڪُڏِي پَؤُ ڪاھٖي،
ڇَڏِ آسانگا اَرواحَ جا، لاھُوتِي!َ لاھٖي،
عِشقُ نانگُ آھٖي، خبرَ کاڌنِ کي پَوي.

بيت - 19

عِشقُ نہ آھي راندِ، تہ ڪي ڪَنِس ڳَڀَرُو
جِيَ جُسٖي ۽ جانِ، ڀَڃٖي جو ھيڪاندِ،
سِسِي نٖيزٖي پاندِ، اُڇَلِ تہ اَڌَ ٿِيٖي.

وائي - 1

عِشقُ تَمامُ بِرہُ تَمامُ، وو! مَين لُوٺِي يارَ لوڪو!
سيڄَ سُتٖي نُون جَهپَ نہ اَوٖي، نيڻٖين نِنڊ حَرامُ،
وو! مَين لُوٺِي يارَ لوڪو!
راتِيان جاڳَڻُ، صاحِبُ سَنڀالُڻ، اِي فَقِيراندا ڪامُ،
وو! مَين لُوٺِي يارَ لوڪو!
مَتِ عَقُلَ دِي مُنجهِہ ڳَئِي، آيا عِشقُ اِمامُ،
وو! مَين لُوٺِي يارَ لوڪو!

داستان ستون

بيت - 1

عاشِقُنِ اَللھُ، وٖيروتارِ نہ وِسَرٖي
آہَ ڪَرِيندٖي ساہُ، ڪَڏِہِ وِيندو نِڪَرِي.

بيت - 2

عاشِقَنِ آرامُ، ڪَڏِہ تان ڪونَ ڪِئو،
طَعنٖي ڪِئا تَمامُ، حَبِيباڻٖي ھيَڪڙٖي.

بيت - 3

عاشِقَ اِنءَ نہ ھُونِ ، جِنءَ تُون سَڄٖين اَگَڙٖين.
وَڃِي دَرِ دوسَنِ جي، رَتُ ڏيِھاڻِي رُونِ
ٻِيَ پَرِ ڪِه نہ پُونِ، ماڪُرِ محبُوبَنِ سٖين.

بيت - 4

جان عاشِقَ مٿي رَتُ، تان دَعويٰ ڪَري مَ نِيهَ جي،
سائو مُهُ، سُنهَ ڳَئِي، سِڪَڻَ اِيُّ شَرَطُ
نہ ڪِين گوڏِ گَرَٿُ، مٿا سِرَ سؤدا ڪري.

بيت - 5

آڃا تو منجهاءَ، ڪَکَ ڇُتٖي رَتُ نِڪَرٖي!
مُهَ ۾ مَحبُوبَنِ جا، ڪِنءَ جهلِيندٖين گهاءَ؟
سو توُن ڪُڄاڙِئاءَ، سِڪَڻَ جوُن سَڌوُن ڪَرٖين؟

بيت - 6

سِڪَڻَ اِيَ نہ سَڌَ، جِنۡ لِڪِئو لِياڪا پائيٖين،
پَئِي پِريان جي نہ ٿِيٖين، مَٿي اَڱَڻَ اَڌَ؟
اِيَ پُڻ ڪُوڙِي سَڌَ، جِن کِلِئو کايو سُمَهِم.

بيت - 7

سِڪَڻُ ۽ سُورِي، ٻَئِي اکَرِ ھيڪَڙٖي،
وِھَڻُ واٽَڙِيَنِ تي، ڪارَڻُ ضَرورِي،
ٻِنيِن جِي پُورِي، جِيَ ڏِنٖي رِيَ نہ ٿيٖي.

بيت - 8

جٖي ڪِين سِڪَڻُ سِکُ، ناتَ پَسُ سِڪَندِيٖين،
پاسي تَنيِن مَ لِڪُ، نِيهُ نہ سُڃاڻنِ جي.

بيت - 9

عاشِقَ! معشُوقَنِ جِي، وَٺِي ويهُ ڳرِي،
جِمَ وِرِچي ڇَڏِيٖين، سَندِي دوستَ دَرِيَ!
ڏِيندا ٻُڪِي ٻاجهَہ جِي ويندَءِ ٺَپَ ٺَرِي،
اَسان تان نَہ سَرِي، تو ڪِنءَ سَرِي سُپِرِين؟

بيت - 10

عاشِقَ! معشوقنِ جو، وٺِي ويهجِ سَيرُ،
اچِي پُڇنَدَءِ پاڻَهِين، پِرتا ڀَريٖ پيرُ،
ڀَلائِنِ سَندو ڀٖيرُ، رَھبرُ ٿِندُءِ راہَ ۾.

بيت - 11

عاشِقَ! معشوقنِ جو، وٺِي ويهجِ دَرُ،
اچِي پُڇندُءِ سُپِرِين، لَهندُءِ سَرَ سَڀَرُ،
ڀَلائِي جو ڀَرُ، رھبُر ٿِندُءِ راہَ ۾،

بيت - 12

عاشِقَ! معشوقِن جو، وِٺي وي‏َه دُکاڻُ،
پَئَجِ پيشِ پِريَنِ جي، پَٽِيَ وِجهِي پاڻُ،
تہ تُون تَنِين ساڻُ، سَدا رَھِم سُرخُرُو.

بيت - 13

عاشقَ! معشوقنِ جو، وٺِي ويهجِ گَهٽُ،
جِمَ وِرِچي جِي ڇَڏِيٖين، موکِيَ سَندو مَٽُ،
ڪري سِرَ جِي سَٽُ، پِيجِ ڪٖي پِياليُون.

بيت - 14

عاشِقَ! معشوقِن جو، وَٺِي ويهجِ رَندُ،
پِيارِندَءِ پاڻَهِم، مَيخانٖي جو مَندُ،
ڪِيمَ ڪَڍِج تُو ڪنڌُہ، اوڏو ٿِي اُنِ کي.

وائي - 1

سُپيرِيان جي سوُنهَ جِي، ڳالِ ڪِينَ وَڃٖي،
وَڃِي دَرِ دوسَنِ جٖي، سُورِيَ سِرُ ھَڄٖي،
عاشِقَ اَنگُهنِ چَڙھئا، ٻئو سَڀُڪو ڀَڄٖي،
پُڇِجِ پوءِ پِريَتَڻُون، پِهرِين سِرُ سَڄٖي،
عاقِلَ ئِي اوڇُون ٿِئا، ڀورو ڪِينَ ڀَڄٖي.

داستان اٺون

بيت - 1

ھَرَ ھَرَ ھَرائِي، وَڃَڻُ دَرِ دوستنِ جي،
پاڙٖي ڏاہَ، پِريَنِ جي، اُڄُ مَ اَوائِي!
اَلَڙِ ٿِي آڇِ مَ تُون، واٽاڙُنِ وائِي،
لائِندَءِ لطيفُ چٖي، سُورا سَرَھائِي،
ڳُجهو ڳالائِي، پِرتِ وَٽِجٖي پاڻَ ۾.

بيت - 2

جان جان ناہِ ضَرُورُ، تان تان طبيبُ ناہِ ڪو،
جُه سو سَرِئو سُوُر تہ ڪَرَ ويڄُ وَرِ پئو.

بيت - 3

سُورُ جَنِين کي سَرِئو، سَرِي تَن صِحَتَ،
مِٺي مُصِيبَتَ، آھي عاشقنِ کي.

بيت - 4

سيئي سُورَ طبيبَ، جَنِين سُورَ سَڃَ ڪِي،
جو لِکِئو ھُتِ لطيفُ چٖي، سوئِي ڪَنِ قَرِيبَ،
جي نَوازِئا نَصِيبَ، دارُونءَ سي دُرستُ ڪِئا.

بيت - 5

جي پِيارٖي پاڻَ، تہ ڪَرَھو ٿِي پاڻِي پيٖين،
اَڳٖي اِنَ نِياڻَ، اَڻَ ڪوٺِئو ڪونَ گِهڙٖي.

بيت - 6

اَڻَ ڪِي عَيان نہ ٿِيٖي، ڪِي پَروڙٖي ڪوَن،
سَچِي جيهِي سونَ، مُهِ نہ پيئِي ماڙُھٖين.

بيت - 7

اَڻَ ڪِي عَيان نہ ٿِيٖي، ڪِي پَروڙٖي ڪونَ،
سا سُنهِين ٿِيٖي سونَ، اَمرُ عطا جِه جو.

بيت - 8

جٖيڪيِن ڏِٺائُون، سو مان ڳُڻُ ڳَنڍِ ٿِئو،
مُون کي پُڇِئائُون، ٺوڪٖي اِنَهِم ٺوڪَ سيٖن.

بيت - 9

جٖيڪيِن ڏِنائُو، سوسِرُ ڏيئِي سَهُ ڄِندَڙا!
مَ چَؤُ ڇِنائُون، اِي پُڻ ڳَنڍِئو سَڄَڻٖين.

بيت - 10

ڇِنَنِ توءِ مَ ڇِنُّ، پاءِ اُمٖيرِي اُنِ سٖين،
جي ھو اَوَڳُڻَ ڪَنِئِي اَسُهِينَ! تون ڳُڻانئِي ڳِنُّ.
پاندُ جهلِئو تون پِنُّ، ھِنَ سُنهارٖي سَڱَ ۾.

بيت - 11

نَمِي کَمِي نِهارِ تُون، ڏَمَرُ وَڏو ڏُک،
مَنجها صَبُرَ سُکُ، ڪي سَنوارِئا! سَمُجهٖين.

بيت - 12

نَمِي کَمِي نِهار تُون، ڏَمرُ ڏولائو،
ٿِيَيءِ ساڃائو، جي اُڀِيٖين اِنَهِين پٖيرَ تي.

بيت - 13

ڏَمَرَ پاسو ڏُکَ سٖين، کاندِ کَٿُوري ھوءِ،
وَاللہُ مَعَ الصَّابِرِيۡنَ، آگو اِيَهِم چوءِ.

بيت - 14

کَمَُ! کَمَندَنِ کَٽئو، ھارايو ھُوڙَنِ،
ڇَکِئو نَہ چُوندَنِ، ھو جو ساءُ صبرَ جو.

بيت - 15

کَمَندڙَنِ گَهرِ کِيۡن، چُندَلَ چَڱا نہ ٿِئا،
ويڻَنِئُون ويڌُ پَئٖي، ھَٿِ نہ اچٖي ڪِيۡن.

بيت - 16

ھو چُونِئِي، تون مَ چَؤ، واتا وَرائٖي،
اَڳِه اَڳَرائِي جو ڪري، خطا سو کائٖي،
پاندَ م پائٖي، وِئو ڪِينٖي وارو ڪِينَ ڪِينۡ.

بيت - 17

ھو چُونِئِي، تون مَ چَؤ، واتا وَرائٖي ويڻُ،
سَڀَنِي سٖين سَيّدُ چٖي، مَنُ مارٖي ڪَرِ مٖيڻُ،
کانڌِ وڏيائِي کٖيڻُ، ڪِينيٖي مَنجها ڪِينَ ٿِيٖي.

بيت - 18

ڪَنِين ڪِينَ پِرائِيو، ڪِينٖي مَنجها ڪِيۡن،
جٖي ھوءِ سَٽاڻِي سِيڱۡ، تہ زِہَ ڇِنٖي جوکو ٿِيٖي.

بيت - 19

سُڻِي ويڻَ ڪَنَنِ سٖين، وَرائِجِ مَ وَرِي،
ھادِيَ جي ھِدايتَ جِي، آھي اِيَ ڳَرِي،
تَنِ سَڄِي ساہِ سَرِي، جَنِ مارِيو نفسُ ماٺِ سٖين.

بيت - 20

چُندَنِ ڪِيمَ چئيجِ، ويڻَ ورائٖي سامُهُم،
ڪا مَتِ قِيمتَ جِهَڙِي، روزُ ڏمَرَ کي ڏيجِ.
ويڻُ مَ وَرائيجِ، تہ سَڀَ دَر سُهاڳِي ٿِيٖين.

بيت - 21

اَڻَ چُندَنِ مَ چَؤ، چُندَنِ چَيو وِسارِ،
اَٺَئِي پهرَ ادبَ سيٖن، پَرِ اِھائِي پارِ،
پايو مُه مُونَنِ ۾، غُربَتَ ساڻُ گُذارِ
مُفتِي منجهِہ وِھارِ، تہ قاضِيَ ڪانيارو نہ ٿيٖين.

بيت - 22

جَنِين سندِيَ ٻوڏَ ۾، ڀَتو ڀَتٖين جِيُ،
تَنَ! تَنِين سٖين پِيُ، اوڏا اَڏٖي پَکَڙا.

بيت - 23

ويٺي جَنِين وَٽِ، ڏُکَندو ڏاڍو ٿيٖي،
سا مجلسَ ئِي مَٽِ، جي حاصلُ ھوءِ ھزارَ جو.

بيت - 24

ويٺي جَنِين وَٽِ، ڏُکندو ڏورِ ٿيٖي،
تَنَ! تَنِين سٖين ڪَٽِ، اوڏا اَڏٖي پَکَڙا.

وائي - 1

يارَ سَڄَڻَ جي فِراقَ، ڙِي جيڏيُون! آئُون مارِي!
درِ دوسَنِ جي ڪَئين جو هُوندا، مُون جيها مُشتاقُ، ڙِي جيڏيُون، آئُون مارِي!
جاٿٖي ڪاٿٖي مَحبوبَن جٖي، آہِ حُسنَ جِي هاڪَ، ڙِي جيڏيُون، آئُون مارِي!
سُرمو سَهِي ڪَرِ اَکِنِ جو، خاصُ پِريان جِي خاڪِ، ڙِي جيڏيُون، آئُون مارِي!
عبداللطيفُ چٖي، پِرِين اَسانهجو هَميشه آ حُسناڪُ، ڙِي جيڏيُون، آئُون مارِي!

وائي - 2

يارَ سَڄَڻَ جي فِراقَ، ڙِي جيڏيُون آئُون مارِي!
درِ دوسَنِ جي ڪَئِين جو ھُوندا، مُون جيها مُشتاقَ،
ڙِي جيڏيُون آئوُن مارِي!
جاٿٖي ڪاٿٖي مَحبُوبَنِ جٖي، آہِ حُسنَ جِي ھاڪَ،
ڙِي جيڏيُون آئوُن مارِي!
سُرمو سَهِي ڪرِ اَکِنِ جو، خاصُ پِريان جي خاڪِ،
ڙِي جيڏيُون آئوُن مارِي!
عبداللطيفُ چٖي، پِرِين اَسانهجو ھَميشه آحُسناڪُ،
ڙِي جيڏيوُن آئوُن مارِي!

سر کنڀات

داستان پھريون

بيت - 1

ڀَلائِي آھِينِ، پِريِن ڀَلائِيَ پاھِجٖي،
سَٻاجها سِرِ چَڙھئو، ڏوراپو نہ ڏِينِ،
مان ڏٖي مَدِيُون ٿِينِ، سَڄَڻَ سَڄايِنِ ۾.

بيت - 2

پيشانِيَ ۾ پِرِيَ جي، ڀَلائِيَ جا ڀٖيرَ،
اَڱڻَ اُڪَنڍِيُنِ جي، ڏٖي پاٻوھٖي پيرَ،
قَمَرُ پاڙٖي ڪيرَ، شَمسُ سُپيرِيَنِ سٖين؟

بيت - 3

تُون چَنڊَ! اُھوئِي، جو ھُتِ پَسٖين ٿو پِرِيَ کي،
آڏِتُ چَئجِ اُنِ کي، ڏِيانءِ جو روئِي،
ھيڪانِديَ ھوئِي، سانگُ مَ پَوٖي سَڄَڻٖين!

بيت - 4

مَرُ ھيڪاندا ھُونِ پِرِين، سانگِ مَ وَڃنِ سيٖڻَ!
رَھيا آھِينِ رُوحَ ۾، نِتُ جَنِين جا نيٖڻَ!
وِماسِئا جَن وٖيڻَ، ٿو تارِيَ تَڳٖي تَنِ ھِيُون.

بيت - 5

راتِ سَهائِي، ڀُون سَئينِ، پَٽِيُنِ وڏو پَنڌُ
ھَلندٖي حَبِيبنِ ڏي، ڪَرَھا! موڙِ مَ ڪَنڌُ،
ٻَنڌَڻُ سوئِي ٻَنڌُ، جو پَهُچائٖي پِريَنِ کي.

بيت - 6

راتِ سَهائِي، ڀُون سَئِين، ڀائِي! گُهرجٖي ڀَلُ،
اَھُرَ ۾ ايلاچِيُون، چَندَنُ چَرِي چَلُ،
موُن تو ھِيسٖين ڳالَڙِي، ٻٖي ڪِهِۡم مَ سَلُ،
ھاھُرَ ڪندو ھَلُ، تہ کِجايُون کَرَنِ کي.

بيت - 7

راتِ سَهائِي، ڀُون سَئِين، پِرتِ نَئِين، پَنڌُ پُورِ،
مَيا! مَحبُوبَنِ جٖي، ھَلِي وانءُ حُضوُرِ
جي چِڻِڪَنِ چِتَ ۾، سي ڪِنءَ سَڄَڻَ ڏُورِ؟
الَلھَ لَڳِ اَسُورِ، اُئان ئِي ٿِي آءُ تُون.

بيت - 8

اَڄُ پُڻِ اَڇائِي، چوڏِھيَ ماہَ چَنڊَ جِي،
موُن گَهرِ مون پِرِيَنِ جٖي، اَچڻَ جِي وائِي،
موُن گَهرِ واڌائِي، پيئِي کامَ کَرَنِ ۾.

بيت - 9

اَڄُ پُڻِ اُمارو، چوڏِھيَ ماہَ چَنڊَ جو،
موُن گَهرِ موُن پِرِينِ جٖي، اَچڻَ جو وارو،
سَڄَڻُ سوڀارو، ڀٖيڄَ ڀِنِيَ گَهرِ آئيو.

بيت - 10

چوڏِھيَ چنڊُ اُڀِرِئو، اُوڻِٽيهَ پَسيٖسِ عاَم،
مَٿِس ناہِ مَلامَ، جٖيڪِيۡن پُڇٖين پُڇُ سو.

بيت - 11

چوڏِھِيَ چنڊَ! تُون اُڀِريٖن، سهسٖين ڪَرِييٖن سِنگارَ،
پلَڪَ پِرِيان جٖي نَہ پَرين، جٖي حِيلَنِ ڪَرِيٖين ھزارَ،
جِهَڙو تُون سَڀَ ڄَمارَ، تِهَڙو دَمُ دوستَ جو.

بيت - 12

سَهسٖين سِڄَنِ اُڀرٖي، چوراسِي چَنڊَنِ،
بِاللهِ، رٖي پِرِيَنِ، سڀَ اُنداھِي ڀائِيان.

بيت - 13

چَنڊَ! تُهجِي ذاتِ، پاڙِيان تان نَہ پِرينِ سٖين،
تون اڇو ۾ راتِ سَڄَڻَ نِتُ سوجِهرا.

بيت - 14

چَنڊَ! چِٽائِي تُهجِي، سِياھيَ ۾ سوُرُ،
لايان لالَ لِڱَنِ کي، چَندنَ ڀرٖي ٻُورُ،
ڪوُماڻو ڪَپُورُ، مون واجهائِيندٖي پِرِيَ کي.

بيت - 15

چنڊَ! لَڳَنِئِي مَنڊَ، سَنجهيئِي سِيخَ ٿِيٖين،
ڪَرِ اُنداھِي اَنڌَ، تہ مِلان مَحبُوبنِ کي.

بيت - 16

چنڊَ! چُئَئِن حَقُ، جي وِڙھٖين جي وِچِريٖن،
ٻہ اَکيِوُن ٽِئو نَڪُ، تو ۾ ناہِ پِريَنِ جِهوا.

بيت - 17

چنڊَ! چُئَئِن سَچُ، جي مَٺِي نہ ڀائِيٖين
ڪَڏِہ اُڀِرٖين سَنهڙو، ڪَڏِہ اُڀِرين ڳَچُ
مُهَ ۾ ٻَريٖئِي مَچُ، تو ۾ ناہِ پيشانِي پَرِيَ جِي.

بيت - 18

کڻِي نٖيڻَ خُمارَ مان، جان ڪِئائُون نازُ نَظَرُ،
سُورِجَ شاخُون جَهڪِيُون، ڪوُماڻو قَمَرُ،
تارا ڪَتِيُون تائِبَ ٿِئا، ديکِيندٖي دِلبَرُ،
جَهڪو ٿِئو جَوھَرُ، جانِبَ جي جَمالَ سٖين.

بيت - 19

اُنداھِيَ اَڌَ راتِ م، پِرِيَ پَسايو پاڻُ
چنڊُ ڪَتِنِ ساڻُ، پي‏هِي وِئو پَڙِلاوَ ۾.

بيت - 20

تارا تٖيلِيَ رُوءِ، لُڌا لالَنَ! اُڀِرٖين،
جِهَڙِي تو صُبُوحِ، تِهَڙِي صافِي سَڄَڻٖين

بيت - 21

تو ڏاہَ گَهڻُو نِهارِيان، تارا! تٖيلاھِۡم،
سَڄَڻُ جٖيڏاھِۡم، تُون تٖيڏاھِۡم اُڀِريٖن.

بيت - 22

ھُنَ تارٖي، ھُنَ ھَنڌِ، ھُتِ مُهِجا سُپِرِين
سَڄَڻَ ماکِيَ مَنڌِ، ڪَؤڙا ٿِينِ نہَ ڪَڏِھِمۡ.

بيت - 23

ھُنَ تارٖي، ھُنَ ھٖيٺِ، ھُتِ مهِجا سُپِرِين،
سَڄَڻَ ماکِيَ مٖيٺِ، ڪَؤڙا ٿِينِ نَہ ڪَڏِھِمۡ.

بيت - 24

ھُنَ تارٖي، ھُنَ جاءِ، ھُتِ مُهِجا سُپِرِين،
سَڄَڻَ ماکِيَ ساءِ، ڪَؤڙا ٿِينِ نَہ ڪَڏِھِمۡ.

بيت - 25

تارا، تِرَ، تِروڪِڻيوُن، مَٿنِ ڦُلَڙِيوُن،
کوءِ! سي راتَڙِيُون، جٖي مون پِرِيَ پُڄاڻا پيٖئِيوُن.

وائي - 1

جيڏِيوُن! ھِيُ ضَرُورُ، آيَلِ! ڪِيَ رَھندو پِرِيَ رٖي؟
سَگهو ساعِتَ نہ ڄِندَڙو، اَٺئِي پَهرَ مَلُورُ،
آيَلِ! ڪِيَ رَھندو پِرِيَ رٖي؟
مَنَ ۾ مُشتاقَنِ جٖي، ساڄَنَ! تُهِجو سوُرُ،
آيَلِ! ڪِيَ رَھندو پِرِيَ رٖي؟
پيريٖن آئُون نَہ پُڄَڻِي، ڏيٖهُ پِرِيان جو ڏُورُ،
آيَلِ ڪِيَ رَھندو پِرِيَ رٖي؟
وَڃٖي ويلَ سَڀَڪَهِمۡ، ھِيَڙو پِرِيَ حُضُورِ،
آيَلِ ڪِيَ رَھندو پِرِيَ رٖي؟

وائي - 2

اَڱڻِ آيامِ پٖيهِي يا اَلا! مُون سارِيندٖي سُپرِيِن،
مُشڪُ عَطُرُ مُون پِريِن، سِڪِيَسِ، ڄَمُ َسڀيئِي،
يا اَلا! مُون سارِيندٖي سُپِرِين.
تَنُ جَنِين جو طالِبُو، روُحَ تَنِين سٖين ريهٖيِ،
يا اَلا! موُن سارِيندٖي سُپِريِن.
ساڄَنَ سندِيَ سُونهَ جِي، آئون ڳالِ ڪَرِيان ڪٖيهِي؟
يا اَلاَ مُون سارِيندٖي سُپِريِن.
ٿِئو لُطفُ، لَطيِفُ چٖي، دوسُ آيو دَرِ پٖيهِي،
يا اَلا! مُون سارِيندٖي سُپِريِن.

وائي - 3

وَھلِي وَنءُ مَ وھامِي! رہُ راتِ! رائِندِيَسِ پِرِيَ کي.
شمعَ ٿِندِيَسِ شَبِ ۾، اِنَ خُوشِيَ کان کامِي،
رَہُ راتِ! رائِندِيَسِ پِرِيَ کي.
بابُوئَنِ سَندِيَ باہِ جِنءَ، ٻَران شالَ اُجهامِي!
رَہُ راتِ! رائِندِيَسِ پِرِيَ کي.
پِرتِ جا پِيتَمَ جِي، سا ڪِينَ پَرُوڙٖي عَامِي،
رَہُ راتِ! رائِندِيَسِ پِرِيَ کي.
مونکي مُون پِرِيَنِ جو، آھي دَردُ دَوامِي،
رہُ راتِ! رائِندِيَسِ پِرِيَ کي.
آھِيان يارُ سَيِّدَ جو، ڪانَہ رَھِي ڪا خامِي،
رہُ راتِ! رائِندِيَسِ پِرِيَ کي.
ھو جو لَنؤ، لطِيفُ چٖي، مُون کي آہِ مُدامِي،
رَہُ راتِ! رائِندِيَسِ پِرِيَ کي.
روشَنُ ٿِيان رُڃُنِ ۾، جي ھُئان لَنؤ اِنَهِمۡ لامِي،
رَہُ راتِ! رائِندِيَسِ پِرِيَ کي.
ڪارِي سا قِيامَ سَئِين، ھوتُ جِه جو حامِي،
رَہُ راتِ! رائِندِيَسِ پِرِيَ کي.
آيَمِ تِه لوڪَ سٖين، جٖيسيِن مان چَوَنِ سُؤامِي،
رَہُ راتِ! رائِندِيَسِ پِرِيَ کي.

داستان ٻيون

بيت - 1

ناسِيندٖي نِگاہَ، پِهرِين ڪِجِ پِرينِ ڏٖي،
اَحوالَ عاجِزَنِ جا، آکِجِ لَڳِ اللھَ،
روزُ نِهارِنِ راہَ، اَکِيُون اَواھِنجٖي آسَرٖي.

بيت - 2

ناسِيندٖي نَظَرُ، پِهرِين ڪِجِ پِريَنِ ڏٖي،
قَمَرَ! ڪَهِجِ قَرِيبَ کي، نِستُ آئُون نِٻَرُ،
ٻِي ڀٖيڻِي ناھِم ڀَرُ، اَکِيُون اَواھِنجٖي آسَريٖ.

بيت - 3

ناسِيندٖي نِرتِ، پِهرِين ڪِجِ پِريَنِ ڏٖي،
قَمَرَ! ڪَهِجِ قريبَ کي، سارٖي ساڻُ سُرتِ،
ٻئو ڀَروسو نہ ڀِتِ، اَکِيُون اوَاھنِجٖي آسَرٖي.

بيت - 4

ناسِيندٖي نِهارَ، پِهرِين ڪِجِ پِريَنِ ڏٖي،
آئُون جي ڏِيَئِن سَنهيا، چَئج چنڊ! اَپارَ،
ساڄَنَ! سَڀَ ڄَمارَ، اَکيوُن اَواھِنجي آسَرٖي.

بيت - 5

چَڱا چنڊَ! چَئيجِ، سنيها کي سَڄَڻٖين،
مَٿا اَڱَڻِ اُڀرِي، پِرِيَنِ جٖي پَئيجِ،
جهِيڻُو ڳالائيجِ، پيرٖين وِجهِي ھَٿَڙا.

بيت - 6

آئُون جي ڏِيَئِن سَنيها، سي تون چنڊَ! پَليءِ ٻَنڌُ،
چئجِ حالُ حَبِيبَ کي، نَئِي نوڙائٖي ڪَنڌُ
تو تيڏاھِين پَنڌُ، جيڏاہَ عالَمَ آسَرو.

بيت - 7

اُڀِرُ چَنڊَ! پَسُ پِرِين، تو اوڏا، مُون ڏُورِ،
سَڄَڻَ سُتا وِلهَہ ۾، چوٽا ڀَرٖي ڪَپُورِ،
پٖيريٖن آئُون نَہ پُڄَڻِي، ٻاٻَلُ ڏٖي نَہ ٻُور،
جِه تي چَڙِھي اَسُورِ، سَنجهٖي سَڄَڻَ سٖيٽِيان.

بيت - 8

آئُون اُڪَنڊِيائِي مَران! پِرِين ڀَلا، پَرَ ڏُور،
ٻاٻَلُ ڏٖي نہ ٻُور، پنڌَ نَہ جوڳِي پِيَڙِي.

بيت - 9

ڌڻِي ڪَرِيندِہ ڪَڏِھِمۡ، حَياتِيَ ھيڪاندِ؟
مَنَ ۾ مُشتاقنِ جٖي، ڪيِ رَنجائٖي راندِ،
پِرِين ڏيساندَرَ پاندِ، ڳُجُهہ ڳَرَھِيان ڪَنِ سٖين؟

بيت - 10

ھِيَڙٖي سَڄَڻَ سارِئا، ڪِٿٖي ھُندَمِ ھٖيرَ؟
اَچيِ لالَنَ! نہ ڏِيٖين، مَٿي پَلنگَنِ پٖيرَ؟
ٿِي وِرُوھَڻَ وٖيرَ، ڳُجهُہ ڳَرَھِيان ڪَنِ سٖين؟

بيت - 11

وَڏَ ڦُڙو ۽ واءُ، ڪَرَھٖي کاڏو کوڙِئو،
کوءِ! ٻَنِ! پَلاڻِيان! اولاڻِئو نہ اُٿِيٖي.

بيت - 12

پَلاڻِيان پِئو! اولاڻِئو نہ اٿِيٖي!
جيڏاہَ وَڳُ وِئو، اُڀو تَرَسٖي اوڏَھِم.

بيت - 13

ڪَرَھو، نہ ڪِيۡن ڪانُ، پيرٖين آئوُن نہ پُڄَڻِي،
جو مُون راتِ رَساڻٖي، نٖيئِي ساڄَنَ ساڻُ،
مُون نہ وَھِيڻوُن پاڻُ! ويٺِي نٖيڻَ نِچوئِيان.

بيت - 14

ڪَرَھا! ڪَسَرَ ڇَڏِ، وِکوُن وِجهُہ وَڌَندِيوُن،
ھيڪَرَ حَبِيبَنِ سان، مونکي نٖيئِي گَڏِ
مَڇُڻ پُونِيءِ ھَڏِ، آھُون اُڪَنڍِيَنِ جِيوُن.

بيت - 15

ڪَرَھا! ڪَسَرَ ڇَڏِ، وِکَ وَڌَندِي پاءِ،
مُهجو ھَلڻُ اُتَهِۡم، جِتٖي جانِبَ جاءِ،
توکي چندَنُ چارِيان، ٻِئو وَڳُ لاڻِي کاءِ،
اِيَهِمۡ اُٺَ! اُٺاءِ، جِنۡ ھُندِيَ رات ھُتِ مِڙُون.

بيت - 16

ڪَسَرَ ڇَڏِ ڪَواٽَ! وَکُون وِجُهہ وَڌَندِيُون،
سَئِين سُپيرِيَنِ جِي، وِنگِي ڀاءِ مَ واٽَ،
ڇَڏِ جهورِي، ڏي جهاٽَ، تہ ھُندِيَ رات ھُتِ مِڙُون.

بيت - 17

ڪَرَھا! ڪُرُ سُڃاڻُ پِئَڪو ۽ پاھِجو،
اصلِ آھي اَھِنجو، نالٖيرو نِڌاڻُ
ڪَرَھا! اسان ساڻُ، ڪٖي چانگا ڪِجِ چَڱائِيون.

بيت - 18

آڻٖي ٻَڌُمِ وَڻَ جاءِ، مانَ مُکَرِيُون چَرٖي،
ڪُڌاتُورو ڪَرَھو، لِڪئِو لاڻِي کاءِ ،
اِنَ مَيٖي سندٖي ماءِ! مُون ڳالِڙِنِ ڳوڙھا ڪئو.

بيت - 19

مَيا! مَڃِ مِنَٿَ، اَڄُ مُهِجِي ڪَرَھا!
جهاڳِيندٖي جَرَ پَٽِيوُن، مَتان ڪَرِيٖين ڪَٿَ،
سُپيرِيان جي سَٿَ، موُن کي نٖيئِي ميڙِيٖين.

بيت - 20

ڳَلِ ڳانا ياقُوتَ جا، موتِيَنِ ڳُتِيَسِ مالَ،
ڪَدِيفٖي جِي ڪَرَھا! ھيدِي پايَنءِ حالَ،
چَندُن چارِيَنءِ جالَ، جي مُون راتِ رَساڻِيٖين.

بيت - 21

ڳَلِ ڳانا ياقوتَ جا، موتِي مَنجهہ مَهارَ،
چانگا! چَندُن چارِيَنءِ اَٺَڻِي پَهرَ اَپارَ،
سَندِيَ پِيَ پَچارَ، جي موُن راتِ رَساڻِيٖين.

بيت - 22

مَيا! تو مَهارَ، سَڄِي پايان سونَ جِي،
چارِيَنءِ چَندَنَ چوٽِيُون، نايو مٖيندِيَ ڏارَ،
سَندِيَ پِيَ پَچارَ، جي موُن راتِ رَساڻِيٖين.

بيت - 23

اُٺُ نہ وَڃٖي وَڳَ سٖين، چَرٖي نہ لاڻُون،
مَيٖي کي مَجازَ جو، ٿُوھٖي ۾ ٿاڻوُن،
ڀَٽارٖي ڀاڻوُن، مَرَندٖي سِينءَ نَہ مَٽئِو.

بيت - 24

اُٺُ نہ وَڃٖي وَڳ سيٖن، چَرٖي نہ چانگو،
لَڳِيَسِ نائُڪَ نِيهَ جِي، نِ‏هوڙِئو نانگو،
ڇَڏٖي سِرَ سانگو، رِڙھٖي رَندِ پِريَنِ جي.

بيت - 25

وِھٖي مَنجِهِم وَڳَ، کَٿُورِيَ ڏارَ چَرٖي،
ماءِ! مُهِجٖي ڪَرَھٖي، پَڌَر پَڳَ نہ لَڳَ،
جَڳَ سٖين جِهَڙو جَڳَ، ھِيٖين سيٖن ھُتِ چَرٖي.

بيت - 26

ڀُوُر نہ چَرٖي ٻُورُ، ڇَڏِئو تُورُ، تَڪُون ڪري،
مُونٖين ھَڻِي موٽِئو، ڪَرَھو راتِ ڪَپُورُ،
مَيو ٿِئو مَعمُورُ، چَندَنُ چَکِي آئِيو.

بيت - 27

اَڄُ نہ اَڳِيَ ڍارَ، ڪَرَھو جِنءَ ڪالَ ھُئو،
اَڱَڻِ آيو نہ ڪَرٖي، پاھورٖي پَچارَ،
جيڪُسِ منجهہ قَطارَ، ڪا وَلِ چِنائِين وِہَ جِي.

بيت - 28

مَيٖي ماڪائِي، وِڌو واتُ وَلِنِ کي،
خَبَرَ ٿِي کيٖٽَ ڌَڻِنِ کي، وِڏوُڻا واھِي،
ڪَرَھٖي ڪا ڪَتَ ڇَڏِيِي، وَرٖيسِ نہ وائِي،
چانگي چَرِيائِي، ويئِي ويچارٖي وِسَرِي.

بيت - 29

مِٺِيوُن لَهِي مُهاءِ، جي تو چانگاچِنِيُون،
وَلَڙِيون وِہَ ساءِ، اَڃا تو مُهَندِيوُن.

بيت - 30

وَٽٖي سٖيٽَ سُوَٽَ، پاءِ پَهجٖي ڪَرَھٖي،
وَلِيوُن واسَ وَرَنِيُون، پَهرِيُون مَٿٖي پَٽَ،
چانگٖي چَکِي چَٽَ، تہ پوءِ نہ رَھندو پَئِنڌَ رٖي.

بيت - 31

ڪِين جو ڪيڏاھِمۡ، چانگو چَکِي آئيو،
تاڻِئو تيڏاھِمۡ، نٖيٽَ ڇِنايو نِڪري.

بيت - 32

ڪَرَھٖي کي ڪَئِين، وِڌَمِ پَئنڌَ پَلَڻَ جا،
لٖيڙُو لاڻِيَ کي چَرٖي، نِيَرَ ساڻ نَئِين،
چانگٖي سَندٖي چِتَ ۾، صاحبَ! وجُهہ سَئِين،
اوباھِئوسِ اَئِين! لُطفَ ساڻُ، لَطِيفُ چٖي.

بيت - 33

ڪَرَھا! توکي ڪاَم، مون سچو پَسِي سَڃِييِ،
مانَ پَرُوڙٖي مامَ، ساڱاھٖي سَئِينءَ وَھيٖن.

بيت - 34

کَنڀاتِڙٖي تَڙِ وَرِي، اُڀِي تَڙِ واجهاءِ،
ماَن اَچِهوُن ڪاءِ، سُواڌائِي سَڄَڻيٖن.

بيت - 35

چانگٖي چَئِي چُڪِياسِ، مَٿاء اَڪَ نہ اُلَهٖي!
جِه وَلِ گَهڻا وِھاٽِئا، اُنَ سٖين آرِ لَڳِياسِ،
چوڌارِي چَندنَ وَڻَ، پَچِي پُوڄَ پِياسِ،
راڙٖي رَتُ ڪِياسِ، ھِنَ ڪُڌا تُورٖي ڪَرَھٖي!

بيت - 36

اُٿِي اَڙائِينس، ڇَڏِئو تہ ڇٖيڪَ ٿِئو،
کارايان، کِڙِئو وَڃٖي، پَلاڻِي پائِينسِ،
ڏاوَڻِ تِه ڏائِينسِ، جِنۡ چَرٖي ۽ چِنگهٖي ڀُڻو.

بيت - 37

دُودَستِي، دُوپٖيرَ، سِيٖني سَنگَهرَ رُڪَ جِيِ،
ماءِ! مُھِجٖي ڪَرَھٖي، تازٖي ڦُلَنِ ھيرَ،
تِه ڪامَڻَ ڪَندِي ڪٖيرَ؟ جو مُنهِم وَٽِ مَسَ رَھٖي!

بيت - 38

ڪَنِين ڪامَڻَ ڪِئاءِ؟ ڪِنءَ ڀَنڀولهِ؟ ڪَرَھا!
اَکِيَنِ مَٿٖي اَکِيا، پِڙَ ۾ پيرَ گَٺاءِ!
وَڳَ ڪِ وِسَرِئاءِ؟ ٻَڌو جِنءَ گهاڻٖي وَھٖين!

بيت - 39

نَوَ نِيَرَ پائٖي، جان موُن ھِيَڙو جهلئِو،
وِئَڙو ڇِنائٖي، پوِينءَ راتِ پِريَنِ ڏٖي.

بيت - 40

نَوَ نِيَرَ ڏَہَ ڏاوَڻِيوُن، پَنِرَہَ پَئنڌَ پِياسِ،
جَڏِہ سَڄَڻَ يادِ پِياسِ، ڇِرِڪَ ڇِنايَئِين ھيڪَڙٖي.

بيت - 41

کائٖي نہ کَٽَڻَهارَ، چَندَنَ جا چُوپا ڪَريٖ،
اَگَرَ اوڏو نہ وڃٖي، سِر کَنڊَ لَهٖي نہ سارَ،
لاڻٖي جِيَ لَغارَ، مَيو مَتارو ڪِئو.

بيت - 42

چانگا! چَندَنُ نہ چَرٖين، مَيا! پِيٖين نَہ موڪَ،
اَگَرَ اوڏو نہ وڃيٖين، ٿُڪِئو ڇَڏِيٖين ٿوڪَ،
لاڻِي وچا لوڪَ، تو ڪِ‏هَٖڙي اَکَرِ آئُڙِي؟

بيت - 43

جِئان ڪوڙِ ٻہ ڪاٺِيوُن، پَنجٖين لَکٖين پاءُ،
مَيو تِ‏ه ماڳاءُ ڏِيهاڻِي ڏارَ چَرٖي.

بيت - 44

جِئان ڪوڙِ ٻہ ڪاٺِيوُن، پَنجٖين لَکٖين پَنُ ،
تِئان ڇاڻٖي ڇُڳِيوُن، مَيٖي رَتو مَنُ،
تِ‏ه وَلِ سَندو پَنُ ڪُوماڻو ڪوڙٖين لَهٖي.

بيت - 45

لَکِ لاکِيڻو ڪَرَھو، ڪوڙيٖن ڏيئِي ڳِڌومِ،
اَڱڻِ سُونهَ ٿِئوم، مُلِ مَهانگو مَ چَئو.

بيت - 46

لَکِ لاکِيڻو ڪَرَھو، ڪوڙٖين ڏيئِي ڇوڙِ،
اِھا سَٽِ سَيِّدُ چٖي، جِهِين ٽِهِين جوڙِ،
تُرتُ رساڻٖي توڙِ، جُہ پَلاڻِئو تہ پِريَ مِڙٖي.

بيت - 47

لَکِ لاکِيڻو ڪَرَھو، ڪوڙيٖن ڏيئِي ڪاہِ،
ايلاچِيوُن آھُرَ ۾، پُوڄَ ميٖي کي پاءِ،
ڪَٿَ نہ ڪَندو ڪاءِ، جُہ پَلاڻِئو تہ پِريَ مِڙٖي.

وائي - 1

اَھِينِم ڳالَڙِيُون، ماءِ! مُرادوُن پِريَ سٖين.
جي مان پيٖيُون پِرِيَ رٖي کوءِ! سٖي راتَڙِيُون.
ماءِ! مُرادوُن پِريَ سٖين.
جي مان اوريوُن پِريَ سٖين، وَرُسي راتَڙِيُون،
ماءِ! مُرادوُن پِريَ سٖين.
پَسَڻ، ڪارَڻِ پِريَ جٖي، پاتِيُمِ جهاتَڙِيُون.
ماءِ! مُرادوُن پِريَ سيٖن.
آڌِيَ عبدُاللطيفُ چٖي، ڪُهَنِ ڪاتَڙِيوُن،
ماءِ! مُرادوُن پِرِيَ سٖين.

وائي - 2

سَڌٖين سٖيڻَ نہ ھُونِ، نِيهُ نِياپٖي نہ ٿِيٖي،
ڪارِيَ راتِ رَتَ ڦُڙا، جان جان نٖيڻ نہ روُنِ،
نِيهُ نياپٖي نہ ٿِيٖي.
موٽَڻُ جَنِين مِيهَڻُون، پِڙَ تي سيئِي پُونِ،
نِيهُ نِياپِي نہ ٿِيٖي.
جَنِ مُسافِرَ سُپِريِن، سي مَرُ رويو روُنِ،
نِيهُ نِياپٖي نہ ٿِيٖي.

وائي - 3

توڻٖي تَڙِيٖين تُون، يا اَلا! تو دَرُ توءِ نہ ڇَڏِيان!
مُون کي سو مُشاھِدو، جي مُهُ نہ ڏِيٖين موُن،
يا اَلا! تو دَرُ توءِ نہ ڇَڏِيان!
مُون ٻِئا دَرَ گَهڻا نِهارِئا، آھيٖين تُونهيِن توُن،
يا اَلا! تو دَرُ توءِ نہ ڇَڏِيان!

سر سري راڳ

داستان پھريون

بيت - 1

مانَ پُڇَنِئِي سُپِرِين، چِتا لاہِ مَ چُرَ،
اُنِين جا اَمُرَ، کَڻُ تہ خالِي نہ ٿِيٖين.

بيت - 2

مانَ پُڇَنِئِي سُپِرِين، چِتا چُرَ مَ لاہِ،
پِريَنِ اَڳِئا پاءِ، پَلَءُ مَڱَڻَهارَ جِنءَ.

بيت - 3

مانَ پُڇَنِئي سُپِرِين، چِتَ ۾ رَکِجِ چٖيتُ،
سِڙِہُ ڌُئارٖي صافُ ڪَرِ، صابُڻَ ساڻ سُپٖيتُ،
سامُونڊِي! سُچٖيتُ، ٿِيُ تہ پَهُچٖين پارَ کي.

بيت - 4

مانَ پُڇَنِئِي سُپِرِين، چِتَ ۾ چٖيتاريجِ،
ڪَڍِجِ ڪائٖي ڪَچَ کي، ڪُوڙُ مَ ڪَمائيجِ،
وَڻِجُ وِھائيجِ، سَڀُ سوداگَرَ! سَچَ جو.

بيت - 5

مانَ پُڇَنِئِي سُپِرِين، چِتَا لاہِ مَ چورُ،
ڪَڍِي ڇَڏِ توُن قلبَ مان، مارٖي ڪوڙُو ڪورُ ،
ھُنَ ڀَرِ سَندو ھورُ، مَٿا تو مَعافُ ٿِيٖي.

بيت - 6

مانَ پُڇَنِئيِ سُپرِيِن، چيتاريجِ چِتُ،
دائِما دُور بِيَ ۾، پَسٖين، وِلاتُنِ وِتُ،
نٖيهَ نٖيکارٖي نِتُ، ملاحَ! گَڏِ مُعۡلِمَ سٖين.

بيت - 7

ڪائو ڪَمايومِ، موتِي موُن نہ وَڻِجِئا!
سِيهٖي جو سَيِّدُ چٖي، وَکَرُ وِھايومِ!
ھِهَڙو حالُ سَندومِ توہَ تُهجِيَ اُبَهان!

بيت - 8

ڪَچُ ڪَمايُمِ ڪُوڙُ، ڀَڳَمِ عَهدَ اَللھَ جا!
پِڃِرو جو پاپَنِ جو، چوٽِيَ تائِين چُورُ!
معلومُ اَٿيئِي مُورُ، ڳُوڙھا! اِنَهِمۡ ڳالِ جو.

بيت - 9

ڪُوڙُ ڪَماءِ مَ ڪَچُ، اُٿِي اورِ اَللھَ سيٖن،
ڪَڍُ تون دَغا دِل مان، صاحِبَ وَڻٖي سَچُ،
مَحبتَ سندو مَنَ ۾، ماڻِڪَ! ٻارجِ مَچُ،
اِنَ پَرِ اُٿِي اَچُ، تہ سَودو ٿِيَئِي سَفَرو.

بيت - 10

سَودو اِھوئِي سَفَرو، سو مُون پَلَءِ پاءِ،
وَسُ ويچارٖي ناہِ ڪو، تون آگا! عَرضُ اُناءِ،
رِيَ ھمراھِيَ ھادِيَ جي، مُورِ نہ مِڙٖي ماءِ،
لُطفَ ساڻُ لَنگهاءِ، لَهِرُو لَهرِنِ وِچَ مان.

بيت - 11

لُڙَ، لَهرِيون، لَسَ، لٖيٽَ، جِتٖي اَتُ نہ آبَ جو،
اَللھَ! اُتِ مَ اولِيٖين، ٻيڙا مَٿي ٻيٽَ،
جوکو ٿِيٖي مَ جَهازَ کي، ڦَرَھٖي اَچٖي مَ ڦيٽَ!
لَڳٖي ڪا مَ لَپيٽَ، ھِنَ غارِيٖبي غُرابَ کي!

بيت - 12

سِڙَہ سَوان، لاڄُو نَوان، اولا سَندَنِ عاجَ،
ساٿِي سَفَرِ ھَلِئا، ڀَرٖي جُنگَ جَهاجَ،
حاصلُ ڪَرِيٖين حاجَ، واحِدَ! وَڻجارَنِ جي.

بيت - 13

سِڙَہ سَوان، لاڄُو نَوان، مُهاڻا سَندَنِ مِيرَ،
ساٿِي سَفَرِ ھَلِئا، ٿِئا سَڻاوا سِيرَ،
جي اَچَنِ ساڻُ اُڪِيرَ، سي ٻيڙا رَکٖين ٻاجَهہ سٖين!

وائي - 1

سَهسٖين شُڪرانا، ڪوڙِيٖين ڀالَ ڪَرِيمَ جا.
حمدُ چَئجِ حَڪِيمَ کي، جورِ ھَڻِي جانا، ڪوڙِيٖين ڀالَ ڪَرِيمَ جا.
تو ڏيکارٖي تو ڌَڻِي، باطِنَ جا بانا، ڪوڙِيٖين ڀالَ ڪَرِيم جا.
مَتان، مَردَ! وسارِيٖين صاحِبَ جو ثَنا، ڪوڙِيٖين ڀالَ ڪَرِيمَ جا.
دوستُ رَکِي دِل ۾، پَڙہُ لالَنُ لِسانا، ڪوڙِيٖين ڀالَ ڪَرِيمَ جا.
جَفا ڏيئٖي جِيَ کي، ٿِيُ فِڪرَ مَنجهِہ فَنا، ڪوڙِيٖين ڀالَ ڪَرِيمَ جا.
تُسِي توسٖين توہُ ڪري، مَنَ آگو اِحسانا!، ڪوڙِيٖين ڀالَ ڪَرِيمَ جا.
ڪَڍُ تُون دَغا دِل مان، ٻانهپَ سيٖن، ٻانها!، ڪوڙِيٖين ڀالَ ڪَرِيم جا.
صاحِبَ وڻٖي سَچَ سيٖن، ٿِيُ دانَهُ، ديوانا!، ڪوڙِيٖين ڀالَ ڪَرِيم جا.
جي تَسليِمَ سيٖن تَحقيِقُ ھُئا، سي ڪِنءَ اَمانا؟ ڪوڙِيٖين ڀالَ ڪَرِيمَ جا.
جاڳِئا جي، جَبارَ لَءِ، سيئِي سَمانا، ڪوڙِيٖين ڀالَ ڪَرِيمَ جا.
فَاذۡ کُروُنِيۡ اَذۡ کُرۡ کُمۡ، ڪَهِئو قُرآنا، ڪوڙِيٖين ڀالَ ڪَرِيمَ جا.
وَاشۡکُرُوالِيۡ وَلَا تَکۡفُرُوۡنِ، ڪَڍُ تون ڪُفرانا، ڪوڙِيٖين ڀالَ ڪَرِيمَ جا.
سَڀِ سَنوارِيا سُپِرينءَ، ڪُوَلَ تو ڪَنا، ڪوڙِيٖين ڀالَ ڪَرِيمَ جا.
چَڱِي چَئجِ چاہَ سٖين، مَدحَ اِيَ مَنا، ڪوڙِيٖين ڀالَ ڪَرِيمَ جا.
تائِبَ ٿِيو تَڪِڙا، جوشا، جُوانا! ڪوڙِيٖين ڀالَ ڪَرِيمَ جا.
تہ لَهٖين تُون لَطِيفَ کان، اَمُنُ اِيمانا، ڪوڙِيٖين ڀالَ ڪَرِيمَ جا.

وائي - 2

مون ۾ تُون موجُود! آئُون اَڳاھِين آھيان!
آئُون اَسُونهِين آھِيان!
اَکِيُون اَکَڙِيُنِ کي، سِڪئو ڪَنِ سُجُودُ،
آئُون اَڳاھِين آھِيان!
آئُون اَسُونهِين آھِيان!
تٖيلاہَ رَسِيُون بُودَ کي، جيلاہَ ٿِيُون نابودُ،
آئُون اَڳاھِين آھِيان!
آئُون اَسُونهِين آھِيان!
ماڙُهنِ جي موٽَڻَ جو، صاحِبَ هَٿِ سُجُودُ،
آئُون اَڳاھِين آھِيان!
آئُون اَسُونهِين آھِيان!
اِنَ دَرِ سيئِي اَگِهئا، جَنِ وِڃايو وُجُودُ،
آئُون اَڳاھِين آھِيان!
آئُون اَسُونهِين آھِيان!

داستان ٻيون

بيت - 1

جيڪِين مَنجهِہ جَهانَ، سو تارِيَ تَڳٖي تُهِجٖي،
لُطفَ جِي لَطِيفُ چٖي، تو وَٽِ ڪَمِي ڪانَ،
عَدُلَ ڇُٽان آن نَہ، ڪو ڦيرو ڪِجِ فَضُلَ جو!

بيت - 2

سارِي راتِ سُبحانُ، جاڳِي جَنِ يادِ ڪِئو،
اُنِ جِيَ عَبداللطيفُ چٖي، مِٽيَ لَڌو مانُ،
ڪوڙِيٖين ڪَنِ سَلامُ، آڳَهِ، اَچِئو اُنِ جي.

بيت - 3

سٖيوا ڪَرِ سَمُنڊَ جِي، جِتِ جَرُ وَھٖي ٿو جالَ،
سَئٖين وَھَنِ سِيرَ ۾، ماڻِڪَ، موتِي، لالَ،
جي ماسو جُڙَ ئِي مالَ، تہ پُوڄارا! پُرِ ٿيٖين.

بيت - 4

سي پُوڄارا پَرِ ٿِئا، سَمُنڊُ سٖيوِئو جَنِ،
آندائُون عَمِيقَ مان، جُوتِي جَواھَرنِ،
لَڌائُون لَطِيفُ چٖي، لالُون مان لَهرِنِ،
ڪانِه قِيمَتَ تَنِ، مُلُ مَهانگو اُنِ جو.

بيت - 5

سيوئو جَنِ سُبحانُ، وِيرِ نہ وِڙِھٖي تَنِ سٖين،
توبَهَ جي تاثِيرَ سٖين، تَرِي وِئا طوُفانُ،
ڏيئِي تَوَڪَّلَ تَڪِيو،آرُ لَنگهِيا آسانُ،
ڪامِلُ ڪِشتِيبانُ، وِچَ ۾ گَڏِيُنِ واھَرُو.

بيت - 6

سارِي راتِ سُڄاڻَ، سَودو ڪَنِ صاحِبَ سٖين،
ٻانهپَ ڀَرٖي ٻيڙِيوُن، ھَلِئا جوپَ جُوانَ،
پاڻِي پَهِلِوانَ، لَحظٖي مَنجِهہ لنگهٖي وِئا.

بيت - 7

ٻانهپَ جو ٻيڙِن ۾، وَکَرُ وِڌائُون،
موٽِي مَعرفَت جا، سَچا سودِيائون،
اَلتَّائِبُ مِنَ الذَّنۡبِ، اِيَ کَٽِ کَٽِيائُون،
اُنِين جِيَ آئُون، بَرڪتَ بارُ لَنگهائِيان!

بيت - 8

جَنِين سَودٖي، سَچَ جو، وَکَرُ وِھايو،
بَخِرو لَهُمُ البُشۡريٰ جو، اُنِين لَءِ آيو،
اُنِ کي لالَنَ لَنگهايو، ساندارو سَموُنڊَ جو.

بيت - 9

اِيَ گَتِ غَوّاصَنِ، جِنءَ سَمنڊُ سوجِهيائُون،
پيهِي منجهِہ پاتارَ جي، ماڻِڪَ ميڙِيائُون،
آڻٖي ڏِنائُون، ھِيرو لالُ ھَٿَنِ سٖين.

بيت - 10

آڇارا عَمِيقَ جا، گَڏِئا غَواصَنِ،
جَهرِيُون جهاڳٖي آئِيا، ڪارُونڀارَ ڪُنَنِ،
سَمُنڊُ سوجهٖي جَنِ، آڻٖي اَمُلَ اولِئا.

بيت - 11

وِئا جي عَمِيقَ ڏٖي، مُهِ ڪائو ڏيئِي،
تَنِ سِپُون سوجهٖي ڪَڍِيُون، پاتارا پيهِي،
پَسَندا سيئِي، اَمُلَ اَکَڙِيُنِ سٖين.

بيت - 12

آڏو چِڪَڻُ چاڙُ، مُهِجِي موجَ نہ سَهٖي مَڪُڙِي،
مٖيڙي مَٺايُنِ جو، بيحدِ چاڙھِيُم بارُ،
چَوَڻَ چارو ناہِ ڪو، بَدِيُون بي شُمارُ،
ڪَپَرُ ڪارُونڀارُ، اُڪارِيٖين اِحسانَ سٖين.

بيت - 13

وٖيَرَ مَ لاھٖي ويهُ، مٿٖي آرَ اوڙاہَ جي،
پَسيِ پاڙٖي وارِيُون، ڪِجِ اَنديشو ايهُ،
وِيندو نہ پَسٖين ڏيهُ، پَتَڻِ ھُنَ پارِ مَڻٖي؟

بيت - 14

اَٺَئِي پَهَر اوڙاہَ تي، مَنجهِہ گُهرِءِ گهارٖي،
وَسُ نہ ويچارٖي، تہ ڪا ماڳِ ڍُڪَندِي مَڪُڙِي.

بيت - 15

ھِڪِي ٻانهٖي چِتَ ۾، ٻِي صاحِبُ سَنوارٖي،
دَنگِي ھِنَ درياہَ مان، ھَلائٖي ھاڪارٖي،
تَرازُو تارٖي، سُتَڙِ سَڀيئِي ڪَرٖي.

بيت - 16

ھِڪِي ٻانهٖي چِتَ ۾، ٻِي سِٽٖي صاحِبُ،
ڪَڍٖي اُونهي ڪُنَ مان، اِي آگٖي جو عَجَبُ،
اِيُ سائِينءَ جو سَبَبُ، جِنءَ ٻُڏا اُڪارٖي ٻارِ مان.

بيت - 17

ھِڪِي ٻانهٖي چِتَ ۾، ٻِي جا ڪَرٖي اَللہُ،
پاڻِه وِجهٖي ڪُنَ ۾، پاڻِه اُڪارٖي اوڙاہُ،
تِه واحدَ کي واہُ، جو سُتَڙِ سَڀيئِي ڪري.

بيت - 18

ھِڪِي ٻانهٖي چِتَ ۾، ٻِي جا اَللھُ ڪري،
پاڻِه وِجهٖي ڪُنَ ۾، پاڻِه ڪَنڌِيَ نٖي،
سُتَڙِ سي ڍوئٖي، جي تَڙَ تَوائِي مَڪُڙا.

بيت - 19

ھِڪِي ٻانهٖي چِتَ ۾، ٻِي ڪري جوڙَ جَبارُ،
ڪَڍٖي اُونهٖي ڪُنَ مان، اِي آگي جو آڌارُ،
جَهازُ جوھَرِيَنِ جو، تِه کي ڀَؤُ نہ ڏٖي ڀَتارُ،
نَنڍا وَڏا مَڪُڙا، سَڀِ پَسَندا پارُ،
جيڏاہُ مُه مَدِينٖي جو، سُڄٖي مُحَمّدُ موچارُ،
سٻاجهو سَتارُ، سُتَڙِ سَڀيئِي ڪَرٖي.

وائي - 1

ڪنڌِي سارِيان ڪانَ، يا اَمُنُ! اَمانَ!
يا اِلاھِي! ٻاجَهہ ٻِلاٽِي ڀائِيان.
ڳَڻَڻَ ڳاڻيٽو ناھِڪو، اَپَرِ ٿِئا عِصيانَ،
يا اِلاھِي! ٻاجَهہ ٻِلا ٽِي ڀائِيان.
خَبَرَ ناہ قَبرَ جِي، نِسورا نِسيانَ،
يا اِلاھِي! ٻاجَهہ ٻِلاٽِي ڀائِيان.
والِي! رَسِجِ وَھِلو، اَرَکِ ٿِئا اِنسانَ،
يا اِلاھِي! ٻاجَهہ ٻِلاٽِي ڀائِيان.
سُڻُ سَٻاجها سُپرِين! نَعرو، نِگهبانَ!
يا اِلاھِي! ٻاجَهہ ٻِلاٽِي ڀائِيان.
مَدِيُون پَسِي مُهجِيُون، شَرِمايا شيطانَ!
يا اِلاھِي! ٻاجَهہ ٻِلاٽِي ڀائِيان.
ھِنَ مُهِجٖي حالَ تي، ھَيء ھَيء ڪَنِ حَيوانَ!
يا اِلاھِي! ٻاجَهہ ٻِلاٽِي ڀائِيان.
سائِين! سُکاڻِي آھِيٖين، ساموُنڊِيَ، سبُحانَ!
يا اِلاھِي! ٻاجَهہ ٻِلاٽِي ڀائِيان.
تُرَھو ڇِنُمِ تارِ ۾، رَسِجِ توُن رَحمانَ!
يا اِلاھِي! ٻاجَهہ ٻِلاٽِي ڀائِيان.
ٻيلِي جو ٻُڏَنِ جو، مون تي موٽٖي مانَ،
يا اِلاھِي! ٻاجَهہ ٻِلاٽِي ڀائِيان.
ويٺو پِنٖي پِنَڻو، ڪَرِ ڀيرو مٿي ڀانَ،
يا اِلاھِي! ٻاجَهہ ٻِلاٽِي ڀائِيان.
خالِقَ تان خُوبُ ڪِئا، گولَنِ جا گُذِرانَ،
يا اِلاھِي! ٻاجَهہ ٻِلاٽِي ڀائِيان.
آئوُن پُڻ اَنڌو اُنِ ۾، ويٺو پِنان پانَ،
يا اِلاھِي! ٻاجَهہ ٻِلاٽِي ڀائِيان.
سَڀِ سُؤالِي سَمَگِئا، داتا ڏيئِي دانَ،
يا اِلاھِي! ٻاجَهہ ٻِلاٽِي ڀائِيان.
وِلها سَڀِ وَھِيان ڪِئا، تُهجٖي جُودَ، جُوانَ!
يا اِلاھِي! ٻاجَهہ ٻِلا ٽِي ڀائِيان.
مَتان مُونکي ڇَڏِيٖين، ٻيلِي سندا ٻانَ!
يا اِلاھِي! ٻاجَهہ ٻِلاٽِي ڀائِيان.
وِيرَ! وَسِيلو آھِيٖين، داڙُو ۾ دِيوانَ،
يا اِلاھِي! ٻاجَهہ ٻِلاٽِي ڀائِيان.
لاءِ ڏُھارِيَنِ ڏيِهَ کٖي، خِيموُن اَڏِئو خانَ،
يا اِلاھِي! ٻاجَهہ ٻِلاٽِي ڀائِيان.
اُتٖي عبدللطيفُ چٖي، سُڻِج ڪا، سُلِطانَ!
يا اِلاھِي! ٻاجَهہ ٻِلاٽِي ڀائِيان.

داستان ٽيون

بيت - 1

کوُھا ڪالَ کَڻِي، اُنِ وِڌا اُتَرَ آسَرٖي،
اَلا! جُهرٖي مَ اُنِ جٖي، اولٖي جِي اَڻِي
وَڻِجارَنِ وَڻِي، وَکَرُ وِڌو ٻيڙِيٖين.

بيت - 2

وَکَرُ سو وِھاءِ، جو پَئِي پُراڻوُن نَہ ٿِيٖي،
ويچِيندٖي وِلاتَ ۾، ذَرو ٿِيٖي نہ ضاءِ،
سا ڪا ھَڙَ ھَلاءِ، آڳَهِ جِه جي اُبَهٖين.

بيت - 3

اورِيائِين آڻِينِ، ميڙِئو مُعۡلِمَ خَبَروُن،
سا تان سُڌِ نہ ڏِينِ، جِتٖي وَہُ ويڌَ ڪري.

بيت - 4

ٻيڙِي، تُهجِي ٻاجهَہ، وَکَرُ تِه وِصالَ جو،
کوُھا، اولا، تو ڪِئا، سَڀِ سُونهارا ساجَ،
اُتِ ڪا مُعۡلِمَنِ حاجَ، جِتِ پُورَڻَ وارو پاڻِهِمۡ.

بيت - 5

ٻيڙِي پُراڻِي، وَکَرُ پاءِ مَ وِتَرو،
تَرٖي ۾ تُنَ پِئا، پاسَنِئُون پاڻِي،
ھِيَ ھَڏِ وِھاڻِي! ڪَڙھُہ ڪالوُڻٖي ڏِيهَ کي.

بيت - 6

تَرٖي تُنَ پِياسِ، پاسَنِئوُن پاڻِي وَھٖي،
کُوھو جهُر جهُنو ٿِئو، لاڄُو سَڀِ لَڙِياسِ،
جيلاہ سَڌَرُ سُکاڻِياس، وَھٖي تٖي وَہَ سامُهُون.

بيت - 7

ويٺو تنَ تُنِينسِ، مَکِ ڏِيهاڻِي مَڪُڙِي،
سَنباھٖي سَيّدُ چٖي، مٿي نيٖڍُوءَ نِينسِ،
وَٽائٖي وَڏاندَرا، لاڄُو لَڳائِينسِ،
آخَرِ اُھِرائِينسِ، تہ جوکو ٿِيٖي نہ جَهازَ کي.

بيت - 8

تُنَ تُنِيندو آءُ، مَکِ ڏِيهاڻِي مَڪُڙِي،
سانباھِي سَمُونڊَ جِي، مَنا مورِ مَ لاہِ،
اَڄُ ڪِ سَنجهِہ صُباحِ، اُھِرَندِي اَتانگَ تَڙيٖن.

بيت - 9

اَچِي سو ڏِٺوءِ، جو ڪَپَرُ سوءِ ڪَنَنِ سيٖن،
سُتٖي لوڪِ، لَطِيفُ چٖي، يادِ نہ ذرو ڪِئوءِ،
غافِلُ ٿِي غُرابَ کي، اوڙَہَ تي آندوءِ،
سو ڇِتَرُ ڇُوھٖي کان رَکٖين! جو پِئو پُراڻوُن پوءِ،
جَهازُ ضَعِيفَنِ جو، پاڻِيَ ۾ پَرِتوءِ!
سَيِّدَ! ساٿُ سَندوءِ، پُرِ بَندَرِ پَهُچائِيٖين!

بيت - 10

جُتو وانءُ، جَهازَ! گڏئو غُرابَنِ سٖين،
پُورِيندٖي ھُنَ پارَ ڏي، سَڌَرَ کَڻِجِ سازَ،
اَچَنِ ٿا آوازَ، سَٽاڻٖي سَموُنڊَ جا.

بيت - 11

دَنگِي وچِ دَرياہَ، ڪِين ٻُڏٖي ڪِين اُپِڙٖي،
ھو جٖي واڍٖي واڻِئا، سي سُونهَڻَ سَڀ سَڙِيا.
مُعۡلِمَ ماڳِ نہ اَڳيِيٖن، ڦِلِنگِي مَنجهِہ ڦِريا،
ملاحَ! تُ‏هِجِيَ مَڪُڙِي، اَچِي چورَ چَڙھِيا.
جِتي ڍِينگَ ڍَرِيا، تِتي تارِي تُهِجِي!

بيت - 12

دَنگِيَ ۾ داڻا، وَٺِي وِجهُہ وَکَرَ جا،
وِيرِ وِڙَھندِيَءِ ويسَرا! وِہُ مَ، ويڳاڻا!
ھِيَ نِنڊَ نَہ ڄاڻان، ڪَڏِہ ھَڻَندِيَءِ تارَ ۾!

بيت - 13

وَکَرُ ، وَڻِجارا! پاڻَ پَرائو چاڙِھئو،
اَچِي لَهِرِيوُن لَڳِيُون، ٻيڙِيَ ٻِپارا،
جاڳو جٖي، يارا! تہ تَڙِ تَوائِي نہ ٿِيٖي.

بيت - 14

ٻيڙِياتا! ٻٖيئِي، تو نَہ ڦَٻَندِيُون ڳالَڙِيُون،
سَڄِيُون راتِيوُن سُمَهٖين، ڀَرُ سُکاڻَ ڏيئِي،
صُباحَ سَڀيڻِي، پارِ پُڇَندَءِ خَبَروُن.

بيت - 15

وَہَ تِکَ وَھَڪُرا، جِت نَنگَرَ نہ ٺَهِرَنِ،
وَڏاندَريوُن وَہَ سامُ‏هِيوُن، جَجهٖي زورِ جُنَبنِ،
نٖيڍُوءَ ۾ ناتارِيوُن، وَڻِجارا وِجَهنِ،
مُلا مُعۡلِمَنِ، مون ڳَرِي سُئِي ڳالَڙِي.

بيت - 16

وَڻِجارا! ويٺٖي، تو نہ سَرَندِي شاہَ رٖي،
مَکِ پَهجِي مَڪُڙِي چَڱِي ڪَرِ چيٺٖي،
پاسا پاکَڙِيَنِ جا، سَمُنڊُ ٿو سيڪٖي،
جي لُنڊا ۾ لٖيکٖي، وِيرِ وِڙھندِي تَنِ سٖين.

بيت - 17

ناکُئو نِگَهَبانُ، مُعۡلِمَ مُنجٖي خَبَرُون،
جَنِ سارٖي کَنيو سَمُونڊَ تي، سَفَرَ جو سامانُ،
لُطفَ ساڻ لَطِيفُ چٖي، تَنِ لَنگهِئو طُوفانُ،
سَنڀارٖي سُبۡحانُ، وَڃِي عَادَنِئُون اُکَتَا.

بيت - 18

بَندَرِ جان ڀَئِي، تہ سُکاڻِيا! مَ سُمَهو،
ڪَپَرُ تو ڪُنَ ڪري، جِنۡ ماٽٖي منجهہ مَهِي،
ايڏو سُورُ سَهِي، نِنڊَ نہ ڪِجٖي، ناکُئا!

بيت - 19

سُتا سَڀِ پَئِي، سَندٖي مُعۡلِمَ آسَرٖي،
اَئِين پُڻِ سُمهو، ناکُئا! بَندَرِ ناہِ ڀَئِي،
جَنِ جِي سَيِّدَ لَڄَ کَنئِي، سي سَڀِ لَنگهِيندا لَڪِيوُن.

وائي - 1

ساٿِيَنِ نَنڌا بارَ، وو! تَنِ پانڌِيَنِ نَنڌا بارَ،
توکي آرَسُ اَکَڙِيُنِ ۾!
پاتا پاڙٖيوارِيٖين، پَڳَهَہ مَنجهِہ پاتارَ،
توکي آرَسُ اَکَڙِيُنِ ۾!
پَتَڻُ ٿو پُورَ ڪَرٖي، آئِي تُهِجَڙِي وارَ،
توکي آرَسُ اَکَڙِيُنِ ۾!
سَڄِيوُن راتِيوُن سُمَهٖين، کِيو منجهہ خُمارَ،
توکي آرَسُ اَکَڙِيُنِ ۾!
ڪِ تو ڪَنٖين نہ سُئِي، ھَلَڻَ جِي ھاڪارَ؟
توکي آرَسُ اکڙيُنِ م!
تائِبَ ٿِيو تَڪِڙا، سَچِي اِيَ سَنڀارَ،
توکي آرَسُ اکَڙِيُنِ ۾!
نِنڊَ نہ ڪِجٖي ايتَرِي، سُڻِجِ، اَدا ياَر!
توکي آرَسُ اَکَڙِيُنِ ۾!
سائِينءَ مُڪِهَ سَچَ کي، تون ڪُوڙو مَنجِهہ قَطارَ،
توکي آرَسُ اَکَڙِيُنِ ۾!
ڪ تو ڪَنٖين نہ سُئِي، ڪَپَرَ جِي ڪُوڪارَ؟
توکي آرَسُ اَکَڙِيُنِ ۾!
گِهڙان ٿِي رِءَ گَهڙٖي، اِلاھِي تُهارَ!
توکي آرَسُ اَکَڙِيُنِ ۾!
ھو جو شَڪُ شارِڪَ جو، تِئان رَکُ، سَتارَ!
توکي آرَسُ اَکَڙِيُنِ ۾!
ڪُلُّ نَفۡسٍ ذَائِقَتهُ الۡمَوۡتِ، پَڙھو اِيَ پَچارَا،
توکي آرَسُ اَکَڙِيُنِ ۾!
شِڪارُ تون شَهبازَ جو، تون تان مَنجِهہ شِڪارَ!
توکي آرَسُ اَکَڙِيُنِ ۾!
يَوۡمَ يَفَِّرُالۡمَرَءُ مِنۡ اَخِيۡهِ، جِت ڀَڄَندا ڀارَ،
توکي آرَسُ اَکَڙِيُنِ ۾!
تُرَھو ڇِنو تارِ ۾، اَچِجِ تُون، اوسارَا!
توکٖي آرَسُ اَکَڙِيُنِ ۾!
لَکَ مِڙيئِي لُٽِئا، ھُنهِين وِئا ھَزارَ،
توکٖي آرَسُ اَکَڙيُنِ ۾!
ڏِنَءِ جي اَللھَ کي، ھُندَ ٿِيٖين پَرِيٖين پارَ،
توکي آرَسُ اَکَڙِيُنِ ۾!
جوٽَنِ مَٿا جُٽِڪي، دُنِي تُهِجٖي دارَ!
توکي آرَسُ اَکَڙِيُنِ ۾!
جِيفوآہِ حَدِيثَ ۾، اَنڌِيَ اِي آچارَ،
توکي آرَسُ اَکڙِيُنِ ۾!
وَٽِيَءِ ڪِينَ وِلَهنِ سيٖن، ڪَنبِي ڀَرِ قَهارَ،
توکي آرَسُ اَکَڙِيُنِ ۾!
ساڪِنءَ ھَلٖي توسٖين، جا ڀَڳِي کان ڀَتارَ؟
توکي آرَسُ اَکَڙِيُنِ ۾!
جِئڻُ، جالَ نہ نِبَهٖي، سُڻِجِ اِيَ سَنڀارَ،
توکي آرَسُ اَکَڙِيُنِ ۾!
جِمَ وِساريٖين ويسَرا! ڀِتِن جِي ڀُلِڪارَ،
توکي آرَسُ اَکَڙِيُنِ ۾!

داستان چوٿون

بيت - 1

سڀيئِي سَئِينءَ ڪَرٖين، ڪو مَ مُنجهايٖين واٽِ!
سُپيرِيان جي ساٿِ، لائو لَڱو ميڙِيٖين!

بيت - 2

سَڀيئِي سُبحانَ جي، ڪَرِ حَوالٖي ڪَمَ،
ٿِيُ تَحقِيقُ تَسِليمَ ۾، لاھٖي غَمَ وَھَمَ،
قِادرُ ساڻُ ڪَرَمَ، حاصُلُ ڪري حاجَ تو.

بيت - 3

چَڱَنِ ساڻُ چَڱائِيُون، اِنءَ سَڀُڪو ھوءِ،
ٿو جِنءَ ڪَرٖي نہ ڪوءِ، بُڇَنِ ساڻُ ڀَلائِيُون.

بيت - 4

چَڱا ڪَنِ چَڱائِيُون، مَٺائِيوُن مَٺَنِ
جو وَڙُ جُڙٖي جَنِ سيٖن، سو وَڙُ سيئِي ڪَنِ.

بيت - 5

مَيَنِ مَٿٖي سَمَرا، کُهِيَنِ سَڏَ ڪَرِينِ،
ساٿُ نِباھِيو نِينِ، اِيَ پَرِ سَندِي سَڄَڻٖين.

بيت - 6

وِتُ وِيمٖي جو جٖي لَهٖين، تہ ٻِي ڪارِ نہ ڪَرِيٖين ڪا،
سا پَروُڙِج ڳالَڙِي، وَڻِجارَنِ وَٽَا،
موٽِي جَنِ ھَٿا، آندَءِ گَهٖڻي اَدَبَ سٖين.

بيت - 7

اَمُلَا آڇِ مَ اُنِ کي، جٖي نہ پَروُڙنِ مَٽِ،
جِتِ گَڏِجيئِي جوھَرِي، ماڻِڪُ تِتَهِم مَٽِ،
جَنِين سونَ سٖين سَٽِ، تَنِ ھَڻِي رِيُّ رَدِ ڪِئو.

بيت - 8

سونا! وانءُ صَرافَ سينءَ، لڏو لاہِ مَ، لَڏِ،
سودو سوئِي ڇَڏِ، جِه ۾ جَواھِرُ ناہِ ڪِين.

بيت - 9

سونا! وانءُ صَرافَ سِينءَ، لَڏو ھَڏِ مَ لاہِ،
آھي تَنِ اُونداہِ، جَنِ جَواھِرَ ضايَع ڪِئا.

بيت - 10

جُہ صَرافَنِ لَڏِئو، تہ تُون پُڻِ لَڏِجِ، سونَ!
قَدُرُ لَهَندُءِ ڪونَ، نيئِي گَڏِيندَءِ گَڏُوءَ سيٖن.

بيت - 11

اَگِهئو ڪائو ڪَچُ، ماڻِڪَنِ موٽَ ٿِي!
پَلَءِ پايو سَچُ، آڇِندٖي لَڄَ مَران!

بيت - 12

وِئا سي وِنجهارَ! ھِيرو لَعلُ وِنڌِينِ جي،
تَنِين سَندا پوئِيان، سِي‏هٖي لَهَنِ نَہ سارَ،
ڪُٽِنِ ڪُٽِ لُهارَ، ھاڻٖي اُنِين ڀيڻِيٖين.

بيت - 13

وَڃَنِ مَ وِنجهارَ! پاڻِيَٺَ جي پَرَکَڻا،
ڪَنۡيَرُ پايو اَکِيٖين، لَهَنِ سَڀَڪِه سارَ،
موتِيَ جي مِزاجَ جو، قَدرُ مَنجهِہ ڪِنارَ ،
صَرافَنِئُون ڌارَ، ماڻِڪَ مُلاحِظو ٿِيٖي!

بيت - 14

ٿا صَرافَ سُڄَنِ، پاڻُ ڪوٺائِنِ جوھَرِي،
ماڻِڪُ ڪري مُٺِ ۾، وانءُ وَٺِي وَٽِ تَنِ،
سَندُسِ ئِي سَيِّدُ چٖي، ڪِهَڙو قَدُرُ ڪَنِ؟
پاڻِيَٺُ ئِي پَرکَِن، ڪِ ڪَئِنچَلُ گَڏِن ڪَچَ سٖين؟

بيت - 15

اَمُلُ، اَسارِي پَئِي، ڀورِي! ڀَڳُءِ جِتِ،
ڪُه نہ رُنُءِ تِتِ، ٻَئِي، اَڌَ ھَٿِ ڪري؟

بيت - 16

اَمُلُ اَسارِي پَئِي، ڀورِي! ڀَڳُءِ جِينءَ ،
وَانءُ صَرافَنِ سِينءَ، ٻَئِي اَڌَ ھَٿِ ڪري

بيت - 17

ماڻِڪُ مُنڌَ ھَٿا، پيتِيَ ۾ پُرِزا ٿِئو!
سَڄو تان، سَيِّدُ چٖي، لَهٖي لَکُ سَوا،
ڀَڳٖي پُڄاڻا، پَدَ مان ئِي پَرٖي ٿِئو!

بيت - 18

جِتي ماڻِڪَ ماڳُ، تِتي چوران تَڪِيو،
سَئوُن تَنِ سَڀاڳُ، اَمُلُ جَنِ اوباھِيو.

بيت - 19

چورُ اُڀو اِنءَ چوءِ، تہ آئُون اُھوئِي آھِيان،
جي اَسِي اَکِيَنِ ھوءِ، تہ لِڪٖي کي ڪو نَہ لَهٖي.

وائي - 1

جاڳو، يارا! جٖيڏِيُون! پاڻُ پَرَنِجٖي،
جاڳو، جوشا! جٖيڏِيُون! پاڻُ پَرَنِجٖي.
ھلٖندي حَبِيبَنِ ڏي، ويلو وچِ نہ ڪِجٖي،
جاڳو، جوشا، جيڏيون!
مَٿا اُھِسَ اُسِرِي، پَتنگ جِنءَ پَئجٖي،
جاڳو، جوشا، جيڏيون!
عَرَضُ اَحوالُ اُنِ کي، چَڱِيَ ڀَتِ چَئجٖي،
جاڳو، جوشا، جيڏيون!
ڪري نِيازُ نِڪَڻوُن، واحِدَ ڏي وَرجٖي،
جاڳو جوشا، جيڏيون!
آھي موتُ مِڙنِ تي، گوڙِيون ڪِئو گَجٖي،
جاڳو، جوشا، جيڏيون!
اَجَلُ اِيندُءِ اوچتو، جو سَدا ٿو سُڄٖي،
جاڳو، جوشا، جيڏيون!
اَڳِيان اُنداھِيَ جو، سَمَرُ ساڻُ ڪِجٖي،
جاڳو، جوشا، جيڏيون!
کَڻُ تون قُوتُ قَبَرَ جو، گَهڻُو ٿو گُهِرجٖي،
جاڳو، جوشا، جيڏيون!
آگو عيبَ اَواھِنجا، ڍَڪِئا ڳُجهَہ ٻُجهٖي،
جاڳو، جوشا، جيڏيون!
جيڪِين وَھٖي وُجُودَ ۾، صاحبُ سو سَمُجٖهي،
جاڳو، جوشا، جيڏيون!
ڊڄِي ڊاءِ ڌَڻِيَ جي، جيڪو ڀَيءِ ڀَڄٖي،
جاڳو، جوشا، جيڏيون!
اَمُنُ آھي اُنَ کي، جو مَنجهِہ اللھ اَجهٖي،
جاڳو، جوشا، جيڏيون!

داستان پنجون

بيت - 1

مون ٿٖي چَيُ ءِ، ڪاندَ! ڀُتِي ڀاڙِ مَ مَڪُڙِي،
سِڙہَ پُڙاڻا پاندَ، لَهرِيُون سَهِي لَڳَندِيوُن.

بيت - 2

لَهرِنِ ليکو ناہِ ڪو، جِتِ ڪَپَرَ ڪُنَ ڪارا،
آڇارا عَمِيقَ جا، اَچَنِ اوڀارا
اُٿِي، اَسارا! وِيرِ وِڙَھندِيَءِ، ويَسرا!

بيت - 3

وِيرِ وِڙَھندِيَءِ، ويَسرا! اُٿِي توہُ طَلَبِ،
سائِرَ ڪِه سَبَبِ، ڪالَ نہ وِڌِہ ڪُنَ ۾.

بيت - 4

ڪالَ وِڌائِين ڪُنَ ۾، جاڏا جُنگَ جَهازَ،
تُهِجِي اَڄُ تَرازَ، آھي آرَ اَکِنِ ۾.

بيت - 5

آھي آرَ اَکِنِ ۾، ناکُئا! ڪِجِ نِگاہَ،
وَڏا ٻيڙا ٻوڙِئا، سائِرَ ڏيئِي ساہَ،
مُلاحِظو، مَلاحَ! ڪِجِ ڪو اِنَهِ ڪُنَ جو.

بيت - 6

مُلاحِظو مِهرانَ جو، مُورِ مَ لاہِ مَناءُ،
سامُونڊِي!َ سَنڀالِ ڪِين! سُمَ‏هڻَ آيُءِ ساءُ،
جاڳِي جَرَ مَٿاءُ، تارٖي وانءُ تَرازَ کي.

بيت - 7

تارٖي وانءُ تَرازَ کي، مَنجها، مَوجَ، مَلاحَ!
داھُون ڪَنِ درياہَ جِيوُن، اُونهِيٖ جا آگاہَ،
سوُنهَنِ جِي صَلاحَ، وَٺُ تہ وِيرِ لَنگهٖي وَڃٖين.

بيت - 8

سوُنهان سُڌِيُون ڏِينِ، ھِنَ ديوانٖي دَرِياہَ جِيوُن،
ڪُوڙَ اوڏائِي ڪِينَ ڪِين، رُڳو سَچُ سودِينِ،
عِجِزَ جو اَڌَ راتِ کي، وَکَرُ وِھائِينِ
ساٿُ نِباھِيو نِينِ، ثابِتُ اِنَهِم سِيرَ مان.

بيت - 9

ثابِتُ لَنگهِئا سِيرَ، لَهرِنِ لوڏِئا ڪِينَ ڪِين،
وَڃِي پَهتا پارَ کي، نِرتِئُون مَنجهان نِيرَ،
ماءِ پَهُتا مِيرَ، ٻارِ لَنگِهيائون ٻاجهہ سٖين.

بيت - 10

تون ويسَرو، ويِرَ! ساٿَينِ سَنڀَتِ پَنڌَ جِي،
جوڙٖي جُنگَ جَهازَ کي، ڪوڏِ ھَڻائِجِ ڪِيرَ،
وَھٖي وَڻجارَنِ جِي، بَندرَ ڏاہَ بَهِيرَ،
گَهرِ تَنِين جٖي کِيرَ، جَنِ لاڳٖيدارَ لَنگهائِيا.

بيت - 11

قَرڦُلَ، ڦوٽا، پارِچا، پاڻِيَٺَ پاتائون،
ڪوٺيُون قِيمَتَ سندِيُون، تَرَ ۾ تاڪِيائون،
لاڄُنِ منجهِہ لطيفُ چٖي، ٻيڙا ٻَڌائون،
نَذَرُ نَبِيَ ڄامَ جو، چڙھندٖي چَيائون،
جي ڇُھٖي ڇوڙِيائون، سي ٻيڙيون رکٖين ٻاجهَہ سٖين!

بيت - 12

وِچِينءَ جان ويهِي، جَرِ پَلَءُ پائِيان،
”تَڙِ ٻيڙا! گَهرِ سُپِرِين!“ اوسَهِ اِيَ پيئِيِ،
جِنءَ وَڻجارو سيٖن وَکريٖن، سَرَھا سڀيئِي،
حُرمَتَ ساڻُ حَبِيبَ جي، سُونگِئا نہ سيئِي،
پاڻِه اُوءِ پيهِي، کَنڊَ کٖيڙائوُ آئِيا.

وائي - 1

عُمرِ سَڀَ عَبَثُ، ويٖلَ وِڃايَمِ، وَقتَ وِڃايَمِ پاھِجا!
ويٺِي لِکِئو لوڙِيان، جيڪِين ڪِئَڙو مَسُ!
ويلَ وِڃايَمِ پاھِجا!
اَچِي اَڀاڳِيَنِ کي رَسِجِ، اچِي رَسُ!
ويلَ وڃايَمِ پاھِجا!
حالُ مُهِجو ھِهَڙو جِهَڙو، تان توُن پِرِيَمِ! پَسُ
ويلَ وِڃايَمِ پاھِجا!
قَلبُ جو ڪارو ٿِئو، ڪاتِبَ! لاھِيٖين ڪَسُ!
ويلَ وِڃايَمِ پاھِجا!

داستان ڇھون

بيت - 1

تانگٖي ۾ تاڻٖي، ٻَڌُ پَهِجو تُرَھو،
اُونهٖي ۾ آڻٖي، ڪونَ ڏِيندُءِ ڪو ٻئو!

بيت - 2

تارُو تَرِئو وَڃَنِ، نَنڍا وَڏا واھُڙا،
ھَيء! ٻَرِ! اَٺارُنِ، جِنءَ ڳَرا مَٿِنِ مولِيا.

بيت - 3

ڏوٖري لَهُ ڏاتارُ، جِمَ وِھٖين ويسَرو!
ھَڪِئو ھوجِ ھُشِيارُ، کِوَڻِ کِوَندِيَءِ اوچتِي.

بيت - 4

سُتِه ڪِهَڙِيَ سارَ؟ وِڄُ کِوَندِيَءِ، وَيسرا!
ٿو جيڏا تو يار، لَهِرِن لَهِوارا ڪِئا.

بيت - 5

سُتهِ سَنجهيئِي، وِڄُ کِوَندِيَءِ، ويسَرا!
وِيرَ وَرِي ويئِي، اَسارَنِ تان اوچتِي.

بيت - 6

کِوَڻِ کِوايو، آيَءِ نِنڊَ اَڀاڳَ کي!
جَنِين نَہ ڀَؤُء ڀانيو، ڪري تَوائِي تَنِ کي.

بيت - 7

سامُونڊِي! ٿو سَنبَهٖين، ساڄو جَهلِ سُکاڻُ،
لَڳٖي واءُ وَڏاندَرو، مُنجهائٖي مَهراڻُ
جَنِين ڀانيو پاڻُ، ڪَري تَوائِي تَنِ کي.

بيت - 8

نَڪو سُکُ نَکَٽٖين، نَہ ويساندِ نَئٖين،
جيڪا اَچَئِي سامُهِين، ڀايٖين سا سَئٖين!
مُوڙِي ڪوہُ مَئٖين؟ جِنءَ سَڄِيُون راتِيوُن سُمَهٖين!

بيت - 9

اَھُکِي راہَ اللھَ جِي، اَھُکِي، اُھُکِيَ ڀَتِ،
ھُوءِ جي ڏِھائِي، ڏيهَ جا، تَنِ پُڻِ مُوڙھِي مَتِ،
آڇارانِ اُبَتِ، گِهڙِجِ گهاٽٖي نِيهَ سٖين.

بيت - 10

مَ ڪِين ھٖيجِ، مَ ھوجِ تَرسُ مَ، تاڻِ جَهازَ کي،
چَؤ ڪَلِمُون مُحَمَّدَ تي، تہ اَڳيان اَچيئِي اوڄَ،
سَهُکِيَ ڀَتِ، سَٻوجهَہ! تُهجِي مَڪٖي ڍُڪٖي مَڪُڙِي.

بيت - 11

تَنَ م تَرازَ توہَ جِي، گَهڻُو لَهُ گهورٖي،
اَدبَ ۽ اِخلاصَ جا، سِڙہَ ٻَڌِجِ سورٖي،
وَکَرُ وينَتِيُنِ جو، تِه ۾ پاءِ توري،
تہ عادَنِئُون اورٖي، تُهِجو تَوائِي نہ ٿِيٖي.

بيت - 12

توڻٖي تَوائٖي، توءِ تُهِجو آسَرو!
سَڄَڻَ ڳَرِ لائٖي، کيِرٖوُن ڏِندِيَسِ جيڏِيٖين.

وائي - 1

ھٖي جٖي، ھو جٖي لڪَ! مون مارِيندا لَڪَ!
مُون مارِيندا لَڪَ!
يا والِي! ڪيچُ نہ اوڏِيَ ڇَڪَ!
موُن مارِيندا لَڪَ!
اَتُ نہ ڏِجٖي عامَ کي، لوڪا ڪِجٖي لِڪَ،
موُن مارِيندا لَڪَ!
پاڻَ ۾ پارِيُون ڪري، نِيهَ وَھائِجٖي نِڪَ،
موُن مارِيندا لَڪَ!

سر سامونڊي

داستان پھريون

بيت - 1

پَڳَهَ پاسي گهارِ، آيَلِ! سامُونڊِيَنِ جٖي،
وِجهِي جِيُ جَنجارِ، جِمَ وَڃَنِئِي اوھَرِي.

بيت - 2

پَڳَهَ پاسي پَچُ. آيَلِ! سامُونڊِيَنِ جي،
مَنَ ۾ ٻارٖي مَچُ، جِمَ وَڃَنِئِي اوھَريِ.

بيت - 3

پَڳَهَ پاسي وٖيهُ، آيَلِ! ساموُنڊِيَنِ جي
تون ويسَرِي وِکَ کَڻٖين، ھو پُورِيندا پرَ ڏيهُ،
سَمُنڊُ جَنِ ساڙيٖهُ، ڪوہُ نہ ويٖئِيَن تَنِ سيٖن؟

بيت - 4

جان انِدہِ تان آءُ، ھَڻِي ھَٿُ پَڳهَ ۾،
لَڳٖي واءُ سُواءُ، سِڙُہ سانباھِي نہ سَهٖي.

بيت - 5

نَنگَرَ جان نہ کَڻَنِ، وانءُ وَھلِيِ نِڪرِي،
مَڇُڻ ڏيٖهِ وَڃَنِ، ناڙِيُون پُورٖي ناکُئا.

بيت - 6

نَنگَرَ ۽ ناڙِيُون، پَڳَهَ کَڻِي پَنڌِ ٿِئا
بَندرَ بازارِيُون، سُڃا سامُونڊِيَن رٖي.

بيت - 7

نَنگَرَئُون نٖيڻٖين، مَنُ اولِيَ نہ اوھَرٖي!
سَٻاجهٖين سيڻٖين، پائٖي ڳُڻَ ڳِهِيون ھِيوُن.

بيت - 8

سيئِي جوڀَنَ ڏِيهَ، جَڏِہ سَڄَڻَ سَفَرِ ھَلِئا!
رُئان، رَھَنِ نہ سُپِرِين؛ آيَلِ! ڪَرِيان ڪِيَّ؟
مُون کي چاڙھٖي چِيَّ، وِئو وَڻِجارو اوھَرِي!

بيت - 9

نَہ سي تَڙِ ھوڙاڪَ، نَہ وايُون وڻِجارَنِ جِيوُن!
سَرَتِيُون! سامُونڊِيَنِ جا، اَڄُ پُڻِ چِڪِئَمِ چاڪَ،
مارِينِهُون فِراقَ، پاڙٖيچيُون! پِريَنِ جا.

بيت - 10

وِئا اُھَرِي اوءِ، مونکي ڇَڏٖي ماڳِهِمۡ،
جُڳَنِ جا جُڳَ ٿئا، تِئان نہ موٽِئو ڪوءِ!
گُندَرُ مارِيندوءِ، ويچارِي! وِئَنِ جو.

بيت - 11

اُونهٖي ۾ اُھَرِي، جَڏِہ جي وِئا،
ساندارٖي سَموُنڊَ جي، نِهوڙٖي نِئا!
وَڃِي تِتِ پِئا، جِتِ نِهايَتَ ناہِ ڪا.

بيت - 12

اُونٖهي ۾ اُھَرِي، جَڏِہ، وِئا جي،
موٽِي ماڳِ نہ آئِيا، ماءِ! سامُونڊِي سي،
کارو تَنِين کي، جيڪُسِ وَہُ وَرِي وِئو!

بيت - 13

اوڙاہِ وِئا نہ وَرِئا، آئُون تِه مارِي ويٖڻَ!
ڪري ساموُنڊِي سيٖڻَ، جُسٖي جارُ پِرائِيو!

بيت - 14

جي وِئَڙَمِ اَڄُ، سي ڪَڏِہ اِيندا مان ڳَرٖي؟
پِريان جِي ھُنَ پارَ ڏي، وَڃِي دَنڪِي ڌَڄُ،
ساموُنڊِيَڪو ڏَجهُہ، ماءِ! مارِيندُم ڪَڏِھِمۡ!

بيت - 15

اُھَرِيا جِئائِين، ڍُڪَنِ تَنِ تَڙائِيٖين!
ساموُنڊِيَنِ سائِين! واءُ سَڻائو وارِيٖين!

بيت - 16

ساموُنڊِي سارٖي، مَٿٖي تَڙَ گُذارِيان،
موُن کي ٿِي مارٖي، اُنِين سَندِي ڳالَڙِي!

بيت - 17

ساموُنڊِي سارٖي، ماءِ! مُهِجو ڄِندَڙو،
بَندَرِ ويچارٖي، وَڃِي لايا ڏِيهَڙا.

بيت - 18

سامُونڊِيُڪو سَڱُ، آھي گُندَرَ گاڏُئُون،
اَنگُنِ چاڙھي اَڱُ، وِئو وَڻِجارو اوھَرِي!

بيت - 19

وڃٖيئيِ وِسَرِي شالَ! جو توُن سودو سِکِئو،
اَڃا آئٖين ڪالَ، پُڻِ ٿو سَفَرِ سَنبَهٖين!

بيت - 20

ڳِرِيو جهَلِئو روءِ، مَٿي مُهرٖي ھَٿَڙا،
کوءِ! سودو سَندوءِ، جو تون، ڍولئا! سِکِئو.

بيت - 21

اُلوڙَڻُ نَہ ڏِئٖي، وَرُ وِڌائِين وَنجهَہ کي،
رَہُ اَڄوڪِي راتَڙِي، لالَنَ! موُن لائٖي،
وَڃۡ مَ ڦوڙائٖي، ايڏٖي سَفَرِ، سُپِرِين!

بيت - 22

جيڪُسِ نِٻَرُ نِيهُ سَندومِ، جِنۡ موُن اُٻِي، ھُنِ ٿٖيلِئو،
سَعيو ساموُنڊيَنِ سٖين، اَڳهِم تان نَہ ڪِئومِ،
وِجهَڻُ مَنجهِہ ھُئومِ، پاڻُ وَرااڪٖي رَسِ سٖين.

بيت - 23

ٻيڙِيَ جٖي ڀوُڻَنِ، نِيهُ نہ ڪِجي تَنِ سٖين،
اُڀِيوُن ڏَنڀَ ڏِسَنِ، جُہ سِڙہُ ڏيئِي سِيرَ ٿِئا.

بيت - 24

ھِيَڙو ٻيڙِيَ جان، ڏُتَڙِ پٖي ڏِيه ٿِئا!
پُڇِئو تان نَہ پِريان، ڪَرَ لاھُو ٿِي ڪَڏِھِين.

بيت - 25

تَنَ جَنِين جِي تانگَ، سي سَڄَڻَ سَفَرِ ھَلِئا،
لَئِج لاتِ، لَطِيفُ چٖي؛ ڪَڏِہ اِيندَمِ؟ ڪانگَ!
ڪِه سَٽاڻٖي سانگَ، پِرِين پَرَ ڏيهِي ڪِئا.

بيت - 26

تان ڪيِن لَئِجِ ڪانگَ! ڪَڏِہ ايِندا مان ڳَرٖي!
سيڻَنِ ڪارَڻِ سانگَ، مون تان گَهڻيئِي ڪِئا!

بيت - 27

سَرَ نِسرِئا پاندَ؛ اُتَرَ لَڳا، آءُ پِرِين!
موُن تو ڪارَڻِ، ڪاندَ! سَهِسٖين سُکائون ڪِيوُن.

بيت - 28

سَرَ لوھِيڙا ڳَڀِئا، ڪُسَرَ نِسَرِئا،
تو ڪِنءَ وِسَرِئا، ڍولئا! ڏيِهَ اَچَڻَ جا؟

بيت - 29

جيڪَرَ اَچٖي ھاڻِ، تہ ڪَرِيان رُوحَ رُچَندِيوُن،
آيَلِ! ڍولِئٖي ساڻِ، ھُندَ ڳَرِ لَڳِي، ڳالِيُون ڪَريان.

بيت - 30

آيَلِ! ڍولِئٖي ساڻُ، اَچٖي تہ جهٖيڙِيان،
لايَءِ ڏيِهَ گَهڻا، مون سيٖن ڪِيَءِ ٿورِڙا.

بيت - 31

ڍولِئو وِئَڙو ڏوُرِ، تٖي ٿِي سِيَ گُذارِيان،
مادَرِ! موُن مَ چورِ، ناتَ پَڌَرِ پُندِي پِرِيَ رٖي.

بيت - 32

لاھِندائِي ڪَنِ، ڳالِيُون ھَلَڻَ سَندِيُون،
ڏِيندا مُون ڏُکَنِ، وَہِ وِجَهندا ڄِندَڙو!

بيت - 33

مُون کي جِيارِئو پِرِيَنِ جِي ڳالِ ڪري،
ڊَٺو اَڄُ اَڏِئو، ھِيَڙو ڪوٽَ بُرجَ جِنءَ.

بيت - 34

وانءُ وَڃِي وائُٺِ، ھِيَڙا! ماڳُ پِرِيَنِ جو،
چُمِئو، چُمُ چائُٺِ، ھوءِ جا سَندِي سَڄَڻٖين.

بيت - 35

آئُون جَنِ آسارٖي، مٿي تَڙَ گُذارِيان،
موُن کي وِسارٖي، شالَ مَ وڃَنِ اوھَرِي!

بيت - 36

سَن‏هٖي لَڪِ، نَڪِ سَئٖين، ڪَجَلَ ڀِنَنِ نيڻَ،
ساموُنڊِي! مون سيڻَ، ڪِ تو ڪالَ لَنگهائِيا؟

بيت - 37

ھٖي سَڄَڻَ سيئِي، جي مُون ڪوڏِ نِهارِئا،
اِيندَمِ جان پيهِي، تہ سَڀِ لاھِيندَمِ ڏُکَڙا.

بيت - 38

چَمَڪيِوُن چَوڌارَ، ڌَڄُون ڌاڙٖيچَنِ جِيوُن،
ماءِ! سامُنڊِي آئِيا، سَهسٖين ڪَرٖي سِنگارَ،
اُٺِين جِي پَچارَ، ڪالو ڪَرَ ڪانگُ ڪَرٖي.

وائي - 1

پريَنِ جي پَنڌاءُ، مونکي جي جَهلِندِيُون،
سٖي نَہ پُڄَندِيوُن.
ڀَلِي ڪري آئِيو، ٺاٺارو ڏيهاءُ،
سٖي نَہ پُڄَندِيُون.
ڀَڳِي ڪُٽِ سَڄِي ٿِي، لَٿِي جاڪِ ڳَراءُ،
سٖي نَہ پُڄَندِيوُن.
سَرَتِنِ سُورَ پِرائيا، ھاڻٖي ھِنَ ھَنڌاءُ،
سٖي نَہ پُڄَندِيون.
تان ڪينِ واسُ وِھائِيو، ٻاروچٖي مُلاءُ،
سٖي نہ پُڄَندِيُون.
تان ڪِين ڏُنگَرُ ڏُورِيان، جان ڪُڙِہ اَندَرِ ساہُ،
سٖي نَہ پُڄَندِيُون.
مَتِيون موٽَڻَ سَندِيوُن، تون ھَڏِ اَڇ مَ، ماءُ!
سٖي نَہ پُڄَندِيُون.

وائي - 2

تَڙَ نِهارِيان تٖي، مُهِجا بَندَرِ وِئَڙا جٖي،
مانَ سِڙَہ سُڃاڻان سَڄَڻٖين.
اُڀِي اوسَهِ پائِيان، ڪارَڻِ وَڻِجارٖي،
مانَ سِڙَہ سُڃاڻان سَڄَڻٖين.
گَهڻُو اُڪَنڍِي آھِيان، پِرِيَ پَهِجِي کٖي،
مانَ سِڙَہ سُڃاڻان سَڄَڻٖين.
آسائِتِي آھِيان، اَلا! ڪاندُ اَچٖي،
مانَ سِڙَہ سُڃاڻان سَڄَڻٖين.

وائي - 3

آيَلِ! ڪَرِيان ڪِيَّ؟ مُھِجو نِيهُ اَپَلِئو نہ رَھٖي،
وِئو وَڻِجارو اوھَرِي، مونکي چاڙهٖي چِيَّ،
مُهِجو نِيهُ اَپَلِئو نَہ رَھٖي.
سامُونڊِيَنِ جي سڱَ کي، رُئان راتو ڏِيهَ،
مُهِجو نِيهُ اَپَلِئو نَہ رَھٖي.
اُڏوھِيَ جِنءَ ڏُکَڙا، چَڙِهئا چوٽِيَ سيَّ،
مُهِجو نِيهُ اَپَلِئو نَہ رَھٖي.
گُندَرَ مَٿَاء ڄِندَڙيٖ، وَرِئا وَلِنِ جيَّ،
مُهِجو نِيهُ اَپَلِئو نَہ رَھٖي.
مادَرِ! پائٖي مُنڊِيون، وَڃان ھادِيَ سِيَّ،
مُهِجو نِيهُ اَپَلِئو نَہ رَھٖي.

وائي - 4

آيَلِ! ڪَرِيان ڪِيَّ مُهِجو نِيهُ اَپَلِئو نہ رَھٖي.
وِئو وَڻِجارو اوھَرِي، مونکي چاڙھٖي چِيَّ مُهجو نِيهُ اَپَلِئو نَہ رَھٖي.
سامُونڊِيَنِ جي سڱَ کي، رُئان راتو ڏِيهَ،
مُهِجو نِيهُ اَپَلِئو نَہ رَھٖي.
اُڏوھِيَ جِنءَ ڏُکَڙا، چَڙِھئا چوٽِيَ سِيَّ،
مُهِجو نِيهُ اَپَلِئو نَہ رَھٖي.
گُندَرَ مَٿاء ڄِندَڙي، وَرِئا وَلِنِ جِيَّ،
مُهِجو نِيهُ اَپَلِئو نہ رَھٖي.
مادَرِ! پائٖي مُنڊِيون، وَڃان ھادِيَ سِيَّ،
مُهِجو نِيهُ اَپَلِئو نَہ رَھٖي.

داستان ٻيون

بيت - 1

اَڄُ پُڻ وايُون ڪَنِ، وَڻِجارا وَڃَڻَ جِيوُن،
اَٺَئِي پَهَرَ اَٿَنِ، سَعيو ڪِه سَفَرَ جو.

بيت - 2

اَڄُ پُڻ وايوُن ڪَنِ، وَڻِجارا وَڃَڻَ جِيوُن،
موُن اُڀيئِي ھَلِئا، بَندَرَجَنِ تَڙَنِ،
سَرَتِيوُن! سُورُ سَندُنِ، مُون مارِيندو ڄِندَڙٖي.

بيت - 3

اَڄُ پُڻِ وايوُن ڪَنِ، وڻجارا وَڃَڻَ جِيُون،
ھَلَڻَ ھارا سُپِرِين، رُئان تان نَہ رَھَن،
آئُون جهَلِيندِي ڪٖيتَرو؟ آيَلِ سامُونڊِيَنِ،
پَڳَهَ ڇوڙٖي جَنِ، وِڌا ٻيڙا ٻارِ ۾.

بيت - 4

لاھِيان جي نہ چِتاء، اَلا! اُنِ مَ وِسَران!
مَڙِھئو مَنجهاراءِ، جِيُ مُهِجو جَنِ سٖين.

بيت - 5

چِتاء جي نہ چُرَنِ، اَلا! اُنِ مَ وِسَران!
مون مَنُ آھي تَنِ، مَڙِھئو منجهارا ھِيٖين.

بيت - 6

تَڙٖين تَواريِنِ، ماءِ! ساموُنڊِي آئِيا،
مُون کي جِيارِينِ، وايوُن وَڻجارَنِ جِيوُن.

بيت - 7

اولا کَڻِي اُوءِ، پَڳَهَ ڇوڙٖي پَنڌِ ٿِئا،
آيَلِ! سامونڊِيَنِ جِي، آہِ اَڙانگِي جُوءِ،
ڪَڏِہ ڏِسَندِيَسِ رُوءِ، وَرِي ھِنِ اَکِنِ سٖين؟

بيت - 8

لَڳِي اُتَرَ ھِيرَ، سامُنڊِيَنِ سِڙہَ سَنباھِيا،
نَنگَرَ کَڻِي ناکُئا، ٿِئا سَڻاوا سِيرَ،
ھِيَڙٖي نِتُ اُڪيِرَ، کارٖي کٖيڙائُنِ جِي.

بيت - 9

لڳٖي اُتَرَ اُھَرِئا، واھُندٖي وَرَنِ،
آئُون گَهڻوئِي گهورِيان سودو ساموُنڊِنِ،
اَڱَڻِ جَنِ اَچَنِ، عِيدَ وَرَتٖي اُنِ کي.

بيت - 10

اَڱَڻِ آئِيا جان، سَرِتِيون! مون کي سُکَ ٿِئا،
اَمُلَ پِرِيَ مَٿاء، ٻَرَڪِئو ٻِئَنِ ڏِيان.

بيت - 11

آئِي اُتَرَ مُندَ، ھِيٖين، اُڊَڪو نَہ لَهٖي،
وَٽِينِ لاڄُو بندَ، ٻِيهَرَ مَکِينِ ٻٖيڙِيُون.

بيت - 12

لاڄُوٿا لَوَنِ، اَچَنِ سِڙَہ اُپَٽِئا،
ڪارَڻِ تَنِ پرِيَنِ، ويٺِي واٽَ نِهارِيان.

بيت - 13

سِڙَہ سُڃاڻئو چوءِ، ماءِ! سامُنڊِي آئِيا،
مانَ مُهِجو ھوءِ، جانِي ھِنَ جَهازَ ۾!

بيت - 14

سِڙَہ ٿٖي سِبِيائُون، بَندَرَجَنِ تَڙَنِ تي،
سِڙَہ سِبِي ساڄا ڪَرٖي، کوُھا کَنيائُون،
بيرَقوُن بَحرَنِ ۾، ڇوڙٖي ڇَڏِيائوُن،
لَهرِيُون لَنگِهيائُون، لُطفَ ساڻُ، لطيفُ چٖي.

بيت - 15

سِڙَہ ٿٖي سِبِيائُون، بَندَرَجَنِ تَڙَنِ تي،
ملا مُعلِم خَبَروُن، پُڇِي پُورِيائُون،
سُتَڙُ سوٺِيائُون، اَوَتَڙِ ڪِه نہ اولِئا.

بيت - 16

بَندَر ديسان دٖيسِ، مُلُ نہ مِلٖي وارِيٖين،
فَقِيراڻٖي وٖيسِ، اَمُلَ ڏِينِ اَتورِئا.

بيت - 17

پَتَڻِ پوءِ پَچارَ، آن ڪٖي سِڙَہ وِيندا گَڏِئا؟
اُڪُنڍَ موُن اَپارَ، شالَ مُهِجا موٽِئا!

بيت - 18

اُڀِيوُن تَڙَ پُوڄِينِ وَھُون وَڻِجارَنِ جِيوُن،
آڻِئو اَکا ڏِينِ، کَٿُورِي، سَموُنڊَ کي.

بيت - 19

جَنِين ڪارڻِ موُن، تَڙَ پُوڄارا پُوڄِئَا،
پُنِيَمِ اُميٖدُون، سيئِي سَڄَڻَ آئِيا.

بيت - 20

وائُنٽِيُون ٿِيوُن وَرَڪَنِ، اَڃا سِڙَہ نہ پَڌَرا،
سيئِي ٿِيوُن مَرَڪَنِ، جَنِين سَندا آئِيا.

بيت - 21

کُوھَنِ سِرِ وائُنٽِيوُن، وائُنٽِيُنِ سِرِ ڳَنڊَ،
کٖيڙٖي کٖيڙٖي کَنڊَ، ماءِ! سامُنڊِي آئِيا.

بيت - 22

جَرِ ٿَرِ ڏِيا ڏٖي، وَڻِ ٽِڻِ ٻَڌي وائُنٽِيُون،
اَلاَ! ڪاندُ اَچٖي، آسائِتِي آھِيان!

بيت - 23

جا جَرِ جاٽُون نہ ڏِئي، ڏِيا نہ موھٖي،
سَڌُون ڪوہُ ڪَري، سا پَهِجٖي ڪاندَ جِيوُن؟

وائي - 1

اَئِين موُنکي زورِ مَ جَهلِئو، جيڏِيوُن!
ووءِ! آئوُن ھلَندِي ھوتَ ڏي.
اُونهٖي وِئَڙا اوھَرِي، تَرازوُن تارٖي،
ووءِ! آئُون ھَلندِي ھوتَ ڏي.
مَرِي رَھندِيَسِ ماڳِهِمۡ، سامونڊِي سارٖي،
ووءِ! آئُون ھَلندِي ھوتَ ڏي.
سُورُ تُهِجو سُپِرِين! موُن مَعذُورِ کي مارٖي،
ووءِ! آئُون ھَلندِي ھوتَ ڏي.
ھاڻِ نہ جِيان، جيڏِيُون! آئُون ڪُٺِيَسِ ڪوھِيارٖي،
ووءِ! آئُون ھَلندِي ھوتَ ڏي.

وائي - 2

ڪَرَھَلَ پائٖي لَڄُ، ڪُهُ نہ ويئِيَن اُنِ سيٖن؟
اُجارِيائوُن اولِيوُن، ڌُئارِيائُون ڌَڄُ،
ڪُهُ نہ ويئِيَن اُنِ سٖين؟
مَتان وِھٖين، ويسَرِي! اُٿِي، ڀُورُلَ! ڀَڄُ،
ڪُهُ نہ ويئِيَن اُنِ سٖين؟
سيڻَنِ ساجهُرُ لَڏِئو، توُن آئي! نِهارٖين اَڄُ،
ڪُهُ نہ ويئِيَن اُنِ سٖين؟
ڪالَ سِبايُءِ ڪَنجِرو، اَنگوُن، پاتِيُءِ اَڄُ،
ڪُهُ نہ ويئِيَن اُنِ سٖين؟
ڪيرُ سُڻِيندو تُهِجِيُون، اَدوُرائوُن اَڄُ،
ڪُهُ نہ ويئِيَن اُنِ سٖين؟

وائي - 3

وِيندِي آئُون ھوتَنِ وَٽِ، موُن وَہُ وَڻِجارِن سٖين.
پَڳَهُ کَڻُ مَ پاتِڻِي! جانِي! مون لَءِ جَٽِ،
موُن وَہُ وَڻِجارن سٖين.
وايوُن وَڻجارَنِ جِيوُن، اَدِيوُن! اَڄُ نہ ھَٽِ،
مُون وَہُ وَڻِجارَن سٖين.
ڳَرَھِيان سوُرُ سَفَرَ جو، ھَلِي پَهِجٖي اَرَٽِ،
موُن وَہُ وَڻِجارَن سٖين.
پُورِيندِيَسِ پَريَنِ ڏي، ڪانَ ڪَرِيندِيَسِ گَهٽِ،
موُن وَہُ وَڻِجارَن سٖين.
ڏيئِي سِڙہُ سِيرَ ٿِئا، پيرُ نہ لايَئوُن پَٽِ،
موُن وَہُ وَڻِجارَن سٖين.

داستان ٽيون

بيت - 1

پُران، مانَ پُڄان؛ بَندَرَ موُن ڏوُرِ ٿِئا،
نہ موُن ھَڙَ نہ ھَنجَ ڪِين، جو آئُون چَئِي چَڙھان،
اِيَهِمُ ڪِجِ، پاتِڻِي! جِه پَرِ پِرِيَ مِڙان،
ڪارُون تٖي ڪَرِيان، تو دَرِ اُڀي، ناکُئا!

بيت - 2

ھَڙَ ۾ ڪِينَ ھُئونِ، ھُنهِمۡ ھُنِ نہ چاڙِھئا،
سارو ڏِيهُ سَمُونڊَ تي، لَهِي سِڄُ وِئونِ،
جَڏِہ سائِينءَ سَبَبُ ڪِئونِ، تَڏِہ سُتَڙِ ٿِئا، سَيّدُ چٖي.

بيت - 3

اَسان اُڌارا، آٖڻي آوَنگَ چاڙِھئا،
مُهُ ڏيئِي، موُن آئِيا، سَمُها سِيارا،
اُڀِرَنِ سِيڪارا، پَسِئو وَرَ ٻِئَنِ جا.

بيت - 4

مُون اُڀٖي تَڙَ وَٽِ، پِريَنِ پَڳَهَ ڇوڙِئا،
ڪا مُنهِين ۾ گَهٽِ، ناتَ سَڄَڻَ سَٻاجها گَهڻُو.

بيت - 5

مُون اُڀٖي تَڙَ ھٖيٺِ، پِريَنِ پَڳَهَ ڇوڙِئا،
ڪا مُنهِين ۾ ڏٖيٺِ، ناتَ سَڄَڻَ سَٻاجها گَهڻُون.

بيت - 6

مُون اُڀٖي تَڙَ جَهلَ، پِريَنِ پَڳَهَ ڇوڙِئا،
ڪا مُنهِين ۾ اَلَ، ناتَ سَڄَڻَ سَٻاجها گَهڻوُن.

بيت - 7

موُن اُڀٖي تَڙَ پاسِ، پِريَنِ پَڳَهَ ڇوڙِئا،
ھو اَللھَ ھارَ اُھَرِئا، آئُون دَمِدَمِ دُعا ڪَندِياس،
آہَ نہ لاھِندِياسِ، موٽِي اِيندا مان ڳَرٖي.

بيت - 8

کيڙائُنِ کارو، سَنجهيئِي سارِئو،
آيَلِ! اُمارو، آھِنَ پَرِيٖين پارَ جو.

بيت - 9

کارٖي کيڙائُو، مَٿٖي مِٺٖي موٽِئا،
سودو ڪَنِ نَہ سونَ جو، وَڏا وِھائُو،
موتِي جي مِهرانَ جا، تَنِ جا طاماعُو،
سامُنڊِي سائُو، لَنڪا لوپٖي آئِيا.

بيت - 10

لَنڪا لَنڪا ڪَنِ، لَءِ لَنڪا جي اوھَرِئا،
سُڻِي سونُ لَنڪا جو، سُکُ نہ سامُنڊِيَنِ،
پِرِہَ پَڳَهَ ڇوڙِئا، کارٖي کيڙائُنِ،
وَڏي ڀاڳِ ڀِڙَنِ، جٖي ڪَهِيا ڪارُنڀارَ ڏي.

بيت - 11

وَڻِجارَنِ ورِي، پِرِہَ پَڳَهَ ڇوڙِئا،
اولِيُون پَسِي اُنِ جِيوُن، پِئَڙَمِ ڳَچَ ڳَرِي،
وِندِيَسِ، ماءِ! مَرِي، سارٖي سامُنڊِيَنِ کي.

بيت - 12

وَڻِجارَنِ وارٖي، پِرِہَ پَڳَهَ ڇوڙِئا،
کيڙائُو کارٖي، سَنڀُوڙا، سَيّدُ چٖي.

بيت - 13

وَڻِجارٖي جِي ماءِ! وَڻِجارو نہ پَلِيٖين؟
آيو ٻارھٖين ماہِ، پُڻِ ٿو سَفَرِ سَنبَهٖي!

بيت - 14

وَڻِجارٖي ڪانداءُ، موُن وَرُ ويٺٖي گهارِئو!
لَڳٖي اُتَرَ واءُ، ڍولِئو ھَلَڻَ جِيوُن ڪري.

بيت - 15

جٖي توُن وَڻِجارو ڪاندُ، تہ مُون ھَڏِ مَ
لائوُن لَڌِيُون!
پَرَ ڏيهَ مَٿي سانگُ، اَٺَئِي پَهَر جِه ڪِئو.

بيت - 16

پَرَ ڏيهِ پُوريائُون، سامُنڊِيَنِ سِڙَہ سَنباھِيا،
مان تَنُ مارِيائُون، پاڻا وِجهِي گُنَدرٖين!

بيت - 17

ڏِٺِي ڏِيارِي، سامُنڊيَنِ سِڙَہ سَنباھِيا،
وِجِهئو وَرُ وَنجَهہ کي، رُوئٖي وَڻجارِي،
مارِندَءِ، مارِي! پِرہَ سُورَ پِريَنِ جا.

بيت - 18

ڏِٺِي ڏيارِي، سامُنڊِيَنِ سِڙَہ سَنباھِيا،
اُنِ کي مُندَ اُتَرَ جِي، اوچِتِي آئِي،
وَڻِجارَنِ وائِي، آھي پَرِيٖين پارَ جِي.

وائي - 1

اَئِين اَچِي پَسو، جيِڏيُون!
ووءِ! ھِي جو وَہُ مُهجٖي ڄِندَڙٖي.
پائٖي وِئَڙا پيرَ ۾، مَنجها کِرَسَ کَسو،
ووءِ! ھِي جو وَہُ مُهجٖي ڄِندَڙٖي.
ڏيئِي وِئَڙا ڏاہِ کي، سُورَنِ جو سَرَسو،
ووءِ! ھِي جو وَہُ مُهجٖي ڄِندَڙٖي.
آئُون ڏورِيندِي اُنِ کي، ڏيئِي تَنَ تَسو،
ووءِ! ھِي جو وَہُ مُهجٖي ڄِندَڙٖي.
ساءُ نہ آيان سُورَ جو، ھاڻي ٿِيوُن ھَسو،
ووءِ! ھِي جو وَہُ مُهجٖي ڄِندَڙٖي.
مَتان وِھو، ويسَرِيُون! رِڙِھو تٖي رَسو،
ووءِ! ھِي جو وَہُ مُهجٖي ڄِندَڙٖي.
مُدائِتٖي مِيهَ جِنءَ، ويرو تارِ وَسو،
ووءِ! ھِي جو وَہُ مُهجٖي ڄِندَڙٖي.

وائي - 2

ڏُکَ لاھِندَمِ ڏُنگَرَ، ووءِ!
ماءِ! پِريَنِ جا مُنکٖي سَڀيئٖي.
جو پَسان سو ڀائِيان، پِرِيان جو پَهِي،
ماءِ! پِريَنِ جا مُنکٖي سَڀيئِي.
ڏاڍِي ذاتِ جَتَنِ جِي، ويئِي ڏِيلُ ڏَھِي،
ماءِ! پِريَنِ جا مُنکِي سَڀيئِي.
آئُون ڏورِيندِي اُنِ کي، رائٖي راتِ رَھِي،
ماءِ! پِريَنِ جا مُنکٖي سَڀيئِي.
ڏِٺا وَڻَ ڪوھِيارَ جا، ويئِي اُڃَ لَهِي،
ماءِ! پِريَنِ جا مُنکِي سڀيئِي.

سر سھڻي

داستان پھريون

بيت - 1

وَہَ تِکَ، واھُڙَ تِکَ، جِت نِيهُ، تِکَ نِرالِي،
جَنِ کي عِشقُ عَمِيقَ جو، سي خِلوَتَ خِيالِي،
وارِيٖين سي، والِي! ھِيَڙو جَنِين ھَٿِ ڪِئو.

بيت - 2

اَنڌِيَ وَڇُون، ڪَنڌِيَ وَڇُون، تَنِگئا لَهٖي نہ تِکَ،
صُورَتَ جا ساھَڙَ جِي، ڏِيلَ پَهِجٖي ڏِکَ،
واھُڙُ تَنِين وِکَ، جَنِ سانڀارا سُپِرِين.

بيت - 3

واھُڙَ وَھَنِ نَوان، اَڃا وَہُ اَڳٖي ٿِئو،
گَهرِ ويِٺيوُن گَهڻا ڪريو، سَرَتِيوُن!
سَڱَ سَوان،
صُورَتَ جا ساھَڙَ جِي، سا جٖي ڏِٺِي آن،
ھُندَ نہ پَلِئو مان، گِهڙو سَڀِ گَهڙا کَڻِي.

بيت - 4

جيڏيُون! ڏِٺِيانجٖي، صُورَتَ ساھَڙَ ڄامَ جِي،
سُکِ ٿِي سُتِيوُن ڪِينَ ڪِينۡ، ڪاندَنِ پاسٖي ڪٖي،
مُنهائِي اڳٖي، گِهڙو سَڀِ گهڙا کِڻي.

بيت - 5

ڏِٺِي جَنِ ھيڪارَ، صُورَتَ ساھَڙَ ڄامَ جِي،
سُکِ ٿِي سُتِيوُن ڪِينَ ڪِينۡ، ڀرِي ساڻُ ڀَتارَ،
گِهڙيُون گَهڙَنِئا ڌارَ، ڪاھٖي پيٖيوُن ڪُنَ ۾.

بيت - 6

ساھَڙُ مُون جِنءَ، سَرَتِيوُن! جٖي ڏسو سَڀيئِي،
تہ سُمَهون ڪِينَ سُکِ ٿِي، پاسو وَرَ ڏٖيئِي،
مُنها اَڳيئِي گهِڙو سَڀِ گَهڙا کڻِي.

بيت - 7

جٖيڪِين ڏِٺو مان، سو جٖي ڏِٺو جٖيڏِيٖين،
گَهَر وَرَنِين سان، ھُندَ گَهڻِنِ گهورٖي ڇَڏِئا.

بيت - 8

گَهڙَنِ وارِيُون تَڙَنِ تي، گِهڙَن گَهڻيئِي،
سَڀَڪا چٖي ”آن سُوھَڻِي، لَءِ پِريان پيئِي“،
صُباحَ سَڀيئِي پَسبِيوُن پاتارَ ۾.

بيت - 9

ڪَنڌِيَ اُڀِيُون ڪيتَرِيُون، ”ساھَڙُ ساھَڙُ“ ڪَنِ،
ڪَنِين سانگو ساہَ جو، ڪٖي ”گهورِيَسِ“ڪِئو گهِڙَنِ،
ساھَڙُ سَندو تنِ، گهاگهائٖي گِهڙَنِ جي.

بيت - 10

وَڻَنِ ويٺا ڪانگَ، وِچِين ٿِي ويٖلا ڪَرٖي،
گِهڙِي گَهڙو ھَٿِ ڪَرٖي، سُڻِي سانجِهيَ ٻانگَ،
سيئِي ڍُونڍٖي سانگَ، جِتٖي ساھَڙُ سُپِرِين.

بيت - 11

گِهڙِي گهَڙو ھَٿِ ڪَري، ٻَهُون نِهارٖي ٻَنگُ،
سر در قدمِ يار فداشد چہ بجاشد، وَصۡلَ اِھوئِي وَنگُ،
راتِ جَنِين جو رَنگُ، اَلا! سٖي اُڪارِيٖين.

بيت - 12

گِهڙِي گَهڙو ھَٿِ ڪري، ٻَهُون نِهارٖي ٻَنگُ،
وَ اَمَّا مَنۡ خَافَ مَقَامَ رَبِهّٖ، اِيُ لَنگهِيائِين لَنگهُہ،
سِڪَندِيَنِ کٖي سَيِّدُ چٖي، ڪِينَ جهَلِندو جَهنگُ،
راتِ جَنِين جو رَنگُ، اَلا سي اُڪارِيٖين.

بيت - 13

گِهڙِي گَهڙو ھَٿِ ڪَرٖي، چيلهِہ ٻَڌِي چوتو،
مُهِجو مَنُ مِهارَ کي، پارِ وَڃِي پَهُتو،
گوتٖي ۾ گوتو، مُنکي مُحِبَّ مِهارَ جو.

بيت - 14

گِهڙِي گَهڙو ھَٿِ ڪري، ٻوڙِيائِين ٻاھُون،
ويچارِيَ وَڏِيوُن ڪِيوُن، وِچِ دَرِيا داھُون،
موٽُ، مُحِبَ! پاھُون، تاڪُنِ تَڪِي آھيان.

بيت - 15

گِهڙِي گَهڙو ھَٿِ ڪري، اِلاھِي تُهارَ!
ڄَنگَهہ ڄَرُڪٖي واتَ ۾، سِسِي کي سِنسارَ،
چُوڙا ٻِيڙا چِڪَ ۾، لُڙَ ۾ لُڙِيَسِ وارَ،
لَکٖين جَهُٽِيَسِ لوھَڻِيوُن، ٿٖيلِيوُن ٿَرَ نِئوُن ڌارَ،
مِڙئا مَچَ ھزارَ، ڀاڱا ٿِندِي سُوھَڻي!

بيت - 16

مِنهِ جِهِين جٖي موُن، ڏِٺو مُهُ مِهارَ جو،
اَھِمَ ساہَ سَئوُن، سو ڪِنءَ گَهڙو گهورِيان؟

بيت - 17

گَهڙو ڀَڳو تہ گهورِئو، مَرُ چُورُ ٿِيٖي چُوڙو،
طَالِبُ الۡمَوۡلٰي مُذَڪَّرٌ، اِيُ ٻُڏَندَنِ ٻُوڙو،
ڪوڙِھئو ڏَمُ ڪُوڙو، مُون مِهارُ مَنَ ۾.

بيت - 18

گَهڙو ڀَڳو تہ گهورِئو، مَرُ ٻِيڙَ ٿِئي ٻاھِمۡ،
طَالِبُ الۡمَوۡلٰي مُذَڪَّرٌ، اِيَ پَرِ اَساھِمۡ،
پُئان مَ پاھِمۡ، موُن مِهارُ مَنَ ۾.

بيت - 19

گَهڙو ڀَڳو تہ گهورِئو، پاڻا ھو حِجابُ،
واڄَٽُ وَڄٖي وُجُودَ ۾، رَھِيو رُوحَ رَبابُ،
ساھَڙَ رِءَ صَوابُ، آئُون گَهڻوئِي گهورِيان.

بيت - 20

گَهڙو ڀَڳو تہ گهورِئو، تان ڪِينۡ تَرُ، ھِيان!
اَدَبُ اَکَڙِيَنِ کي، ڏِيهاڻِي ڏِيان،
مِهارَنِ مِيان، سَئُون سُنهايُمِ پٖيچَرو.

بيت - 21

گَهڙو ڀڳو تہ گهورِئو، آسَرَ مَ لاھٖيجِ،
لَا تُقۡنَطُوۡ! مِنۡ رَّحۡمَﺔِ اللہِ، تُرَھٖي اِنَ تَرٖيجِ
حَبِيباڻٖي ھٖيجِ، پَسٖين مُهُ مِهارَ جو.

بيت - 22

گَهڙو ڀَڳو، مُنڌَ مُئِي، وِئا وَسِيلا،
سارَ ڇَڏِيائِين سِيرَ ۾، ھَيء! رَھِئا حِيلا،
سُهڻِيَ جا سِيلا، وَحۡدَتَ سَڀِ وِڃائِيا.

بيت - 23

گَهڙو ڀَڳو، مُنڌَ مُئِي، وَسِيلا وِئا،
تِهان پوءِ سُئا، سُهڻِيَ سَڏَ مِهارَ جا.

بيت - 24

جَڏِہ وَسِيلَنِ، لوڙھٖي ڇَڏِي لُڙَ ۾،
پارارا پِريَنِ، تَڏِہ پُڇي سُوھَڻِي .

بيت - 25

پاڻُ مَ کَڻجِ پاڻَ سيٖن، وَسِيلا وِڃاءِ،
عِشقَ ساڻُ اُٺاءِ پٖيرُ پِريان جٖي پارَ ڏٖي.

بيت - 26

پاڻُ مَ کَڻجِ پاڻَ سٖين، وَسِيلا وِسارِ،
لُڙُ لَنگهائٖي، سُوھَڻِي! پِرتِ وِجَهندِيَءِ پارِ،
سٖي تُرتُ لَنگِهندِيوُن تارِ، اُڪَنڍَ آڳَهُ جَنِ سٖين.

بيت - 27

پاڻُ مَ کَڻجِ پاڻَ سٖين، رِءَ وَسِيلٖي وانءُ،
مَٿاء سائِرَ، سُوھَڻِي! پِرتِ وَٺِجٖي پانءُ،
نِيهَ ڳِنَندٖي نانءُ، وَنءُ پِريان جٖي پارَ ڏٖي.

بيت - 28

پاڻُ مَ کَڻجِ پاڻَ سيٖن، رِءَ وَسِيلٖي وَڌُ،
لالَنُ تَنِين لَڌُ، عِشقُ جَنِين جٖي اَڳَ ۾.

بيت - 29

پاڻُ مَ کَڻجِ پاڻَ سٖين، رِءَ وَسِيٖلي وَڃُ،
ڀٖيلو ڀٖيرٖي ڀَڃُ، اُڪَنڍَ کَڻُ عَمِيقَ ۾.

بيت - 30

ڪونهِ آڳَهُ اِھَڙو، جِهَڙِي مَحَبَتَ مَنِ،
اُڀِيُون اوريِٖين پارَ ڏٖي، ڪُوڙِيُون ڪَکَ پُڇَنِ،
نَدِي تَنِ نٖيڙُ ٿِيٖي، جٖي رِءَ تُرَھٖي تَرَنِ،
سِڪَ رَساڻٖي، سُوھَڻِي! اَصۡلِ عاشِقَنِ،
سٖي جَهلِيوُن ڪِينَ ڪُنَنِ، پُڇَنِ جٖي مِهارَ کي.

بيت - 31

پُڇَنِ جٖي مِهارَ کي، پُڇٖي سي مِهارُ،
تُرَھو تَنِين بارُ، عِشقُ جَنِين کي آڪَرو.

بيت - 32

عِشقُ جَنِين کي آڪَرو، تُرَھو مَٿٖي تَنِ،
جٖي ساھَڙَ کي سِڪَنِ، تَنِين جَرُ جَنڊُ ٿِيٖي،

بيت - 33

تُرَھَو اَڇِ مَ تَنِ کي، جَنِ عِشقَ سيٖن آگاہَ،
پُڇٖي مَسَ ملاحَ، ساھَڙَ مَڻِي سُوھَڻِي

بيت - 34

ساھَڙُ، سا سُوھَڻِي، سائِرُ پُڻِ سوئِي،
آھٖي، نِجوئِي، ڳُجهُہ ڳُجهاندَرَ ڳالَڙِي.

وائي - 1

ڪِهَڙٖي مَنجِهہ حِسابَ؟ ھُئَڻُ مُهِجو ھوتَ رٖي، لا!
گولِي! ڀَڄُ گناھَ کان، ڪونِهۡ سُولُ ثَوابَ،
ھُئَڻُ مُهِجو ھوتَ رٖي، لا!
نَڪِين تَقاوَتَ ۾، نَڪِين مَنجِهہ رَبابَ،
ھُئَڻُ مُهِجو ھوتَ رٖي، لا!
خُدِيائِي خُوبُ ٿِيٖين، لايٖين جٖي لُعابَ،
ھُئَڻُ مُهٖجو ھوتَ ري، لا!
پَلِيتُ ئِي پاڪُ ٿِيٖي، جُنبِئو مَنجِهہ جِنابَ،
ھُئَڻُ مُهِجو ھوتَ رٖي، لا!
سو نَہ ڪَهِمۡ شَيۡءِ ۾، جٖيڪِين مَنجِهہ تُرابَ،
ھُئَڻُ مُهِجو ھوتَ رٖي، لا!
ھوءِ جٖي جَرَڪِڻا جَرَ تٖي، سٖي تان سَڀِ حُبابَ،
ھُئَڻُ مُهِجو ھوتَ رٖي، لا!
ھادِيَ سٖين ھُنَ پارَ ڏٖي، رِڙهٖين ساڻُ رِڪابَ!،
ھُئَڻُ مُهِجو ھوتَ رٖي، لا!
چَنبو وِجهيِ چورَ کٖي، آءٌ ڇَڙَ عُقابَ،
ھُئَڻُ مُهِجو ھوتَ رٖي، لا!
ديدُ وِڃاءِ مَ دوستَ جو، ھَلِي مَنجِهہ حِجابَ،
ھُئَڻُ مُهِجو ھوتَ رٖي، لا!
ڪَسۡرَتَ آھٖي قُربَ ۾، اِدۡغامَ اِعۡرَابَ،
ھُئَڻُ مُهجو ھوتَ رٖي، لا!
فَنا وِجِهي فَمَ ۾، ڪارَڻِ ٿِيُ ڪَبابَ،
ھُئَڻُ مُهِجو ھوتَ رٖي، لا!
ڏَٖي طَهوُرا تَنِ کي، جٖي سِڪَنِ لاءِ شَرابَ،
ھُئَڻُ مُهِجو ھوتَ رٖي، لا!
مُٺِيَ ڪِئا مَرضَ ۾، جاوا سَڀِ جَوابَ،
ھُئَڻُ مُهِجو ھوتَ رٖي، لا!

داستان ٻيون

بيت - 1

ڪَرَ ڳلَ ڪوچَ ڪُنَ گَهڻا، جِتِ جَرَ واڳُو جِئائِين،
پاڻُ اُڇَلٖي آبَ ۾، وَہَ سِر وِڌائيِن،
لَهِريوُن لَنگِهيائِين، لُطفَ ساڻُ لَطِيفُ چٖي.

بيت - 2

ڪَرَ ڳَلَ ڪوچَ ڪُنَ گَهڻا، جِتِ دَڙڪو
مَنجهِہ دَرياہَ،
اَچِئو اُتاھِمۡ گِهڙٖي، سانگو ڪَرٖي نَہ ساہَ،
ساھَڙَ جِيَ صَلاحَ، ٻارِ لَنگهايَسِ ٻاجَهہ سٖين.

بيت - 3

دَھشَتَ دَمُّ دَرياہَ ۾، جِتِ ھَيبَتَ ھُلاچو،
وِرڄِي وِيرِن وِچَ ۾، ڪاڏٖي وِئو ڪَچو؟
ساھَڙُ ڄامُ سَچو، ساڻِي ٿِندُ مِ سيِرَ ۾.

بيت - 4

دَھشَتَ دَمُّ دَرياہَ ۾، جِتِ سَٽاڻا سِنسارَ،
بيحَدِ باڳُو بَحرَ ۾، ھَيبَتَنَاڪَ ھَزارَ،
سارِيان ڪانَ سَرِيرَ ۾، طاقتَ توھان ڌارَ،
ساھَڙَ ڄامَ! سَتارَ! سِگهو رَسِجِ سِيرَ ۾،

بيت - 5

دَھشَتَ دَمُّ دَريَاہَ ۾، جِتِ ڪَڙَڪا ڪُنَ ڪَرِينِ،
ٻِڇَلِ ٻانڊِيَ ٻارِ ۾، اُتِ لَهرِيوُن لوڏا ڏِينِ،
سَناوَرَ سامِيا، اُتِ سِيڻايا نَہ سَنڊِينِ
جِتِ وِيرِيُون واٽَ نہ ڏِينِ، اُتِ، ساھَڙَ! سِيرَ
لَنگهائِيٖين.

بيت - 6

دَھشَتَ دَمُّ، دَرياہَ ۾، جِتِ ڪَڙَڪو ڪُنُ ڪَرٖي،
توڏِي تاڪُنِ وچَ ۾، مَٿاء وِيرَ وَرٖي،
اءُ، ساھَڙَ! مُهِجا سُپِرِين! پِرِتا پيرَ ڀَرٖي
ھادِي! ھَٿُ ڌَرٖي، اُونهٖي مان اُڪارِيٖين.

بيت - 7

دَھشَتَ دَمُّ! دَرياہَ ۾، جِتِ ڪُنَنِ جا ڪَڙَڪا،
سَهٖي ڪِينَ سَمُونڊَ جا، ماندِي دِلِ دَڙَڪا،
ساھَڙَ! توُن سُڻُ ڪا، فَرِيادِي فَقِيرِ جِي.

بيت - 8

دَھشَتَ دَمُّ! دَرياہَ ۾، جِتِ ڪُنَنِ جو ڪَڙَڪو،
آھِۡم اُنَهِمۡ پارَ جو، دِلِ اَندَرِ دَڙَڪو ،
ڀَڃٖي سِڪَ سَيِّدُ چٖي، سِيرَ سَندو سَڙَڪو،
والِي! ڪِجِ وَڙُڪو، تہ ٻارِ لَنگهِيان ٻاجَهہ سين.

بيت - 9

دَھشَتَ دَمُّ دَرياہَ ۾، جِتِ لُڙَ لَهرِيوُن، لَسَ، ليٽَ،
آِڻئو اوڀارَنِ م، ٻانڊيِ ٻوڙٖي ٻيٽَ،
جِتِ چِڪَڻِ جِي چَپٖيٽَ، اُتِ ساھَڙَ! سِيرَ لَنگهاءِ تون.

بيت - 10

دَھشَتَ دَمُّ، دَرياہَ ۾، جِتِ تِکِيوُن تَوارُون،
مُهِجِيوُن مانَ مِهارَ کي، پَهُچَنِ پُڪارُون،
لَهُ ساھَڙَ! سَنڀارُون، تَہ لَهرِنِ لوڏِي نَہ مَران.

بيت - 11

دَھشَتَ دَمُّ! دَرياہَ ۾، جِتِ جايُون جانارَنِ،
نَڪو سَنڌو سِيرَ جو، مَپُ نَہ مَلاحَنِ،
دَرِندا دَرياہَ ۾، واڪا ڪِئو وَرَنِ ،
سَڄا ٻٖيڙا ٻارِ ۾، ھَلِئا ھيٺِ وَڃَنِ،
پُرزو پَئدا نَہ ٿِيٖي، تَختو مَنجها تَنِ،
ڪو جو قَهرُ ڪُنَنِ ۾، وِئا ڪِينَ وَرَنِ،
اُتٖي اَڻَتارُنِ، ساھَڙَ! سِيرَ لَنگهاءِ تُون.

بيت - 12

دَرَھَڙَ ڌَنۡسَ دَرياہَ ۾، جتِ لَهرِيوُن ڪَنِ لوڙا,
سَئٖين اَچِي سَموُنڊَ ۾، ٿِئا سِيڻايا سوڙا،
جٖي تارُو ھُئا توڙا، تَنِ ھَرٻو ڀايو ھيٖڪَڙو.

وائي - 1

سَچا ساھَڙَ! مُنکٖي توُن، اي! وَھِيان
واھَرَ! مُنکٖي تُون،
اي! نٖيئِي اولِ پِريان جٖي پارَ ڏٖي.
ڪُنَ جٖي ڪارُنڀارَ جا، وو! سٖي آئُون
ڀائِيان ڀُون،
اي! نٖيئِي اولِ پِريان جٖي پارَ ڏٖي.
سَندو جِيَڻَ آسَرو، وو! مَناءِ لاٿو مُون،
اي! نٖيئِي اولِ پِريان جٖي پارَ ڏٖي.

داستان ٽيون

بيت - 1

تَڙِ تَڪَڙِ تارِ گهِڙَڻُ، اِيُ ڪاڻِيارِنِ ڪَمُ،
ڏہَ ڏَہَ ڀيرا ڏِيهَ ۾، ڏٖي ڏوراپا ڏَمُ،
عَقُلُ، مَتِ، شَرَمُ، ٽيئِي نِيهَ نِهوڙِئا.

بيت - 2

گهٖيڙا ڪَري نَہ گهُورَ، تَڙُ تَڪَڙِ کان نَہ لَهٖي،
جِه کي سِڪَ ساھَڙَ جِي، پُورَنِ مَٿٖي پُورَ،
ڪارِيَ راتِ ڪُنَنِ ۾، وَھمَنِ ڪِي وَھلُورَ،
جِه کٖي ساڻُ پِريان جا سُورَ، تِه کي نَدِي ناہِ نِگاہَ ۾.

بيت - 3

جئان گِهڙٖي تِئان گهٖيڙُ، ڪَپَرو پُڇَنِ ڪوڙِيوُن،
ڏَمَ سٖين جُسو ظاھِراً، مَنَ مِهارَ سٖين مٖيڙُ،
سا نَديِ ڀائٖي نٖيڙُ، جِه کي سِڪَ ساھَڙَ جِي.

بيت - 4

جِئان وَھٖي تِئان واٽَ، ڪَپَرو پُڇَنِ ڪُوڙِيوُن،
جَنِ کٖي سِڪَ ساھَڙَ جِي، سي گهيڙَ نَہ پُڇَنِ گهاٽَ،
جَنِ کٖي عِشقَ جِي اُساٽَ، سي واھُڙُ
ڀائِنِ وِکَڙِي.

بيت - 5

ڪِه جِه گهڙَي گِهڙِي، جِنۡ اَوَتَڙا تَڙُ ٿِئوسِ،
سالِمَ ويئِي سُوھَڻِي، ڪُنَنِ ڪِينۡ نَہ ڪِئوس،
اَھِسُ اَکَڙِيَنِ ۾، پِريان جو پِئوس،
حَقّا حَقُّ ٿِئوسِ، ھُئِي طالِبِ حَقَّ جِي.

بيت - 6

ھُئِي طالِبِ حَقَّ جِي، توڏِي لاڪُون توڙَ،
نَہ مَلاحُ نَہ مَڪُڙِي، نَڪِينۡ ٻَڌٖي نوڙَ،
پاڻِي پِنِيَ ٻوڙَ، سُهڻِيَ ليکٖي سِيرَ ۾.

بيت - 7

توڏِي توڙائِين، نِيهَ نَوازِي سوُھَڻِي،
ڳِچِيَ ھارُ حَبِيبَ جو، لائِقُ لَڌائِين،
سو تَڙُ سوٺائِين، جيڏاہَ عالَمَ آسَرو.

بيت - 8

توڏِي! تُهائِينِ جٖي، سٖي ھِتَهِين ڇَڏِ حِرَصَ،
ساھَڙَ ڌارا، سُوھَڻِي! کوٽِيوُن ڪَنِ کِرَسَ،
وَڏِي اِيَ وِرَسَ، جِنۡ ڏَمَ وَٽِ ڏيِهَ گُذارِيٖين.

بيت - 9

توڏِيَ کي تَعظِيمَ، ٻِئَنِ سَڀَنِئا اَڳَرِي،
اوڏِي ٿِي اَلفَ کي، مَنُ گَڏِيائِين سٖين مِيمَ،
جيلاہَ ذاتِ حَلِيمَ، مِلِي تٖي مِهارَ کي.

بيت - 10

سارٖي سِکُ سَبَقُ، شَرِيعَتَ سَندو، سُوھَڻِي!
طَرِيقَتا تِکو وَھٖي، حَقِيقَتَ جو حَقُ،
مَعِرفَتَ مَرَڪُ، اَصۡلِ عاشِقَنِ کي.

بيت - 11

صَبرُ شاڪِرَنِ، آھي اوطاقُنِ ۾،
جٖي وَصۡلُ ٿِئا وِصالَ ۾، سٖي ذَرو نَہ
ظاھِرُ ڪَنِ،
وِيَيتَ واھَرَ تَرَنِ، ھِيَڙا جَنِّ ھَڄِي وِئا.

بيت - 12

پَلِ پَلِ ٿٖي پَلِي، ڏَمَ ڏِيهاڻِي ڪيتَرو،
پَسِي دَورُ دَرِياہَ جو، وِچا ڪِينَ وَلِي،
ڪارِيَ راتِ قَرِيبَ ڏٖي، مَنجها حُبَّ ھَلِي،
نَہ ڪِه جهولَ جَهلِي، ھُئِي سَمُنَ
پُورِي سُوھَڻِي.

بيت - 13

جهولَ نہ جَهلِي سُوھَڻِي، سائِرَ سَٽَ سَندِياسِ،
جِه اِھَڙِي ڄائِي عاجِزا، سا مَرُ مَرَڪٖي ماسِ،
پَسٖين جٖي پِئاسِ، تَہ ڪِينۡ عِشقُ آڻيٖين.

بيت - 14

نَڪا جهولَ جهَلٖيس، نَہ تانگو نَہ تارِ ڪِينۡ،
ڏَمُ ڏِيهاڻِي ڪيتَرو، پَرِ ۾ ٿو پَلٖيسِ
تان تان جِيُّ جَلٖيسِ، مِلٖي جان نَہ مِهارَ کي.

بيت - 15

سِهَ سِيارو، پاڻِي پارو، جِتَ جُهڙُ،
جَهڪَ ۽ جهولَ،
مَنَ اَنَدرِ مِهارَ جا، ھِيَڙٖي اَچَنِ ھولَ،
جيلاہَ ٻَڌِيَسِ ٻولَ، تٖي اَڙانگا آرَ تَران.

بيت - 16

سِيارٖي سِهَ راتِ ۾، جا گِهڙٖي وَسَندٖي مِيهَ،
ھَلو تہ پُڇوُن سُوھَڻِي، جا ڪَرَ ڄاڻٖي نِيهَ،
جِه کي راتو ڏِيهَ، مِهارُ ئِي مَنَ ۾.

بيت - 17

ساوَڻِ گِهڙٖي سڀڪا، ھِيَ سَرَھِي سِيارٖي،
تَنُ وِڌائِين تارِ ۾، اَرواحَ جٖي آرٖي،
مَحَبَّتِي مارٖي، ڪونهِ دادُ دَرياہَ ۾.

بيت - 18

ٻانڊِي! جٖي ٻٖيلِي ٿِيٖين، تَہ حالُ ڳَرَھِيان ھِيُّ ،
سَگهو ساعَتَ نہ ڄِندَڙو، جَرَ رٖي مُهجو جِيُّ،
ساوَڻُ سِيارو ڀائِيان، وَہِ پِريان جٖي وِيُّ،
پارِ جَنِين جو پِيُّ، وَڃَڻُ واجِبُ تَنِ تٖي.

بيت - 19

واھُڙ! ڀَرِيُون مَ پاءِ، تو پُڻِ ليکو ڏِيَڻُون،
سَدا ساوَڻَ ڏِيَهڙا، ھِيَهِمۡ نَہ ھُنداءِ،
وِھاڻِيَ وِينداءِ، اوڀَرَ اُتاھان لَهِي.

بيت - 20

واھُڙَ وَھٖين مَ ڇالَ! سُڪِي ٻيلاٽِيوُن ٿِيٖين
پَسان تُهجٖي پيٽَ ۾، لاڻا، لوُتَ، لِيارَ،
جِه تو سَڀَ ڄَمارَ، آسائِتِيوُن ٻوڙِيوُن.

بيت - 21

ڪَڙِ ڪَڙِ، ڪُنَ! مَ وَڄُ، ٻانڊِي ٻوڙِ مَ ٻارِ ۾،
مُون تي جا مِهارَ جِي، سا ڪِنءَ ڌُئان ڌَڄُ؟
توءِ گِهڙَندِيَسِ اَڄُ، جٖي اُبَتا آرَ ڪَرِيٖين.

بيت - 22

اَدا! ڙٖي! ٻانڊِي! توکي ڪَڙھان ڪِ پاڻ کي؟
سُوڌِي خَبَرَ سَڄَڻٖين، تو ڪا تَڙِ آندِي؟
توُن پاتارِئا پانڌِي، اَسان پَنڌُ پِريَنِ ڏٖي

بيت - 23

مَحَبَّتِيَ مِهارَ جِيُون، دِلِ اَندَرِ دوُنهيوُن،
آڻِئو وِجهٖي آرَ ۾، لُهاڻو لُوھِيُون،
جٖي ساھَڙَ جِيوُن سُونهيوُن، سِيرَ
سِراڙو تَنِ کي.

وائي - 1

مَدَتَ ٿِيُ مِهارَ! يارَ! ساھَڙَ! سائِرَ سِيرَ ۾.
اُونها ڪُنَ، اَتانگَ تَڙَ، اولِي ھَڻُ آڌارَ!
ساھَڙَ! سائِرَ سِيرَ ۾.
ڏِيهَ ڏُھِلا ڏَمَ سٖين، آھيان آھِئا ڌارَ،
ساھَڙَ! سائِرَ سِيرَ ۾.
ٻِڇَلِ ٻانڊِي ٻارِ ڪَرٖي، اَتِ اُبَتا آرَ،
ساھَڙَ! سائِرَ سِيرَ ۾.
تِتٖي گِهڙِي سُوھَڻِي، آڳَهَ رِءَ آڌارَ،
ساھَڙَ! سائِرَ سِيرَ ۾.
”ڪارِي راتِ، ڪَچو گهڙو“ توڏِيَ ڪِي تَوارَ،
ساھَڙَ! سائِرَ سِيرَ ۾.
سَنڀُوڙو سِيڻاہِ سٖين، سِگهو رَسُ سَنگهارَ!
ساھَڙَ! سائِرَ سِيرَ ۾.
اورارا آھُون ڪَرِيان، پَهُچان شالَ پَرارَ،
ساھَڙَ! سائِرَ سِيرَ ۾.
سُڻِئو جهانءِ جِهڄٖي ھِيُون، سانڀارا سَنڀارَ،
ساھَڙَ! سائِرَ سِيرَ ۾.
آيَمِ رٖيلٖي رٖيءِ سٖين، اَللھَ! تو آھارَ،
ساھَڙَ! سائِرَ سِيرَ ۾.
تارِ تَرَندِيَسِ، لُڙَ لَنگهِيندِيَسِ، وِندِيَسِ وَٽِ وَڇارَ،
ساھَڙَ! سائِرَ سِيرَ ۾.
پُوربِندِيَسِ پارِ مَڻِي، سَهَسٖين جٖي سِنسارَ،
ساھَڙَ! سائِرَ سِيرَ ۾.
گولِي گهاگهائٖي گِهڙِي، جَکَنِ ٿا جانارَ،
ساھَڙَ! سائِرَ سِيرَ ۾.

داستان چوٿون

بيت - 1

اَدِيُون! سَڀِ اَندامَ، چَڙَنِ مُهِجا چورِئا،
لارُنِ جا لَنءُ لايِئِي، سا ڪِنءَ آڇِيان عامَ؟
لَڳِيَسِ جِه جٖي لامَ، سو دلاسا دوستُ مُهٖي.

بيت - 2

چؤڌارِي چَڙا، ٻُرَنِ ٻيٖلايَنِ جا،
سُتٖي سَنڀارَنِ جو، پِيُمِ ڪَنِّ پَڙاءُ ،
وِھَڻُ مُون نہ وَڙاءُ، سُڻِئو جهانءِ جِهڄٖي ھِيُون.

بيت - 3

چَڙَنِ چورِي اَھِيان، سُکِ ٿِي سُمَهان ڪِيَّ؟
سارِيان ساھَڙَ ڄامَ کي، ڏَہَ ڏَہَ ڀيرا ڏيِهَ،
مِهارَ مَرَڻَ سِيَّ، نِيَرُ پاتُمِ نِيهَ جو.

بيت - 4

ڪارا ڪُنَ، ڪارِي تُڳِي، جِتِ ڪارِيهَرَ ڪَڙَڪا،
مَئٖي مَتٖي مِهراڻَ ۾، اَچَنِ دُپارا دَڙَڪا،
ويِندٖي ساھَڙَ سامُها، جهولَ ڏِنَسِ جَهڙَڪا،
کَرِڪِنِ جا کَڙَڪا، سُونها ٿِئَڙَسِ سِيرَ ۾.

بيت - 5

کَرِڪِنِ خُوشِ ڪِياسِ، مَحبَتِيَ مِهارَ جٖي،
پَسَڻَ ڪارَڻِ پِرِيَ جٖي، آڌِيَ اُٿٖيياسِ،
سُتٖي جاڳاياسِ، سانڀَرَ سُپٖيرِيَنِ جٖي.

بيت - 6

جِيارِيَسِ سَنڀارَ، ڪُهُ ڪَرِيندَمِ گَڏِجِي؟
ويٖروتارَ وُجُودَ ۾، پِرِيَنِ جِي پَچارَ،
سٖي سَڄَڻَ ھُونِ نَہ ڌارَ، جٖي ھِيٖين ۾ حَلُ ٿِئا.

بيت - 7

ٻيلٖي پارِ ٻُرِي، موُن کي چَڙَنِ چورِئو،
مَحَبَّتِي مِهارَ جِي، سُتِي شاخَ چُرِي،
مَٿٖي جهوڪَ جُهرِي، پُندِيَسِ پارٖيچَنِ جٖي.

بيت - 8

ھُنَ ڀرِ سُيَمِ ھُوءِ، سُتٖي سَنڀارَنِ جِي،
چِتُ چَڙَنِ چورِئو، جؤنڪَ ٿِئَڙَمِ جوُءِ،
مَحَبّتِيَ مِهارَ جِي، بااللھِ پيٖيَمِ بُوءِ،
وَڃِي رُوءِ بَرُوءِ، ديٖکِيان دوستَ مِهارَ کٖي.

بيت - 9

ھُنَ ڀَرِ سُيَمِ ھاڪَ، سُتٖي سَنڀارَنِ جِي،
مَحبَّتِيَ مِهارَ جٖي، چَڙَنِ چورِئا چاڪَ،
اُنِين جِيَ اوطاقَ، وَڃَڻُ واجِبُ موُن پِئو.

بيت - 10

ڪٖيڏاہَ گَهنڊَ گُڙَنِ؟ ڪٖيڏاہَ اُٿِي ويِئيوُن؟
تٖيڏاہَ ٿِيُون چَرَنِ، جٖيڏاہَ پُٺِ مِهارَ جِي.

بيت - 11

ڪِٿٖي ٿِئو مِهارُ؟ ڪِٿٖي ٿو گَهنڊُ گُڙٖي؟
ڪِٿٖي دُونهِي دوستَ جِي؟ ڪِٿٖي پَرِيُون پارُ؟
جِه مُون سَڀَ ڄَمارَ، جَرَ ۾ جهوتُون ڏِنِيوُن.

بيت - 12

وَڇِنِ سٖين وٖيٺِي، سُورَ وِياڇٖي سُوھَڻِي،
آن ڪا ٿِي ڏٖيٺِي، مٖيهِنِ جٖي مِهارَ سٖين؟

بيت - 13

پُڄِئو پِنگَهنِ پاندَ، ويٺِي روءِ وَڇِنِ سٖين،
ڪُه ڪَريِندِيسِ ڪاندَ؟ گَهرُ ڀَڳو تان گهورِئو.

بيت - 14

ڳِچِيَ پايو ٻانهَ، ويٺِي روءِ وَڇِنِ سٖين،
لايان لالَ لِڱَنِ کي، اَئِين جٖي چَرو ڪانهَ،
آئُون اَواھِنجِيَ دانهَ، سَدا ڀُڻان سَنَرِي.

بيت - 15

ڀيٖلِئا جِتِ ڀَڳِيُون، آيوُن اُتِ وَرِي،
ڪانهِ ٻِي ڳَريِ، مٖيهِنِ کٖي مِهارَ رٖي.

بيت - 16

مِهارا مِرِڪَ، پيِتائِين پِريٖمَ جِي،
تِه مُنڌَ مَتِوالي ڪِي، سَندِيَ ساءَ سُرِڪَ،
لَڳَيسِ ڪامَ ڪِرِڪَ، لوھا تِکِي، لَطِيفُ چٖي.

بيت - 17

مِهارا مَهي، پِيتائِين پِرٖيَم جِي،
اُرِڪَ سُرِڪَ، سَيّدُ چٖي، لَڳِيَسِ ڏُوتُ ڏَھِي،
سَگهٖي تان نَہ سَهيِ، مِلٖي جان نَہ مِهارَ کٖي.

بيت - 18

مَرٖي تان مَ مِهارُ، وَٿَاڻُ وِلَهو مَ ٿِيٖي،
وَڇِنِ جٖي وَڇارَ جو، وِنگو ٿِيٖي مَ وارُ،
ساھَڙُ موُن سِينگارُ، ماڙھُنِ ليکٖي مِيهَڻُون.

بيت - 19

مٖيهِيوُن ھِنَ مِهارَ جِيوُن، اَلا! سَڀِ بَچنِ،
وَڇُون جٖي ڪِيرَنِ سٖين، سَدا ٿِيوُن سُونَهنِ،
مُنکٖي ماڻِڪِيَنِ، تاڻٖي ھَنيو تارِ ۾.

بيت - 20

ميهِيوُن ھِنَ مِهارَ جِيوُن، اَلا! سَڀِ جِيَنِ،
ڪارِيوُن، ڪَڪِيوُن، ڪُنڍِيوُن، وارا ڪِئو وِيَنِ،
جُوءِ جا جاندارَنِ جِي، ٻٖيلا ٻَهَ ٻَهَ ڪَنِ،
اَچِي رٖيلَ رَھَنِ، موُن سانڀارا سُپِرِين.

بيت - 21

چاھَڪَ چَرِي، تارِ تَرِي، آيوُن مَٿٖي آرَ،
ڪوڙِييٖن ڪَرَ کَڻَندِيوُن، سُڻِي سَڏَ ڌَڙارَ،
ميهِيوُن ساڻُ مِهارَ، پَرَچِي پارِ لَنگهِيندِيوُن.

بيت - 22

چاھَڪَ چَرِي، تارِ تَرِي، آيوُن مَٿٖي ٻٖيٽَ،
لُڙَ لَنگهِيندِيوُن ليٖٽَ، لُطفَ ساڻُ، لَطِيفُ چٖي.

بيت - 23

چاھَڪَ چَرِي، تارِ تَرِي، آيوُن مَٿٖي ڪُنَ،
ڪوڙيٖين ڪَرَ کَڻَندِيُون، ساھَڙَ جٖي سَمُنَ،
ميهِيوُن ساڻُ اَمُنَ، پَرَچِي پارِ لَنگهِيندِيوُن.

بيت - 24

چاھَڪَ چَرِي، تارِ تَرِي، آيوُن مَٿٖي کُوہَ،
سُڻِي سَڏُ ساھَڙَ جو، راضِي ٿِندَنِ روُحَ،
ميهِيوُن ساڻُ صُبُوحَ، پَرَچِي پارِ لَنگهِيندِيوُن.

وائي - 1

مُنکٖي ڪامَ جَهلٖي، سَڀَڪا پاڻُ پَلٖي،
آئُون وِڌَڙِي نِيهَ اُڇَلٖي،
وِيندِي آئُون پارِ پِريان ڏي، مُنکي ڪامَ جَهلٖي،
آئوُن وِڌَڙِي نِيهَ اُڇَلٖي.
تَنُ وِڌائِين تارِ ۾، آڌِيَ راتِ اُڇَلٖي،
آئُون وِڌَڙِي نِيهَ اُڇَلٖي.
پَسِي دُونهيُون دوستَ جِيوُن، مُهجو جِيُّ جَلٖي،
آئُون وِڌَڙِي نِيهَ اُڇَلٖي.

داستان پنجون

بيت - 1

ساندَہِ سَڀُ دَرِياہُ، پَرٖي ڪَنڌِي پارَ جِي،
ڇَڪِي ڇولِيَ ۾ گهِڙِي، جِتٖي جِيَّ وِڙاہُ،
پَسِئو ڏوہَ ڏَڪٖي ھِيُون، آرَ مَٿٖي اَرِواحُ،
جٖي توہُ ٿِيٖي توڏاہُ، تہ وِيرَ وَھِيڻوُن ناہِ ڪِينۡ.

بيت - 2

ساندَہِ سَڀُ دَرِياہُ، پَرٖي ڪَنڌِي پارَ جِي،
ڪَنبٖي ھِيُون ڪَماحَقّهٌ، آرَ مَٿٖي اَرِواحُ،
دِلاسٖي دارَينَ جٖي، سانچِئو سانٖچي ساہُ،
جٖي توہُ ٿِيٖي توڏاہُ، تَہ وِيرَ وَھِيڻُون ناہِ ڪِيۡن.

بيت - 3

سِڪَڻَ وارِنِ سُٿِرو، جٖي دَھشَتَ سان دَرياہُ،
اوڙَڪِ اُنِين جو نَہ رَھٖي، آرَ بِنا اَرِواحُ،
وِيندٖي ساھَڙَ سامُهِيوُن، صَدَقو ڪَندِيوُن ساہُ،
جَنِ کي حُبَّ اُنۡهِ جِي آہِ، ساھَڙُ ساڻِي تَنِ جو.

بيت - 4

گِهڙِئا سٖي چَڙھِئا، اِيُهِمۡ اَٿٖيئيِ،
مَئٖي مَتٖي مِهراڻَ ۾، پَؤ ٽَپو ڏيئِي،
تہ مِهارُ مِلٖيئِي، سَنڀُوڙو سِيڻاہَ سٖين.

بيت - 5

اَکِيون مُ‏هُ مِهارَ ڏي، رَکِيوُن جَنِ جوڙٖي،
رِءَ سَنڊَ سَيِّدُ چٖي، تارِ گِهڙَنِ توڙٖي،
تَنِين کٖي ٻوڙٖي، سائِرُ سَگهٖي ڪِينَ ڪِينۡ.

بيت - 6

آڌِيَ اُڌاڻا، سَرَتِيوُن! سُک مِهارَ جا،
لَنگهٖي سِيرَ سَوان ٿئا، ساھَڙَ سٖيباڻا،
ڀِنِي تٖي ڀاڻا، پَسان مانَ پِرِيَنِ جا.

بيت - 7

آڌِيَ اُڌاڻو، ھِيَڙو موُن ھَٿَنِ مان،
وَہِ پَئِي، واھُڙَ تَرٖي، ساھَڙَ سٖيباڻو،
ڀٖيڄَ ڀِنِيَ ڀاڻو، پِيَ جو پَسِي آئِيو.

بيت - 8

جٖيڏاہَ چِتَ چاہُ گهَڻوُن، آرُ پِ اوڏاھِين،
وَڃٖي وَہُ واڪا ڪِئو تِکو تِئائِين،
مِهارُ مِلائِين، لَهرِنِ مَنجِهہ، لَطِيفُ چٖي.

بيت - 9

پَلِئان، پَلِئو نَہ رَھٖي، نِرتُون نِيهُ نِبارُ،
گِهڙان، گهورِئو ڄِندَڙو! اُٿَلَ موُن اَپارُ،
جَنِين مَنِ مِهارُ، ھَلَڻُ تَنِين حَقُ ٿِئو.

بيت - 10

پَسُ! پَسَڻا پَرٖي ٿِئا، اورٖي سَندُن آرُ،
دَرِياہَ رٖي سَهاڙُ، ڏِسَڻُ گهَڻوُن ڏُھِلو.

بيت - 11

ڪاڏٖي وَڃان؟ ووءِ! جِنۡ وَھَڻُ وَڇارَنِ مَٽِئو،
ڏوڌِي پُڇٖي ڏٖيهَ جا، جَرَ سِرِ اُڀِي جوءِ،
شِڪَستِي سَيِّدُ چٖي، چِيهان ڪَرِئو چوءِ،
”ساھَڙَ سانگُ سَندوءِ، اَچِي اوراھُمۡ ٿِيٖي“.

بيت - 12

سَندو ڏَمَ ڏَھَڪارُ، ھَڏِھِمۡ ڪونِهۡ ھِنَ کي،
ھِيَ پاڻِيَ سٖين پاھِجو، پُسائٖي نَہ سِنگارُ،
ڪارَڻِ مُنڌَ مِهارُ، ڪارِيَ راتِ ڪُنَ تَرٖي.

بيت - 13

ڏَمُ ڏِيهاڻِي ڏٖي، سَندا مٖيهَرَ مِيهَڻا،
جَهلِيَمِ ٿٖي جهولِيَ ۾، پَلَءِ پائِيو سٖي،
مَرُ جان چالِيهَ چٖي، سَڱا سُپٖيرِيَنِ جٖي.

بيت - 14

جٖيهَرَ لوڪُ جهَپَ ڪَرٖي، ذَرو جاڳَ نہ ھوءِ،
اوھِيَرَ اَچِئو، اَدِيوُن! پَهُ پِرِيان جو پوءِ،
جٖي ڪَچو چُونِم ڪوءِ، تہ مَرَڪُ
ڀايان مِيهَڻُو.

بيت - 15

تَہ ڪَرَ ڪِنءَ سُئِي؟ جٖي سِيرَ نَہ
گهِڙِي سُوھَڻِي،
ھِتِ حَياتِيَ ڏِيهَڙا، ھَڏِہۡ تان نَہ ھُئِي،
چُڪٖي تِه چَرِي ڪِي، جو ڏِنُسِ اُنِ ڏُھِي،
سُهڻِيَ کي، سَيّدُ چٖي، وِڌو قُربَ ڪُهِي
ھُنهِمۡ ھُندَ مُئِي، پَرَ ٻُڏِيَ جا ٻِيڻا ٿِئا.

بيت - 16

ڪا جا ڪُنَ ڪَرِينِ، ڀِنِيَ ڀُڻِ جهُڻِ پاڻَ ۾،
اَکِيوُن تِه آبَ کي، آڌِيَ اُڪِيرِينِ،
توڻٖي تِڪُون ڏِينِ، تَپِ اُڃَ اُنِين کٖي نَہ لَهٖي.

بيت - 17

دائِمُ جا درياہَ ۾، سا مَڇِي ڪِنِي ڪوہُ؟
آھِس اِيُ اَندوہُ، پاڻِي ڪِٿٖي تَہ پِيان.

بيت - 18

ڪٖيرُڪُنَ؟ ڪٖيرَ؟ ڪيرَ ڏَمَرَ سَهٖي ڏَمَ جا؟
قَضا رِءَ ڪٖيرَ ڌَرٖي؟ مَٿٖي پاڻِيَ پٖيرَ،
ڀَينَرُ! ڀِنِيَ ويٖرَ، لِڌو تٖي ٿِي لوڙِيان.

بيت - 19

جٖي ٻُڏان تَہ ٻَنِّ، اولِجان اُنَ پارَ ڏي،
ڪَنڌِيَ اَچِئو سُپرِيِن، مانَ ”ٻَرِ! ٻَرِ!“ ڪَنِّ،
مُيائِي سٖين تَنِّ، جٖيڪَرَ اُٿِي نِڪَران.

بيت - 20

لَهرِ مِڙوئِي لالُ، وَھَڻُ کَٿُورِئا وِتَرو،
اوٻَهارا عَبِيرَ جا، جَرَ مان اَچنِ جالَ،
ڪُنَنِ گِهڙيِ ڪالَ، سِڪَ پِريان جٖي سُوھَڻِي.

بيت - 21

جٖيڪِينۡ ڏِٺُءِ تارِ ۾،ڪَنڌِيَ سو ڪَهٖيجِ،
جَرُ وَڏو جهاجهَہ گَهڻِي، پاندُ مَ پُسائٖيجِ،
ساھَڙُ ساڱا ھٖيجِ، تہ ثابِتُ لنگٖهين سِيرَ مان.

بيت - 22

ڳؤرا ٻَئِي پارَ، ھِيُون حَيَرتَ ۾ پِئو،
وِھان تَہ ويٖرَمَ ٿِيٖي، نِيهَ ۾ پوءِ نِهارَ،
وَڃان تہ واڪو ٿِيٖي، پاڙٖي پوءِ پَڄارَ،
ھُتِ ٿِي وَعدٖي وارَ، ھِتِ سُوٽُون ڏِينِمِ سَرَتِيوُن.

بيت - 23

جا ھَڙَ اَندرِ جِيَّ، ساھَڙَ ڏنِي ساہَ کي،
ساھَڙَ ڇُڙٖي نہ ساہَ جِي، ساھَڙَ ساھَڙَ رِيَّ
ساھَڙَ مٖيڙِ سَمِيعَ! تہ ساھَڙَ ڇُڙيٖ ساہَ جِي.

وائي - 1

اَکِيوُن پٖيرَ ڪَرٖي، وَڃِجٖي وو! وَڃِجٖي.
سُپٖيرِيان جِي ڳالَڙِي، ڪِه سان ڪِينَ ڪِجٖي،
وَڃِجٖي، وو! وَڃِجٖي.
لِڪائٖي لوڪَ کان ، ڳُجهَڙِي ڳوٺِ نِجٖي،
وَڃِجٖي، وو! وَڃِجٖي.
مَحَبّتِيَ مِهارَ جو، سُورُ نہ ڪِه سَلِجٖي،
وَڃِجي، وو! وَڃِجٖي.

داستان ڇھون

بيت - 1

ساھَڙَ جا سِنگارَ، اَڻَ لِکِئا اَڳٖي ھُئا،
نِڪاڪُنۡ فَيَڪُوۡنُ ھُئِي، نَڪا ٻِي پَچارَ،
مَلَڪَنِئا مَهدِ ھُئِي، توڏِيَ جِي تَوارَ،
مَحَبَّتَ ساڻُ مِهارَ، لايائِين لَطِيفُ چٖي.

بيت - 2

سُهِڻيَ کي سِنگارَ، اَڻَ لِکِئا اڳٖي ھُئا،
ڪُنۡ فَيَڪُوۡنُ ڪانَ ھُئِي، نَڪا ٻِي پَچارَ،
مَرَڪِي ساڻُ مِهارَ، لايائِين لَنءُ، لَطِيفُ چٖي.

بيت - 3

گهٖيڙَ لَنگهئو گهارٖي، مِيثاقا مِهارَ سان،
اَلَسۡتُ بَرَبِّڪُمۡ؟ قَالُوۡا بَليٰ، پَرِ اِھا پارٖي،
ڏِسِئو ڏيکارٖي، پِرتِ پِريان جو پيچِرو.

بيت - 4

”اَلَسۡتُ“ اَرواحَنِ کي، جَڏِہ چَيائُون،
مِيثاقا مِهارَ سٖين، لَڌِيُون مُون لائُون،
سو موٽٖي ڪِنءَ پاھُون؟ جو مَحفُوظا
مَعافُ ٿِئو.

بيت - 5

”اَلَسۡتُ“ اَرواحَنِ کي، جَڏِہ چَيائِين جِيَّ،
”قَالُوا بَليٰ قَلبَ ۾، ٿِئو تَفا ءُلُ تِيَّ،
مَحَبّتِيَ مِهارَ جٖي، آئۡون نِهوڙِي نِيهَ،
سَرَتِيوُن! ساھَڙَ سِيَّ، ھَلَڻُ مُون حَقُّ ٿِئو.

بيت - 6

”آلَسۡتُ“ اَرواحَنِ کي، جَڏِہ اَمرُ ڪِئو اَحَدَ،
ھو مَنَ ڪاڍو مِهارَ ڏٖي، سُهڻِيَ سِڪَڻَ سَڌَ،
دِلو دَورَ دَرِياہَ جٖي، ڪِئو اِرادٖي اَڌَ،
جٖيڪِين آيُسِ ڏاہَ عَهَدَ، سو پارٖي مُنڌَ پاتارَ ۾.

بيت - 7

”اَلَسۡتُ“ اَرواحَنِ کي، جَڏِہ فَرمايو فَتاحَ،
ھو مَنَ ڪاڍو مِهارَ ڏي، سُهڻِيَ سِڪَڻَ ساہَ،
دِلو دَورَ دَرِياہ جٖي، ڪِئو اِرادٖي اَداہَ،
جٖيڪِين آيُسِ ڏاہَ اللہَ سو پارٖي مُنڌَ پاتارَ ۾.

بيت - 8

”اَلَستُ“ اَرواحَنِ کي، جَڏِہ فَائِقَ فَرمايو،
ھو مَنَ ڪاڍو مِهارَ ڏٖي، سُهڻِيَ کي ساعِيو،
دِلو دَورَ دَرِياہَ جو، اوڏاھِين آيو،
جيڪِين ھادِيَ ھَلايو، سو پارٖي مُنڌَ پاتارَ ۾.

بيت - 9

”اَلَستُ“ اَرواحَنِ کي، جَڏِہ چَيائِين،
ھو مَنَ ڪاڍو مِهارَ ڏٖي سُهڻِيَ سَدائِين،
جيڪِين آيُسِ اوڏاھِين، سو پارٖي مُنڌَ پاتارَ ۾.

بيت - 10

”اَلَسۡتُ“ اَرواحَنِ کي، جَڏِہ جاڳايو جَلِيلَ،
سَئيِن راہَ، سَيِّدُ چٖي، سوٺائُون سَبِيلَ،
وَحَدتَ جٖي وادِيَ ۾، ڪوڙٖين ڪٖي قَلِيلَ،
دَرِياہَ جٖي دَلِيلَ،لوڙھٖي لَهوارا ڪِئا.

بيت - 11

کامان، پَچان، پَڄُران، لُڇان ۽ لوچان،
تَنَ ۾ تَنۡسَ پِريَنِ جِي، پِيان نَہ ڍاپان،
جٖي سَمُنڊَ مُه ڪَرِيان توءِ سُرڪِيائِي نَہ ٿِيٖي.

بيت - 12

کامان، پَچان، نَہ مَران، سَڙان سارِي راتِ،
ٻَنِ ٻِئائِيَ کي وِجهِي، ڪَرِ پِريان جِي تاتِ،
سِيخوُن سَندِيوُن، سَڄَڻٖين، اُڀِرَنِ آڌِيَ راتِ،
نہ ڪِينۡ ھَٿِ نَہ ساٿِ، ڏِيهاڻِئو چَنگِ چَڙھان.

بيت - 13

ڪاِري راتِ، ڪَچو گَهڙو، اُڻَٽِيهَ اُونداھِي،
چَنَّڊ نالو ناہِ ڪو، دَرِياہَ دَڙَ لائِي،
ساھَڙَ ڪارَڻِ سُوھَڻِي، آڌِيَ ٿٖي آئِي،
اِي ڪَمَ اِلاھِي، ناتَ ڪُنَنِ ۾ ڪٖيرَ گِهڙٖي؟

بيت - 14

ڪارِي راتِ، ڪَچو گَهڙو نَڪا سِيڻَهِ ساڻُ،
وِجهٖي ويرَمَ نَہ ڪَرٖي، پِريان ڪارَڻِ پاڻُ،
مَحَبَّتَ کي مِهَراڻُ، سُڪِي سَڀُ پَٽُ ٿِئو.

بيت - 15

ڪارِي راتِ ڪَچو گَهڙو، مَٿاء وَسٖي مِيهُ،
ھِڪو ڀَؤُ بيراہَ جو، ٻِئو سانڀارا سِيهُ،
شالَ مَ ڇِڄٖي نِيهُ، گِهڙان، گهورِئو ڄِندَڙو!

بيت - 16

اورارِ نَہ پَرارِ، ويچارِي وَہَ وِچَ ۾!
سُڪِيَ ڏَنِيَ سُپرِيِن، ٻِئو مِڙوئِي تارِ،
تُون گِهڙُ ڪِيمُ نِهارِ، ٻُڏَندَنِ سٖين
ٻاجهُون ڪَرٖي.

بيت - 17

ھِنَ پارِ، نَہ ھُنَّ، ويچارِي وَہَ وِچَ ۾!
نِيَڇُ نِهارٖي نَہ گِهڙِي، تِهِ ۾ پِئَسِ تُنَّ،
اَللھَ! ساڻُ اَمُنَّ، آرا ڪِهۡ اُڪارِيٖين.

بيت - 18

سَهَسٖين سائِرَ ٻوڙِيوُن، مُنڌَ ٻوڙِئو مَهِراڻُ،
وَہَ وِڃائِيو پاڻُ، ھَڻِي ڪَنڌُ ڪَپَنِ سٖين.

بيت - 19

سَهَسٖين سائِرَ گَجَنِّ، توءِ سَهَجَ نَہ مَٽٖي سُوھَڻِي،
تہ ڪٖي نِيهَ ڇِڄَنِّ، پَرِ تَهِمۡ پِرِيَنِ جٖي؟

بيت - 20

سُپٖيرِيان جٖي تُرَھٖي، ٻُڏِي! ھَٿُ مَ لاءِ،
صُباحَ تان چُنداءِ ”اَسان تو اُڪارِئو.“

بيت - 21

سُپيٖرِيان جٖي تُرَھٖي، ٻُڏيٖن توءِ مَ لَڳُ،
جي ڀايٖين پِريَ مِڙان، تہ پُورَ اُبَتي وَڳُ،
پاءِ تيڏاھِمۡ پَڳُ، ناہِ جيڏاھِمۡ نِجهُرو.

بيت - 22

سُڪِيَ جٖي سانباہِ ۾، جَڏِہ ٻُڏِيوُن جٖي،
ساھَڙُ تَنِين کٖي، ٻٖيلٖي ٻِنِين ڪَنڌِييٖن.

بيت - 23

سُڪِيَ ٻُڏَنِ جٖي، ساھَڙُ ساڻِي تَنِ جو،
لَهِرِنِ سِرِ لَطِيفُ چٖي، ڪُلَنِ چاڙھِئو نٖي،
جٖي پُڇَنِ پَنڌُ پَرٖي، تَنِ اُماڻٖي اورَھُون.

بيت - 24

سُڪِيَ جي سانباہِ ۾، ٻُڏيٖن، توءِ ٻُڏُ،
ڪَکَ، ڪانڊيرا، ڪاٺِيوُن، مٖيڙٖي ٻَڌُ مَ مَڏُ،
نڪو ساھَڙَ سَڏُ، نَڪا سُڄٖي سُوھَڻِي.

بيت - 25

جٖي تو بيتَ ڀائِيا، سٖي آيَتوُن آھِينِ،
نِئو مَنُ لائِينِ، پِرِيان سَندٖي پارَ ڏي.

وائي - 1

ويٺِي ڪِينَ وِسارٖي، مَحَبَّتَ وِڌَڙِي مارٖي،
ديوانِي، يارَ! وو! مَستانِي، دِلِبَرَ! جاني! وو!
لا! ويٺِي ڪِينَ وِسارٖي.
جِه کي سِڪَ ساھَڙَ جِي، سا گهايَلِ گهَرِ نہ گهارٖي،
لا! ويٺِي ڪِينَ وِسارٖي.
ڏَمُ ڏُھٖيلو ڏُکئِو، سِرَ ۾ سؤنٽا مارٖي،
لا! ويٺِي ڪِينَ وِسارٖي.
ٻٖيلٖي پاسِ ٻُرَنِ جٖي، تَنِ کَرِڪِنِ وِڌِيَسِ کارٖي،
لا! ويٺِي ڪِينَ وساري.
ٻيلي ٻِنِين ڪَنڌِيٖين، مُحِبُّ مٖيهُون ٿو چارٖي،
لا! ويٺِي ڪِينَ وِسارٖي.
ھُوءِ ھُنگاروُن، پُونِ پُڪارُون، تَڙِ تَڙِ دوسُ تَوارٖي،
لا! ويٺِي ڪِينَ وِسارٖي.
ھُوءِ جا پِڪَ پِريَنِ جِي، آھِيان تِه آسارٖي،
لا! ويٺِي ڪِينَ وسارٖي.

داستان ستون

بيت - 1

تَڙِ نَہ گِهڙٖي تُورُ، توءِ مَنَ ڪاڍو مِهارَ ڏي،
ڏاڍو دَورُ دَرِياہَ ۾، سِڪَڻَ وَڏو سُورُ،
مَنَ ۾ موجَ مِهارَ جِي، پَهَسَ پِريان جو پُورُ،
ٻٖيلٖي ٻِنِين ڪَنڌِيٖين، نِتُ نِهارٖي نُورُ،
مَنجها جَرَ ضَرُورُ، ڪَچٖي کي ڪومَ ٿِيٖي؟

بيت - 2

ٻوڙِيٖين، چاڙھِيٖين توُن ڌَڻِي!
ٻٖي جو دَعويٰ رَسٖي نَہ دَمُ،
ھِنَ مُهجٖي حالَ جو، مٖيهَرَ تٖي مَعۡلَمُ،
رَکُ ڀٖيلٖي جو ڀَرَمُ، جو اَچِي پِئو اَجهورَ ۾.

بيت - 3

ڪانڌِي ڪَنگَ ٿِئاسِ، وَھَڻُ جَنازو سُوھَڻِيَ،
ٻگا جٖي ٻٖيٽَنِ جا، ڪُلا تَنِ ڏِناسِ،
اَکِيٖين مَلَڪَ ڏِٺاسِ، توءِ مَنَ ڪاڍو مِهارَ ڏي.

بيت - 4

اُڀو تَڙِ مِهارُ، مَلاحَنِ سَڏَ ڪَرٖي،
آئُون پُڻ وِجهان ھَٿَڙا، اَئِين پُڻ وِجهو ڄارُ،
گهورِيُون ڪارُنڀارُ، مانَ مِڙَنِهُون سُپِرِين.

بيت - 5

مِهارُ مَلاحَنِ کي، اُڀو آڇٖي اَڇَ،
آئُون پُڻ وِجهان ھَٿَڙا، اَئِين پُڻ وِجهو رَڇَ،
سَندِيَ ڪُنَ ڪُڻِڇَ، مانَ ھُونِ سَلامَتَ سُپِريِن.

بيت - 6

مِهارُ مَلاحَنِ کي، اُڀو ڪَرٖي سَڏَ،
اَدا! اِنَهِين پارَ جا، موڙٖي اَچو مَڏَ،
وِئا جٖي وَہَ گَڏَ، ھَلو ڏورِيوُن اُنِ کي.

بيت - 7

ڪَنڌِيَ جَهلِئو ڪانهَ، عاشِقُ اُڀو آھون ڪري،
تو ڪِنءَ ٻوڙِي سوُھَڻِي؟ ٻيلِي! مُهجِي ٻانَه،
دَرِياہَ! توتي دانهَ، ڏِيندُسِ ڏِيهَ قِيامَ جٖي

بيت - 8

جِتٖي ڀيٖرَ ڀِرَنِ، ڀَرِيوُن پُونِ ڀَوارِيوُن،
تانگَ نَہ لَڌِي تارُئيٖن، مَپُ نَہ ماٽِيَڙَنِ،
ڪَنڌِيَ اُڀا ڪيتَرا، سِيڻايا سَنڪَنِ،
توُن ڪِنءَ تَنِ تَڙَنِ، اَچِئو، اَسارِي! گِهڙٖين؟

بيت - 9

ڀَرِيوُن ڀَرِ دَرِياہَ، پَسُ! جٖي پارِ پَوَندِيوُن،
ٻَڌُ تَوَڪُّلَ جو تُرَھو، آھَرَ ساڻُ اَللھَ،
جَنِ جِي ساھَڙَ ساڻُ صَلاحَ، سٖي ڪِينَ ٻُڏَندِيُون ڪَڏِھِمۡ.

بيت - 10

سانڀارا سَڏَ ڪِئو، اُڀا چُونِمِ؛”آءُ“،
ھِڪُ تِکوئِي تارِ وَھٖي، ٻِئو لُڙُ لَهرِيوُن ۽ واءُ،
ساڻِي جَنِ اَللھُ، ٻُجهان، سٖي نَہ ٻُڏَندِيوُن.

بيت - 11

سانڀارا سَڏَ ڪِئو، اُڀا چُونِمِ: ”اَچُ“،
ھِڪُ تِکوئِي تارِ وَھٖي، ٻِئو ھَٿِ ڪَمِيڻِيَ ڪَچُ،
ساڻِي جَنِين سَچُ، ٻُجهان، سٖي نہ ٻُڏَندِيوُن.

بيت - 12

ھارِي! حَقُّ رَکٖيجِ، سانڀارا ساھَڙَ جو،
خوابَ خِيالَ، خَطِرا، تَنِ کٖي تَرَڪُ ڏِئٖيجِ،
اَندَرُ آئِينو ڪَرٖي، پَرِ ۾ سو پَسٖيجِ،
اِنَهِمۡ راہَ رَمٖيجِ، تَہ مُشاھِدو ماڻِيٖين.

بيت - 13

ھارِي! رَکِجِ حَقُّ، سانڀارا ساھَڙَ جو،
خوابَ، خِيالَ، خَطِرا، تَنِين ڏيجِ تَرَڪُ،
ڪَرِيٖين غَيرَ غَرَقُ، تہ مُشاھِدو ماڻِيٖين.

بيت - 14

سانڀارا سيئِي، تَنُ جَنِين جو طالِبُو،
مَنُ پرِيان نٖيئِي، پَڳَهِئو پاڻَ ڳَرٖي.

بيت - 15

لَيا ڏِٺَمِ لارَ، سانڀارا ساھَڙَ جا،
ھِيُون ھِتِ نَہ وِندُري، ڌراڙَنِئوُن ڌارَ،
مُهجو مَنُ مِهارَ، پَڳَهِئو پاڻَ ڳَرٖي .

وائي - 1

آيَلِ! اَسَڻِ! تٖي جِيان، لا! جٖي سارِيِنِمِ سُپِرِين.
ساھَڙَ! مَٿاءَ صَدَقو، ڏَھٖين ڏمَ ڏِيان،
لا! جٖي سارِينِمِ سُپِرِين.
مَٿا ماڻِڪَ ھٖيڪَڙٖي، اَمُلَ اَٺَ ڏِيان،
لا! جٖي سارِينِمِ سُپِرِين.
اَچٖين عَبُداللّطِيفُ چٖي، تہ، جانِبَ! نِتُ جِيان،
لا! جٖي سارِينِمِ سُپرِينِ.

داستان اٺون

بيت - 1

ٻُڏَندٖي ٻُوڙَنِ کي، ڪٖي ھاتِڪَ ھَٿَ وِجهَنِ،
پَسو لَڄَ، لَطِيفُ چٖي، ڪيٖڏِي کٖي ڪَکَنِ،
توڻٖي ڪَنڌِيَ ڪَنِ، ناتَ ساڻُنِ وَڃَنِ سيِرَ ۾.

بيت - 2

ڪَچيِ ڪانِي ڪانهَ، ٻُڏا ڪَڍٖي ٻارِ مان،
يا لَنگهائٖي، لَطِيفُ چٖي، يا ڌُرِئا
ڪَريٖ دانهَ،
ڪَما حَقُّه ڪَکَنِ جِي،آھٖي ڳالِ اَڳانهَ،
جٖيڪيِنۡ ڏٖي ٻُڏَنِ کي ٻانهَ، ناتَ ساڻُنِ وَڃٖي سِيرَ ۾.

بيت - 3

جان ڪيِنۡ ڪَنڌِيَ ڪانهَ، تان تاڻٖي ٻَڌِج تُرَھو،
ھَٿُ پِرِيان جٖي ھَٿَ ۾، ٻٖي کٖي ڏِجِ مَ ٻانهَ،
سَندِي ڪَپَرَ دانهَ، ڪِ تو ڪَنٖين نَہ سُئِي؟

بيت - 4

ھاواڻا ھُلَنِّ،ڪَپَرَ ڪارُنڀارَ جا،
لَهرِيوُن، لُڙَ، لَطِيفُ چٖي، ڀٖيٖلي تٖي ڀُلَنِّ،
جٖي ڪَچٖي ساڻُ ڪَهَنِّ، آڪو تَنِ اوباھِيٖين.

بيت - 5

آھِيٖين ھُتِ اُماڻَ، ٻَڌُ تُرَھو تارِ جو،
لَهرِيُون، لُڙَ، لَطِيفُ چٖي؛ جَهلِئا جُنگَ جُواڻَ،
اونهٖي تَڙِ آگَهٽِئا، آڏِي پائٖي آڻَ،
جٖي پِئامُهِ مِهراڻَ، تَنِ ٻانڌِيَنِ ٻٖيٽُ نہ اُجَڄهٖي.

بيت - 6

ڪَچو کان ڪُنڀارَ اوڳِي! ڳِنِئو اُٿِيٖين ،
ڪِ تو ڪَنٖين نَہ سُئِي؟ ڀيٖلي تٖي ڀُلِڪارَ،
لوڙھِئا لَکَ، لَطِيفُ چٖي، ڪوڙِيٖين ڪارُنڀارَ،
اُڪارِيٖين،آڌارَ! آرا آڪٖي وارِيٖين.

بيت - 7

ڪَچٖي ساڻُ ڪَهٖي، پَڪو پُڇٖي نَہ سُوھَڻِي،
لَنگِهئو لُڙُ، لَطِيفُ چٖي، وَڇارَنِ وَھٖي،
ساڪِنءَ نِيهُ نَهٖي؟جه کي نِيهَ نَڌو کَڻِي.

بيت - 8

اُونهٖي ۾ اوھَرِي. ڪَهٖي ڪَچٖي ساڻُ،
سُپَڪَ جو، سَيّدُ چٖي، پُڇٖي نہ پَرِياڻُ،
عِشقَ وارِيوُن، عَبُداللَّطِيفُ چٖي، سَڌَ نہ کَڻَنِ ساڻُ،
جَنِين پاسٖي پاڻُ، سٖي اَوَتَڙَا اُکَتِيوُن.

بيت - 9

اَنگَ پَسِي رَنگُ، ڪِئو ڪو جو دَورُ دِلٖي،
ٻر! ٻر! ٻٖيلِي نہ ٿِئو، ڪَچو مَنجهِہ ڪِلٖي،
تَران ٿِي تارِ گَهڻُو، تُهجٖي بَحرَ بِلٖي،
سو مٖيهارومِ مِلٖي، آھِيان جِهجٖي آسَرٖي.

بيت - 10

ڀايُمِ نَہ ڀٖيلو، مُنکٖي ڌاءَ ڌُئارِئو،
آڪٖي مَٿٖي اُسَرِي، رُوحَ ڏِنو ريٖلو،
تيلاھِمۡ ويٖلو، پِئُمِ واھُڙَ وِچَ ۾.

بيت - 11

ڪَڍِئا جٖي ڪُلالَ، سٖي پَسِي خالَ خُوشِ ٿِيٖي،
پاڻِيَ چِٽَ پُسائِيا، ڌاءَ نَہ جَهلِي ڌَمالَ،
سُپَڪَ ڀانيا سُوھَڻِيَ، جو ڀَنَ جٖي جَمالَ،
آڪٖي جا اَحوالَ، مَعۡلُمُ ٿِئا مِهراڻَ ۾.

بيت - 12

ڪَچو، تان ڪوہُ؟ نَظَرُ پِريَنِّ جو،
ساھَڙُ مُهجو سُپِرِين، ڏَمَ ڏِٺٖيئِي ڏوہُ،
جٖي ڇَٽو، جٖي ڇوہُ، تہ پُورِيندِيَسِ پارَ مَڻِي.

بيت - 13

آڪو تہ آڪو، ڪَچو آيُمِ ڪَمِّ،
جِيَ جَنِين جا جَمِّ، پڪا سٖي پُڇَندِيُون.

بيت - 14

پَڪا رَڇَ ڪُنڀارَ جا، پَڪِي نِيهائِين،
مُون کي تِئائيِن، ڀٖيلو ڀاڱٖي آئِيو.

بيت - 15

ڪَچٖي ڪَٽُ نہ جَهلِئو، ڀٖيلو پِئو ڀُرِي،
سارَ ڇَڏِيائِين سِيرَ ۾، ٻانهُنِ کان ٻُرِي،
لَٽٖي لَهرِيوُن ويٖئِيوُن، چؤڌارِي ڃُرِي،
ھِيَڙٖي مَنجهِہ ھُرِي، ماھِيَتَ مَلَڪَ الۡمَوتَ جِي.

بيت - 16

ڪَچٖي ڪَٽُ نہ جَهلِئو، ڀيلو پِئو ڀَڄِي،
ماھِيَتَ مَلَڪَ الۡمَوتَ جِي، مَنجهِہ وُجُودَ وَڄِي،
ساھَڙَ کي سَڄِي، آڪٖي جٖي اَحوالَ جِي.

بيت - 17

ڪَچٖي ڪَٽُ نہ جَهلِئو، ڀيلو سَهٖي نہ ڀَرُ،
ھَٿٖين، پٖيريٖن آڱُرِيٖين، ٻانهُنِ ڇَڏِئو ٻَرُ،
ساَھَڙ! سِگهو وَرُ، پيٖيَسِ مُهِ مِهراڻَ جٖي.

بيت - 18

ڀٖيلٖي ڀُلائِي پَسِي چِٽَ چَرِي ٿِيِي،
”ٻَرِ! ٻَرِ! ٻُڏِي سوُھَڻِي!“ وِيرِنِ ۾ وائِي،
ڪَچٖي ڪٖيرائِي، لاَل لَهرِنِ وِچَ ۾.

بيت - 19

پَڪو کَڻِجِ پاڻَ سٖين، چَڱُو چِٽائٖي،
ڪَچو ڏٖيجِ ڪُلالَ کي، مُهَ تي موٽائٖي،
سو سُڻُ ھِيٖين سٖين، سُوھَڻِي! جٖيڪيِن
فائِقُ فَرمائٖي،
مَوجُون مُنجهائٖي، مارِينِئِي مِهراڻَ جِيوُن.

بيت - 20

ڪو جو وَرِئو واءُ، جِنۡ ٻَرُ ٻانهُنِ ڇَڏِئو،
اَڳٖي اِنَ تَڙاء، اُنڌاھِيائِي اُڪِران.

بيت - 21

ھَڻَندٖي ٿَڪَمِ ھَٿَ، ھِيَڙٖي حُجُون ڇَڏِيُون،
لَکُ لَهرِنِ گَڏِئو، مَوجُون وَرِيُون مَٿَ،
نِيَمِ ڪُنَّ قُوَّتَ، ڀِرُ، ڀَلٖيرا سُپِرِين!

بيت - 22

ھِيَڙٖي حُجُون ڇَڏِيون، قُوَّتَ رَھِيَمِ ڪانَ،
مُون تي موٽِجِ، مُون پِرينِ! ساھَڙَ ڄامَ سُڄاڻَ!
آھِيان گَهڻُون اَڄاڻَ، ڀِرُ ڀَلٖيرا سُپِرِين!

بيت - 23

ڀِرُ، ڀَلٖيرا سُپِرِين! ڀَلا ۾ ڀٖيراہَ،
تورِءَ تارِي ناہِ ڪا، والِي! تو رِءَ واہَ،
ساھَڙَ جِي صَلاحَ، تَنَ کي ڪَڍٖي تارِ مان.

بيت - 24

تَنَ کي ڪَڍٖي تارِ مان، صُلحُ ساھَڙَ جو،
اُتِ آڏو اَچٖي ڪِينَ ڪِينۡ، ٻٖيلِيَپو ٻٖي جو،
مٖيهَرَ! ڪِجِ مُهجو، ڪو اوڪَرُ ڪِهِين آرَ تان.

وائي - 1

موُن پارٖيچِيَ سارَ، آئوُن جا وِيندَڙِي وَٽِ وَڇارَ،
ڏَمُ مَ جاڳٖي، لو! مُون پارٖيچِيَ سارَ.
مُنکٖي تِتيٖ مٖيڙِيٖين، جِتِ ڪُنڍِنِ جِي قَطارَ،
آئوُن جا وِيندَڙِي وَٽِ وَڇارَ.
ٻُرَنِ ٻيلايَنِ جا، سانڀارا سَنڀارَ،
آئوُن جا وِيندَڙِي وَٽِ وَڇارَ.
وِچُ مَ پوءِ وِصالَ کي، سَٻاجها سَتّارَ!
آئوُن جا وِيندَڙِي وَٽِ وَڇارَ.
گَهرِ گَهرِ گِلا جا وَھٖي، پاڙٖي پَنڌِ پَچارَ،
آئوُن جا وِيندَڙِي وَٽِ وَڇارَ.
تاڪُنِ تَڪِي آھِيان، سِگهو رَسُ، سَهاڙَ،
آئوُن جا وِيندَڙِي وَٽِ وَڇارَ.

داستان نائون

بيت - 1

جَرِ ٿَرِ تِکَ، تَوارَ، وَڻِ ٽِڻِ وائِي ھيڪَڙِي،
سَڀٖيئِي شَيءَ ٿِئا، سُورِيَ سَزاوارَ،
ھَمَه مَنصُورَ ھَزارَ، ڪِهَڙا چاڙِھئو چاڙھِئٖين؟

بيت - 2

سَڀَتِ پَچارَ پِريَنِ جِي، سَڀَتِ ھوتَ حُضُورُ،
مُلڪُ مِڙو مَنصُورُ، ڪُهِي ڪُهَندِہۡ ڪيتَرا؟

بيت - 3

لَهرِنِ لَکَ لِباسَ، پاڻِيَ پَسَڻُ ھيڪَڙو،
اُونهٖي تِه عَمِيقَ جيِ، وارٖي ڇَڏِ وِماسَ،
جِتِ ناہِ نِهايَتَ نِي‏هَ جِي، کوءِ اُتِ پَهچِي کاسَ،
تَڙَنِ جِي تَلاسَ، لاہِ تَہ لالَنَ لَڳِ ٿِيٖين.

بيت - 4

مَرِجِ وَٽِ مِهارَ، مَتان موٽٖين، سُوھَڻِي!
ساھَڙَ جا سِنگارَ، مَتان ڏَمَ ڏيکارِيٖين.

بيت - 5

”چُونِمِ جٖي ھيڪارَ: مَ وَنءُ موٽِي سُوھَڻِي!“
دُنهِيَ پاسٖي دوسَ جٖي، گهارِيان سَڀَ ڄَمارَ،
ٻانڌِيَڻا ٻِيهارَ، ھُندَ نہ لِڱٖين لائِيان.

بيت - 6

وَڃان ڪِينَ وَرِي، ھُندَ رِءَ چَئٖي رَھِي رَھان،
دُنهِيَ پاسٖي دوسَ جٖي، ماڳِه پُئان مَرِي،
صُورَتَ نَہ سُنهَ ڪا، ڪِيَسِ چِتَ چَرِي
وِصالا فِراقَ جِي، سُڄٖي ڳالِ ڳَرِي،
تيلاھِمۡ تَرِي، مُهُ ڳِنِئو موٽِئو وَڃان.

بيت - 7

جٖي قِيامَ مِڙَنِ، تَہ ڪَرَ اوڏا سُپِريِن،
تِهان پَرٖي سُڄَنِ، واڌايوُن وِصالَ جِيوُن.

بيت - 8

آئُون ڪِ نہ ڄاڻان اِيَّ ؟ تَہ جَرَ گهِڙِيٖي جوکو ٿِيٖي،
قَضا جا ڪَرِيمَ جِي، تِه کان ڪَنڌُ ڪَڍِيو ڪِيَّ؟
ھِڪُ لِکِيٖي، ٻٖي نِيهَ، آڻٖي اوِليَسِ اولَ ۾.

بيت - 9

نَہ ڪانِيَ نَہ ڪانهَ، نَڪو ڏوہُ قَلَمَ جو،
اَنگُ اُتٖيئِي لِکِئو، جِتِ نَہ رَسٖي ٻانهَ،
ڪِه کي ڏِيان دانهَ؟ قَضا قَلَمُ وَھائِيو.

بيت - 10

تَڙَنِ جا طَعنا، سَهَنگا ڏِينِمِ سَرَتِيوُن،
دَرِياہَ ديوانا! سُڻُ حَقِيقَتَ حالَ جِي.

بيت - 11

تَران لَءِ طَعنٖي، مَٿٖي وَہَ واڪا ڪِئو،
آڻٖي وِڌِيَسِ آرَ ۾، دَرِياہَ دٖيوانٖي،
قَلَمَ جٖي ڪانٖي، آڻٖي اولِيَسِ اولَ ۾.

بيت - 12

تَران تان مَران، وَران تان وَہُ وِتَرو،
ھِيَڙٖي ۾ ھوتَنِ جا، اَچَنِ گُهورَ گَهڻان،
پَسِئو پاڙٖي وارِيوُن، ڏِسِئو ڏوہَ ڏَران،
وِچا ڪِنءَ وَران؟ ڪَنڌِيَ مُهجو ڪارَڻِي.

بيت - 13

نَڪو سَنڌو سُورَ جو، نَڪو سَنڌو سِڪَ ،
عَدَدُ ناہِ عِشقَ، پُڄاڻِي پاڻَ لَهٖي.

بيت - 14

عَدَدُ ناہِ عِشقَ جو، سُڻِي ٿِيُ ساڻِي،
ڪانِه پُڄاڻِي، مَهِدا مُنڌَ! مِهارَ جِي.

بيت - 15

سِڪَ تُهجِي، سُپِرِين! جِنءَ تَران تِنءَ تارِ،
تُنهِمۡ رَھِئو رُوحَ ۾، تُنهِمۡ اَکِنِئا ٻارِ،
پِريِن! تُهجٖي پارِ، مُون واجهائِندٖي وَرہَ ٿِئا.

بيت - 16

سِڪَ تُهجِي، سُپِريِن! ڪَپٖي ۽ ڪورٖي،
سَگهان نہ چورٖي، ڏاڍو نِيَرُ نِيهَ جو.

بيت - 17

سِڪُ تُهجِي، سُپِريِن! اَندَرِ ٿِي اَجَهلَ،
ٻَرَ ڪِئو ٻاھَرِ نِڪَرٖي، کُورٖي کانئِي کَلَ،
رِءَ سِيراھِيَ سَلَ، موُن کي ڏِنا سَڄَڻٖين.

بيت - 18

سِڪَ تُهجيِ، سُپِريِن! اَنَدرِ ٿِي اَجهاڳَ،
مَنجهِين ڀَرِئا ماڳَ پَلُٽِئا پارِيُون ڪَرٖي.

بيت - 19

ڪِينۡ تَران ڪِينۡ تارِ موُن، ڪِينۡ سَگهان ڪِينۡ سَگُهہ ،
آڏو ڏيجِ مَ لَڳُ موُن ھيڪَلِيَ وَلَها!

بيت - 20

سِڪَ سِڪَنديَنِ لاہِ، وِڇوڙِئا مٖيڙِ پِرِيِن،
ايڏِي سَگَهہ، سَچا ڌَڻيِ! توھِمۡ کي جُڳاءِ،
تَنُ جَنِين جو طالِبُو مِهَر تَنِين کٖي پاءِ،
مٖيڙائٖي جو، ماءِ! ڪانگُ لَوَندو ڪَڏَھِين؟

بيت - 21

ڏِٺٖي ٿِئَمِ ڏِيهَ، ڪُهُ ڄاڻان ڪِهَڙا پِرِين؟
نٖيڻَ ڀَرجِي نِيهَ، پَلُٽِئا پارِيُون ڪَرٖي.

بيت - 22

ڏِٺي ڏِيهَ ٿِئامِ، ڪُهُ ڄاڻان ڪِهَڙا پِرِين؟
وَلِنِ جِنءَ وَرِيامِ، گُندَرَ غَمَ پِريَنِ جا.

بيت - 23

ڏِٺٖي ڏِيهَ ٿِئام، ڪُهُ ڄاڻان ڪِهَڙا پِريِن؟
سَهسٖين سِڄَ اُلَهِي، واجهائِندٖي وِئامِ،
تَنِين سالَ ٿِئامِ، جَنِين ساعَتَ نہ سَهان.

بيت - 24

گَهرُ نہ وَرُ، نَہ وَٿُ ڪا،آھِمِ مَنِّ مِهارُ،
اِنَ اوسِيڙٖي اُٿِيان، سَنجهٖي ڪَرٖي سِنگارُ،
پرِين! تُهجو پارُ، پَسان مانَ پَرِ ڪَهِمۡ.

وائي - 1

ھوئِجِ ھُشِيارِ خَبَرِدارِ، تِرڪَڻِ آھي تَڙَ ۾.
کَڏوُن، کُوٻا چِڪَ، چِڪَندِيوُن، تان
ڪِيۡن نَئِي نِهارِ،
تِرڪَڻِ آھٖي تَڙَ ۾،
آڌِيَ سٖي آکُڙَندِيُون، اَکِيوُن جَنِ ڪَپارِ،
تِرڪَڻِ آھٖي تَڙَ ۾.
موُن سو ملاحَنِ کان، تَڙَ اَڙانگا تارِ،
تِرڪَڻِ آھي تَڙَ ۾.
ھوتُ ھَلنديَنِ کَٽِئو، وِھَڻُ، مُنڌَ! وِسارِ،
تِرڪَڻِ آھٖي تَڙَ ۾.
کُهِ آتَڻُ! ٻَنِ جيڏيون! ڏيراڻِيوُن ڏئارِ!
تِرڪَڻِ آھٖي تَڙَ ۾.
پَڪو کَڻِجِ پاڻَ سٖين، پِرِين تُهجو پارِ،
تِرڪَڻِ آھٖي تَڙَ ۾.
وِيندٖي واٽاڙُئَنِ کي، پَٽِيَ ڪِيمَ پَچارِ،
تِرڪَڻِ آھٖي تَڙَ ۾.
پُندِيٖين مُهِ مِهارَ جٖي، ڏَمَ وَٽِ ڏِيهَ مَ گهارِ،
تِرڪَڻِ آھٖي تَڙَ ۾.
ساھَڙَ کي، سُڻُ، سُوھَڻِي! ٻِڇَلِ آڏِي ٻارِ،
تِرڪَڻِ آھٖي تَڙَ ۾.
تارِ تَرَندِيٖين، لُڙُ لَنگَهندِيٖين، عِشقَ جٖي آڌارِ،
تِرڪَڻِ آھٖي تَڙَ ۾.
پاندُ مَ ڇَڏِجِ پِرِيَ جو، پِهٖين جٖي پاتارِ،
تِرڪَڻِ آھٖي تَڙَ ۾.
ٿِندوءِ سَڏُ ساھَڙَ جو، توڏِي! ٿِيُ تَيارِ،
تِرڪَڻِ آھٖي تَڙَ ۾.

ابيات مُتفرقہ

بيت - 1

ساھَڙَ ڌارا سُوھَڻِي، اَڌوتِي آھٖي،
ڪُنڍِيُون جو ڪاھٖي، پاسٖي تِهِين پاڪَ ٿِيٖي.

بيت - 2

ساھَڙَ ڌارا سُوھَڻِي، نِسورِي ناپاڪَ،
نَجاسَتَ ناہِ ڪَرٖي، اُنِين جِي اوطاقَ،
ھوءِ جٖي کِيرَ پِياڪَ، پاسٖي تَنِين پاڪَ ٿِيٖي.

بيت - 3

ساھَڙَ ڌارا سُوھَڻِي، ھِيَ تان جُنبِي جوءِ،
ھِنَ پاڻِيَ سٖين پاھِجو، مُورِ نہ مَٿو ڌوءِ،
جٖي پِريَ پاسٖي ھوءِ، تہ ڪَرَ توڏِيَ تَڙُ ڪِئو.

بيت - 4

ساھَڙَ ڌارا سُوھَڻِي، ھِيَ تان جُهڪِي زالَ،
توڏِيَ تَپُ شُروُعُ ٿِئو ھَيءَ! ھِيڻَيِ جٖي حالَ،
جَڏِي رِءَ جَمالَ، اَگهِي ٿي آھُون ڪَرٖي.

بيت - 5

ساھَڙَ ڌارا سُوھَڻِي، آھٖي ۾ آزارَ،
ڏَمَ پاسٖي ۾ ڏُکَندو، صِحَتَ وَٽِ سَنگهارَ،
توڏِيَ سَندٖي تَنَ جِي، دَوا ۾ دِيدارَ،
جٖي پَسٖي مُهُ مِهارَ، تہ سِگهِيائِي سَگهِي ٿِيٖي.

بيت - 6

مَتان گِهڙٖين سُوھَڻِي! اَڄُ دَرياہ ۾ دَمُ،
ڪارِيَ راتِ ڪُنَنِ ۾، ڪِهَڙو اَٿَئِي ڪَمُ؟
مَتان جاڳٖي ڏَمُ، پُڇٖي پاڙٖي وارِيٖين.

بيت - 7

پُڇِي پاڙٖي وارِيوُن، ڪوہُ ڪَرِيندو ڏَمُ؟
ڪارِيَ راتِ ڪُنَنِ ۾، آہِ، ڪاڻِيارِنِ ڪَمُ،
ھِيُ ھَڏو ۽ چَمُ، گهورِئو مُحِبَ مِهارَ تان.

بيت - 8

ڏِيهاڻِي ڏَمَرُ ڪَرٖي، مَٿٖي مَحَبَتَ موُن،
تِه کي اَچِي تونُ، پِريَمِ! ڪوہُ نہ پَلِيٖين؟

بيت - 9

جان جان ھُئِي جِئرِي، وِرِچِي نَہ ويٺِي،
وَڃِي ڀُنۡ پٖيٺِي، سِڪَندِي کٖي سَڄَڻٖين.

بيت - 10

جان جان ھُئِي جِئرِي، ويٺِي نَہ ويٖساندِ،
لُڙھِي لَهرِنِ پاندِ، مُيائِي مِهارَ ڏٖي.

بيت - 11

وَرُ اُنداھِي راتَڙِي، چانڊوُڻِيَ چانڊا،
اورٖي مِهارا، مُهُ مَ پَسان ڪو ٻِئو!

بيت - 12

سَدا پُڇُ مَ، سُوَھڻِي! اُنداھِيَ اَڌَ راتِ،
پِريان ڏٖي پِرڀاتِ، وانءُ ڏٖيٺارٖي ڏِيهَ کي.

بيت - 13

سائِرَ ٻوڙِي سُوھَڻِي، نَہ ڍورٖي، نَہ ڍَنڍَ،
اَکِنِ مَنجِهہ اُڪَنڍَ، مُيائِي مِهارَ ڏي.

بيت - 14

ساھُڙَ سُڪِيَ ۾ ٿِئو، پاڻِيَ مَنجِهہ پُنو،
سَندو ڪَچَ ڪُنو، تارِ تَرَندو ڪيتَرو؟

بيت - 15

ساوَڻَ لَهرِيُون. ٿَرَ وارِي، تِرَ وارَ،
اِنَهائِي اَپارَ، مُون سٖين ڀَلٖي ڀالَ ڪِئا.

بيت - 16

نہ مُون ناناڻِئا کَٽِئو، نَڪِين ڏاڏاڻِئا،
پِريَنِ جٖي پارا، مُون سٖين وَڏائِي وَڙَ ٿِئا.

وائي - 1

ڪُه ڄاڻان ڪيڏاھِين؟ مُهجو تَنُ تَڻٖي تيڏاھِين،
سائِين نٖيڻٖين نِيهَڙو لَڳائٖي وِئَڙا.
جيڏاہَ عالَمَ آسَرو، مون پُڻ آھٖي اوڏاھِين،
دُنهِي دوسِتَ مِهارَ جِي، ڏِيٖي جِنءَ ڏِٺائِين،
سارٖي سُپٖيرِيَنِ کٖي، رَہَ پَرِ رَتُ رُنائِين،
دامَنَ تٖيڏِي، چَنگُلُ مٖيڏا، روزَ قِيامَتَ تائِين،
پِيرُ اَسانڏا حَضرَتُ مِيران، ڪُلَ دِي آسَ پُڄائِين.

وائي - 2

توکٖي مَڱان، جو تون آھٖيين، ٻِئو دَرُ
ڪونَ سُڃاڻان.
اِلاھِي! عِنايَتَ سٖين، نوازِيٖين نِماڻا،
اَنڌا ڪَرِيٖين اَڳَ ۾، ڪوٺائِيٖين ڪاڻا.

وائي - 3

نَهِين نَهِين مٖيڏٖي وَسِ، وو! بِنا دِلبَرَ ھِيَ دِلِ ماندِي.
سِڪان ٿي سَنگهارَ کٖي، بابِ مُهجٖي بَسِ،
مُنکٖي مَتِ مِهارَ جِي، ڪانَ اَچٖي ٻِي ڪَسِ،
دَردَ دَسِي آھِيان، دَردُ مُهِين جو دَسِ،
سُکُ نہ پُڇٖي سُوھَڻِي، ڏُکُ ڏُکِيَ کي ڏَسِ.

وائي - 4

لَڙَڪٖي لَنءُ نَہ سُڃاتو، راندِ ڀايائِين راز کٖي.
اَنڌو اُلُوھِيَتَ کان، آھٖي اِيُ اُماٿو،
صُباحَ سو نَہ شُمارَ ۾، ليٖکِئا جو اَڄُ لاٿو،
پٖيَيسِ ڪاڻِ ڪَرِيمَ سٖين، ٿِئُسِ، نِمرُودِي ناتو.

وائي - 5

وَڃٖي سا راتِ وِھاڻِي، رِءَ پَسَڻَ پِريَنِ جٖي!
ھِهَڙا اوڏا سُپِرِين، تو ڪِنء نِنڊَ رِھاڻِي؟

وائي - 6

مُهجِيُون سَڀيئِي، آيَلِ! ماءِ! مَنَ مُرادُون پُنِيوُن،
جِهَڙِي پِرِيان ڳالَڙِي، تِهَڙي ٻِي نہ ڪاءِ،
ڪِجٖي تان ڪوڏُ ٿِيٖي، سُڄٖي تان سِيباءِ،
وِہُ داتاجٖي دَرَ تٖي، شُڪرُ جِه جُڳاءِ،
ڪانِه حَدَ حَمدَ جِي، تہ ڪَرِيان لالَنَ لاءِ،
ڳَڻِئو ڳَڻِيان ڪيتَرِيوُن، وَڏِيوُن وَڏاياءِ؟
سو مُون ھَٿا نَہ ٿِيٖي، جٖيڪيِن تو جُڳاءِ،
تو سَڄِيُون، تو سَندِيوُن، سِڪَنِ توھِين ساءِ،
اُڃَ تُهجٖي اُڃِيوُن، لوچِنِ توھِين لاءِ،
دِلِ دانهُنِ رٖي نَہ رَھٖي، مُونکٖي ماٺِ جُڳاءِ.

سر سسئي آبري

داستان پھريون

بيت - 1

اَوَّلِ آخَرِ آہِ، ھَلَڻُ مُ‏هِجو ھوتَ ڏٖي،
پورهِئو سَندو پورِھيَتٖين، والِي! ڪِيمَ وِڃاءِ،
سو مُون ٿورو لاءِ، جِنْ جِئَرٖي مِلان جَتَ کي.

بيت - 2

ڏَرٖي ۽ ڏارٖي، سَٽَ سُورَنِ جٖي سَسُئِي،
پٖييائِي پُنهوُءَ ڏٖي، نِرمَلِ نِهارٖي،
لالَنَ جِي، لَطِيفُ چٖي، سُنهَ سَتِي سارٖي،
پِريَتَڻوُن پارٖي، مارَڳَ ۾ مُنڌَ مُئِي.

بيت - 3

جٖي سِجهائِي سِڪَ، تہ پُڻ سِڪٖي سَسُئِي،
پِيتائِين پُنهُوءَ سٖين، ھَڏِ نَہ ڀَڳِيَسِ ھِڪَ،
اِنَ تَڙَ مَنجها تِڪَ، ڏِنٖي پاڻَ اُڃَ ٿِيٖي.

بيت - 4

پَسِي جهاجهَہ جَمالَ جِي، جَنِين پِيتِي پِڪَ،
اَپَرِ اَڳانجهو ٿِئو سُورُ اُنِين کٖي سِڪَ ،
ھَڏِ نہ ڀَڳِيَنِ ھِڪَ، سَدا سائِرَ سِيرَ ۾.

بيت - 5

مَحَبَّتَ جَنِ جٖي مَنَ ۾، تَنِ تَشۡنَگِي تارِ،
پِي پِيالو اُڃَ جو، اُڃَ سيٖن اُڃَ اُٿِيارِ،
پُنهُو! پاڻَ پِيارِ، تہ اُڃَ سٖين اُڃَ اُجهائِيان.

بيت - 6

مَحَبَّتَ سَندو مَنَ ۾، پُرِ پِيالو جَنِ،
پِيَڻَ پَرچا ناہِ ڪو، ڪِهۡ جِهۡ ڏاہِ ڏَڀَنِ،
تِه نِهايَتَ ناہِ ڪا، جِه سُڃا سُڃَ وَڃَنِ،
تٖيلاہَ اُڃَ مَرَنِ، سَدا سائِرَ سِيرَ ۾.

بيت - 7

سَدا سائِرَ سِيرَ ۾، اَندَرَ لَهٖي نَہ اُڃَ،
پَسَڻُ جو پِرِيَ جو، سا سَڀائِي سُڃَ،
تٖيلاہَ مَرَنِ اُڃَ، سَدا سائِرَ سِيرَ ۾.

بيت - 8

ساڄَنَ ڪارَڻِ سُڃَ، مَرُ قَبُولٖي سَسُئِي،
اَندَرِ جَنِين اُڃَ، پاڻِي اُڃئو اُنِ کٖي.

بيت - 9

پاڻِيَ مَٿٖي جهُوپَڙا، مُورِکَ اُڃَ مَرَنِ،
ساھا اوڏو سُپِرِين، لوچٖي تان نَہ لَهَنِ،
دَمُ نَہ سُڃاڻَنِ، داھُون ڪَنِ مُٺَنِ جِنۡ.

بيت - 10

سَسُئِيَ ڪِينَ سَمُجِهئو، اورٖي آرِيَ ساڻُ،
ڪَرٖي پٖيکُ پُنهُوءَ سيٖن، پاڌارِيائِين پاڻُ،
ڄَٽِ وِڃايو چاڻُ، ٻانڀَڻِ ٻَروچَنِ سٖين.

بيت - 11

لَڳٖي ڪوسو واءُ، لوڪُ مِڙوئِي لَهَسِئو،
اَڀَنِ مَنجها آئِيو، ”ھَيءِ! ھَيءِ !جو ھُڳاءُ،
طُيُورَنِ تَوارِئو پُنهُوءَ پڄُاڻاءُ
رَسِئو سُورُ شَبانَ کٖي، وُحُوشَنِ وَٽاءُ،
مِرُوئَنِ مَوتُ قَبُولِئو، اَپَرِ اَفسوساءُ،
بِرَ پُڻِ ڪَنِ بُڪاءُ، اَڪَنڍِئا آرِيَ لَءِ گَهڻوُن.

بيت - 12

مَهدِ مُحتاجِي ڪَرٖي، پُٺِيَ پٖيرُ کَڻٖيجِ،
ڪُٻٖيلِياڻِي! ڪٖيچَ ڏٖي، حُجَ مَ ھَلائٖيجِ،
پاڻا ڌارَ پِريَتَڻُو، سَسُئِي! ساڻُ کَڻٖيجِ
اوڏِي عَزازِيلَ کي، ويٖجهِي تان مَ وَڃٖيجِ،
نا اُمٖيدِي نٖيجِ، تَہ اوڏِي ٿِيٖين اُمٖيدَ کي.

بيت - 13

مَهِدِ مُحتاجِي ڪَرٖي، حُجَ وِڃائٖي ھَلُ،
عُذرَ خواھِيوُن، عاجِزِيوُن، سَسُئيِ! ڪِهۡ مَ سَلُ،
ڏُنگَرُ ڏورَڻُ ڏاکَڙو، لَنءُ رِءَ ڪونِهۡ لَلُ،
اِيُ ڀَلائِيَ جو ڀَلُ، جِنۡ پاسٖي ٿِيَڻُ پاڻَ کان.

بيت - 14

وِہُ مَ، مُنڌَ! ڀَنڀورَ ۾، ھاڙيٖ ھَڏِ مَ ھَلُ،
ڪُوڙِي ڪِجِ مَ ڪَڏِھِين، سَچِي ڳالِ مَ سَلُ،
جانِبَ لءِ مَ جَلُ! سُورُ وِسارِ مَ سَسُئِي!

بيت - 15

سُکٖين ٿِيُ مَ سَنَرِي، پَسِي ڏُکَ مَ ڏَرُ،
پَٽِي ڪَرِ مَ پاھِجو، گهورِي! اَڏِ مَ گَهرُ،
مارِي! ھَڏِ مَ مَرُ، مَڇُڻِ جِيُ جِيارِئٖين.

بيت - 16

سُکين ٿِيٖي نَہ سَنَرِي، ڏُکٖين تان نہ ڏَرٖي،
اورٖي ھَڏِ نہ اُڀِيٖي، پُرٖي تان نَہ پَرٖي،
سَرَتِيوُن! ٿو نہ سَرٖي، ٻِنِين رِءَ ٻانڀَڻِ کي.

وائي - 1

تَنَ مَنَ مَنجهِہ تَوارَ، ھو! يارَ! سَدا آھٖي سِڪَ جِي،
تِنءَ چِڻِڪَنِ چِتَ ۾، جِنءَ سا گَهنڊِيَ لارَ،
ھو! يارَ! سَدا آھٖي سِڪَ جِي.
لَڳِي اُڃَ اَکِيَنِ کي، سِگهو موٽُ سَتّارَ!
ھو! يارَ! سَدا آھٖي سِڪَ جِي.
پَسان ڪِينَ پِريَتَڻوُن، ڪاڏٖي پِرتِ پَچارَ؟
ھو! يارَ! سَدا آھٖي سِڪَ جِي،
بَندِياڻِي ڀَنڀورَ ۾، آھِيان اَھِئا ڌارَ،
ھو! يارَ! سَدا آھٖي سِڪَ جِي.
مُنکي ڇَڏِ مَ ڇَپَرٖين، آرِياڻِي! آڌارَ!،
ھو! يارَ! سَدا آھٖي سِڪَ جِي.
ڏِيان خٖيزُ خِزانَ ۾، بٖي ٿو مَنجِهِہ بَهارَ،
ھو! يارَ! سَدا آھٖي سِڪَ جِي.
مُضِرَّ تان مُون کي ڪِئا، حَڪِيمَنِ ھَزارَ،
ھو! يارَ! سَدا آھٖي سِڪَ جِي.
دَوا آھِيٖين دِلِ جي، وارو! واقِفَ ڪارَ!
ھو! يارَ! سَدا آھٖي سِڪَ جِي.
اڻٖي ڏيٖ عَلِيلَ کي، مَعجُونُون، موچارَ!
ھو! يارَ! سَدا آھٖي سِڪَ جِي.
آھٖي عَبدُاللّطِيفَ کي، تُهجِي پِيَّ! پَچارَ،
ھو! يارَ! سَدا آھٖي سِڪَ جِي.

داستان ٻيون

بيت - 1

پَسيِ ڏُنگَرَ، ڏاہِ! جِمَ ھَلَڻَ ۾ ھِيڻيِ وَھٖين،
لانچٖي لَڪَ، لَطِيفُ چٖي، پُٺِيَ ڪٖيچِيَنِ ڪاہِ،
پُڇِي پُورِجِ، سَسُئِي! بَلوچاڻيِ باہِ،
اِنَ وَڙائِتٖي وَرَ جِي، آسَرَ ھَڏِ مَ لاہِ،
جو اَکِنِئُون اوڏو آہِ، سو پِرِين پَراھوُن مَ چَهو.

بيت - 2

ھِتاء کَڻِي ھُتِ، جَنِ رَکِئو سٖي رَسِيوُن،
ساڄَنُ سوُنهَ، سُرِتِ، وِکائِي ويجهو گَهڻوُن.

بيت - 3

جِڪُسِ يادِ ڪِئاسِ، وَرَ وَڃِي وَڻِڪارَ ۾،
جَلدُ جَرِيدِي پَنڌَ ۾، اَدِيوُن! اَڄُ ٿِئاسِ،
وَڃِي ڪٖيچِ پُنِياسِ، ٻاروچاڻِيَ ٻاجَهہ سٖين.

بيت - 4

واقِفِ نَہ وَڻِڪارَ جِي، بارِي سُڄَنِ بَرَ،
وَرُ، وَسِيلا! سُپِرِين! ٿَڪِيَسِ ڏورٖي ٿَرَ،
لَهجِ، لَعۡلُ لَطِيفُ چٖي، ڪاندَ! مُيَ جيِ ڪَرَ،
وِلَهِي ڪَرٖي، وَرَ! مَڇُڻِ مارَڳِ ڇَڏِيٖين.

بيت - 5

واقِفِ نَہ وَڻِڪارَ جِي، اَڳَ نَہ ڏٖيهُ ڏِٺومِ،
ڏۡنگَرَ ڏوراپَنِ سٖين، ڪاتِيَ رِءَ ڪُٺومِ،
جٖيلاہَ مُحِبُ مِٺومِ، تٖي ڇُلُون ڪَرِيان ڇَپَريٖن.

بيت - 6

واقِفِ نَہ وَڻِڪارَ جِي، پاڻَيَ کَنيُمِ نہ پاءُ،
جَبَلُ جَلدايُون ڪَرٖي، تِکَ ڏيکارٖي تاءُ،
لَڳٖي لُڪَ، لَطِيفُ چٖي، مَعذُورِنِ مَٿاءُ،
اُتٖي اوڏو آءُ، جِتِ ھوتَ! ھٖيڪَلِي آھِيان.

بيت - 7

واقِفِ نَہ وڻِڪارَ جِي، جِتِ جَبَلُ جوراڻوُن،
اُتٖي عَبدُاللَّطِيفُ چٖي، سُڄٖي سَفَرُ سَٽاڻُون،
پِهروئِي پاڻوُن، سَوَلو، ڪَرِييٖن ساٿَ جو.

بيت - 8

وَڏا وَڻَ وڻِڪارَ جا، جِتِ جائُو، جَمُرَ، جَرَ،
ڪوسا تَپَنِ ڪَڪِرا، ٻِي دَمِدَمِ تَپٖي ڌَرَ،
ويچارِي ڏٖي وَرَ، پيرُ نہ لَهٖي پِرِيَ جو.

بيت - 9

وَڏا وَڻَ وَڻِڪارَ جا، جِتِ نانگَ سُڄَنِ نِيلا،
اُتٖي عَبدُاللَّطِيفُ چٖي، ڪِئا ھيڪَلِيَنِ حِيلا،
جِتِ ڪُڙمَ نہ قَبيِلا، اُتِ رَسِجِ، رَھبَرَ! راہَ ۾.

بيت - 10

ويچارِيَ وَڻِڪارُ، اَڳَ نَہ ڏِٺو ڪَڏِھِين،
مِهرَ نَہ ھُئِي ماڙُھٖين، ھو سَڀُ ھِندوڪارُ،
جَتُ ڪِئائِين يارُ، سُورَنِ ڪارَڻِ، سَرَتِيوُن!

وائي - 1

ھو جٖي ھَلِئا ھوتَ سُنهارا،
مُون نَہ وَھِيڻا پُنهُوءَ سَڱِيڻا.
سَسُئِي پُڇٖي ساٿَ جا، اوطاقُون اوتارا،
مُون نَہ وَھِيڻا پُنهوءَ سَڱيِڻا.
آن ڪٖي وِيندا گَڏِئا؟ آرِياڻِي اِہَ پارا،
موُن نَہ وَھِيڻا پُنهُوءَ سَڱيِڻا.
ٽَلِيُون ٽَؤنرَ، ھَلَوِيُون مَيَنِ سِرَ موچارا،
موُن نَہ وَھِيڻا پُنهُوءَ سَڱيِڻا.
مُون کي نِيندا پاڻَ سٖين، ڪامِلَ ڪُرَ اُجارا،
موُن نَہ وَھِيڻا پُنهوُءَ سَڱيِڻا.
اَدِيوُن! عَبدُاللّطِيفُ چٖي، دوسَ آيا دِلِدارا،
مُون نَہ وَھِيڻا پُنهُوءَ سَڱيِڻا.

داستان ٽيون

بيت - 1

پُنهون ڇَڏِئو پوءِ، جانِبُ جَبَلِ ڳولِيٖين،
تٖيلاھِين تَنگُون ڪَرِيٖين، جيلاھِين توُن جوءِ،
ساڄَنُ سُڃَ نِهارِيٖين، ڏُکِي! ڏوہُ ڪِئوءِ
ھاڙٖي ھوتُ نہ ھوءِ، وَرِي پُچُ وٖيٺِيَنِ کٖي.

بيت - 2

وَرِي پُڇُ ويٺِيَنِ کٖي، سَندا پُنهُوءَ پارَ، ساڄَنُ سَڀَ ڄَمارَ، ڏُکِي! ڏورِجِ ڏِيلَ ۾.

بيت - 3

ڪونِهۡ اُتِ ڪوھِيارُ، جِتِ تو، ڀورِي! ڀائِيو،
پَنڌُ مَ ڪَرِ پَهاڙَ ڏٖي، وُجُودُئِي وَڻِڪارُ،
ڌارِئا ڀائِجِ ڌارَ، پُڇُ پِرِيان ڪَرَ پاڻُ تُون.

بيت - 4

سَڀَئيِ سارٖي، سَسُئِي! گَهَرڪُنڊُون تُون گهورِ،
وَڃِي ڏُورِ مَ ڏورِ، دَرا مَنجِهہ دوسِتُ ٿِئو.

بيت - 5

دَرا مَنجهِہ دوسِتُ ٿِئو، موٽِي پُڇُ پاھِين،
عَبَثُ اَڳاھِين وَڃِئو ڪُوڪٖين ڪاندَ کي.

بيت - 6

پَرَ گَهرا پاسو ڪَرٖي، پُڇُ پِرِيان ڪَرَ پاڻُ،
سو تان توھِين ساڻُ، جِه لَءِ جَفائُون ڪَريٖن.

بيت - 7

سوئِي کَڻِئو ساڻُ، سوئِي ڏورِيٖين، سَسُئِي!
ڪَڏِہ ڪَنِين نَہ ڪِئو، ڄُلَڻَ مَنجها ڄاڻُ،
پُڇُ پِرِيان ڪَرَ پاڻُ، تہ توُن تِئائِين لهَيٖن.

بيت - 8

جو تُون ڏورِيٖن ڏوُرِ، سو سَدا آھٖي ساڻُ تو،
لالَن لَءِ، لَطِيف چٖي، مَنجهِي ٿِيُ، مَعذُورِ!
مَنجها پَنءَ پَروڙِ، تو مَنجِهہ آھِسِ تَڪِيو.

بيت - 9

وَڃٖين ڇو وَڻِڪارِ؟ ھِتِ نہ ڳولِيٖين ھوتَ کي؟
لِڪو ڪِينَ، لَطڀيفُ چٖي، ٻاروچو ٻٖي پارِ،
ٿِيُ سَتِي، ٻَڏُ سَندِرو، پِرتِ پُنهُوءَ سٖين پارِ،
ناٺِي نٖيڻَ نِهارِ، تو ۾ ديٖرو دوستَ جو

بيت - 10

ڪُوڙِيُون پُڇَنِ ڪيٖچُ، ھوتُ نہ پُڇَنِ ھِتَهِمۡ،
جَنِ پُنهُوءَ سيٖن پيٖچُ، تَنِ پيرٖن پَنڌُ وِسارِئو

بيت - 11

ھَلُ ھِيٖين سٖين ھوتَ ڏٖي، پيريٖن پَنڌُ وِسارِ،
قاصِيداڻِي ڪارِ، ڪِينَ رَساڻٖي ڪيچَ کٖي.

بيت - 12

ھَلُ ھِيٖين سٖين ھوتَ ڏٖي، پيريٖن ڪَرِ مَ پَنڌُ،
رائٖي پُڇُ مَ رَندُ، رِڙُھہ، رُوحانِي سَسُئِي!

بيت - 13

ھَلُ ھِيٖين سٖين ھوتَ ڏٖي، ڇَپَرِ ھَڏِ مَ ڇُلُ،
آرِياڻِي اَمُلُ، ڪايا ۾ ڪاندُ ٿِئو.

بيت - 14

ھَلُ ھِيٖين سٖين ھوتَ ڏٖي، ڇَپَرِ ڇُلُ مَ توُن،
مَنجها لَڌو مُون، ڪوھِيارو ڪيچَ ڌَڻِي،

بيت - 15

ھَلُ ھِيٖين سٖين ھوتَ ڏٖي، سِسِي کَڻُ مَ ساڻُ،
جَنِين ڀائِيو پاڻُ، سي آرِياڻِئا اورٖي رَھِيوُن.

بيت - 16

ڪِجٖي پَنڌُ، پُڇان تو، ڪيچَِينِ ڪَارڻِ ڪِينءَ؟
بيخُود ھَلِجِ بَرَ ۾، آئوُن تو چُئان اِينءَ
سِڪَڻُ ساڄَنَ سِينءَ، مَتان، مُٺِي! ڇَڏِيٖين.

بيت - 17

مَتان مُٺِي! ڇَڏِيٖين، پِريَتَڻُون پاڻا،
ڄاپَنِ جِنءَ ڄاڻا، تون پُڻِ ھوئِجِ تَنِ جِنۡ.

بيت - 18

مَتان، مُٺِي! ڇَڏِيٖين، پاڻا پِريَتَڻوُن،
کَٿُورِيَ ڪَڻُون، مَڙھٖي مَڙھِجِ مُهَ ۾.

وائي - 1

غَفلَتَ يارُ گَنوايو، ٻَڙِي! جيڏِيوُن!
ڪِنءَ ڪَرِيان آئوُن! ڪُهُ ٿِئو؟
سُتِيَسِ تان ساٿُ وِئو، اُٿِيَسِ تان ڏُکُ آئِيو،
ڪِنءَ ڪَرِيان آئوُن! ڪُهُ ٿِئو؟
پُڇان پوءِ پنُهُوءَ کي، عَبَثُ تان اَنُ کائِيو،
ڪِنءَ ڪَرِيان آئُون! ڪُهُ ٿِئو؟
ھوتَ ھَلندٖي جا ڪِئيِ، سا مُون ڳالِ سُڻائِيو،
ڪِنءَ ڪَرِيان آئُون! ڪُهُ ٿِئو؟

داستان چوٿون

بيت - 1

ھٖيجُ نہ ھُندو جَنِ، سٖي ڪِنءَ وِندُرِ وِيندِيُون؟
وِھو وِچِ رَھَنِ، سَهسٖين سَڌُنِ وارِيُون.

بيت - 2

سَڌائِتيِ سَڀَڪا، بُکَ نہ باسٖي ڪا،
جٖيهِيَ تٖيهِيَ ذاتِ جِي، جُنبَشِ ڪانِه جا،
مُون سٖين ھَلٖي سا، جا جِيُّ مِٺو نَہ ڪَريٖ.

بيت - 3

ڪيچِ نَہ جُنبَڻَ جاءِ، تَہ ڪا ھَلٖي ھوتَ ڏٖي،
مُون سٖين ھَلٖي ساءِ، جا جِيُّ مِٺو نَہ ڪَرٖي.

بيت - 4

آتَڻَ ۾ پِرِياڻُ، ھو سَڀَنِين جيڏِيٖين،
مُون سَڀاڳِيَ ساڻُ، ڪيرَ ڇُلَندِي ڇَپَريٖن؟

بيت - 5

سُکَنِ وارِي سَڌَ، مَتان ڪا مُون سٖين ڪَريٖ،
اَندَرُ جَنِين اَڌَ، ڏُنگَرَ سٖي ڏورِيندِيُون.

بيت - 6

ڏُنگَرَ نَہ ڏورٖي، سِڪَڻَ جِيوُن سَڌوُن ڪَرٖي.
ويٺِي گَهرِ گهورٖي، مَٿاء پِرِيَنِ ڄِندَڙو.

بيت - 7

وَرٖيتِيوُن! وَرو، آئوُن نَہ وَرَندِي وَرَ رٖي.
جاڏٖي ھِنَ جَبَلَ جو، تانگهِيندِيَسِ تَرو،
جَتَنِ ساڻُ ذَرو، نِيهُ نِبيرَڻُ نہ ٿِيٖي.

بيت - 8

وَڃو سَڀِ وَرِي، اَئِين جٖي وَرَنِ وارِيوُن،
ڦوڙائٖي فِراقَ جِي، سُڄٖي ڳالِ ڳَرِي،
ٻُنڀا جَنِ ٻَرِي، ڏُنگَرَ سٖي ڏورِيندِيوُن.

بيت - 9

وَڃو سَڀِ موٽِي، اَئِين جٖي وَرَنِ وارِيوُن.
ڪانَ ھَلندِي ڪيچَ ڏٖي، ڪَرِھو مَ کوٽِي.
ڪَڍِيَمِ ڪاڇوٽِي، وِڌُمِ جوڳُ جَتَنِ لَءِ.

بيت - 10

اَڄُ مَلِيندِيَسِ، ماءِ! ڌاڄا ڪَندِيَسِ ڪَپِڙا،
جِيجا! جوڳِياڻِي ٿِيان، مُونکي جَهلَ مَ پاءِ،
ھوتَ ٻَروچٖي، لاءِ ڪَنٖين ڪُنِرَ پائِيان.

بيت - 11

عِناتا! اُتاھِين، جانِي جَڙٖي ٻَنڌُ،
آھٖي گَهڻوُن اَھُکو، فَقِيرِيَ جو فَندُ،
چَکٖين تَہ چَرِئو ٿِيٖين، مَيخانٖي جو مَندُ،
ڪِينَ ڪَڍِبو ڪَنڌُ، مَنجها سَڱَ سَيّدُ چٖي.

بيت - 12

موُن کي ڀانئِي ڀاڄَ، ڏٖيرَ ڏُوُراڻا ھَلِئا،
اَڳِئا اُٿِي اُنِ جٖي، خُوبُ نہ پَڪَمِ کاڄَ!
ميٖڙيٖ آپَ سَرَتِيِوُن، نَڪٖي ڳايَمِ ڳاڄَ،
سامُون ھَٿا نَہ ٿِيٖي، جيڪا رَسَمَ راڄَ،
آيَلِ! آئوُن اَڪاڄَ، ٻولُ ٻَروچٖي وِتَرو.

بيت - 13

تو جو ٻولُ، ٻَروچَ! ويهِي ڪِئو وَڻِڪارَ ۾،
سوئِي پارِجِ، ھوتَ! وِلَهِيَ مُون مَعذُورِ سٖين.

بيت - 14

پِهرِين تُون پارٖيجِ، پارَڻُ پوءِ پُنهوُءَ تٖي،
ٻولُ مَ وِساريٖجِ، ھو جوڪِيوءِ ھوتَ سٖين.

بيت - 15

تو سٖين ٻولَ ٻَهُون، سَهَسٖين ساڄَنُ جٖي ڪَرٖي،
ڪَندِيٖين تو ڪَهوُن، جٖي نالو ڳِيَڙُءِ نِيهَ جو.

بيت - 16

سُڻِي ٻولَ سَندانِ، جِمَ سُمَهٖين،
سَسُئِي!
ڪَندِيٖين ڪُهُ ڪٖيڻانِ؟ جُہ سٖي اُنِ اورانگهِئا.

بيت - 17

سِڄَ اُلَٿٖي سَسُئِي، رَتَ وَرَڻو روءِ،
پَهِي نہ پانڌِي ڪو، جِه ڪَرَ پُڇٖي لوءِ،
مُوڙھِي وَڃٖي توءِ، موٽَڻَ جِي ڪانَ ڪَرٖي.

بيت - 18

ڇُلان مَنجِهمِ نَہ ڇاڪَـ؛ پُران، پُونِم پُرڪَڻا.
مَتان ڪا مُنڌَ ڪَرٖي، موٽَڻَ جِي مَزاڪَ،
چِتُ سَندو مُون چاڪَ، ھاڙٖي ھَڏِ ھڻِي ڪِئو.

بيت - 19

پيرٖين پِيَمِ پُرڪَڻا، رَہَ ۾ گَهڻوُن رُنومِ،
پاراتو پِريَنِ کٖي، تَپِي تان نَہ ڏِنومِ
چُڪِي، تٖي چَيومِ، ”سُواھَرُو“ سَڄَڻٖين.

بيت - 20

چُڪِيَ کي چَئِي، ڪا جاڳائٖي، جيڏِيُون!
وِيَڙو ساٿُ وَھِي، تو نِنڊائِي نَہ لَهٖي.

بيت - 21

چُڪَسِ سَڀِ چَئِي، ماڙھُو شَهرَ ڀَنڀورَ جا،
سا موٽٖي ڪِينءَ مُئِي؟ جِه جو جانِبُ جَتَ وَٺِي وِئا.

بيت - 22

موٽَڻَ جا مَذڪوُرَ، جان ڪٖي چَيَسِ جيڏِيٖين،
پِرِيَٽِ پِهرٖي پوُرَ، نٖيئِي پَهُچائِي پُنهُوءَ کي.

بيت - 23

موٽَڻَ جي مَصۡلِحَتَ، مُون کي ڏِھو مَ، جيڏِيُون!
نِهارِيندِيَسِ نِڪَريِ، آرِياڻِي اَلبَتَّ،
ڪَندِيَسِ اوٽَ عَيبَ جِي، لَڪَنِ ڏيئِي لَتَ،
سَرَتِيُون! شَرِيڪَتَ، آئوُن ڪِنءَ آگَنِ سيٖن ڪَريان؟

بيت - 24

موٽِي مَران مَ، ماءِ! موٽَڻَ کان اَڳٖي مَران!
لُڇِي لالَنَ لاءِ، شالَ پُدِيَسِ پٖيَر تٖي!

وائي - 1

مَعلوُمُ حالُ، حَبِيبَ! موُن کٖي دَردُ قَدِيمِي، وو!
دَردُ جَدِيدِي حُبَّ حَبِيبِي،
آلُودِي آزارَ کان، تورِءِ ٿِيَسِ، طبيبَ!
دَردُ جَدِيدِي حُبَّ حَبِيبِي.
شادِي ڏِيٖين صِحَتَ جِي، غَمِي لاہِ، غَرِيبَ!
دَردُ جَدِيدِي حُبَّ حَبِيبِي.
آھِئا ٿِي آھُون ڪَرِيان؛ نَعرو مَنجهِہ نَصِيبَ!
دَردُ جَدِيدِي حُبَّ حَبِيبِي.
ڪاھِلِ آھِيان ڪُوَڙِي؛ رَسِي لاہِ، رَقِيبَ!
دَردُ جدِيدِي حُبَّ حَبِيبِي.
حاذِقُ آھِيٖين ھِنَ جو، اَچٖين شالَ، عَجيبَ!
دَردُ جَدِيدِي حُبَّ حَبِيبِي.
دَوا آھِيٖين دِلِ جِي، پُڇِ پُڇِ رَھيَسِ طَبِيبَ،
دَردُ جَدِيدِي حُبَّ حَبِيبِي.
اَلا! عَبدُاللّطيِفَ کٖي، ڪوڙٖي لاءِ قَرِيبَ!
دَردُ جَدِيدِي حُبَّ حَبِيبِي.

داستان پنجون

بيت - 1

ڀَڄِي جان ڀَنڀورَ کان، ڏُنگَرُ ڏورِئو موُن.
ڪاھٖي رَسِيَسِ ڪيچَ کي، جِتٖي پاڻَ پُنهوُ،
سَڀَتِ آھِيٖين تُون، قَضا ڪَندِہ ڪَنِ سٖين؟

بيت - 2

پٖيهِي جان پاڻَ ۾، ڪِيَمِ رُوحَ رِھاڻِ،
تہ نَڪو ڏُنگَرُ ڏٖيهَ ۾، نَڪا ڪيچِيَنِ ڪاڻِ،
پُنهُو ٿِيَسِ پاڻِ، سَسُئِي، تان سُورَ ھُئا.

بيت - 3

ڏِنا جِيَڻَ لَءِ، جيڏِيوُن! ڏيَرنِ مُون کي ڏُکَ،
ڀڳَيسِ جان ڀَنڀورَ کان، تان سُورَ مِڙيٖئيِ سُکَ،
لَٿِي موُن تان لُکَ، پُنهُو ٿِيَسِ پاڻِهِين.

بيت - 4

پُنهُو ٿِيَسِ پاڻِهِين، وِئو سَسُئِيَ جو شَرَمُ،
ھيڪَلِيوُن ھَلَنِ جٖي، ڀَڄِي تَنِ ڀَرَمُ،
جو وِندُرَ ۾ وَرَمُ، سو سوَدو سَرِئُسِ ھِتَهِين.

بيت - 5

پُنهوُ ٿِيَسِ پاڻِهيِن، وِئو سَسُئِيَ جو سِنگارُ،
مَنۡ عَرَفَ نَفۡسَهٗ، فَقَدۡ عَرَفَ رَبَّهٗ، اِھوئِي آچارُ،
جو وِندُرَ ۾ واپارُ، سو سَودو سَرِئُسِ ھِتَهِين.

بيت - 6

پُنهوُن ٿِيَسِ پاڻِهِين، ويئِي سَسُئِيَ جِي سُونهَ،
خَلَقَ آدَمَ عَليٰ صُوۡرَتِهٖ، اِيَ وَڻَنِ مَنجهِہ وِروُنهَ،
چَرِيَ مَنجها چُونهَ، کَڻِي ھوتُ ھَنجِ ڪِئو.

بيت - 7

ويئِي سُونهَ سَسُئِيَ جِي، پُنهوُ ٿِيَس پاڻَ،
سَڀَنِ جِي، سَيِّدُ چٖي، آھٖي اُتِ اُماڻَ،
ڀَنڀورَ جا ڀاڻَ، آڏا عَجِيبَنِ کي.

بيت - 8

وَھمَ وِرساياسِ، ناتَ پُنهوُ آئوُن پاڻَ ھُئِي،
پاڻُ وِڃايُمِ پاھِجو، پَئِي پِريان جٖي پاسِ،
رَتِي عِلَم نہ راسِ، ڌارا پَسَڻَ پِرِيَ جٖي.

بيت - 8

وَھمَ وِرساياسِ، ناتَ پُنهوُ آئوُن پاڻَ ھُئِي،
پاڻُ وِڃايُمِ پاھِجو، پَئِي پِريان جٖي پاسِ،
رَتِي عِلَم نہ راسِ، ڌارا پَسَڻَ پِرِيَ جٖي.

بيت - 8

وَھمَ وِرساياسِ، ناتَ پُنهوُ آئوُن پاڻَ ھُئِي،
پاڻُ وِڃايُمِ پاھِجو، پَئِي پِريان جٖي پاسِ،
رَتِي عِلَم نہ راسِ، ڌارا پَسَڻَ پِرِيَ جٖي.

بيت - 9

قافَئوُن ڪاھِيندِياسِ، موٽان، تان ڪُرَ مِيهَڻُون،
ٻانهِي ٻاروچَنِ جِي، سَڱُ نہ ساھِيندِياسِ،
اَلۡفِراقُ اَشَدُّ مِنَ الۡمَوتِ، ھِتي نَہ ھُوندِياسِ،
آہَ نہ لاھِيندِياسِ، جِيَرٖي جَتُ ڏسِي مَران!

بيت - 10

جِيَڻُ جَتَ ڌارا، مَعذوُرِ جو مَسَ ٿِيٖي!
چانگَنِ سِرِ چَڙھِي وِئا، ساٿِي سَوارا
اَکِيون اوتارا، پَسِئو رُونِ پُنهوُءَ جا.

بيت - 11

ھيڪَرَ ھُئَڻُ ڇَڏِ، تہ اوڏِي ٿِيٖين عَجِيبَ کي،
مَارَ اَيۡتُ شَيۡئاً اِلاَّ وَرَاۡيۡتُ اللھَ، نٖيئِي اَجها اوڏاھِين اَڏِ،
تَہ ھوتُ توھِين کان ھَڏِ پِرِين پاسٖي نَہ ٿِيٖي.

بيت - 12

ھوتُ تُھجٖي ھَنجَ ۾، پُڇٖين ڪوہُ پَهِي؟
وَفِي اَنفُسۡڪُمۡ، اَفَلاَ تُبۡصِرُوۡنَ، سوجٖهي ڪَرِ سَهِي،
ڪَڏِہ ڪا نَہ وَھِي، ھوتُ ڳولَڻَ ھَٽَ تي.

بيت - 13

ھوتُ تُھجٖي ھَنجَ ۾، پُڇٖين ڪُه پَرِياڻُ،
وَنَحۡنُ اَقۡرَبُ اِلَيۡهِ مِنۡ حَبۡلِ الۡوَرِيۡدِ، تُھجو توھِين ساڻُ،
پَھِجو آھٖي پاڻُ، آڏو عَجِيبَنِ کي.

بيت - 14

وَوڙِئَمِ سَڀِ وَٿاڻَ، يارَ ڪارَڻِ جَتَ جٖي،
اَللھُ بِڪُلِّ شَيۡءِ مُحِيطُ، اِيۡ آرِياڻِيَ اُھڃاڻَ،
سَڀَ ۾ پُنهُو پاڻَ، ڪِينِهۡ ٻِئو ٻَروچَ رٖي.

بيت - 15

ڄاڻِي سُڃاڻِي، وِھان ڪِنءَ ماٺِ ڪَريٖ؟
اَندَرِ آڳِ عِشقَ جي، اَپَرِ اُڏاڻِي،
اَلۡعِشۡقُ نارٌ اللھِ الۡمُوقَدِة، کُورٖي جِنءَ کاڻِي،
آھٖي آرِياڻِي، ٻِئو، سَرَتِيوُن! سُڄٖي ڪِينَ ڪِينۡ.

بيت - 16

سَرَتِيوُن! سَڀوئِي ٿِئو، اَندَرِ آرِياڻِي،
ويٺِي پَسان پاڻَ ۾، ڏُنگَرُ ڏِيهاڻِي،
ھُيَسِ ھوتَنِ ھاڻِي، تٖي ڪٖيچِي گَڏِيَمِ ڪَهَ ۾.

بيت - 17

ڪَڍَ پُنهُوءَ ڏٖي ڪاھٖي، چاٽِيَ رُوحُ چَرِئو ڪِئو،
اُٿٖي وٖيٺٖي اوڏَھِين، سُتٖي پُڻِ ساھٖي،
اَلۡعِشقُ حِجابٌّ بَينَ الۡعَاشِقِ وَالۡمَعۡشوُقِ لاشَڪُ ٿِيُ لاھٖي،
آرِياڻِي آھٖي؛ ٻِئو، سَرَتِيون! سُڄٖي ڪِينَ ڪِين.

بيت - 18

ڀينَرُ! آئوُن ڀورِي ، مُون سَڱُ سُڃاڻِي نَہ ڪِئو،
ڏِيندا مُون ڏيرَ وِئا، جهِڄَڻُ ۽ جهورِي،
لَڳِي جَنِ لورِي، ڏُنگَرُ سٖي ڏورِيندِيوُن.

بيت - 19

اَدِيُون! آئوُن اَڄاڻِ، مُون سَڱُ سُڃاڻِي نَہ ڪِئو،
ھُندَ نَہ سَٺِيَمِ ھيتَرِي، ڪوھِيارٖي جِي ڪاڻِ،
رَتِيَ جِيَ رِھاڻِ، جِيُ اَڙايُمِ جَتَ سٖين.

وائي - 1

اَھُکِيَ آڳَهُ آھي، وو! آھي؛
مُنکٖي تان نَہ ڇَڏِيندو تِکَ ۾.
پُڇٖي پوءِ پِئَنِ کي، لَڪَنِ ۾ لَڏَ لاھٖي،
مُنکٖي تان نَہ ڇَڏِيندو تِکَ ۾.
آرِي اُگهاڙَنِ کي، پُنهوُ ڄامُ پَراھٖي،
مُنکٖي تان نَہ ڇَڏيِندو تِکَ ۾.

داستان ڇھون

بيت - 1

جَڏائِيَ جو جامُ، ڏِنائوُن ڏُکِيَ کي،
مَنگَلُ مُهجٖي مَنَ ۾، ٻارِئو ھوتَ حَمامُ،
اَرَکِ ٿِئو آرامُ، ڪاڪُلُ پَسِي ڪاندَ جو.

بيت - 2

دَردُ نَہ لَهٖي دارُئٖين، زُلفَ زورُ ڏِنومِ،
ڪاڪُلُ ڪالَ ڏِٺومِ، رُخسارٖي تٖي رُوپَ سٖين.

بيت - 3

ڀَنڀو جو ڀَنڀورَ ۾، ڪاڪُلُ ڏِٺُمِ ڪالَ،
ھَيءِ تَنِين جٖي حالَ، زُلفَ جٖي رفُ ڪِيُون.

بيت - 4

پَرِيندِہۡ پاڻُ وِئو، زُلفَ ڪِيَسِ زافُ،
سَندو ڪاڪُلَ ڪافُ، مارٖي مَعذُورِنِ کي.

بيت - 5

ھاڻِ نَہ جِيان، جيڏِيُون! زُلفَ زافُ ڪِياسِ،
ڪاڪُلَ آئُون ڪُٺِياسِ، ڀَنڀو ڀَنڀورَ ۾.

بيت - 6

ڪاڪُلَ ڪُٺيِ جا، ڪَفَنُ تِه ڪِينَ ٿِيٖي،
مَنجِهہ شَهادَتَ سا، لُڏٖي ۽ لاڏَ ڪَرٖي.

بيت - 7

ڏَکا، ڏُنگَرَ ڄامَ! مَ ڪَرِ مَعذُورِنِ تٖي،
توتٖي لَڄَ لَطِيفُ چٖي، آھٖي سَندِي عامَ،
مارِ مَ، چَئِي مَعذُورِ کي، وَھِيان ڪاندَ ڪَلامَ،
پَرچِجِ پِيادِنِ سٖين، اَللھَ لَڳِ، عَلامَ!
جا نَوازِي اَھِجٖي نامَ، سا، ھوتَ! مَ ڇَڏِجِ ھيڪَلِي.

بيت - 8

ڏَمَرَ، ڏُنگَرَ جامَ! سَکَرَ، پاڻَ شَرِيڪَ سٖين،
ڪٖيهِي ڪُلفَتَ تِه سٖين؟ جا گولِي اَھِجٖي گامَ،
وَرِجِ توُن، وَرِيامَ! مُهجو اَچَڻُ آن ڳَرٖي.

بيت - 9

ڏَکا ڏُنگَرَ! لاہِ؛ آئُون اَڳَ مُئِي آھِيان،
آرِياڻِيَ سٖين آہِ، ذاتِي سَڱُ ضَعِيفِ جو.

بيت - 10

پيرَ پَٽائِين ڪُئۡنَرا، ڏُنگَرَ مَٿٖي ڏٖي،
ڦَٽِئا ڦَڻَ فَقِيرِ جا، سِيرُون ٿِئَڙا سٖي،
جِهَڙيٖ تِهَڙٖي حالَ سٖين، پُرٖي پُنهوُءَ ڏٖي،
وَڃٖي، مانَ وَرٖي، ٻانِهيَ ٻَنڌَڻُ جِ‏ه سٖين.

بيت - 11

پيرَ پَٽائِين ڪُنۡئَرا، ڏُنگَرَ مَٿٖي ڏٖي،
پاڻُ نَہ پَسٖي ڦَٽِئو، ڪَڙَھٖي ڪيچِيَنِ کٖي.
ھاڙو ھوتَ پَرٖي، ڪُه ڄاڻان، ڪِنءَ لَنگِهئا؟

وائي - 1

موُن اَنڌِيَ ڏٖي اِيندا،
ھوتَ سلامَتَ سُپِرِين.
پَلَءِ لائي پاھِجٖي، نِيَّ کٖي اُتِ نِيندا،
ھوتَ سَلامَتَ سُپِرِين.
سَڱُ نَہ ڪَندا سُکَ سٖين، سُورَ سَڱيِڻا ٿِيندا،
ھوتَ سَلامَتَ سُپِرِين.
رَکِي ڳَلُ ڳَلَنِ تٖي، نِيهَ نِياپو ڏيِندا،
ھوتَ سَلامَتَ سُپِرِين.
پَرِيَٽِ نِيندا پاڻَ سٖين، ڇورِي تان نَہ ڇَڏِيندا،
ھوتَ سَلامَتَ سُپِرِين.

داستان ستون

بيت - 1

ڏُورِ مَ ڏيٖهِ وِئو، پيرُ تُهجٖي پِريَ جو،
وِھَڻُ واٽَڙِيَنِ تٖي، ڪيچِنِ رِءَ ڪِهو؟
وِندُرِ جو وِئو، سو اَللھَ! وارٖي آڻِيٖين!

بيت - 2

وِندُرِ جٖي وَڃَن، سٖي مَرُ ٻَنڌَنِ سَندِرا،
ٻِيُون ڪوہُ ٻَنڌَنِ؟ ڇوڙٖي جٖي ڇَڏِيندِيُون

بيت - 3

ڏٖيهُ ڏيٖهائِين ڏوُرِ، پَرَ ڏٖيها پَرٖي ٿِئا،
سٖيڻَنِ ڪارَڻِ سَسُئِي، پيئِي پَراھيٖن پُورِ،
توُن وَڃٖين، ھوتَ! حُضوُرِ، مُهجو جِيَڻُ جٖيلاھِين ٿِيٖي.

بيت - 4

ھٖيڪاندِيَ ھوئِي، اُٿِي راتِ رَوان ٿِئا،
ساہُ سَڳٖي ۾ سُورَ جٖي، پُنهُو وِئو پوئِي
رَہُ، قَضا! دَمُ ڪوئِي؛ تہ ھيڪَرَ ھيڪاندِي ٿِيان.

بيت - 5

ھَڏِ نَہ ساہُ سُڌِيرُ،دِل دَرماندِي دوسَ رٖي،
پائٖي وِئَڙا پِرتِ جو، زوراوَرُ زَنجِيرُ،
جِيُ، جُسو، جاڳِيرُ، ھاڻٖي مِلڪَ ھوتَ جِي.

بيت - 6

عُمِرِ سَڀِ عِشقَ سٖين، پُنهُو جٖي پُڇَنِ،
رِيسَ ريٖذالِيوُن تَنِ سٖين، ڪُڄاڙي کي ڪَنِ؟
مارَڳِ جٖي مَرَنِ، وَڏو طالِعُ تَنِ جو.

بيت - 7

وَڏو طالِعُ تو، جِنۡ لَڳِنءَ پيرِ پُنهوُءَ جي،
سَسُئِي! اِنَ سُتُونَ کي، رويو رويو رو،
ويٺِي ھِتِ مَ ھو، ھَلٖين تَہ ھوتُ لَهٖين.

بيت - 8

وٖيِٺَينِ ناہِ وَراڪو، سُتِيَنِ ڪونِهۡ سَنگُ،
ھوتُ ھَلَندِنِ کَٽِئو، جَنِ اَنگُنِ چاڙھِئو اَنگُ،
باسٖي ڀَئِي ڀَنگُ، رِڙھِي ڄامَ رَسِيوُن.

بيت - 9

ويٺٖي وَرِ نَہ پوُنِ، سُتٖي مِلَنِ نَہ سُپِرِين،
جٖي مَٿٖي رَندَنِ روُنِ، ساڄَنُ مِلٖي تَنِ کي.

بيت - 10

ڪَڙھٖي ۽ ڪَڙٖي، پَرِ ۾ پيرُ پُنهُوءَ جو،
سِڪَ ٻَڌائِين سَندِرو، جانِبَ لَءِ جَڙٖي،
لَڪَنِ سِرِ، لَطِيفُ چٖي، مُنڌَ جهٖيڙٖي ۽ جَهڙٖي،
پَڻِيَ تان نَہ پَڙٖي، جٖي عُمِرِ سَڀِ اِنءَ ڪَرِي.

بيت - 11

ڪِ ڪٖي ڪَڙيان پيرَ؟ ڪِ ڪَڙھان ڪيچَ ڌَڻِيَنِ لَءِ،
اِيُ ڏَنءُ ڏيئيِ ڏيرَ، پاڻا پَراھان وِئا.

بيت - 12

ڪَڙہُ پُڻِ ڪيچَ ڌَڻِيَنِ لَءِ، ڪَڙِ پُڻِ پيرَ سَندانِ،
اِنَهِين پَرِ اُتانِ، پُندِہۡ، مُنڌَ! پَهاڙَ ۾.

بيت - 13

سُورَنِ سِجهائِي، چٖيلهِہ ٻَڌِئو چوٽِيٖين چَڙھٖي،
سَڱُ پِرِيان جٖي سَسُئِي، مٖيڙِي مِلائِي
لَڌائِين، لَطِيفُ چٖي، لالَنُ لالائِي
ٻانَڀڻِ ٻاڏائِي، حَبِئا وارِئو ھوتَ کي.

بيت - 14

رائٖي ڪِي رَنجُورَ، ٽَڪَرَ توءِ ٽانڪِئو چَڙھٖي،
لانچٖي لَڪَ، لَطِيفُ چٖي، ھَلِي ڏاہَ حُضُورَ،
رَھِيا سَڀِ رُڃُنِ ۾، سَسُئِيَ جا سالُورَ،
ساڄَنُ مٖيڙيُسِ سُورَ، سُکَ نہ مٖيڙِيُسِ سُپِرِين.

بيت - 15

مَنجها پَنءَ پَرُوڙِ؛ سَڀَ مَ پُڇِجِ، سَسُئِي!
ويھيِ وَڏٖي ڍِڳَ مان، ڌُڻِي وِجهِجِ ڌوُڙِ،
تَہ توُن ماڻِيٖين مُوڙِ، جٖي پَندِ اِھائِي پارِيٖين.

بيت - 16

لُڇٖي ڪِينَ ڪُڇٖي، آٽٖي مُنڌَ اَندوہَ ۾،
پَرِ ۾ پيرُ پُڇٖي، لالَنَ جو، لَطِيفُ چٖي.

بيت - 17

ٻَرِيائِي تہ ٻارِ، ڦُوڪِ تہ لَڳٖي اَنبَريٖن.
ھِتٖي جي ھُئَڻَ جِيوُن، وَٿوُن سَڀِ وِسارِ،
سَموُرِي سَرِڪارِ، نٖيئِي رَکجِ ناہِ ۾.

بيت - 18

قَدُ ٻَڌِي، توُن ڪِينۡ، پَهُچَندِنءَ پُنهُوءَ سٖين؟
جِنۡ سِينوُ ساھِيٖين سَسُئِي! ٿِيٖين تَهِوارُون تِينۡ،
مُٺِي! ٿِيُ مِسڪِينۡ، ھِمَّتَ ھوتُ وِڃائِيو.

بيت - 19

ٻَلَرِ لَڳو ٻاڻُ، پَسو! جوءِ جَرا ٿِييِ،
سا مُنڌَ مَرٖي نَہ جِيٖي، پيئِي پَڇاڙٖي پاڻُ،
سَسُئِي سُورَنِ ساڻُ، سَنڀوڙِي، سَيِّدُ چٖي.

وائي - 1

ٻاروچان ٻاجهَہ گَهڻِي،
آن ٿِي ڇُلان ڇَپَرٖين.
آئوُن پَهجٖي پِرِيَ سٖين، وِيندِيَسِ واڳَ وَڻِي،
آن ٿِي ڇُلان ڇَپَرٖين.
مَرُ تان پوئِمِ مُهَ ۾، سَندِي پيَّ پَڻِي،
آن ٿِي ڇُلان ڇَپَرٖين.
ڪونِه ھِنَ ڀَنڀورَ ۾، ڌارا دوسَ ڌَڻيِ،
آن ٿِي ڇُلان ڇَپَرٖين.
ھَٿا ھَڏِ نَہ ڇَڏِيان، آرِيَ جِي پِ اَڻِي،
آن ٿِي ڇُلان ڇَپَريٖن.
آھٖي ھوتَنِ ھَٿَ ۾، سَندِي جِيَّ جَڻِي،
آن ٿِي ڇُلان ڇَپَرٖين.
ڪِينَ وِرِميا ڪِٿَهِين، ڄُلِيا ڄَڻَ ھَڻِي،
آن ٿِي ڇُلان ڇَپَرٖين.
موُن کٖي ڪوٺِئو پاڻ ڏي، ھادِي! ھَٿُ کَڻِي،
آن ٿِي ڇُلان ڇَپَرٖين.
پُنهوُءَ ڌارا پَٻَ ۾، ٻيلِي ناہِ ٻَڻِي،
آن ٿِي ڇُلان ڇَپَرٖين.
تو رِءَ تٖيلُ نَہ پائِيان، نَڪا سِينڌِ ڦَڻِي،
آن ٿِي ڇُلان ڇَپَرٖين.
اَدِيوُن! عَبدُالّلطِيفُ چٖي، لَڳِيَمِ تَنَ تَڻِي،
آن ٿِي ڇُلان ڇَپَرٖين.

داستان اٺون

بيت - 1

اَڌَرِ، نِڌَرِ، اَڀَرِي، اَسُونهِين آھِيان،
لُڙَڪ لَعۡل، لَطِيفُ چٖي وَرَ لءِ وَھايان،
ھيٖجا ھَنجُون حَبَ ۾، ھوتَنِ لءِ ھارِيان
جانِبُ ضَعِيفِيَ سٖين، پُونهُو پَهايان،
پِيهان، پَچايان، جٖي مان نِهو پاڻَ سٖين.

بيت - 2

اَڌَرِ، نِڌَرِ اَڀَرِي، آھيان اَسوُنهِين،
پَرَڏِيهيِ پِرِين ڪِئا، مَرَڻَ لَءِ مُونهِين،
سَسُئِي کٖي، سَيِّدُ جٖي، تَنگُنِ ۾ تُونهِين،
ھارِي! ڪِنءَ ھوُنهِين، رِءَ سَمَرَ سَڌُون ڪَرٖين؟

بيت - 3

اَڌَرِ، نِڌَرِ، اَڀَرِي، اَسُونهِين آئُون،
چِيا، چورَ چُنجُن ۾، بَرَ ۾ بَلائُون،
موٽُ پُنهُو! پاھُون، مَتان، مُحِبَّ ! مَرِي رَھان.

بيت - 4

اَڌَرِ، نِڌَرِ، اَڀَرِي، اوڳِي، اَوائِي،
ڪِينَ ٽُهارِي ٽَڪَرٖين، ساڻُسِ سَڳائِي،
لاڳاپَنِ، لَطيفُ چٖي، مُنڌَ رائٖي رَھائِي،
جَلَڻُ، جَڏائِي؛ آرِي! لاہِ اَصِيلِ تان.

بيت - 5

اَڌَرِ نِڌَرِ، اَڀَرِي، گَمَنِ گَماٽِي
سا ڪِنءَ وِھٖي ويٖسَرِي؟ جا گ‏هائِيِ، گُهماٽِي
پيئِي پٖيشِ پُنهُوءَ جٖي، اُسُنِ ۾ آٽِي
جا لُڪُنِ لُوساٽِي، سا سٖيڄَ چَڙھَندِي سَسُئِي.

بيت - 6

اَچِي عِزرائِيلَ، سُتِي جاڳائِي سَسُئِي،
ٿِي دَوڙائٖي دَلِيلَ، تَہ پُنهُوءَ ماڙھُو موڪَلِئو.

بيت - 7

مُنۡڪِرَ ۽ نَڪِيرَ کٖي، جَڏِہ ڏِٺائِين،
اَڳِئا اُٿِي اُنِ کي، پُنهوُ پُڇِئائِين،
اَدا! اِھائين، ڪو وِئو ساٿُ سَڄَڻَ جو؟

بيت - 8

ڀاياڻِي ٿِي ڀورِ، پُٺِيَ ڪيچِيَنِ ڪَڪَرا،
رائو مِڙوئِي رَتَ سٖين، ڪارَڻِ ڪاندَ ڪَڪورِ،
لانچٖي لَڪَ، لَطِيفُ چٖي، اُٿِي ڏُنگَرَ ڏورِ،
جَتُ وَڃٖي ٿو زورِ، اُپُڙُ تان اوڏِي ٿِيٖين.

بيت - 9

پئِي ٿِي پَيمالُ، سا مُنڌَ مَرٖي، نَہ جِئٖي،
بُريٖ ھِنَ ڀَنڀورَ سٖين، ھَڏِ نَہ ڳَرَھٖي حالُ،
لالَنَ جو، لَطِيفُ چٖي، وِسارٖي نَہ وِصالُ،
ڀِرِي ڪِجاہُ، ڀالُ، ھِيَ ڏاہِ ڏورِيندِي ڪٖيتَرو؟

بيت - 10

جُهٽَ پِٽٖي؛ پِهُ جَهنگِ؛ ھاڙٖي پُڇُ مَ ھوتَ کٖي،
سُورُ سُٻيلِي، سَسُئِي! لَڪَ تِهِين سٖين لَنگهِہ،
تَہ سُپٖيرِيان جٖي سَنگِ؛ مُنڌَ! مٖيڙائو تو ٿِيٖي

بيت - 11

ٿَڪِيائِي، ٿَرَ ٿٖيلِ؛ چَڙہُ چُڪِيائِي چوٽِيٖين،
ھَلَندٖي ھوتَ پُنهُوءَ ڏٖي، ڀَءَ مِڙيئِي ڀٖيلِ،
اُٿِي، رائو رٖيلِ؛ ويٺَنِ تان وارِي وَرٖي.

بيت - 12

ھِيَ گِسِي، ھِيُ گَسُ؛ ھِيُ پَهَڻُ، ھِيُ پيچِرو،
ويچارِيَ وَڏو ڪِئو، وِيندَنِ پُٺِيَ وَسُ،
ليڙَنِ جو، لَطِيفُ چٖي، ڏُنگَرِ اَٿِي ڏَسُ،
جَڳَ ۾ رَھِيُسِ جَسُ، سَڳَرِ ٿِي سَردارَ جٖي.

وائي - 1

ھوتَ سٖي ھَلَڻَهارا، وو! جيڏِيوُن!
ڪِنءُ ڪَرِيان آئوُن اُنِ سٖين؟
کوءِ پَلَنگَ! ٻَنِ ماڙِيوُن! کَيِڻَ سٖي ٿِيَڙَمِ کارا!
ڪِنءَ ڪَرِيان آئوُن اُنِ سٖين؟
سوُنهَنِ سُپٖيرِيَنِ جا، آتَڻَ وٽِ اوتارا،
ڪِنءَ ڪَرِيان آئوُن اُنِ سٖين؟
وٖيٺو ڏٖي ڏُکِيَنِ کي، پُنهُو ڄامُ پُوڄارا،
ڪِنءَ ڪَرِيان آئوُن اُنِ سٖين؟
آھِيان پَئٽِ پُنهوُءَ جِي، ڪَندِيَسِ ڪُنِرَ ڪارا،
ڪِنءَ ڪَرِيان آئوُن اُنِ سٖين؟
پيرُ مَ ڇَڏِجِ پِرِيَ جو، ھيء!ھئ! ھَٺَ اَسارا!
ڪِنءَ ڪَرِيان آئوُن اُنِ سٖين؟
ڪيچِيَنِ ڪَرَہَ پَلاڻِئا، مَيا ٿَيِڙمِ مارا،
ڪِنءَ ڪَرِيان آئُون اُنِ سٖين؟
اَنڌَنِ آھِيٖين آسَرو، موٽِجِ، مُحِبَّ موچارا!
ڪِنءَ ڪَرِيان آئوُن اُنِ سٖين؟

داستان نائون

بيت - 1

وِہُ مَ وِسارٖي، پُڇا ڪَرِ مَ پَنڌَ جِي،
نِرمَلُ نِهارٖي، ھَلَندِنِ تان ھَٿِ ڪِئو.

بيت - 2

اَوَجَهڙِ اَسُونهِنِ، ڏٖيهُ گَهڻوئِي ڏورِئو،
سَڳَرِ رِءَ سُونهَنِ، پَهُتِي ڪانَہ پَنڌُ ڪرٖي.

بيت - 3

واءَ! وِڃاءِ مَ سو، پُٺِيَ جِه پَنڌُ ڪَرِيان،
ڇَٽا! ڇَپَرِ پِريَ جو، پيرُ پَرنِيان تو،
بَرِ بورائو جو؛ سو، لَڳِي، مَتان لَٽِيٖين!

بيت - 4

واءَ وِڃايُمِ ڪالَ، پُٺِيَ جِه پَنڌُ ڪَرِيان،
وَڃَڻُ موُن وانٽٖي پِئو، ھوتَنِ ڪارَڻِ حالَ،
جَبَلُ ڏورِيان جالَ، ڪارَڻِ پيرَ پُنهُوءَ جٖي.

بيت - 5

کُهِجِ مَ، اُجهاکٖيهَ، گَرَدَ پَسُ گَنگَنِ جِي، ڏُکِي! مَنجها ڏيٖهَ، نِڪِرُ ناہِ ڪُلٖي ڪَرٖي.

بيت - 6

ڏُورِ مَ توُن ڏوريٖجِ، صَبرُ ڪَرِ مَ، سَسُئِي!
پُرَڻُ ڇَڏِ پيرَنِ پيرَنِ سٖين، وِھَڻُ وِسايجِ،
سُکَنِ جا، سَيّدُ چٖي، لاڳاپا لاھٖيج,
ھِيٖين ساڻُ ھَلٖيجِ، تَہ پَندُ پاسٖي ڀَرِ نِبِريٖ.

بيت - 7

ويٺِيَسِ وِکَ نَہ اُپُڙٖي، تُون آرِياڻِي! آءُُ،
چُڪِيَ توسٖين چاءُ، پاسٖي ڀَرِ پيئِي رِڙھٖي.

بيت - 8

کُهِي جا کَنيائِين، وِکَ تِهِين ويجهِي ڪِئيِ،
ڇِڪِيَ ڇِنائِين، پَنڌُ مِڙوئِي پَٻَ جو.

بيت - 9

سَؤُ ڪوہَ ڪَرٖي سَڀَڪا، تُون، کُهِي! کَڻِجِ وِکَ،
تاڻِجِ مَنجها تِکَ، تہ پَنڌُ پاسٖي ڀَرِ نِبِرٖي.

بيت - 10

وِئِو جاڳائٖي جَتُ، وٖيرِي ڪِه وِلاتَ جو،
سَندو سُورَنِ خَطُ، ڏِنُمِ ھوتَ ھَٿَنِ سٖين.

بيت - 11

ڏُھِلا موُن ڏِيهَ ٿِئا، پٖييُمِ، ڄامَ! ڄَيوُن،
ڪَندٖي پَنڌُ پَهاڙَ ڏٖي، ٿِئَڙُمِ رُوحُ رَيوُن،
لُڇِئو ٿِيان، لَطِيفُ چٖي، ڪارَڻِ دوسِتَ دَھيُون،
ڀايان لَڪَ لَيُون، جٖي سُورَ پِرِيان جا ساڻُ موُن.

بيت - 12

ھيڪَلِيائِي ھاڻِ، پُورِيندِيَسِ پنُهُوءَ ڏٖي،
ڪَندِيَسِ ڪوھيارَلَ سٖين، رُچِي رُوحَ رِھاڻِ،
رُلِي ڇُلِي ڇَپَرٖين، ڪِهِ پَرِ لاھِيان ڪاڻِ،
آھِيان گَهڻُون اَڄاڻِ، پَرَ سُورَ پِرِيان جا ساڻُ موُن.

بيت - 13

ھيڪَلِيائِي ھٖيلَ، پُورِيندِيَسِ پُنهوُءَ ڏٖي،
آڏا ڏُنگَرَ لَڪِيوُن، سُورِيوُن سُڄَنِ سٖيلَ،
تَہ ڪَرَ ٻيلِي آھِنِ ٻٖيلَ، جٖي سُورَ
پِرِيان جا ساڻُ موُن.

بيت - 14

دوسِتُ ڏِٺائِين دِلِ سٖين، وِرچِي تان نَہ وِھٖي،
لانچٖي لَڪَ لَطيفُ چٖي، پَهَڻَنِ مَنجهِہ پِهٖي،
سَندٖي نِيهَ نِهٖي، ڪِي سَرفِرازُ سَسُئِي.

وائي - 1

وَڃِي وَڃِي ٿِندِيَسِ ويجهِي،
پَسَڻَ ڪارَڻِ پِرِيَ جٖي.
آڏا ڏوُنگَرَ،لَڪِيون؛ موٽِجِ، مُحِبَ مِجٖيجِي!
پَسَڻَ ڪارَڻِ پِرِيَ جٖي.
پِرِين، پَهُنوارَ! تو چُئان؟ ٻَيَرَ آھِيان ٻٖي جٖي.
پَسَڻَ ڪارَڻِ پِرِيَ جٖي.
نَمُ گُهرِجٖي نِيهَ جو، آھِيان آئوُن اَروجِي،
پَسَڻَ ڪارَڻِ پِرِيَ جٖي.
جا نَہ ھَلَندِي ھوتَ ڏٖي، پِيُ تِهِين جو پاجِي،
پَسَڻَ ڪارَڻِ پِرِيَ جٖي.

داستان ڏھون

بيت - 1

آءُ اوراھُون، سُپِرِين! وَڃُ مَ اَڳاھُون،
ٿَڪِي کَڻٖي ٿَرَنِ ۾، ٻاڪارِئو ٻاھُون،
دَردَ جِيوُن داھُون، موُن مارِيندِيوُن، موٽُ توُن.

بيت - 2

آءُ اوراھُون، سُپِرِين! وَڃُ مَ، پِيَّ! پَرٖي،
مُون ڏِٺِي، مُون وِسَهو، وِرچِي تان نَہ وَرٖي،
ڌارا مُهَ مَرٖي، ڏُکِيَ جٖي ڏيکارِيٖين!

بيت - 3

آءُ اوراھُون، سُپِرِين! پَرٖي وَڃُ مَ، پِيَّ!
موٽُ، مَرَندِيَسِ ڇَپَرٖين، تون جِيارو جِيَّ ،
ھوتَ! مَ ڇَڏِجِ ھِيَّ، پُنهُو! پِيادِي پَنڌَ ۾.

بيت - 4

آءُ اوراھُون، سُپِرِين! ڏُکِيَ ڏيجِ مَ ڏاگهُہ،
وَٽِ ڇَڏٖي مُون واگهُہ، آرِي! وِئٖين عِشقَ جو.

بيت - 5

آءُ اوراھوُن سُپِرِين! ڏُکِيَ ڏاگُهہ مَ ڏيجِ،
پيهِي گَهرِ پُڇيجِ، تہ، ھوتَ! ھَلاڪَتَ نَہ ٿِيٖي.

بيت - 6

مَڇُڻِ، وَرَ! وِسارِيٖين، آرِي! لَڳِ اَللہَ،
توکٖي سارِيو ساہُ اُڪَنڍِئو آھوُن ڪَرٖي.

بيت - 7

مَڇُڻ، وَرَ! وِسارِيٖين، صَبۡرُ نَہ سارِيان،
توکٖي نِ‏هارِيان، آءُ، مُهجا سُپِرِين!

بيت - 8

ھَٿا ھَڏِ نَہ ڇَڏِيان، صَبۡرُ شُڪۡرانو،
ذوقَ زَمانو، مُون، وَرَ! وِئو وِسَرِي.

بيت - 9

صَبۡرَ ۽ شُڪۡرَ کٖي، ڪاڏٖي آئُون ڪَندِي؟
آھِيان جِه سَندِي، سو تَہ گُهرِجٖي ساڻُ مُون.

بيت - 10

صَبۡرَ ۽ شُڪۡرَ کي، وَٺِي آئوُن ويٺِي،
ڏُکِيَ سٖين ڏٖيٺِي، ڪا ڪِجِ اَچِي ڪَڏِھِين.

بيت - 11

صَبۡرَ ۽ شُڪۡرَ کي، ھَٿِ ڪِئو مون ھاڻِ،
پِرِيَمِ! اَچِي پاڻِ، پِٽِيَ کي پُڇيجِ تُون.

بيت - 12

ناہِ جَمِعيّتَ جانِ کٖي، ھوتَ پُڄاڻا ھاڻِ،
اَللہَ! سٖيئِي آڻِ، جَنِ ساءُ چَکايُمِ سِڪَ جو.

بيت - 13

ناہِ جَمِعيّتَ جانِ کٖي، ھوتَ پُڄاڻا ھِتِ،
پُنهُوءَ جِيَ پِرِتِ، ساءُ چَکايُمِ سِڪَ جو.

بيت - 14

ناہِ جَمِيعيّتَ جانِ کٖي، پُنهُوءَ پُڄاڻا،
سٖي مُون سٖيباڻا، جَنِ ساءُ چَکايُمِ سِڪَ جو.

وائي - 1

پَلَڪَ نَہ رَھٖي دِلِ تورٖي،
وَرُ، مِيان خانَ بَلوچا!
اُٺَ چارِيندِيَسِ اُنِ جا، مَٿاء ٽَڪَرَ ٽورٖي،
وَرُ، مِيان خانَ بَلوچا!
ڏِيندِيَسِ ماہُ مِرُن کٖي، مَٿاء ڪُلَنِ ڪورٖي،
وَرُ، مِيان خانَ بَلوچا!
ڪانگَ کِيَنِمِ ڪيچَ جا، ماسُ چِنجُنِ سان چورٖي،
وَرُ، مِيان خانَ بَلوچا!
ڏُکَ لاھِيندِيَسِ ڏِيلَ جا، ساڻُ عَجِيبَنِ اورٖي،
وَرُ، مِيان خانَ بَلوچا!
آرِياڻِي، عَبدُاللّطِيفُ چٖي، سارَ لَهَندُمِ سوري،
وَرُ، مِيان خانَ بَلوچا!

داستان يارھون

بيت - 1

ڪَنُ ٿِيُ، ڪيچِيَنِ ڪُڇِئو؛ ڪُڇُ مَ، ٿا ڪُڇَنِ؛
اِشارَتوُن اُنِ جيوُن، سُڪُوتا سُڄَنِ،
وَٽا ويهِي تَنِ، سُڻُ تَہ سوزُ پِرائِيٖين.

بيت - 2

سُڻُ تہ سوزُ پِرائِيٖين، ” آءُ“ چَيائون اَڄُ،
ٻولِي ٻِي نَہ سِکِئا، ”پاڻا“ چُندَءِ ”ڀَڄُ“،
واڄٖي وَٽِ مَ وَڄُ، ٻُڌُ تَہ ٻِيائِي لَهٖي.

بيت - 3

ٻُڌُ تَہ ٻِيائِي لَهٖي، ”آئون“ اِتِ نَہ آہِ،
ڪُڇَڻَ ڪَنڍِي لاہِ، ڪَنُ ٿِيُ، ڪيچِيَنِ ڪُڇِئو.

بيت - 4

ڪَنُ ٿِيُ ڪِيچِيَنِ ڪُڇِئو، ڪُڇُ مَ، ڪُڇِيائُون،
رَھِي نَہ رَتِيَ جيتَريِ، اُنِيين وَٽِ ”آئُون“،
وَڍٖي وِڌائُون، ھو جو وَڻُ ”ھُئَڻَ“ جو.

بيت - 5

ڪَڏِہ پَئِجٖي ڪَنُ ٿِي، ڪَڏِہِ ٿِيجٖي واتُ،
ڪَڏِہ ٿِيجٖي ڪاتُ، ڪَڏِہ ٿِيجٖي ٻَڪَرو.

بيت - 6

ڪَٽارو ۽ ڪوسُ، اَڱَڻِ آرِيَ ڄامَ جٖي،
دِيَتَ آھٖي دوسُ، مارَڳَ ۾ مُيِنِ جِي.

بيت - 7

ڪامُون مُڇٖيجاہُ گَهڻِيُون گُهرِجَنِ آن، اوٺِيا!
ھٖي وَڻَ نَہ لَهَنداہُ، ھو وَڻَ اوڏاھِين گَهڻا.

بيت - 8

اَکِيوُن لَٽَ اوراٽِيوُن، ڪِهَ پَرِ ڪَڙِيان پيرُ؟
لَٽَ لاھِيندو ڪيرُ؟ موُن جٖيهيَ مَعذُورِ کي.

بيت - 9

اَکِيوُن آرِيَ ڄامَ جِيوُن، اَنڌِيَ سٖين آھينِ،
ھو جٖي وَڻِ وِندُرَ جا، سٖي موُن سُنهائِينِ،
ڏِسِئو ڏيکارِينِ، ڏيکارين، پيشانيِ پُنهُوءَ جِي.

بيت - 10

اَکِيوُن آرِيَ ڄامَ جِيُون، آھِينِ اَنڌِيَ ساڻُ،
پَسيِ ڪَندِيوُن پاڻُ، پيشانِي پُنهُوءَِ جِي.

بيت - 11

سَڏَ مَ ڪَرِ سَڏَنِ رٖي، ھَلَڻَ رِءَ مَ ھَلُ،
جَلَڻَ رِءَ مَ جَلُ، رُئَڻَ رِءَ مَتان رُئٖين.

وائي - 1

دَردَ مُيَ جٖي جا دارُون،
وو! موٽُ، سَٻاجها سُپرِيِن!
موُن لَڳِيوُن، مُون وِسَهو، مَحَبَتَ جِيوُن مارُون،
وو! موٽُ، سَٻاجها سُپِرِين!
مائِٽَنِئا مُون سٖين گَهڻا، ڪُسَڻَ ڪِئا ڪارُون،
وو! موٽُ، سَٻاجها سُپِرِين!
سُکَنِ موُن سٖين ڪِينَ ڪِئو، سُورَنِ لَڌِيُمِ سارُون،
وو! موٽُ، سَٻاجها سُپِرِين!
مُهجِيوُن شَهرَ ڀَنڀورَ ۾، پَلِپَلِ پُونِ پَچارُون،
وو! موٽُ، سَٻاجها سُپِرِين!
اَدِيوُن! عَبدُالّلطيفُ چٖي، لَڳِيُمِ تَنِ اَندَرِ تارُون،
وو! موٽُ، سَٻاجها سُپِرِين!

ابيات مُتفرقہ

بيت - 1

اُٿِئو ۽ اُٿِئاڪُ، ڪالوڪو ڪاڏي گَيو؟
وِئو جاڳائٖي، جيڏِيوُن! بِرہُ، ھِيُ بٖيباڪُ،
چُرِ ڦُرِ ڪارٖي چاڪُ، سُورُ سُمَهارٖي ڪِينَ ڪِينۡ!

بيت - 2

سَنڌِيوُن سوُرَ ڪَرِينِ، ھَڏَ پُڻِ ڏُکَنِ ھوتَ لَءِ،
پِريَنِ جٖي پاڻَ، ڏِنا، سٖي سُتٖي سُکُ نَہ ڏِينِ،
جٖي ماڙھُنِ کٖي مارِينِ، تَنِ سُورَنِ کٖي سَڏَ ڪَرِيان!

بيت - 3

صَدا وِڌِيَمِ سُورَ جِي اَڳِئا ڪوھِيارٖي،
جو نِجَسَ نِکارٖي، سو پُنهُو وِڌُمِ پاندَ ۾.

بيت - 4

جان ساماڻِنءَ، سَسُئِي! تان وٖيسُ
وِڙَنِ جو ڪَرِ،
لاھي لَڄَ، لَطِيفُ چٖي، ٿِيُ بيگارِياڻِي بَرِ،
تَہ وِيندِہۡ پوئِي وَرِ، اَڳِئا ھوتُ حُضوُرَ ۾.

بيت - 5

سَسُئِيَ کي سَڏُ ٿِئو، اَسان اولاڻُون،
پَنڌَ نہ پُڄاڻُون، اَڻَ ڪوٺِي ڪانَ ڪَريٖ.

بيت - 6

پَسو! پَرائَنِ، سُورَنِ آڏِي سَسُئِي،
پَرايا پَهِجَنِ، وِجهَنِ ويچارِيَ تٖي.

بيت - 7

مُنڌَ نَہ منجها تَنِ، پَسِي لَڪَ لُڏَنِ جٖي،
جا پَرِ کاھوڙِيَنِ، سا پَرِ سِکِي سَسُئِي.

بيت - 8

مُنڌَ! مَ مَنَهِ ويهُ، اُڀِي اوسِرُ اُسَ ۾،
تو سيئِي سٖيڻَ ڪِئا، ڏُورِ جَنِين جو ڏيهُ،
پاڙٖي پاڙٖي پيهُ، وَتُ پُڇَندِي پِريَ کٖي.

بيت - 9

ٻيلِي ناہِ ڀَنڀورَ ۾، تِهِ سَسُئِيَ جو سَهيِ،
ڏَمَرُ ڏيرَنِ مَنَ ۾، ڪنَدا اِنءُ ڪَهِي،
لَنگهائٖي، لَطِيفُ چٖي، کَڻِجِ، ڄامَ! کُهِي،
ھِيَ مَعذُورِ ھَڏِ مُئِي؛ تُون، ڪامِلَ! وَڃُ مَ ڪيڏَھِين.

بيت - 10

اولاڪَنِ اَچِي، مَعذورِ تي مارو ڪِئو،
مَتان وَرَ وِسارِيٖين، مَنجها ڪُرَ، ڪَچِي!
سُپَڪِ ٿِي سُورَنِ سٖين، پَهُچَندِينءَ پَچِي،
لاھٖي لاڳاپا، لَنگهِہ توُن، سيڻَنِ ڏاہَ، سَچِي!
مَنجها راہَ رَچِي، ٿِندِنءَ لَعۡلَ، لَطِيفُ چٖي.

وائي - 1

ڳالِيُون ھوتَ ٻَروچٖي ساڻ،
وو! مُهجٖي جِيَ جِيوُن، جيڏِيوُن!
ڇُلِي پيٺِيَسِ ڇَپَرٖين، سَڱَ تُهِين جٖي ساڻُ،
چَڙھِي ڏاڍٖين ڏُنگَرٖين، پُرزا ڪَندِيَسِ پاڻُ،
رُلِي ڇُلِي ڇَپَرٖين، ڄامَ وِڃايُمِ ڄاڻُ،
ھَٿان ھَڏِ نَہ ڇَڏِيان، سَندو نِيهَ نِڌاڻُ،
نَصِيبُ ڪَرِ نَسُئِيَ کٖي، پُنهُوءَ اُٺَ وَٿاڻُ.

وائي - 2

مُنکٖي تان جَهلَ مَ پائِيو،
وو! جيڏِيوُن! آئوُن ھَلندِي ھوتَ ڏٖي.
ھِيُ جو بارُ ڀَنڀورَ جو، لُوٺِيَ تان سَڀِ لاھِيو،
آھٖي عاجِزِنِ تٖي، پَسَڻَ سَندو ساعِيو،
ڪِينَ وِھَندِيَسِ ڪُنڊَ ۾، نَہ مون ڀَءُ نَہ ڀايو،
وِھارٖي وَطَنِ ۾، شُهِديَ کي مَ سِڪايو،
ڪُٺَلِ ڪَجائَنِ ۾، چاڙھٖي ھِيَ ھَلايو،
مُهجو پَنڌُ پُنهُوءَ ڏٖي، رٖيبٖي تان مَ رَھايو،
اَدِيوُن! عَبدُاللّطِيفُ چٖي، مولٖي مُحِبُّ مِلايو.

وائي - 3

ڪَرَھاَ مَ ڪاھِيو، مِيان! ڪيچِي!
آئوُن آرِياڻِي عَرَضُ چُوندِي.
ڪَرٖي، ھوتَ! ھَلَڻَ جِي، لُوٺِيَ کٖي مَ لَڄايو،
وَسِيلو وِلَهِيَ جو، آڳانڍو اَئِين آھيون،
پاسٖي ۾ پَرِيَٽِ جٖي، جٖهيڪٖي اُٺَ جُهڪايو،
وِلَهِيَ جٖي وِيهانءَ ۾، واڄَٽِ سَڀِ وَڄايو،
اُگهاڙيوُن آتَڻَ ۾، پَهجِيوُن پاڻَ پَراھِيون،
سائِينءَ ڪارَڻِ، سُپِرِين! صُورَتَ کي مَ سِڪايو،
ساڪِنَ ٿِي شَهرَ جا، معذُورِ کي مَرَڪايو،
پُنهُو ڄامَ! پَرِٽِ سٖين، ويهِي سُورَ وِراھِيو،
لاھٖي بارُ ڀَنڀورَ ۾، وِيندو گهوٽُ وَناھيو،
پُنهُوءَ ڄاڃِئَڙَنِ کٖي، رَڌٖي کِيَڻَ کارايو،
پَرڻائٖي پُنهُوءَ کٖي، نٖيکٖيٽِي نِکِڙايو،
ٻيلِي ٿِي ٻانڀَڻِ سٖين، ڏِکِيَ ڏيجُ ڏيکارِيو،
اَدِيوُن! عَبدُاللّطِيفُ چٖي، سَڄَڻَ کي ساراھِيو.

وائي - 4

اَدا! ڙٖي! ڏوٿِي! آئوُن پُڇان تو ٿِي:
ڪيچِ رَسَندِيَسِ ڪِنءَ؟ ڏَسُ موُن ڏٖي.
نہ سَمِي، نَہ سُومِرِي؛ نَہ آئوُن جَتِ، اوٺِي؛
آئوُن اُنِين مان آھِيان، جٖي ٻانڀَڻَ پڙَھَنِ پوٿِي،
پَرٽِ ٿِنديَسِ، پِرِين پُڇَندِيَسِ، پَڇاڙِيندِيَسِ پوتِي،
سَنجهٖي وِئڙو سُپِرِين، ساڄَنُ پُڇان سو ٿِي،
ساجَهرِ ساٿَ پلاڻئو، تو پَلاڻئو پوءِ ٿِي،
ھِتا ٿٖي ھوتُ وِئو، جَتُ پُڇٖين جو ٿِي،
ھَلِجِ ھوتَ پُنهُوءَ ڏٖي، مَنجها نِيهَ نِڪو ٿِي،
آتَڻُ وِجهِي آڳِ ۾، مَنجها جوئِن جوءِ ٿِي،
سَنجهٖي ساٿَ سِڌارِئو، پُنهُو پُڇان پوءِ ٿِي،
رويو رُئان رُڃُنِ ۾، ھيء! ھيء! آئوُن ھِتِ ڪُهِ ٿِي؟

وائي - 5

ڪِهَڙو سَڱُ سِياڪو؟
ھارِيَ موُن ھوتَنِ سٖين.
آئوُن ھيڪَلِي حَبَ ۾، نَہ موُن مِٽُ نَہ ڪاڪو،
مُنڌَ پِيادِي، پَنڌُ گَهڻوُن؛ نَہ موُن اُٺُ، نَہ ناقو؛
چَڙھِي نہ سَگهان چوٽِٖيين، ڏُنگَرَ ڪونِه ڏاڪو،
پِرِين پُڇندِيَسِ پَٻَ ۾ وَڻِ وَڻِ وِجَهندِيَسِ واڪو،
ھُوءَ جا پِڪَ پُنهُوءَ جِي، چَٽِئان تِه چُئاڪو،
پَسَڻَ ڌارا پِرِيَ جٖي، فَقِيرِ پوءِ مَ فاقو،
وِچُ مَ پوءِ وِصالَ ۾، لِکَ مَ پوءِ لِياڪو،
آتَڻُ وِجهِي آڳِ ۾، پُڇَندِيَسِ پوءِ پَهاڪو.

وائي - 6

پانڌِي پِرِيَنِ جو، اي! مانَ ڪو پَسان!
ڀينَرُ! ڀِنِيَ اُسَهو، ڏُنگَرُ ڏورَڻُ اَسان،
مُدائِتٖي مِيهَ جِنۡ، ويٖلو ويلَ ٿِي وَسان.

وائي - 7

اَتَڻَ ۾ ويهِي، سَڀِ دُعا ڪَرٖيجاہُ، جيڏِيوُن!
ڪانِه بَسِ بَهِيرَ کٖي، ھَلُ چَلُ پَئٖي پيئِي،
راہَ مُسافِرُ سَڀُڪو، ڪونَ ڏِٺو سوُن ھِت ڏيهِي،
سارِيندا صَلواتَ کي، مَنجهِہ قَبَرَ سڀِ پيهِي،
ڪوٺائُو ڪَرِيمُ جو، ڳالِ پُڇَندُمِ ڪيهِي؟
نَوازِيندو نُورَ سٖين، ناقِصِ کٖي اُتِ نيئِي،
اَللُھ ھيڪُ مُحَّمدُ برحَقُ، شالَ چُئان مان حَرفَ اِھيئِي.

وائي - 8

جيڏِيوُن! آئون تان نَہ چَوَندِي، لو!
ڏُکُ ڏوراپو سيڻَنِ کي صَرِيحُ، لو!
سَڱِ نَہ وَرَنِ سُپِرِين، مِنَّتَ موٽَنِ مانَ،
ڀينَرُ! ڀٖيڻِي حُجَ جِي، ڪوھِيارٖي سٖين ڪانَ؛
سو توُن صاحِبُ آھِيٖين، جو نَہ ڀٖيرايٖين
ڀانَ، سَئٖين سُوالِي سَمَگِئا، تو، داتا! ڏٖيئِي دانَ.

وائي - 9

ڪا جا ڳالِ ھُئِي، سا جٖي لوڪَ سُئِي،
لو! ٻاروچٖي جٖي مَنَ ۾.
سِرُ سَڳَرِ، پُرُ پيچَرٖي، تون جا لوڪَ سُئِي،
سَسُئِي سَڳَرَ پَٽِيٖين، ڪيرُ چَوَندو مُئِي؟
پَنڌُ ڪَرِيندٖي پِريَ ڏٖي، ڪَڏِہ ڪانَ کُهِي،
آن ڪا ڏِٺِي، ڏوٿيا! کٖيرِنِ پاسِ کُهِي؟

وائي - 10

ويجهِي وِندُرَ جَنِ وَڻَنِ،
اي! اوڏِي آيَسِ، چان، پِريان جٖي پيچَرٖي.
جٖي تو اوڏا ڀائِيا، سٖي ڏُنگَرَ ڏُورِ ڏِسَنِ،
مَدِي نَہ ھُيَنِ مَنَ ۾، تہ ڪيچا ڪوہُ اَچَنِ؟
مرڻَ مُهجٖي کٖي ڪِئو ھِيُ پَهُ ٻاروچَنِ،
سُونهَنِ سَڳَرَ پَٽِيٖين، مَنَهَ مَعذوُرَنِ،
وِندُرِ وائِي جا وَھٖي، موُنکٖي سا نَہ سَلَنِ،
آڻٖي ٻَڌا اوٺِيٖين، موتِي کٖي مَيَنِ،
لاٿائوُن لَطِيفُ چٖي، لَڏُون سِرِ لَڪَنِ.

سر معذوري

داستان پھريون

بيت - 1

ھَلَندٖي ھوتَ پُنهُوءَ ڏٖي، کُهِجَنِ ڪٖي کوُٽِيوُن،
پَهَڻُ تَنِين پَٽُ ٿِيٖي، جٖي لَءِ لالَنَ لوُٺِيوُن،
سَڀِ سَهيليوُن سِڪَ کٖي، چُنجهُون ۽ چوُٺِيوُن،
ٻانڀَڻِ! ٿِيُ ٻوُٽِيُون، تہ ڪُتا کِيَنِئِي ڪيچَ جا.

بيت - 2

ڪُتا کِيَنِئِي ڪيچَ جا، سَندا جٖي پُنهُوءَ،
اَگهٖين ھُندَ ، اَسوُنهَ! جٖي جانارَنِ يادِ پُئٖين.

بيت - 3

تَنِ پيئِي جانارَنِ يادِ، جٖي پارِئَلَ پُنهوُءَ ڄامَ جا،
سَندِي لالَنَ لاڌِ، مُيا پوءِ مُنڌَ ٿِيِي.

بيت - 4

جاڳايَسِ جَنبُورَ، ڪُتٖي قَرِيبَنِ جٖي،
بَهِي بَهُڪِي اُٿِئو، گِهڏِي مَنجها گهُورَ،
سَڀِ لاھِندو سوُرَ، گِرِي ھِنَ غَرِيبِ تان.

بيت - 5

نَڪِيۡن آھِيوُن چُوھَڙا، نَڪِين آھِيُون چورَ،
ھاگاما ۽ ھورَ ڪُتا! ڪَرِيٖين ڪَنِ تٖي؟

بيت - 6

ڪُتو چٖي قَرِيبَ جا، آھِيوُن ساڌَ سَهِي،
پِهرِين باتِ بَهِي، پُڇُون پوءِ پانڌِيَنِ کٖي.

بيت - 7

ڪُهٖين، تَہ آپُ ڪُهُ، ڏَسِ مَ چُوھَڙِيان،
سَندا آھٖيڙِيان، آن نَہ سَهنَدِي ھَٿَڙا.

بيت - 8

ڪُتو طالِبُ ڍُونڍَ جو، اَسِين ڪُتٖي ڪِيڙَ،
جَھُٽِي آھٖي چِيڙَ، ڪارابٖي جٖي ڪَنَ ۾.

بيت - 9

ڪُتو ڪُرِٽٖي ھَڏِيُون، جُوانۡمَردُ جِڳِرُ کاءِ،
اَلدُّنِيَا جِيفَةٌ وَطُلاّبُهَا کِلاَبُ، اِيَ ھِيٖين سيٖن لاءِ.

بيت - 10

جُہ يارُ ڏِٺائوُن يارَ جو، پُٺِيَ پٖيرُ ڪَڙِينِ،
ڦِرِئا نَہ فَرمانَ کان، اُنِهۡ ۾ آھِينِ،
ڏِسِي نَہ ڏاڙِھينِ، شَبانَ جٖي سَڳَ کٖي.

بيت - 11

سَگِبانَ سِينڍارِئا، بَڇِئا، تٖي بَهَنِ،
ڦِرِئا نَہ فَرمانَ کان، مُلُ نَہ موتِيَڙَنِ،
ڪونِهُ ڏوہُ ڪُتَنِ؛ ڏاڪارِئا، ڏاڙِھينِ ٿا.

بيت - 12

ڏَکا، ڏُنگَرَ جا مِرُون، مَرُ ٿا مُون تٖي ڪَنِ،
پُڙَندا ڪِينَ پَرِيَٽِ تٖي، ھِنَ جا سَڌَرَ ٿا سُڄَنِ،
سَڳائِيَ جِي، سَيّدُ چٖي، آھٖي سُڌِ سَڀَنِ،
ھُندَ نَہ ھِتِ ٽَرَنِ، پَرَ قَرابَتَ ڪَمُ ڪِئَو.

بيت - 13

ڪَمِ قَرابَتَ جَنِ جِي، ھِتٖي آيَمِ ھِيَّ،
رِفاقَتَ راکَنِ جٖي، پَهُتِيَسِ پاھَڙَ سِيَّ،
ماڙھُو مُلاحِظو تِه جو، ڪيچِ نَہ ڪَندا ڪِيَّ؟
ذاتِ نِسورِيائِيَّ نِيَ، پَرَ سَڌَرَ سٖين سَڱُ ٿِئو.

بيت - 14

سَڌَرَ سٖين سَگَُ ڪَرٖي، پَرَ کَنڊٖين پٖيياسِ،
ڪيرَ بِرَھمَڻِ؟ ڪَنِ جِي؟ ڪٖيرُ ڄاڻٖي ڪٖيڻاسِ؟
ھُندَ نَہ سِنڌِ سُياسِ، ھِنَ پُرِيٖين ڪِيَسِ پَڌَرِي.

وائي - 1

خوُبِي مَنجهِہ خِفَتَ، اي! دوستَ! دِقَتَ،
آھٖي عَبدُاللّطِيفَ کٖي.
مَدَحَ مُون کان نَہ ٿِيٖي، سَندِي سُورَ صِفَتَ،
آھٖي عَبدُاللّطِيفَ کٖي.
ھِجٖي ڪَرِيان ھٖيجَ سٖين، مُطالِعُ مَحَبَتَ،
آھٖي عَبدُاللّطِيفَ کٖي.
حُزنُ ھوتَ پُنهُوءَ جو، رُڳِيائِي راحَتَ،
آھٖي عَبدُاللّطيِفَ کٖي.
پِرِيان جٖي پِستانَ جو، فاقوئِي فَرَحَتَ،
آھٖي عَبدُاللّطِيفَ کٖي.

داستان ٻيون

بيت - 1

ڏُکِيَ ڏَمَرُ ناہِ، بُکِيَ کِلَ نَہ اُڄَهٖي،
اُگهاڙِيَ وِھانءُ، وِئو ويچارِيَ وِسَرِي.

بيت - 2

اَدِيُُون! وَرُ اُگهاڙَ وِھانءُ جِه وِسارِئو،
جيڏِيُُون! ڇَڏٖي جاڙَ، سَڀِ نَنگِيوُن ٿِي نِڪَرو.

بيت - 3

سَڀِ نَنگِيُُون ٿِي نِڪَرو، لالَچِ ڇَڏٖي لوڀَ،
سُپٖيرِيان سٖين سوڀَ، نِنڊوُن ڪَندٖي نَہ ٿِيٖي.

بيت - 4

سَڀِ نَنِگِيُون ٿِي نِڪَرو، پَرَھَڻَ ڇَڏٖي پوءِ،
مَهَدِ مِڙَنِئا ھوءِ، ڪَهٖي جا ڪِينَ کَڻِي.

بيت - 5

ڪَهٖي جا ڪِينَ کَڻِي، پِرِيَ پَهُتِي سا،
وِھٖي وٖيڙھجِي جا، وَصۡلُ تِه وِڃائِيو.

بيت - 6

وَصۡلُ تِه وِڃائِيو، سِينڌِ سُرمٖي سٖينءَ،
سا لُوٽِي لِيلا جِينءَ مَڻِئو جِه مِٽُ ڪِئو.

بيت - 7

ھُوندِئا ھوتُ پَرٖي، اوڏو آ اَڻَ ھُوندِ کي،
ساڄَنُ تَنِ سَرٖي، ”لا“ سٖين لَڏِينِ جٖي.

بيت - 8

لائٖي خَنجَرُ ”لا“ جو، ھَيءِ! خَچَرَ کٖي ھَڻُ،
سَڌُنِ جِيوُن، سَيِّدُ چٖي، وَٿوُن سَڀِ وِڪَڻُ،
پيرُ پَرُوڙٖي کَڻُ، تَہ ھَلَڻَ ۾ ھورِي وَھٖين.

بيت - 9

ھورِنِ ھاڙو لَنگهِئو، ٿِيُ جَرِيدِي، جوءِ!
ھُوندِ جَنِين سٖين ھوءِ، ھوتَ نَہ ھُوندو تَنِ سٖين.

بيت - 10

ھورِنِ ھاڙو لَنگهِئو، مُٺِي! مُوسَٽُ ڇَڏِ،
”لا“ سٖين اُٿِي لَڏِ، ”ڪِينَ“ رَساڻٖي ڪيچَ کي.

بيت - 11

ھورِنِ ھاڙو لَنگِهئو، ڳَورِيُُن پاسٖي ڳوٺَ،
ڪيچِ تَنِين کٖي ڪوٺَ، ”ڪيِنَ“ جَنِين جٖي ڪَڇَ ۾.

بيت - 12

ھورِنِ ھاِڙو لَنگهِئو، ڳَورِيُُون ٿِيُُون ڳمَنِ،
ھاڃٖي تِه ھَڄَنِ، ڌارا سِڪَ، سَيّدُ چٖي.

بيت - 13

نڪا ھِتِ، نَہ ھُتِ، ڪا ڳَورِيَ سَندِي ڳالِ،
ڪِينَ پَهُتيِ مالِ، حالِ پَهُتِي ھوتَ کٖي.

وائي - 1

ھَلُ ھوتَنِ ڪارَڻِ حالَ،
شالَ سَڳَرِ ٿِندِنءَ ساٿَ جٖي!
پيرَ پَهجٖي پِرِيَ لَءِ ڪوڏِ رَتائِين ڪالَ،
شالَ سَڳَرِ ٿِندِنءَ ساٿَ جٖي!
چَڙَھندٖي سِرِ چوٽِيٖين، لَڪَنِ ڪِئَڙَسِ لالَ،
شالَ سَڳَرِ ٿِندِنءَ ساٿَ جٖي!
جٖي ڀايٖين جَتَنِ جٖي، ويجهِي ٿِيان وِصالَ،
شالَ سَڳَرِ ٿِندِنءَ ساٿَ جٖي!
پُرِي ڀايٖين جَتَنِ جٖي، ويجهِي ٿِيان وِصالَ،
شالَ سَڳَرِ ٿِندِنءَ ساٿَ جٖي!
ڪيچا آيو قافِلو، مَيَنِ مَٿٖي مالَ،
شالَ سَڳَرِ ٿِندِنءَ ساٿَ جٖي!
اِينديَءِ بُوءِ بوتَنِ جِي، توُن جَهلِجِ پَٻَ پَيالَ،
شالَ سَڳَرِ ٿِندِنءَ ساٿَ جٖي!
جِتٖي جَمازَنِ کٖي؛ جَبَلَ ٿِينِ جَنجالَ،
شالَ سَڳَرِ ٿِندِنءَ ساٿَ جٖي!
پُڇٖي پِيادِيَنِ کٖي، اُتِ آرِياڻِي اَحوالَ،
شالَ سَڳَرِ ٿِندِنءَ ساٿَ جٖي!
اَدِيوُن! عَبدُاللّطِيفُ چٖي، سَڄَڻُ مِلَندُمِ شالَ،
شالَ سَڳَرِ ٿِندِنءَ ساٿَ جٖي!

داستان ٽيون

بيت - 1

ھَلَندٖي ھاڙو مَڻِي، ڪَرَڻُ ڪوہَ پِيامِ،
اَرڏا آرِيَ ڄامَ رٖي، گُندَرَ گُذَرِيامِ،
لَڪِيوُن، لَڪَ، لَطِيفُ چٖي، اورانگَهڻُ آئيامِ،
پُرَڻُ پُنهُوءَ پُٺِ ۾، اِيَ سَعادَتَ سَندِيامَ،
مَٿِسِ ڪَمَ وِڏامِ، وِھان تان نَہ وَسِ پِئو.

بيت - 2

ھَلَندٖي ھاڙو مَڻِي، ڏَڪَنِ مُهجا ڏوہَ،
ھو اوڇَڻَ سِرِ اُٺَنِ تٖي، ھِيَ پنڌِ پَڇاڙٖي پوءَ،
لٖيڙَنِ رٖي، لَطِيفُ چٖي، ڪِنءَ
ڪَرِيندِيَسِ ڪوہَ؟
اَڳِئا رائو سُڄٖي روہَ، وِھان تان نَہ وَسِ پِئو.

بيت - 3

ھَلَندٖي ھاڙو مَڻِي، سِسِي ڏِيندِيَسِ ساہُ،
لِڱَنِ تان، لَطِيفُ چٖي، پارٖي نِئُمِ پاہُ،
ڪَندو ٻاجهَہَ اَللُھ، وِھان تان نہ وَسِ پِئو.

بيت - 4

ھَلَندٖي ھاڙو مَڻِي، گَسا تان مَ گُسان،
لَڪَنِ تان، لَطِيفُ چٖي، رِڙھِي مانَ رَسان،
پُنهُو، شالَ پَسان، وِھان تان نہ وَسِ پِئو.

بيت - 5

ڀائِي حالَ ھَلِي وِئا، ڪِه کٖي سُورُ سَلان؟
کَڻِئو لَڄَ، لَطِيفُ چٖي، لَڪَنِ مَنجِهِہ لُڇان،
پانڌِي ڪيرُ پُڇان؟ وِھان تان نَہ وَسِ پِئو.

بيت - 6

وَڌو ڪِيمَ، وَڻاہُ! اُنچا، ڏُنگَرَ! َ ٿِيو،
ٽِمو مَ نيڻاہُ! تَہ پيرُ نِهارِيان پِرِيَ جو.

بيت - 7

وارو! موُن، وَڻاہُ! ڪا سُڌِ سُنهَپَ
جِي نہ ڏِھو؟
اِيَ اِھائِي ڳالَڙِي، شَجَرَ! سُڻٖيجاہُ،
چوٽِيَ ڇاڙھٖيجاہُ، تَہ مُوڙھِيَ ڪو مُهُ ٿِيٖي.

بيت - 8

وارو! موُن وَڻَراہِ! ڪا سُڌِ سُنهَپَ
جِي نَہ ڏھو؟
وِجهِي وَراڪَنِ ۾، مَعذُورِ کي مَ مُنجهاءِ،
مَنجها پاڻَ پِيادِيوُن، ھادِي ٿِي ھَلاءِ،
پِرِيان کٖي پَهُچاءِ، تَہ لَڳِي لُوٺو نَہ ٿِيٖين.

بيت - 9

وارو! مُون وَڻَڪار! ڪا سُڌِ سُنهَپَ
جِي نَہ ڏِھو؟
آھٖي اَسُونهِيَنِ جِي، مَٿٖي تو مَيارَ،
وِڙِھئا وٖيراڳِڻِ سٖين، لَڪَنِ جا لِيارَ،
ڪَرِيان ٿِي ڪُوارَ، ڪَنڊَنِ ڪانڊٖيرَنِ جِي.

بيت - 10

ڪَنڊا مُون پيرَنِ ۾، توڻٖي لَکَ لَڳَنِ،
آگُرِ، آڱُوٺٖي نَہ مِڙٖي، ڇِپُون پيرَ ڇِنَنِ،
وِيندٖي ڏاہَ پِرِيَنِ، جُتِي جاتِ نہ پائِيان.

بيت - 11

جُتِي سٖي پائِيندِيُون، جَنِين پيرَ پِرِيۡن،
لاٿِيُون سَڀِ پَرِيۡنِ، سَسُئِيَ سُپيٖرِيَنِ کي.

وائي - 1

جيڏِيوُن ! جا جَڙَ لائِي، جِيَّ جَتَنِ سٖين،
ساموُن، سَرَتِيوُن! سٖيباڻِيام: تِه جِئَڻُ
جالَ ڪِئامِ؛
جِيَّ جَتَنِ سٖين، جيڏِيوُن!
مَهَرَ جا ميَنِ جِي، سَنجهٖي ھَٿِ ھُيامِ،
جِيَّ جَتَنِ سٖين، جيڏِيوُن!
صُبحِ سُتٖي سُکَ ۾، ويٖسَلٖي ويٖيامِ،
جِيَّ جَتَنِ سٖين، جيڏِيوُن!
ھَڪَل ھوتَ پُنهوُءَ جِي، سَڳَرَ مَنجهِہ سُيامِ،
جِيَّ جَتَنِ سٖين، جيڏِيوُن!
ڏُورِندٖي ۾ ڏُنگَرٖين، ٿَهَرَ ٿوڀَ ٿِيامِ،
جِيَّ جَتَنِ سٖين، جيڏِيُون!
ڪوڙيٖين ڀالَ ڪَرِيمَ جا، گَنجٖي مَنجهِہ
گُهرِيامِ،
جِيَّ جَتَنِ سٖين، جيڏِيوُن!
سُتٖي سَڳَرَ پَٽِيٖين، سِگَهڙِي سارَ لَڌِيامِ،
جِيَّ جَتَنِ سٖين، جيڏِيوُن!
ڪِيهُون ڪوھَنِ پَٽِيٖين، ڪُوڪُون جَماجانِ،
جِيَّ جَتَنِ سٖين، جيڏِيوُن!
ھوتاڻِي ھَٿُ کَڻٖي، پُنهوُ پِيادِيانِ،
جِيَّ جَتَنِ سٖين، جيڏِيوُن!
ڏُکُون، بُکُون، ڏاکڙاہ، ڪارَڻِ جَنِ ڪِئامِ،
جِيَّ جَتَنِ سٖين، جيڏِيوُن!
موٽِي، ماءِ! ڀَنڀورَ ۾، اَگَڻِ سٖي ايامِ،
جِيَّ جَتَنِ سٖين، جيڏِيوُن!

داستان چوٿون

بيت - 1

مَرِي، جِيُ، تَہ ماڻِيٖين، جانِبَ جو جَمالُ،
ٿِيٖين ھُندَ حَلالُ، جٖي پَندِ اِھائِي پارِيٖين.

بيت - 2

مَرُ، تَہ موچارِي ٿِيٖين، اَجَلا اَڳٖي اَڄُ،
جان ڪِينۡ ھُئٖين جِيَريِ، تَہ مُنڌَ! ڀَنڀورا ڀَڄُ،
پُنهُوءَ ساڻُ پَهَڄُ، تَہ مَلَڪَ الۡمَوتُ ماڻِيٖين.

بيت - 3

مَرُ، تَہ موچارِي ٿِيٖين، جِيَڻُ آڏو جَتَ،
ھارِي! ڪَرِ ھِمَتَ، تَہ ڏيئِي دَمُ دوسُ لَهٖين.

بيت - 4

مَرُ، تَہ موچارِي ٿِيٖين، ويهِي وِجهُہ مَ ويرُ،
دِلِ ۾ آڻِ مَ دَورُ توُن، ڦِرَڻُ سَندو ڦيرُ،
توڻٖي لَهٖين نَہ پيرُ، توءِ راحَتَ اَہِ رِڙھَڻَ ۾.

بيت - 5

مَرُ، تَہ موچارِي ٿِيٖين، ويهِي جِيُ مَ، جوءِ!
مُنڌَ مَرَڻا پوءِ، پَهُچَندِينءَ پُنهُوءَ کٖي.

بيت - 6

اَجَلا اَڳٖي، سَسُئِي! مُنڌَ! جِيَرِيائِي مَرُ،
ٽولِئا تِه مَ ٽَرُ، جِه رُوحُ وِڃايو راہَ ۾

بيت - 7

مَرَڻا اَڳٖي جٖي مُئا، سٖي مَرِي ٿِينِ نَہ ماتِ،
ھُندا سٖي حَياتِ، جِيڻا اَڳٖي جٖي جِيا.

بيت - 8

جِيَڻا اَڳٖي جٖي جِيا، جُڳِ جُڳِ سٖي جِيَنِ،
اُوءِ موٽِي ڪِينَ، مَرَنِ، مَرَڻا اَڳٖي جٖي مُئا.

بيت - 9

اُنچو اُتاھُون گَهڻوُن، جِيَڻَ کٖي جَبَلُ،
مَرَڻَ! مُون سٖين ھَلُ، تَہ پُٺِيَ تو پَنڌُ ڪَرِيان.

بيت - 10

تو سَڱُ، ساہَ! گَهڻَنِ سٖين، جِيَڻَ! گوشٖي جاءُ،
مَرَڻَ! مُون سٖين آءُ، تَہ پُٺِيَ تو پَنڌُ ڪَرِيان.

بيت - 11

تو سامائٖي، سَسُئِي! مَرَڻُ ڪِئو مُردارُ،
ڪُپَرِ سٖين ڪوھِيارُ لُوٺِي! تو لَڄائِيو.

بيت - 12

پَرِ ۾ پَچِيِ پِرِيَ کٖي، مَرِي نَہ ڄاتوءِ،
”مُوۡتُوۡ“، مُنڌَ! نَہ سوءِ، ڪَنڌُ ڪُڄاڙِئا ڪاٽِيٖين؟

وائي - 1

توڏَنِ تان نہ تَوارِيو، مُهجو لالَنُ وارِيو،
اَللھَ ڪارَڻِ، مِيان! اوٺِيا!
شَرَفُ لَهٖي سَسُئِي، ڪُٺَلِ کي ڪَمُ ڪارِيو،
مُهجو لالَنُ وارِيو.
مٖيندِيَ مورَ مَلِيرَ جا، چانگَنِ کٖي سَڀِ چارِيو.
مُهجو لالَنُ واريو.

داستان پنجون

بيت - 1

ھَٿٖين، پٖيرٖين، مُونَڙِيٖين؛ ھَلِجِ ساڻُ ھِيٖين،
عِشقُ آرِيَ ڄامَ جو، نِباھٖي نِيٖين،
جان جان ٿِي جِيٖين، تان پاڙِجِ ڪومَ
پُنهوُءَ سٖين.

بيت - 2

ھَٿٖين پٖيرٖين، مُونَڙِيٖين؛ ڪَهِجِ ڀَرِ ڪَپارَ،
مَتان، ڇورِي! ڇَڏِيٖين، پِرِيَتَڻي پَچارَ،
توکٖي سَنَدَ، سَسُئِي! سَندِي لَنءَ لَغارَ،
جٖي ھُونِءِ ھوتَ ھَزارَ، تہ پاڙِجِ ڪومَ پُنهُوءَ سٖين.

بيت - 3

ھَٿٖين؛ پٖيرٖين، مُونَڙِيٖين؛ ڪَهِجِ ڀَرِ قُدامَ،
وَچِ وَسِيلو ناہِ ڪو، اورٖي آرِيَ ڄامَ،
ھِيٖين لائٖي ھامَ، پاڙِجِ ڪومَ پُنهُوءَ سٖين.

بيت - 4

ھَٿٖين، پٖيرٖين، مُونَڙِيٖين؛ پُرِي ڪجِ پَرَکَ،
قَدَمُ ڪيچَ ڌَڻِيَنِ ڏٖي، پاءِ وَڌَندِي وِکَ،
جٖي ھُونِءِ ھوتَنِ لَکَ، تہ پاڙِجِ ڪومَ
پُنهڦوءَ سٖين.

بيت - 5

ھَٿٖين، پٖيرٖين مُونَڙِيٖين؛ سِرِجِ ساہَ پَساہَ،
ھوتُ گَڏِبُءِ حَبَ ۾، رَھَبَرُ مَٿٖي راہَ،
جان جان ساڻُءِ ساہُ، تَہ پاڙِجِ ڪومَ پُنهُوءَ سٖين.

بيت - 6

ٿَڌِيَ ٿَڪِي نَہ وِھٖي، تَتِيَ ڪَرٖي تاڻَ،
وِڌائِين وَڻِڪارِ ۾، سَسُئِيَ پاڻُ سُڪاڻَ،
پُڇٖي پَهَ پَکِيَنِ کٖي، پيئِي مُنڌَ پَرِياڻَ،
ڏِنَسِ ڏيٖهَ وَڻَنِ جا، تَنِ اَللھَ لَڳِ اُھڃاڻَ،
مانَ پَرَچِي پاڻَ، اَچٖي آرِياڻِي وَرِي.

بيت - 7

توڻٖي وِلاڙُون ڪَرٖين، توڻٖي ھَلٖين وِکَ،
لِکِئٖي مَنجها لِکَ، ذَرو ضايعَ نَہ ٿِيٖي.

بيت - 8

لِکِئو جو نِراڙِ، سو اَنگُ ڪِياڙِيَ نَہ ٿِيٖي،
پارِئو ويٺيِ پارِ، جٖيڪِينۡ لالَنَ لِکِئو لوحَ ۾.

بيت - 9

جِتٖي جيتَرِيُون، لِکِيُُون لوحَ قَلَمَ ۾،
تِتٖي تيتَرِيُون، گَهڙِيوُن گهارَنُ آئِيوُن.

بيت - 10

ڪِيائِين ڪيچِيَنِ لَءِ، جُسو جَلاوَتَ،
ڇَڏٖي، ٻيٺٖي ڇَپَرٖين، ھارِي سَڀِ حُجَتَ،
ھُئِي نِماڻِي نِسَتَ، پَنڌُ وِڌائِين پاڻَ تي.

بيت - 11

ڏُکِيَ ڏورَڻُ پاڻَ تٖي، ويچارِيَ وِڌو،
ڏِيلُ جِهِ جو ڏُکَ سٖين، سَڀوئِي سِڌو،
ھُئَڙُسِ اَڳَ لِڌو، پوءِ ٿِي ڪَرٖي پَنڌَڙا.

بيت - 12

پَنڌُ نَہ پَنڌَنِ جيتَرو، ڪِنءِ سُڄَندِي ڪِيهَ؟
جيڪَرَ ڪَرِيا رِيهَ، پَرَ چُندا مُنڌَ چَرِي ٿِييِ.

بيت - 13

چُونِمِ مَرُ چَرِي ٿِيِي، پَرَ جٖي سَڏُ سُڻِينِ،
مَرُ مُنهيِن کٖي ڏِينِ، ماڙھُو اَچِئو مِيهَڻا.

بيت - 14

ماڙھُو ڏيئيِ مِيهَڻا، مُون کٖي ڪَندا ڪوہُ؟
جِه ڇورِيَ ۾ ڇوہ، سا پِٿُون ٿِندِي پٖيرَ تٖي.

وائي - 1

وِہُ مَ واٽَ وِرڃِي، ھو! اَلاَ! مِيان!
جِنءَ ڪَهَندِنءَ تِنءَ لَهَندِنءَ.
ڪَنِين اَچِي ڪَا ڪَهِي، ڪَنِين اَچِي ڪا چَئِي،
جِنءَ ڪَهَندِنءَ تِنءَ لَهَندِنءَ.
اَمُلُ ڀايان اُنَ کٖي، ساڄَنَ مُنکٖي جاچَئِي،
جِنءَ ڪَهَندِنءَ تِنءَ لَهَندِنءَ.
پيرَ پَٽائِين ڪُونئَرا، رائٖي ڪِيَسِ رَچِي،
جِنءَ ڪَهَندِنءَ تِنءَ لَهَندِنءَ.
مُهُ ڪَرِ مَعذُورِنِ ڏٖي، پُنهُو ڄامَ! پَرَچِي،
جِنءَ ڪَهَندِنءَ تِنءَ لَهَندِنءَ.
موُن کٖي تِهِين مارِئو، جَتَنِ جا چَئِي،
جِنءَ ڪَهَندِنءَ تِنءَ لَهَندِنءَ.
وِندُرَ واٽَڙِيَنِ تٖي، ڪانڌِي ٿِندَمِ ڪيچِي،
جِنءَ ڪَهَندِنءَ تِنءَ لَهَندِنءَ.

داستان ڇھون

بيت - 1

جَهلِي تان نَہ رَھان، ڌارا پَسَڻَ پِرِيَ جٖي،
اَپَرِ عاجِزِ آھِيان، لالَنُ جان نَہ لَهان،
فَردا مُون ڦِٽِي ڪِي، وَعدٖي ڏٖي نَہ وَھان،
صُباحَ سِينءَ نَہ سَهان، خواہِ مٖيڙِيٖين،
خواہِ ماريٖين.

بيت - 2

فَردا مُنڌَ ڦِٽِي ڪِي، نَقدُ کَنيو نارِ،
ھِيَ جا واڳَ وِلَهِيَ جِي، ويرَمَ ڏٖي مَ وارِ،
جٖيڪِين مُٺِيَ مارِ، جٖيڪِين ميڙِ مُٺِيَ کٖي.

بيت - 3

مُٺِيَ ٿِي مُدَعا گُهرٖي، موتُ ٿِئو مَوجُودُ،
اَچٖين تَہ اَڄُ ڪَرِيان، صُباحَ جو سُجُودُ،
جٖيڪِين نٖي وُجُودُ، جٖيڪِين ميڙِ مُٺِيَ کي.

بيت - 4

جٖيڪِين ميڙِ مُٺِيَ کٖي، جٖيڪِين مُٺِيَ،
ڏُکِيَ کي ڏيکارِ، ھيڪَرَ ھوتُ اَکِنِ سٖين

بيت - 5

ڏُکي ٿِي ڏَڌورَ، لَهَسِي لَنءَ، پُنهُوءَ جٖي،
ڏيئِي آڳِ اَتورَ، سَڀَ نَہ کانئِي سَسُئِي.

بيت - 6

ڏُکِي! ڏِکَ وِسارِ، سٖيڄَ ڦِٽِي ڪَرِ، سَسُئِي،
پَٽِيٖين پيرُ نِهارِ، تَہ آرِياڻِي اُتان لَهٖين.

بيت - 7

ڏُکِي! ڏُکُ مَٿٖي ڪَرٖي، وانءُ ڇَپَرِ پيهِي،
گَڏِبَئِي ڏٖيهيِ، سُوڌِيُون ڏِندَءِ خَبَروُن.

بيت - 8

ڏُکِيَ ڏِيهاڻِي، مُٺِيَ مَٿٖي ھَٿَڙا،
تِه پَرِ نَہ کاڻِي، جِه پَرِ جِيٖي، جيڏِيُون!

بيت - 9

ڏِسَڻُ ڏِکا اَڳَرو سَسُئِي! آڻِ مَ شَڪُ،
ٿِيُ ٻانِهِي، ڀَرِ اوئِيُون؛ لُڏُ مَ، پَسِي لَڪُ،
وَرُ پُنهوُءَ سٖين پَلَڪُ! کوءِ ٻارَہَ ماہَ ٻَئنِ سِيٖن!

بيت - 10

ھَردَمُ ھوتَ پُنهُوءَ جو، ڏِسَڻُ ڀائِجِ ڏِکَ،
وَرُ پُنهُوءَ ساڻ پَلَڪَ! ٻَنِ ٻارَہَ وَرِہَ ٻِئَنِ سٖين!

بيت - 11

ٿورَ ويٖرَمِي ٿِيُّ، وَڃَڻُ ويرَمَ نَہ سَهٖي
ڏيئِي مَرِجِ ڏُنگَرٖين، جَتَنِ ڪارَڻِ جِيُّ،
ھَڏِ نَہ ھُندو ھِيُّ؛ ساہُ پِريان تان صَدَقو!

بيت - 12

ڏُکِيَ سَندِيوُن ڏُنگَرٖين، آڌِيَ آھوُن پُونِ،
ڏارٖي جو ڏُنگَرَ کٖي، سو ڪِينۡ چَيو چُونِ،
آرِيَ جٖي اَفسوسَ ۾، ماڙھُو مِروُن رُونِ،
اِنَ پَرِ سيئِي ھُونِ، ھِيَڙا جَنِ ھَڄِي وِئا.

بيت - 13

ڏُکِيَ سَندِيوُن ڏُنگَرٖين، پَسو! پِٽُون پُونِ،
مُئٖي پُڄاڻا مُنڌَ کي، روجهَہ رُڃُنِ ۾ رُونِ،
ڀُوڻا اِيَهِين چُونِ، تَہ ”مُيَ اَسان کٖي مارِئو!“

بيت - 14

ڏُکِيَ سَندِيوُن ڏُنگَرٖين، اوڇِنگارُون اَچَنِ،
ھَڻِي سانگِ سَسُئِيَ کٖي، ڪِلو ڪِئو ڪيچِيَنِ،
جٖي ھَٿا ھوتَ مَرَنِ، ھوتُ تَنِين جٖي ھَنجَ ۾.

بيت - 15

ڏُکِيَ سَندِيُون ڏُنگَرٖين، وَڻَ ٽِڻَ وايُون ڪَنِ،
وَٽا ويهِي جَنِ، وَڍِيَ سٖي واڍوڙِئا.

بيت - 16

وَڍِيَ سٖي واڍوڙِئا، رَتُ نَہ ڏِٺو جَنِ،
مَوتُ قَبُولِئو تَنِ، ڏِٺو جَنِ ڏُکِيَ کٖي.

بيت - 17

ڪِه جِه ڏُکا ڏٖي، پاراڀا کٖي پانڌِييٖن،
سُورَ ڀَرِيائِين سٖي، ڳالِ ڪِئائِين جَنِ سٖين.

بيت - 18

ڪو جو وَڍِيَ وَڍُ، جِنۡ وِڻَ وَڍِيائِين وَڍَ سٖين،
ڏُکُ ڏُکِيَ کٖي ڏَڍُ، جَنِ ڏِٺِي سٖي ڏُکِئا ٿِئا.

بيت - 19

وَڍِيَلِ ٿِي وايُون ڪَرٖي، ڪُٺَلِ ڪُوڪارٖي،
ھُنَ پَنَ پَهِجا سارِئا، ھِيَ ھَنجُُون ھَڏَنِ لاءِ ھارٖي.

بيت - 20

ڏُکِيَ توءِ ڏُڪارُ، توڻٖي وَسَنِ مِيهَڙا،
صاحِبَ ھَٿِ سُڪارُ، ھِنَ وَسِ آھِينِ ھَٿَڙا.

بيت - 21

ڏُکِيَ توءِ ڏُڪارُ، سٖيڻَنِ ڏيٖهُ سُڪارِئو،
ٻاروچاڻُون، ٻارُ، سَڀوئِي سُُواءَ سٖين.

وائي - 1

اَچِي، لالَنَ! لَٽِ، مِيان! مُيَ جو لوڙہُ لَڪَنِ ۾.
ھو کانُ کَٿُورِيَ ھٖيرَئوُن، موُن صابُڻَ ڇَٽَ،
مُيَ جو لوڙہُ لَڪَنِ ۾.
آرِياڻِي! اَچِي ڪَرٖي، ڪا گَهڙِي موُن وَٽِ جَٽِ،
مُيَ جو لوڙہُ لَڪَنِ ۾.
کَٿُورِي کَشبُوءِ سٖين، ھارِيائون ھَٽِ ھَٽِ،
مُيَ جو لوڙہُ لَڪَنِ ۾.
دَردُ مُهِجٖي دِلِ جو، تُون، ڪامِلَ! اَچِي ڪَٽِ،
مُيَ جو لوڙہُ لَڪَنِ ۾.
اَدِيوُن! عَبدُاللَّطِيفُ چٖي، سِرَ تائِين آھٖي سَٽِ،
مُيَ جو لوڙہُ لَڪَنِ ۾.

داستان ستون

بيت - 1

آئُون نَہ گَڏِي پِرِيَ کٖي، ٿورا ڏِيهَ ٿِئا،
راتٖين روزَ وِئا، عَبَثُ آرِيَ ڄامَ رٖي!

بيت - 2

آئوُن نَہ گَڏِي پِريَ کٖي، سَهَسٖين سِڄَ وِئا،
ھَلَڻَ وٖيرَ ھِئا، ديٖکٖي شالَ دَمُ ڏِيان!

بيت - 3

آئُون نَہ گَڏيِ پِرِيَ کٖي، تُون ٿو لِهٖين، سِڄَ!
آئُون جٖي ڏِيَنءِ سَنٖيها، نٖيئِي پِرِيان کٖي ڏِجِ،
وَڃِي ڪيچِ چَئِجِ، تَہ ”ويچارِي واٽَ مُئِي!“

بيت - 4

آئوُن نَہ گَڏِي پِرِيَ کٖي، پويوُن ٿِيو پَساہُ،
سِڪان ٿِي سَڪَراتَ ۾، رويو پُڇان راہُ،
شالَ مَ وِڃٖيمِ ساہُ، ڌارا پَسَڻَ پِرِيَ جٖي!

بيت - 5

آئُون نَہ گَڏِي پِريَ کٖي، عُمِرِ تان ويئِي،
وِلَهِيَ ڏِيهَ وِڃائِيا، سَرَتِيوُن! سَڀيئِي،
پِيرِيَ ۾ پيئِي، اَکِيوُن آرِيَ ڏٖي کَڻٖي!

بيت - 6

آئوُن نَہ گَڏِي پِرِيَ کٖي، جوڀَنُ وِئو جاڙُ،
آڏا آرِيچَنِ کٖي، چاڙھِيڪا ۽ چاڙَ،
موُن مُٺِيَ کان نَہ ٿِيٖي، وَڏَپَڻَ مَنجِهہ وِلاڙَ،
عُمِرِ سَڀِ اَواڙَ، ويٖيَمِ! ٿِي واڪا ڪَرِيان!

بيت - 7

آئوُن نَہ گَڏِي پِريَ کٖي، ھِيُ پُڻِ ڏِيهُ وِئو،
نِهوڙٖي ناڀُنِ سٖين، موُن کٖي نِيهَ نِئو،
مُٺِيَ مَوتُ ٿِئو، ”پِيُّ، پِيُّ“ ڪَندٖي پَنڌَ ۾!

بيت - 8

آئُُون نَہ گَڏِيَ پِرِيَ کٖيم آيو عِزۡرائِيلُ،
جوراڻٖي سيٖن، جيڏِيُُن! نَڪو قالُ نَہ قِيلُ،
آيو مَوتَ دَلِيلُ، مارِيندو مُرادَ کان!

بيت - 9

آئوُن نَہ گَڏِي پِريَ کي، مَٿا آيو مَوتُ،
واجهائِندٖي وَرِہَ ٿئا، ھَڏِ نہ گڏئُمِ ھوتُ
جِڪُسِ ٿينديَسِ فَوتُ، فَنا ھِنَ فِراقَ ۾!

بيت - 10

وِلاڙِئو وَڻٖين چَڙھٖي، ڳِجهُنِ ٿِندِي ڳاہُ،
سَسُئِيَ سُورِيَ چاڙِھئو، پِرِيان لَءِ پَساہُ،
ھو مِروُن ھِيُ ماہُ؛ ڪِينَ ڪَمِيڻِيَ رَکِئو.

بيت - 11

وِلاڙِئو وَڻٖين چَڙھٖي، رَئِي پَسِئو روءِ،
وِچا جو وِچُ پوءِ، سو ڪِه پَرِ ڪَهِي لاھِيان!

بيت - 12

وِلاڙِئو وَڻيين چَڙھٖي، اُنچَنِ مَٿٖي اَڄُ،
لالَنَ ڪارَڻِ لَڄُ، باسِيائِين بَردارَ جو.

بيت - 13

وِلاڙِئو وَڻٖين چَڙھٖي، ڏِئو پَٽولٖي لانگَ،
ٽارِيَ ٽارِيَ ڇانگَ، سَسُئِيَ مورَٻَچَنِ جِنۡ.

بيت - 14

وِلاڙِئو وَڻٖين چَڙھٖي، پَسو سَگهَہ سَندِياسِ،
آڌِيَ وَڃِئو آکُڙٖي، نَڪو پِيُ نَہ ماسِ،
سوئِي سو سٖيڻاسِ، پَرٖي پَڙاڏا ڪَرٖي.

بيت - 15

وِلاڙِئو وَڻٖين چَرھٖي، ڏاڍو ڏورٖي ڏوُرِ،
سُپيرِيان جٖي سُورِ، پَرٖي پَڙاڏا ڪَرٖي.

بيت - 16

پَرٖي پَڙاڏا ڪَرٖي، اورٖي نَہ آھٖي،
ڪَمَتَرِ ڪا ڪاھٖي، پَهُچٖي ھِنَ پَٽِيَ کٖي.

بيت - 17

رُڃُنِ ۾ رَڙِ ٿِي، ڪَرَ ڪَووَلَ جِي ڪُوڪَ،
وَلوَلو ۽ وُوڪَ، اِيَ تاہ آہَ عِشقَ جِي.

بيت - 18

رُڃُنِ رَڙِ ٿِي، ڪَرَ چَتوُنءَ جِي چانگارَ،
اِيَ عِشقَ جِي اُٻَڪارَ، نَعرو آھي نِيهَ جو.

بيت - 19

رُڃُنِ ۾ رَڙِ ٿِي، جِهَڙِي ڪَرٖي جوءِ،
اِيَ نَہ عَورَتَ ھوءِ، اِيَ تان آہَ عِشقَ جِي.

بيت - 21

رُڃُنِ ۾ رَڙِ ٿِي، ڪَرَ سارَنگِيَ دازُ،
اِيُ عِشقُ جو آوازُ، ماڙھُو رَکَنِ مُنڌَ تٖي.

وائي - 1

ھِيَ گهايَلِ ھَڏِ گهورِي،
وو! اَلا! مِيان! ڪيچي موُن نَہ سَڱِيڻا.
عِشقَ آرِيَ ڄامَ جٖي، ھِيَ جُهونَڙِي ھَڏِ جهورِي،
وو! اَلا! مِيان! ڪيچِي موُن نَہ سَڱيِڻا.
رَھِي جا رُڃُنِ ۾، سا ڇَپَرِ ڇَڏِھو مَ ڇوري،
وو! اَلا! مِيان !ڪيچي مون نہ سَڱِيڻا.
اَدِيُون آريِچَنِ لَءِ، ڏُنگَرِ ٿِندِيَسِ ڏورِي،
وو! اَلا! ڪيچِي موُن نَہ سَڱيِڻا.

سر ديسي

داستان پھريون

بيت - 1

مُٺِيَسِ! جَهلِ مَهارَ، ڪُٺِيَسِ! ڪاہِ مَ ڪَرَھو،
موُن نِماڻِيَ جٖي نِجُهرٖي، ڀٖيرو ڪِجِ ڀَتارَ!
ساڄَنَ! توھان ڌارَ، ڏِٺُمِ ڏِيهُ قِيامَ جو.

بيت - 2

ڏاگَهنِ ڏٖيرَن، ڏُنگَرَنِ، ٽِنِينۡ ڏِنَمِ ڏُکَ،
سٖي سَڀِ ڀانيَمِ سُکَ، ھيڪاندِ ڪارَڻِ ھوتَ جٖي.

بيت - 3

ڏاگَهنِ ڏيرنِ، ڏُنگَرَنِ، ڏُکَنِ آئُون ڏَڌِي،
پُڇان پيرُ پُنهوُءَ جو، وِجهان وِکَ وَڌِي،
لِکِئٖي آئُون لَڌِي، ناتَ پَٽِنِ ڪيرَ پَنڌَ ڪِرٖي؟

بيت - 4

ڏاگها! ڪِيمَ ڏَرو، اَڃا آرِياڻِي اَڳٖي ٿِئو،
موڙٖي مَڃَرَ ٽارِيُون، چانگا!ٿا چَرو،
آن تان حَرَفُ ھَرو، مُورائِيم مَعافُ ٿِئو.

بيت - 5

اَڱڻَ مَٿٖي اوپِرا ، جَڏۡہِ ڏاگها ڏِٺَءَ ڏِيهَ،
وَٺِي سَڙَڪَ، سَسُئِي! وٖيهُ وِھاڻِيَ سِيَّ،
چوٽٖي سٖين چانگَنِ کٖي، جَڙِ زَنجِيرَنِ جِيَّ،
تَہ ھوتُ تُهِجو ھِيَّ، پُنهُو نِيائُون نَہ پاڻَ سٖين.

بيت - 6

اَڱَڻَ مَٿٖي اوپِرا، جَڏِہۡ ڏاگها ڏِيهَ ڏِٺاءِ،
ڪُنجُون جٖي قُفِلَنِ جِيوُن، تان ڪِهۡ لَلِ لِڪاءِ،
تَہ سُڀاڻٖي سَندِياءِ، ٿِيٖي سارُوڻِي، سَسُئِي!

بيت - 7

اَڱَڻَ مَٿٖي اوپِرا، جَڏِہِ ڏِٺَءِ اُٺَ،
ڏايُءِ نہ ڏاگَهنِ کٖي، اوڳِي! ساڻُ اَڳَٺَ!
تَہ ھُندَ نہ تُهجٖي ھَٺَ، سُورَ پِرايا سَسُئِي!

بيت - 8

اَڱَڻَ مَٿٖي اوپِرا، جَڏِہۡ ڏِٺَءِ توڏا،
وَنگِيَءِ نَہ وارَنِ سٖين، تَنِ گورَنِ جا گوڏا؟
تَہ لَڪَنِ جا لوڏا، ھُندَ نہ سَٺَءِ سَسُئِي!

بيت - 9

ڏاگَهِنئِوُن ڏيرَِن، جٖي آندا ٻَرۡدَ ڀَنڀورَ ۾،
ھَڻِي چِيلَ چَرا ڪِئا، وَہِ پَئِي وَھُڙَنِ،
کُڙِيَ کُڙڪو اُنِ جو، ھُندَ سُتٖي سو سَڀَنِ،
ڏاندَنِ ساٿِ سَيّدُ چٖي، پِيادِيوُن پَهُچَنِ،
جَنِ جو پيرُ نَہ لَڳو پَٽِيٖين، تَنِ آيَمَ ساڻُ اُٺَنِ،
گُنگَنِ ۽ جُنگَنِ، مُنڌَ اَسُونهِين مٖيڙِيٖين!

بيت - 10

اَڳٖي اُٺَ رَڙَنِ، موُن ڀٖيرٖي ماٺِ ٿِيي،
پَلاڻِيندٖي پاڻَ ۾، ڪُڇِئو ڪِينَ ڪُٺَنِ،
ڪاجا مامَ مُٺَنِ، ھِنَ پُڻِ ھُئِي ھُنِ سٖين.

بيت - 11

ڇا جٖي ڏِنگا ڏٖيرَ؟ مُهِجو ڏِيهُ ڏِنگو مَ ٿِيٖي!
اُٺَنِ اوٺِيَڙِن جٖي، ڇا وَھِيڻوُن وٖيرَ؟
ھِيَ ڪَمِيڻِي ڪٖيرَ؟ جا اَمُرَ کي آڏِي ڦِرٖي.

بيت - 12

دٖيسِي سيڻَ ڪِجَنِ، پَرَديسِي ڪِهَڙا پِرِين؟
لَڏِئو، لاڏُوڻا ڪِئو، پَهِجي ديسِ وَڃَنِ،
پُڄاڻا پِريَنِ، ڪِجٖي بَسِ ڀَنڀورَ کان.

بيت - 13

ڌُرِئائِين ڌارِيان، مِٽَ مُيَّ جا نَہ ٿِئا،
مَدِي ڏيرَنِ مَنَ ۾، کِلِئو کِنڪارِيان،
صُبُوحِ ٿِي سارِيان، تَہ اُٺَ نَہ اوطاقُنِ ۾.

بيت - 14

اُٺَ مَ اوورٖي آڻِ، ڏاگَهنِ ڏَڌِي آھِيان!
ھَڻِي ھَٿُ ھَيَنِ کٖي، پَرٖي کٖي، پَرٖي نٖيئِي پَلاڻِ،
ھوتُ مُهجو ھاڻِ، پُنهُو نِيائُُن پاڻَ سٖين.

بيت - 15

جَتا! شالَ جِئو! جِئو! ٿا جاڙُون ڪَرِھو؟
ٻانَڀڻِ کٖي ٻَروچَ رٖي، ٻيلِي ناہِ ٻِئو،
ڇِنَڻُ تان نَہ پِئو، ھِيُ سَگَُ نہ ڇِنَڻَ جٖيهَڙو.

بيت - 16

جَتَنِ جا جٖيلا، ٿِي ساٿَ پُڇائٖي سَسُئِي،
آيَسِ آرِيَ ڄامَ جا، تَڙِ توڏا تٖيلا،
اُنِ کٖي ناڪٖيلِيوُن نَڪَن ۾، دُھِرِيوُن، دَلٖيلاَ،
سِرِھَڻِئو سٖيلا، لايو نِيهُ، نِنڊُون ڪَرٖين!

بيت - 17

جَتَنُ ڪِجِ جَتَنِ جو، آئِيا ڪِ اِيندا،
وَٺِي پُنهُو پاھِجو، وَٽا تو وِيندا،
دَمُ نَہ دَمِيندا، سِڌارِيندا ساڻٖيهَ ڏي.

بيت - 18

جَتَ ھَڏِھِين ھُتِ، موُن ھِتِ ھِيَڙٖي ۾ حَلُ ٿِئا،
چَنگُلَ جَنِين چَوڦَرا، راحَتَ تَنِ جِي رُتِ،
گُنگَنِ جِيَ گُپُتِ ڇٖيڙٖي وِڌِيَسِ ڇَپَرٖين.

بيت - 19

جَتَنِ وِڏِيَسِ جارِ، ناتَ ھُيَسِ نِماڻِي نِڪَڻِي،
ٿِئَڙا پاڻَ قَرارِ، موُن مَنُ گَڏٖي گُندَرٖين.

بيت - 20

جٖي ڄاڻان جَتَنِ، پوءِ پَٽاندَرُ ھيتَرو،
آئوُن ڪِنءَ مُلاتَنِ، سَرَتِيون! سُورَ پرائِيان؟

بيت - 21

ھٖي جٖي آيا ھٖيرَ، موُن اَڳَ نَہ ڏِٺا ڪَڏِھِين،
آئوُن ترَسان، ھو تَڪِڙا، پَٽِ نہ لائِنِ پيرَ،
ڀَنڀولِيَسِ بَرَنِ ۾، پَسِي ڀِينڊِيَنِ ڀيرَ،
آءُ، آرِياڻِي! اُسَرِي، ٿِي واھَرَ جِي ويرَ،
ھِيَ ڪَمِيڻِي ڪِيرَ؟ توُن، پارِسَ! رَسِجِ پَٻَ ۾.

بيت - 22

جَتَنِ يارانُون، ڪيچِنِ موُن سٖين ڪونَ ڪِئو،
نالٖي سُيَسِ ھوتَ جٖي، مَٿِمِ ٻارانُون،
تيلاھِين طَعۡنوُن، ڏيِندا موُن ڏيرَ وِئا.

بيت - 23

گورا وَڃَنِ گامَ، ڏيرَنِ سَندا ڏٖيهَ تٖي،
توڏَنِ جِيوُن تَڙَ ڀِيڙَ ۾، تَرِيُون تَرِڪَنِ تان مَ!
اوٺِيَڙا آرامَ، لَنگهِي پَٻُ، پَرٖي ٿِئا.

بيت - 24

گَهَ سِرِ ٿِيٖي مَ گُسَ، پَڻِي پوءِ م پِرِيَ تٖي!
جِه سِرِ ساڄَنُ سُپِرِين، تِ‏ه اُٺَ مَ لَڳٖي اُسَ!
پُنهُو! پاڪَ پُرِسَ! ھوتَ! نَہ ڪِجَنِ ھيڏِيوُن.

بيت - 25

اُسَ مَ لَڳي اوٺِيٖين، لٖيڙان لُڪَ مَ لَڳَ!
اَللَھ! آرِيچَنِ کٖي، ڪوسو واءُ مَ وَڳَ!
جَتَ جَجها ۾ جَڳَ، مُهِجِي پِرِتِ پنُهُوءَ سيٖن.

بيت - 26

لَڏِيندٖي لِباسُ، جَتَنِ جيڏوئِي ڪِئو،
اَچٖي آرِيَ ڄامَ جو، وَڻَ وَڻَ مَنجها واسُ،
مِروُن کِيَنِمِ ماسُ، ھَڏَ ھَلَندا ھوتَ ڏٖي.

بيت - 27

اُٺَ ويرِي، اوٺارَ ويرِي، ويرِي ٿِئَڙَمَ ڏيرَ،
چوٿُون ويرِي واءُ ٿِئو، جِه لَٽِئا پُنهُوءَ پيرَ،
پَنجُون ويرِي سِڄُ ٿِئو، جِه اُلَهِي ڪِي اَويرَ،
ڇَهون ويرِي ڇَپَرُ ٿِئو، جِه سَوان نَہ ڪِئا سٖيرَ،
سَتوُن ويرِي چَنڊُ ٿِئو، جو کِڙِئو نَہ وَڏِيَ ويرَ،
واھٖيرٖي جِيَ ويرَ، ڇُلُون ڪَرِيان ڇَپَرٖين!

وائي - 1

ڏاگَهنِ ڏيرَنِ ساڻُ، ڪَرَھَنِ، ڪٖيچِنِ ساڻُ،
مَتان ڪا ٻِي لَنءُ لائٖي!
آئوُن سُتِي، ھو ھَلِئا، وِئَڙا ڪَرَھَلَ ڪاھٖي،
مَتان ڪا ٻِي لَنءُ لائٖي!
آسَڻَ اََڳِئا اُنِ جٖي، ”ٻَرِ ٻَرِ!“ ڪِئو ٻاڏائٖي،
مَتان ڪا ٻِي لَنءُ لائٖي!
چَتُرَ ڏيئِي چِٽَ کٖي، وِئَڙا ھوتُ ڇَپائٖي،
مَتان ڪا ٻِي لَنءُ لائٖي!
جيڪا ھُيَنِ مَنَ ۾، وِئَڙا پَهجِي پُڄائٖي،
مَتان ڪا ٻِي لَنءُ لائٖي!
اَدِيوُن! عَبدُاللَّطِيفُ چٖي، اِيندَمِ واڳَ وَرائٖي،
مَتان ڪا ٻِي لَنءُ لائٖي!

داستان ٻيون

بيت - 1

اَڄُ پِہ وَسائِي اوٺِيٖين، مَٿٖي مارَڳَ ماڪَ،
پُنهُو نِيائُون پاڻَ سٖين، تاڙِيوُن ڀَڃِي طاقَ،
ھَيُهاَتَ ھَيۡهَاتَ لِمَا تُوۡ عَدُوۡنَ، سُڃِي ٿِي اوطاقَ،
چُڪِيَ چورٖي چاڪَ، ھاڙٖي ھوتَ ھَلِي وِئا.

بيت - 2

مِڙِي مُنڌَ ڏٖي آئِيوُن، ساھٖيڙِيوُن سَهَجا،
اَلَسَّفَرُ قِطۡعَةٌ، مِنَّ النَّارِ، ھارِي! موٽُ ھِتا،
سَڱُ صِرَاطَ الۡمُسۡتَقِيۡمَ جو، اَٿِي تان اَڳِئا،
سٖي ڪيچِي نِندَءِ ڪِئا؟ تُهِجو نِيهُ نِفاقَ سٖين.

بيت - 3

جَڏاہَ ڪُنۡ فَيَڪُوۡنُ چَئِي، نِئو آرِياڻِيَ اَرِواحُ،
اَنگُ اَڳَهيِن لِکِئو، مُهِجو مِيثاقاء،
مَنۡ طَلَبَ شَيۡئاََ وَجَدَّ وَجَدَ، اُتو عَلِيَ شاہَ،
اَڃا ھِنَ حَدِيثَ جو، موُن آسَرو آہِ،
پُنهُوءَ جٖي پَيغامَ تان، مُهِجو موتُ مُباحُ،
سَرَتِيُون! دُعا ڪِجاہُ، تَہ مٖيڙائو مُون ٿِيٖي.

بيت - 4

سَبَ سِياھِي، آھٖي آرِيَ ڄامَ رٖي،
ڪَڏِہۡ پَسٖي ڪا نَہ ڪا، رِءَ لالَنَ لالائِي،
دُودُ دِلِ دُورِ ڪَرٖي، ڪَرِ، ساڄَنَ! صَفائِي،
مَنۡ لَا شَيۡخُ لَهٗ فَشَيۡخُهُ الشَّيۡطَانُ، اِنَ رِءَ اُنداھِي،
ھُوءَ جا ھَلِي ھيڪَلِي، سا گِيرَبَ گَمائي،
بِلاَ شَيۡخٍ مَنۡ يَّمۡشِيۡ فِي الطَّرِيۡقِ، اِھَڙِي اَوائِي،
تِهۡ رِءَ تَوائِي، ڪوڙيٖن ٿِينِ ڪيتَرِيوُن.

بيت - 5

بَرُ وَڏو، بارُ گَهڻُون، ويجهو نَہ وَڻِڪارُ،
لٖيڙَنِ جو، لَطِيفُ چٖي، کَنيو مُنڌَ مَدارُ،
وَڻَندُنِ تَہ وَرِا ڪَندا، ناتَ اَڳِيَنِ جو اِختِيارُ،
ڪاڏٖي ٿِئو ڪوھِيارُ! ڪِٿٖي ٿِي ھَٿَ کَڻٖي!

بيت - 6

ڪٖيڙٖي ڪيچايَنِ، گؤرا گَسِ ھَلائِيا،
لَڙِئو، چَڙھِئو چوٽِيٖين، ڪَرِئو ڪوہَ ڪِڙَنِ!
سُونهَنِ جٖي سَردارَ سٖين، سٖي توڏَ مَ تَرٽِجَنِ،
لُطِفَ ساڻُ، لَطِيفُ چٖي، لَنگِهئو بَرُ بوتَنِ،
تَنِ ڪِهَڙو غَمُ گُنگَنِ؟ ھوتُ حِماتِي جَنِ جو.

بيت - 7

جاڳائٖي جَتَنِ، گؤرا گَسِ ھلائِيا،
پَهُتٖي رِءَ پَهاڙَ ۾، اُٺَ مَ اَگَهٽِجَنِ!
لَتاڙٖي، لَطِيفُ چٖي، لَنگهِئو بَرُ بوتَنِ،
تنِ ڪِهَڙِي چُڪَ چانگَنِ؟ ھوتُ حِماتِي جَنِ جو.

بيت - 8

ڀِنِيَ ٿا ڀَرِينِ، ساٿِيَنِ سَنڊَ ھَٿَنِ ۾،
لٖيڙَنِ جو، لَطِيفُ چٖي، مُون کٖي مَنجهُہ نَہ ڏِينِ،
ھوتُ پُنهُو ٿا نِينِ، اَسُُونهِيَ جو آجِڪو!

بيت - 9

پُڻِ ٿا پَلاڻِينِ، اوٺِي اَڄُ اُٻاکَرا،
پَهَ، پارٖيسِيُون پاڻَ ۾، ڏيٖرَ ڏِيهاڻِي ڏِينِ،
ھوتُ پُنهُو ٿا نِينِ، ٻاروچِي ٻولِي ڪِئو!

بيت - 10

پُڻِ ٿا پَلاڻِينِ، اوٺِي گَهڻوُن اُٻاھَرا،
ھُوءِ جٖي ھَلَڻَ سَندِيوُن ڳاھُون ڳالائِين،
مُنکٖي ٿا مارِينِ، سَڄَڻَ سانباھِي ڪِئو!

بيت - 11

اوڳارِينِ نَہ آنِرا، ٻَڌا چَرَنِ نَہ ٻُورُ،
لٖيڙَنِ کٖي، لَطِيفُ چٖي، ھَلَڻَ جو مَذڪُورُ،
مَيَنِ کٖي مامُورُ، آھٖي اُڻِتُڻِ اَڳِيٖين پَنڌَ جِي.

بيت - 12

ويٺِي ٻُڪٖي ٻاڦَ، جهولٖي جُهۡنڪَ جُهڻِي ڪِي،
آيَمِ تَنِ اُٺَنِ سٖين، جَنِ جا پيرَ دُدا، ڌَڙَ داڦَ،
لَنگهِئا لَڪَ، لَطِيفُ چٖي، توڏا تَڙَ، ٻَنگَ، طاڦَ،
ڪٖيرَ لَنگهِندِي قافَ؟ اِيُ بَرُ بِرَھمَڻِ باسِئو.

بيت - 13

دوڪَ دَھلِئا جِتِ، گؤرا ھَلَنِ نَہ گَسَ ۾،
چَؤ سالَ ئِي نَہ چَلِڻا، ٿِي تَنگَ نِهارٖي تِتِ،
سُوڌِي اُنِين، سَيّدُ چٖي، پوءِ پانچارِئَنِ پَرِتِ،
اِنَ اَڙانگٖي پَنڌَ جِي، ڪا نٖيشَنِ پوءِ نِرِتِ،
سَسُئِي وَڏٖي سَتِ، جا اِھَڙِيَ پَرِ پَنڌُ ڪَرٖي.

بيت - 14

”ھَيِء!ھَيِء“ڪِئو ”ھاءِ!“، ٿِي پاڻُ ھَڻٖي سِرِ پاھَڻٖين،
لَڌائِين، لَطِيفُ چٖي، جُوءِ جَتَنِ جِي جاءِ،
شُڪۡرَ، بارِ! سَنداءِ، سُٿاڻٖي ساٿِ مِڙِي.

وائي - 1

لالَنُ آيَڙو پيهِي، وِئَڙا سوُرَ سَڀٖيئيِ،
جِيَسِ! جِيَسِ! وو جيڏِيوُن! مُهِجو لالَنُ، آيو پيهِي،
ڳالِيُون ڪَندِيَسِ ڳُجِهيوُن، مُهَ مُقابِلِ ويهِي،
جِيَسِ! جِيَسِ! وو جيڏِيوُن!
کَٿُورِيَ بارُ ڀَرٖي، آيو ڏُنگَرَ ڏيهِي،
جِيَسِ! جِيَسِ! وو جيڏِيوُن!
سَرڪَشِي سَردارَ سٖين، موُن ڪَمِيڻِيَ ڪيهِي؟
جِيَسِ! جِيَسِ! وو جيڏِيوُن!
ھُئِي شِڪَستِي سَسُئِي، رازَ پُنهُوءَ جٖي ريهِي،
جِيَسِ! جِيَسِ! وو جيڏِيوُن!
اَدِيوُن! عَبدُاللّطِيفُ چٖي، سَڄَڻَ آيَمِ سيئِي،
جِيَسِ! جِيَسِ! وو جيڏِيوُن!

داستان ٽيون

بيت - 1

اَللهَ ڪارَڻِ، اوٺِيا! ڪَرَھا مَ ڪاھِيو،
جانِبَ! جَڏٖي جِيَ جو، آڳانڍو آھِيو،
لاڳاپو لاھِيو، مَتان مُهِجوہ، سُپِريِن!

بيت - 2

اَللہَ ڪارَڻِ، اوٺِيا! ليٖڙا نِهو مَ لُرَ،
نِهو نِماڻِي پاڻَ سٖين، ٻانِهِيَ جَهلٖي ٻُرَ،
مُنکٖي مارٖي مَنجِهہ ٿِي، سَندِي ھوتَنِ ھُرَ،
ڪَچو لائِيان ڪُرَ، ڪيچا اورٖي جٖي وَران.

بيت - 3

ڪيچا اورٖي ڪِٿَهِين، وَڻُ نَہ ويٖساھِين،
ڪَمِيڻِي! ڪيچِيَنِ لَءِ، پُورِجِ پَراھِين،
تاڻِجِ تيڏاھِين، وارِجِ ڪا مَ وَرَڻَ جِي.

بيت - 4

ڪيچا اورٖي ڪيتَرِيُون، مَعذوُرِيوُن مُيوُن،
واٽوُن وِيهَ ٿِيُون، ڪُهُ ڄاڻان ڪٖيهِيَ وِئا؟

بيت - 5

اَلا! اَچَنِ اُوءِ، جَنِ آئٖي مَنُ سَرَھو ٿِيٖي،
پَسان مانَ پَرِ ڪَهِمۡ، جَتَنِ سَندِي جوُءِ،
لَنگهٖي لَڪَ، لَطِيفُ چٖي، سُڻِيان ھوتَنِ ھُوءِ،
گولِي ٿِيان گُلۡبوُءِ، جٖي سُڃاڻان ساٿَ ڌَڻيِ.

بيت - 6

ڪيچا آيو قافِلو، راتِ موچارِيَ رُوءِ،
بوتٖي ۽ بَلوچَ جِي، رِڙھيِ پَسان رُوءِ،
لَنگهٖي لَڪَ، لَطِيفُ چٖي، پُڇان ڪيچِيَنِ ڪُوءِ،
گولِي ٿِيان گُلۡبوُءِ، جٖي موُن نِهو پاڻَ سٖين.

بيت - 7

ڪيچا آيو قافِلو، ڀَلٖيرو ڀايان،
پَڻِي جا پيرَنِ جِي، لِڱنِ کٖي لايان،
چَنبٖيلِي چايان، جٖي موُن نِهو پاڻَ سٖين.

بيت - 8

ڪيچا آيو قافِلو، ڄامَنِ سَندو ڄامُ،
پَسَندِہۡ پنُهُوءَ کٖي، اَکِنِ ڪِئو آرامُ،
ناتَرِ چايان نامُ، جٖي مون نِهو پاڻ سٖين.

بيت - 9

ڪيچا آيو قافِلو، جُنگُ سُنهارِيَ جوڙَ،
تَلِيارا توڏن کٖي، ڳِچِيَ سُونهَنِ موڙَ،
دؤلَتَ چايان دوڙَ، جٖي موُن نِهو پاڻَ سٖين.

بيت - 10

ڪٖيچان آيو قافِلو،طَرَحَ موچارِيَ توڏَ،
سِنگارِيائون، سَيّدُ چٖي ڪَرَھا مَنجها ڪوڏَ،
لَکُ لَهٖي ٿِي لوڏَ، جِيجا! تَنِ جَتَنِ جِي.

بيت - 11

ڪيچا آيو قافِلو، ساٿَ ڌَڻِي سَرِواڻُ،
وارَ وَڍٖي واڳون ڪَرِيان، پُئان ھُندَ پَلاڻُ،
جِهَڙو پُنهُو پاڻُ، تِهَڙِي سِٽا ساٿَ جِي.

بيت - 12

جهوُڙا جَنِ جهُلُنِ ۾، ھِيرٖي لَکَ ھَزارَ،
لَڳا واٽَ وَڻَنِ جا، پُنهوُءَ کٖي پالارَ،
آن ڪٖي وِيندا گَڏِئا، اِھَڙِيَ سِٽَ سُوارَ؟
لَنگهِي ڪالَ قَطارَ، توُن، آئِي! اَڄُ نِهارِيٖين!

بيت - 13

مِزِمانَن مَهِرِي، آڻٖي جهوڪِئا جهوڪَ ۾،
چاٽٖي چَنبَنِ ۾ وِئا، جِنۡ بازُ سَٽٖي بَحرِي،
ڪوھيارو قَهرِي، وِئو نِهوڙٖي نِنڊَ ۾!

بيت - 14

ڪيچِي ڪالَ ڪَهِي وِئا، اَدِيوُن! آڌِيَ راتِ،
جاڳان تان جٖيڪِين ٿِئو، وِھاڻِيَ پِرِڀاتِ،
ڦوڙائو فَقِيرِ کٖي، ڏِنو جَتَنِ ذاتِ،
رَفِيۡعَ الَّدرۡجَاتِ! پَرَمَلُ پُنهوُ ميڙِيٖين!

بيت - 15

مُون ڀانيو مُون وَٽِ، ھَمٖيشَهَ ھُوندا پِرِين،
وٖيڙھو ڏيئِي ويڪَرو، پَهرِي وِئا پَٽِ،
ساہُ جَنينِ جٖي سَٽِ، وِڪِيُمِ ٿٖي وَڻِڪارِ ۾.

بيت - 16

مُون ڀانيو مِزِمانَ، ھَمٖيشَهَ ھوُندا پِريِن،
ڪُهِي ڪَمِيڻِي ھَلِئا، ڪَهَلَ ڪِيائوُن ڪانَ،
ڏيئِي وِئا ڏاہِ کٖي، سُورَنِ جا سامانَ،
جورو راتِ جُوانَ، جيڏِيوُن! جَتَ ڪَرٖي وِئا!

بيت - 17

ڀانيُمِ جٖي سَرِواڻَ، ڇُلائِيندَمِ ڇَپَرٖين،
کانيَمِ ھُندَ پَلاڻَ، اُٺَ گُڏايَمِ اُنِ جا.

بيت - 18

ڪاڏٖي مُهُ مَڪرانَ جو؟ ڪاڏٖي ڪيچُ ٿِئو؟
ھهَڙو ساٿُ ڀَنڀورَ تان، ڪَڏِھِين ڪونَ پِئو،
ڪوھِيارو ڪامَ ھَڻِي، چورٖي چِتُ وِئو،
جَنِين جَتُ نِئو، تَنِ اُٺَنِ گهورِي آھِيان.

بيت - 19

بِرِہَ مَڻايُسِ بَرُ، ناتَ سُکِي ڪٖيرَ سَڌوُن ڪَرٖي؟
گَهڻوُن ڏورِيائِين ڏُکَ سٖين، ڏيرَنِ لَءِ ڏُنگَرُ،
وَرِي آيُسِ وَرُ، سَفَرَ مُيَ جا سابِ پِئا.

بيت - 20

وَرَ ۾ڪونِهۡ وَرُ، ڏيرَنِ وَرُ وَڏو ڪِئو،
نِهارِيندِيَسِ نِڪَڻِي، بوتَنِ ڪارَڻِ بَرُ،
آڏو ٽَڪَرَ ٽَرُ، مَتان روہَ رَتُيون ٿِيٖين!

بيت - 21

وَرَ وَراڪا وِچَ ۾، لَکٖين آڏا لَڪَ،
ھو جٖي آڏا حَقَ، سٖي ڪَندا ڪوہُ ڪَنديَنِ کي؟

وائي - 1

ھوتَ! نَہ ڀانُيمِ ھِيَّ، آئُون جا مارِي،
سَڄَڻَ! تُهِجٖي نيِهَ،
وو! ڇَڏٖي توُن ڪو ڇَپَرِ وِيندٖين.
لُڪوُن لَڳَنِ ڪوسِيوُن، ڏاڍا تَپَنِ ڏِيهَ،
وو! ڇَڏٖي توُن ڪو ڇَپَرِ وِينديٖن.
عِشقَ آرِيَ ڄاَم جٖي، ڪِيَسِ نِماڻِي نِيهَ،
وو! ڇَڏٖي تُون ڪو ڇَپَرِ وِيندٖين.
جُهنگارِيندٖي جَهنگَ ۾، ڏوٿِيَنِ ڏِٺَڙِي ڏِيهَ،
وو! ڇَڏٖي توُن ڪو ڇَپَرِ وِيندٖين.
آن ڇا ڇَڏِي ڇَپَرٖين ڪيچِ رَسَندِي ڪِيَّ؟
وو! ڇَڏٖي توُن ڪو ڇَپَرِ وِيندٖين.
وِلَهِيَ ھِتِ وَسائِيا، سَندا مَحَبَتَ مِيهَ،
وو! ڇَڏٖي توُن ڪو ڇَپَرِ وِينديٖن.
اَدِيوُن! عَبدُاللّطِيفُ چٖي، پَهُچان سٖيڻَنِ سِيَّ،
وو! ڇَڏٖي توُن ڪو ڇَپَرِ وِيندٖين.

داستان چوٿون

بيت - 1

وارو! وَرُ وَٺِي وِئا، آرِيچا اَظۡلامَ،
آندائُون آرِيَ جا، پُنهُوءَ ڏٖي پَيغامَ،
پَهُ ڪِيائوُن پاڻَ ۾، مُنها مَخفِي مامَ،
سَنڀُوڙا ساٿُ کَڻِي، وٖيساھٖي وَرِيامَ،
ڪاڪِيوُن! راتِ قِيامَ، جيڏِيوُن جَتَ ڪَرٖي وِئا!

بيت - 2

وارو! وَرُ وَٺِي وِئا، جابِرَ ڪَرٖي جورُ،
بٖيدِي ٿِئو ڀَنڀوُر، حَشَرُ ڪَرٖي ھَلِئا!

بيت - 3

وارو! وَرُ وَٺِي وِئا ڪَرٖي ڏيرَ ڏَمَرُ،
ھاڻٖي ٿِئو حَشَرُ، پُنا قَولَ قِيامَ جا!

بيت - 4

وارو! وَرُ وَٺِي وِئا، ڏيرَ ڪَرٖي ڏورو،
ساڄَنَ رِءَ سَرَتِيوُن! آتَڻُ اَڌورو،
نِيَّ سٖين نِسورو، حَشَرُ ڪَرٖي ھَلِئا!

بيت - 5

وارو! وَرُ وٺِي وِئا، جورٖي سٖين جابِرَ،
صَبُرُ ڪِنءَ صابِرَ، اَچٖي عَجِيبَنِ رٖي؟

بيت - 6

وارو! وَرُ وَٺِي وِئا، ڏاڙِھِيَ ڀَنڀا ڏيٖرَ،
ڏِيندِيَسِ ڏاڍٖين ڏُنگَرٖين، اُنِين لَءِ اُلٖيرَ،
ڪيچِ پَهُچٖي ڪيرَ؟ وَڃَڻَ سٖين وَسُ ڪَرِيان.

بيت - 7

سَنجهٖي مُو نَہ سَنڀالِيو تَہ ڪِينۡ اوٺِي ڪَندا اِينءَ،
ڪُهِي ڪَمِيڻِي ڪِينءَ، جَڏِي راتِ جَتَنِ ڪِي!

بيت - 8

سَنجهٖي موُن نَہ سَنڀالِيو، صُبُحِ سارِيَمِ سُورَ،
جَتَنِ لاءِ ضَروُرَ، گَهڻا گهارِيَمِ ڏِيهَڙا.

بيت - 9

سَنجٖهي موُن نَہ سَنڀالِيو، صُبُحِ سارِيَمِ سُورَ،
آڌِيَ راتِ اُڌَمِئو، ڏِينِ پَلُٽِئو پُورَ
جَتَنِ جٖي ضَرُورَ، مادَرِ! مارِي آھِيان!

بيت - 10

سَنجهٖي موُن نَہ سَنڀالِيو، مارِيَسِ سوُرَ صُبُوحِ،
نٖيڻَ ھٖيرايَءِ نِنڊَ سٖين، جَتَنِ لَنگهِي جُوءِ،
ھاڃو ڪَرٖي ھُوءِ، آڏِيَ راتِ اُٿِي وِئا!

بيت - 11

آڌِيَ اُوءِ اُٿِي وِئا، ڪَرُ رَکِيائُون ڪيچَ،
ٻاروچاڻٖي پيچَ، مُهِجو مَنُ مُنجهائِيو!

بيت - 12

جَڏِيَ وٽِ جالٖي، مانَ لِلّہِ ڪارَڻِ لِکَ سِينءَ ،
آھٖي آرِيَ ڄامَ جٖي، ھِتِ ھُتِ حَوالٖي ،
عَيبَ موُن ۾ اَڳَرا، مانَ نِرۡمَلُ نِڪالٖي!
پَرٽِياڻِي پالٖي، ڪامِلُ نِندو ڪيچ ڏٖي!

بيت - 13

پَرِيَٽَنِ پالٖيياسِ، ٻانڀَڻِ ٻٖيٽِي آھِيان،
حُسۡنَ ھوتَ پُنهُوءَ جٖي، مارِي مَوتِ وِڌِياسِ،
جانڪِينۡ تان جِيَندِياسِ، پٖيَيسِ وَرِ وِصالَ جٖي.

بيت - 14

پَرِٽَنِ جٖي پاڙٖي، جاڙَ گُذارِيُمِ، جيڏِيوُن!
جَنِين موُن کٖي مارِئو، سوُرَنِ سٖين ساڙٖي،
اٖيرادٖي آڻٖي، سانگِيَنِ سٖين سَڱُ ڪِئو.

بيت - 15

اَسِين پاڻَ پَرِٽَ، پورھِيَتَ پُنهُوءَ ڄامَ جا،
ھوتُ کَٿُورِيَ ھٖيَرئوُن، موُن ۾ صابُڻَ ڇَٽَ،
آتَڻَ مَنجهِہ اُگَهٽَ، ڪاندُ ڪِهِين جِي مَ ڪَرٖي!

بيت - 16

گَڏِيو ڌوٻِيَنِ ڌوءِ، پُنهُوءَ پارِچو ھَٿَ ۾،
اُتٖي آرِيَ ڄامَ جو، قاصِدُ آيُسِ ڪوءِ،
اِيُ، ڪامِلَ! ڪَمُ نَہ سَندوءِ، جِنۡ پَهَسَ پَڇَاڙِيٖين پوتِيٖين.

بيت - 17

نَڪو ڪيچُ ڀَنڀورُ، نَڪو مائِٽُ مُنڌَ جو،
ھورُ مِڙوئِي ھِنَ کٖي، ھوتَنِ ڪونهِ ھورُ،
زارِيَ ڌارا زورُ، ھَلٖي ڪونَ حَبِيبَ سٖين.

بيت - 18

ڇورِي، نِدورِي، نَڪو مائِٽُ مُنڌَ جو،
سَوٖين ھَلَنِ ساٿَ ۾، ڪَمِي ۽ ڪورِي،
آئوُن پُڻِ آھِيان اُنِ ۾، لَنگهِي ۽ لورِي،
لَنگهائِيٖين، لَطِيفُ چٖي، ٿَرَنِ جا ٿورِي،
آھِيان اَزورِي، تُهجٖي جورٖي جَبَلُ لَنگِهيان.

وائي - 1

ڇا کٖي ٿا ڪَرَہَ قَطارِيو؟ وو! موُن نِماڻِيَ تان ڪِينۡ نَہ چَيو.
اَللھَ ڪارَڻِ، اوٺِيا! اَئِين واڳَ وَٺِي وَرُ وارِيو،
وو! موُن نِماڻِيَ تان ڪِينۡ نَہ چَيو.
رَھو راتِ ڀَنڀورَ ۾، تان ڪا گَهڙِي ھِتِ گهارِيو،
وو! موُن نِماڻِيَ تان ڪِينۡ نَہ چَيو.
سِڪِي جِهَ سَڱُ ڪِئو، تِهَ مَعذُورِ کي مَ مارِيو،
وو! موُن نِماڻِيَ تان ڪِينۡ نَہ چَيو.
سائِينءَ ڪارَڻِ، سُپِرِين! دوستَ! دَرَسَنُ ڪارِيو،
وو! موُن نِماڻِيَ تان ڪِينۡ نَہ چَيو.
موڙٖي مَڃَرَ ٽارِيوُن، چانگَنِ کٖي اَئِين چارِيو،
وو! موُن نِماڻِيَ تان ڪِينۡ نَہ چَيو.
اَڀَرٖي عَبدُاللّطِيفَ ڏٖي، واڳَ، وَنهِيَلَ! اَئِين وارِيو،
وو! مُون نِماڻِيَ تان ڪِينۡ نَہ چَيو.

داستان پنجون

بيت - 1

جِنءَ سو ھَرَڻُ ھُماءُ، سَرگَرداۡن سَنسارَ ۾،
ھِيُ پَڳُ نَہ کوڙٖي پَٽِيٖين، ھوُ ڌَڙَ سِرِ
ڌَرٖي نہ ساہُ،
جيڪُسِ تَنِ مُلاءُ، سَسُئِيَ سُورَ پِرائِيا.

بيت - 2

راتِ ڏِٺائِين روجهَہ، ڀانءِ ڪِ اوٺِي آئِيا،
پَريَتَڻٖي پِرِيَنِ جٖي، سِڪَڻَ ڪِي سَٻوجهَہ،
ھُئِي گَهڻوُن اَٻوجهَہ، سُورَنِ سُنهائِي سَسُئِي.

بيت - 3

روجهَہ ڏِٺائِين راتِ، ھوتُ ڳولِندٖي حَبَ ۾،
ڪيچِيَنِ جٖي ڪَڙِي ٿِيِي، توءِ تَنِين جِي تاتِ،
ٻاروچاڻِي ذاتِ، مَناءَ مُيَ نَہ وِسَريٖ،

بيت - 4

جَبَلَ ۾ جانارَ، سَرَہَ گَڏِبَءِ، سَسُئِي!
ڀِنِيَ پوءِ ڀَوارِئِي، ٻانڀَڻِ جِي ٻاڪارَ،
ھوتاڻِي ھيڪارَ، مؤلا! مُنکٖي مٖيڙِيٖين!

بيت - 5

سَمَرُ جَنِين نَہ ساڻُ، ھوتُ حِماتِي تَنِ جو،
ڪَرٖي ڇٖيڄَ ڇَپَرَ ۾، پُنهُو اِيندو پاڻَ،
ٿِيندي رِيجهَہ رِھاڻِ، لَحظٖي مَنجهِہ لَطِيفُ چٖي.

بيت - 6

پَسِي سٖي سَرَھِي ٿِيِي، جٖي مَيَنِ لَنگهِئا مَسَ،
تِٿُ تِه کٖي ناہِ ڪو، لَڪَ مِڙيٖئيِ لَسَ،
حُبَ جِهِين کٖي ھوتَ جِي، وِندُرُ تِه کٖي وَسَ،
سَندِيَ چانگَنِ چَسَ، پيرَ ٺَرَندَءِ پَٻَ ۾.

بيت - 7

سَسُئِي لَنگهِئو سو، مَردَ جِه ماتُ ڪِئا،
جَبَلُ وَڏو جو، نُوڻِ مِڙوئِي نِيهَ کٖي.

بيت - 8

جَبَلُ مارٖي جَکَ، جو آڏو آرِيچَنِ کٖي،
توڻٖي لَڪَنِ لَکَ، سَڀِ لَنگهِيندِيَسِ سِڪَ سٖين.

بيت - 9

جَبَلُ جيڏوئِي، جو آڏو آرِيچَنِ کٖي،
وَٺِي وَرُ، واٽَ وِئا، بُرفَتَ بِروھِي،
رُڃُنِ ۾ روئيِ، پَسان شالَ پُنهُوءَ کٖي!

بيت - 10

جَبَلَ سُڄَنِ جالَ، آڏا آرِيچَنِ کٖي،
ھاڙٖي ڏاہَ ھَٿُ کَڻِئو، ڇَپَرِ مِڙان شالَ!
ڪيچِي وِئَڙَمِ ڪالَ، تٖي ٿِي ڏُنگَرَ ڏورِيان.

بيت - 11

ڇَپَرُ ڇَمَرُ ڀائيان، ڪانڀُو ۽ ڪارو،
پَٻُ وِجَهندِيَسِ پُٺِ تٖي، صُبُحِ سَوارو،
وَڃَڻَ موُن وار، ڪِينَ وِھَندِيَسِ وِچَ ۾.

بيت - 12

ڇَپَرَ ۽ ڇَمَرَ، ٿا لَڳَهَ لَڳَنِ پاڻَ ۾،
آڏا ڏُنگَرَ ڪَرڪَرا، وٖيڌَ، وِنگايوُن، وَرَ،
آئوُن پِيادِي پَٽِيٖين، نِماڻِي نِڌَرَ،
سُورِيُون جِتِ، سَڳَرَ؛ اُتِ ٻاتاڙِيَ ٻيلِي ٿِيين!

وائي - 1

ھِيَڙو ٿو ھُنِ سارٖي، مُهِجو ساہُ سَيّدَ کٖي ٿو سارٖي،
جيڏِيوُن! آئوُن ھَلَندِي، وِيندِي ھوتَ ڏٖي؛
سَرَتِيوُن! آئوُن ڪَهَندِي وِيندِي ڪيچَ ڏٖي.
ھوتَنِ ھَلَڻُ مَنَ ۾، ڪيرَ گَهڙِي ھِتِ گهارٖي؟
جيڏِيوُن! آئوُن ھَلَندِي، ويندِي ھوتَ ڏٖي؛
سَرَتِيوُن! آئوُن ڪَهَندِي ويندِي ڪيچَ ڏٖي.
آسَرَ ڀَرِي آھِيان، مانَ واحِدُ آڻٖينِ وارٖي!
جيڏِيوُن! آئُون ھَلَندِي، ويندِي ھوتَ ڏٖي؛
سَرَتِيوُن! آئُون ڪَهَندِي ويندِي ڪيچَ ڏٖي.
پَنڌَ اَڙانگا پَٽِيٖين، مُنکٖي ڪوھِيارو ٿو ڪارٖي،
جيڏِيوُن! آئُون ھَلَندِي، ويندِي ھوتَ ڏٖي؛
سَرَتِيوُن! آئوُن ڪَهَندِي ويندِي ڪيچَ ڏٖي.
سَچو سُخُنُ سُپِرِين، مانَ پُنهَلُ پَهجو پارٖي!
جيڏِيوُن! آئُون ھَلَندِي، ويندِي ھوتَ ڏٖي؛
سَرَتِيوُن! آئوُن ڪَهَندِي ويندِي ڪيچَ ڏٖي.
ڄٖيرو اَندَرِ ڄِندَڙٖي، وِئو ٻاروچَلُ ٻارٖي!
جيڏِيوُن! آئُون ھَلَندِي، ويندِي ھوتَ ڏٖي؛
سَرَتِيوُن! آئُون ڪَهَندِي ويندِي ڪيچَ ڏٖي.
وِڌا ڪَمَ ڪَرِيمَ تٖي، ھِنَ ويچارِيَ وارٖي،
جيڏِيوُن! آئوُن ھَلَندِي، ويندِي ھوتَ ڏٖي؛
سَرَتِيوُن! آئوُن ڪَهَندِي ويندِي ڪيچَ ڏٖي،
اَدِيوُن! عَبدُاللَّطِيفُ چٖي، وِھَندُمِ ڪِينَ وِسارٖي،
جيڏِيوُن! آئُون ھَلَندِي، ويندِي ھوتَ ڏٖي؛
سَرَتِيوُن! آئوُن ڪَهَنديِ ويندِي ڪيچَ ڏٖي.

داستان ڇھون

بيت - 1

آڏَتِراڇا، آھُڙا، ڏُنگَرَ کٖي ڏاڪا،
ڪِيَمِ آہَ عَجِيبَ کٖي، سِڪَ مَنجها سا ڪا،
پٖيئِي ھَٿِيڪِي ھوتَ کٖي، ڪُوڪَ وَڃِي ڪَنِ ڪا،
مُهِجو وَسُ واڪا، ٻُڌَڻُ ڪَمُ ٻَروچَ جو.

بيت - 2

آڏَتِراڇا، آھُڙا، ڏُنگَرَ کٖي ڏاڪا،
وَٺِي وَرُ واٽَ ٿِئا، بَرِ چَڙھِي باڪا،
ڦَٽِئا پيرَ فَقِيرِ جا، چَڙَھندٖي چَڙھاڪا،
ھُيَنِ جِيَ اَندَرِ جاڪا، وِئا پُڄائٖي پاھِجِي.

بيت - 3

آڏَتِراڇا، آھُڙا، ڏاڪا ڏُنگَرَ کٖي،
ھو جٖي وَرَ وِندُرَ جا، مارِندا موُنکٖي،
ھاڙو ھِيڻِيَ کي، لنگهائِجِ، لَطِيفُ چٖي.

بيت - 4

آڏَتِراڇا، آھُڙا، وِندُرَ وَراڪا وَرَ؛
حُبَّ جِهِين کي ھوتَ جو، سا ڏورِيندِي ڏُنگَرَ،
پَهُچايٖين، پَروَرَ! لُطفَ ساڻُ، لَطِيفُ چي.

بيت - 5

آڏَتِراڇا، آھُڙا، وِندُرَ وَراڪا، واڪَ؛
اُجهايَسِ اُٺَنِ جٖي، ڦوڙائٖي فِراقَ،
پُنهُو پَرمَلَ پاڪَ! واحِدَ لَڳِ وَرٖيجِ تُون.

بيت - 6

آڏَتِراڇا، آھُڙا، وِنگا وَرَ واٽُنِ،
جٖيرا، جِڳِرَ، بُڪِيوُن،آرِيَ لَءِ آٽَنِ،
ڪَسٖي ڪَنواٽَنِ، سَنڀُوڙا، سَيّدُ چٖي.

بيت - 7

ڪوڏَرِ نَہ ڪاتِي، جِه سان ٽَڪَرُ ٽانڪِيان،
جٖيڪو جَبَلُ لَنگهِيان، سو ھَيبَتَ جو ھاٿِي،
پِريَنِ جا پاتِي، سا جَڙَ جِيَرٖي نَہ لَهٖي.

بيت - 8

ڪَرِڙا ڏُنگَرَ، ڪَهَ گَهڻِي، جِتِ بَرَپَٽَ، بَيرانُ،
ڏاھَنِ ڏاھَپَ وِسَرِي، ٿِئا حَريِفَ ئِي حَيرانُ،
سَسُئِي لَنگهِئو سَيّدُ چٖي، مَحَبَّتَ سٖين مَيدانُ،
جِه جو آرِياڻِي اَڳِواڻُ، تِه جِي ڪانِهۡ باکَ بَهِيرَ ۾.

بيت - 9

ڪَرِڙا ڏُنگَرَ، ڪَهَ گَهڻِي، جِتِ واٽُنِ تٖي وارِي،
آڏا لَڪَ، لَطِيفُ چٖي، بَرَ سُڄَنِ بارِي،
جا مَنِزَلُنِ مارِي، سا، قادِرَ! ڪٖيچِ رَساڻِيٖين!

بيت - 10

ڪَرِڙا ڏُنگَرَ، ڪَهَ گَهڻِي، جِتِ جَبَلَ گُوناگُونِ،
لٖيڙَنِ جِيوُن، لَطِيفُ چٖي، تَنگِ تَوارُون پُونِ،
جَنِ ڏِٺو پٖيرُ پُنهُوءَ جو، سٖي نَہ ڪِينۡ رُونِ نَہ چُونِ،
ھُوندَنِ مَٿٖي ھُونِ، لاڳاپا ھِنَ لوڪَ جا.

بيت - 11

ڪَرِڙا ڏُنگَرَ، ڪَهَ گَهڻِي، جِتِ ماٿَرِ مَٿاھِين،
سُڄَنِ ٿا، سَيّدُ چٖي، اُتِ مِروُن مَهائِين،
تُون، آرِياڻِي! آھِين، مَنَهِ مَعذُورِيَنِ جِي.

بيت - 12

ڪَرِڙا ڏُنگَرَ، ڪَهَ گَهڻِي، جِتِ وِئا روڏا رِنگائٖي،
ساڱاپٖي سٖيڻَنِ جٖي، ٿِي وِندُرِ واجهائٖي،
رَھِيَسِ، رَسُ لَطِيفُ چٖي، تِهۡ ڪَمِيڻِيَ ڪاھٖي،
آرياڻِي آھي، مَنَهِ مَعذورِيَنِ جِي.

بيت - 13

ڪَرِڙا ڏُنگَرَ، ڪَهَ گَهڻِي، جِتِ رِڻُ، تَتو رائو؛
تِتِرُ ٿِيٖي مَ تَنِ کٖي، ڏُنگَرَ ۾ ڏائو،
جَڏِہ ڄامُ پُنهُو ڄائو، تَڏِہ ٿِي وَسَ وَڻِڪارَ ۾.

بيت - 14

سِڪِي جان سُتِياسِ، تان سِڪُ سُمَهَڻُ نَہ ڏِيٖي،
جاڳِي، سُتِيَسِ جَنِ لَءِ، سٖي آيا تان نَہ اُٿِياسِ،
ڀينَرُ! آئوُن ڀُلِياسِ، نَتَ سِڪَ سُمَهَڻَ ڇا لَڳٖي؟

بيت - 15

ماڻِڪُ مِٽُ سَندومِ، اُنداھِيَ ۾ سوجهِرو،
حَشَرَ وٖيلَ حِسابَ ۾، ڇَڏٖي نَہ وِيندومِ،
سارِيو سَڏُ ڪَندومِ، ڪوھِيارو ڪيچَ ڌَڻِي.

وائي - 1

وِيندِيَسِ ڪيچِ ڪَهِي، سيڻَنِ ساڻُ سَهِي،
وو! ڀينَرُ! آئوُن جِيَندِيَسِ تان نَہ جَتَنِ رٖي.
وِھان ڪِنءَ ماٺِ ڪَرٖي، ھيڏو سُورُ سَهِي؟
وو! ڀينَرُ! آئوُن جِيَندِيَسِ تان نَہ جَتنِ رٖي.
ھيڏٖي شَهَرَ ڀَنڀورَ ۾ سارِيان ڪونَ سَهِي،
وو! ڀينَرُ! آئون جِينديَسِ تان نہ جَتنِ ري.
اَڳِئا آرِيَ ڄامَ جو، وِئَڙو ساٿُ وَھِي،
وو! ڀينَرُ! آئُون جِيَندِيَسِ تان نَہ جَتَنِ رٖي.
صُبُحِ ڏُنگَرُ ڏورِيان، ڪِه پَرِ راتِ رَھِي،
وو! ڀينَرُ! آئُون جِيَندِيَسِ تان نَہ جَتَنِ رٖي.

وائي - 2

گُهمان جالَ جَبَلُ، مِيان! جيڏِيوُن!
جانِبَ جَتَ لَءِ.
ڏوريندِيَسِ ۾ ڏُنگَرٖين، ڪَندِيَسِ آئوُن اُڇَلُ،
جيڏِيوُن! جانِبَ جَتَ لَءِ.
ھٖيڏٖي شَهَرَ ڀَنڀورَ ۾، رَھان نا ھِڪُ پَلُ
جيڏِيوُن! جانِبَ جَتَ لَءِ.
پُنهُو پاڻَ نَہ وَڃِڻو ڪو مُنهِين ۾ وَلُ،
جيڏِيُُون! جانِبَ جَتَ لَءِ.
اوڏِي ٿِي، عَبدُاللّطِيفُ چٖي، ھوتَ ڪارَڻِ ھَلُ،
جيڏِيوُن! جانِبَ جَتَ لَءِ.

داستان ستون

بيت - 1

پُنهُوءَ سٖين پِرِيتِ جو، ڪو جو پٖيچُ پِئومِ،
ڀَنڀٖي ھِنَ ڀَنڀورَ ۾، وِھَڻُ وِہُ ٿِئومِ،
مَتِيوُن موٽَڻَ سَندِيوُن، ڪاڪِيُون! ڪِيمَ ڏِئومِ،
سَرَتِيوُن! ساہُ سَندومِ، ٿِئو حَوالٖي ھوتَ جٖي.

بيت - 2

ڪُڄاڙِئا ڪاھٖي، شُترَ اُنِ سِنگارِئا؟
ٽَلِيون، ٽَؤنرَ، ھَلَوِيوُن، وِئا ڇٖيرُون ڇَمَڪائٖي،
لَنگهِئا لَڪَ لَطِيفُ چٖي، وِئا ڪَرَھَلَ ڪُڏائٖي،
ٻانڀَڻِ کٖي ٻَروچَ جو، آسَرو آھٖي،
واڳوُن وَرائٖي، ڦٖيرِينِ مانَ فَقِيرِ تٖي!

بيت - 3

ڏانجَهنِ تٖي ڏانجها، ڏِنائُون ڏُکِيَ کٖي،
لَڳِيَسِ نائُڪَ نِيهَ جِي، ڪُڙِہ اَندَرِ ڪا جا،
ٿَرَنِ ۾ ٿاجا، ڪَرٖي مُنڌَ مِرُنِ سٖين.

بيت - 4

ڪو مُهِ ڪُٺَلِ آئِيو، وَسِ نہ ويچارِي،
ھوتَ! تُهِجٖي ھَٿَ رٖي، پَهُچٖي نَہ پارِي،
اَچٖين جٖي، آرِي! تَہ پاندَ پُڄِي لَڪُ لَنگهِيان.

بيت - 5

ڪو مُهِ ڪُٺَلِ آئِيو، ناہِ ويچارِي وَسِ،
ھوتَ! تُهِجٖي ھَٿَ رٖي، گولِي ٿِيٖي مَ گَسِ،
ڏُکُ ڏُکِيَ کٖي ڏَسِ، تَہ مُوڙھِيَ ڪو مُهُ ٿِيٖي.

بيت - 6

ڪَڏِہ تان ٻاجَهہ پَئِي، ساڄَنَ! مُجُ سَلامُ،
سِڪَ تُهِجِيَ، سُپِرِين!ڪِئو تَنُ تَمامُ،
ھَٿٖين حاجَ وِہُ ٿِيِي، نٖيڻٖين نِنڊَ حَرامُ،
دوسَ! نَہ سَهان دامُ، تُون وِندُرِ ٿو وٖيلا ڪَرٖين!

بيت - 7

سُرَھِي مَنجها ساٿَ، آئِي بُوءِ ڀَنڀورَ کٖي،
بِيٺا بازارِنِ ۾، لائٖي جَتَ جَباتَ،
سَندِيَ ھوتَ حِماتَ، ڪيچِ پَهُتو قافِلو.

بيت - 8

بَرُ مِڙوئِي بُوءِ، ڇَپَرَ ڇاٽُون مُڪِيوُن،
ٻَهِ ٻَهِ ٿِي ڀَنڀورَ ۾، ھَنڌَ مِڙيٖئيِ ھُوءِ،
راڻِنِ وَرِي رُوءِ، گُندَرَ لَٿا گولِيٖين.

بيت - 9

جَڏِہۡ پيئِي ڇَٽَ، ڇَپَرِ ھوتَ پُنهُوءَ جِي،
پَرَھٖي ويٺِيُون پَٽَ، گُندَرَ لَٿا گولِيٖين.

بيت - 10

جَڏِہۡ پيئِي باسَ، ڇَپَرِ ھوتُ پُنهُوءَ جِي،
اَدِيوُن! آرِيچَنِ جا، وَڻَنِ مُڪا واسَ،
آيَلِ! پُنِي آسَ، پُنهُو آيو ڪيچَ ۾.

بيت - 11

آيَلِ! اوطاقُون، ڪَرٖي ڪيچِي ھَلِئا،
سُڪِيوُن نَہ سيڻَنِ جٖي، ماڳَنِ تان ماڪُون،
نِسورِيوُن ناڪُون، سَڃٖي ھَلِئا سُورَ جِيوُن.

بيت - 12

جَتَنِ سان جانۡڪوُن، سَرَتِيوُن! موُن سَڱُ ٿِئو،
ڪَرٖي ڪوھِيارو وِئو، تَنُ ڇِنِي تانڪُون،
آئُون پُڻِ تَڏاڪُون، اَڌَ ڏُکوئِي آھِيان.

بيت - 13

مَتان ڪا ٻَڙِي! ٻولَ ٻاروچٖي وِسَهٖي،
ھُندَ نَہ سُتِيَسِ، سَرَتِيوُن! ويهِي رَھيَسِ وَڙِي،
جَتَ پَهِجٖي جُوءِ ۾، گهارِنِ مانَ گَهڙِي،
ڪٖيچِيَنِ آن نَہ ڪَڙِي، ڪِه ڏُکِيَ ڏاوَڻُ ڏائِيون.

بيت - 14

ڏيرَنِ ڏوہُ نَہ، جيڏِيوُن! ماءِ! مِڙوئِي مُون،
آئُون اَسُونهِين، اُوسُنهان، پِرِين سَندا پَرَڀُون،
اَصۡلِ آرِيَ ڄامَ جو، پاندُ نَہ پَڄِتوسُون،
جِه جو تُنهِين تُون، سٖي پِيادِيوُن پَهُچائِيٖين!

بيت - 15

اَدِيوُن! آئوُن نَہ تِيَّ ،جِنۡ پِرِيَتَڻوُن پِرِيَنِ سٖين،
ٻَڌِي سُتِيَسِ سوگهو، ڇَلۡوَرُ ڇاتِيَ سِيَّ،
تَہ ڪٖيچِي ڪاھٖي ڪَرَھا، مُنهان وَڃَنِ ڪِيَّ؟
ڏوہُ مُهِجٖي ڏِيهَ، پُنهُوءَ کٖي ڪا مَ چَئٖي.

وائي - 1

لَڳَڙِي آہِ لَغارَ، وو! يارَ! لُنءَ لُنءَ ۾ لالَنَ جِي؛
سَنڌَ سَنڌَ ۾ ساڄَنَ جِي.
آئُون سُتِي، ھُو ھَلِئا، سَنجهٖي ٿِئَڙا سُوارَ،
وو! يارَ! لُنءَ لُنءَ ۾ لاَلنَ جِي.
جٖيڪِين اورَڻُ پِرِيَ سٖين، جٖيڪِين پِرِيَ پَچارَ،
وو! يارَ! لُنءَ لُنءَ ۾ لالَنَ جِي.
کوءِ سٖي جِيَڻَ ڏِيهَڙا، جٖي پُونِ پِرِيَنِئا ڌارَ!
وو! يارَ! لُنءَ لُنءَ ۾ لالَنَ جِي.
لَڳِي آھٖي، نَہ لَهٖي، سَندِي عِشقَ پَچارَ،
وو! يارَ! لُنءَ لُنءَ ۾ لالَنَ جِي.
گَهڻُون اُڪَنڍيِ آھِيان، تَنِ جَتَنِ جٖي جِنسارَ،
وو! يارَ! لُنءَ لُنءَ ۾ لالَنَ جِي.
گَڏِي وِيندِيَسِ گَسَ ۾، ڪاڪِيُون! ساڻُ قَطارَ،
وو! يارَ! لُنءَ لُنءَ ۾ لالَنَ جِي.
مٖيخُون مَحَبَّتَ سَندِيوُن، ھِيَڙٖي مَنجهِہ ھَزارَ،
وو! يارَ! لُنءَ لُنءَ ۾ لالَنَ جِي.
ڪانگَنِ قَطارُون ڪِيوُن، چُڪِيَ کٖي چَوڌارَ،
وو! يارَ! لُنءَ لُنءَ ۾ لالَنَ جِي.
آئوُن نِماڻيِ نِڪَڻِي، دَمِجِ توُن، دِلِدارَ!
وو! يارَ! لُنءَ لُنءَ ۾ لالَنَ جِي.

وائي - 2

ھوتَنِ بِنا نِي، مِيان! دَردَ فِراقَ نِي، ميان!
پُنهُوءَ سائِينءَ، جيڏِيوُن! اَلولو! مارِي آھِيان!
اَدِيوُن! آرِيچَنِ جٖي، آئُون نِهوڙِيَسِ نِفاقَ،
ھوتَنِ بِنا نِي، مِيان!
ڏُنگَرُ ڏورِئو نَہ ٿِيٖي، مُون وَلهِيَ کان واڪَ،
ھوتَنِ بِنا نِي، مِيان!

وائي - 3

تَنِ پِريَنِ کٖي اُڪَنڍِي آئُون، لَڪَ لَنگِهيائُون،
ڏٖيرَ قَرارِئا ڏٖيهَ ۾ : تَنِ اُٺَنِ گهورِي آئوُن!
چَڙھِي ڏاڍٖين ڏُنگَرٖين، ٻانڀَڻِ اُڇَلٖي ٻاھُون،
ڏٖيرَ قَرارِئا ڏٖيهَ ۾.
ھُيَسِ پاسِ پَرِٽَ جٖي، ٻانڀَڻِ ڌِيَ نائوُن،
ڏٖيرَ قَرارِئا ڏٖيهَ ۾.

وائي - 4

ڇورِي ڇَڏِ مَ ڇَپَرٖين، ٻاروچَلَ! ٻانهِي.
جانِبَ جِهَڙو جَڳَ ۾، ناھٖي ڪو ثانِي،
ڇورِي ڇَڏِ مَ ڇَپَرٖين.
پُنَهَلَ! نِئو پاڻَ سٖين، پورِھيَتِ پَرِٽِِياڻِي،
ڇورِي ڇَڏِ مَ ڇَپَرٖين.
پورِھيو ڪَندِيَسِ پِرَ جو، ڀَرِيِندِيَسِ پاڻِي،
ڇورِي ڇَڏِ مَ ڇَپَرٖين.
ھوتَ! مَ ڇَڏِئو ھٖيڪَلِي، ھِيَ جا وِندُرِ وِڪاڻِي،
ڇورِي ڇَڏِ مَ ڇَپَرٖين.
اَدِيُون! عَبدُاللَّطِيفُ چٖي، اِيندُمِ آرِياڻِي،
ڇورِي ڇَڏِ مَ ڇَپَرٖين.

سر ڪوھياري

داستان پھريون

بيت - 1

لَيۡلَ نَہ جاڳِنءَ لِکَ سِنءَ، ڪُلّيِ نَوۡمُ ڪِئاءِ!
قُمۡ ٿِي، پَهُچُ قَرِيبَ کٖي، اِجۡلِسۡ تو نَہ جُڳاءِ،
مُٺِي! مِزمانَنِ سٖين، ويهِي راتِ وِھاءِ،
جيلاہَ نِنڊَ ڪِئاءِ، تٖي روزُ رَھٖين ٿِي راہَ ۾.

بيت - 2

لَيۡلَ نَہ جاڳِنءَ لِکَ سِنءَ شامَ سُتِنءَ سَڀَ راتِ،
اوڳِي! اوٺِيَڙَنِ جا، ٿِي پَهَ پُڇٖين پِرِڀاتِ!
ٿِيُ سَڳَرِ تَنِ جٖي ساٿِ، تہ، ڀورِي! ڪِه ڀالَ مِڙٖين.

بيت - 3

لَيۡلَ نَہ جاڳِنءَ لِکَ سِنءَ، سُتِنءَ راتِ سَڄِي،
ھِتا ھوتاڻِيَنِ جِيُُن، وٖييُون خُرزِينُون کڄِي،
ڀورِي! تُون نَہ پَڄِي، سَبَبِ ڪِه ساٿَ مِڙٖين؟

بيت - 4

اِجۡلِسۡ ڪَرٖي اُٿِئا، توَارِئو توڏنِ،
نَوۡمَ نَوازِنءَ؛ اُنِ جٖي، مَرۡحَبا موڏَنِ،
رڙھِي رَسُ روڏَنِ، اَلۡيَوۡمَ سِۡيرُوۡا، سَسُئِي!

بيت - 5

غافِلِ! غَفِلَتَ ڇوڙِ! تُون ڪِنءَ اَڻاسِي! اوجَهرٖين؟
ڇُپاتا چَڙھِي وِئا، وَڃِي پَهُتا توڙ،
نٖيڻٖين نِنڊَ اُکوڙِ، جِمَ وَرَنِ ۾ واڪا ڪَرٖين.

بيت - 6

سَنجهٖي رَھٖين سُمَهِي، غافِلِ! مَنجِهہ گَهرَنِ،
لٖيڙَنِ جو، لَطِيفُ جٖي، ڪَرَڳَلُ سوءِ نَہ ڪَنِ،
سٖي ڪِنءَ مُحِبَ مِڙَنِ؟ جٖي سَنجهٖي رَھَنِ سُمَهِي.

بيت - 7

الوڙو اَکِيَنِ آيَمِ نِنڊَ اَڀاڳَ کٖي!
ھاڻٖي ھِنَ ڀَنڀورَ ۾، گهارِيان ڪارَڻِ ڪَنِ؟
اَدِيوُن! اوٺِيَڙَنِ، ھِيٖين سٖين ھاڃو ڪِئو!

بيت - 8

جَڏِہ سُتِيُُون جٖي، پَٿَرِ پيرَ ڊِگها ڪَرٖي،
تَڏِہ تَنيِن کٖي، ساٿَ سُتٖيئِي ڇَڏِئو.

بيت - 9

سُتِنءَ پيرَ ڊِگها ڪَرٖي، وَڏِي جاڙَ ڪِياءِ،
درَ ڀَرِ اُڀِيٖين دوسَ جٖي، تہ سُرِ پُرِ ھُندَ سُياءِ،
اَصلِ آريَ ڄامَ جِي، سَڳِي توُن نَہ سِياءِ،
پُنهُوءَ سٖين پٖيياءِ؛ ٿِي نِڀاڳِي! نِنڊوُن ڪَرٖين!

بيت - 10

اِي ڪَمُ ڪَمِيڻِيَنِ، جِنۡ سُمَهَنِ پٖيرَ
ڊِگها ڪَرٖي،
لوچٖين ڇو نَہ، لَطِيفُ چٖي، ھارِي! لَءِ ھوتَنِ؟
نِنڊا نِڀاڳِنِ کٖي، اوڀالا اَچَنِ،
سٖي پُنهُو ڪوہُ پُڇَنِ؟ جٖي سَنجهٖي رَھَنِ سُمَهِي.

بيت - 11

سُتِنءَ سَوارِي، مُهُ ويڙھٖي مَئَنِ جِنۡ،
ڏِٺَءِ نَہ ڏيرَنِ جا، چوڌارِي چارِي؟
تٖيلاہَ، ويچارِي! ساٿُ سُتٖيئِي لَڏِئو.

بيت - 12

سُتِنءَ سَنجهٖئيِ، مُهُ ويڙھٖي مُئَنِ جِنۡ،
اوجاڳو اَکِيَنِ کٖي، ڄاتوءِ نَہ ڏيئِي،
ھَٿا تو پيئِي، ٿِي ڪَچو ڪٖيچِيَنِ کٖي ڪَرٖين!

بيت - 13

اوڄاڳو، اَڄاڻِ! ڪِيُءِ نَہ ڪَمِيڻِيَنِ جنۡ،
اَسارِي! اِھَڙِيَ پَرِ، پِيءِ ڪيچِنِ سٖين ڪاڻِ،
ٻانِهِي چايو ٻاڻِ، ٿِي سَڄِيوُن راتِيوُن سُمَهٖين!

وائي - 1

گِلا ڪا مَ ڪَرٖي، لِکِئو تان نَہ ٽَرٖي،
ٻَڙِي! جيڏِيوُن! مُهِجِي، وو! شَهرَ ڀَنڀورَ ۾.
جو سِينگارُ سَرَتِيٖين، سو مُون ناہِ ڳَرٖي،
مُهِجِي، وو! شَهرَ ڀَنڀورَ ۾.
جِهَڙيٖ تِهَڙٖي حالَ سٖين، وَڃان پيرَ ڀَرٖي،
مُهِجِي، وو! شَهرَ ڀَنڀورَ ۾.
جِه وَڻَ ھٖيٺا ھَلِئا، سَڄَڻَ سانگُ ڪَرٖي،
مُهِجِي، وو! شَهرَ ڀَنڀورَ ۾.
لاموُن تِه وَڻَ سَندِيوُن، لوڏِيان، لايان ڳَرٖي،
مُهِجِي، وو! شَهرَ ڀَنڀورَ ۾.
قَضا جا ڪَرِيمَ جِي، ڪِه تان ڪِينَ ٽَرٖي،
مُهِجِي، وو! شَهرَ ڀَنڀورَ ۾.
جيڪِين لِکئو لوحَ ۾، پاڙِيان سو پَڙٖي؛
مُهِجِي، وو! شَهرَ ڀَنڀورَ ۾.
اَدِيوُن! عَبدُاللّطيفُ چٖي، شَلَ قادِرُ ڪَرَمُ ڪَرٖي!
مُهجِي، وو! شهرَ ڀَنڀورَ ۾.

داستان ٻيون

بيت - 1

ڏُنگَرَ! تُون ڏاڍو، ڏاڍا! ڏاڍايُون ڪَرٖين،
مُون تَنَ اَندَرِ تِينءَ وَھٖين، جِنۡ وَڻُ وَڍٖي واڍو،
اِي ڪَرَمَ جو ڪاڍو، ناتَ پَٿَرِ ڪيرَ پَنڌَ ڪرٖي؟

بيت - 2

ڏُنگَرَ! ڏُکَ سَنداءِ، پِريَ گَڏِجان تہ چُئان،
ڀِنِيَ ٿِيٖين ڀَوارَئُون، ٻِئا وِنگا وَرَ سَنداءِ،
چَڱِي ڪانَ ڪِياءِ، پيرُ وِڃايُءِ پِريَ جو.

بيت - 3

ڏُنگَرَ! ڏَسُ پِريَنِ جو، قافَ نہ ڏِيٖين ڪو؟
قَطارِئا ڪالَ وِئا، توڏا وَٽا تو؟
ھوتُ مُيَ جو ھو، ساڄَنُ اُنَھِين ساٿَ ۾؟

بيت - 4

ڏُنگرَ!ڏَسُ پِرِيَنِ جو، قافَ! نہ ڏِيٖين ڪَلَ؟
قطارِئا ڪالَ وِئا، توڏا توھيِن جَهلَ؟
سُڻي ھوتُ ھَڪَلَ، مانَ ٻُڌِي ٻاروچو وَريٖ!

بيت - 5

ڏُنگَرَ! ڏوراپو، پِھِرو چُندِيَسِ پِريَ کٖي:
”پَھَڻَ پيرَ پِٿُون ڪِئا، تَرِيُون ڇِنِيُون تو،
رَحمُ نہ پِيُيءِ روحَ ۾، قَدُرُ مُھجو ڪو؛“
واڪو ڪَندِيَسِ ”وو! مُون سٖين جَبَلُ ٿو جاڙُون ڪَرٖي!“

بيت - 6

ڏُنگَرَ! مُون نہ ڏُکوءِ، آن اَڳَ ڏُکوئِي آھيان،
سارِيان ڪونَ سُکوءِ، سُورَ گَهڻٖيئيِ سَنڀَران.

بيت - 7

ڏُنگَرَ! ڏُکويِنِ کٖي، دِلاسا ڏِجَنِ،
گَهڻُون پُڇِجيٖ تَنِ کي، جَنِ وَٽا ھوتَ وَڃَنِ،
تُون ڪِنءَ سَندا تَنِ، پَھَڻَ!پيرَ ڏُکوئِيٖين؟

بيت - 8

ڏُنگَرَ! ڏُکِ پَئي، ڪِئَمِ تو سيٖن ڳالَڙِي،
پاڻا آئُون مُئِي، سُورُ سُڻائٖي پِرِيَ جو!

بيت - 9

ڏُنگَرَ! مُون سٖين رو، ڪَڍِي پارَ پُنهُوءَ جا،
سَڄَڻُ ھومِ ھيڪَڙو، وِئو ڦوڙائٖي سو،
ڪِھ کي ڏِيان ڏوہ؟ مُون سٖين اٖيرادٖي اِيَّ ڪِئو!

بيت - 10

ڏُنگَرَ! ڏُکويُون، تو ۾ اورَڻَ آئِيُون،
جٖي اَچَنِ ڦوڙائِيُون، ڏِجَنِ دِلاسا تَنِ کٖي.

بيت - 11

ڏُنگَرَ! ڏُکويِنِ کٖي، ڳَلِ سُڪا ڳوڙھا،
ھوجٖي پَھَڻَ پَٻَ جا، ڀَڄِي ٿِئا ڀورا،
گُندَرَ جا گھوڙا، وَڃَنِ جانِ جُدا ڪِئو!