سر ڪلياڻ

داستان پھريون

بيت - 1

اَول الله عَلِيمُ، اعلى، عالَمَ جو ڌَڻِي،
قادِرُ پنھنجي قُدرت سين، قائم آھِ قديم،
والِي، واحِدُ، وَحدَہُ. رازق، ربُّ رَحِيم،
سو ساراھ سچو ڌڻي، چئِي حَمدُ حَڪيم،
ڪري پاڻ ڪَرِيمُ، جوڙُون جوڙَ جھان جي.

بيت - 2

وَحۡدَہٗ لا شَرِيڪَ لَهٗ، جان ٿو چَئين اِيئن،
تان مَڃُ مُحمَّدُ ڪارَڻِي، نِرِتُون مَنجهان نِينھن،
تان تُون وَڃيو ڪِيئن، نائِين سِرُ ٻِين کي

بيت - 3

وَحۡدَہٗ لا شَرِيڪَ لَهٗ، جَڏھن چَيو جن،
تَن مَڃيو مُحمَّدُ ڪارَڻِي، ھيجان ساڻ ھِنَئينِ،
تڏھن مَنجهان تن، اَوَتَڙِ ڪو نہ اوليو.

بيت - 4

وَحۡدَہٗ لا شَرِيڪَ لَهٗ، جن اُتوسين ايمانَ،
تن مڃيو مُحمَّدُ ڪارَڻِي، قَلبَ ساڻ لِسانَ،
اُوءِ فائِقَ ۾ فَرمان، اَوَتَڙِ ڪنھن نہ اوليا.

بيت - 5

اَوَتَڙَ ڪنھن نہ اوليا، سُتَڙِ ويا سالِمَ،
ھيڪائِي ھيڪُ ٿيا، اَحَدَ سين عالِمَ،
بي بھا بالِمَ، آگي ڪيا اڳھِين.

بيت - 6

آگي ڪيا اڳھِين، نسورو ئي نُور،
لَاخَوفٌ عَلَيھِمۡ وَلَاھُمۡ يَحۡزَنُونَ، سچن ڪونهي سُور،
مولي ڪيو مَعمؤر انگُ اَزَلَ ۾ اُنِ جو.

بيت - 7

وَحۡدَہٗ جي وَڍيا، اِلّا اللہ سين اورِينِ،
ھِنيون حقيقت گڏيو، طريقت تورِينِ،
معرفت جي ماٺ سين، ڏيساندَرُ ڏورِينِ،
سُک نہ سُتا ڪڏھين، ويھي نہ ووڙِينِ،
ڪُلَھِنئُون ڪورِينِ، عاشق عَبۡدُاللَّطِيفُ چئي.

بيت - 8

وَحۡدَہٗ جي وَڍيا، اِلّا اللہ اَڌَ ڪَيا،
مُحَمدُ رَسُولُ اللہ چَئي، مسلمان ٿيا،
عاشق، عَبۡدُاللَطِيفُ چئي اِنَھيِن پَھِ پيا،
تيلان ڌَڻيءَ ڌُئا، جيلان وِيا وَحدت گڏجي.

بيت - 9

وَحۡدَہٗ جي وَڍيا، ڪَيا اِلّا اللہ اَڌَ،
سي ڌَڙَ پَسي سَڌَ، ڪنھن اَڀاڳِيءَ نہ ٿِئي.

بيت - 10

وَحۡدَہٗ لا شَرِيڪَ لَهٗ، ٻُڌءِ نہ ٻوڙا،
ڪِہ تو ڪنين نہ سُئا، جي گهَٽَ اندر گهُوڙا،
ڳاڙيندين ڳوڙھا، جت شاھد ٿيندَءِ سامُھان.

بيت - 11

وَحۡدَہٗ لا شَرِيڪَ لَهٗ، اِھو وِھائج وِيّ،
کَٽين جي ھارائين، ھنڌ تُنھنجو ھِيُ،
پاڻان چوندُءِ پِيُ، ڀري جام جَنَّتَ جو.

بيت - 12

وَحۡدَہٗ لا شَرِيڪَ لَهٗ، اِيءُ ھيڪڙائِي حَق،
ٻيائِي کي ٻَکُ، جن وڌو، سي وِرسيا.

بيت - 13

سِرُ ڍُؤنڍيان، ڌڙ نہ لھان، ڌڙ ڍُؤنڍيان، سِرُ ناھِ،
ھَٿَ ڪَرايُون آڱريون، ويا ڪپجي ڪانِھ،
وحدت جي وِھانءِ، جي ويا، سي وڍيا.

بيت - 14

عاشق چَؤ مَ اُنَ کي، مَ ڪِي چَؤ معشوق،
خالق چَؤ مَ خام تون، مَ ڪِي چَؤ مخلوق،
سَلِج تنھن سُلوڪ، جو ناقِصئا نِڱيو.

بيت - 15

وحدتان ڪثرت ٿي، ڪثرت وحدت ڪُل،
حق حقيقي ھيڪڙو، ٻولي ٻِيءَ مَ ڀُل،
ھُو ھُلاچو ھُل، بااللہ سندو سڄڻين.

بيت - 16

پاڻَھِين جَلَّ جَلَالَهٗ، پاڻھِين جانِ جمالُ،
پاڻھِين صورت پِرِينءَ جي، پاڻھِين حُسن ڪَمالُ،
پاڻھِين پِير مُريد ٿئي، پاڻھِين پاڻَ خيالُ،
سڀ سڀوئي حالُ، منجهان ئي معلوم ٿئي.

بيت - 17

پاڻَھِين پسي پاڻکي، پاڻھِين مَحبُوبُ،
پاڻھِين خلقي خوب، پاڻھِين طالب تن جو.

بيت - 18

سو ھِيُ سو ھُو، سو اجَلُ سو اللہ،
سو پِرين، سو پَساھ، سو ويري، سو واھَرؤ.

بيت - 19

پڙاڏو سو سَڏُ، وَرُ وائِيءَ جو جي لَھِين،
ھُئا اَڳَھِين گَڏُ، ٻُڌڻ ۾ ٻہ ٿيا.

بيت - 20

ايڪ قَصَرُ، دَرَ لَکَ. ڪوڙين ڪَڻِس ڳڙکيون،
جيڏانھن ڪريان پرک، تيڏانھن صاحب سامهُون.

بيت - 21

ڪوڙين ڪايائون تُنھنجيون، لِکَن لَکَ ھزارَ،
جِيءُ سڀ ڪنھن جيءَ سين، دَرسن ڌارون ڌَار،
پِريَمِ! تنھنجا پارَ، ڪھڙا چَئِي ڪيئن چوان.

وائي - 1

سَڀَڪا پِريان ڪون پُوڄي،
نِينھُن نيڻين، ڳُڻُ ڳالهہ وو.
جا چِتايم چِتَ ۾، سَڄَڻُ سا ٿو ٻُجهي،
لاتِ جا لَطِيف جي، سَڏُ تُنھنجو سُڄي.

بيت - 32

مُلهہ مَھانگو قَطَرو، سِڪَڻُ شَھادت،
اَسان عِبادتَ، نَظَرُ نازُ پِريَن جو.

داستان ٻيو

بيت - 1

اگهي اَگهائي، رَنجُ پِريان کي رسيو،
چَکيَم چڱائِي، سورانگهي سُوريءَ تان.

بيت - 2

انڌا اُوندا ويڄَ! کَلَ ڪُڄاڙيا کانئِيين؟
اسان ڏُکي ڏِيل ۾، تون پيارِئين پيڄَ!
سُورِي جنِين سيڄَ، مرڻ تن مُشاھِدو.

بيت - 3

سُوريءَ سَڏ ٿيو، ڪا ھَلندي جيڏيون؟
وَڃڻ تِن پِيو، نالو نِينھن ڳِنَھَنِ جي.

بيت - 4

سُوري سَڏَ ڪَري، اُڀِي عاشقَن کي،
جي اَٿيئي سَڌَ سِڪڻَ ۾، تہ ڪَؤ مَ پير پَري،
سِسِي ڌَار ڌَري، پُڇِجُ پوءِ پريتَڻو.

بيت - 5

سُوري آھِ سينگار، اَڳھِين عاشقن جو،
مُڙڻ، موٽڻ ميھڻو، ٿيا نِظاري نِروارُ،
ڪُسڻ جو قَرارُ، اصل عاشقن کي.

بيت - 6

سُوري سينگاري، اَصلِ عاشِقَن کي،
لُڏِيا ڪِين، لَطِيف چَئي، ٿِيا نيزي نظاري،
ڪوٺيو ڪِناري، آڻيو چاڙھي اُنِ کي.

بيت - 7

سُوريءَ مٿي سيڻَ، ڪھڙي ليکي سَنَرا؟
جيلَهَ لڳا نيڻَ، تي سؤريائِي سيڄَ ٿي.

بيت - 8

سُوريءَ چَڙھڻ، سيڄ پَسڻ، اِيُ ڪَمُ عاشِقَن،
پاھؤن ڪِينَ پَسَنِ، سائي ھَلنِ سامهان.

بيت - 9

سُوريءَ تي سَؤ وارَ، ڏِھاڙيو چَنگ چڙھين،
جِمَ وِرچي ڇڏئين، سِڪڻ جي پَچار،
پِرتِ نہ پَسِين پارَ، نينھن جِئان ئي نِڱئو.

بيت - 10

پھرين ڪاتي پاءِ، پڇج پوءِ پريتڻو،
ڏُکُ پِريان جو ڏيلَ ۾، واڄَٽَ جئن وَڄاءِ،
سِيخُن ما‏ہُ پَچاءِ، جي نالو ڳِيڙُءِ نِينھن جو.

بيت - 11

ڪاتِيءَ ڪونهي ڏوھُ، ڳَنُ وڍيندڙَ ھٿ ۾،
پَسيو پَرِ عجيب جِي، لِچيو وڃي لوھُ،
عاشقن اَندوہ، سدا معشوقن جو.

بيت - 12

ڪاتِي تِکِي مَ ٿئي، مَرُ مُنِيائِي ھوءِ،
مانَ وِرمَن توءِ، مُون پِريان جا ھٿڙا؟

بيت - 13

ڪاتي جا قَريبَ جِي، سا ھَڏُ چِيري چَمُ،
عاشقَن پَنھنجو اَنگُ، اللہ ڪارَڻِ وَڍِيو.

بيت - 14

جي تون سِڪَڻ سِکيو، تہ ڪاتيءَ پَئي مَ ڪَنجهُہ،
اَندرِ اِيُ اَھنجُ، سانڍج سُکائون ڪَري.

بيت - 15

جان وَچِين، تان ويھ، نہ تہ وَٺِيو واٽَ وَنءُ تون،
ھيءُ تَنِين جو ڏيهُ، ڪاتي جنين ھَٿ ۾

بيت - 16

ڪاتي جَنِ ڳَرِي، مان لَنؤ لَڳي تَن سِين،
مُحبَت جي ميدانَ ۾، وَڃان پيرَ ڀَري،
اَڏيءَ سِرُ ڌَري، مانَ ڪُھَنِئوُن سُپرين.

بيت - 17

اڳيان اَڏِنِ وَٽِ، پويَن سِر سنباھيا،
ڪاٽ تہ پوين قبولَ ۾، مَڇُڻ ڀائين گهَٽ،
مٿا مُھايَنِ جا، پيا نہ ڏِسين پَٽِ؟
ڪلاڪي ھَٽِ، ڪُسڻ جو ڪوپُ وَھي.

بيت - 18

جي اَٿيئي سَڌَ سُرڪ جِي، تہ وَنءُ ڪلالن ڪاٽي،
لاھي رک، لَطِيف چئي، مٿو وَٽِ ماٽي،
تِڪَ ڏيئي پِڪَ پِيُ تون، منجهان گهوٽ! گهاٽي،
جو وَرَنَهَ وِھاٽي، سي سِرَ وَٽِ سَرو سھانگو.

بيت - 19

جي اَٿيئِي سَڌَ سُرڪ جي، تہ ونءُ ڪَلالڪِي ھَٽِ،
لاھي رک، لطيف چي، مَٿو ماٽي وَٽِ،
سِرُ ڏيئي ۾ سَٽِ، پِيجُ ڪي پياليون.

بيت - 20

جي اَٿيئي سَڌَ سُرڪ جي، تہ ونءُ ڪلالڪي ڪُوءِ،
مَھيسَر جي مَنڌَ جِي، ھُتِ ھَڏھِين ھُوءِ،
جان رمز پروڙيم روءِ، تان سِرَ وَٽِ سُرڪِي سَڳُڻي.

بيت - 21

جي اَٿيئي سَڌَ سُرڪ جي، تہ وَنءُ ڪَلالڪي گهرِ،
وَڍڻُ، چِيرڻُ، چِچِرڻُ، پَھَتِ اُنِين جي پَرِ،
جي وَٽِي پويئِي وَرِ، تہ سَھَنگي آھ، سيد چَئي.

بيت - 22

ناڻي ناھِ ڪَڪُوھُ، ڪي مُلهہ مَھانگو مَنڌُ،
سَنباھج، سيّد چئي، ڪاٽڻ ڪارَڻِ ڪَنڌُ،
ھِيُ تنِين جو ھنڌُ، مَٽَن پاس مَرَنِ جي.

بيت - 23

عاشق زھر پِياڪَ، وِھُ ڏسي، وِھُسَنِ گهڻو،
ڪَڙي ۽ قاتلَ جا، ھميشه ھيراڪَ،
لڳين لَنؤ، لطيف چي، فَنا ڪيا فِراقَ،
توڻي چِڪَنِن چاڪَ، تہ بہ آھَ نہ سَلِن عامَ کي.

بيت - 24

مَ ڪَرِ سَڌَ سَري جي، جي تون ٽارِئين ٽُوھُ،
پِيتي جنھن پاسي ٿئي، منجهان رَڳُن رُوح،
ڪاٽي چَکُ ڪڪُوھُ، لاھي سِرُ، لطيف چي.

بيت - 25

سَڌَڙِيا شراب جون، ڪُھُ پَچارُون ڪَنِّ؟
جُہ ڪاتَ ڪَلالن ڪڍيا، تہ موٽيو پوءِ وڃنِّ،
پِڪُون سي پِينّ، سِرَ جنجا سَٽِ ۾.

بيت - 26

سِرَ جُدا، ڌَڙَ ڌارَ، دوڳَ جنين جا ديڳِ ۾،
سي مَرُڪن پَچارَ، حاضر جن جي ھَٿ ۾.

بيت - 27

ديڳين دوڳ ڪَڙھن، جِت ڪَڙئين ڪَڙَڪو نہ لَھي،
تِتي طبيبن، چاڪ چِڪَندا ڇڏيا.

بيت - 28

سِسي سي گهُرَنِ، جي واٽِيندڙَ وِچَ ۾،
اُوءِ ڪِي ٻيو پُڇَن، سَرو جَن سَنباھيو؟

بيت - 29

اَصُل عاش پنھنجي، سِسي نہ سانڍين،
لاھيو سِرُ، لطيف چي، ساھُ سَلهاڙيو ڏِين،
ڪُلھنِئون ڪورينِ، پُڇَنِ پوءِ پِريتَڻو.

بيت - 30

اصل عاشقن جو، سِرُ نہ سانڍڻُ ڪمُ،
سَوَ سِسِنئان اڳرو، سَندو دوسان دمُ،
ھِيُ ھڏو ۽ چمُ، پِڪَ پِريان جِيَ نہ پَڙي.

بيت - 31

جي مٿي وٽِ مِڙَنِ، تہ سڀ ڪنھن سَڌَ ٿئي،
سِرَ ڏني سَٽِ جُڙي، تہ عاشقَ اِئن اچن،
لِڌا تي لَڀَنِ، مُلهِہ مَھانگا سُپرين.

وائي - 1

مَنڌُ پئندي مون، ساڄَنُ سَھِي سڃاتو،
پِي پِيالو عِشقَ جو، سڀڪي سمجِهيوسون،
پريان سَندي پارَ جي، اندر اڳ اَٿُون،
جِئڻُ ناھي جَڳَ ۾، ڏِينھن مڙيئِي ڏُون،
الا! عبداللطيف چي، آھين تُون ئي تُون.

داستان ٽيون

بيت - 1

اُٿياري اُٿي وِيا، مَنجهان مُون آزارَ،
حبيبَ ئي ھڻِي ويا، پِيڙا جي پَچار،
طَبيبن تَنوارَ، ھَڏِ نہ وڻي ھاڻِ مون.

بيت - 2

ھَڏِ نہَ وَڻي ھاڻ مون، ويڄَن جي وِصالَ،
ھِنَ منھنجي حالَ، حبيبُ ئي ھادي ٿيو.

بيت - 3

حَبيبُ ئي ھادِي ٿِيو، رَھَنُما راحَتَ،
پِيڙا نيائين پاڻَ سِين، لائي ڏيئي لَتَ،
سُپيريان صِحتَ، ڏِنيَم منجهان ڏُکندي.

بيت - 4

اَورِ ڏُکَندو اُو ٿئي، ھادِي جنھن حَبِيبُ،
تِرُ تَفاوتُ نہ ڪري، تنھن کي ڪو طَبِيبُ،
رَھَنُما رَقِيبُ، ساٿَرِ صِحتَ سُپِرين.

بيت - 5

ساٿَرِ صِحتَ سُپِرِين، آھي نہ آزارُ،
مجلسَ وير مِٺو ٿئي، ڪوٺِيندي قَھارُ،
خَنجرُ تنھن خُوب ھڻي، جنھن سين ٿئي يارُ،
صاحِبُ رَبُّ ستّارُ، سوجهي رَڳُون ساھَ جون.

بيت - 6

رَڳُون ٿيون ربابُ، وَڄَنِ ويلَ سَڀَڪَنھِين،
لُڇَڻُ، ڪُڇَڻُ، نہ ٿِيو، جانِبُ ري جَبابُ،
سوئِي سَنڌِيندُم سُپِرِين، ڪَسِ جنھن ڪَبابُ،
سو ئِي عينُ عَذابُ، سو ئِي راحَتَ رُوحَ جي.

بيت - 7

سو ئِي راھَ رَدِّ ڪري، سو ئي رَھَنُماءُ،
وَ تُعِزُّ مَنۡ تَشَآءُ وَ تُذِلُّ مَنۡ تَشَآءُ.

بيت - 8

پَرِ ۾ پُڇيائُونِ، عشق جي اسباب کي،
دارُون ھنَ دردَ جو، ڏاڍو ڏسِيائُون،
آخر والعَصَر جو، ايئن اُتائون،
تھان پوءِ آئون، سِڪان ٿي سَلام کي.

بيت - 9

سِڪِين ڪُهُ سَلامَ کي، ڪَرين ڪُهُ نہ سَلامُ؟
ٻيا دَرَ تن حرامُ، اِيُ دَرُ جنِين ديکيو.

بيت - 10

مِٺايان مِٺو گهڻو، ڪَڙو ناھِ ڪَلامُ،
سُڪُوتُ ئِي سَلامُ، پِريان سَندي پارَ جو.

بيت - 11

پريان سَندي پارَ جي، مِڙيئي مِٺائي،
ڪانهي ڪَڙائي، چَکِين جي چيتُ ڪري.

بيت - 12

ڄاڻي ٻُجهي جَن، توسين سُورَ سَڃَ ڪئي،
تون ڪيئن سنديُون تَن، پَرَ سين پَچارؤن ڪرين.

بيت - 13

تو جنِين جي تاتِ، تن پڻ آھي تنھنجي،
’فَاذۡکُرُونِي اَذکُرۡکُمۡ‘، اِي پَرُوڙِج باتِ،
ھَٿِ ڪاتي ڳُڙُ واتِ، پُڇَڻُ پَرِ پِرِين جي.

بيت - 14

حَبِيبَن ھيڪار، مَنجهان مِھرَ سَڏُ ڪيو،
سو مون سَڀُ ڄَمار، اورڻ اھوئي ٿِيو.

بيت - 15

پاٻوھي ھيڪارَ، مُون کان پُڇيو سَڄَڻين،
اَلَسۡتُ بِرَبِّڪُمۡ، چَيائُون جنھن وارَ،
سَندي سورَ ڪِنارَ، تَنَ تَڏاھڪُون نہ لھي.

بيت - 16

پاٻوھِيو پُڇَنِّ، ڪِٿي ھَٿُ حَبِيبَ جو؟
نيزي ھيٺان نِيھنَ جي، پاسي پاڻُ نہ ڪَنِّ،
عاشِقَ اَجَلَ سامُھان، اُون چي ڳاٽ اَچَنِّ،
ڪُسَڻُ قُربُ جَنِّ، مَرَڻُ تَنِّ مُشاھِدو.

بيت - 17

ڪوٺي ڪُھي سُپرِين، ڪوٺي ڪُھڻَ ساڻُ،
نيزي ھيٺان نِينھنَ جي، پاسي ڪَرِ مَ پاڻُ،
ڄُلُ، وِڃائي ڄاڻُ، عاشِقَ! اَجَلَ سامهُون.

بيت - 18

ڪوٺڻُ قَريبَنَ جو، عينُ تَڙڻُ آھِ،
اِيَ اُلٽي ڳالَهڙِي، سِڪَ وَرَندِي ساھِ،
آسَرَ ھَڏِ مَ لاھِہ، ڇِنَڻُ ڳَنڍَڻُ اُنِ جو.

بيت - 19

ڪُھَنّ تان ڪَرَ لَھَنِ، ڪَرَ لَھَنِ تان ڪُھَنِّ،
سيئِي ماءِ! مُھَنّ، سيئي راحتَ رُوحَ جِي.

بيت - 20

ڪُھي سو ڪَرَ لَھي، ڪوٺي سو قَريبُ،
اِھا عادتَ سِکيو، ھَر زمان حبيبُ،
تِڇي سو طبيبُ سو ئي راحتَ رُوحَ جِي.

بيت - 21

ڪُھَنِّ ۽ ڪوٺين، اِي پَرِ سندي سَڄَڻين،
سؤريءَ چاڙھيو سُپرين، ڏَنڀَ ڏِھاڻي ڏِين،
ويٺا وِرِھُ وَٽِين، آءُ واڍوڙيا! وِھاءِ تُون.

وائي - 1

ٿيندو تَنَ طَبيبُ، دارُون منھنجي دردَ جو،
ٻُڪِي ڏِيندُمِ ٻاجهَہ جِي، اَچي شالَ عَجيبُ،
پِرِيَنِ اَچِي پاڻ ڪِيو، سَندو غُورُ غَرِيبُ،
ڏُکَندو سڀوئِي ڏُور ڪِيو، مَنجهُون تَنَ طَبيبُ،
اَدِيُون! عبداللطيف چَي، ھاتِڪُ آھِ حَبِيبُ.

سر يمن ڪلياڻ

داستان پھريون

بيت - 1

تون حبيبُ، تون طبيبُ، تون دَردَ جي دَوا،
جانِبَ! منھنجي جِيءَ ۾، آزارَ جا اَنوا،
صاحبَ! ڏي شِفا، ميان! مريضن کي.

بيت - 2

تُون حَبِيبُ، تُون طَبِيبُ، تُون دَرد جو دارون،
دَوا آھين دِل کي، تُنھنجون تَنوارون،
ڪَريان ٿِي ڪارون، جِئن ٻُڪي ٻينئون نَہ ٿِئي.

بيت - 3

تُون حَبِيبُ، تون طِبِيبُ، تون ئي ڊَٺنِ ڊَبُ،
تُون ڏِئين، تُون لاھِئين، تُون ئي هادي رَبّ،
آهمُ اِيُ عَجبُ، جِئَن، واريو ويڄَ وِهارِئِين.

بيت - 4

تون حَبِيبُ، تون طَبِيبُ، تون دارُون کي دَردَن،
تون ڏِئين، تون لاھِئين، ڏاتر! کي ڏکندَن،
تَڏھين ڦَڪِيُون فَرقُ ڪنِ، جَڏھين اَمُر ڪَريِو اُنِ کي.

بيت - 5

جان ڪِي ڪَري طَبِيبُ، داروُن ھِن دَردَ جا،
ھَڻِيو سي حَبِيبُ، اُکوڙِيو اَڌ ڪَري.

بيت - 6

ھَڻُ حَبِيبَ! ھَٿَ کَڻي، ٿيڪَ مَ ٿورو لاءِ،
پِريمَ! تنھنجي گهاءِ، مَران تہ مانُ لَھان.

بيت - 7

ھَڻُ حَبِيبَ! ھَٿُ کڻِي، دِل ۾ ڏيرِي دَانھن،
ڪُڇان تَان ڪوڪَ ٿِئي، صَبرُ آئون نہ سَھان،
ڪَنھن کي اِئن چَوان، تہ مون کي ماريو سَڄڻين.

بيت - 8

ھَڻُ حبيبَ! ھَٿُ کڻِي، ٻَنگا لھِي ٻاڻُ،
ماڳھِين مون مِنھُن ٿِئي، جهولِيءَ وِجهان پاڻُ،
اِنَ پَرِ ساجَنَ ساڻ، مانَ مُقابلو مون ٿئي.

بيت - 9

جِٿ حبيبَ ھڻنِ، نائُڪَ ڀَري نِينھن جِي،
تِتي طبيبنِ، وِڄا وڃٖي وِسري.

بيت - 10

ھڻِين جي حبيبَ! محبتِي مَيا ڪري،
پُڇان ڪينَ طبيبَ ھُندَ گهائَنِ سين ٿِي گهارِيان.

بيت - 11

چوري چَنگُ، ٻَنگُ لھي، حبِيبَن ھَنيوس،
ٻُجهان ٻاڻ لڳوس، ڪانارِئو ڪَرَ کڻي.

بيت - 12

ڪانارِيا ڪُڻِڪَنِ، جنِين لوھُ لِڱَنِ ۾،
محبتَ جي ميدانَ ۾، پِيا لالَ لُڇَنِ،
پاڻَهِين ٻَڌنِ پَٽِيُون، پاڻَهِين چِڪِيا ڪَنِ،
وَٽان واڍوڙِيَن، رھي اَچجي راتڙِي.

بيت - 13

رھِي اَچجي راتڙي، تن واڍوڙئن وَٽاءَ،
جَنِ کي سورُ سريرَ ۾، گَهٽَ مَنجهارا گهاءَ،
لِڪائي لوڪاءَ، پاڻِهين ٻَڌنِ پَٽِيُون.

بيت - 14

اَڄُ پڻ ڪَنجهو ڪَنجَهہ، واڍوڙَڪِيءَ مَنَھِينءَ،
جُہ پڻ پِييَنِ سَنجَهہ، ھُو پِنيُون ھُو پَٽِيُون.

بيت - 15

اَڄُ پڻ ڪھڙي دانھن، واڍوڙَڪيءَ مَنَھِينءَ؟
ويڄَ ورائي ٻانھن، چوري چاڪَ نِھاريا.

بيت - 16

ويچارا واڍوڙ، سَدا شاڪِرَ سُورَ سِين،
تاڻين مَٿي توڙَ، اوري ڪَنِ نَہ آسرو.

بيت - 17

سَدا آھي سورَ جي، واڍوڙَن وائِي،
جيڪا اَٿَنِ مَن ۾، سَلِن نہ سائِي،
اَوڙڪِ اھائي، ڳوليو لَھنِ ڳالهڙي.

بيت - 18

سَگهنِ سُڌِ نہ سُورَ جِي، گهايَلَ ڪيئن گهارِين،
پيَلَ پاسو پَٽَ تان، واڍوڙَ نَہ وارِينِ،
پَرِ ۾ پَچَنِ پِرينءَ لَئي، ھَئي! ھَنجُون ھارِينِ،
سَڄَڻُ جي سارِينِ، تن رويو وِھامي راتڙي.

بيت - 19

سَگهنِ سُڌِ نَہ سُورَ جِي، ٿا رُنڪَن رَنجُوري،
پيا آھن پَٽَ ۾، مَٿن مامُوري،
لڳين لَنؤ، لَطِيفُ چَي، سَدا جِي سوري،
پِرتِ جن پُوري، تن رويو وِھامي راتڙي.

بيت - 20

آيَلِ! اُنِ نہ وِسَهان، ھَنجُون جي ھارِينِ،
آڻيو آبُ اَکَينِ ۾، ڏيه کي ڏيکارِينِ،
سَڄَڻُ جي سَارين، سي نڪي روئن نہ چون ڪِي.

وائي - 1

وِرسيا ويڄَ ويچارا! دِلِ ۾ دَردُ پِرِيُنِ جو،
اُٿيو ويڄا! مَ وِھو، وَڃو ڊَبَ کَڻِي،
ٻُڪِي ڏيندا ٻاجَهہ جِي، آيا سُورَ ڌَڻِي،
آيا جِيءَ جِيارا، دِلِ ۾ دَرِدُ پِرِينِ جو.

داستان ٻيو

بيت - 1

تَنَ طبيب نہ تُون، سُڌِ نَہ لهين سُورَ جي،
سانڍِ پنھنجا ڊَبَڙا، کَڏَ کڻي ۾ ڀُون،
ڪانَ گُهرجي مُون، حياتِي ھوتَنِ ري.

بيت - 2

ويڄَنِ سين وائِيءَ پِيا، ڪِري نَہ ڪَيائون،
جي پَندِ پاريائُون، تہ سِگهائي سَگها ٿِيا.

بيت - 3

ويڄَنِ سين وائِيءَ پِيا، ڪِري ڪَن نَہ پاڻَ،
اَگها اِنَ اُھُڃاڻَ، پَسو! سُورَ سِجهائِيا.

بيت - 4

آھي گَهڻو اَگهنِ جو، تَرسُ طبيبنِّ،
ڪيو وَسُ ويڄنّ، تان ڪِريءَ ري ڪينَ ٿئي.

بيت - 5

اگهائِي سَگها ٿِيا، جي ويٺَا وَٽِ ويڄَن،
تَرسي طَبِيبن، چيٺي ھوندَ چَڱا ڪَيا.

بيت - 6

پاڙي ويڄَ ھُئَام، تان مُون مُور نَہ پُڇيا،
تيلاھين پيام، موريسرَ اَکين ۾.

بيت - 7

ھاريا! تو ھِرِي، ڪُيَچُ ڪايا سين ڪيو،
ڪَرِئين جي ڪِرِي، تَہ تون تَوانو ٿئين.

بيت - 8

جي ڀائِين پِرِينَ مِڙان، تہ سِکُ چوران ڪِي داتِ،
جاڳَڻُ جَشَنُ جن کي، سُکُ نہ ساري راتِ،
اُجِهي ٻُجِهي آئيا، وائي ڪَنِ نہ واتِ،
سَلي سُوريءَ چاڙھيا، بيان ڪَنِ نہ باتِ،
توڻي ڪُسَنِ ڪاتِ، تہ بہ ساڳِي سَلَنِ ڪينَ ڪِي.

بيت - 9

تڙي طبيبنِّ، گهايَلُ گَهران ڪَڍيو،
چِڪيا چاڪَ چِيهُون ڪري، ڪَڙيُون مور نہ ڪَنِّ،
دوستَ جي درسنَ سين، پَئي ٺارُ ٺَپَنِّ،
وِرچيو ويڄَ وَڃنِّ، آءُ تہ پِريَمِ اُبَهان.

بيت - 10

ويڄَن ويٺي ئي، دوست پيهِي دَر آئيو،
صِحَتَ جي سَرِيرَ ۾، ڪَلَّ ڪَرين پيئي.
پِيڙَ پَري ويئي، اَچڻَ ساڻُ عَجِيبَ جي.

بيت - 11

وَڍي جَنِ وِڌياسِ، وَري ويڄَ ئِي سي ٿِيا،
تُرتُ ٻَڌائُون پَٽِيُون، روزِ ڪِيَائُون راسِ،
ھينئڙا! تنِين پاسِ، گهارِ تہ گهايَلُ نہ ٿِئين.

بيت - 12

ھاريا ويڄَ! مُياسِ! سُڌِ نہ لَهين سُورَ جي،
پريان کي چُوندِيَاسِ، تہ تَرس طَبِيبن ڇڏيو.

بيت - 13

ويڄَ! مَ ٻُڪِي ڏي، اَلا چَڱِي مَ ٿِيان!
سَڄَڻُ مانَ اَچي، ڪَرَلاھُو ٿِي ڪَڏِھِين.

بيت - 14

وِھَڻُ ويڄَنِ وَٽِ، جي سِکين تہ سَگهو ٿِئين،
اَڳِين عَادَتَ مَٽِ، اَگها! عاجِز نَہ ٿئِين.

بيت - 15

ھُئين تہ ويڄن وَٽِ، تون ڪِئن جِيءَ جَڏو ٿِئين؟
سِرُ ڏيئي ۾ سَٽِ، ڪُهُ نہ ڪَيءِ ڊَبَڙا؟

بيت - 16

ڪُٺيس ڪويڄَنِّ، تَنَ طبيبَ نہ گڏيا،
ڏيئي ڏنڀَ ڏَڏَنِ، پاڻان ڏِيلُ ڏکوئِيو.

بيت - 17

تَرسُ طبيبنِ جو، جَڏَنِ ڪيو نہ جات،
جو ويڄن جي وات، دارونئَان تنھن دور ٿيا.

بيت - 18

دارُون ۽ ڪارُون، جان ڪِي ڪِيا ويڄَ مُون،
ٻُڪِي ڏيندا ٻَاجَهہ جِي، نِهاري نَاڙُون،
جن جون سيڻَ لَهنِ سَارُون، تن تَان ڏُکَندو ڏُور ٿئي.

بيت - 19

اَگهن مِڙِي اَڄُ، ڪيو سَڏُ صِحَتَ کي،
ڏُور ڏُکندا! ڀَڄُ ،مِهريءَ مُنھن ڏيکاريو.

وائي - 1

اَچِي سارَ لَهيج، ساجنَ سُورَ تُماري آئُون مارِي!
سُوري تُماري جي مَران، مُون ڏوہُ مَ ڏيج،
ڊَبنِ ڀَري ھَٿَڙا، دارُون دوستَ! ڪَريج.

داستان ٽيون

بيت - 1

ھَيءِ ھَيءِ وَھي ھَاءِ، مَنَ ۾ مَحبوبنِ جِي!
جيرا جوشَ جَلائِيَا، بُڪين ٻَري باہِ!
پَسو مَچَ مَٿاءِ، جي ويساہَ نہ وِسَهو!

بيت - 2

ھَيءِ ھَيءِ وَھي ھوءِ، مَنَ ۾ محبوبنِ جِي!
جيرا جوشَ جَلائِيا، بُڪِين مڪي بوءِ!
اَچي پَسو رُوءِ، جي ويساہَ نہ وِسَهو!

بيت - 3

ڪانڊين ٽانڊين ٻاٻُرين، پَچان مَرُ پيئِي!
جيرا، جِگِرَ، بُڪِيُون، سيخُنِ ۾ ٽيئِي!
ويڄَنِئون ويئِي! ٿِي وھِيڻِي سَڄَڻين!

بيت - 4

سَرُ جو سَڃيو سَڄَڻين، ڀَرُ ڀيڏيءَ ڏيئي،
ڪانَ ڪَرنگهرُ ڪَپيو، پَکَن سِرِ پيهِي!
جيرا، جِگِرَ، بُڪِيُون، پاساڙا ٻيئي!
ويڄنئوُن ويئي! ٿِي وھيڻي سَڄَڻين!

بيت - 5

سَرُ جو سَڃيو سَڄَڻين، ٻنگان ٻاڻُ ڀَري،
وِيو وُجودان نِڪري، ڪَڙِ ڪَڙِ ڪانُ ڪَري!
پُڇوپيرَ ڀَري، تہ ڪِہ ٺَرِيو ھَٿُ حَبيبَ جو؟

بيت - 6

سَرُ جو سَڃِيو سَڄَڻين، ٻِيهَرَ ٻاڻُ ڀَري،
ڇِمڪِيو سو ڇوہَ مان، ڪَڙ ڪَڙ ڪانُ ڪَري،
جيرا، جِگِرَ، بُڪِيُون، لنگهي پِيو پَري،
لڳو جِيءَ جَڙي، تاڻِيان، تِيرُ نہ نِڪري!

بيت - 7

سَرُ جو سڃيو سَڄَڻين، سِيڱَ مَنجهان سيلو،
ٽِنگرُ ٽِڪيو ڪِينَ ڪِي، پارِ لنگهيو پِيلو،
ھَڻَڻَ سين حِيلو، جانِبَ جيڏو ئي ڪَيو.

بيت - 8

ڌَڳايو ڌَئِين، ڄيرو اَندر ڄندُري!
لَڳي سِيخَ وُجودَ ۾، سَندي نِينهَن نَئِين!
مُشاھدي تَنھين، مونکي وِڌو مَچَ ۾!

بيت - 9

پُڇُ پَتنگنِ کي، سندِيُون کامَڻَ خَبَرُون،
آڻِيو وجَهن آڳِ ۾، جِيءُ پَنھنجو جي،
جيري جنِين جي،لڳا نيزا نِينهَن جا.

بيت - 10

پتنگ چائِين پاڻَ کي، تہ اَچي آڳِ اُجهاءِ،
پَچَڻَ گهڻا پَچَائِيا، تون پَچَڻَ کي پَچاءِ،
واقف ٿِي وِساءِ، آڳِ نہ ڏِجي عامَ کي.

بيت - 11

پَتنگُ چائِين پاڻَ کي، تہ ڄيري پؤُ ڄاڻي،
تان تان تاڻِجُ تَوَ ڏي، جان آڳِ نہ اُجهاڻِي،
وِسَهُ وِھاڻي، آڳ نہ ڏِجي عام کي.

بيت - 12

پَتَنگُ چائِين پاڻَ کي پَسِي مَچُ مَ موٽُ،
سَهائِيءَ سُپرين جي، گهِڙُ تہ ٿِئين گهوٽُ،
اَڃا تون آروٽُ! کُوري خَبَر نہ لهِين.

بيت - 13

پَتنگن پهُ ڪيو، مِڙيا مٿي مَچَّ،
پَسِي لَهسَ نہ لِچيا، سَڙِيا مَٿي سَچَّ،
سندا ڳِچين ڳَچَّ، ويچارن وڃائِيا.

بيت - 14

چَڙِھيو چَڪاسِن چاءِ، آڳِ ٻرندي آئيا،
وِھسَنِ واڙي ڦُلَ، جئن، مُحَبَتي مَچَ لاءِ،
آڻي پاڻ اَڙاءِ، کڻي کوري وِچَ ۾.

بيت - 15

جي تَتو تنُ تنُورَ جئن، تہ ڇَنڊي ساڻُ ڇَماءِ،
آڻي آڳِ اَدب جي، ٻاري جانِ جلاءِ،
بُرقعان اندر بازيون، پنھنجو سڀ پچاءِ،
لُڇَڻُ لنؤ، لَطِيفُ چي، پَڌرِ ھَڏِ مَ پاءِ،
متان لوڪ لَکاءِ، وصالان وچ پَئي!

بيت - 16

اڃا تَنُوران، ڪالهہ ڪڍياسون سڄڻين،
پڻ تايائون تڪڙو، وحدت جي وَڌان،
محبتين مٿان، مچُ مُورائينِ نہ لهي!

بيت - 17

پَچائي پَهاڻُ، جن رساڻيو رُڪَ کي،
تنين سندو ڄاڻُ، آھي آڳَڙينِ کي.

بيت - 18

ڌنءُ ڌنءُ ڌَمڻَ وار، اڄ پڻ آڳڙين جي،
ٻاري مچ مَجاز جو، اوتيائون اڱارَ،
ڌُوڌا! ٿِيُ مَ ڌارَ، جِمَ ڪَچو رُڪُ ڪڻيُون ٿئي.

بيت - 19

ڌُوڌا! تون نہ ڌَئِين، آڳِ اوڏو نہ وڃين!
اُلا جي عشق جا، سي تان تون نہ سَهِين،
اُڀو ائن چَئِين، تہ آئون آڳَڙيو آھيان!

بيت - 20

سَرُ سانداڻ ڪري، پُڇج گهرُ لهارَ جو،
ڌَڪن ھيٺ ڌري، مانَ گڏينئي رُڪَ سين.

بيت - 21

سَهِين جئن سانداڻ، ڌَڪن مٿي ڌَڪڙا!
وہِ وِڃائي پاڻ، ڏي ڏَٻائون ڏُڱرين.

بيت - 22

ھيءَ! ٻَرِ! اَڱَارنِ، ٻڏاھين ٻَرَنِ جي،
ھڪ کوري کانِئيا، ٻيو ڌوڌي مَنجهِہ ڌَڳَنِ،
پاڻان لُهارَنِ، ميڙي رَکيا مَچَ ليءِ!

بيت - 23

ٻارِيو اُجهائِين پِرين، اُجهايو ٻارِينِ،
مونکي ٿا مارِينِ، لُئا لُهارَنِ جا.

بيت - 24

اَڄ آڳڙيا آئيا، سُوڌا سِراڻِي،
پياري پاڻِي، تيغُون ڪندا تکيون.

بيت - 25

اَڄ آڳَڙيا آئيا، سائُو ڪي سُڄاڻ،
لاھِيندا مُورياڻَ، رُڪُ ڪَرِييندا پڌرو.

بيت - 26

ڪَٽُ ڪَڙِھي، لوھُہ ٻَري ڌوڌا جِتِ ڌَڳَن!
مترڪَن مُنھن ڪَڍِيا، سانداڻِيون سِڪَن،
اڄ پڻ آڳڙين، ميڙو آھي مَچَ تي!

بيت - 27

سَرھا ڏِٺَم سي،جَن ساڃاءِ سِراڻِ سين،
تيغَ تَنين جي کي، ڪَٽُ نہ لَڳي ڪَڏھِين.

وائي - 1

جِيءُ جِيَاريو ،ڪِينَ مُنھِنجَڙُو ھارِيو،
پِرِين جِيءَ پَچارَ، سيڻنِ جِيءَ سَنڀارَ، جَڏِڙو جِيءُ جِياريو،
اُڃِيو تن عَمِيقَ مان، پِرين پُوڄ پِيَارِيو،
مَرَضُ مَريضنِ تان، اِشاري سَاڻُ اُتاريو،
ڪَرَمَ ڪَرِيمَن جي مون کي، اَھُکِيءَ ما اُڪارِيو،
سَنئون مُنھن ڪَري، سُپِرِين! اَئيِن نِرمَل نُورَ نِهاريو،
سائِلَنِ جئن سَڏَ ڪَري، اَئِين طالِحَنِ کي تارِيو.

داستان چوٿون

بيت - 1

ايڪ پيالو، ٻہ ڄڻا! عشق نہ ڪري اِيئَن!
ليکيا جي لِکَڻِ ۾، سي قرب رسندا ڪيئن،
ھُئڻ ڪيا ھِيئن، وانجيا، پَسُ! وِصال کان.

بيت - 2

ايڪ پيالو، ٻہ ڄڻا! عشق نہ ايئن ڪري!
آٽي سي ايڪ ٿيا، جي گَتا نينھن ڳري،
دُوئِي ڌار ڌري، جہُ خُلَّت خنجر آئيو.

بيت - 3

ايڪ پيالو، ٻہ ڄڻا! عشق نہ ڪري اَڌَ،
ايَ تان ساعر، سَڌَ، ڪَيَءِ جا قَوال سين.

بيت - 4

جيڏانھن قاتِلَ ڪوڙ، اُکيُون اوڏانھِين کَڻي،
وِہُ تَنين جي ووڙ، جَنِين سانگُ نَہ ساہ جو.

بيت - 5

اَکيون اوڏانھِين کَڻي، جيڏانھن قاتل ڪُلّ،
مَٿو ڪَن نہ مُل، پِڪَ برابر پانھنجو.

بيت - 6

قاتلَ ڪمائِي ڪَري، وِہُ ماکي جي ڪن،
وٽان ويهِي تن، پِيج ڪي پياليون.

بيت - 7

ھوندو ھَڏِ مَ سَنڌِ، لاءِ پياڪَن پانھنجو،
پوڄَ پيارج پَنهِيڙا، ويندا وٺيو ڪَنڌِ،
تہ ھَٽَ تنھنجي ھنڌِ، موکي! ڪو مانُ لهي.

بيت - 8

ھوندو ھَڏِ مَ رَکُ، لاءِ پياڪَن پانھنجو،
وٽِي واٽاڙئن کي، تان پياري پَرَکُ،
سا لِکَ لهي ٿي لَکُ، جا تو ايندي اُنِ سين.

بيت - 9

گهٽَنِ ۾ گُهٽِڪَنِ. وَٽيُون پِيَنِ وِہَ گاڏيُون،
برخيز بدہ ساقِي! پيار کي پِريَن،
پِڪين نہ پرچن، مٽ تڪيائون مَنجهيان.

بيت - 10

آڻي اُتر واءَ، موکيءَ مٽ اُپٽيا،
مَتارا تنھن ساءَ، اَچن سِرَ سَنباھِيو.

بيت - 11

وجهج واٽاڙُئن تي، ميخاني جي ماڪَ،
ٿيندي سُڌ سڀڪنهين، ھنڌ ھنڌ پوندي ھاڪَ،
پِرہ جا پياڪَ، جُہ سي اَڱڻ آئيا.

بيت - 12

جُہ سي اَڱڻ آئيا، تہ سَرو ڪندا سُڃ،
سائي ٿِيندين اُڃ، ھي پِيتو! ھُو آڻ ڪِي!

بيت - 13

موکِي چوکِي نہ ٿئي، اصل اوڇي ذات،
وَٽيون ڏيئي واتِ، مَتارا جنھن ماريا.

بيت - 14

مَتارا مري ويا، موکِي! تون نہ مَرِين!
ڪيهِيءَ پَرِ پَرِين، ڏُکِي! ڏاتارن ري؟

بيت - 15

مَتارا مري ويا، موکِي! تو بي مَرُ،
تنھنجو ڏوسُ ڏمرُ، ڪونَ سهندو اُنِ ري!

بيت - 16

سَري سين ڪونِ، ويڻَ موکِيءَ جي ماريا!
ڪو جو سخن ڪلال جو، پِتي تي پيونِ!
تِهان پوءِ ٿيونِ، مرڻ مَتارنِ کي!

بيت - 17

اَڃا کوري ماڳَ، مَٽَ، ڪُٽِڪا، ڪَٽ گَهڻا،
لاھي ويهُ مَ لاڳَ، موکي! مَتارَنِ جا.

بيت - 18

ڪَنڌ ڪَٽَارو، مُنھن وٽِي، عادت سندين اِيَّ،
تنين تِڪُون ڏنيون، جُنبِي منجهان جِيَّ،
سرو تن سَبِيّ، جَن حاصل ڪيو حال کي.

بيت - 19

موکِيءَ مَٺو نہ گُهريا، وِھُہ نہ وِھاٽيا،
سُرڪِيءَ ڪاڻ، سيَّد چئي، اُتي ٿِي آٽِيا،
جي ڳالهين ڳَنڱاٽِيا، تن بَٺَنِ پاسي بُٺيون.

بيت - 20

سِرُ ڏيئِي سَٽِ جوڙ، ڪنھن پَرِ ڪَلالن سين!
ڪاتِي ڪَرٽُ ڪپار ۾، خَنجَرُ آڻي کوڙ!
مَرڻان مُنھن مَ موڙ، وَٽِي ٿِي وڌِ لهي!

بيت - 21

وَٽَ وَٽَ وَٽيءَ ۾، مَٽَ مَٽَ مَنڌُ ٻيو،
قدر ڪيفَ ڪلال جو، پِيَاڪَن پيو،
اَچن دُرسُ دڪان تي، ڪَنڌَ قبول ڪيو،
سُرھا سِرُ ڏيو، چَکَن سُرڪَ سيَّد چئي.

بيت - 22

آٽي ٿي آگارَ کامي کردارنِ سِين!
پَسين سي ڀتارَ، پُر پيتوءِ جَنِ سِين.

بيت - 23

ڪلالنئون ڪاءِ، مَتِ نہ سِکِين مون ھِنئان!
روئندي رات وِھاءِ، چِڪائِيندي بَٺيُون!

وائي - 1

دوسُ پيھي دَرِ آيو، ٿِيو مِلَڻَ جو ساعِيو،
ڏينھين پُڄاڻُون، آڻي اسان کي مولى مُحِبُ مِلايو،
ويو وِڇوڙو، ٿِيو ميلاپو، واحِدَ واءُ ورايو،
ھو جِنهين جو ڏَسُ ڏؤراڏو، اوڏو اَڄُ سو آيو،
عَبدُاللطِيفُ چي، اَچِي عَجيبَن، پاڻَ فَضُلُ فَرمايو.

وائي - 2

دوسُ پيهي دَرِ آيو، ٿِيو مِلَڻَ جو ساعِيو،
ڏينھين پُڄاڻُون، آڻي اسان کي، مولي مُحِبُ مِلايو،
ويو، وِڇوڙو، ٿِيو ميلاپو، واحِدَ واءُ ورايو،
ھو جِنھين جو ڏَسُ ڏؤرڏو، اوڏو اَڄُ سو آيو،
عبدُالطِيفُ چي، اَچي عَجيبَنِ، پاڻَ فَضُلُ فَرمايو.

داستان پنجون

بيت - 1

صوفِي سالم سي ويا، جي اَڪثر سين اَڏيارَ،
بازي بازِندنِ کي، آھي اَويسارَ،
پِريان سين پَهڪارَ، رنديءَ رَساڻي ڪيا.

بيت - 2

صوفِيءَ سيرُ سڀِن ۾، جئن رڳن ۾ ساہ،
سانہ ڪري ڳالهڙِي، جئن پويون پروڙي پساہ،
آھِس اِيُ گناھہ، جي ڪا ڪَري پَڌرِي.

بيت - 3

ڏِني ڏُکويا، اَڻ ڏِني راضي ٿيا،
صوفِي تي ٿيا، ڪِينَ کنيائون پاڻ سين.

بيت - 4

صوفِي لاڪُوفِي، ڪونَ ڀانئيس ڪيرُ،
منجهيان ئِي مَنجِهہ وڙھي، پڌر ناھِس پيرُ،
جنين ساڻس ويرُ، ٿئي تنين جو واھَرُو.

بيت - 5

صوفِيءَ صاف ڪيو، ڌوئِي ورق وُجُود جو،
تهان پوءِ ٿيو، جيئري پَسَڻُ پرينءَ جو.

بيت - 6

صُوفِي چائِين، سَڌَ ڪرين، صُوفين اِيَ نہ صلاحَ،
ڪاٽي رک ڪُلاہَ، وجهہ اُڇلي آڳ ۾.

بيت - 7

جي ڪُلاہُ رکين ڪنڌ تي، تہ صوفي سالمُ ٿِيءُ!
وِہَ وٽِي ھٿ ڪري، پُر پيالو پِيءُ،
ھَنڌُ تنين جو ھِيءُ، جن حاصل ڪيو حال کي.

بيت - 8

جُسي ۾ جَبّار جو، خَفِي خِيمو کوڙ،
جَلّي تون زبان سين، چار ئِي پهر چور،
فڪر سين فُرقان ۾، اِسم اعظم ڏور،
ٻيا در وڃي مَ ووڙ، اِيُ اَمُلُ اِئائِين سَپَجي.

بيت - 9

عالَم آئوُن ساڻ، ڀَريو ٿو ڀيرَ ڪري،
پاڻ نہ آھي ڄاڻُ، مانڊِيءَ مَنڊُ پکيڙيو.

بيت - 10

طالِبُ ڪَثَرَ سُونھن سَرُ، اِيَ رومِيءَ جِي رُوءِ،
جِنين ڏٺي جُوءِ، تنين ڪُڇيو ڪين کِي.

بيت - 11

طالِبُ ڪَثَرَ، سُونھن سَرُ، اِيَ رومِيءَ جِي راءِ،
ماڙھُو اِتِ ڪِياءِ، مَنڊُ نہ پسين مَنڊيو!

بيت - 12

طالِبُ ڪَثَرَ سُونھن سَرُ، روميءَ چيو آھي،
تاڙي جي لاھي، تہ مَنجِهين مُشاھدو ٿئي.

بيت - 13

طالِبُ ڪَثَرَ، سُونھن سَرُ، اِيَ رومِيءَ جي رِھاڻِ،
پهرين وِڃائڻ پاڻُ، پوءِ پَسڻُ پِرينءَ کي.

بيت - 14

طالِبُ ڪَثَرَ، سُونھن سَرُ، ايَ روميءَ جي راحَتَ،
جَنين ڏِٺي سَتَ، تَنين ڪُڇيو ڪِينَ ڪِي.

بيت - 15

طالِبُ ڪَثَرَ، سونھن سَرُ، ايَ روميءَ جي اوطاقَ،
جي ڀَڄي دَرِ فِراقَ، تہ مَنجِهين مُشاھدو ٿِئي.

بيت - 16

ظاھر ۾ زاني، فِڪرَ مجهہ فنا ٿيا،
تنين کي تعليم جِي، ڪُڙھِہ اندر ڪانِي،
حرفُ حقَانِي، دَورُ ڪيائون دل ۾.

بيت - 17

جن کي دَورُ دَردَ جو، سبق سُورَ پڙھنّ،
فِڪرَ فَرَھِي ھٿ ۾، ماٺ مُطالع ڪنّ،
پَنو سو پڙھنّ، جنھن ۾ پَس پِرينءَ کي.

بيت - 18

وِسَرِيوم سَبقُ! پَهرين سِٽَ نہ سَنڀران،
اَڃا ھيءُ وَرَقُ، ھَيءِ! مُطالع نہ ٿِيو!

بيت - 19

ڪَيو مُطالع مُون، ھو جو وَرقُ وِصال جو،
تَنھن ۾ تُون ئي تُون، ٻي لاتِ نہ لَحظي جيتِري.

بيت - 20

سا سِٽَ نہ سارينِ، اَلف جنھن جي اَڳ ۾،
ناحَقُ نهارينِ، پنا ٻيا پِرينءَ لَئي.

بيت - 21

سا سِٽَ ساريائون، اَلف جنھن جي اَڳ ۾،
”لاَ مَقصُودَ فِي الدَّارَينِ“ اِن پَرِ اُتائون،
سَڳرُ سوٺائُون، ٿيا رَسِيلا رحمانَ سين.

بيت - 22

ٿِيا رَسِيلا رَحمانَ سِين،سَڳر سُونھين جي،
آئيون تَنِين کي، اوڌايون وِصال جُون.

بيت - 23

اَکرَ پَڙھي اَڀاڳِيا، قاضِي ٿئين ڪِياءُ؟
ڀيرِئين ۽ ڀانئِين، ايڏا اِئن نہ آءُ!
اِنَ سُرڪِيءَ سندو ساءُ، پڇج عَزازِيل کي.

بيت - 24

عاشق عَزازِيل، ٻيا مڙيئي سَڌَڙيا،
منجهان سِڪَ سَبِيلَ، لعنتي لال ٿيو.

بيت - 25

جو مون پَڙھيو لَئي، سبقُ سابِقُ جو،
پهرين سُڃاتم پانھنجي، نفسَ جو نِهو،
جِت عَرفانُ اَصَل ۾، ٿي رُوحن روزَ ڪيو،
وري وَرَقُ پيو، گڏيم وَڍُ وصال جو.

بيت - 26

اَکر ڇُٽي ھيڪَڙي، ٻَهون جي نہ ٻُجهن،
ڪوہُ ڪَبو کي تَنِ، سَڄي سُڻائي ڳالهڙي.

بيت - 27

پَڙھيو ٿا پڙھنّ، ڪَڙھن ڪين قُلُوب ۾،
پاڻان ڏوہَ چَڙھنّ، جي وَرَقَ ورائين وِتَرا.

بيت - 28

پَڙھيو پَڙھيجانءِ، سَبقُ انهيءَ سُور جو،
مِيمُ رَکجانءِ مَنَ ۾، اَلفُ تَنھن اڳيانءِ،
چِتان جوريجانءِ، اِھا لاتِ لَطيفُ چي.

بيت - 29

اَکر پڙھُہ اَلف جو، وَرَقَ سڀ وسار،
اَندار تون اُجار، پنا پڙھندين ڪيترا.

بيت - 30

جئن جئن وَرَقَ وَرائين، تئن تئن ڏٺو ڏوہُ،
تنھن ڪَهڻِيءَ ڪبو ڪوہُ؟ جي رھڻِيءَ رھيو نہ سُپرين.

بيت - 31

ڪاتِبَ! لِکِين جئن، لايو لامُ اَلف سين،
اَسان سڄڻُ تئن رھيو آھي روح ۾.

بيت - 32

ڪوہُ ٿو ڪاڳر ڪورِئين؟ ويٺو وِڃائين مَسُ،
ڏوري تِيائين ڏَسُ، اَکرُ جيئائين جُڙيا.

بيت - 33

تهڙا چالِيها نہ چالِيهَہ، جهڙو پسڻ پرينءَ جو،
ڪهڙي ڪاتِبَ! ڪَرِئين، مٿي پنن پِيهَ،
جي ورقَ وارِين وِيهَ، تہ اَکر اُھوئِي ھيڪڙو.

بيت - 34

تَنُ کُڏِي مَنُ حُجرو، ڪيم چاليها رَکُ،
ڪوہ نہ پُوڄيو پُوڄئين، اَٺئِي پهر اَلَکُ؟
تان تون پاڻُ پَرَکُ! سَڀَڪَنھن ڏانھن سامهون.

بيت - 35

سَڀَڪنھن ڏانھن سامهون، ڪو ھنڌ خالِي ناھِہ،
اُحَدا جي اَرَکَ ٿيا، سي ڪانئرَ ڪبا ڪانهِ؟
مُحبُّ منجهين، مَنَ مانهِ، مون اَڄاڻندِيءَ اُجهيو.

وائي - 1

وَٺَڙِيون ھوت وَڃَنِ، وو! جَهلِيان، پَلِيان، ھينئڙو نَہ رھي!
آئون جَنِين جِي آھِيان، ڪَڙي مَ ٿِيان تَنِ،
گهورِيان گَهڻي ڀَتئين سندِي ٻاجَهہ ٻيَن،
مَرُ مران، مارِينِ مُون، پُرزا پُرزا ڪَنِ،
آئُون مُيائِي گهورِي، جي مان محب مِلَنِ.

وائي - 2

وسارِج مَ ويڻَ، جوڀن ٻہ ٽي ڏِينھَڙا،
لُوٺِيُون سَهَنِ لوڪَ جا، وھاڻِي ٿيون ويڻَ،
اَصل اُسارينِ جا، سُتي وِيَڙا سيڻَ،
جيڏِيُون! جي مان وِسَهو، نِنڊَ مَ ھيريو نيڻَ،
راتَڙِيُون جاڳن جي، آئون ڪَندَڙي سيڻَ،
آڌِيءَ رات اُٿي ڪَري، جَهلِ تُون ننڊان نيڻَ.

داستان ڇھون

بيت - 1

دائودِي دَيُون ڪري، رَنڪَن ڪونھي رنگُ،
گهوڙِيءَ ھيٺ اَيَنگُ، ڪاھيو پاکَرئين ھڻي.

بيت - 2

دائودِي دَيُون ڪري، رَنڪَنِ ڪونهي چيتُ،
گهوڙِيءَ ھيٺ سُچيتُ، ڪاھيو پاکَرئين ھڻي.

بيت - 3

اوقابِيلَ! اَکين ۾، توکي باري بانَ،
اُڀو اَڳرايُو ڪرين،ماڳِ ھڻيو مَستانَ،
جانبَ! تون زيانَ، اَکين سين ايڏا ڪرين!

بيت - 4

اوقابِيلَ! اَکين ۾، توکي تکا تِير،
ساجن! اُنهيءَ سِيڱَ سِين، ڦَٽيءَ گهَڻا فَقِيرَ،
ٻيو مَ مارِجُ ميرَ! تُنھنجو پَهريون ئِي پُورو ٿِيو.

بيت - 5

او قابِيلَ! اَکِين ۾، تِيرَ تِکا توکي،
ساجَن! اِنهيءَ سُور جي، ڪَلَ نہ آہ ڪَنھن کي،
مارِين ٿو مونکي! چاڙھي لوھہ لطيف چَئي.

بيت - 6

اوقابِيلَ! اَکين سين، تِيرَ چَلايا تو،
ٻيو مَرُ ماري سو، جَهنجو پَهريون پورو نہَ ٿِئي.

بيت - 7

جي ھُو پائِينِ ڪانُ ڪَمانَ ۾، تہ سينو سِپَر رکُ،
مهن ۾ معشوقن جا، چاڪَ چَٽڪا چَکُ،
سورِي ڀانءِ مَ شڪُ، عاشقُ ٿِيءُ تہ اُبَهِين.

بيت - 8

جي ھُو پائين ڪانُ ڪَمانَ ۾، تہ سينو سِپَر ڏيجِ،
مُهن ۾ مَعشوقن جا، جهالُو ٿي جهليجِ،
پاھان پَڳَ مَ ڏيجِ، عاشقُ ٿِيُ تہ اُبَهِين.

بيت - 9

جي ھُو پائِن ڪَان ڪَمانَ ۾، تہ نَئي ڏِجُ سينو،
ڪَجي نہ ڪِينو، وَڃي دَرِ دوستَن جي.

بيت - 10

پائي ڪانُ ڪَمانَ ۾، ميان! مار مَ مون،
مون ۾ آھين تون، متان تنھنجو ئِي توکي لڳي.

بيت - 11

ڪيو ڇڏين ڪانُ، ھَڏِ نہ ھَڻائين ٿا،
ٿيا جي نيشانُ، تہ پهرئين سان پورا ھئا.

بيت - 12

لوري جِت لڳوم، اُتِ اُڀو ئِي آھيان،
سُورہ پرين سَندوم، مانَ ٻاجهائي ٻيو ھَڻي!

بيت - 13

مُحبتَ جي ميدانَ ۾، عاشق! ٿِيُ اَچامُ،
سُمُهان سَلَ سيّد چَئي، ڪَندءِ تِيرَ تَمامُ،
ڪَهِج ڪو مَ ڪَلام، جِمَ دوسنَئون دُؤرِ ٿِئين.

بيت - 14

مُحبت جي ميدان ۾، اَچي پير پَيان،
سِر وَڍڻ، ڌَڙَ ڌار ڌَرڻُ، اِي سِينگارُ سَندانِ،
ڏِيندا مُون ڏِٺانِ، مَٿا مَحبُوبَنِ لَيءِ.

بيت - 15

محبّت جي ميدان ۾، ڪر پَڙاڏو پَٽُ،
سِرُ سورِيءَ، ڌَڙُ ڪُنگرين، متان ڪُڇِين ڪَٽُ!
عشق نانگ نِپَٽُ، خبر کاڌن کي پوي.

بيت - 16

محبت جي ميدان ۾، سِرَ جو سانگُ مَ ڪَرِ،
لاھي سِرُ، لَطيف چَئي، اَڳيان دوستَن ڌَرِ،
عِشقُ نانگُ اَپَرِ، خبر کاڌَنِ کي پَوي.

بيت - 17

محبّت جي ميدان ۾، سِرَ جو ڪر مَ سانگُ،
سورِيءَ سُپيرِين جي، چَڙہُ تہ ٿئين چانگُ،
عشق آھي نانگ، خبر کاڌَنِ کي پوي.

بيت - 18

مَحبتَ جي ميدانَ ۾، ڪُڏِي پئو ڪاھي،
ڇَڏِ آسانگا اَرواحَ جا، لاھُوتِي! لاھي،
عِشقُ نانگُ آھي، خَبر کاڌَن کي پَوي.

بيت - 19

عشق نہ آھي راند، ڪي ڪَنسِ ڳڀرُو،
جِيَ جُسي ۽ جانِ جِي، ڀِڃي جو ھيڪاندِ،
سِسِي نيزي پاندِ، اُڇل تہ اَڌ ٿئي.

وائي - 1

عشق تمام، برہ تمام، وو! مئن لوُٺي يارَ لوڪو!
سيجَ سُتي نون جَهپَ نہ آوي، نيڻين ننڊ حَرامُ،
راتِيان جاڳڻ، صاحب سنڀالڻ، اي فقيراندا ڪام،
مت عقلَ دي مُنجهہ گئي، آيا عشق اِمامُ.

داستان ستون

بيت - 1

عاشقن اللہ، ويرو تار نہ وسري،
آہ ڪَرِيندي ساہُ، ڪڏھن ويندو نڪري.

بيت - 2

عاشق اِئن نہ ھُونِ، جئن تون سَڄي اَکَڙين،
وڃي در دوستن جي، رَتُ ڏِھاڻِي رُون،
ٻِيَ پَرِ ڪَنهِين نہ پُوَن، ماڪُرِ مَحبوبنِ سين.

بيت - 3

جان عاشقَ مٿي رَتُ، تان دعويٰ ڪري مَ نِينهن جِي،
سائو مُنھن، سُونهن گَئِي، سِڪَڻَ اِيَ شرط،
نڪِي گوڏِ گَرَٿُ، مٿا سِرَ سؤدا ڪري.

بيت - 4

اَڃا تو منجهانءَ، ڪَکَ ڇُتي رتُ نڪري!
مُنھن ۾ محبوبن جا، ڪئن جَهلِيندين گهاءَ؟
سو تون ڪُڄاڙياءَ، سِڪَڻَ جون سَڌُو ڪرين؟

بيت - 5

سِڪڻُ ائن نہَ سَڌَ، جِئَن لِڪِيو لِياڪا پائِين،
پَئي پِريان جي نہ ٿِئين، مَٿي اَڱَڻَ اَڌَ؟
اِيَ پڻ ڪُوڙي سَڌَ، جِئَن کليو، کايو سُمهِين.

بيت - 6

سِڪڻُ ۽ سورِي، ٻئي اَکَرِ ھيڪڙي،
وِھڻُ واٽَڙِين تي، ڪارَڻُ ضرورِي،
ٻِنهي جِي پُورِي، جِيءَ ڏني رِي نہ جڙي.

بيت - 7

جيڪي سِڪَڻُ سِکُ، ناتَ پَسُ سِڪندئين،
پاسي تنين مَ لِڪُ، نِينهُن نہ سُڃاڻن جي.

بيت - 8

عاشقَ! معشوقن جِي، وٺِي ويهُہ ڳَري،
جِمَ وِرچي ڇَڏئِين، سَندِي دوست دَرِي!
ڏِيندا ٻُڪِي ٻاجَهہ جِي، ويندءِ ٺَپَ ٺَرِي،
اَسان تان نہ سَرِي، تو ڪئن سَري سپرين؟

بيت - 9

عاشقَ! مَعشوقَن جو، وَٺي ويهج سيرُ،
اَچي پُڇَندَءِ پاڻهين، پِرتان ڀَري پيرُ،
ڀَلاين سندو ڀيرو، رَھَبر ٿيندُءِ راہَ ۾.

بيت - 10

عاشقَ! مَعشوقَن جو، وَٺِي ويهِجُ دَرُ،
اَچي پُڇَندءِ سُپرين، لَهندءِ سارَ سَڀَر،
ڀَلائيءَ جو ڀَرُ، رَھبرُ ٿِيندءِ راہَ ۾.

بيت - 11

عاشقَ! معشوقن جو، وٺِي ويهہ دُڪاڻ
پَئجِ پيش پِرينِ جي، پَٽِيءَ وجِهي پاڻ،
تہ تُون تنِين ساڻُ، سدا رھِين سُر خرُو.

بيت - 12

عاشقَ! معشوقن جو، وٺِي ويهج گَهٽُ،
جِمَ وِرِچِي ڇَڏئين، موکِيءَ سندو مَٽُ،
ڪري سِرَ جي سَٽُ، پِيج ڪِي پِياليُؤن.

بيت - 13

عاشقَ! معشوقَن جو، وَٺِي ويهِجُ رندُ،
پيارِيندءِ پاڻهين، مَيخاني جو منڌ،
ڪِيمَ ڪَڍِجُ ڪَنڌُ، اوڏو ٿِي اُن کي.

وائي - 1

سُپيريان جي سونهن جِي، ڳالهہ ڪِينَ وڃي،
وڃِي دَرِ دوسِتن جي، سُوريءَ سِرُ ھَڄِي،
عاشقَ انگُن چڙھيا، ٻيو سَڀڪو ڀَڄي،
پُڇجِ پوءِ پِرِيتَڻو، پهرين سِرُ سَڄي،
عاقِلَ ئِي اوڇؤن ٿيا، ڀورو ڪِينَ ڀَڄي.

داستان اٺون

بيت - 1

ھَرَ ھَرَ ھَرائِي، وڃڻ دَرِ دوستن جي،
پاڙي ڏانھن پِرين جي، اُڃُ مَ اَوائِي،
اَلڙُ ٿِي آڇِ مَ تون، واٽاڙُن وائِي،
لائِيندءِ، لَطِيفُ چي، سُوران سَرھائِي،
ڳُجهو ڳالهائِي، پِرتِ وَٽجي پاڻ ۾.

بيت - 2

جان جان ناھِہ ضَرورُ، تان تان طَبِيبُ ناہِ ڪو،
جُہ سو سَريو سورُ، تہ ڪَرِ ويڄُ وَر پِيو.

بيت - 3

سُورُ جنين کي سَريو، سَري تن صحتَ،
مِٺي مصيبت، آھي عاشقنِ کي.

بيت - 4

سيئي سُور طَبيبَ، جَنِين سُورَ سُڃَ ڪي،
جو لِکيو ھُتِ لَطيفُ چي، سوئي ڪَنِ قَريب،
جي نَوازِيا نَصيبَ، دارُونءَ سي دُرستُ ڪِيا.

بيت - 5

جي پياري پاڻَ، تہ ڪَرَھو ٿِي پاڻِي پِئين،
اَڳي اِنَ نِياڻ، اَڻَ ڪوٺِيو ڪو نَہ گِهڙي.

بيت - 6

اَڻَ ڪِي عَيان نہ ٿئي، ڪِي پروڙي ڪونَ،
سڃي جيهِي سونَ، منھن نہ پيئِي ماڙھوئين.

بيت - 7

اَڻَ ڪِي عَيان نَہ ٿئي، ڪي پروڙي ڪونَ،
سا سُونهِين ٿئي سونَ، اَمرُ عطا جنھن جو.

بيت - 8

جيڪي ڏِنائُون، سو مَان ڳُڻُ ڳَنڍِ ٿِيو،
مون کي پُڇِيائُون ٺوڪي اِنهيءَ ٺَوڪَ سِين.

بيت - 9

جيڪي ڏِنائُون، سو سِرُ ڏيئِي سهُ ڄِندڙا!
مَ چَؤ ڇِنائون، اِي پڻ ڳَنڍِيو سڄڻين.

بيت - 10

ڇِنَنِ توءِ مَ ڇِنُّ، پاءِ اُميرِي اُنِ سين،
جي ھُو اوڳڻ ڪَنئي، اَسُونهِين! تہ تون ڳُڻان ئِي ڳِنُّ،
پاند جهليو تون پِنُّ، ھن سُونهاري سَڱَ ۾.

بيت - 11

نَمِي کَمِي نِهار تون، ڏَمَرُ وڏو ڏک،
مَنجهان صَبر سُکُ، جي سَنوارِئا! سَمجهين.

بيت - 12

نَمِي کَمِي نهار تون، ڏَمَرُ ڏولائو،
ٿِيَيءِ ساڃائو، جي اُڀئين انهيءَ پيرَ تي.

بيت - 13

ڏَمر پاسو ڏُکَ سين، سين، کَاندِ کَٿورِي ھُوءِ،
وَاللہُ مَعَ الصّابِرِين، آگو ايهين چُوءِ،

بيت - 14

کَمُ کَمَندنِ کَٽيو، ھارايو ھوڙَنِ،
چکيو نہ چُوندنِ، ھو جو ساءُ صبرَ جو.

بيت - 15

کَمندڙن گَهر کِين، چَوَندڙ چڱا نہ ٿيا،
ويڻَنِئُون ويڌُ پين، ھٿِ نہ اَچي ڪِين.

بيت - 16

ھُو چَوَنئي، تون مَ چؤ، واتان ورائي،
اَڳُ اَڳِرائي جو ڪَري، خَطا سو کَائي،
پاندَ ۾ پائي، ويو ڪِيني وارو ڪِينَ ڪي.

بيت - 17

ھُو چَوَنئي، تون مَ چَؤ، واتان وَرائي ويڻُ،
سَڀني سِين سَيّد چَئي، مَنُ ماري ڪَرِ مِيڻُ،
کاند وَڏِيائِي کِيڻُ، ڪِيني مَنجهان ڪِينَ ٿِئي.

بيت - 18

ڪِنِين ڪِينَ پِرائيو، ڪِيني منجهان ڪِين،
جي ھوءِ سَٽاڻِي سِيڱ، تہ زِہَ ڇِني جوکو ٿئي.

بيت - 19

سُڻي ويڻَ ڪَنَنِ سِين، وَرائج مَ وَري،
ھادِيءَ جي ھدايتَ جِي، آھي ايَ ڳَرِي،
تَنِ سَڄي ساہِ سَري، جن ماريو نَفسُ ماٺ سِين.

بيت - 20

چُوندَنِ ڪِيمَ چَئيجُ، ويڻَ وَرائي سامُهون،
ڪا مت قيمتَ جَهڙِي، روز ڏَمر کي ڏِيجُ،
ويڻُ مَ وَرائيجُ، تہ سَڀُ دَرِ سُهاڳي ٿِئين.

بيت - 21

اَڻ چُوندَنِ مَ چؤ، چُوندَن چيو وسار،
اَٺئِي پهرَ اَدبَ سين، پَرِ اِھائي پارِ،
پايو مُنهن مُونن ۾، غُربت ساڻ گذار،
مُفتِي منجهہ وھارِ، تہ قاضيءَ ڪانيارو نہ ٿئين؟

بيت - 22

جِنين سَندِيءَ ٻوڏَ ۾، ڀَتون ڀَتين جِيُ،
تَنَ تنين سين پِيُ، اوڏا اوڏي پَکَڙا.

بيت - 23

ويٺي جنين وَٽِ، ڏُکَندو ڏاڍو ٿِئي،
سا مَجِلس ئِي مَٽِ، جي حاصل ھوءِ ھَزارَ جو،

بيت - 24

ويٺي جِنين وٽ، ڏُکَندو ڏُور ٿِئي،
تَنَ تنين سين ڪَٽِ، اوڏا اَڏي پَکَڙا.

وائي - 1

يار سڄڻ جي فراقَ، ڙي جيڏيُون! آئُون ماري!
دَرِ دوسَن جي ڪَئِين جو ھوندا، مُون جيھا مُشتاقَ،
جاٿي ڪاٿي محبوبن جي، آھ حُسنَ جي ھاڪَ،
سُرمو سھِي ڪر اکين جو، خاص پِريان جي خاڪ،
عَبدُاللَطِيفُ چئي، پرين اَسانجو ھميشه حُسناڪ.

وائي - 2

يار سڄڻ جي فراقَ، ڙي جيڏِيُون! آئُون ماري!
دَرِ دوسَنِ جي ڪَئِين جو ھوندا، مون جيها مُشتاقَ،
جاٿي ڪاٿي محبوبن جي، آہ حُسنَ جي ھاڪَ،
سُرمو سَهِي ڪر اَکين جو خاص پِريان جي خاڪِ،
عَبۡدُاللّطِيفُ چئي، پرين اَسانجو ھميشه حُسناڪ.

سر کنڀات

داستان پھريون

بيت - 1

ڀَلائِي آھِين، پِرِين ڀَلائِيءَ پانھنجي،
سَٻاجها سِرِ چَڙهئو، ڏوراپا نہ ڏين،
مان ڏي مَديُون ٿِينِ، سَڄَڻَ سَڄايُن ۾.

بيت - 2

پيشانِيءَ ۾ پِرينءَ جي، ڀَلائِي جا ڀيرَ،
اَڱڻِ اڪنڍُين جي، ڏي پاٻوھي پيرَ،
قمرُ پاڙي ڪير، شَمسُ سُپيرين سينِ.

بيت - 3

تُون چَنڊَ اُھوئِي، جو پَسِين ھُتِ پِرِينءَ کي،
آڏو چئج اُنِ کي، ڏِيانءِ جي روئي،
ھيڪاندِيءَ ھوئِي، سانگُ مَ پَوي سَڄَڻين.

بيت - 4

مَرُ ھيڪاندا ھُونِ پِرِين، سانگ مَ وڃن سيڻَ،
رھيا آھِنِ روحَ ۾، نِتُ جنين جا نيڻَ،
جَن وِماسِيا ويڻَ، تو تارِيءَ تَڳي تن ھنيون.

بيت - 5

کِلان تان کامي ھِنيون رُئان تان راند،
جهليان جهيڻو نہ ٿئي، جو جَرُ نيڻين پاندِ،
اکڙيون مون ويساند، پِرِينءَ گڏجي ڪنديون.

بيت - 6

رات سَهائِي، ڀُون سَئِين، پَٽين وَڏو پَنڌُ،
ھَلندي حَبيِبن ڏي، ڪَرھَا موڙِ مَ ڪَنڌُ،
ٻَنڌڻُ سوئِي ٻنڌُ، جو پَهچائي پِرينءَ کي.

بيت - 7

رات سَهائِي، ڀُون سَئِين، ڀائِي، گُهرجي ڀَلُ،
آھُرَ ۾ ايلاچِيُون، چَندَن چَرِي چَلُ،
مُون توھِيسين ڳالهڙي، ٻِي ڪَهِين مَ سَلُ،
ھاھُرَ ڪندو ھَلُ، تہ کَجايُون کَرَنِ کي.

بيت - 8

راتِ سَهائي، ڀُون سئيِن، پِرتِ نَئين پَنڌُ پورِ،
مَيا! محبوبَنِ جي، ھَلي وانءُ حُضورِ،
جي چڻڪَنِ چِتَ ۾، سي ڪِيئَن سَڄَڻَ ڏُور،
اللہَ لَڳ اَسُورِ، ئِي ٿي آءُ تُون.

بيت - 9

اَڄُ پُڻُ اڇائِي، چوڏِھينءَ ماھَہ چنڊَ جِي،
مُون گهرِ مون پريَنِ جي، اَچَڻَ جي وائِي،
مون گهرِ واڌائي، پيئي کامَ کَرَنِ ۾.

بيت - 10

اَڄُ پڻ اُمارو، چوڏھِين ماہ چَنڊَ جو،
مُون گهَرِ مُون پِريُنِ جي، اَچَڻَ جو وارو،
سَڄَڻُ سوڀارو، ڀيڄَ ڀِنيءَ گهرِ آئِيو.

بيت - 11

چوڏِھينءَ چنڊُ اُڀِرِئو، اُڻٽِيهَہ پَيسِ عامَ،
مَٿسِ ناہِ مَلام، جيڪِي پُڇين پُڇُ سو.

بيت - 12

چوڏھِينءَ چَنڊَ تون اُڀِرين، سَهسين ڪَرِيين سنگارَ،
پَلَڪَ پِريان جي نہ پَرين، جي حِيلاَ ڪَرِين ھَزارَ،
جهڙو تون سَڀَ ڄَمارَ، تهڙو دَمُ دوست جو.

بيت - 13

سَهسين سِجَنِ اُڀري، چوراسِي چَنڊَنِ،
بِاللہ رِي پِرِيَنِ، سَڀَ اُونداھِي ڀانئِيانِ.

بيت - 14

چَنڊَ تنھنجِي ذاتِ، پاڙيان ڪي نہ پِرِيَنِ سين،
تُون اَڇو ۾ راتِ، سَڄَڻَ نِتُ سوجِهرا.

بيت - 15

چنڊ تُنھنجي ذاتِ، سَڀَ مڙھايان سونَ سين،
آھِينِ پِرين پَنڌَ ۾، ڪَرِ سَهائِي رات،
اَچَنِ جَنھِن ساعات، لَهِي وَڃُ لطيفُ چي.

بيت - 16

چَنڊَ چُئَئِن حَقُ، جي وِڙِھِين جي وچرين،
ٻَہ اَکِيُو ٽئو نَڪُ، تو ۾ ناہ پِرينءَ جِهو.

بيت - 17

چَنڊَ چُئَئين سَچُ، جي مَٺِي نہ ڀائِيين،
ڪَڏھن اُڀرِين سَنهڙو، ڪَڏھن اُڀرِين ڳَچُ،
مُنھن ۾ ٻَريئِي مَچُ، تو ۾ ناہِ پيشانِي پِرِينءَ جِي.

بيت - 18

کَڻِي نينَ خُمارَ مان، جان ڪيائون نازُ نَظَرُ،
سُورجَ شاخُون ڄُڪِيُون، ڪُوماڻو قَمَرُ،
تارا ڪَتِيُون تائِب ٿيا، ديکِيندي دِلبَرُ،
جهَڪو ٿئو جوھَرُ، جانِبَ جي جَمالَ سين.

بيت - 19

اُونداھِيَ اَڌَ راتِ جو، پِرينءَ پَسايو پاڻُ،
چَنڊُ ڪَتِنِ سَاڻُ، پيهِي وِئو پَڙِلاو ۾.

بيت - 20

تارا تيلِيءَ رُوءِ، لُڌا لالَنَ اُڀِرِين،
جَهڙِي تو صُبوح، تَهڙِي صافِي سَڄَڻين.

بيت - 21

توڏَھن گهَڻون نهارِيان، تارا تينلاھين،
سَڄَڻُ جيڏاھِين، تُون تيڏانھيِن اُڀِرِين.

بيت - 22

ھُنَ تاري ھُنَ ھَنڌِ، ھُتِ منھنجا سُپرين،
سَڄَڻَ ماکي مَنڌِ، ڪَوڙا ٿين نہ ڪَڏَھِين.

بيت - 23

ھُنَ تاري، ھُنَ ھيٺ، ھُتِ منھنجا سُپرِين،
سَڄَڻَ ماکي ميٺِ، ڪوڙا ٿين نہ ڪَڏَھِين.

بيت - 24

ھُنَ تاري ھُنَ جاءِ، ھُتِ منھنجا سُپرِين،
سَڄَڻَ ماکيءَ سَاءِ، ڪَوڙا ٿين نہ ڪَڏَھِين.

بيت - 25

تارا، تِرَ، تِروڪِڻيون، مٿِن ڦُلَڙيُون،
کُهہِ سي راتَڙِيُون، جي مون پِرَ پُڄاڻا پيئِيُون.

وائي - 1

ھنئڙو ھِيءُ ضَرُورُ، آيَلَ! ڪين رَھندو پرينءَ ري،
سَگهو ساعتَ نہ ڄندڙو، اَٺئِي پَهر مَلُورُ،
آيل! ڪين رھندو پرينءَ ري.
مَنَ ۾ مُشتاقَنِ جي، ساجَنَ! تُنھنجو سُورُ،
آيل! ڪين رھندو پرينءَ ري.
پيرين آئون نہ پُڄَڻِي، ڏيهُہ پِرِيان جو ڏُورُ،
آيل! ڪين رھندو پرينءَ ري.
وَڃي ويلَ سڀ ڪهين، ھينئڙو پرينءَ حُضُورِ،
آيل! ڪين رھندو پرينءَ ري.

وائي - 2

اڱڻِ آيامِ پيهِي يا اَلا! مون سارِيندي سُپِرِين.
مُشڪُ عَطُرُ مون پِرِين، سِڪِيَسِ ڄَمُ سَڀيئِهي،
يا اَلا! مون سارِيندي سُپِرِين.
تَنُ جَنِين جو طالِبُو، رُوحَ تَنين سين رِيهي،
يا اَلا! مون سارِيندي سُپِرِين.
ساڄَنَ سندِي سُونهَنِ جِي، آئون ڳالهِہ ڪَرِيان ڪيهِي،
يا اَلا! مون سارِيندي سُپِرِين.
ٿئو لُطُفُ، لَطيفُ چي، دوسُت آيودَرِ پيهِي،
يا اَلا! مُون سَارِيندي سُپِرِين.

وائي - 3

وَھَلَڙي وَؤن مَ وِھامِي، رَھُ راتِ، رائِينديَسِ پرينءَ کي،
شمَعَ ٿينديس شَب ۾، اِنَ خوشيءَ کان کامي،
رَھُ راتِ، رائِينديَسِ پرينءَ کي.
بابُوئَنِ سَنديءَ باھِ جان، ٻَران شالَ اُجهامِي،
رَھُ راتِ، رائِينديَسِ پرينءَ کي.
پَرِتِ جا پِيتَمَ جي سا ڪِينَ پُروڙي عامِي،
رَھُ راتِ، رائِينديَسِ پرينءَ کي.
مون کي مون پِريَنِ جو، آهي دَردُ دَوامِي،
رَھُ راتِ، رائِينديَسِ پرينءَ کي.
روشَنُ ٿِيان رُڃُنِ ۾، جي ھُئان لَنؤ اِنهي لامِي،
رَھُ راتِ، رائِينديَسِ پرينءَ کي.
ڪارِي سا قِيامَ سَئِين، آھِ ھوتُ جنھن جو حامِي،
رَھُ راتِ، رائِينديَسِ پرينءَ کي.
آيَمِ تِھن لوڪَ سان، جيسِين مون چَوَنِ سامِي،
رَھُ راتِ، رائِينديَسِ پرينءَ کي.

داستان ٻيو

بيت - 1

ناسِيندي نِگاھَہ، پهرين ڪج پِرِينءَ ڏي،
اَحوالَ عاجزن جا، آکِجِ لَڳِ اللہَ،
روزُ نِهارنِ راھَہ، اَکيُون اَوھان جي آسِري.

بيت - 2

ناسِيندي نَظر، پَهرِين ڪجِ پِرين ڏِي،
قَمَر! ڪهج قَريبَ کي، نِستُ ٿي نِٻرُ،
ٻِئو ڀروسو نہ ڀَرُ، اَکِيُون اَوھان جي آسري.

بيت - 3

ناسِيندي نِرتِ، پهرين ڪج پِرين ڏي،
قَمَر! ڪَهِج قَريبَ کي، ساري ساڻُ سُرتِ،
ٻِئو ڀَروسو نَہ ڀِتِ، اَکِيُون اَوھان جي آسري.

بيت - 4

ناسِيدي نِهار، پهرِين ڪجُ پرينءَ ڏي،
آئون جي ڏِيَئن سَنِيها، چئِج چَنڊَ اپارَ،
ساجن! سَڀ ڄَمَارَ، اَکيُون اَوھان جي آسِري.

بيت - 5

چَڱيان چَنڊَ! چَئيج، سَنِيها کي سَڄَڻين،
اَڱڻ مَٿان اُڀرِي، پِرينِ جي پَئيجِ،
جِهيڻو ڳالهائيجِ، پيرين وجِهي ھَٿَڙا.

بيت - 6

آئون جي ڏِيَئن سَنيها، سي چَنڊَ! پَلئِہ ٻنڌُ،
چَئِج حالُ حَبيبَ کي، نئي نِوڙائي ڪَنڌُ،
تو تيڏاھين پَنڌُ، جيڏانهہ عالمَ آسرو.

بيت - 7

اُڀَرُ چَنڊَ، پَسُ پِرِين، تو اوڏا مُون ڏُورِ،
سَڄَڻَ سُتا وِلَهہ ۾، چوٽا ڀَري ڪَپُورِ،
پيرين آئُون نہ پُڄڻِي، ٻاٻل ڏي نہ ٻُور،
جنھن تي چڙھي اَسُورِ، سَنجهي سَڄَڻَ سيٽيان.

بيت - 8

جها اَڇا چَنڊَ، تهان اڇا مون پِرِين،
اَڱڻَ مَٿان اُڀري، کِڙَنِ اُتي کَنڊَ،
اُنِين ڪي اُڪَنڊَ، تو ڏانھُن گهڻو نهاريان.

بيت - 9

آئون اُڪَنڊيائِي مَران، پِرين ڀَلا پَرَ ڏورِ،
ٻاٻَلُ ڏي نہ ٻورُ، پنڌ نَہ جوڳِي پِيڙِي.

بيت - 10

ڌَڻِي! ڪَرِيندين ڪَڏھِين، حياتِيَ ھيڪاندِ؟
مَنَ ۾ مُشتاقَنِ جي، ڪِي رنجائي راندِ،
پِرِين ڏيساندَرَ پاندِ، ڳَجُهہ ڳَرھِيان ڪن سين؟

بيت - 11

ھِينئَڙي سَڄَڻَ سارِئا، ڪِٿي ھُوندَمِ ھيرَ؟
اَچِي لالَنَ نہ ڏِيين، مَٿي پَلَنگَن پيرَ،
ٿِي ورُوھڻ ويرَ، ڳُجُهہ ڳَرھِيان ڪن سين؟

بيت - 12

وَڏَپڻ ۽ واءُ، ڪَرھي کاڏو کوڙِئو،
سو ڪئَن پَلاڻِيَا جو اولاڻِئو نہ اُٿيي.

بيت - 13

پَلاڻِيان پئو، اولاڻِيو نہ اُٿِيي،
جيڏانھن وڳُ وِئو، اُڀو تَرِسي اوڏاھِين.

بيت - 14

ڪَرَھو، نہ ڪيڪاڻُ، پيرين آئُون نہ پُڄڻِي،
جو مون راتِ رَساڻيي، نيئِي ساجنَ ساڻُ،
مُون نہ وَھِيڻو پاڻُ، ويٺِي نيڻَ نِچوئِيان.

بيت - 15

ڪَرھا! ڪَسَرَ ڇَڏِ، وِکُون وِجهُہ وَڌَندِيُون،
ھيڪَر حَبِيبَن سان، مونکي نيئي گَڏِ،
مَڇڻ پوني ھَڏِ، آھُون اُڪَنڍينِ جُون.

بيت - 16

ڪَرَھا! ڪَسَرَ ڇَڏِ، وِکَ وَڌَندِي پاءِ،
منھنجو ھلڻ اُتَهِين، جِتي جانِبَ جاءِ،
توکي چَندَنُ چارِيان، ٻئو وَڳُ لاڻِي کاءِ،
اِيھين اُٺَ اُٺاءِ، جِئَن ھوندِي رات ھُتِ مِڙون.

بيت - 17

ڪَسَرَ ڇَڏِ ڪَنواٽَ، وِکُون وِجُهہ وَڌَندِيُون،
سَئِين سُپيرِيَنِ جِي، وِنگِي ڀانءِ مَ واٽَ،
ڇَڏِ جهورِي، ڏي جهاٽَ، تہ ھوندِيءَ رات ھُتِ مِڙُون.

بيت - 18

ڪَرھا! ڪُرُ سُڃاڻُ، پِئُڪو ۽ پانھِنجو،
اَصُلُ آھي آنهنجو، ناليرو نِڌاڻُ،
ڪَرھا اَسان ساڻُ، ڪي چَانگا ڪج چَڱائِيون.

بيت - 19

آڻي ٻَڌُمِ وَڻَ جاءِ، تہ مانَ مُکريُون چَري،
ڪُڌاتُورو ڪَرَھو، لِڪئو لاڻِي کاءِ،
اِنَ مَيي سندي ماءِ، مُون ڳالهِن ڳوڙھا ڪئو.

بيت - 20

مَيا! مَڃ مِنٿَ، اَڄُ منھنجي ڪَرَھا،
جهاڳِيندي جَرَ پَٽِيُون، مَتان ڪَرِيين ڪَٿَ،
سُپرِيان جي سَٿَ، مُون کي نيئِي ميڙِيين.

بيت - 21

ڳَلِ ڳانا ياقُوتَ جا، موتِيُنِ ڳُتيَس مالَ،
ڪَديفي جي ڪَرَھا، ھند ھيدِي پائين حالَ،
چَندَنُ چارِئين جالَ، جي مُون رات رَساڻِيين.

بيت - 22

ڳَلِ ڳانا ياقُوتَ جا، موتِي مَنجهِہ مَهارَ،
چانگا! چَندنُ چاريايئين، اَٺَئِي پَهرَ اَپارَ،
سَندِي پِيَّ پَچارَ، جي مون راتِ رَساڻِيين.

بيت - 23

مَيا! تو مَهارَ، سَڄِي پايان سونَ جِي،
چارِئين چَندَنَ چوٽِيُون، نايو ميندِيءَ ڏارَ،
سَندِي پِيَ پَچارَ، جي مُون راتِ رَساڻِيين.

بيت - 24

اُٺُ نہ وڃي وَڳَ سين، چَري نہ چانگو،
لَڳيسِ نائُڪَ نِينھَن جِي، نِهوڙِيو نانگو،
ڇَڏي سِرَ سانگو، رِڙھي رَندِ پِرين جي.

بيت - 25

اُٺُ نہ وڃي وَڳَ سِين، چَري نَہ لاڻو،
مَيي کي مَجازَ جو، ٿوھي ۾ ٿاڻو،
ڀَٽاري ڀاڻو، مَرندي سِينءَ نَہ مَٽِيو.

بيت - 26

اٺ نہ وڃي وَڳَ سين، ٻڌو چري نہ ٻوُر،
ميي کي مجاز جو، ڪُڙِ اندَرِ ڪو سُورُ،
سوڪو پِرايَنءِ پُورُ، سُڪِي جِئن سانٺو ٿئو.

بيت - 27

وِھي مَنجهِين وَڳَ، کَٿُورِيءَ ڏارَ چَري،
ماءِ منھنجي ڪَرَھي، پَڌَرِ پَڳَ نہ لَڳَ،
جَڳَ ۾ جهڙو جَڳَ، ھِيين سين ھُت چَري.

بيت - 28

ڀورُ نہ چري ٻورُ، ڇڏيو توُرُ تَڪُون ڪَري،
مونِين ھَڻي موٽِئو، ڪَرَھو راتِ ڪَپورُ،
مَيو ٿِئو مَعمورُ، چَندُن چَکِي آئِيو.

بيت - 29

اڄ نہ اڳينءَ ڍارَ، ڪَرَھو جئن ڪالهہ ھئو،
اڱڻِ آيو نہ ڪري، پاھوري پَچارَ،
جيڪُسِ مَنجهہ قَطار، ڪا وَلِ چِنائين وِھہَ جي.

بيت - 30

ڪَرَھو سَرھو نہَ ٿئي، چانگو تان نہ چري،
لايو لَؤ لَطيفُ چي، مُٺو ماڳِ مري،
نَظَرُ نَينهن ڌري، پيشانيءَ ۾ پرينءَ جي.

بيت - 31

پيشانيءَ ۾ پرينءَ جي، چانگي رکئو چِتُ،
نيٽ ڇِنايو نِتُ، اُڀو اوڏاھِين اُسري.

بيت - 32

مَيي ماڪائِي، وڌو واتُ وَلِنِ کي،
خَبَرَ ٿِي کيٽَ ڌَڻيُن کي وِڏُوڻا واھِي،
ڪَرَھي ڪَاڪَتَ ڇَڏِي، وَرِيَسِ نَہ وائِي،
چانگي چَرِيائِي، وئي ويچاري وِسرِي.

بيت - 33

مٺيون لَهِي مُهاءِ، جي تو چانگ! چِنِيُون،
وَلَڙِيُون وِھَہ ساءِ، اَڃا تو مُهَندِيُون.

بيت - 34

وَٽي سيٽَ سُوَٽَ، پاءِ پنھنجي ڪَرَھي،
وَليُون جي واسَ وَرنيُون، پَهرِيُون مَٿي پَٽَ،
چانکي چَکي چَٽَ، تہ پوءِ نہ رَھَندو پَئڌ ري.

بيت - 35

لکين سوين چَرَنِ، ڪرھا ڪنگو ريٽ تي،
تِئان ويسَرِينِ، ھَٿ نَہ آيو ھيڪڙو.

بيت - 36

ڪِي جو ڪيڏاھين، چانگو چَکِي آئيو،
تاڻِئو تيڏاھين، نيٽَ ڇِنايو نِڪري.

بيت - 37

ڪَرَھي کي ڪَئِين، وِڌَمِ پَئدَ پَلَڻَ جا،
ليڙو لاڻِيءَ کي چَري، نِيَرَ ساڻ نَئِين،
چانگي سَندي چِتَ ۾، صاحبَ وِجُهہ سَنئِين،
واباھئوس اَئِين، لُطفَ ساڻُ لَطِيفُ چي.

بيت - 38

ڪَرَھا! توکي ڪامَ، مون سَچو پَسي سَڃئي،
مانَ پَروڙي مامَ، ساڱاھي سَئينءَ وَھين.

بيت - 39

چانگي چَئِي چُڪياسِ، مَٿان اَڪَ نہ اُلَهي،
جنھن وَلِ گهڻا وِھاٽئا، اُنَ سين آرِ لَڳياسِ،
چوڌارِي چَندنَ وَڻَ، پَچِي پُوڄَ پِياسِ،
راڙي رَتُ ڪِياسِ، ھِنَ ڪُڌاتُوري ڪَرَھي.

بيت - 40

کَنڀاتِڙي تَڙِ وَري، اُڀي تَڙِ واجهاءِ،
مانَ اَچئو ڪاءِ، سُواڌائي سَڄَڻين.

بيت - 41

اُٿي اَڙائِينس، ڇڏئو تہ ڇيڪَ ٿِئو،
کارايان کِڙِئو وڃي، پَلاڻي پائِينسِ،
ڏاوَڻُ سو ڏانِيسِ، جِئن چَري ۽ چِنگهي ڀُڻو.

بيت - 42

دودَستِي، دوپيرَ، سِيني سَنگهرَ رُڪَ جِي،
ماءِ! مُنھنجي ڪَرَھي، تازي پُلَنِ ھيرَ،
تھن کي ڪامَڻَ ڪَندي ڪيرَ، جو مُونھين وَٽِ مَسَ رَھي.

بيت - 43

ڪهين ڪامَڻَ ڪياءِ؟ ڪِيئَن ڀَنڀولئين ڪَرھا؟
اَکِيُن مَٿي اَکيا، پِڙَ ۾ پيرَ گَٺاءِ،
وَڳَ ڪِ وِسرِياءِ، ٻَڌو جِئَن گهاڻي وَھِين.

بيت - 44

نڪِي ڀنڀوليو ڪرھو، نہ ڪي ڪامِڻَ ڪنھن ڪياس،
اکين مٿي آگيا، پَرِ ۾ پير گناس،
وَڳَ نہ وِسرِئاسِ، ڪَرَھي لِکيو لوڙئو.

بيت - 45

ھوسِ وڏڙو وَڳَ جو، مِڙَنِ ۾ مَنهُندارُ،
چنمِ ٿي چاڳَ منجهان، موڙئو مَڃَرَ ٽارَ،
لِکِئي جِي لَغارَ، آڻي ٻڌُمِ اڳيان.

بيت - 46

نَوَ نِيرَ پائي، جان مُون ھِينئڙو جهلئو،
وِئڙو ڇِنائي، پوئينءَ راتِ پِرينءَ ڏي.

بيت - 47

نَوَ نِيرَ ڏھَہ ڏاوِڻيُون، پندرَھن پَئنڌَ پياسِ،
جَڏھن سَڄڻ ياد پَياس، ڇِرڪَ ڇِنايئِين ھيڪڙي.

بيت - 48

کائي نہ کَٽَڻهارُ، چَندَن جا چُوپا ڪري،
اَگَرَ اوڏو نہ وَڃي، سر کَنڊَ لَهي نہ سارَ،
لاڻِي جِيءَ لَغارَ، مَيو مَتارو ڪئو.

بيت - 49

چَندَنَ جا چوپا ڪري، چَري نہ مِصِرِيءَ سَنگَ،
اَنگيين مَٿي انگَ، مَيي کي محبوب جا.

بيت - 50

چانگا! چَندَنُ نہ چَرِين، مَيا! پِئين مَ موڪَ،
اگر اوڏو نہ وَڃِين، ٿُڪيو ڇَڏين ٿوڪَ،
لاڻي وِچان لوڪَ، تو ڪَهڙي اَکرِ آئڙي؟

بيت - 51

جِئان ڪوڙ ٻہ ڪاٺيُون، پَنجين لکين پاءُ،
مَيو تنھِن ماڳاءُ، ڏيھاڙي ڏارَ چَري.

بيت - 52

جِئان ڪوڙِ ٻہ ڪاٺِيُون، پَنجين لَکِين پَنُ،
تِئان ڇاڻي ڇُڳِيُون، مَيي رَتو مَنُ،
تَنھن وَلِ سَندو پَنُ، ڪوماڻو ڪوڙين لَهي.

بيت - 53

لَکِ لاکِيڻو ڪَرَھو، ڪوڙين ڏيئي ڇوڙ،
اھا سِٽَ سيّد چئي، جهين تهين جوڙ،
تُرت رساڻي توڙِ، جُہ پلاڻيو تہ پرينءَ مڙي.

بيت - 54

لَکَ لاکِيڻو ڪَرَھو، ڪوڙين ڏيئي ڪاھِہ،
ايلاچيون آھُرَ ۾، پُوڄ مَيي کي پاءِ،
ڪَٿَ نہ ڪَندو ڪاءِ، جُہ پلاڻيو تہ پِرِينءَ مِڙي.

بيت - 55

لَکَ لاکِيڻو ڪَرھو، ڪوڙِين ڏيئي ڳِڌوم،
اَڱڻ سونھن ٿِيَئوم، مُلهِہ مَهانگو مَ چئو.

وائي - 1

آھِنمِ ڳالَهڙِيُون، ماءِ! مُرادُون پرينءَ سين.
جي مون پييُن پرينءَ ري، کهِہ! سي راتَڙِيُون،
ماءِ! مُرادُون پرينءَ سين.
جي مون اورِيُون پرينءَ سين، وَرُ سي راتَڙيُون،
ماءِ! مُرادُون پرينءَ سين.
پَسَڻَ ڪارَڻِ پرينءَ جي، پاتِيُمِ جهاتَڙيُون،
ماءِ! مُرادُون پرينءَ سين.
آڌِيءَ عبدُاللّطيفُ چي، ڪُهَنِ ڪاتَڙِيُون،
ماءِ! مُرادُون پرينءَ سين.

وائي - 2

سَڌين سيڻَ نہ ھُونِ، نِينھُن نِياپي نہ ٿِئي.
ڪارِي راتِ رَتَ ڦُڙا، جان جان نيڻَ نہ رُونِ،
نِينھُن نِياپي نہ ٿِئي.
موٽَڻُ جَنِين ميهَڻون، پِڙَ تي سيئِي پُونِ،
نِينھُن نِياپي نہ ٿِئي.
جَنِ مُسافِرَ سُپِرِين، سي مَرُ رويو رُونِ،
نِينھُن نِياپي نہ ٿِئي.

وائي - 3

توڙي تَڙِيين تون، يا اَلا! تو دَرُ توءِ نہ ڇَڏِيان.
مُون کي سو مُشاھِدو، جي مُنھن نہ ڏِيين مون،
يااَلا! تو دَرُ توءِ نہ ڇَڏِيان!
مون ٻِيئا دَرَ گَهڻا نِهاريا، آھِيين تُو ھِي تون،
يا اَلا! تو دَرُ توءِ نہ ڇَڏِيان!

سر سريراڳ

داستان پھريون

بيت - 1

مانَ پُڇَنِئي سُپِرين، چِتان لاھِ مَ چَرُ،
اُنِين جا اَمُرَ، کَڻُ تَہ، خالي نہ ٿيين.

بيت - 2

مانَ پُڇَنِئي سُپرِين، چِتان چُرَ مَ لاھِہ،
پِرِيَنِ اَڳِيان پاءِ، پَلَؤ مَڱڻَهارَ جِئن.

بيت - 3

مانَ پُڇَنِئي سُپِرِين، چِتَ ۾ رکِجِ چيتُ،
سِڙِھُ ڌُئاري صافُ ڪر، صابُڻَ سان سُپيتُ،
سامُونڊِي سُچيتُ، ٿيءُ تہ پَھچِين پارَ کي.

بيت - 4

مَان پُڇَنئي سُپرِين، چِتَ ۾ رکِج چيتائِيج،
ڪَڍِي ڪائي ڪَچ کي، ڪُوڙُ مَ ڪَمائِيجُ،
وَڻِجُ وِھائيجُ، سَڀُ سوداگَر سَچَ جو.

بيت - 5

مانَ پُڇَنِئي سُپِرِين، چِتان لاھِہ مَ چورُ،
ڪَڍِي ڇَڏِ قَلبَ مان، ڪُٽي ڪُوڙو ڪورُ،
ھُنَ ڀَرِ سَندو ھورُ، مٿان تو معافُ ٿئي.

بيت - 6

مانَ پُڇَنِئي سُپِرِين، چيتاريج چِتُ،
دائِما دُوربِيءَ ۾، وسين وِلايَتُن وِتُ،
نينھَن نيکاري نِتُ، مَلاحَ گَڏ مُعۡلِمَ سين.

بيت - 7

ڪائو ڪَمايومِ، موتِي مون نہ وَڻجِئا،
سِيهي جو سَيَّدُ چئي، وَکَرُ وِھايومِ،
ھَهڙو حالُ سندومِ، توہَ تُنھنجيءَ اُبَهان،

بيت - 8

ڪَچُ ڪَمايُم ڪوڙُ، ڀَڳَمِ عَهدَ اَللہَ جا،
پِڃِرو جو پَاپَنِ جو، چوٽِيءَ تائين چُورُ،
مَعلومُ اَٿيئِي مُورُ، ڳُوڙھا اِنهيءَ ڳالهہ جو.

بيت - 9

ڪُوڙُ ڪَماءِ مَ ڪَچُ، اُٿي اورِ اَللہَ سين،
ڪَڍُ تُون دَغا دِل مان، صاحِبَ وَڻي سَچُ،
مُحبتَ سندو مَنَ ۾، ماڻِڪَ ٻارجِ مَچُ،
اِنَ پَرِ اُٿِي اَچُ، تہ سودو ٿِيئي سَڦَرو.

بيت - 10

سودو جو سَڦرو،سو مُون پَلئي پاءِ،
وَسُ ويچارِيءَ ناھِہ ڪو، تون آگا! عَرضُ اگهاءِ،
رِيءَ ھَمِراھيءَ ھادِيءَ جي، مورُ نہَ مِڙي ماءِ،
لُطفَ ساڻُ لنگهاءِ، لَهِرو لَهَرِن وِچَ مان.

بيت - 11

لَڙُ لَهريون، لَسَ، ليٽَ، جِتي اَنتُ نہ آبَ جو،
اللہ! اُتِ مَ اولِيين، ٻيڙا مَٿي ٻيٽَ،
جوکو ٿِيي مَ جَھازَ کي، ڦَرَھي اَچي مَ ڦيٽَ،
لڳي ڪا مَ لَپيٽَ، ھِنَ غارِيبي غرابَ کي.

بيت - 12

سِڙھَہ سَنوان، لاڄُو نَوان، اَولا جَنِين عاجَ،
ساٿِي سَفَرِ ھَلئا، ڀَري جُنگِ جَهاجَ،
حاصُلُ ڪَرِين ھاجَ، واحِدَ! وَڻِجارنِ جي.

بيت - 13

سِڙھَہ سَنوان، لاڄُو نَوان، مُهاڻا سندن مِيرَ،
ساٿِي سَفَرِ ھَليا، ٿِيا سَڻاوا سِيرَ،
جي اَچَنِ ساڻُ اُڪِيرَ، سي ٻيڙيون رَکيِن ٻاجَهہ سين.

وائي - 1

سَھسين شُڪرانا، ڪوڙين ڀاَل ڪَرِيمَ جا.
حَمدُ چَئِج حَڪِيمَ کي جورِ ھڻِي جانا، ڪوڙين ڀاَل ڪَرِيمَ جا.
تون ڏيکارين تون ڌَڻِي، باطِنَ جا بانا، ڪوڙين ڀاَل ڪَرِيمَ جا.
مَتان مَرد وِسارئين، صاحِبَ جِي ثَنا، ڪوڙين ڀاَل ڪَرِيمَ جا.
دوس رَکِي دِلِ ۾ پَڙهُ لالَنُ لِسَانا، ڪوڙين ڀاَل ڪَرِيمَ جا.
جَفا ڏيئي جيءَ کي، ٿِيءُ فِڪرَ مَنجِهہ فَنَا، ڪوڙين ڀاَل ڪَرِيمَ جا.
تُسِي توسين توھُ ڪَري، مَنَ آگو احسانا، ڪوڙين ڀاَل ڪَرِيمَ جا.
ڪَڍُ تُون دَغا دِلِ مان ٻانَهپَ سين، ٻانها، ڪوڙين ڀاَل ڪَرِيمَ جا.
صاحِبَ وڻي سَچَ سين، ٿيُ دانَھُ، ديوانا. ڪوڙين ڀاَل ڪَرِيمَ جا.
جي تَسليمَ سين تَحقِيق ھُئا، سي ڪئن اَمَانا، ڪوڙين ڀاَل ڪَرِيمَ جا.
جاڳِيا جي جَبارَ لَئي سيئي سَمانا، ڪوڙين ڀاَل ڪَرِيمَ جا.
فَاذ ڪُرُوني اَذ ڪُرُڪُم ڪَھِئو قُرانا، ڪوڙين ڀاَل ڪَرِيمَ جا.
واَ شڪُرُوا لِي وَلا تَڪفُروُنِ ڪَڍُ تون ڪُفرانا، ڪوڙين ڀاَل ڪَرِيمَ جا.
سَڀَ سَنواريا سُپِرِينءَ ڪُوَلَ تو ڪَنا، ڪوڙين ڀاَل ڪَرِيمَ جا.
چَڱِي چَئِجُ چاھَ سين مَدَحَ اِيءَ مَنا، ڪوڙين ڀاَل ڪَرِيمَ جا.
تائبَ ٿِئو تَڪَڙا جوشئون جُوَاناَ، ڪوڙين ڀاَل ڪَرِيمَ جا.
تَہ لَھِين تون لَطِيفَ کان اَمُنُ اَمانا، ڪوڙين ڀاَل ڪَرِيمَ جا.

وائي - 2

مون ۾ تُون موجُود، آئون اَڳاھِين آھِيان،
آئُون اَسُونِھين آھِيان.
اَکِيُون اَکَڙِيُنِ کي، سِڪئو ڪَنِ سُجُودُ،
آئُون اَسُونِھين آھِيان.
تيلاھن رَسِيُون بُودَ کي، جيلاھن ٿِيُون نابوُدُ،
آئُون اَسُونِھين آھِيان.
ماڙهُن جي موٽَڻَ جو، صاحِبَ هَٿِ سُجُود،
آئُون اَسُونِھين آھِيان.
اِنَ دَرِ سيئي اِگِهئا، جَنِ وِڃايو وُجُودُ
آئُون اَسُونِھين آھِيان.

داستان ٻيو

بيت - 1

جيڪِي منجِهہ جَهانَ، سوتارِيءَ تَڳي تُنھِنجي،
لُطفَ جِي لَطِيفُ چي، تو وٽ ڪَمِي ڪانَ،
عَدُلَ ڇُٽان آن نہ، ڪو ڦيرو ڪَج فَضُلَ جو،

بيت - 2

سارِي راتِ سُبحانُ، جاڳِي جن ياد ڪيو،
اُنِ جِي عَبۡدُاللَطِيفُ چي، مِٽِيءَ لڌو مانُ،
ڪوڙين ڪَنِ سَلام، آڳَهہِ اَچيو اُن جي.

بيت - 3

سيوا ڪَرِ سبحان جِي، جِت جَرُ وھي ٿو جالَ،
سَوين سُپَڄنِ سَمنڊ ۾،ماڻِڪَ موتِي لالَ،
جي ماسو جُڙَئي مالَ، تہ پُوڄارا پُرِ ٿِئيين.

بيت - 4

سي پُوڄارا پُرِ ٿِيا، سمنڊ سيوئو جَنِ،
آندائُون عَمِيقَ مان، جهوتِي جواھَرَنِ،
لَڌائُون لَطِيفُ چي، لالون مان لَهرنِ،
ڪانهي قِيمتَ تَنِ، مُلهہ مَهانگو اُنِ جو.

بيت - 5

سيوِئو جَنِ سُبحان، ويرِ نَہ وِڙھي تَنِ سِين،
توبَهہَ جي تاثِيرَ سين، تَرِي ويا طوفانَ،
ڏيئِي تَوَڪُلَ تَڪِئو، آرُ لَنگِئا آسانُ،
ڪامِلُ ڪِشتِيبانُ، وِچَ ۾ گَڏِيُن واھَرُو.

بيت - 6

سارِي رات سبحانَ، سودو جَنِ صاحبَ سين،
ٻانهپَ ڀَري ٻيڙِيُون، ھلئا جوپَ جُوانَ،
پاڻِي پَهلوانَ، لَحظي مَنجِهہ لَنگِهي وئا.

بيت - 7

ٻانهپَ جو ٻيڙِين۾، وَکَرُ وِڌائُون،
موتي معرفت جا، سَچا سوديائُون،
اَلتائِبُ مِنَ الزَنبّ، اِيءَ کَٽ کَٽِائُون،
اٺين جِي ائُون، بَرَڪَتَ بارَ لَنگهائِيان.

بيت - 8

جَنِين سودي سَچَ جو، وَکَرُ وِھايو،
”بَخِر و لَهمُ الّبشِريٰ“ جو اُنِين لَئہِ آيو،
اُنَ کي لالَنَ لَنگهايو، ساندارو سَمونڊَ جو.

بيت - 9

اِيءَ گَتِ غَوّاصَنِ، جِيئن سَمنڊُ سوجِهائُون،
پيهِي مَنجِهہ پاتارَ جي، ماڻِڪَ ميڙِيائُون،
آڻي ڏنائُون ھيرا لالَ ھَٿنِ سين.

بيت - 10

اَڇارا عَميقَ جا، گَڏيا غَوّاصَنِ،
جُهرِيُون جهاڳي آئِيا، ڪارُونڀارَ ڪُنَنِ،
سمنڊُ سوجهي جَنِ، آڻي اَمُلَ اولِيا.

بيت - 11

ويا جي عَمِيقَ ڏي، مُنھن ڪائو ڏيئِي،
تِن سِپُون سوجهي ڪَڍيُون، پاتاران پيهِي،
پَسَندا سيئِي، اَمُلَ اَکڙِيُنِ سين.

بيت - 12

آڏو چِڪَڻُ چار، مُنھنجِي موجَ نہ سهي مَڪُڙي،
ميڙي مَٺَاين جو، بيحَدِ چاڙھيم بارُ،
چَوَڻَ چارو ناھِہ ڪو، بَدِيُون بي شُمارُ،
ڪَپرُ ڪارُونڀارُ، اُڪارِين احسانَ سان.

بيت - 13

ويرَ مَ لاھي ويهُہ، مَٿي آرَ اوڙاھَہ جي،
پَسِي پاڙي وارِيُون، ڪِجِ اَنديشو ايهُہ،
وِيندو نَہ پَسين ڏيهُہ، پَتَڻِ ھُنَ پارِ مَڻي؟

بيت - 14

اَٺَئِي پَهَرَ اوڙاھَہ تي، مَنجهہ گهُرءَ گهاري،
وَسُ نَہ ويچاري، تَہ ڪامَاڳِ ڍڪَندِي مَڪَڙِي.

بيت - 15

ھِڪي ٻانهي چِتَ ۾، ٻِي صاحبُ سَنوارِي،
دنگِي ھِنَ دَرياھہ مان، ھَلائي ھاڪاري،
تَرازو تارِي، سُتَڙ سَڀيئي ڪَري.

بيت - 16

ھِڪي ٻانهي چِتَ ۾، ٻِي سَنواري صاحِبُ،
ڪَڍي اُونهي ڪُنَ مان، اِي آگي جو عَجَبُ،
اِيءُ سائينءَ جو سَبَبُ، جِئن ٻُڏا ڪڍي ٻارِ مان.

بيت - 17

ھِڪِي ٻانهي چِتَ ۾، ٻِي جا ڪري اَللہُ،
پاڻَهِي وجهي ڪُنَ ۾، پاڻَهي اُڪاري اوڙاھُہ،
تنھن واحَد کي واھُہ، جو سُتَڙِ سڀيئي ڪري.

بيت - 18

ھِڪي ٻانهِي چِتَ ۾، ٻِي جا اللہ ڪَري،
پاڻِهي وِجهي ڪُنَ ۾، پاڻهِي ڪَنڌيَ ني،
سُتَڙِ سي ڍوئِي، جي تَڙَ تَوائِي مَڪُڙا.

بيت - 19

ھِڪڙِي ٻانِهي چِتَ ۾، ٻِي ڪَري جوڙَ جَبارُ،
ڪَڍي اُونهي ڪُنَ مان، اِيءُ آگي جو آڌارُ،
جَهازُ جوھرِين جو، تَنھِن کي ڀَؤ نہَ ڏي ڀَتارُ،
نَنڍا وَڏا مَڪُڙا، سَڀِ پَسَندا پارُ،
جيڏانھن مُنھُن مَديني جو، سُڄي مُحَمّدُ موچارُ،
سَٻاجهو سَتارُ، سُتَڙِ سَڀيئِي ڪَرِي.

وائي - 1

ڪَنڌِي ساريان ڪانَ، يا اَمنَ امانَ!
يا اِلاھِي! ٻاجَهہ ٻلاٽِي ڀائيان.
ڳَڻَڻَ ڳاڻيٽو ناھہ ڪو، اَپَرِ ٿِئا عِصيانَ،
يا اِلاھِيَ ٻاجَهہ ٻِلاٽِي ڀائيان.
خَبَرَ ناھِہ قَبَرَ جِي، نِسورا نِسيانَ،
يا اِلاھِي! ٻاجَهہ ٻِلاٽِي ڀائيان.
والِي رَسِجِ وَھِلو، اَرَکِ ٿِيا اِنسانَ،
يااِلاھِي! ٻاجَهہ ٻِلاٽِي ڀائيان.
سُڻُ سَٻاجها سُپِرِين نَعرو، نِگهبانَ،
يااِلاھِي! ٻاجَهہ ٻِلاٽِي ڀائيان.
مَدِيُون پَسِي منھنجيون، شَرِمائيا شيطانَ،
يااِلاھِي! ٻاجَهہ ٻِلاٽِي ڀائيان.
سائِين! سُکاڻِي آھِيين، سامُونڊِي سُبحانَ،
يااِلاھِي! ٻاجَهہ ٻِلاٽِي ڀائيان.
تُرَھو ڇِنُمِ تارِ ۾، رَسِجِ تُون رَحمانَ،
يااِلاھِي! ٻاجَهہ ٻِلاٽِي ڀائيان.
ٻيلِي جو ٻُڏَنِ جو، مون تي مُوٽي مانَ،
يااِلاھِي! ٻاجَهہ ٻِلاٽِي ڀائيان.
ويٺو پِني پِنَڻو، ڪَرِ ڀيرو مَٿي ڀانَ،
يااِلاھِي! ٻاجَهہ ٻِلاٽِي ڀائيان.
خالِقَ تان خُوبُ ڪِئا، گولَنِ جا گُذِرانَ،
يااِلاھِي! ٻاجَهہ ٻِلاٽِي ڀائيان.
آئون پڻ اَنڌو اُنِ ۾، ويٺو پِنان پانَ،
يااِلاھِي! ٻاجَهہ ٻِلاٽِي ڀائيان.
سَڀِ سَوالِي سَمَگِيا، داتا ڏيئِي دانَ،
يااِلاھِي! ٻاجَهہ ٻِلاٽِي ڀائيان.
وِلها سڀ ونهيان ڪِئا، تنھنجي جُودَ جُوانَ،
يااِلاھِي! ٻاجَهہ ٻِلاٽِي ڀائيان.
مَتان مُونکي ڇَڏِئين، ٻيلي سندا ٻانَ،
يااِلاھِي! ٻاجَهہ ٻِلاٽِي ڀائيان.
وِيرَ وَسِيلو آھيين، داڙو ۾ دِيوانَ،
يااِلاھِي! ٻاجَهہ ٻِلاٽِي ڀائيان.
لاءِ ڏُھارِيَنِ ڏيهہ کي، خِيمو اَڏئو خانَ،
اُتي عَبدُالّطيفُ جي، سُڻِجِ ڪا سُلطانَ،
يا اِلاھِي! ٻاجَهہ ٻِلاٽِي ڀائيان.

داستان ٽيون

بيت - 1

کُوھا ڪالهہ کڻِي، اُنِ وِڌا اُتَرَ آسري،
اَلا جُهري مَ اُنِ جي، اولي جي آڻِي،
وَڻجارَنِ وِڻِي، وَکَرُ وِڌو ٻيڙيين.

بيت - 2

وَکَرُ سو وِھاءِ، جو پَئي پُراڻو نہ ٿِئي،
ويچيندي وِلاتَ ۾، ذَرو ٿِئي نہ ضاءِ،
سا ڪا ھَڙَ ھَلاءِ، آڳَهِہ جَنھن جي اُبَهِين.

بيت - 3

وکر ڍيروُن ڍيرَ، پَرَ وِھئيندَڙَ ويسَرا،
ڪِنِي وِھائي وَسُ ڪِئو، وَکَرُ وڏيءَ ويرَ،
ڪِنِي گهمندي سيرَ، وَکَرُ وڪامِي وِئو.

بيت - 4

اورِيائين آڻِينِ، ميڙئو مَعَلِمَ خَبرُون،
ساتا سُڌِ نہ ڏِينِ، جتي وَہُ ويڌَ ڪري.

بيت - 5

ٻيڙي تُنھنجِي ٻاجَ، وَکُرُ تھين وِصال جو،
کُوھا، اولا،تو ڪَئا، سَڀ سُونھارا ساجَ،
اُتِ ڪا مُعَلِمَنِ حاجَ، جِتِ پُور وارو پَڻهين.

بيت - 6

ٻيڙِي پُراڻِي، وَکر پاءِ مَ وِتَرو،
تَري ۾ تُنَ پئا، پاسَنِئون پاڻِي،
ھِيءَ ھَڏِ وِھاڻِي، ڪَڙھُہ ڪالوڻي ڏِينھَن کي.

بيت - 7

تَري تُنَ پِياسِ، پاسَنِئُون پاڻِي وَھي،
کوھو جُهرُ جهونو ٿئو، لاڄُو سَڀ لَڙياسِ،
جيلاھن سَڌَرُ سکاڻياس، وَھي تي وَھَہ سامهون.

بيت - 8

ويٺو تُنَ تُنِينسِ، مَکِ ڏھاڙي مَڪُڙِي،
سَنباھي، سَيّدُ چئي، مٿي نيڍوءَ نِينسِ،
وَٽائي وَڏاندَرا، لاڄُو لَڳائِينسِ،
آخَرِ اُھِرائِينسِ، تُہ جوکو ٿِئي نہ جهازَ کي.

بيت - 9

تُنَ تُنِيندو آءُ، مَکِ ڏِھاڙي مَڪُڙي،
سانباھي سَمُونڊَ جي، مَنا مُورِ م لاھِہ،
اَڄُ ڪِ سَنجهِہ صُباحِ، اھرَندِي اَتانگَ تَڙِين.

بيت - 10

اَچِي سو ڏٺوءِ، جو ڪَپَرُ سُوءِ ڪَنَنِ سين،
سُتي لوڪ لَطِيفُ چي، يادِ نہ ذرو ڪيوءِ،
غافِلُ ٿِي غُرابَ کي، اوڙھَہ تي آندوءِ،
جھازُ ضَعيفَنِ جو، پاڻِيءَ ۾ پَرِتوءِ،
سَيَدَ ساٿُ سندوءِ، پُرِ بَندَرِ پَهچائِيين.

بيت - 11

جُتو وانءَ جَھازَ، گَڏئو غُرابَنِ سين،
پُوريندي ھُنَ پارَ ڏي، سَڌَرَ کَڻجِ سازَ،
اَچنِ ٿا آوازَ، سَٽاڻي سَمُونڊَ جا.

بيت - 12

دَنگِي وِچَ دريا، ڪِي ٻُڏي ڪِي اُپِڙي،
ھُو جي واڍي واڻئا، سي سُونهَڻَ سڀ سِڙيا،
مُعۡلِمَ ماڳِ نہ اڳِيين، ڦلنگِي مَنجهہ ڦِڙِيا،
مَلاحَ تُنھنجِي مَڪُڙِيءَ، اچِي چورَ چڙھيا،
جِتي ڍينگَ ڍَرِيا، تِتي تاري تُنھنجِي.

بيت - 13

دنگِيءَ ۾ داڻا، وَٺِي وِجهُہ وَکَرَ جا،
ويرِ وَرَندِيءَ ويسِرا، وِھُہ مَ ويڳاڻا،
ھيَ نِنڊَ نہ ڄاڻا، ڪَڏھِن ھَڻنديءِ، ڪُنَ ۾.

بيت - 14

وَکَرُ وَڻِجارا، پاڻ پَرائو چاڙِھئو،
اَچي لَهِريُون لَڳِيُون، ٻيڙِيءَ ٻِپارا،
جاڳو جي يارا، تہَ تَڙِ تَوائِي نہَ ٿِئي.

بيت - 15

ٻيڙِياتا، ٻيئِي، تو نہ ڦَٻَنديُون ڳالَڙِيُون،
سَڄِيُون راتِيُون سُمَهِين، ڀَرُ سُکاڻَ ڏيئِي،
صُباحَ سَڀيئِي، پارِ پڇَندَءِ خَبَرُون.

بيت - 16

وَھہَ تِکَ وَھَڪُرا، جِت نَنگرَ نہ ٺهِرَنِ،
وڏاندَريُون وَھَہ سامُهِيُون، جَجهي زورِ جُنبَنِ،
نيڍوُءَ ۾ ناتارِيُون، وَڻِجارا وِجِهنِ،
مُلا معۡلِمَنِ، مُون ڳَرِي سُئِي ڳالهڙِي.

بيت - 17

وَڻِجارا ويٺي، تو نہ سَرَندِي شاھَہ ري،
مَکِ پَنھنجِي مَڪُڙِي، چَڱِي ڪَر چيٺي،
پاسا پاکَڙِينِ جا، سَمُنڊُ تو سيڪي،
جي لُنڊا ۾ ليکي، وِيرِ وڙھندِي تن سين.

بيت - 18

ناکُئو نِگهَبانُ، مُعۡلِمَ مُنجي خَبرُون،
جِن ساري کَنيو سَمُونڊَ تي، سَفَرَ جو سامانُ،
لُطفَ ساڻُ لَطِيفُ چَئي، تن لَنگهيو طُوفانُ،
سَنڀاري سُبۡحانُ، وڃِي عادَنئُون اُکَتا.

بيت - 19

بَندَرِ جان ڀَئِي، تہ سُکاڻِيا مَ سُمهو،
ڪَپَرُ ٿو ڪُنَ ڪري، جِئن ماٽي منجهہ مَهِي،
ايڏو سُورُ سَهِي، ننڊ نہ ڪجي ناکُئا.

بيت - 20

سُتا سَڀِ پَئِي، سَندي مُعۡلِمَ آسري،
اَئِين پڻ سُمهو، ناکئا، بَندَرِناھہ ڀَئِي،
جن جي لائقَ لَڄَ کَنئِي، سي سڀ لَنگهيندا لَڪيُون.

وائي - 1

ساٿِيُنِ نَنڌا بارَ وو! تَنِ پانڌِيَنِ نَنڌا بارَ،
توکي آرَسُ اَکڙِيُنِ ۾.
پاتا پاڙي وارِئين، پَڳَهہَ مَنجِهہ پاتارَ،
توکي آرَسُ اَکڙِيُنِ ۾.
پَتَڻُ ٿو پُورَ ڪَري، آئِي تنھنجَڙِي وارَ،
توکي آرَسُ اُکڙِيُنِ ۾.
سَڄِيُون راتِيُون سُمَهين، کِيو مَنجِهہ خُمارَ،
توکي آرَسُ اُکڙِيُنِ ۾.
ڪِ تو ڪَنِين نَہ سُئِي، ھَلَڻَ جِي ھاڪارَ،
توکي آرَسُ اَکڙِيُنِ ۾.
تائبَ ٿِيو تَڪِڙا، سَچِي اِيءَ سَنڀارَ،
توکي آرَسُ اَکڙِيُنِ ۾.
نِنڊَ نہ ڪِجي ايتِرِي، سُڻِج اَدا يارَ،
توکر آرَسُ اَکڙِيُنِ ۾.
سائِينءَ مُڪئي سَچَ کي، تون ڪُوڙو مَنجِهہ قطارَ،
توکي آرَسُ اَکڙِيُنِ ۾.
ڪِ تُون ڪنين نہ سُئي، ڪَپَرَ جِي ڪُوڪارَ،
توکي آرَسُ اَکڙِيُنِ ۾.
ھُو جو شَڪُ شارِڪَ جو، تِئان رَکُ سَتارَ،
توکي آرَسُ اَکڙِيُنِ ۾.
ڪُلّ نفسِ ذائِقَتُه المُوت، پَڙھو اِيءَ پَچارَ،
توکي آرَسُ اَکڙِيُن ۾.
شِڪارُ تون شَھبازَ جو، تون تان مَنجهِہ شڪارَ،
توکي آرَسُ اَکڙِيُن ۾.
يومَ يَفرِّ المَرَءُ مِن اَخيه، جِتِ ڀَڄَندا ڀارَ،
توکي آرَسُ اَکڙِيُن ۾.
تُرَھو ڇِنو تارِ ۾، اَچِجِ تُون اوسارَ،
توکي آرَسُ اَکڙِيُن ۾.
لَکَ مِڙيئِي لُٽِيا، ھُنھين وِئا ھَزارَ،
توکي آرَسُ اَکڙِيُن ۾.
ڏِنَئِي جي اَللهَ کي، ھُوند ٿيين پَريين پارَ،
توکي آرَسُ اَکڙِيُن ۾.
جوٽَن مَٿان جُٽِڪي، دُنِي تُنھنجي دارَ،
توکي آرَسُ اَکڙِيُن ۾.
جيفو آھِ حَدِيثَ ۾، اَنڌِيءَ اِي آچارَ،
توکي آرَسُ اَکڙِيُن ۾.
وَٽِيَئِي ڪِينَ وِلھَنِ سين، ڪَنبِي ڀَرِ قَھارَ،
توکي آرَسُ اَکڙِيُن ۾.
سا ڪيئن ھَلي تو سين، جا ڀَڳِي کان ڀَتارَ؟
توکي آرَسُ اَکڙِيُن ۾.
جِئَڻُ، جالَ نہ نِبَھي، سُڻِجِ اِيءَ سَنڀارَ،
جِمَ وِسارِيين، ويسَرا ڀِتِنِ جِي ڀُلڪارَ،
توکي آرَسُ اَکڙِيُن ۾.

داستان چوٿون

بيت - 1

سَڀيئي سَئِينءَ ڪَرين، ڪومَ مُنجهائِين راھ،
سَڄَڻَ جي صَلاح، لائو لَڱو ميڙئين.

بيت - 2

سَڀيئي سَئِينءَ ڪَرين، ڪومَ مُنجهائِين واٽ،
سُپيرِيان جي ساٿِ، لائو لَڱو ميڙئِين.

بيت - 3

سَڀيئِي سُبحانَ جي، ڪَرِ حوالي ڪَمَ،
ٿِي تَحقِيق تَسلِيمَ ۾، لاھي غَمَ وَھَمَ،
قادِرُ ساڻُ ڪَرَمَ، حاصل ڪري حاجَ تو.

بيت - 4

چَڱنِ ساڻُ چَڱائِيُون، اِنءَ سَڀڪو ھوءِ،
تو جِئَن ڪَري نہ ڪوءِ، بُڇَنِ ساڻُ ڀَلائِيُون.

بيت - 5

چَڱا ڪَنِ چَڱائِيُون، مَٺائيون مَٺَن،
جو وَڙُ جُڙي جن سِين، سو وَڙُ سيئِي ڪَن.

بيت - 6

مَيَنِ مَٿي سَمَرا، کُھِيَنِ سَڏَ ڪَرِينِ،
ساٿُ نِباھِيو نِينِ، اِيءَ پَرِ سَندِي سَڄَڻين.

بيت - 7

وِتُ وِيمي جو جي لَھِين، تہ ٻِي ڪارِ نہ ڪَرِين ڪا،
سا پَرُوڙِج ڳالهڙِي، وَڻجارَنِ وٽا،
موتِي جن ھَٿا، آندَءِ گهڻي اَدَبَ سين.

بيت - 8

اَمُلهہ آڇِ مَ اُنِ کي، جي نہ پَرُوڙِنِ مَٽِ،
جِتِ گَڏِجيئِي جوھَرِي، ماڻِڪَ تِٿھِين مَٽِ،
جِنين سونَ سين سَٽِ، تَن ھَڻِي رِيءُ رَدِ ڪيو.

بيت - 9

سونا! وَؤن صَرافَ سِين، لَڏو لاھِ مَ لَڏِ،
سودو سوئِي ڇَڏِ، جَنھن ۾ جَواھِرُ ناھِ ڪو.

بيت - 10

جُھ صَرافَنِ لَڏِئو، تہ تُون پڻ لَڏِجِ، سونَ!
قَدُرُ لَھَندُءِ ڪونَ، نيئِي گَڏِيندَءِ گَڏُوءَ سين.

بيت - 11

جي نہ سُڃاڻَنِ سَچَ کي، ويھُ مَ تَنِين وَٽِ،
اَمُلهَہ کي اَڌَ ڪري، پاڻان ھَڻندا پَٽِ،
مُھرَ تَنِين وَٽِ مَٽِ، جي پارِکُو پارسَ جا.

بيت - 12

اَگهِئو ڪائو ڪَچُ، ماڻِڪَنِ موٽَ ٿِي،
پَلَئہ پايو سَچُ، آڇِيندي لَڄَ مَران.

بيت - 13

وئا سي وِينجهارَ، ھِيرو لال وِنڌِينِ جي،
تنِين سَندا پوئيان، سيھي لَھَن نہ سارَ،
ڪُٽِنِ ڪُٽِ لُھارَ، ھاڻي اُنِهين ڀيڻِيين.

بيت - 14

وَڃَنِ مَ وِينجهارَ، پاڻِيَٺَ جي پَرَکڻا،
ڪُنيَرُ پايو اَکِيين، لَھَنِ سَڀَ ڪَنھِن سارَ،
موتِي جي مِزاجَ جو، قَدرُ مَنجهِہ ڪِنارَ،
صَرافَنِئُون ڌارَ، ماڻِڪَ مُلاحِظو ٿِئي.

بيت - 15

ٿا صَرافَ سُڄَنِ، پاڻَ ڪوٺائِن جوھِري،
ماڻِڪَ ڪَري مُٺِ ۾، وانءُ وَٺي وَٽِ تَنِ،
سَندُسِ ئِي سَيّدُ چَئِي، ڪَھِڙو قَدُرُ ڪَنِ،
پاڻِيَٺُ ئِي پَرکن، ڪِي ڪَئنچَل گَڏِن ڪَچَ سِين؟

بيت - 16

اَمُلُ اَسارِي پَئي، ڀُوري ڀَڳئي جِتِ،
ڪُھِ نہ رُئين تِتِ، ٻَئي اَڌَ ھَٿِ ڪَري؟

بيت - 17

اَمُلُ اَساري پَئي، ڀُورِي ڀَڳئي جِيئن،
وانءُ صَرافَنِ سِيئن، ٻَئي اَڌَ ھَٿَ ڪَري.

بيت - 18

ماڻِڪُ مُنڌَ ھَٿا، پيتِيءَ ۾ پُرزا ٿئو،
سَڄو تان سَيّدُ چئي، لَھي لَکُ سَوا،
ڀَڳي پُڄاڻا، پَدمان ئي پَري ٿئو.

بيت - 19

ڀڳو ميلان ئي مَٿي، سَڄو تان سؤ لَکَنِ،
ماڻِڪَ تي مُلهُہ وِترو، جو ڌُرِيان ھيٺ ڌَڻِنِ،
سُوجهي صرافَنِ، بي بھا بَسِ ڪِئو.

بيت - 20

جِتي ماڻِڪَ ماڳُ، تِتي چوران تَڪِيو،
سَئون تَنِ سَڀاڳُ اَمُلُ جن اوباھيو.

بيت - 21

چورُ اُڀو ائين چوءِ، آئون اُھوئِي آھيان،
جي اَسِي اَکِيَنِ ھوءِ، تہ لِڪي کي ڪونہ لَھي.

وائي - 1

جاڳو جوشان، جيڏيُون! پاڻُ پَرَنِ جي.
ھلَندي حَبِيبَنِ ڏي، ويلو وِچِ نہ ڪِجي،
جاڳو جوشان جيڏِيُون.
مَٿا اُھِسَ اُسِرِي، پَتنگَ جيئن پِئِجي،
جاڳو جوشان جيڏِيُون.
عَرَضُ اَحوالُ اُنِ کي، چَڱِيَ ڀَتِ چَئجي،
جاڳو جوشان جيڏِيُون.
ڪَري نِيازُ نِڪَڻي، واحِدَ ڏي وَرِجي،
جاڳو جوشان جيڏِيُون.
آھي موتُ مِڙِنِ تي، گوڙِيُون ڪِئو گَجي،
جاڳو جوشان جيڏِيُون.
اَجَلُ اِيندُءِ اوچتو، جو سَدا پِئو سُڄي،
جاڳو جوشان جيڏِيُون.
اڳيان اُونداھِيءَ جو، سَمَرُ ساڻُ ڪجي،
جاڳو جوشان جيڏِيُون.
کَڻُ تُون قوتُ قَبَرَ جو، گهَڻُون ٿو گهُرِجي،
جاڳو جوشان جيڏِيُون.
آگي عيبَ اواھِنجا، ڍَڪِيا ڳُجهَہ ٻُجهي،
جاڳو جوشان جيڏِيُون.
جيڪِي وَھي وُجودَ ۾، صاحِبُ سو سَمُجهي،
جاڳو جوشان جيڏِيُون.
ڊڄِي ڊاءِ ڌَڻِيَ جي، جيڪو ڀَئِيءَ ڀڄي،
جاڳو جوشان جيڏِيُون.
اَمُنُ آھي اُنَ کي، جو مَنجهِہ الله اَجهي،
جاڳو جوشان جيڏِيُون.
 

داستان پنجون

بيت - 1

مُون ٿي چَيئِي ڪاند، ڀُتي ڀاڙِ مَ مَڪُڙِي،
سِڙَھ پُراڻا پاند، لَھِريون سھي لَڳَندِيُون.

بيت - 2

لَھَرِن ليکو ناھِ ڪو، جِتِ ڪَپَرَ ڪُنَ ڪارا،
آڇارا عَمِيقَ جا، اَچَنِ اوڀارا،
اُٿِي اَسارا، وِيرِ وِڙَھنديئي، ويسِرا.

بيت - 3

وِير وِڙَھنديئي، ويسرَا، اُٿِي توھُ طَلبِ،
سائِرَ ڪَنھِن سَبَبِ، ڪالَ نہ وِڌُءِ ڪُنَ ۾.

بيت - 4

ڪالَ وِڌائِين ڪُنَ ۾، جاڏا جُنگَ جَھازَ،
تَنھن جِي اَڄُ تَرازَ، آھي آرَ اکِيُنِ ۾.

بيت - 5

آھين آرَ اَکَينِ ۾، ناکُئا ڪَج نِگاھَ،
وَڏا ٻيڙا ٻُوڙِئا، سائِرَ ڏيئي ساھَ،
مُلاحِظو مَلاح، ڪِجِ ڪو اِنَهين ڪُنَ جو.

بيت - 6

مُلاحِظو مھراڻَ جو، مُورِ مَ لاھِ مَناءُ،
سامُونڊِي سَنڀالِ ڪِي، سُمَهڻَ آيُئي ساءُ،
جاڳِي جَرَ مَٿاءُ، تاري وانءُ تَرازَ کي.

بيت - 7

تاري وانءُ تَرازَ کي، مَنجهان مَوجَ مَلاحَ،
دانھُون ڪَنِ درياھَ جون، اُونهي جا آگاھَ،
سُونھَنِ جي صَلاحَ، وَٺُ تہ وِيرِ لَنگهي وَڃِيين.

بيت - 8

سُونھان سُڌِيون ڏِينِ، ديواني درياھَ جون،
ڪُوڙَ اوڏائِي ڪِينَ ڪِي، رُڳو سَچُ سوڌينِ،
عِجِزَ جو اَڌَ راتِ کي، وَکَرُ وِھائِين،
ساٿُ سلامت نِينِ، ثابِتُ اِنهِيءَ سِيرَ مان.

بيت - 9

ثابِتُ لَنگهِئا سِيرَ، لَھرنِ لوڏئا ڪِينَ ڪِي،
وَڃي پُھتا پار کي، نِرتون مَنجهان نِيرَ،
ماڙ پَھتا مِيرَ، ٻارِ لَنگهِئون ٻاجهَہ سِين.

بيت - 10

تُون ويسَرو وِيرَ، ساٿِين سَنڀتِ پنڌَ جي،
جوڙي جُڻگ جَھازَ کي، ڪوڏَ ھَڻائِج ڪِيرَ،
وَھِي وَڻَجارَنِ جي، بَندَرَ ڏانھن بَھِيرَ،
گهَرِ تَنِين جي کيرَ، جَنِ لاڳيدارَ لنگهائِيا.

بيت - 11

قَرقَلَ ڦوٽا، پارچا، پاڻِيَٺَ پاتائون،
ڪوٺيُون قِيمَتَ سَندِيُون، تَرَ ۾ تاڪِيائُون،
بيروقون بحرن ۾، ڇوڙي ڇڏيائون،
لاڄُنِ مَنجهہ، لَطِيفُ چي، ٻيڙا ٻَڌائون،
نَذرُ نَبِيءَ ڄامَ جو، چَڙَھندي چَيائون،
جي ڇُھي ڇوڙيائُون، سي ٻيڙِيُون رَکِين ٻاجهَہ سين.

بيت - 12

قَرقل، ڦوٽا، پارچا، اَگرَ ۽ عنبير،
اِھڙو وَڻِجُ وَٺِي ڪَري، وانءُ وَڻجارا وير،
ڀُتي ڀاڙ مَ مڪڙي، اڳيان سائِرَ سُڄي سير،
گهرِ تَنين جي کِيرَ، ساٿ جَنِين جي سَچِيون.

بيت - 13

وِچينءَ جان ويھِي، جَرِ پَلَئُہ پائِيان،
”تَڙِ ٻيڙا، گهَرِ سُپِرِين“، اوسَھِ اِيءَ پيئِي،
جِئن وَڻِجارو سين وَکَرين، سَرَھا سَڀيئِي،
حُرمَتَ ساڻُ حَبِيبَ جي، سُونگِئا نہ سيئِي،
پاڻو سي پيھِي، کَنڊَ کيڙائو آئِيا.

وائي - 1

عُمرِ سَڀَ عَبَثُ ويلَ وڃايمِ، وَقتَ وِڃايَمِ پانھنجا.
ويٺي لِکئو لوڙيان، جيڪِي ڪئو مَسُ
وَقتَ وِڃايَمِ پانھنجا.
اِچِي اَڀاڳِيَن کي، راحيم اَچي رَسُ،
وَقتَ وِڃايَمِ پانھنجا.
حالُ مُنھنجو ھِھَڙو جِھِڙو، توُن پِرِيم اَچِي پَسُ،
وَقتَ وِڃايَمِ پانھنجا.
قَلبُ مون ڪارو ٿِئو، تون ڪامِلَ لاھِين ڪَسُ،
وَقتَ وِڃايَمِ پانھنجا.

داستان ڇھون

بيت - 1

تانگهي ۾ تاڻي، ٻَڌُ پَنھنجو تُرَھو،
اُونهي ۾ آڻي، ڪو نہ ڏيندُءِ ڪو ٻيو.

بيت - 2

تارو تَرِئو وَڃَنِ، ننڍا وڏا واھُڙا،
ھَيءِ! ٻَرِ اَتارُنِ، جِئن ڳَرا مَٿنِ مولِهيا.

بيت - 3

ڏوري لَھُ ڏاتارُ، جِم وِھِين ويسرو،
ھَڪيو ھوجِ ھُشِيارُ، کِوِڻِ کِوَندَئِي اوچِتي.

بيت - 4

سُتين ڪَھِڙيءَ سارَ، وِڄُ کِوندَيئي ويسَرا،
تو جيڏا تو يارَ، لَھَرِن لَھَوارا ڪِئا.

بيت - 5

سُتين سَنجهيئِي، وِڄُ کِوندَيئِي ويسَرا،
وِيرَ وَري ويئِي، اَسارنِ تان اوچِتي.

بيت - 6

کِوڻِ کِوايو، آئي نِنڊَ اَڀاڳَ جي،
جَنِين پَھُ نہ پايو، ڪَري تَوائِي تِن کي.

بيت - 7

سامُونڊِي، ٿو سَنبَھِين، ساڄو جهَلِ سُکاڻُ،
لَڳي واءُ وَڏاندَرو، مُنجهائي مھراڻُ،
جنين ڀانيو پاڻُ، ڪَري تَوائِي تِنِ کي.

بيت - 8

نَڪو سُک نَکَٽين، نہ ويساندِ نَئين،
جيڪا اَچيئِي سامُهِين، ڀانيين سا سَئين،
مُوڙيءَ ڪوھَ مَئين؟ جِئن سَڄيُون راتِيُون سمهين.

بيت - 9

اَھَکِي راھَ اَللهَ جِي، اَھَکِي اَھَکِي ڀَتِ،
ھُوءِ جي ڏھائِي ڏيھَ جا، تن پڻ مُوڙھي مَتِ،
آڇارانِ اُبَتِ، گهِڙِج گهاٽي نِينھَن سين.

بيت - 10

مَ ڪِي ھيج مَ ھوڄ، تَرِسُ مَ، تاڻِ جهَازَ کي،
چئُہ ڪَلمو مُحَمَّدَ صہ تي، تہ اڳِيان اَچَيئِي اَوڄ،
سَھُکِي ڀَتِ سَٻوجهہ، تنھن جي مَڪي ڍَڪي مَڪڙِي.

بيت - 11

تَنَ ۾ تَرازَ توھَ جِي، گهڻو لَھُ گهوري،
اَدَبَ ۽ اِخِلاق جا، سِڙھَ ٻَڌجِ سوري،
وَکَرَ وينَتِيُون جو، تَنھن ۾ پاءِ توري،
تہ عادَنِئُون اوري، تُنھنجو تَوائِي نہ ٿِئي.

بيت - 12

توڻي تَوائِي، توءِ تُنھنجو آسِرو،
سَڄڻ ڳَرِلائي، کِيرون ڏِينديسِ جيڏِيون.

بيت - 13

ويھُ تُون وساري، ڇنڊا جي ڇُلڻ جا،
جو لَکَ لَھِرِيون ڏي، ڪَرِ ساڃاھَ سَمُونڊ جي.

بيت - 14

سوداگر سَمونڊَ جا، لاڄُو لالَ وَٽيجِ،
اَڇا اولا عاجَ جا، چڱا چِٽائيج،
سِڙھَ سِبي سقلات جا، کوھا خُوبُ کَڻيج،
سَتُ سُکان سَرِ ڪَري، ڇَھ ڇڄهريون اَڏيج،
ٻارَھَن، تيرَھَن، پَندِرَھَن، سَترَھَن سينگاريجِ،
ساري سيٽَ سَيّدُ چئي، پورِي پُڄائيجِ،
مُلان مَعلمَ خبرون، پُڇِي پروڙيج،
”وَسَقاھُم رَبُّھُم شراباً طَھُورا“ پاڻِي پاڪ پئيج،
لُڙَ ۾ ڪِيم لُڏيجِ، تہ سُتَڙِ سامونڊِي ٿِئين.

وائي - 1

ھي جي، ھُو جي لَڪَ، مون مارِيندا لَڪَ،
مون مارِيندا لَڪَ.
يا والِي! ڪِيج مَ اوڏي ڇَڪَ،
مون مارِيندا لَڪَ.
اَنتُ نہ ڏِجي عام کي، لوڪان ڪِجي لِڪُ،
مون مارِيندا لَڪَ.
پاڻيءَ جان پارِيُون ڪَري، نينھن وَھائِجي نِڪَ،
مون مارِيندا لَڪَ.

سر سامونڊي

داستان پھريون

بيت - 1

پَڳَھَ پاسي گهارِ، آيَلِ سامُونڊيُن جي،
وجِهي جِيءُ جَنجارِ، جِمَ وَڃَنِئِي اوهِرِي.

بيت - 2

پَڳَهَہ پاسي پَچُ، آيَلِ سامُونڊين جي،
مَنَ ۾ ٻاري مَچُ، جِمَ وَڃَنِئِي اوهرِي.

بيت - 3

پَڳَھَ پاسي ويھُ، آيَلِ سامُونڊينُ جي،
تون ويسرِي وِکَ کَڻِين، ھو پُورِيندا پَرَڏيھُ،
سَمُنڊُ جن ساڙيھُ، ڪوھُ نہ ويئيَن تَنِ سين.

بيت - 4

جان اچِين تان آءُ، ھَڻي ھَٿُ پَڳَھ ۾،
لَڳي واءُ سَواءُ، سِڙھُ سانباھِي نہ سَھي.

بيت - 5

نَنگرُ جان نہ کَڻَنِ، وانءُ وَھِلِي نِڪري،
مَڇُڻ ڏيھِ وَڃَنِ، ناڙِيُون پُوري ناکُئا.

بيت - 6

ننگرَ ۽ ناتاريُون، پَڳَھَ کَڻِي پَنڌِ ٿئا،
بَندرَ بازارِيُون، سُڃا سامُونڊِيَنِ رِي.

بيت - 7

نَنگرِئُون نيڻين، مَنُ اولِي نہ اوھِري،
سَٻاجهي سيڻين، پائي ڳُڻَ ڳھِيو ھِيون.

بيت - 8

سيئِي جوڀَنِ ڏِينھَن، جَڏَھِن سَڄَڻ سَفَرِ ھَلئا،
رُئان رَھَنِ نہ سُپرِين، آيَلِ ڪَريان ڪِيئن،
مُونکي چاڙھي چِيئَن، وِئو وَڻِجارو اوھِري.

بيت - 9

نہ سي تڙِ ھوڙاڪَ، نہ وايُون وَڻِجارَنِ جُون،
سَرتِيُون سامُونڊين جا، اڄُ پڻ چِڪِيَمِ چاڪَ،
مارِينم فِراقَ، پاڙيچون پِريَنِ جي.

بيت - 10

وِئا اوھَرِي او، مُون کي ڇڏي ماڳَھِين،
جُڳَنِ جا جُڳَ ٿئا، تِئان نہ موٽئو ڪو،
گُوندَرُ ماريندوءِ، ويچارِيءَ وِيَنِ جو.

بيت - 11

اُونهِي ۾ اوھِرِي، جَڏھِن جي وئا،
سانداري سَمُونڊَ جِي، نِھوڙي نِئا،
وَڃِي تِتِ پِئا، جِتِ نِھايَتَ ناھِ ڪا.

بيت - 12

اُونهي ۾ اوھَرِي، جَڏَھن وئا جي،
موٽِي ماڳِ نہ موٽئا، ماءِ سامُونڊِي سي،
کارو تنين کي، جيڪُسِ وَھُ ورِي وئو.

بيت - 13

اُونهين وِئا نہ وَرِئا، آئون تَنھِن مارِي ويڻَ،
ڪَري سامُونڊِي سيڻَ، جُسي جارُ پِرائِيو.

بيت - 14

جي وِيڙَمِ اَڄُ، سي ڪَڏھِن ايندا مُون گهَرِين؟
پِريان جي ھُنَ پارَ ڏي، وَڃِي دَونڪِي ڌَڄُ،
سامُونڊِيڪو ڏَجهُہ، ماءِ مارِيندم ڪَڏَھِين.

بيت - 15

اُھَرِيا جِئائِين، ڍُڪَنِ تَنِ تَڙن تي،
سامُونڊينِ سائِين! واءُ سَڻائو وارِيين.

بيت - 16

سامُونڊِي ساري، مَٿي تَڙَ گُذارِيان،
مُون کي ٿِي ماري، اُنين سَندِي ڳالهَڙِي.

بيت - 17

سامُونڊِي ساري، ماءِ مُنھِنجو جِندَڙو،
بَندَرِ ويچارِي، وَڃِي لايا ڏِينھَنڙا!.

بيت - 18

سامُونڊِيڪو سَڱُ، آھي گندَرَ گاڏُئون،
انگنِ چاڙھي اَڱُ، وئو وَڻِجارو اوھَرِي.

بيت - 19

وڃيئِي وِسرِي شال، جو تون سودو سِکِئين،
اَڃان آئين ڪالَ، پڻ ٿو سَفَرِ سَنبھِين.

بيت - 20

ڳِرِئو جهَلئو روءِ، مَٿي مُھِري ھَٿَڙا،
کوءِ سودو سَندوءِ، جو تون ڍولئا سِکئين.

بيت - 21

اُلوڙَڻُ نہ ڏِئي، وَرُ وِڌائين وَنجهَہ کي،
رَھُ اَڄوڪِي راتِڙِي، لالَنَ! مُون لائي،
وَڃُ مَ ڦوڙائي، ايڏي سَفَرِ سُپرِين.

بيت - 22

جيڪُسِ نِٻَرُ نِينھُن سَندومِ، جئَن مون اُڀي ھُن ٿيلهِئو،
سعيو سامُونڊِين سين، اڳھِين تان نہ ڪِئوم،
وِجهَڻُ مَنجهہ ھُئومِ، پاڻُ وراڪي رَسِ سين.

بيت - 23

ٻيڙِيءَ جي ڀُوڻَنِ، نِينھُن نہ ڪَجي تِن سين،
اُڀيُون ڏَنڀَ ڏِسَنِ، جي سِڙھ چاڙھي سِيرَ ٿئا.

بيت - 24

ھِننڙو ٻيڙِيءَ جان، ڏُتَڙِ پي ڏينھن ٿئا،
پُڇئو تان نہ پِريان، ڪَرَلاھُو ٿِي ڪڏھين.

بيت - 25

تَنَ جنِين جي تانگهہ، سي سَڄَڻ سَفرِ ھَلئا،
لَئِجِ لاتِ لَطِيف چِي، تہ ڪَڏَھِن اِيندَم ڪانگَ،
ڪَنھِن سٽاڻي سانگَ، پِرينِ پَرڏيھِي ٿئا.

بيت - 26

تُون ڪِي لَئِجِ ڪانگَ، ڪَڏھِن اِيندا مانَ گهرين؟
سيڻَنِ ڪارَڻِ سانگَ، مُون تان گهڻيئي ڪِئا.

بيت - 27

سَرَن سِرِيا پاندَ، اُتَرَ لڳا، آءُ پِرِين!
مُون تو ڪارَڻَ ڪاندَ، سَھَسين سُکائُون ڪِيون.

بيت - 28

سَرَ، لوھِيڙا ڳَڀِئا، ڪُسَرَ نِسِريا،
تو ڪِيئن وِسرِيا، ڍولِئا ڏينھَن اَچَڻَ جا.

بيت - 29

جيڪر اي ھاڻِ، ڪريان رُوحَ رَچندِيُون،
آيَلِ! ڍولِئي ساڻِ، ھوندَ ڳَرِ لڳِي ڳالهيون ڪَريان.

بيت - 30

آيَلِ ڍولِئي سان، اَچي تہ جهيڙِيان،
لايَئِي ڏِينھن گهڻان، مون سين ڪَيَئي ٿورِڙا.

بيت - 31

ڍولِئو وِئو ڍورِ، ٿِي ڏُکيا ڏِينھن گذاريان،
مادرِ مُون مَ چورِ، نا تہ پَڌَرِ پَوندِي پِرينءَ رِي.

بيت - 32

لاھِيندائي ڪَنِ، ڳالهيُون ھَلَڻَ سَندِيُون،
ڏِيندا مُون ڏُکَنِ، وَھِ وِجهندا جِندڙو.

بيت - 33

مون کي جِياريو، پِرِيَنِ جي ڳالهہ ڪري،
ڊَٺو اَڄُ اَڏِيو، ھِنيڙو ڪوٽَ بُرجَ جئن.

بيت - 34

وَؤن وَڃي وانئُٺ، ھِنيڙا ماڳ پِرين جو،
چُمِئو چُم چانئُٺِ، ھوءِ جا سَندِي سَڄڻين.

بيت - 35

آئون جَنِ آسارِي، مَٿي تَڙَ گُذارِيان،
مون کي وِساري، شالَ مَ وَڃن اوھري.

بيت - 36

سَنهي لَڪ، نَڪَ سَئن، ڪَجَلَ ڀِنَنِ نيڻَ،
سامُونڊِي مون سيڻ، ڪِ تو ڪالهَہ لَنگهائيا.

بيت - 37

ھي سَڄَڻَ سيھي، جي مُون ڪوڏَ نِھارِئا،
اِيندم جان پيھِي، تہ سَڀِ لاھِيندمِ ڏُکڙا.

بيت - 38

چمڪيون چوڌارَ، ڌَڄُون ڌاڙيچنِ جون،
ماءِ! سامُونڊِي آئيا، سَھسين ڪَري سِنگارَ،
اُنِين جي پَچارَ، ڪالهونڪَرَ ڪانگُ ڪَري.

وائي - 1

پِرِينَ جي پَنڌاءُ، مون کي جي جهَلِيندِيُون،
سي نہ پُڄَندِيُون.
ڀَلِي ڪري آئِيو، ٺاٺارو ڏيھاءُ،
سي نہ پُڄَندِيُون.
ڀَڳِي ڪُٽِ سَڄِي ٿِي، لَٿِي جا ڪِ گهراءُ،
سي نہ پُڄَندِيُون.
سَرَتِينِ سُورَ پِرائِيا، ھاڻي ھِنَ ھَنڌاءُ،
سي نہ پُڄَندِيُون.
تان ڪِي واسُ، وِھائِيو، ٻاروچي مُلاءُ،
سي نہ پُڄَندِيُون.
مَتِيُون موٽَڻَ سَندِيُون، تون ھَڏِ آڇِ مَ ماءُ،
سي نہ پُڄَندِيُون.
تان ڪي ڏُونگَرَ ڏوريان، جان ڪِي سيني اندرِ ساءُ،
سي نہ پُڄَندِيُون.

وائي - 2

تَڙِ نِھارِيان تي، مُنھنجا بَندَرِ وِئَڙا جي،
مانَ سِڙَھ سُڃاڻان سَڄَڻين.
اُڀِي اوسَھِ پائِيان، ڪارَڻِ وَڻِجاري،
مانَ سِڙَھ سُڃاڻان سَڄَڻين.
گهڻُون اُڪَنڍِي آھيان، پِرِينءَ پنھنجي کي،
مانَ سِڙَھ سُڃاڻان سَڄَڻين.
آسائتِي آھِيان، الا! ڪانڌُ اَچي،
مانَ سِڙَھ سُڃاڻان سَڄَڻين.

وائي - 3

آيلِ ڪَرِيان ڪِيئن، مُنھِنجو نِينھُن اَپَلِئو نَہ رَهٖي.
وِيو وَڻِجارو اوھَرِي، مُون کي چاڙهٖي چيئَن ،
مُنھِنجو نِينھُن اَپَلِئو نَہ رَهٖي.
سامُونڊِيَنِ جي سَڱَ کي، رُئان راتو ڏينھن،
مُنھِنجو نِينھُن اَپَلِئو نَہ رَهٖي.
اُڏوھِيءَ جان ڏُکَڙا، چَڙِهئا چوٽِيءَ سِيئَن،
مُنھِنجو نِينھُن اَپَلِئو نَہ رَهٖي.
گوندر مَٿاءِ جندُڙي وَرِيا وَلِيُنِ جيئن،
مُنھِنجو نِينھُن اَپَلِئو نَہ رَهٖي.
مادَرِ پائي مُنڊِيُون، وَڃان ھادِيءَ سِيئَن،
مُنھِنجو نِينھُن اَپَلِئو نَہ رَهٖي.

داستان ٻيو

بيت - 1

اَڄُ پڻ وايُون ڪَنِ، وَڻِجارا وَڃَڻَ جُون،
اَٺَئِي پَھَرَ اَٿَنِ، سَعيو ڪَنھِن سَفَرَ جو.

بيت - 2

اَڄُ پُڻُ وايُون ڪَنِ، وَڻِجارا وَڃَڻَ جُون،
مُون اُڀيئِي ھَلِئا، بَندَرَ جَنِ تَڙَنِ،
سَرتِيُون! سُورُ سَندنِ، مُون مارِيندو جندَڙي.

بيت - 3

اَڄُ پُڻُ وايُون ڪَنِ، وَڻِجارا وَڃَڻَ جُون،
ھَلڻَ ھارا سُپرِين، رُئان تان نہ رَھَنِ،
آئون جهَلِيندي ڪيترو، آيَلَ سامُونڊِين،
پَڳھَ ڇوڙي جَنِ، وِڌا ٻيڙا ٻارِ ۾.

بيت - 4

لاھِيان جي نہ چِتاءُ، الا! اُنِ مَ وِسران،
مَڙِھئو مَنجهاراءُ، جِيءُ مُنھنجو جَنِ سين.

بيت - 5

چِتان جي نہ چُرَنِ، الا، اُنِ مَ وِسران،
مُون مَنُ آھي تَنِ، مَڙھِئو مَنجهارا ھِيين.

بيت - 6

تَڙين تَنوارِينِ، ماءِ! سامُونڊِي آئِيا،
مون کي جِئارِينِ، وايُون وَڻِجارَنِ جون.

بيت - 7

اولا کَڻِي اُوءِ، پَڳھَ، ڇوڙي پَنڌِ ٿِئا،
آيَلِ سامُونڊِينِ جي، آھِ اَڙانگِي جُوءِ،
ڪَڏھِن ڏسنديس رُوءِ، وَرِي اِنَ اَکِينِ سِين.

بيت - 8

لَڳِي اُتَرَ ھِيرَ، سامُونڊِين سِڙَھ سَنباھِئا،
نَنگرَ کَڻِي ناکُئا، ٿِئا سَڻاوا سِيرَ،
ھِنيڙي نِتُ اُڪِيرَ، کارِي کِيڙائُنِ جي.

بيت - 9

لَڳي اُتَرَ اُھَرِئا، واھندي وَرَنِ،
آئُون گهڻو ئِي گهورِيان، سودو سامُونڊِيَنِ،
اَڱڻِ جن اَچَنِ، عِيدَ وَرتِي اُنِ کي.

بيت - 10

اڱڻِ آئِيا جان، تہ سَرَتِيُون مون سُکَ ٿئا،
اَمُلَ پِرِينءَ مٿان، ٻَرڪِيو ٻئَنِ ڏِيان.

بيت - 11

آئِي اُتَر مُندَ، ھِينئين اُڊَڪو نہ لَھي،
وَٽِينِ لاڄوبَندَ، ٻيھَرَ مَکِينِ ٻيڙِيُون.

بيت - 12

لاڄو ٿا لَنوَنِ اَچَنِ سِڙَھ اُپِٽِئا،
ڪارَڻِ تَنِ پِريَنِ، ويٺِي واٽَ نِھارِيان.

بيت - 13

سِڙَھ سُڃاڻئو چُوءِ، ماءِ! سامُونڊِي آئِيا،
مانَ مُنھنجو ھُوءِ، جانِي ھِنَ جَھازَ ۾.

بيت - 14

سِڙھَ ٿي سِبيائُون، بَندَرَ جَن تَڙنِ تي،
سِڙھَ سِبِي ساڄا ڪري، کُوھا کَنيائُون،
بيرَقُون بحرنِ ۾، ڇوڙي ڇَڏيائُون،
لَھريُون لَنگهيائُون، لُطف ساڻُ لَطِيفُ چَئي.

بيت - 15

سِڙھَ ٿي سِبيائُون، بَندَرَ جَنِ تَڙَنِ تي،
مُلا معلِمَ خبرون، پُڇِي پُوريائُون،
سُتَڙ سوٺِيائُون، اَوَتَڙِ ڪنھن نہ اولِيا.

بيت - 16

بَندَرَ ديسان ديسِ، مُلهہ نہ مِلي وارِيين،
فَقِيراڻي ويسِ، اَمُلَ ڏِيَنِ اَتوريا.

بيت - 17

پَتڻَ پوءِ پَچارَ، آن ڪِي سِڙھَ ويندا گَڏِئا؟
اُڪَنڊَ مُون اَپار، شال مُنھنجا موٽِيا.

بيت - 18

اُڀيُون تَڙَ پُوڄِينِ، وَھُون وَڻجارنِ جون،
آڻئو اکا ڏِينِ، کَٿُورِي، سمُونڊ کي.

بيت - 19

جَنِين ڪارَڻَ مُون، ٿي تَڙَ پُوڄارا پُوڄِئا،
پُنِيمِ اُميدُون سيئِي سَڄڻَ آئِيا.

بيت - 20

وانئٽيون ٿِيُون وَرَڪَنِ، اَڃا سِڙھَ نہ پَڌِرا،
سيئِي ٿِيُون مُرڪَنِ، جَنِين سَندا آئِيا.

بيت - 21

کُوھَنِ سِرِ وانئُٽِيون، وانئٽِين سِرِ ڳَنڊَ،
کيڙي کيڙي کَنڊ، ماءِ! سامُونڊِي آئِيا.

بيت - 22

جَرِ ٿَرِ ڏِيا ڏي، وَڻِ ٽِڻِ ٻَڌي وانئُٽِيُون،
الا! ڪانڌُ اچي، آسائتِي آھِيان.

بيت - 23

جا جَرِ جاٽون نہ ڏِئي، ڏِيا نہ موھي،
سَڌُون ڪوھُ ڪَري، سا پنھنجي ڪانڌَ جون.

وائي - 1

اَئين مون کي زورِ مَ جهَلئو جيڏِيُون.
وو آئون ھَلَندِي ھوتَ ڏي.
اُونهي وِئَڙا اوھَري، ترازُو تاري،
وو آئون ھَلَندِي ھوتَ ڏي.
مَرِي رَھندِيَسِ ماڳَھين، سامُونڊِي ساري،
وو آئون ھَلَندِي ھوتَ ڏي.
سُورُ تُھِن جو سُپِرِين، مون مَعذُورِ کي ماري،
وو آئون ھَلَندِي ھوتَ ڏي.
ھاڻِ نہ جِيان جيڏِيُون، آئون ڪُٺِيَسِ ڪوھياري،
وو آئون ھَلَندِي ھوتَ ڏي.

وائي - 2

ڪَرَھَلَ پائي لَڄُ، ڪُھُ نہ ويئيئَن، اُنِ سين؟
اُجارِيائُون اوليُون، ڌُئاريائون ڌَڄُ،
ڪُھُ نہ ويئيئَن، اُنِ سين؟
مَتان وِھين، ويسَرِي، اُٿِي ڀُورلَ ڀَڄُ،
ڪُھُ نہ ويئيئَن، اُنِ سين؟
سيڻنِ ساجهُرُ لَڏِئو، تون ھاري! نھارين اَڄُ،
ڪُھُ نہ ويئيئَن، اُنِ سين؟
ڪالهَہ سِبايُئِي ڪَنرو، اَنگُين پاتَئي اَڄُ،
ڪُھُ نہ ويئيئَن، اُنِ سين؟
ڪيرُ سُڻيندو تنھنجون، اَدُورائُون اَڄُ،
ڪُھُ نہ ويئيئَن، اُنِ سين؟

وائي - 3

ويندي آئُون ھوتَنِ وَٽِ، مون وَھُ وَڻِجارَنِ سان.
پَڳَھُ کَڻُ مَ، پاتِڻِي! جانِي مون لَئي جَٽِ،
مون وَھُ وَڻِجارَنِ سين.
وايُون وَڻِجارَنِ جون، اَدِيُون اَڄُ نہ اَرَٽِ،
مون وَھُ وَڻِجارَنِ سين.
ڳَرَھِيان سُورُ سَفَرَ جو، ھَلِي پنھنجي ھَٽِ،
مون وَھُ وَڻِجارَنِ سين.
پُوريندِيَسِ پِرِيَنِ ڏي، ڪانہ ڪَرِينديَسِ گهَٽِ،
مون وَھُ وَڻِجارَنِ سين.
ڏيئِي سِڙَھ سِيرَ ٿِئا، پيرُ نہ لايَئُون پَٽِ،
مون وَھُ وَڻِجارَنِ سين.

داستان ٽيون

بيت - 1

پُران، مانَ پُڄان، بَندَرَ مون ڏُورِ ٿِئا،
نہ مُون ھَڙِ نہ ھَنجَ ڪِي، جو آئُون چَئِي چَڙھان،
اِيھين ڪَجِ، پاتِڻِي! جنھن پَرِ پِرِين مِڙان،
ڪارُون ٿي ڪَريان، تو دَرِ اُڀِي ناکُئا.

بيت - 2

ھَڙَ ۾ ڪِينَ ھُئونِ، ھُونھئين ھُنِ نہ چاڙھئا،
سارو ڏِينھُن سمونڊَ تي، لھِي سِجُ وِئونِ،
جڏھن سائينءَ سَببُ ڪِئونِ، تڏھن سُتَڙِ ٿئا سَيَّدُ چئي.

بيت - 3

اسان اُڌارا، آڻي آوَنگَ چاڙھئا،
مُنھن ڏيئِي مُون آئِيا، سَمُھان سِيارا،
اُڀِرَنِ سيڪارا، پَسئو وَرَ ٻين جا.

بيت - 4

مون اُڀي تَڙَ وٽِ، پِريَنِ پَڳھَ ڇوڙِئا،
ڪا مُنھِين ۾ گهٽِ، نا تہ سَڄَڻَ سَٻاجها گهڻون.

بيت - 5

مون اُڀي تَڙَ ھيٺِ، پِريُنِ پَڳھَ ڇوڙِئا،
ڪا مُنھين ۾ ڏيٺِ، نا تہ سَڄَڻَ سَٻاجها گهَڻون.

بيت - 6

مون اُڀي تَڙَ جهلَ، پِريَنِ پَڳھَ ڇوڙِئا،
ڪا مُنھين ۾ اَلَ، نا تہ سَڄڻَ سَٻاجها گهڻون.

بيت - 7

مون اُڀي تَڙ پاسِ، پِريَنِ پَڳھَ ڇوڙِئا،
ھو الله ھارَ اُھِرِئا، آئون دَمِ دَمِ دُعا ڪَندياس،
آسا نہ لاھِيندِ پياس، موٽِي ايندا مون گهرين.

بيت - 8

کيڙائُنِ کارو، سَنجهي ئي سارئو،
آيَلِ! اُمارو، آھِين پَريين پار جو.

بيت - 9

کاري کيڙائُو، مَٿي مِٺي موٽئا،
سودو ڪَنِ نہ سونَ جو، وَڏا وِھائُو،
موتِي جي مِھراڻَ جا، تَنِ جا طاماعُو،
سامُونڊِي سائُو، لَنڪا لوپي آئِيا.

بيت - 10

لَنڪا لَنڪا ڪَنِ، لَئي لَنڪا جي اوھَرِئا،
سُڻِي سونُ لَنڪا جو، سُکُ نہ سامُونڊيَنِ،
پِرِھَ پَڳَھَ ڇوڙِئا، کاري کيڙائُنِ،
وڏي ڀاڳ ڀِڙنِ، جي ڪَھيا ڪارُونڀار ڏي.

بيت - 11

وَڻجارنِ وَرِي، پِرِھَ پَڳھَ ڇوڙِئا،
اولِيُون ڏسِي اُنِ جون، پِئَڙَمِ ڳَچَ ڳَرِي،
وينديسِ، ماءِ مَرِي، ساري سامُونڊينِ کي.

بيت - 12

وَڻجارنِ ورِي، پِرِھَ پَڳَھَ ڇوڙِئا،
کيڙائو کاري، سنڀوڙا سيّد چئي.

بيت - 13

وَڻجاري جِي ماءِ! وَڻجارو نہ پَليين،
آيو ٻارھين ماھِ، پڻ ٿو سَفَرَ سَنبھي.

بيت - 14

وَڻجاري ڪانڌاءُ! مُون وَرُ ويٺي گهارِئو!
لَڳي اُتَرَ واءو، ڍولِئو ھَلڻَ جون ڪري.

بيت - 15

جان وَڻجارو ڪانڌُ، تہ مُون ھَڏِ مَ لائون لَڌيُون!
پَرڏيھَ مٿي سانگُ، اَٺئِي پَھرَ جنھن ڪئو.

بيت - 16

پَرَڏيھِ پُورِيائُون، سامونڊِينِ سِڙَھ سَنباھِيا،
مون تَنُ مارِيائُون، پاڻان وِجهِي گوندَرِين.

بيت - 17

ڏِٺِي ڏياري، سامُونڊيَنِ سِڙهَ سَنباھِئا،
وِجِهئو وَرُ ونجَهہ کي، روئي وَڻجارِي،
مارِيندَءِ، مارِي، پِرِهَ سُورَ پِريَنِ جا.

بيت - 18

ڏٺِي ڏِياري، سامُونڊيَنِ سِڙھَ سَنباھِئا،
اُنَ کي مُندَ اُتَرَ جِي، اوچِتي آئِي،
وَڻِجارَنِ وائي، آھي پرئِين پارَ جي.

بيت - 19

ٿي ڏياري ڏيٺ، ڍوليو ھَلڻ جي ڪري،
مَکيو پنھنجي مڪڙي، چيٺي چڱيءَ چيٺ،
رُئان رَھنِ نہ سُپرين، جانڪين جهَليان بيٺ،
مُن سِين ڪَري ميٺ، سَڄَڻ سَفرِ ھليا.

وائي - 1

اَئِين اَچِي پَسو، جيڏِيُون! ھِي جو وَھُ مُنھنجي جندُڙي،
پائي وِئَڙا پيرَ ۾، مَنجهان کَرِسَ کَسو،
ھِي جو وَھُ منھنجي جندُڙي.
ڏيئِي وِئَڙا ڏاھِ کي، سُورَنِ جو سَرِسو،
ھِي جو وَھُ منھنجي جندُڙي.
آئون ڏوريندِي اُنِ کي، ڏيئي تَنَ تَسو،
ھِي جو وَھُ منھنجي جندُڙي.
ساءُ اَٿَوَ سُورَ جو، ھاڻي ٿِيُون ھَسُو،
ھِي جو وَھُ منھنجي جندُڙي.
مَتان وِھو ويسَرِيُون، رِڙھو تان رَسو،
ھِي جو وَھُ منھنجي جندُڙي.
مُندائِتي مِينھَن جِيئَن، ويروتان وَسو،
ھِي جو وَھُ منھنجي جندُڙي.

سر سُھڻي

داستان پھريون

بيت - 1

وَھُ تِکَ، واھُڙَ تِکَ. جِت نِينھُن، تِکَ نرالِي،
جن کي عِشقُ عَمِيقَ جو، سي خِلوَتَ خِيالِي،
وارِيين سي والِي، ھنيڙو جِنين ھَٿِ ڪئو.

بيت - 2

اَنڌِي وَڃُون ڪَنڌِي وَڃُون، تَنگِئا لَهي نَہ تِکَ،
صُورَتَ جا سَاھَڙَ جي، ڏيلَ پَنهنجِي ڏِکَ،
واھڙَ تَنِين وِکَ، جَنِ سانڀارا سُپِرين.

بيت - 3

واھُڙَ وَھَنِ نَوان، اَڃان وَھُہ اَڳي ٿئو،
گَهرِ ويٺي گَهڻا ڪريو، سَرَتِيُون سَڱَ سَنوان،
صُورَتَ جا ساھَڙَ جِي، سا جي ڏٺِي آن،
ھُندَ نَہ پَلئو مان، گِهڙو سڀ گَهڙا کڻِي.

بيت - 4

جيڏِيُون ڏِٺِيان جي، صُورَتَ ساھَڙَ ڄامَ جِي،
سُک ٿي سُتِيُون ڪِينَ ڪِي، ڪانڌَنِ پاسي ڪِي،
مُنهائي اَڳي، گِهڙو سَڀُ گهڙا کَڻِي.

بيت - 5

ڏِٺِي جَنِ ھيڪارَ، صُورَتَ ساھَڙَ جِي،
سُکِ ٿي سُتِيُون ڪِينَ ڪِي، ڀِري ساڻُ ڀَتارَ،
گِهڙِيُون گهڙَنئون ڌارَ، ڪاھِيو پيون ڪُنَ ۾.

بيت - 6

ساھَڙُ مُون جِيئَن سَرتِيُون، جي ڏِسو سَڀيئي،
تَہ سُمهون ڪِينَ سُکِ ٿِي، وَرَ پاسو ڏيئِي،
مُنهان اڳيئِي، گهِڙو سَڀ گهڙا کَڻِي،

بيت - 7

جيڪِي ڏِٺو مان، سو جي ڏِٺو جيڏيين،
گهرَ وَرَنِ سان، ھُند گهڻِن گهوري ڇَڏِئا.

بيت - 8

گهڙَنِ وارِيُون تَڙَنِ تي، گهڙَنِ گهڻيئِي،
سَڀَڪا چي، آن سُوھِڻِي، لَئي پِريان پيئِي،
صُباحَ سَڀيئِي، پَسبِيُون پاتارَ ۾.

بيت - 9

ڪَنڌِيءَ اِڀيُون ڪيتريُون، ”ساھَڙُ، ساھَڙُ“ ڪَنِ،
ڪنِين سانگو ساھَہ جو، ڪي ”گهورِيَسَ“ ڪيو گِهڙَنِ،
ساھَڙُ سَندو تَنِ، گهاگهائي گِهڙنِ جي.

بيت - 10

وَڻَنِ ويٺا ڪانگَ، وِچِين ٿِي ويلا ڪري،
گِهڙي گَهڙو ھَٿِ ڪري، سُڻي سانجِهيءَ ٻانگَ،
سيئِي ڍُونڍي سانگَ، جِتي ساھَڙُ سُپِرِين.

بيت - 11

گِهڙِي گَهڙو ھَٿِ ڪري، ٻَهُون نِهاري ٻَنگُ،
سر دم قدم يار فِدا شُد چہ بَجا شُد، وَصۡلَ اِھو ئِي وَنگُ،
رات جنِين جو رَنگُ، اللہ، سي اُڪارِيين.

بيت - 12

گِهڙِي گَهڙو ھَٿِ ڪري، ٻَهُون نِهاري ٻَنگُ،
”وَ اَمَامَنۡ خَافَ مَقَامَ رَبِّه“، اِيءُ لَنگِهيائِين لُنگُهہ،
سِڪَندِيَنِ کي، سَيّدُ چَئي، ڪِينَ جَهلِيندو جَهنگُ،
راتِ جِنِين جو رَنگُ، اللہ! سي اُڪارِئين.

بيت - 13

گهِڙي گهَڙو ھَٿِ ڪَرِي، چيلهِہ ٻَڌِي چوتو،
مُنهنجو مَنُ مهارَ کي، پَارِ وَڃِي پَهُتو،
گوتي ۾ گوتو، مونکِي مُحبَ مِهارَ جو.

بيت - 14

گِهڙِي گهَڙو ھَٿِ ڪَري، ٻوڙِيائين ٻاھُون،
ويچارِيءَ وَڏِيُون ڪِيُون، وِچ ِدَريا داھون،
موٽُ مُحِبَ پاھُون، تاڪُنِ تَڪِي آھِيان.

بيت - 15

گِهڙِي گَهڙو ھَٿِ ڪري، اِلاھِي تُهارَ،
ڄَنگهہ ڄَرڪي واتَ ۾، سِسي کي سيسارَ،
چُوڙا ٻيڙا چِڪَ ۾، لُڙَ ۾ لُڙِيَس وارَ،
لَکين چُهٽيسِ لوھڻيوُن، ٿيليوُن ٿَرنِئُون ڌارَ،
مِڙئا مَڇَ ھزارَ، ڀاڱا ٿِيندِي سُوھَڻِي.

بيت - 16

مِهہ جَنهِين جي مُون، ڏِٺو مُنهن مِهارَ جو،
آھمِ ساھَہ سَنئُون، سو ڪِيئن گهَڙو گهورِيان.

بيت - 17

گَهڙو ڀَڳو تہ گهورئو، مَرُ چُورُ ٿِئي چُوڙو،
طالِبُ الۡموليٰ مُذَڪّرُ، اِيُ ٻُڏَندَنُ ٻُوڙو،
ڪوڙِھئو ڏَمُ ڪُوڙو، مُون مهارُ مَنَ ۾.

بيت - 18

گَهڙو ڀَڳو تہ گهورئو، مَرُ ٻِيڙَ ٿِيي ٻاھِين،
طالِبُ الۡموليٰ مُذَڪّرُ، اِيُ پَرِ اَساھِين،
پُئَان مَ پاھِين، مُون مِهارُ مَنَ ۾.

بيت - 19

گَهڙو ڀَڳو تہ گهورئو، پاڻان ھو حِجابُ،
واڄَٽُ وڄي وُجُودَ ۾، رھيو رُوحَ رَبابُ،
ساھَڙَ رِي صوابُ، آئون گهڻو ئِي گهورِيان.

بيت - 20

گَهڙو ڀَڳو تہ گهورئو، تان ڪِي تَرُھِيان،
اَدَبَ اَکَڙِيَنِ کي، ڏيهاڙِيو ڏِيان،
مِهارَنِ مِيان، منکي سئُون سُنهايو پيچرو.

بيت - 21

گَهڙو ڀَڳو تہ گهورئو، آسَرَ مَ لاھيجِ،
لَا تَقۡنَطُوا مِنۡ رّحۡمَتِه اللہ، تُرھي اِنَ تَريجِ،
حَبِيباڻِي ھيجِ، پَسِين مُنهُن ميهارَ جو.

بيت - 22

گهڙو ڀَڳو، مُنڌَ مُئِي، وِئا وِسِيلا،
سازَ ڇَڏِيائِين سيرَ ۾، ھَئي رَھئا حِيلا،
سُهڻيءَ جا سِيلا، وَحدَتَ سَڀُ وِڃائِيا.

بيت - 23

گَهڙو ڀَڳو مُنڌَ مُئِي، وَسِيلا وِئا،
تِهان پوءِ سُئا، سُوھڻِيءَ سَڏَ مهارَ جا.

بيت - 24

جَڏَھِن وَسِيلَنِ، لوڙھي ڇَڏِي لُڙَ ۾،
پاراڙا پِريَنِ، تَڏَھِن پُڇي سُوھَڻي.

بيت - 25

پاڻُ مَ کَڻِجُ پاڻَ سِين، وَسِيلا وِڃاءِ،
عِشقَ ساڻ اُٺاءِ، پيرُ پِريان جي پارَ ڏي.

بيت - 26

پاڻُ مَ کَڻجِ پاڻَ سين، وَسِيلا وِسارِ،
لُڙُ لنگهائي سُوھَڻِي، پِرتِ وِجهندين پارِ،
سي تُرتُ لنگهنديُون تارِ، اُڪَنڍَ آڳَهُہ جن سين.

بيت - 27

پاڻُ مَ کَڻجِ پاڻَ سين، رِي وَسيلي وانءُ،
مَٿا سائِرَ، سُوھَڻِي، پِرتِ وٺجي پانءُ،
نينهن ڳِنندي نانءُ، وَڃُ پِريان جي پارَ ڏي.

بيت - 28

پَاڻُ مَ کَڻِجُ پاڻَ سِين، رِي وَسِيلي وَڌُ،
لالَنُ تَنِين لَڌُ، عِشقُ جَنِين جي اَڳَ ۾.

بيت - 29

پَاڻُ مَ کَڻِجُ پاڻَ سِين رِيءَ وَسِيلي وَڃُ،
ڀيلو ڀيري ڀَڃُ، اُڪَنڍ کَڻُ عَمِيقَ ڏِي.

بيت - 30

آڳَهہ عِشقَ واريين، جڏھن ڪِيا جَنِ،
تَڏھن رَسِئا تَنِ، ميهَڻا مِهارَ جا.

بيت - 31

ڪونهي آڳَهُہ اَھِڙو، جهڙِي مُحبتَ مَنِ،
اُڀِيُون اوريين پارَ ڏي، ڪوڙيُون ڪَکَ پُڇَنِ،
نَدِي تن نيڙُ ٿِي، جي رِي تُرھي تَرَنَ،
سِڪَ رَساڻي، سُوھڻِي، اَصۡلِ عاشِقَنِ،
سي جَهليُون ڪينَ ڪُنَنِ، پُڇَنِ مَرُ مهارَ کي.

بيت - 32

پُڇَنِ جي مِهارَ کي، پُڇي سي مهارَ،
تُرَھو تنين بارُ، عِشقُ جنِين کي آڪرو.

بيت - 33

عِشقُ جَنِين کي آڪرو، تُرھو مَٿي تَن،
جي ساھڙ کي سِڪَنِ، تَنِين جَرُ جنڊ ٿِئي.

بيت - 34

تُرھَو آڇِ مَ تَنِ کي، جا عِشقَ سَين آگاھُہ،
پُڇي مَسَ مَلاحُ، ساھَڙَ مَڻي سُوھڻي.

بيت - 35

سو ساھَڙُ، سُوھڻِي، سائِرُ پڻ سوئِي،
آھي نِجوئِي، ڳُجُهہ ڳُجهاندَرَ ڳالهڙِي.

وائي - 1

ڪھڙي منجِهہ حِسابَ، ھوئَڻُ منھنجو ھوت ري،
گولي ڀَڄُ گُناھَ کان، ڪونهي سُول ثَوابَ،
ھوئَڻُ منھنجو ھوت ري.
نَہ ڪِي تَفاوَتَ ۾، نَہ ڪِي مَنجِهہ رَبابَ،
ھوئَڻُ منھنجو ھوت ري.
خُدِيائِي خُوبُ ٿِيين، جُنبَئو مَنجِهہ جِنابَ،
ھوئَڻُ منھنجو ھوت ري.
سو نَہ ڪھِين شَيءِ ۾، جيڪِي مَنجِهہ تُرابَ،
ھوئَڻُ منھنجو ھوت ري.
ھوءِ جي جَرَڪِئا جَرَ تي، سي تان سَڀِ حُبابَ،
ھوئَڻُ منھنجو ھوت ري.
ھادِيءَ سين ھُنَ پارَ ڏي، رِڙهين ساڻُ رِڪابَ،
ھوئَڻُ منھنجو ھوت ري.
چَنبو وجِهي چورَ کي. آءُ ڇَڙَ عُقابَ،
ھوئَڻُ منھنجو ھوت ري.
ديدُ وِڃاءِ مَ دوستَ جو، ھَلي مَنجِهہ حِجابَ،
ھوئَڻُ منھنجو ھوت ري.
ڪَسرَتَ آھي قُربَ ۾، اِدغا ۾ اِعرابَ،
ھوئَڻُ منھنجو ھوت ري.
فنا وِجِهي فَمَ ۾، ڪَارڻِ ٿِيءُ ڪَبابَ،
ھوئَڻُ منھنجو ھوت ري.
ڏي طَھُورا تَن کي، جي سِڪا لاءِ شَرابَ،
ھوئَڻُ منھنجو ھوت ري.
مُٺيءَ ڪِيا مَرضَ ۾، جاڏا سَڀِ جَوابَ
ھوئَڻُ منھنجو ھوت ري.

داستان ٻيو

بيت - 1

ڪَرَڳَلَ ڪُوچَ ڪُنَ گهڻا، جِتِ جَرَ واڳُون جِئائِين،
پاڻُ اُڇلي آبَ ۾، وَھَہ سِرِ وِڌائِين،
لَهريُون لَنگهيائِين، لُطف ساڻ لَطِيفُ چئي.

بيت - 2

ڪَرَڳَلَ ڪوچَ ڪُنَ گهڻا، جِتِ دَڻَڪو مَنجهِہ دَرياھہ،
اَچئو اُتاھِين گهِڙي، جت سانگو ڪَري نَہ ساھَہ،
ساھڙَ جي صَلاحَ، ٻارِ لَنگهايس ٻاجهہَ سِين.

بيت - 3

دَھشَتَ دمَ دَرِياھہ ۾، جِتِ ھيبَتَ ھُلاچو،
وِرِجِيِ وِيرِنِ وِچَ ۾، ڪاڏي وِيو ڪَچو،
ساھَڙُ ڄامُ سَچو، ساڻِي ٿِيندُمِ سِيرَ ۾.

بيت - 4

دَھشَتَ دَمّ دَرياھَہ ۾، جِتِ سِٽاڻا سينسارَ،
بيحَدِ باڳُو بَحرَ ۾، ھيبَتَ ناڪ ھَزارَ،
سارِيان ڪا نہ سَرِيرَ ۾، طاقَتَ تُھان ڌارَ،
ساھَڙ ڄامَ سَتارَ، سِگهو رَسجِ سِيرَ ۾.

بيت - 5

دَھشَتَ دَمُ دَرياھَہ ۾، جَتَ ڪَڙَڪو ڪُنَ ڪَرِين،
ٻِڇَلَ ٻانڊِي ٻارِ ۾، اُتِ لَهريُون لوڏَا ڏِينِ،
سَناوَرَ ساميا، اُتِ سيڻايا نہ سنڊين،
جِتِ وِيريون واٽَ نَہ ڏِينِ، اُتِ ساھَڙَ سِيرَ لَنگهاءِ تون.

بيت - 6

دَھشَتَ دَمُ دَرياھَہ ۾، جِتِ ڪَڙڪو ڪُن ڪري،
توڏي تاڪُن وِچَ ۾، مَٿان وِير وَري،
آءُ ساھَڙَ مُنھِنجا سُپِرين، پِرتان پيرَ ڀَري،
ھادِي ھَٿ ڌَري، اونهيءَ مان اُڪارِيين.

بيت - 7

دَھشتَ دَمُ دَرِياھَہ ۾، جِتِ ڪُنَنِ جا ڪَڙڪا،
سَهي ڪِينَ سَمُونڊَ جا، ماندِي دِلِ دَڙِڪَا،
ساھَڙَ سُڻج ڪا، فَرِيادِي فقِيرَ جي.

بيت - 8

دَھشَتَ دَمُ دَرياھَہ ۾، جِتِ ڪُنَنِ جو ڪَڙڪو،
آھِمِ اُنَهِي پارَ جو، دِلِ اندرِ دَڙڪو،
ڀَڃي سِڪَ سَيّد چَئي، سِيرَ سَندو سَڙڪو،
والِي ڪِجِ وَڙُ ڪو، تہ ٻارِ لَنگهيان ٻاجهہ سين.

بيت - 9

دَھشَتَ دَمُ دَرِياھہ ۾، لُڙَ لَهِرِيُون لَسَ ليٽَ،
آڻِئو اوڀارَنِ ۾، ٻانڊِي ٻوڙي ٻيٽَ،
جِتِ چِڪَڻِ جي چَپيٽَ، اُتِ ساھَڙَ سِيرَ لَنگهاءِ تون.

بيت - 10

دَھشتَ دَمُ دَرِياھہ ۾، جِتِ تِکِيُون تَوارُون،
مُنهنجون مانَ مِهار کي، پَهُچَنِ پُڪارُون،
لَهُہ ساھَڙَ سَنڀارُون، تَہ لَهَرنِ لوڏي نَہ مَران.

بيت - 11

دَھشَتَ دَمُ دَرياھَہ ۾، جِتِ جايوُن جانارَنِ،
نَڪو سَنڌو سِيرَ جو، مَپُ نہ مَلاحَنِ،
دَرندا دَرياھَہ ۾، واڪا ڪئو وَرَنِ،
سَڄا ٻيڙا ٻارِ ۾، ھلئا ھيٺ وَڃَنِ،
پُرزو پئدا نہ ٿِئي، تَختو مَنجها تَنِ،
ڪو جو قَهرُ ڪُنَنِ ۾، وئا ڪِينَ وَرَنِ،
اُتي اَڻ تارُنِ، ساھَڙَ سِيرَ لَنگهاءِ تُون.

بيت - 12

دَھشَتَ دَمُ دَرياھَہ ۾، جَتَ ڪُنَ ڪَڙڪا ڪَنِ،
سَهسين سِيڻايا سِيرَ ۾، لُڙَھندا لَکَ وَڃَنِ،
نَہ ڪَنڌي نَہ ڪَپَرو، نَہ ڪي سَڏَ سُڄَنِ،
توڏي اُتيئي تري، جِتِ وسيلا وَڃَنِ،
اُتي اَڻ تارُنِ، ساھَڙَ سِيرَ لنگاءِ تون.

بيت - 13

دَھَشت دَمُ دَرياھَہ ۾، جِتِ لَهريُون ڪَنِ لوڙا،
سَئين اَچي سمُونڊَ ۾، ٿئا سيڻايا سوڙا،
جي تارُو ھُئا توڙا، تَنِ ھُرٻو ڀانيو ھيڪڙو.

وائي - 1

سَچا ساھَڙ مونکي تون، وَھِيا واھَرَ مون کي تون،
نيئي اولِ پِرِيان جي پارَ ڏي.
ڪُنَ جي ڪارُونڀار جا، سي آئون ڀانيان ڀُون،
نيئي اولِ پِرِيان جي پارَ ڏي.
سندو جِيَڻَ آسَرو، مَنان لاٿو مون،
نيئي اولِ پِرِيان جي پارَ ڏي.

داستان ٽيون

بيت - 1

تَڙِ تَڪَڙِ تارِ گِهڙڻُ، اِيءُ ڪاڻِيارِنِ ڪَمُ،
ڏَھَہ ڏَھَہ ڀيرا ڏِينھَن ۾، ڏي ڏوراپا ڏَمُ،
عَقُل، مَتِ، شَرَمُ، ٽيئِي نِينهَن نِهوڙِئا.

بيت - 2

گهيڙَنِ ڪَري نہ گُهورَ، تَڙُ تَڪَڙِ کان نہ لَهي،
جَنھِن کي سِڪَ ساھَڙَ جِي، پُورَنِ مَٿي پُورَ،
ڪارِيءَ راتِ ڪُنَنِ ۾، وَھَمَنِ ڪِي وَھلُورَ،
جَنھِن کي ساڻُ پِريان سُورَ، تَنھِن کي نَدِي ناھہِ نِگاھَہ ۾.

بيت - 3

جِئا گِهڙي ِتئان گهيڙُ، ڪَپَرو پُڇَنِ ڪُوڙِيُون،
ڏَمَ سين جُسو ظاھِري، مَنَ مِهارَ سين ميڙُ،
سا نَدِي ڀانئي نيڙُ، جَنھِن کي سِڪَ ساھَڙَ جِي.

بيت - 4

جِئا وَھي تِئان واٽَ، ڪَپَرو پُڇَنِ ڪوڙيُون،
جن کي سِڪَ ساھَڙَ جِي، سي گهيڙَ نہ پُڇَنِ گهاٽَ،
جن کي عِشقَ جِي اُساٽَ، سي واھُڙُ ڀائِينِ وِکَڙِي.

بيت - 5

ڪِهِہ جِهِہ گهيڙَ گِهڙِي، جئن اَوَتَڙان تَڙُ ٿِئوس،
سالمُ ويئِي سُوھڻِي، ڪينَ ڪُنن ڪِئوس،
اُھُسُ اَکَڙِيُنِ ۾، پِريان جي پِئوسِ،
حَقا حَقُ ٿِئوسِ، ھُئِي طالِبِ حَقَ جِي.

بيت - 6

ھُئِي طالِبِ حَقَ جِي، توڏِي لاڪُون توڙَ،
نہ مَلاحُ نہ مَڪُڙِي، نڪِي ٻَڌي نوڙَ،
پاڻِي پِنِيءَ ٻوڙَ، سُهڻيءِ ليکي سِيرَ ۾.

بيت - 7

توڏِي تورائِين، نِينھَن نوازِي سُوھڻِي،
ڳِچِيءَ ھارُ حَبِيبَ جو، لائِقُ لَڌائِين،
سو تَڙُ سوٺائِين، جيڏانهہ عالَمَ آسِرو.

بيت - 8

توڏِيءَ ٻِي نَہ تاتِ، مِهارُ ھُيسِ مَنَ ۾،
جُہ پُڻُ پَيسِ راتِ، ھُو ساھَڙُ ھِيءَ سُوھَڻِي.

بيت - 9

توڏِي تُھائِين جي، سي ھِتِهين ڇَڏِ حِرَصَ،
ساھَڙَ ڌاران سُوھَڻِي کوٽِيُون ڪَنِ کِرَسَ،
وَڏِي اِيءَ وِرَسَ، جِئن ڏَمَ وَٽِ ڏِينھَن گُذارِيين.

بيت - 10

توڏيءَ کي تَعظِيمَ، ٻِينِ سَڀنئا اَڳرِي،
اوڏي ٿِي اَلَفَ کي، مَن گَڏِيائِين مِيمَ،
جيلاھَہ ذَاتِ حَلِيمَ، ملي تي مِهَار کي.

بيت - 11

ساري سِکُ سَبَقُ، شرِيعَتَ سَندو، سُهڻِي،
طَرِيقَتا تِکو وَھي، حَقِيقَتَ جو حَقُ،
مَعرِفَتَ مَرَڪُ، اَصل عاشِقنِ جو.

بيت - 12

صَبرُ شاڪِرَنِ، آھي اوطاقُنِ ۾،
جي واصُل ٿِئا وِصال ۾، سي ذرو نہ ظاھِرُ ڪَنِ،
وييتَ واھَڙَ تَرَنِ، ھِينڙا جَنِ ھَڄِي وئا.

بيت - 13

پَلِ پَلِ ٿِي پَلي، ڏَمَ ڏِيهاڻي ڪيترو،
پَسي دورُ دَرِياھہ جو، وچان ڪِينَ وَلِي،
ڪارِيءَ راتِ قَريبَ ڏي، مَنجهان حُبَ ھَلِي،
نَہ ڪَنهن جهولَ جهَلِي، ھُئي سَمنَ پورِي سوھِڻِي.

بيت - 14

جهولَ نَہ جهَلي سُوھَڻِي، سائِر سَٽَ سَندِياسِ،
جهمِ ڄائِي اَھِڙِي عاجِزا، سا مَر مَرَڪي ماسِ،
پَسين جي پِئاسِ، تَہ ڪِي عِشق آڻِيين.

بيت - 15

نَڪا جهول جهَليسِ، نَہ تانگهو نَہ تارِ ڪِي،
ڏمُ ڏيهاڙي ڪيترو، پَرِ ۾ ٿو پَليسِ،
تان تان جِيءُ جَليسِ، مِلي جان نَہ ميهارَ کي.

بيت - 16

سِهَہ سِيارو، پاڻِي پارو، جِتِ جهُڙُ جهَڪَ ۽ جهولَ،
مَن اندَر مِھار جا، ھِينڙي اَچَنِ ھولَ،
جيلاھہ ٻَڌِيَسِ ٻولَ، تي اَڙانگا آر تَران.

بيت - 17

سِياري سِهَہ راتِ ۾، جاگهِڙي وَسندي مِينھَن،
ھَلو تہ پُڇُون سُوھڻِي، جا ڪَرَ ڄاڻي نِينھَن،
جنھن کي راتو ڏِينھَن، مھارو ئِي مَنَ ۾.

بيت - 18

سانوَڻَ گِهڙي سَڀَڪا، ھِيءَ سَرَھِي سِياري،
تَنُ وِڌائِين تارِ ۾، اَرواحَ جي آري،
جو مُحبَتِي ماري، تهہ ڪونهي دادُ دَرياھَہ کي.

بيت - 19

ٻانڊِي جي ٻيلي ٿِئِين، تہ حالُ ڳَرِھيان ھِيُ،
سَگهو ساعتَ نَہ ڄندَڙو، جهورِيءَ مُنھنجو جِيُ،
ساوَڻُ سِياري ڀائِيان، وِھَہ پِريان جي وِيُ،
پارِ جَنِين جو پِيُ، وَڃَڻُ واجِبُ تَنِ تي.

بيت - 20

واھُڙَ! ڀَريُون نہ پاءِ، تو پِڻ ليکو ڏيَڻُون،
سَدا ساوَڻَ ڏِينھَنڙا، اِيهم نہ ھُونداءِ،
وِھاڻِيءَ وينداءِ، اوڀَرَ اُتاھان لَهِي،

بيت - 21

واھُڙَ! وَھِين مَ شالَ، سُڪِي ٻيلاٽِيُون ٿِيين،
پَسان تُنھنجِي پيٽَ ۾، لاڻا لُوتَ، لِيارَ،
جئن تو سَڀُ ڄَمارَ، آسائِتيُون ٻوڙِيُون.

بيت - 22

ڪَڙِ ڪَڙِ ڪُنَ مَ وَڄُ، ٻانڊِي ٻوڙِمَ ٻارِ ۾،
مُون تي جا مِھار جِي، سا ڪِي ڌئان ڌَڄُ،
توءِ گِهڙيندِيَسِ اَڄُ، جي اُبَتا آرَ ڪَرِيين.

بيت - 23

اَداڙي ٻانڊِي!، توکي ڪَڙھان ڪِ پَاڻ کي؟
سُوڌِي سُڌِ سَڄَڻِين، تو ڪا تَڙَ آندِي؟
تُون پاتارِئان پانڌي، اَسان پنڌُ پِرين ڏي.

بيت - 24

مَحَبّتِي مِھارَ جُون، دِلِ اَندَرِ دُونھِيُون،
آڻئو وِجهي آرَ ۾، لُھاڻو لُوهيُون،
جي ساھَڙَ جِيون سُونھيُون، سِيرَ سِراڙو تن کي.

وائي - 1

مدت ٿي مِهارَ يارَ، ساھَڙَ سائِرَ سِيرَ ۾.
اُونها ڪُنَ، اَتانگَ تَڙَ، اولي ھَڻُ آڌارَ!
ساھَڙَ سائِرَ سِيرَ ۾.
ڏِينھَن ڏُھِلا ڏَمَ سين، آھِيان اَھئان ڌارَ،
ساھَڙَ سائِرَ سِيرَ ۾.
ٻِڇَلِ ٻانڊي ٻارِ ڪري، اَتِ اُبَتا آرَ،
ساھَڙَ سائِرَ سِيرَ ۾.
تِتي گِهڙي سھڻي، آڳَهہَ ري آڌارَ،
ساھَڙَ سائِرَ سِيرَ ۾،
ڪاري راتِ، ڪَچو گَهڙو، توڏِيءَ ڪِي توارَ،
ساھَڙَ سائِرَ سِيرَ ۾.
سَنڀُوڙو، سِيڻاھہِ سين، سِگهو رَسُ سَنگهارَ،
ساھَڙَ سائِرَ سِيرَ ۾.
اوراران آھُون ڪَرِيان، پَهُچان شالَ پَرارَ،
ساھَڙَ سائِرَ سِيرَ ۾.
سُڻِئو جھانءِ جهڄي ھيون، سانڀارا سَنڀارَ،
ساھَڙَ سائِرَ سِيرَ ۾.
آيَمِ ريلي ريءَ سين، اَللہُ تو آھار،
ساھَڙَ سائِرَ سِيرَ ۾.
تارِ تَرَندِيَسِ لُڙَ لَنگهينديَسِ، ويندِيَسِ وَٽِ وَڇارَ،
ساھَڙَ سائِرَ سِيرَ ۾.
پُورِيندِيَسِ پارِ مَڻِي، سَهَسين جي سِيارَ،
ساھَڙَ سائِرَ سِيرَ ۾.
گولِي گهاگهائي گِهڙي، جَکَنِ ٿا جانارَ،
ساھَڙَ سائِرَ سِيرَ ۾.

داستان چوٿون

بيت - 1

اَدِيُون، سڀ اَندامَ، چَڙَنِ مُنھِنجا چورِئا،
لارُنِ جا لَنوءُ لائِي، سا ڪِئين اڇِيان عامَ،
لَڳِيسِ جنهن جي لامَ، سو دِلاسا دوست مُئي.

بيت - 2

چوڌارِي چِڙا، ٻُرَنِ ٻيلايَنِ جا،
سُتي سنڀارَنِ جو، پِيُمِ ڪَنِ پَڙاءُ،
وِھَڻُ مون نَہ وَڙاءُ، سُڻِئو جھانءِ جِهڄي ھِيون.

بيت - 3

چَڙَنِ چوري آھِيان، سُکِ ٿِي سُمھَان ڪِيئَن،
سارِيان ساھڙَ ڄامَ کي، ڏَھَہ ڏَھَہ ڀير ڏيِنھَن،
مِھارُ مَرَڻَ سِيئن، نِيَرُ پاتُمِ نِينھَن جو.

بيت - 4

ڪارا ڪُن، ڪارِي تُڳِي، جت ڪارِيهَرَ ڪَڙڪا،
مَئي مَتي مِهراڻَ ۾، اَچنِ دُوپارا دَڙڪا،
ويندي ساھَڙَ سامُھان، جهولَ ڏِنسِ جَهڙڪا،
کَرڪِنِ جاکَڙ ڪا، سُنهان ٿِيَڙَسِ سِيرَ ۾.

بيت - 5

کَرِڪِنِ خوشِ ڪِئاسِ، مُحَبَتِي مھارَ جي،
پَسَڻَ ڪارَڻ پِرِينءِ جي، آڌِيءَ ٿِي اُٿيياسِ،
سُتي جاڳاياسِ، سانڀَرِ سُپيريَنِ جي.

بيت - 6

جِياريَسِ سَنڀارَ، ڪوھُہ ڪَرِيندَمِ گڏجِي،
ويرو تارَ وُجُودَ ۾، پِرِيُنِ جي پَچارَ،
سي ڪيئن سَڄَڻَ ڌارَ، جي ھِينئڙي ۾ حَلُ ٿِيا؟

بيت - 7

ٻيلي پاس ٻُرِي، مون کي چَڙَنِ چورِئو،
محَبَتِي مھارَ جِي، سُتِي شاخَ چُرِي،
مَٿي جهوڪَ جُهرِي، پُندِيَسِ پاريچَنِ جي.

بيت - 8

ھُنَ ڀَرِ سُيَمِ ھُوءِ، سُتي سَنڀارَنِ جِي،
چِتُ چَڙَنِ چورِيئو، جَهنگُ ٿِيَڙُمِ جُوءِ،
محَبَتِي مھارَ جِي، بِاللہِ پييَمِ بُوءِ،
وڃِي رُوبَرُوءِ، ديکيان دوستَ مهارَ کي.

بيت - 9

ھُنَ ڀَرِ سُيَمِ ھاڪَ، سُتي سَنڀارَنِ جِي،
محبَتِي مِھَار جِي، چَڙَنِ چورئا چَاڪَ،
اُني جِي اوطاقَ، وَڃَڻُ واجِبُ مُون ٿئو.

بيت - 10

ڪيڏاھہ اُٿي ويئِيُون، ڪيڏاھہ گهنڊُ گڙَنِ،
اوڏَاھہ ٿِيُون چَرَنِ، جيڏاھہ پُٺِ مهارَ جِي.

بيت - 11

ڪيٿي ٿِيئو مھارُ، ڪيٿي ٿو گِهنڊُ گُڙي،
ڪيٿي دُونهِي دوستَ جِي، ڪيٿي پَرِيون پارُ،
جَيئن مُون سَڀِ ڄَمارَ، جَرَ ۾ جهوتون ڏِنِيُون.

بيت - 12

وَڇنِ سِين وِيٺِي، سورَ وِياڇي سوھڻي،
آن ڪا ٿِي ڏيٺي، مينھِنِ جي مِھَار سِين؟

بيت - 13

پُڃئو پِنگهنِ پاندَ، ويٺِي رُوءِ وَڇِنِ سِين،
ڪُهِہ ڪَرِينديسِ ڪاند، گهَر ڀَڳو تان گهورِئو.

بيت - 14

ڳِچِيءَ پايو ٻانھنَ، ويٺي رُوءِ وَڇُنِ سِين،
لايان لالَ لِڱَنِ کي، ائين جي چَرو ڪانھَن،
آئون اَوان جِي دانھَن، سَدا ڀُڻان سَنري.

بيت - 15

ٻيلِئان جِتِ ڀَڳِيُون، آيُون اُتِ وَرِي،
ڪَانِهہِ ٻِي ڳَرِي، مينھنِ کي مِھار ري.

بيت - 16

مھاران مِرِڪَ، پِيتائِين پِريمَ جي،
تنھن مُنڌَ مَتوالِي ڪئي، سندِيءَ ساءَ سُرِڪَ،
لَڳِيَس ڪاَم ڪِرِڪَ، لوھا تکِي لَطِيفُ چئي.

بيت - 17

مِھاران مَھِي، پِيتائِين پِريمَ جِي،
اُرِڪَ سُرِڪَ سَيّدُ چَئي، لَڳِيسِ ڏوتُ ڏَھِي،
سَگهي تان سَهِي، مِلي جان نَہ مِهارَ کي.

بيت - 18

مَري تان مَ مهارُ، وَٿاڻُ وِلَهو مَ ٿِئي،
وَڇُنِ جي وَڇارَ جو، وِنگو ٿِئي مَ وارُ،
ساھَڙُ مُون سِينگارُ، ماڻُهنِ ليکي ميھڻون،

بيت - 19

مينھُون ھن مِھارَ جُون، اَلا سَڀِ بَچَنِ،
وَڇُونِ جي ڪِيرَنِ سِين، سَدا ٿِيُون سُونھَنِ،
مُنکي ماڻِڪِيُن، تاڻي ھَنيو تارِ ۾.

بيت - 20

مينھُون ھِنَ مِھار جُون، اَلا سَڀ جِيَنِ،
ڪارِيُون، ڪَڪِيُون، ڪُنڍيُون، وارا ڪئو وينِ،
جُويون جاندارَنِ جُون، ٻيلا ٻَهَہ ٻَهَہ ڪَنِ،
اَچِي ريلَ رَھَنِ، مُون سنڀاران سُپِرين.

بيت - 21

چاھَڪَ چَرِي، تارِ تَرِي، آيُون مَٿي آرَ،
ڪوڙين ڪَرَ کَڻَندِيُون، سُڻِي سَڏَ ڌَڙارَ،
مينھيون ساڻُ مھارَ، پَرچِي پارِ لِنگهيندِيُون.

بيت - 22

چاھَڪَ چَرِي، تارِ تَرِي، آيُون مَٿي ٻيٽَ،
لُڙَ لَنگِهيندِيُون ليٽَ، لُطِفَ ساڻُ لَطِيفُ چي.

بيت - 23

چاھَڪَ چَرِي، تارِ تَرِي، آيُون مَٿي ڪُنَ،
ڪوڙِيين ڪَرَ کَڻندِيُون، ساھَڙَ جي سَمَنَ،
مينھُيون ساڻُ اَمنَ، پَرچِي پارِ لَنگِهيندِيُون.

بيت - 24

چاھَڪَ چَرِي، تارِ تَرِي، آيُون مَٿي کُوھَہ،
سُڻِي سَڏُ ساھَڙَ جي، راضِي ٿِيندن رُوحُ،
مينھيون ساڻُ صُبوحَ، پَرچِي پارِ لَنگِهيندِيُون.

وائي - 1

سَڀَڪا پاڻُ پَلي، مُونکي ڪامَ جَهلي،
مُنکي وِڌو نينھن اُڇَلي.
وِيندِي آئون پارِ پِرِيان ڏي، مون کي ڪامَ جَهلي،
مُنکي وِڌو نينھن اُڇَلي،
تَنُ وِڌائِين تارِ ۾، آڌِيءَ راتِ اُڇَلي،
مُنکي وِڌو نينھن اُڇَلي.
پَسي دُونھِيُون دوستَ جُون، منھنجو جِيءُ جَلي،
مُنکي وِڌو نينھن اُڇَلي.

داستان پنجون

بيت - 1

ساندَھِہ سَڀُ دَرياھُہ، پَري ڪَنڌِي پارَ جِي،
ڇڪِي ڇولِيءَ ۾ گِهڙي، جِتي جِيءَ وِاڙھُہ،
پَسئو ڏوھہ ڏَڪي ھِيون، آر مَٿي اَرِواحَ،
جي توھُہ ٿِئي توڏاھہ، تہ وِيرَ وَھِيڻو ناھہِ ڪي.

بيت - 2

ساندَھہ سَڀ دَرياھُہ، پَري ڪَنڌِي پارَ جِي،
ڪَنبِي ھِنيون ڪَما حَقهُ، آرَ مَٿِي اَرِواحُ،
دِلاسي دارِين جي، سانچِئو سانچي ساھُہ،
جي توھُہ ٿِئي توڏاھُہ، نہ وِيرَ وَھِيڻو ناھِہ ڪي.

بيت - 3

سِڪَڻَ وارَنِ سُٿِرو، جي دَھشَتَ سان دَرِياھَہ،
اوڙَڪِ اُنِھن جو نہ رھي، آرَ بِنا اَرِواحَ،
ويندي ساھَڙَ سامهيون، صَدقو ڪنديون ساھُہ،
جن کي حُبّ اُنهِہ جِي آھِہ، ساھَڙُ ساڻِي تن جو.

بيت - 4

گِهڙيا سي چَڙھيا، اِئين اَٿيئِي،
مَئي متي مَهراڻ ۾، پَوءُ ٽپو ڏيئِي،
تہ مھارُ مِليئي، سَنڀُوڙو سِيڻاھَہ سين.

بيت - 5

اَکيُون مُهُہ مِهارَ ڏي، رَکِيُون جن جوڙي،
رِي سَنڊَ سَيّدُ چئي، تارِگِهڙَن توڙي،
تنين کي ٻوڙي، سائِرُ سَگهي ڪِينَ ڪِي.

بيت - 6

آڌِيءَ اُڌاڻا، سَرِتِيُون سُکَ مِهار جا،
لَنگهِي سِيرَ سَنوان ٿِئا، ساھَڙَ سِباڻا،
ڀِنِيءَ تي ڀاڻا پَسان مان مھار جا.

بيت - 7

آڌِيءَ اُڌاڻو، ھينڙو مُون ھَٿَنِ مَان،
وَھِہ پَئِي واھُڙَ تَرِي، ساھَڙَ سيباڻو،
پيڄَ ڀِنِي ڀاڻو، پِيَّ جو پَسِي آئِيو.

بيت - 8

لَھرِنِ لَکَ لِباس، پاڻي پَسَڻُ ھيڪَڙو،
اونهي ۽ عميق جي، واري ڇَڏِ وِماسَ،
جِتِ ناھِہ نھايَتَ نينھن جي، کوءِ اُتِ پنھنجي کاش،
تَرَڻَ جي تَلاش، لاھہِ تہ لالَنَ لڳِ ٿيين.

بيت - 9

جيڏانھن چِتَ چاھُہ گهڻو، آرُ بہ اوڏاھِين،
وڃي وَھُہ واڪا ڪئو، تِکو تئائين،
مِهارُ مِلائِين، لَھرنِ منجِهہ لَطِيفُ چي.

بيت - 10

پَلِئان، پَلِئو نہ رھي، نِرتُو نِيھُن نِبارُ،
گِهڙان گهورِئو ڄِندُڙو، تنين اُٿَلَ مُون اَپارُ،
جنين مَنِ مھارُ، ھَلَڻُ تنين حَقُ ٿِئو.

بيت - 11

پَسُ پَسِڻان پَري ٿِئا، اوري سَندنِ آرُ،
دَرِياھہ رِي سَھاڙُ، ڏِسَڻُ گهڻو ڏُھِلو.

بيت - 12

ڪاڏي وَڃان ووءِ، جو وِھَڻُ وَڇارَنِ مَٽِئو،
ڏوڌِي پُڇي ڏيھَہ جا، جَرَ سِرِ اُڀِي جوءِ،
شِڪَسِتي سَيّدُ چَئي، چِيهان ڪَرِيو چوءِ،
ساھَڙَ، سانگُ سَندوءِ، اَچِي اوراھم ٿِئي.

بيت - 13

سَندو ڏَمَ ڏَھَڪارُ، ھَڏَھِين ڪونهي ھِنَ کي.
ھِيءَ پاڻِيءَ سين پانھنجو، پُسائي نہ سِنگارُ،
ڪارَڻِ مُنڌَ مِهارُ، ڪارِيءَ راتِ ڪُنَ تَري.

بيت - 14

ڏَمُ ڏيھاڻي ڏِي، سَندا ميھَرَ مِيھڻا،
جهليَمِ ٿي جهولِيءَ ۾، پَلَئِہ پَائيو سِي،
مَرُجان چالِيھَہ چي، سَڱا سُپيريُنِ جي.

بيت - 15

جيھَرَ لوڪُ جَهپَ ڪَري، ذَرو جاڳَ نہ ھوءِ،
اوھيَرَ اَچئو اَديُون، پَهُہ پِريان جو پوءِ،
جي ڪَچو چُوَنِمِ ڪوءِ، تہ مَرڪُ ڀايان ميھڻون.

بيت - 16

تہَ ڪَرَڪِيئن سُئي، جي سِيرَ نہ گِهڙِي سُھڻِي،
ھِتِ حياتِيءَ ڏِينھَڙا، ھَڏَھن تان نہ ھُئي،
چُڪي تنھن چَرِي ڪي، جو ڏِنُسِ اُنَ ڏُھِي،
سُھڻِي کي، سَيّدُ چي، وڌو قُربَ ڪُھِي،
ھُنهين ھَنڌِ مُئي، پَرَ ٻُڏِيءَ جا ٻِيڻا ٿئا.

بيت - 17

ڪاجا ڪُنَ ڪَرِينِ، ڀِنِيءَ ڀُڻ جُهڻ پاڻ ۾،
اَکيُون تنھن آبَ کي، آڌِيءَ اڪيرِين،
توڻي تِڪوُن ڏِينِ، تَبِ اُڃَ اُنِينِ کي نَہ لَهي.

بيت - 18

دائِمُ جا دَرِياھَہ ۾، سا مَڇِي ڪِنِي ڪوھُہ،
آھس اِيءُ اَندوھہُ، پاڻِي ڪِٿي نہ پِيان،

بيت - 19

ڪيرَ ڪُنَ، آئون ڪيرَ، ڪيرَ ڏَمَرَ سَهي ڏَمَ جا،
قَضا رِي ڪيرَ ڌَري، مَٿي پاڻِيءَ پيرَ،
ڀينَرُ، ڀِنيءَ ويرَ، لڌوئِي ٿِي لوڙِيان.

بيت - 20

جي ٻُڏَان تَہ ٻَنِ، مَرُ اولِجان اُنَ پار ڏي،
ڪَنڌِيءَ اَچئو سُپرين، مانَ ٻَرِ ٻَرِ ڪَنِ،
مُيائي سِين تَنِ، جيڪَرَ اُٿِي نِڪِران.

بيت - 21

لهرَ مِڙوئِي لالُ، وَھَڻُ کَٿُورِئان وِتَرو،
اوٻارا عَبيرَ جا، جَرَ مان اَچَنِ جالَ،
ڪُنَنِ گِهڙِي ڪالَ، سِڪَ پِريان جي سوھڻِي.

بيت - 22

جيڪي ڏِٺُئِہ تارِ ۾، ڪَنڌِيءَ سو ڪَھيج،
جَرُ وڏو، جهاجَهہ گَهڻِي، پاندُ مَ پُسائيجِ،
ساھَڙُ ساڱاھيجِ، تہ ثابِتُ لَنگِهين سِيرَ مان.

بيت - 23

ڳرا ٻَئي پارَ، ھيون حيرَتَ ۾ پِئو،
وِھان تَہ ويرَمَ ٿِئي، نِينھَن ۾ پوءِ نِهارَ،
وَڃان تَہ واڪو ٿِئي، پاڙي پوءِ پچار،
ھُتِ ٿي واعدِي وارَ، ھِتِ سُوٽُون ڏِينم سَرَتِيُون.

بيت - 24

جا ھَڙَ اَندَرِ جِيءَ، ساھَڙَ ڏِنِي ساھَہ کي،
سا ھَڙَ ڇُڙي نہ ساھَہ جِي، سا ھَڙَ رِيءَ،
ساھَڙ ميڙِ سَمِيعَ ،تہ ساھَڙَ ڇُڙي ساھَہ جِي.

وائي - 1

اَکِيُون پيرَ ڪري، وَڃِجي وو، وَڃِجي،
سُپيرِيان جي ڳالهڙِي، ڪنھن سان ڪينَ ڪِجي،
وَڃِجي وو، وَڃِجي.
لِڪائي لوڪَ کان، ڳُجَهڙِي ڳوٺِ نِجي،
وَڃِجي وو، وَڃِجي،
مَحَبَتِي مِھارَ جو، سُورُ نہ ڪنھن سَلِجي،
وَڃِجي وو، وَڃِجي.

داستان ڇھون

بيت - 1

ساھَڙَ جا سِنگارَ، اَڻَ لِکيا اَڳي ھُئا،
نڪا ڪُنۡ فَيَڪُوۡنُ ھُئِي، نَہ ڪا ٻِي پَچارَ،
مَلَڪَنِئان مَھَندِ ھُئِي، توڏِيءَ جِي تَوارَ،
مَحَبّتَ ساڻُ مِھار، لايائِين لَطِيفُ چي.

بيت - 2

سُھڻيءَ کي سِنگارَ، اَڻ لِکيا اَڳي ھُئا،
ڪُن فيڪون ڪانَ ھُئي، نَڪا ٻِي پَچارَ،
مَرَڪِي ساڻُ مِھارَ، لايائين لَنءُ لَطِيفُ چي.

بيت - 3

گهيڙَ لَنگهئو گهاري، مِيثاقان مھارَ سان،
اَلَسۡتُ بِرَبّڪُمۡ؟ قَالُوۡا بَليٰ، پَر اِيھار پاري،
ڏِسئو ڏيکاري، پِرت پِريان جو پيچِرو.

بيت - 4

اَلَسۡتُ اَرواحَنِ کي، جَڏھِن چَيائُون،
مِيثاقان مھارَ سين، لَڌيُون مُون لائُون،
سو موٽي ڪِيئن پاھُون، جو مَحفُوظا مُعافُ ٿِئو.

بيت - 5

اَلست اَرِواحَنِ کي، جَڏھِن چَيائِين جِيئَن،
قَالُو بَليٰ قَلبَ مان، ٿي واراڻي تِيئَن،
مَحَبَتِي مِھَار جي، آئون نِھوڙِي نِينھَن،
سَرتِيُون ساھَڙَ سِيئَن، ھَلڻُ مُون حَقُ ٿِئو.

بيت - 6

اَلَستُ اَرِواحَنِ کي، جَڏھِن اَمُرُ ڪئو اَحَدَ،
ھو مَنَ ڪاڍو مھارَ ڏي، سُھڻِي سِڪَڻَ سَڌَ،
دِلو دَؤرَ دَرِياھَہ جي، ڪئو اِرادي اَڌَ،
جيڪِي آيسِ ڏانهن عَهَدَ، سو پاڙي مُنڌَ پاتارَ ۾.

بيت - 7

اَلَستُ اَرِواحَنِ کي، جَڏھِن فَرمايو فَتاحَ،
ھو منَ ڪاڍو مِھار ڏِي، سُھڻي سِڪَڻَ ساھَہ،
دِلو دُورِ دَرياھہ جي، ڪئو ارادي اَداھُہ،
جِيڪِ آيُسِ ڏَانهُہ، سو پاري مَنڌُ پَاتارَ ۾.

بيت - 8

اَلَستُ اَرِواحَنِ کي، جَڏھِن فَائِقَ فَرِمايو،
ھو مَنَ ڪاڍو مِھارَ ڏي، سُھڻِي کي ساعِيو،
دِلو دُورِ دَريَاھہ جو، اوڏاھين آيو،
جيڪي ھادِيءَ ھَلايو، سو پاڙي مُنڌَ پاتارَ ۾.

بيت - 9

اَلَستُ اَرِواحَنِ کي، جَڏھِن چيائِين،
ھو مَنُ ڪاڍو مِھارَ ڏِي، سُھڻِيءَ سَدائِين،
جيڪِي آيُسِ اوڏاھِين، سو پاڙي مُنڌَ پاتارَ ۾.

بيت - 10

اَلَسۡتَ اَرواحَنِ کي، جَڏھِن جاڳايو جَلِيلَ،
سَئِين راھَہ سَيّدُ چئي، سوٺائُون سَبِيلَ،
وَحدَتَ جِي وادِي ۾، ڪوڙين ڪي قَلِيلَ،
دَرِياھَہ جي دَلِيلَ، لوڙھي لَھوارا ڪئا.

بيت - 11

کامان، پَچان، پَڄُران، لُڇان ۽ لوچان،
تَنَ ۾ تَونسَ پِرِينِ جِي، پِيان نہ ڍاپان،
جي سَمُنڊَ مُنھن ڪريان، تہ سُرِڪيائِي نہ ٿِئي.

بيت - 12

کامان، پَچان، نَہ مَران، سَڙان سارِي راتِ،
ٻَنِ ٻِئائِيءَ کي وِجهِي، ڪَرِ پريان جِي تاتِ،
سِيخُون سَندِيُون سَڄَڻِين، اُڀِرَنِ آڌِيءَ راتِ،
نَہ ڪي ھَٿِ نَہ ساٿِ، ڏيھاڙيو چَنگ چَڙھان.

بيت - 13

ڪارِي راتِ ڪَچو گَهڙو، اُڻٽِيهہَ اُونداھِي،
چَنڊَ نالو ناھہِ ڪو، دَرِياھہَ دَڙَ لائِي،
ساھَڙَ ڪارَڻِ سُوھڻِي، آڌي ٿي آئِي،
اِيءُ ڪَمُ اِلاھِي، نا تَہ ڪُنَنِ ۾ ڪيرَ گِهڙي.

بيت - 14

ڪارِي راتِ ڪَچو گَهڙو، نڪا سِيڻهِہ ساڻُ،
وِجهي وَيرَمَ نہ ڪري، پِريان ڪارَڻِ پاڻُ،
مُحَبّتَ ۾ مهراڻُ، سُڪِي سَڀُ پَٽُ ٿِئو.

بيت - 15

ڪارِي راتِ ڪَچو گَهڙو، مَٿان وَسي مِينھُن،
ھِڪ ڀَوءُ بيراھَہ جو، ٻِئو سانڀاران سِينھُن،
شَالَ م ڇِڄي نِينھُن، گِهڙان گهورِئو ڄِندَڙو.

بيت - 16

اورارِ نہ پرارِ، ويچارِي وَھَہ وِچَ ۾،
سُڪِيءَ ڏَنِيءَ سُپِرِين، ٻِئو مِڙوئِي تارِ،
تُون ڪُنين ڪِيمَ نِهارِ، ٻُڏندَنِ سين ٻاجُهون ڪري.

بيت - 17

ھِنَ پارِ نہ ھُنّ، ويچارِي وَھَہ وِچَ ۾،
نِيچُ نِهاري نہ گِهڙِي، تِهِن ۾ پيس تُنّ،
اَللہ ساڻُ اَمُنّ، آرا ڪهِہ اُڪارِئين.

بيت - 18

سَهَسِين سائِر ٻوڙِيُون، منڌَ ٻُوڙِئو مِهراڻُ،
وَھَہ وِڃائيو پاڻ، ھَڻِي ڪنڌُ ڪَپَنِ سين.

بيت - 19

سَهَسِين سائِرَ گَجَنّ، توءِ سَهَجَ نہ مَٿي سوھڻِي،
نہ ڪي نِيهہ ڇِڄَنِ، پَرِتَهِم پِريَنِ جي.

بيت - 20

سُپيريان جي تُرَھي، ٻُڏِي! ھَٿُ مَ لاءِ،
صُباحَ تان چُنداءِ، اَسان تہ اُڪارِئون.

بيت - 21

سُپيريان جي تُرَھي، ٻُڏِين توءِ مَ لَڳُ،
جي ڀائِيين پِرِينءَ مِلان، تہ پُور اُبتي وَڳُ،
پاءِ تيڏاھِين پَڳُ، ناھِہ جيڏاھِين نِجُهرو.

بيت - 22

سُڪيءَ جِي سانڀاھِہ ۾، جَڏِھن ٻُڏِيون جي،
ساھَڙُ تَنِين کي، ٻِيلي ٻِنهين ڪَنڌِيين.

بيت - 23

سُڪِيءَ ٻُڏَيون جي، ساھَڙُ ساڻِي تن جو،
لَهرِن سِرِ لَطِيفُ چي، ڪُلهنِ چارھئو ني،
جي پُڇَنِ پَنڌُ پَري، تن اُماڻي اورھُون.

بيت - 24

سُڪِيءَ جي سانڀاھَہ، ٻُڏِين توءِ ٻُڏُ،
ڪَکَ، ڪانڊيرا، ڪاٺيُون، ميڙي ٻَڌُ مَ مَڏُ،
نو ساھَڙَ سَڏُ، نہ ڪا سُڄي سُوھڻِي.

وائي - 1

ويٺِي ڪِينَ وِساري، محَبتَ وِڌَڙِي ماري،
ديوانِي، يار، وو، مَستانِي، دِلبَرَ جانِي، وو!
ويٺِي ڪِينَ وِساري.
جنھن کي سِڪَ ساھَڙَ جِي، سا گهايَلَ گَهرِ نہ گهاري،
ويٺِي ڪِينَ وِساري.
ڏَمُ ڏُھيلو ڏُکِئو، سِرَ ۾ سؤنٽا ماري،
ويٺِي ڪِينَ وِساري.
ٻيلي پاسِ ٻُرَنِ جي، تَنِ کَرِڪِنِ وِڌِيَسِ کاري،
ويٺِي ڪِينَ وِساري.
ٻلي ٻِنهِين ڪَنڌِئين، مُحِبُ مينھُون ٿو چاري،
ويٺِي ڪِينَ وِساري.
ھُوءِ ھُنگارُون پُونِ پُڪارُون، تَڙ تَڙ دوس تواري،
ويٺِي ڪِينَ وِساري.
ھُوءِ جا پِڪَ پِرِيَنِ جِي، آھِيان تهن آساري،
ويٺِي ڪِينَ وِساري.

داستان ستون

بيت - 1

تڙَ نَہ گهِڙي تورُ، توءِ مَنَ ڪاڍو مھار ڏي،
ڏاڍو دؤرُ دَرِياھہ جو، سِڪَڻَ وَڏو سُورُ،
مَنَ ۾ مؤجَ مِھار جي، پَهَسَ پِريان جي پُورُ،
ٻيلي ٻِنهِي ڪَنڌِيين، نِتُ نِهاري نُورُ،
مَنجهان جَرَ ضَرورُ، ڪَچي کي ڪو مَ ٿِئي.

بيت - 2

ٻوڙِئين، چاڙِھئين، تُون ڌَڻِي، ٻِي جو دعويٰ رَسي نہ دَمُ،
ھِنَ مُنھِنجي حالَ جو، ميھَرَ تي معۡلَمُ،
رَکُ ڀيلي جو ڀَرَمُ، جو اَچِي پِئو اَجهورَ ۾.

بيت - 3

ڪانڌِي ڪَانگَ ٿِئاسِ، وَھَڻُ جَنازو سُوھڻِي،
ٻَگها جي بيٽَنِ جا، ڪُلها تَنِ ڏِناسِ،
اَکيين مَلَڪَ ڏِٺاسِ، توءِ مَنَ ڪاڍو مِهارَ ڏي.

بيت - 4

اُڀو تَڙِ مهارُ، مَلاحنِ سَڏَ ڪري،
آئون پڻ وِجهان ھَٿَڙا، اَئين پڻ وِجهو ڄارُ،
گهوريو ڪارنڀارُ، مانَ مِلنئَون سُپِرِين.

بيت - 5

مِهارُ مَلاحَنِ کي، اُڀُو آڇِي اَڇَ،
آئون پڻُ وِجهان ھَٿِڙا، اَئين پڻُ وِجهو رَڇَ،
سَنديِءَ ڪُنَ ڪُڻِڇَ، مان ھُوَنِ سَلامَتَ سُپِرِين،

بيت - 6

مِهارُ مَلاحَنِ کي، اُڀُو ڪَرِي سَڏَ،
اَلا اِنھِين پارَ جا، موڙي اَچو مَڏَ،
وِئا جي وَھہ گَڏُ، ھَلو تَہ ڏورِيون اُنَ کي.

بيت - 7

ڪَنڌِيءَ جَهلئو ڪانھَن، عاشِقُ اُڀو آھُون ڪري،
تو ڪِيئن ٻوڙِي سُوھَڻي، ٻيلِي مُنھِنجِي ٻانهَن؟
دَرِياھَہ توتي دانھَن، ڏِيندسِ ڏِينھَن قِيامَ جي.

بيت - 8

جِتي ڀيرَ ڀِرَنِ، ڀريوُن پَون ڀَواريوُن،
تانگ نہ لَڌِي تارُئين، مَپُ نہ ماٽِيڙَنِ،
ڪَنڌِيءَ اُڀا ڪيتِرا، سِياڻا سَنڪَنِ،
تُون ڪِيئن تن تَڙَنِ، اَچئو اَسارِي گِهڙِين؟

بيت - 9

ڀَرِيُو ڀَرِ دَرِياھہ، پَسُ جي پار پَوندِيُون،
ٻَڌ تَوَڪَلَ تُرَھو، آھَرَ ساڻُ اَللہَ،
جَنِ جي ساھَڙَ صَلاحَ، سي ڪِينَ ٻُڏَندِيُون ڪَڏَھِين.

بيت - 10

سانڀارا سَڏَ ڪيو، اُڀا چَوَنِمِ آءُ،
ھِڪُ تِکوئِي تارِ وَھي، ٻِئو لُڙُ لَهريُون ۽ واءُ،
ساڻِي جن اَللہُ، ٻُجهان سي ٻڏندِيُون.

بيت - 11

سنڀارا سَڏَ ڪَيو، اُڀا چُوَنِمِ اَچُ،
ھِڪ تِکوئِي تارِ وَھي، ٻِيو ھَٿِ ڪَمِيڻِي ڪَچُ،
ساڻِي جَنينِ سَچُ، ٻُجهان سي نَہ ٻُڏندِيُون.

بيت - 12

ھارِي حَقُ رَکيجِ، سانڀارا ساھَڙَ جو،
خُوابَ، خيالَ، خَطرا، تن کي تَرَڪُ ڏِئيجِ،
اَندَرُ آئِينو ڪري، پَرِ ۾ سو پَسيجِ،
اِنهِيءِ راھَہ رَميجِ، تہ مُشاھِدو ماڻِيين.

بيت - 13

ھاري رکَجِ حَقُ، سنڀارا ساھَڙَ جو،
خُوابَ خِيالَ، خَطِرا، تَنِين ڏيج تَرَڪُ،
ڪَرئين غير غَرَقُ، تَہ مُشاھِدو ماڻيين.

بيت - 14

سنڀارا سيئِي، تَنُ جنِين جو طالِبُو،
مَنُ پِريان نيئِي، پڳهِئو پاڻ ڳَري.

بيت - 15

لَيا ڏِٺَم لارَ، سنڀارا ساھَڙَ جا،
ھِيُون ھِتِ نَہ وِندُري، ڌَراڙنِئون ڌارَ،
مُنھِنجو مَنُ مِھارَ، پَڳَهِئون پاڻَ ڳَري.

وائي - 1

آيَلِ، اَمَڙِ، تي جِيان، لا، جي سارِينِمِ سُپِرِين.
ساھَڙَ مَٿان صَدَقو، ڏَھي ڏَمَ ڏِيان،
جي سارِينِمِ سُپِرِين.
مَٿان ماڻِڪَ ھيڪَڙي، اَمُلَ اَٺَ ڏِيان،
جي سارِينِمِ سُپِرِين.
اَچين عَبدُاللّطِيفُ چي، تہ جانِبَ نِتُ جِيان،
جي سارِينِمِ سُپِرِين.

داستان اٺون

بيت - 1

ٻُڏَندي ٻُوڙَنِ کي، ڪي ھاتِڪَ ھَٿَ وِجَهنِ،
پَسو لَڄَ لَطِيفُ چئي، ڪيڏي کي ڪَکَنِ،
جي ڪي ڪَنڌِيءَ ڪَنِ، ناتَ ساڻن وَڃَنِ سِيرَ ۾.

بيت - 2

جا ڪَچِي ڪانِي ڪانھَن، سا ٻُڏا ڪَڍي ٻارِ مان،
يا لَنگهائي لَطِيفُ چي، يا ڌُريا ڪري دانھَن،
ڪَما حَقَه ڪَکَن جِي، آھي ڳالهہ اَڳانهنَ،
يا ڏي ٻُڏَنِ کي ٻانھَن، ناتَ ساڻِن وڃي سِيرَ ۾.

بيت - 3

جان ڪِي ڪَنڌِيءَ ڪَانھَن، تَان تَاڻِي ٻَڌِجُ تُرَھو،
ھَٿُ پِريان جِي ھَٿَ ۾، ٻِي ڪنھن ڏِجُ مَ ٻَانهن،
سَندِي ڪَپَر دانھَن، ڪِ تو ڪَنِين نَہ سُئِي؟

بيت - 4

ھاواڻا ھُلَنِ، ڪَپَرَ ڪارُنڀَار جا،
لَهرِيُون، لُڙَ، لَطِيفُ چي، ڀِيلي تي ڀُلَنِ،
جي ڪَچي ساڻُ ڪَهَنِ، تَنِ آگا اوباھيين.

بيت - 5

آھِيين ھِتِ اُماڻَ، ٻَڌُ تُرَھو تارِ جو،
لَهريُون لُڙَ، لَطِيفُ چي، جَهلئا جُنگَ جُواڻَ،
اُونهي تَڙِ آگَهٽِيا، آڏي پائي آڻَ،
جي پِئا مُنھن مهراڻَ تن ٻانڌِيُنِ، ٻيٽُ نہ اُڄَهي.

بيت - 6

ڪَچو کانءُ ڪُپارَ، اوڳِي کڻئو اُٿِيينِ،
ڪِ تو ڪَنِين نَہ سُئِي، ڀيلي تي ڀُلِڪارَ،
لوڙِھئا لَکَ لَطِيفُ چي، ڪوڙِيين ڪارُنڀارَ،
اُڪارِيين آڌارَ، آرا آنکي وارِيِين.

بيت - 7

ڪَچي ساڻُ ڪَهي، پَڪو پُڇي نہ سُوھڻِي،
لَنگِهئو لُڙُ لَطِيفُ چي، وَڇارَنِ وَھي،
سا ڪِينءَ نِينھَن نَهي، جنھن نينھَن نَڌو کڻِي.

بيت - 8

اونهي ۾ اوھِري، ڪَهِي ڪَچي ساڻُ،
سُپَڪَ جو سَيّدُ چئي، پُڇي نَہ پَرياڻُ،
عِشقَ وارِيُون عَبدُاللَطِيفُ چي، سَڌَ نَہ کَڻَنِ ساڻُ،
جَنِين پاسي پاڻُ، اَوَتَڙان اَکتِيُون،

بيت - 9

انگَ پَسِي رنگق ڪئو، ڪو جو دؤرُ دِلي،
ٻَرِ ٻَرِ ٻيلي نَہ ٿِئو، ڪَچو مَنجِهہ ڪِلي،
تَران ٿِي تارِ گهَڻون، تُنھِنجي بَحَرَ بِلي،
سو ميهارُوم مِلي، آھِيان جَنھِن جي آسِري.

بيت - 10

ڀانيُمِ نَہ ڀِيلو، مُنکِي ڌاءَ ڌُتارِئو،
آڪي مقٿي اُسِري، رؤحَ ڏِنو ريلو،
تيلاھِين ويلو، پِيُمِ واھُڙَ وِچَ ۾.

بيت - 11

ڪڍئا جي ڪُلالَ، سي پَسِي خالَ خُوشِ ٿِئي،
پاڻِيءَ چِٽَ پُسائِيا، ڌاءَ نہ جَهلِي ڌَمالَ،
سُپڪَ ڀانئيا سُوھڻِي، جوڀَنَ جي جَمالَ،
آڪي جا اَحوالَ، مَعۡلم ٿئا مهراڻَ ۾.

بيت - 12

ڪَچو تان ڪوھہُ؟ پَڪو نَظَرُ پِريُنِ جو،
ساھَڙُ مُنھِنجو سُپِرِين، ڏَمَ ڏِٺي مون ڏوھہُ،
جي ڇَتو، جي ڇوھہُ، تہ پُورِيندِيَسِ پارِ مَڻِي.

بيت - 13

آڪو تان آڪو، ڪَچو آيُمِ ڪَمِ،
جِيءَ جَنِين جا جَمِ، پَڪا سي پُڇَندِيُون.

بيت - 14

پَڪا رَڇَ ڪُنڀار جا، پَڪِي نِيھائِين،
مون کي تِئائِين، ڀيلو ڀاکي آئِيو.

بيت - 15

ڪَچي ڪَٽُ نہ جَهلئو، ڀيلو پِئو ڀُرِي،
سارَ ڇَڏيائِين سِيرَ ۾، ڪا ٻانهُنِ کي ٻُرِي،
لَٽي لَهريُون ويئِيون، چوڌارِي چُرِي،
ھيِنئڙي مَنجهِہ ھُرِي، ماھِيَتَ مَلَڪَ الۡمَوتَ جي.

بيت - 16

ڪَچي ڪَٽُ جهَلِئو، ڀيلو پَيو ڀَڄِي،
ماھِيَتَ مَلَڪَ الموت جِي، مَنجِهہ وَجُودَ وَڄِي،
ساھَڙَ کي سَڄِي، آڪي جي اَحوالَ جي.

بيت - 17

ڪَچي ڪَٽُ نَہ جَهلِئو، ڀيلو سَهي نَہ ڀَرُ،
ھَٿين پِيرين آڱُرِئين، ٻانهُنِ ڇَڏِئو ٻَرُ،
ساھَڙَ سِگهو وَرُ، پييسِ مُنھِن مِهراڻَ جي.

بيت - 18

ڀيلي ڀُلائِي، پَسِي چِٽَ چَرِي ٿِئي،
ٻَرِ ٻَر، ٻُڏِي سُوھڻِي، وِيرنِ ۾ وائِي،
ڪَچي ڪيرائِي، لالِ لَهِرنِ وِچَ ۾.

بيت - 19

پَڪو کَڻِجِ پاڻَ سين، چَڱون چِٽائي،
ڪَچو ڏيجِ ڪُنڀار کي، مُنھن تي موٽائي،
سو سُڻُ ھِيين سين سوھڻِي، جو فائِقُ فَرمائي،
موجُون مُنجهائي، مارِينِئِي مهراڻَ جون.

بيت - 20

ڪوجو وَرِئو واءُ، جِئَن ٻَر ٻانھُنِ ڇَڏِئو،
اَڳي اِن تَڙاءُ، اونداھِيائي اُڪِران.

بيت - 21

ھَڻَندي ٿَڪَمِ ھَٿَ، ھِنيڙي ھُجُون ڇَڏِيُون،
لَک لَهرِنِ گَڏِئو، موجُون وَرِيُون مَٿَ،
نِيَمِ ڪُنَ قُوّتَ، ڀِرُ، ڀَليرا سُپرِين.

بيت - 22

ھنيڙي حُجُونَ ڇڏِيون، قُوتَ رَھِيَمِ ڪانَ،
مُون تي موٽجِ مُون پِرين، ساھَڙَ ڄامَ سُڄاڻَ،
آھِيان گهڻُو اَڄاڻَ، ڀِرُ ڀَليرا سُپِرِين.

بيت - 23

ڀِرُ، ڀَليرا سُپِرِين، ڀَلا ۾ بي راھَہ،
تو رِيءَ تارِي ناھہِ ڪا، والِي تورِيءَ واھہَ،
ساھَڙَ جي صَلاحَ، تَنَ کي ڪَڍِي تارِ مان.

بيت - 24

تَنَ کي ڪَڍي تارِ مان، صُلحُ ساھَڙَ جو،
اُتِ آڏو اَچي ڪِين ڪِي، ٻيليپو ٻِي جو،
ميهَرَ ڪِجِ مُنھِنجو، ڪو اوڪَرُ اِنهيءَ آرَ تان.

وائي - 1

مُون پاڙيچيءَ سارَ، آئون جا ويندَڙِي وَٽِ وَڇارَ،
ڏَمُ مَ جاڳي، لو! مون پاڙيچِيءَ سارَ،
مون کي مولا ميڙيين، ڪُنڍِنِ جيءَ قَطارَ،
آئون جا ويندَڙِي وَٽِ وَڇارَ.
ٻُرَنِ ٻيلايَنِ جا، سنڀارا سَنڀارَ،
آئون جا ويندَڙِي وَٽِ وَڇارَ.
وِچُ مَ پوءِ وِصالَ کي، سَٻاجها سَتارَ،
آئون جا ويندَڙِي وَٽِ وَڇارَ.
گَهرِ گَهِر گِلا جا وَھي، پاڙي پَنڌِ پَچارَ،
آئون جا ويندَڙي وَٽِ وَڇارَ.
تاڪُنِ تَڪيِ آھِيان، سِگهو رَسُ سَهارَ،
آئون جا ويندَڙِي وَٽِ وَڇارَ.

داستان نائون

بيت - 1

جَرِ ٿَرِ تِکَ تَوارَ، وَڻِ ٽَڻِ وائِي ھيڪڙِي،
سَڀيئِي شَيءِ ٿِئا، سُورِيءَ سَزا وارَ،
ھَمهَ مَنصُورَ ھَزارَ، ڪَهڙا چاڙھئو چاڙئين؟

بيت - 2

سَڀَتِ پَچار پِريَنِ جي، سَڀَتِ ھوت حُضُورُ،
مُلڪُ مِڙو مَنصُورُ، ڪُهِي ڪُهَندين ڪيترا؟

بيت - 3

مَرِج وَٽِ مِهارَ، مَتان موٽِين، سُوھڻي،
ساھَڙَ جا سِنگارَ، مَتان ڏَمَ ڏيکاريِين.

بيت - 4

جان ڪِي گَهران مَ وَڃُ، نات موٽ مَ سوھَڻي،
ٻيون ڀيري ڀَڃ، ھيڪڙائِي ھَٿِ ڪري.

بيت - 5

چُوَنِمِ جي ھيڪارَ، ”مَ وَنءُ موٽِي سُوھَڻي“
دونهِين پاسي دوس جي، گهارِيان سَڀَ ڄَمارَ،
ٻانڌِيڻا ٻيھارَ، ھند نہَ لڱين لائِيان.

بيت - 6

وَڃان ڪِينَ وَرِي، ھُندَ رِءَ چَئي رَھِي رَھان،
دُونھِين پاسي دوسَ جي، ماڳَهِہ پُئان مَرِي،
صُورَتَ نہ سُنهہ ڪا، ڪَيِسِ چِتَ چَرِي،
وِصالان فِراقَ جي، سُڄي ڳالھہ ڳرِي،
تيلاھِين تَرِي، مُنھن ڳِنِئو موٽئو وڃان.

بيت - 7

جي قِيامَ مِڙَنِ، نہ ڪَرَ اوڏا سُپِرِين،
تِهان پَري سُڄَنِ، وڌايُون وِصالَ جُون.

بيت - 8

آئُون ڪِ نہ ڄاڻان اِيئن، تَہ جَرَ گِهڙي جوکو ٿئي،
قَضا جا ڪَرِيمَ جِي، تَنھن کان ڪَنڌُ ڪَڍِبو ڪِيئن،
ھِڪ لِکِي ٻِي نِينهن، آڻي اولِيَسِ اول ۾.

بيت - 9

نہ ڪاني ڪانھَن، نڪو ڏوھہُ قَلَمَ جو،
اَنگُ اُتيئِي لِکِئو، جِتِ نہ رَسي ٻانھَن،
ڪَنھِن کي ڏِيان دانھَن، قَضا قَلَمُ وَھائِيو.

بيت - 10

تَڙَنِ جا طعَنا، سَهنگا ڏِينمِ سَرِتِيُون،
دَرِياھہ دِيوانا، سُڻُ حَقِيقتَ حالَ جِي.

بيت - 11

تَران لَئي طعني، مَٿي وَھَہ واڪا ڪِئو،
آڻي وِڌِيَسِ آرَ ۾، دَرِياھہ دِيواني،
قَلمَ جِي ڪاني، آڻي اوليَسِ اولَ ۾.

بيت - 12

تَران تَان مَران، وَران تان وَھُہ وِتَرو،
ھِينيڙي ۾ ھوتَنِ جا، اَچَنِ گهُورَ گهڻا،
پَئِسو پاڙيوارِيُون، ڏِسئو ڏوھَہ ڏَران،
وِچان ڪِيئَن وَران؟ ڪَنڌي مُنھنجو ڪارَڻي.

بيت - 13

نَڪو سَنڌو سُورَ جو، نَڪو سَنڌو سِڪَ،
عَدَدُ ناھِہ عِشقَ، پُڄاڻِي پاڻَ لَھي.

بيت - 14

عَدَدُ ناھِہ عِشق َجو، سُڻِي ٿي ساڻِي،
ڪانهِہ پُڄاڻِي، مَهَدان مُنڌَ مِھار جِي.

بيت - 15

سِڪَ تُنھِنجِي سُپِرِين، جِئَن تَران تِئَن تارِ،
تُونھين رھِين روحَ ۾، تُونھين اڱڻان ٻار،
پِرين تُنھنجي پارِ، واجهائِيندين وَرِھَہ ٿِئا.

بيت - 16

سِڪَ تُنھنجِي سُپرِين، ڪَپِي ۽ ڪوري،
سَگهان نَہ چوري، ڏاڍو نِيرُ نِينھَن جو.

بيت - 17

سِڪَ تُنھِنجِي سُپِرِين، اَندر ٿِي اَجَهلَ،
ٻَڙڪِئو ٻاھر نِڪري، کُوري کانئِي کَلَ،
رءَ سِيراھِيَ سَلَ، مُون کي ڏِنا سَڄَڻين.

بيت - 18

سِڪَ تنُھنجِي سُپِرِين، اَندَرِ ٿِي اَجهاڳَ،
منجهين ڀَرِيا ماڳَ، پَلُٽئا پارِيُون ڪَري.

بيت - 19

ڪِي تران ڪِي تارِمُون، ڪِي سَگهان ڪِي سَگُهہ،
آڏو ڏيجِ مَ لَڳُ، مُون ھيڪلِي وَلَها.

بيت - 20

سِڪَ سِڪنديَنِ لاھِہ، وِڇوڙئا ميڙ پرين،
ايڏِي سَگهَہ سَچا ڌَڻِي، تُوھِمِ کي جُڳَاءِ،
تَنُ جَنين جو طالِبُو، مِهَر تَنِين کي پاءِ،
ميڙائي جو ماءِ، ڪانگُ لَوندو ڪَڏَھِين؟

بيت - 21

ڏِٺي ٿِيمِ ڏِينھَن، ڪُهُہ ڪِهَڙا پِرين؟
نيڻَ ڀَرجِي نِينھن، پَلُٽِئا پارِيُون ڪَري.

بيت - 22

ڏِٺي ڏِينھَن ٿِئامَ، ڪُهُہ ڄَاڻان ڪَهڙا پِرِين؟
وَلِينِ جِئَن وَرِيامِ، گوندَرَ غَمَ پِريَن جا.

بيت - 23

ڏِٺي ڏِينهَن ٿِئامَ، ڪُهُہ ڄاڻان ڪهڙا پِرِين؟
سَهسين سِجَ اُلَهِي، واجهائِندي وِيامِ،
تنِين سالَ ٿِئامِ، جنين ساعَتَ نہ سَهان.

بيت - 24

گهرُ نَہ وَرُ نَہ وَٿُ ڪا، آھِمِ مَنِ مِهارُ،
اِنَ اوسِيڙِي اُٿِيان، سَنجهي ڪَري سِنگارُ،
پِرين تُنھنجو پارُ، پَسان مان پَرِ ڪَهِين.

وائي - 1

ھوئجِ ھشيارِ، خَبَردارِ، تِرڪَڻِ آھي تَڙَ ۾،
کَڏُون کوٻا، چِڪَ چِڪندِيُون، تا ڪِي نَئِي نِهارِ،
تِرڪَڻِ آھي تَڙَ ۾.
آڌِيءَ سي اُکَڙَندِيون، اَکِيُون جَنِ ڪَپارِ،
تِرڪَڻِ آھي تَڙَ ۾.
مون سُئو مَلاحَنِ کان، تَڙَ اَڙانگا تارِ،
تِرڪَڻِ آھي تَڙَ ۾.
ھوتَ ھَلندِيَنِ کَٽِيئو، وِھَڻُ، مُنڌَ وِسارِ،
تِرڪَڻِ آھي تَڙَ ۾.
کُهہِ آتَڻُ، ٻَنِ جيڏِيُون، ڏيراڻِيُون ڏُئارِ،
تِرڪَڻِ آھي تَڙَ ۾.
پَڪو کَڻِجِ پاڻَ سين، پِرِين تُنھنجو پارِ،
تِرڪَڻِ آھي تَڙَ ۾.
وِيندي واٽاڙُئَنِ کي، پَٽِيءَ ڪِيمَ پَچارِ،
تِرڪَڻِ آھي تَڙَ ۾.
پُئندي مُنھِن مھارَ جي، ڏَمَ وَٽِ ڏينھن مَ گهارِ،
تِرڪَڻِ آھي تَڙَ ۾.
ساھَڙَ کي سڻُ، سوھڻي، ٻِڇَلِ آڏِي ٻارِ،
تِرڪَڻِ آھي تَڙَ ۾.
تارِ تَرَندِينءَ، لَڙُ لَنگهَندينءَ، عِشقَ جي آڌارِ،
تِرڪَڻِ آھي تَڙَ ۾.
پاندُ مَ ڇَڏِج پِرينءَ جو، پيھين جي پاتارِ،
تِرڪَڻِ آھي تَڙَ ۾.
ٿيندوءِ سَڏُ ساھَڙَ جو، توڏِي ٿِيءُ تيار،
تِرڪَڻِ آھي تَڙَ ۾.

ابيات متفرقہ

بيت - 1

ساھَڙَ ڌاران سُوھڻي، اڌوتِي آھي،
ڪُنڍِيُون جو ڪاھي، پاسي تَنهِن پاڪُ ٿِئي.

بيت - 2

ساھَڙَ ڌاران سُوھڻِي، نِسورِي ناپاڪَ،
نَجاسَتَ ناھِہ ڪا، اُنِين جي اوطاقَ،
ھُوءِ جي کِيرَ پِياڪَ، پاسي تنين پاڪَ ٿِئي.

بيت - 3

ساھَڙَ ڌاران سُوھڻِي، ھِيءَ تان جُنبِي جوءِ،
ھنَ پاڻِيءَ سين پانھنجو، مُورُ نہ مَٿو ڌوءِ،
جي پِرِينءَ پاسي ھوءِ، تہ ڪَر توڏِيءَ تَڙُ ڪيو.

بيت - 4

ساھَڙَ ڌاران سُوھڻِي، ھِيَ تان جُهڪِي زالَ،
توڏِي تَپُ شرُوع ٿِئو، ھَئِہ ھُنين جي حالَ،
جَڏِي رِيءَ جَمالَ، اَگِهي ٿِي آھُون ڪري.

بيت - 5

ساھَڙَ ڌاران سُوھَڻِي، آھي ۾ آزارَ،
ڏَمَ پاسي ۾ ڏُکَندو، صِحَتَ وَٽِ سَنگهارَ،
توڏِيءَ سَندي تَنَ جِي، دَوار ۾ دِيدارَ،
جي پَسي مُنهن مِهارَ، تہ سِگهِيائِي سَگِهي ٿئي.

بيت - 6

مَتان گهِڙين سُوھڻِي، اَڄُ دَرِياھہ ۾ دَمُ،
ڪارِيءَ راتِ ڪُنَنِ ۾، ڪَھڙو اَٿَئِي ڪَمُ،
مَتان جاڳي ڏَمُ، پُڇي پاڙي وارِيُون.

بيت - 7

پُڇي پاڙي وارِيُون، ڪوھُہ ڪَرِيندو ڏَمُ،
ڪَارِيءَ راتِ ڪُنَنِ ۾، ڪاڻياري جو ڪَمُ،
ھِيءُ ھَڏو ۽ چَمُ، گهوريون مُحبَ مِھارَ تان.

بيت - 8

ڏيهاڙي ڏَمَرُ ڪري، مَٿي مَحَبَتَ مُون،
تنھِن کي اَچِي تُون، پِرِين ڪوھُہ نہ پَليين؟

بيت - 9

جان جان ھُئِي جِئَرِي، وِرِچي، نہ ويٺِي،
وڃِي ڀُون پيٺِي، سِڪَندِي کي سَڄَڻين.

بيت - 10

جان جان ھُئِي جِئَرِي، ويٺِي نہ وساندِ،
لُڙھي لَهرِن پاندِ، مُيائِي مھارَ ڏي.

بيت - 11

وَرُ اُونداھِي راتَڙِي، چانڊُوڻِيءَ چانڊا،
اوري مِھارا، مُنھن مَ پَسان ڪو ٻئو.

بيت - 12

سَدا پُڇُ مَ سُوھَڻِي، اونداھِي اَڌَ راتِ،
پِريان ڏي پِرڀاتِ، وانءُ ڏيٺاڙي ڏيهَہ کي.

بيت - 13

سائِر ٻوڙِي سُوھڻِي، نہ ڍوري نہ ڍنڍ،
اَکين مَنجهہ اُڪَنڍَ، مُيائِي مھار ڏي.

بيت - 14

ساھَڙُ سُڪيءَ ۾ ٿِئو، پاڻِي مَنجهِہ پُنو،
سَندو ڪَچَ ڪُنو، تَارِ تَرندو ڪيترو.

بيت - 15

ساوَڻَ لَهرِيُون، ٿَرَ وارِي، تِرَ وارَ،
اِنهائِين اَپارَ، مُون سين ڀَلي ڀالُ ڪئو.

بيت - 16

نَہ مُون ناناڻِئان کَٽِئو، نَہ ڪِي ڏاڏاڻئان،
پِرِيَن جي پاران، مُون سين وَڏائي وَڙَ ٿِئا.

وائي - 1

ڪُهِہ ڄاڻا ڪيڏاھِين، منھنجو تَنُ تَڻي تيڏاھِين،
سائِين نيڻين نينهَڙُ، لَڳائي وِيڙا،
جيڏانهن عالَمَ آسَرو، مون پڻ آھي اوڏاھِين،
دُونھِين دوسَ مِھارَ جي، ڏِيي جئن ڏِٺائين،
ساري سُپيرِيَنِ کي، رَھَہ پَرِ رَتُ رُنائِين،
دامَن تيڏِي، چَنگُلُ ميڏا، روز قَيامَتَ تائِين،
پِيرُ اَسان جو حَضرَتُ مِيران، ڪُلَ جي آسَ پڄائِين.

وائي - 2

نَهِين نَهين ميڏي وَس، وو، بِنا دِلبَرَ ھِيَ دِلِ ماندِي،
سِڪان ٿي سَنگهارَ کي، بابِ نَہ مُنهِن جي بَس،
مُونکي مَتِ مِھارَ جِي، ڪانَ اَچي ٻِي ڪَسِ،
دَرِدَ دَسِي آھِيان، دَرِدُ مُهين جو دَسِ،
سُکُ نہ پُڇي سوھَڻِي، ڏُکُ ڏُکِيءَ کي ڏَسِ.

وائي - 3

لَڙَڪي لَنئُہ نَہ سُڃاتو، راندِ ڀايائِين راز کي.
اَنڌو اُلوھِيَتَ کان، آھي اِيءُ اُماٿو،
صُباحَ سو نَہ شمارَ ۾، ليکِئان جو اَڄُ لاٿو،
پَييسِ ڪاڻِ ڪَرِيمَ سين، ٿِئسِ نِمرودِي ناتو.

وائي - 4

مُنھِنجون سَڀيئِي آيَلِ ماءِ، مَنَ مُرادُون پُنِيُون.
جَهڙِي پِرِيان ڳالَهڙِي، تِهَڙِي ٻِي نہ ڪاءِ،
ڪِجي تان ڪوڏَ ٿِئي، سُڄي تان سِيباءِ،
وِھُہ داتا جي دَرَ تي، شُڪُر جَنھِن جُڳاءِ،
ڪانِهہِ حَدَ حَمدَ جِي، تہ ڪَرِيان لالَنَ لاءِ،
ڳَڻِئو ڳَڻِيان ڪيترِيون، وَڏِيُون وَڏاياءِ،
سو مُون ھَٿان نہ ٿِئي، جيڪي تو جُڳاءِ،
تو سَڄِيُون، تو سَندِيُون، سِڪَنِ توھِين ساءِ،
اُڃَ تنھنجي اُڃِيُون، لوچِنِ توھِي لاءِ،
دِلِ دانُهنِ ري نَہ رَھي، مون کي ماٺِ جُڳاءِ.

سُر سَسُئي آبري

داستان پھريون

بيت - 1

اَوّلِ آخِر آھِہ، ھَلَڻ منھنجو ھوتَ ڏي،
پورهِئو سندو پورھيَتين، والي ڪيم وِڃاءِ،
سو مون ٿورو لاءِ، جئَن جِئَري مَلان جَتَ کي.

بيت - 2

ڏري ۽ ڏاري، سَٽَ سورَنِ جي سَسُئِي،
پيائِي پنُونءَ ڏي، نِرمَلَ نِهاري،
لالَن جي لطيف چي، سُونهن سَتي ساري،
پريتڻون پاري، مارَڳَ ۾ مُنڌ مُئي.

بيت - 3

جي سِجهائي سِڪَ، ہ پِڻ سِڪي سَسُئِي،
پيتائين پُنونءَ کي، ھڏِ نَہ ڀَڳِيَسِ ھڪَ،
اِنَ تَڙَ منجهان تِڪَ، ڏِني پاڻَ اُڃَ ٿئي.

بيت - 4

پَسي جهاجهہ جَمالَ جِي، جنين کي سِڪَ،
اَپَرِ اَڳانجهو ٿئو، سُورُ اُنِهين کي سِڪَ،
ھڏِ نَہ ڀَڳِيَن ھِڪَ، سَدا سائِرَ سِيرَ ۾.

بيت - 5

مَحبتَ جَنِ جي مَنَ ۾، تَنِ تشنگي تارِ،
پي پِيالو اُڃَ جو، اُڃَ سِين اُڃَ اُٿيارِ،
پُنونءَ پاڻُ پِيار، تَہ اُڃَ سين اُڃ اُجهائِيان.

بيت - 6

مَحَبّتَ سَندو مَنَ ۾، پُرِ پِيالو جَنِ،
پِيَڻَ پَرَچا ناھِہ ڪو، ڪنھن جنھن ڏاھِہ ڏَڀَنِ،
جِنھِن نِهايَتِ ناھِہ ڪا، تنھن سُڃا سُڃَ وَڃَنِ،
تيلا ھِن اُڃَ مَرَنِ، سَدا سائِرَ سِيرَ ۾.

بيت - 7

سَدا سائِرَ سِرَ ۾، اَندرِ لَهي نَہ اُڃَ،
پَسَڻُ جو پِرينءَ جو، سا سَڀائِي سُڃَ،
تِيلاھن مَرَنِ اُڃَ، سَدا سائِرَ سِيرَ ۾.

بيت - 8

ساجَنَ ڪارَڻِ سُڃَ، مَرُ قبُولي سَسُئي،
اَندَرِ جَنين اُڃَ، پاڻِي اُچِئو اُنِ کي.

بيت - 9

پاڻي مٿي جهُوپڙا، مُورکَ اُڃَ مَرَنِ،
ساھان اوڏو سُپَرِين، لوچي تان نَہ لَهنِ،
دَمُ نہ سُڃاڻَنِ، داھون ڪن مُٺَنِ جئن.

بيت - 10

سَسُئِي ڪِينَ سَمُجهئو، اوري آريءَ ساڻُ،
ڪَري پيکُ پُنهونءَ سين، پاڌارِيائين پاڻُ،
ڄَٽِ وِڃايو ڄاڻُ، ٻانڀَڻِ ٻَروچَنِ سين.

بيت - 11

لَڳي ڪوسو واءُم جڳُ مِڙوئِي لَهسِئو،
اُڀَنِ مَنجهان آئيو، ھَئي ھَئي جو ھڳاءُ،
طُيورَنِ تَنوارِيو، پُنونءَ پُڄاڻاءُ،
رَسِئو سُورُ شَبانَ کي، وُحُوشَنِ وَٽاءُ،
مِرُوئَنِ موتُ قَبُولِئو، اَپَرِ اَفسوساءُ،
بَرَ پَڻَ ڪَنِ بُڪاءُ، اُڪَنڊئا آرِي لَئي گهڻو.

بيت - 12

مَحمَدِ مُحتاجِي ڪَري، پُٺِيءَ پيرُ کَڻيجِ،
ڪُٻيلِياڻِي ڪيچَ ڏي حُجَ مَ ھَلائيجِ،
پاڻان ڌارَ پِرِيتِڻون، سَسُئِي ساڻُ کَڻيجِ
اوڏِي عَزازِيلَ کي، ويجِهي تان مَ وَڃيج،
نا اُميدِي نيجِ، تہ اوڏِي ٿِيين اُميدَ کي.

بيت - 13

مَحمدِ مُحُتاجِي ڪَري، حُجَ وِڃائي ھَلُ،
عُذرّ خواھيون، عاجزيون، سَسُئِي ڪن مَ سَلُ،
ڏونگرَ ڏورَڻُ ڏاکِڙو، لَنؤَ ري ڪونهي لَلُ،
اِيءُ ڀَلائي ڀَلُ، جِئَن پاسي ٿِيڻُ پاڻَ کان.

بيت - 14

وھُہ مَ منڌَ ڀقنڀورَ ۾، ھاڙھي ھڏِ مَ ھَلُ،
ڪُوڙِي ڪَجِ مق ڪَڏَھين، سَچِي ڳالهہ مَسَلُ،
جانِبَ لئہِ مَ جَلُ، سُورُ وِسارِ مَ سَسُئِي.

بيت - 15

سُکين ٿِيءُ مَ سَنَرِي، پَسِي ڏُکَ مَ ڏَرُ،
پَٽي ڪَرِ مَ پانھنجو، گهورِي اَڏِ مَ گهرُ،
مارِي ھڏِ مَ مَرُ، مَڇُڻِ جِيءَ جِيارِئين.

بيت - 16

سُکين ٿِئيءُ مَ سَنَرِي، ڏکِين تان نَہ ڏَري،
اوري ھَڏِ نَہ اُڀئي، پُري تان نقہ پري،
سَرَتِيون، ٿو نَہ سَري، ٻنهين رِيءَ ٻانڀڻِ کي.

وائي - 1

تَنَ مَنَ منجهہ تَنوارَ، ھو يارَ! سَدا آھي سِڪَ جي،
تِئَن چِڻڪَن چِتَ ۾، جئن سا گَهنڊِي لارَ،
ھو يارَ! سَدا آھي سِڪَ جي.
لَڳِي اُڃَ اَکِين کي، سِگهو موٽُ ستّارَ،
ھو يارَ! سَدا آھي سِڪَ جي.
پَسان ڪينَ پِريتَڻُون، ڪاڏي پِرِت پَچار،
ھو يارَ! سَدا آھي سِڪَ جي.
بندِياڻِي ڀَنڀورَ ۾، آھيان آھِنِ ڌارَ،
ھو يارَ! سَدا آھي سِڪَ جي.
مُنکي ڇَڏِ مَ ڇَپَرين، آرِياڻِي آڌارَ!
ھو يارَ! سَدا آھي سِڪَ جي.
ڏِيان خيزُ خِزان ۾، جي تو مَنجِهہ بهارَ،
ھو يارَ! سَدا آھي سِڪَ جي.
مُضِرّ تان مون کي ڪِئا، حَڪِيمَنِ ھَزارَ،
ھو يارَ! سَدا آھي سِڪَ جي.
دَوا آھيين دِلِ جِي، وارو، واقِفَ ڪارَ!
ھو يارَ! سَدا آھي سِڪَ جي.
آڻي ڏي عَلِيلَ کي، مَعجُونُون، موچارَ!
ھو يارَ! سَدا آھي سِڪَ جي.
آھي عَبدُاللّطِيفُ کي، تنھنجي پِيَ پَچارَ،
ھو يارَ! سَدا آھي سِڪَ جي.

داستان ٻيو

بيت - 1

پَسي ڏُونگَرَ ڏاھہِ، جِمَ ھلَڻَ ۾ ھيڻِي وَھين،
لانچي لَڪَ لَطِيفُ چي، پُٺِيءَ ڪيچِيُنِ ڪاھِہ،
پُڇِي پُورج، سَسُئِي، بَلوچاڻِي باھہ
اِنَ وَڙائِتي وَرَ جِي، آسَرَ ھڏِ مَ لاھِہ،
جو اَکِنِئُون آڏو آھہ، سو پِرين پَراھُون مَ چئو.

بيت - 2

ھِتان کَڻِي ھُتِ، جن رَکِئو سي رَسِيُون،
ساڄَنُ سُونهن سِرتِ، وِکان ئي ويجهو گهڻون.

بيت - 3

جيڪُسِ يادِ ڪِئاسِ، وَرُ وڃِي وَڻَڪارِ ۾،
جَلدُ جَرِيدي پَنڌَ ۾، اَدِيُون اَڄُ ٿِياسِ،
وَڃِي ڪيچِ پُنِياسِ، ٻاروچاڻِي ٻاجهہ سين.

بيت - 4

واقِفِ نہَ وَڻڪارَ جي، اَڳُ نَہ ڏيهُہ ڏِٺومِ،
ڏُونگَرَ ڏوراپَنِ سين، ڪاتِيءَ رِي ڪُٺومِ،
جيلانهن مُحِبُ مِٺومِ، تي ڇُلون ڪَريان ڇَپَرين.

بيت - 5

واقف نہ وَڻڪار جي، پاڻِي کَنيُمِ نہ پاءُ،
جَبَلُ جَلدايُون ڪري، تِکَ ڏيکاري تاءُ،
لَڳي لُڪَ لَطِيفُ چي، مَعذورِن مٿاءُ،
اُتي اوڏو آءُ، جِتِ ھوتَ ھيڪلِي آھيان.

بيت - 6

واقِف نَہ وَڻڪارَ جي، جِتِ جَبَل جوراڻون،
اُتي عبدالطيف چي، سُڄي سَفَر سِٽاڻُون،
پهروئي پاڻون، سَوَلو ڪَريين ساٿَ جو.

بيت - 7

وَڏا وَڻ وَڻڪارَ جا، جِتِ جائو، جَمَرَ، جَرَ،
ڪوسا تَپَنِ ڪُڪِرا، ٻي دَمدَم تَپي ڌَرَ،
ويچاريءَ ڏي وَرَ، پيرُ نَہ لَهي پِرينءَ جو.

بيت - 8

وَڏا وَڻَ وَڻِڪارِ جا، جِتِ نانگَ سُڄَنِ نِيلا،
اُتي عَبۡدُاللَطِيفُ چي، ڪئا ھيڪَلي حِيلا،
جِتِ ڪُڙِمَ نَہ قَبِيلا، اُتِ رَسجِ رَھبَرَ راھَہ ۾.

بيت - 9

ويچاريءَ وَڻَڪارُ، اَڳُ نَہ ڏِٺو ڪَڏھين،
مِهَرَ نَہ ھئِي، ماڙُھين، ھو سَڀُ ھندُوڪارُ،
جَتُ ڪئائِين يارُ، سُورَنِ ڪارَڻِ سَرَتِيُون.

وائي - 1

ھو جي ھَلِئا ھوتَ سنُهارا، مُون نَہ وَھِيڻا، پُنُونءَ سَڱِيڻا،
سَسُئِي پُڇي ساٿَ جا، اوطاقُون اوتارا،
مُون نہ وَھِيڻا، پُنُونءَ سَڱيڻا.
آن ڪي ويندا گَڏِئا آرِياڻي اِھہَ پارا،
مُون نَہ وَھِيڻا، پُنُونءَ سَڱِيڻا.
ٽَلِيُون، ٽَوَنرَ، ھَلَوِيُون، مقيَنِ سِرِ موچارا،
مُون نَہ وَھِيڻا، پُنُونءَ سَڱِيڻا.
مُون کي نيندا پاڻ سين، ڪامِلَ ڪُرَ اُجارا،
مُون نَہ وَھِيڻا، پُنُونءَ سَڱِيڻا.
اَدِيُون عَبدُاللّطيفُ چي، دوسَ آيا دِلدارا،
مُون نَہ وَھِيڻا، پُنُونءَ سَڱِيڻا.

ابيات مُتفرقات

بيت - 1

جي تُون ڏِسي سَرَھي ٿئين، سي مَيَن لَنگهئا مَسَ،
تِٿُ تَنِ کي ناھِہ ڪو، لَڪَ، مڙيئي لَسَ،
حُبَ جَنين کي ھوتَ جي، وِندُرَ تَنِ کي وَسَ،
چانگَنِ سَندِي چَسَ، پيرَ ٺَرندَءِ پَٻَ ۾.

بيت - 2

مانباڻئان مَٽي وِئا، ليڙم لَنگهئو لَسُ،
وَٺِي وَاٽَ ٿِئا، پُنُونءَ ڄامُ پَهسُ،
ھُئو وَڏِيائي وَسُ، ٻاروچو ڀنڀور ۾.

بيت - 3

ڇَپَرُ ڇَمَرُ ڀانئيان، ڪانڀوُ ۽ ڪارو،
پَنڌُ وِجهندِيَسِ پاڻَ تي،سَرَتِيُون سوارو،
وَڃَڻُ مُون وارو، ڪِينَ وِھَندِيَسِ وِچَ ۾.

بيت - 4

وڏا وَڻَ وَڻڪارَ جا، جِتِ چَتُون چانگارِينِ،
مَنزِلُون مَيَنِ جُون، مَعذُورِ کي مارِينِ،
واڳوُن شلَ وارِينِ، ھُونِ سَلامَتَ سُپِرِين.

بيت - 5

وَڏا وَڻَ وَڻڪارَ جا، چِٻُنِ جِتِ چيهان،
مَنزَل دُور من تَنها، اُتِ ٻولِيُون ڪَنِ ٻيهان،
نَڪا پَهَرَ نَہ پيچَرو، ڪِينَ سُڄنِ ڪِيهان،
بَرَ ۾ بلائَنِ جُون، وَتَنِ ٿِيُون وِيهان،
رائِي پيرَ رتُ ڪِئا، لَڳي لُڪَ ڏيهان،
لَڪَنِ جُون لِيهان، لوڙيان عبداللطيف چي.

بيت - 6

واقِف نَہ وَڻڪارَ جي، اڳيان بارِي سُڄَن بَرَ،
وَرُ وَسِيلا سُپرين، ٿڪيَسِ ڏوري ٿَرَ،
لَهجِ لَعلَ لَطيفُ چي. ڪانڌَ مُئيءَ جِي ڪَرَ،
وِلهِي ڪَري وَرَ، متان مارڳُ ڇَڏھو.

بيت - 7

واقف جي وَڻڪار جا، وَنئُہ تنين جي سَڏِ،
ساٿِيُنِ ساڻُ سَيدُ چئي، لَڏو لڏي گڏِ،
نيئي نِماڻو نِجهرو، اوٺينِ پاسي اڏِ،
سُکَ ڀنڀوران ڇَڏِ، تہ ڪَهِي رَسين ڪيچَ کي.

داستان ٽيون

بيت - 1

پُنونءَ ڇَڏِئو پوءِ، جانِبُ جَبَلِ ڳوليين،
تيلاھين تَنگُون ڪَرين، جيلاھين تُون جوءِ،
ساجَنُ سُڃَ ڻِهارِئين، ڏُکِي ڏوھُہ ڪئوءِ،
ھاڙھي ھوتُ نَہ ھوءِ، وڃي پُڇُ ويٺِيُنِ کان.

بيت - 2

ورِي پُڇُ ويٺِيُن کان، سَندا پُنونءَ پارَ،
ساجَنَ، سَڀُ ڄَمارَ، ڏُکِي ڏورِجِ ڏِيلَ ۾.

بيت - 3

ڏُکي ڏُورجِ ڏِيلَ ۾، پُنوُنءَ پاڻَ ڳري،
پِرِين ڪِينَ پَري، ھيئين ڳولجِ ھوتَ کي.

بيت - 4

ھوتُ تنھنجي ھَنجَ ۾، پُڇِين ڪوھُہ پَهِي،
وَفِي اَنفُسِڪُم اَفَلا تُبِصرُونَ، سُوجهي ڪَرِ سَهِي،
ڪَڏَھِن ڪا نَہ وَئي، ڪا ھوتُ پُڇَڻَ ھَٽَ تي.

بيت - 5

ھوتُ تُنھنجي ھَنجَ ۾، پُڇيب ڪوھُہ پَرِياڻ،
سو تان توھِين ساڻُ، جَنھِن لَئي جَبَل ڳولِهين.

بيت - 6

ڪونهي اُتِ ڪوھيارُ، جِتِ تو ڀورِي ڀانئِيو،
پَنڌُ مَ ڪَرِ پَهاڙَ ڏي، وُجُودُ ئِي وَڻِڪارُ،
ڌارِئا ڀانئِجِ ڌارَ، پُڇُ پِريان ڪَرِ پاڻَ تون.

بيت - 7

سَڀَئِي ساري سَسُئي! گهرَ ڪُنڊون تُون گهورِ،
وڃِي ڏُورِ مَ ڏورِ، درا مَنجهہ دوسِتُ ٿئو.

بيت - 8

دَرا مَنجهِہ دوستُ ٿِئو، موٽي پُڇ پاھُون،
عَبَث آڳاھُون، وَڃئو ڪوڪين ڪانڌَ کي.

بيت - 9

پَرَ گهَران پاسو ڪَري، پُڇُ پِريان ڪَرَ پاڻُ،
سو تان توھين سانُ، جَنھِن لَئي جَفائُون ڪَرين.

بيت - 10

سوئي کَڻِئو ساڻُ، سوئِي ڏورِئين، سَسُئِي!
سو تان توھين ساڻُ، جَنھن لَئي جَفائون ڪرين.

بيت - 11

جو تُون ڏورِئِين ڏُورِ، سو سَدا آھي ساڻُ تو،
لالَنَ لَئہِ لَطِيفُ چي، مَنجِهي ٿِيءُ، مَعذُورِ،
مَنجهان پَهَہ پَرُوڙِ، تو مَنجهہ آھسِ تَڪِئو.

بيت - 12

وَڃِين ڇو وَڻِڪارِ، ھتِ نَہ ڳوليين ھوتَ کي؟
لِڪو ڪِينَ لَطِيفُ چي، ٻاروچو ٻي پار،
ٿِيءُ سَتِي، ٻَڏُ سَندِرو، پِرتِ پُنُونءَ سين پارِ،
نائي نيڻ نِهارِ، تو ۾ ديرو دوستَ جو.

بيت - 13

ڪوڙِيُون پُڇَنِ ڪيچُ، ھوتُ نَہ پُڇَن ڪا ھِتَهِين،
جَنِ پُنُونءَ سِين پيچُ، تَنِ پيرين پَنڌُ وِسارِئو.

بيت - 14

ھَلُ ھِيين سيين ھوتَ ڏي، پيرين پنڌُ وِسارِ،
قاصِداڻِي ڪارِ، ڪِين رَساڻي ڪِيچَ کي.

بيت - 15

ھَلُ ھِيين سين ھوتَ ڏي، ڇَپَرِ ھڏ مَ ڇُلُ،
رائي پُڇُ مَ رَندُ، رِڙھہُ رُوحانِي سَسُئي.

بيت - 16

ھَلُ ھِين سِين ھوتَ ڏي، ڇَپَرِ ھڏ مَ ڇُلُ،
آرياڻي اَمُلُ، ڪايا ۾ ڪانڌُ ٿِئو.

بيت - 17

ھَلُ ھِيين سين ھوتَ ڏي، ڇَپَر ڇُلُ مَ تُون،
مَنجهان لَڌو مُون، ڪوھِيارو ڪيچَ ڌَڻي.

بيت - 18

ھَلُ ھِيين سِين ھوتَ ڏي، سسِي کَڻُ مَ سَاڻُ،
جَنين ڀانئيو پاڻُ، سي آرِياڻِيان اوري رَھيُون.

بيت - 19

ڪَجي پَنڌُ، پُڇان تو، ڪيچِيُنِ ڪارَڻِ ڪِيئَن؟
بيخُود ھلِجِ بَرَ ۾، آئُون ٿو چُئان اِيئَن،
سِڪَڻُ ساجَنَ سِيئَن، مَتان، مُٺِي ڇَڏِيين.

بيت - 20

مَتان مُٺِي ڇَڏِيين، پريتَڻون پاڻان،
ڄاپَنِ جِئن ڄاڻان، تون پُڻُ ھوئِجِ تن سان.

بيت - 21

مَتان مُٺِي ڇَڏِيين، پاڻان پِريتڻون،
کَٿُورِي ڪَڻو، مَڙھي مَڙھجِ مُنھن ۾.

وائي - 1

غَفلَت يارُ گَنوائيو، ٻڙي! جيڏيُون،
ڪيئَن ڪَرِيان آئُون ڪُهِہ ٿِئو؟
سُتِيَسِ تان ساٿُ وِئو، اُٿيَسِ تان ڏُکُ آئِيو،
ڪيئَن ڪَرِيان آئون ڪُهِہ ٿيو؟
پُڇان پوءِ پُنونءَ کي، عَبَثُ تان اَنُ کائِيو،
ڪيئَن ڪَرِيان آئون ڪُهہ ٿِيو؟
ھوتَ ھَلَندي جا ڪَئِي، سا مُون ڳالهِہ سُوڻائِيو،
ڪيئَن ڪَرِيان آئون ڪُهِہ ٿِيو؟

داستان چوٿون

بيت - 1

ھيجُ نہ ھُوندي جَنِ، سي ڪِيئن وِندُرِ وِيندِيُون،
وِھو وِچِ رَھنِ، سَهَسين سَڌُنِ وارِيُون.

بيت - 2

سَڌائِتِي سَڀَڪا، بُکَ نَہ باسي ڪا،
جيهي تيهي ذاتِ جيِ، جُنبَشِ ڪانهي جا،
مُون سين ھلي سا، جا جِيءُ مِٺو نَہ ڪَري.

بيت - 3

ڪيچِ نَہ جُنبَڻَ جاءِ، تَہ ڪا ھلي ھوتَ ڏي،
مون سِين ھَلي ساءِ، جا جِيءُ مِٺو نَہ ڪَري.

بيت - 4

آتَڻَ ۾ پَرياڻُ، ھو سَڀَني جيڏِيين،
مُون سَڀاڳِيءَ ساڻُ، ڪيرَ ڇُلندِي ڇَپَرين؟

بيت - 5

سُکَنِ وارِي سَڌَ مَتان ڪا مُون سِين ڪَري،
اندرُ جَنِين اَڌَ، ڏُونگرَ سي ڏورِيندِيُون.

بيت - 6

ڏونگر نَہ ڏوري، سِڪَڻَ جُون سَڌون ڪَري،
گهَرَ ويٺي گهوري، مَٿان پِرِيَنِ ڄِندُڙو.

بيت - 7

وَريتيُون وَرو، آئُون نَہ وَرَندِيَسِ وَرَ ري،
جاڏي ھنَ جَبَلَ جو، تانگهيندِيَسِ تَرو،
جَتَنِ ساڻُ ذَرو، نِينهن نِبيرِڻُ نَہ ٿِئي.

بيت - 8

وڃو سَڀِ وَرِي، اَئِين جي وَرَن وارِيُون،
ڦوڙائي فِراقَ جي، سُڄي ڳالهہ ڳَرِي،
ٻُنڀان جَنَ ٻَرِي، ڏُونگرَ سي ڏوريندِيُون.

بيت - 9

وڃو سڀ موٽي، اَئِين جي وَرَن وارِيُون،
ڪا نَ ھَلندي ڪيچَ ڏي، ڪَرئو مَ کوٽي،
ڪَڍِيَمِ ڪا ڇوٽي، وِڌُمِ جوڳُ جَتَنِ لئي.

بيت - 10

اَئين جي وَرقنِ وارِيُون، سَرَتِيُون سَڌڙِيون،
آرِياڻِي پُنوُنءَ جي، ٻولَ نَہ ٻَڌَڙِيُون،
جي لکِئي لَڌَڙِيُون، ڏُونگرَ سي ڏورِينديون.

بيت - 11

اَڄُ مَلِيندِيَسِ ماءِ، ڌاڄا ڪَندِيَسِ ڪَپڙا،
جِيجان جوڳِياڻِي ٿِيان، مونکي جهلَ مَ پاءِ،
ھوتَ ٻَروچي لاءِ، ڪَنين ڪُنِرَ پائِيان.

بيت - 12

مُون کي ڀانئي ڀاڄَ، ڏيرَ ڏُوراڻا ھلئا،
اڳِئان اُٿِي اُنِ جي، خُوبُ نہ پَڪَمِ کاڄَ،
ميڙي آپَ سَرَتِيُون، نَڪِي ڳايَمِ ڳاڄ،
سا مُون ھٿان نہ ٿِي، جيڪا رَسَمَ راڄَ،
آيَل آئون اَڪاڄَ، ٻولُ ٻَروچي وِتَرو.

بيت - 13

عِناتا! اُتاھين، جاني جڙي ٻنڌُ،
آھي گهڻو اَھُکو فَقيريَ جو فندُ،
چَکين نَہ چَرئو ٿيين، مَيخاني جو مَنڌ،
ڪِينَ ڪڍِبو ڪَنڌُ، منجهان سَڱ سَيدُ،

بيت - 14

تو جو ٻولُ ٻَروچَ، ويهي ڪئو وَڻِڪارَ ۾،
سوئي پارجِ ھوتَ، وِلَهي مُون معّذور سين.

بيت - 15

پِهرِين تُون پاريجِ، پارَڻُ پوءِ پُنهونءَ تي،
ٻولُ مَ وِساريجِ، ھو جو ڪيوءِ ھوتَ سين.

بيت - 16

تو سين ٻولَ ٻَهون، سَهسين ساجنُ جي ڪري،
ڪَنڊِيين توءِ ڪَهُون، جي نالو ڳِيَڙُءِ نِينهن جو،

بيت - 17

سُڻِي ٻولَ سَندانِ، جِمَ سُمَهين سَسُئِي،
ڪَندِيين ڪُهِہ ڪيڻانِ، جہ سي اُنِ اورانگهِئا.

بيت - 18

سِجَ اُلَٿي سَسُئِي، رَتَ وَرَنو روءِ،
پَهي نَہ پانڌِي ڪو، جَنھِن ڪَرَ پُڇي لوءِ،
موڙِھي وڃي توءِ، موٽَڻَ جِي ڪانَ ڪَري.

بيت - 19

ڇُلان، مَنجهمِ نَہ ڇاڪَ، پُران پَونِمِ پُرِڪَڻا،
مَتان ڪا مُنڌَ ڪَري، موٽَڻَ جِي مَذاقَ،
چِتُ سَندو مُون چاڪَ، ھاڙي ھڏِ ھڻِي ڪيو.

بيت - 20

پيرين پَيمِ پُرڪَڻا، رُھَہ ۾ گهَڻو رُنومِ،
پاراتو پُنونءَ کي، تَپِي تان نَہ ڏِنومِ،
چُڪِي ٿي چَيومِ، سُواھرُو سَڄَڻِين.

بيت - 21

چُڪِيءَ کي چَئي، ڪا جاڳائِي جِيڏِيُون،
وِيڙو ساٿُ وَھِي، تو ننڊان ئِي نَہ لَهي.

بيت - 22

چُڪسِ سَڀُ چَئي، ماڙھُو شَهرَ ڀَنڀورَ جا،
سا موٽي ڪيئن مُئي، جنھن جو جانِبُ جَتَ وٺي ويا.

بيت - 23

موٽَڻَ جا مَذڪُورَ، جان ڪِي چَيَسِ جيڏيين،
پَريٽِ پِهرين پُور، نيئِي پُهچائِي پُنونءَ کي.

بيت - 24

موٽَڻَ جي مَصلحَتَ، مون کي ڏِئو مَ جيڏِيُون،
نِهارِيندِيسِ نِڪري آرياڻِي اِلَبَتِ،
ڪَندِيَسِ اوٽَ عَيبَ جي، لَڪَنِ ڏيئي لَتَم
سَرَتِيُون شَرِيڪَتَ، آئون ڪِيئَن آگن سِين ڪَرِيان.

بيت - 25

موٽِي مَران مَ ماءِ،موٽَڻَ کا اَڳي مَران،
لُڇِي لالن لاءِ، شالَ پُونديَسِ پيرَ تي.

وائي - 1

مَعلُومُ حالُ، حَبيبَ! مُون کي دَردُ قدِيمي،
دَردُ جَدِيدِي حب حَبِيبي.
آلُودِي آزارَ سان، توري ٿِيسِ طَبيبَ،
دَردُ جَديدِي حُبّ حبيب.
شادِي ڏيين صِحَتَ جِي، غَمِي لاھِہ غَرِيبَ،
دَردُ جَدِيدِي حُبّ حَبِيبي.
آھئان ٿِي آھُون ڪَرِيان، نَعرو مَنجِهہ نَصيبَ،
دَردُ جَدِيدِي حُبّ حَبِيبي.
ڪاھِلِ آھِيان ڪُوَڙِي، نوري ڏِيمِ نجيبَ،
دَردُ جَدِيدِي حُبّ حَبِيبي.
حاذِق آھيين ھِن جو، اَچِين شال عَجِيبَ،
دَردُ جَدِيدِي حُبّ حَبِيبي.
دَوا آھيين دل جي پُڇ پُڇ رَھيَس طَبِيبَ،
دَردُ جَدِيدِي حُبّ حَبِيبي.
اَلا! عَبدُاللّطِيفَ کي، ڪوڙي لاءِ قَرِيبَ،
دَردُ جَدِيدِي حُبّ حَبِيبي.

داستان پنجون

بيت - 1

ڀَڄي جان ڀَنڀورَ، ڏُونگرُ ڏُورِئو مُون،
ڪاھي رَسِيَس ڪيچَ کي، جِتي پاڻَ پُنونءَ،
سَڀَتِ آھيين تُون، قَضا ڪَنديس ڪِنِ سين؟

بيت - 2

پيهي جان پاڻَ ۾، ڪَيَمِ رُوحَ رِھاڻِ،
تہ نَڪو ڏُونگَرُ ڏيهہَ ۾، نَڪا ڪَيچِيُنِ ڪاڻِ،
پُنون ٿِيَسِ پاڻَ، سَسُئِي تان سُورَ ھئا.

بيت - 3

ڏِنا جِئَڻَ لئہِ، جيڏيون، ڏيرنِ مونکي ڏُکَ،
ڀَڳِيَس جان ڀَنڀورَ کان، تان سورَ ميڙيئي سُکَ،
لَٿِي مون تان لُکَ، پُنونءَ ٿِيس پاڻهين.

بيت - 4

پُنونءَ ٿِيَس پاڻَهِين، وئو سَسُئِي جو شَرَمُ،
ھيڪَليُون ھلَنِ جي، ڀَڄي تَنِ ڀَرَمُ،
جو وِندُر ۾ وَرَمُ، سو سودو سَرِئُسِ ھِتَهين.

بيت - 5

پُنونءَ ٿِيسِ پاڻَهِين، وِئوپ سَسُئِيءَ جو سِنگارُ،
”مَنَ عَرَفَ نَفسَهُ فَقَد عَرفَ رَبَّهُ“، اِھو ئِي آچارُ،
جو ونُدرَ ۾ واپارُ، سو سودو سَرِئُسِ ھِتهين.

بيت - 6

پُنونءَ ٿِيَسِ پاڻهين، ويئِي سَسُئِيءَ جي سُونهن،
”خَلَقَ آدَمَ عَليٰ صُوۡرَتِهٖ“ اِيءَ وَڻَنِ ۾ وِرُونهَن،
چَرِيَ مَنجهان چُونهَن، کَڻِي ھوتَ ھنجِ ڪئو.

بيت - 7

ويئِي سُونهن سَنُئِي جِي، پُنونءَ ٿِيَس پاڻَ،
سَڀِنِ جِي سَيّدُ چي، آھي اُٺِ اُماڻَ،
ڀَنڀورَ جا ڀاڻَ، آڏا عَجِيبَن کي.

بيت - 8

وَھَمَ وِرساياسِ، ناتَ پُنونءَ آئُون پاڻَ ھُئي،
پاڻُ وِڃايُمُ پانھنجو، پَئِي پِريان جي پاسِ،
رَتِي عِلِمَ نہ راسِ، ڌاران پَسَڻَ پِرينءَ جي.

بيت - 9

قافين ڪاھِيندَياسِ، موٽان تان ڪُرَ ميهَڻون،
ٻانهِي ٻاروچَنِ جي، سَڱُ نَہ ساھِيندِيَاسِ،
”اَلَفِراقُ اَشَدّ مِنَ الموتُ“، ھتي نَہ ھوندِياسِ،
آھہَ نَہ لاھيندِياسِ، جِئَري جَتُ ڏِسي مَران.

بيت - 10

جِيَڻُ جَتَ ڌَارا، معذورِ جو مَسَ ٿِئي،
چانگِنِ سِر جَڙھي وِئا، ساٿِي سَوارا،
اَکِيُون اوتارا، پَسِئو رُوَنِ پُنونءَ جا.

بيت - 11

ھيڪَرَ ھُوَنُ ڇَڏِ، تَہ اوڏيٿِيين عَجيبَ کي،
”مَارَاَيۡتُ شَيۡئًا اِلاَ وَرَاَيۡتُ اللہَ“، نيئي اجها اوڏاھين اَڏ،
تہ ھوتُ تونهين کان ھڏِ، پِرِين پاسي نَہ ٿِئي.

بيت - 12

ووڙِئَمِ سَڀِ وَٿاڻَ، جَتَ مُقابِلِ جيڏِيُون،
”اَللہُ بِڪُلّ شَيۡءٍ مُحِيۡطُ“، اِيءُ آرِياڻيءَ اُھڃاڻَ،
سَڀَ ۾ پئونءَ پاڻَ، ڪِينهين ٻئو ٻَروچَ ري.

بيت - 13

ڄاڻي سُڃاڻي، وِھان ڪِيئن ماٺِ ڪَري،
انَدرِ آگ عِشقَ جي، اَپَرُ اُڌاڻي،
”اَلعِشِقُ نارُ اللہِ القموقَدَﺔ“ کُورِي جِيئَن کاڻِي،
آھي آرِياڻي، ٻيو سَرتِيُون سُجهي ڪو نہ ڪو.

بيت - 14

سَرتِيُون سَڀوئي، اَندَرِ آرياڻِي،
ويٺِي پسان پاڻ ۾، ڏونگر ڏيهاڻي،
ھُيَسِ ھوتَنِ ھاڻِي، تي ڪيچِي گَڏِيَمِ ڪَهہَ ۾.

بيت - 15

ڪَڍَ پُنونءَ ڪاھي، چاٽي رُوحُ چَرئو ڪِئو،
اُٿي ويٺي اوڏھين، سُتي پُڻُ ساھي،
”اَلعِشقُ حِجابُ بَيُنَ اُلُعاشِقِين“ لاشڪ ٿيءُ لاھي،
آرِياڻِي آھي، ٻِئو سَرتِيُون سُڄي ڪو نَہ مُون.

بيت - 16

ڀينَرُ آئون ڀورِي، مُون سَڱُ سُڃاڻي نَہ ڪئو،
ڏِيندا مُون ڏيرَ وِئا، جهِڄَڻُ ۽ جهوري،
لَڳي جَنِ لوري، ڏُونگرُ سي ڏورِيندِيُون.

بيت - 17

اَديون آئون اَڄاڻِ، مون سَڱُ سُڃاڻي نَہ ڪئو،
ھُند نَہ سَٺِيمِ ھيتري، ڪوھِياري جي ڪاڻِ،
رَتِيءَ جي رِھاڻ، جِيءُ اَڙايُمِ جَتَ سين.

وائي - 1

اَھُکي آڳهہُ آھي، وو، آھي،
مونکي تان نَہ ڇَڏِيندو تِکَ ۾،
پُڇي پيءِ پِئنِ کي، لَڪَنِ ۾ لَڏِ لاھي،
مونکي تان نَہ ڇَڏيندو تِکَ ۾،
آري اُگهاڙَنِ کي، پُنونءَ ڄامُ پراھي،
مونکي تان نہ ڇَڏيندو تِکَ ۾.

وائي - 2

پُنونءَ پريشان ڙي، نہ ڪو ڄام نہ خانُ،
ھَئي ھَئي حالُ مُنھنجو پُنونءَ پريشان،
مون کي بَڪ بوتَنِ جِي، ناڪي ڀانيان نانُ،
ھَئي ھَئي حالُ مُنھِنجو،
شهرَ پَٽَ ڀانئيان مُون ليکي ميدانُ،
ھَئي ھَئي حالُ مُنھِنجو،
رُئان ٿِي رِڻَنِ ۾ آريَ لَئي عُريانُ،
ھَئي ھَئي حالُ مُنھِنجو،
پِٽيان مُنھن پَسڻ لئي، ھتي ٿِي حيرانُ،
ھَئي ھَئي حالُ مُنھِنجو،
آھي آرِيَ ڄامَ جو، مُون کي ڪارِي ڪانُ،
ھَئي ھَئي حالُ منھِنجو،
دِيوانِيءَ جي دِلِ ۾، سُورنِ جو سامانُ،
ھَئي ھَئي حالُ مُنھِنجو،
وِجهجِ پِڪَ پِينارِ تي، پِرِيَمِ کائِي پانُ،
ھَئي ھَئي حالُ مُنھِنجو.

داستان ڇھون

بيت - 1

جَڏائِيَ جو جامُ، ڏِنائُون ڏُکِيءَ کي،
مَنگلُ مُنھنجي مَنَ ۾، ٻارِئو ھوتَ حَمامُ،
آرکِ ٿِئو آرامُ، ڪاڪُلُ پَسِي ڪانڌَ جو.

بيت - 2

دَرِدُ نَہ لَهي دارُئين، زُلِفَن زورُ ڏِنومِ،
ڪاڪُلُ ڪالَهہ ڏِٺومِ، رُخساري تي رُوپَ سين.

بيت - 3

ڀنڀو جو ڀنڀورَ ۾، ڪاڪُلُ ڏِٺُمِ ڪالَهہ،
ھَئِہ تَنِين جي حالَ، زُلِفَ جي زافُ ڪِيُون.

بيت - 4

پَرِيندِھِمِ پاڻَ وِئو، زُلفَ ڪِيَسِ زافُ،
سَندو ڪاڪُلَ ڪافُ، ماري مَعذورَنِ کي.

بيت - 5

ھاڻِ نَہ جِيان، جيڏِيُون، زُلفَ زافُ ڪَياسِ،
ڪاڪُلَ آئون ڪُٺِياسِ، ڀَنڀو جو ڀَنڀورَ ۾.

بيت - 6

ڪاڪُلَ ڪُٺِي جا، ڪفَنُ تنھن ڪين ٿئي،
مَنجهہ شَهادَتَ سا، لُڏي ۽ لاڏَ ڪَري.

بيت - 7

ڏَکا، ڏُونگرَ ڄامَ، مَ ڪَرِ مَعذُورِنِ تي،
توتي لَڄَ لَطِيفُ چي، آھي سَندِي عامَ،
مارِ مَ چَئي موٿاجِ کي، وَھِيا ڪانڌَ ڪَلامَ،
پَرِچِجِ پِيادِينِ سين، اَللہَ لَڳِ عَلامَ،
جا نَوازِي آھنجي نامَ، سا ھوتَ مَ ڇَڏِجِ ھيڪَلِي.

بيت - 8

ڏَمَرُ ڏُونگر ڄامَ، سَکَرَ، پاڻَ شَريڪَ سِين،
ڪيهي ڪُلفَتَ تَنھِن سِين جا گولِي اھنجي گامَ،
وَرِجِ تُون وَرِيامَ، منھنجو اَچَڻُ آن ڳَري.

بيت - 9

ڏُکا ڏونگرَ لاھہِ، آڳُ مُئِي سَسئي،
آرِياڻِيءَ سين آھہِ، ذاتِي سَڱُ ضَعِيفِ جو،

بيت - 10

پير پَٽائِين ڪُنئَرا، ڏُونگَرَ مَٿي ڏي،
ڦَٽِئا ڦَڻَ فَقِيرِ جا، سيرُون ٿِئڙا سي،
جهڙي تجهڙي حال سين، پُري پُنونءَ ڏي،
وَڃي مانَ وَري، ٻانهِيءَ ٻَنڌَڻُ جنھن سين.

بيت - 11

پيرَ پَٽائِين ڪُنئَرا، ڏُونگرَ مَٿي ڏي،
پاڻُ نَہ پَسي ڦَٽئو، ڪَڙِھي ڪيچِنِ کي،
ھاڙھو ھوت پَري، ڪُهِہ ڄاڻان ڪيئن لنگها؟

وائي - 1

مُون اَنڌييءَ ڏي اِيندا، اڄ اِيندا،
ھوتَ سلامَتَ سُپِرِين.
پَلَئِہ لائي پانھنجي، نِيءَ کي اُتِ نِيندا،
ھوتَ سَلامَتَ سُپرين.
سَڱُ نَہ ڪندا سُکَ سين، سُورَ سَڱِيڻا ٿيندا،
ھوتَ سَلامَتَ سُپرين.
رَکي ڳلُ ڳَلَنِ تي، نِينهَن نِياپو ڏِيندا،
ھوتَ سَلامَتَ سُپرين.
پَرِيٽِ نِيندا پاڻَ سين، ڇورِي تان نَہ ڇَڏِيندا،
ھوتَ سَلامَتَ سُپرين.

داستان ستون

بيت - 1

ڏورِ مَ ڏيھہ وئو، پيرُ تُنھنجي پِرينءَ جو،
وِھَڻُ واٽَرِيَنِ تي، ڪِيچنِ رءَ ڪِهو؟
وِندُر جو وِئو، سو اَللہُ واري آڻِيين.

بيت - 2

ڏيهُہ ڏيهائِين ڏُورِ، پَر ڏيهان پَري ٿِئا،
سيڻَنِ ڪارَڻِ سَسُئِي، پيئِي پَراھين پُورِ،
تُون وَڃِين ھوتَ حُضورِ، مُنھنجو جِيَڻُ جيلاھِيَنِ ٿِئي.

بيت - 3

ھيڪاندِيءَ ھوئِي، اُٿِي راتِ رَوان ٿئا،
ساھُہ سَڳي ۾ سُورَ جي، پُنونءَ وِئو پوئِي،
رَھُہ قَضا دَمُ ڪوئِي، تَہ ھيڪَرَ ھيڪاندِي ٿِئان.

بيت - 4

ھَڏِ نَہ ساھُہ سُڌِيرُ، دِلِ دَرماندِي دوسَ ري،
پائي وِئَڙا پِرتِ جو، زوراوَرُ زَنجِيرُ،
جِيءُ جُسو، جاڳِيرُ، ھاڻي مِلڪَ ھوتَ جي.

بيت - 5

عُمِرِ سَڀِ عِشقَ سين، پُنونءَ جي پُڇَنِ،
رِيسَ ريزالِيُون تن سين، ڪُڄاڙي کي ڪَنِ،
مارَڳِ جي مَرَنِ، وڏو طالِعُ تن جو.

بيت - 6

وِندُرِ جي وَڃَن، سي مَرُ ٻَڏَنِ سَندِرا،
ٻِيُون ڪوھُہ ٻَڌَنِ، ڇوڙي جي ڇَڏِينديُون.

بيت - 7

وڏو طالِعُ توءِ، جِئَن لَڳِئَن پيرِ پُنونءَ جي،
سَسُئِي اِنَ سُتونَ کي، رويو رويو رُوءِ،
ويٺي ھِتِ مَ ھوءِ، جي ھَلين تَہ ھوتُ لَهِين.

بيت - 8

ويٺين ناھہِ وَراڪو، سُتِيَسِ ڪونهي سَنگُ،
ھوتُ ھَلندن کَٽِئو، جَنِ اَنگنِ
باسي پَئي ڀَنگُ، رِڙھي ڄامَ رَسِيُون.

بيت - 9

ويٺي وَرِ نَہ پُوَنِ، سُتي مِلَنِ نَہ سُپِرِين،
جي مَٿي رَندَنِ رُونِ، ساڄَنُ مِلي تنِ کي.

بيت - 10

ڪَڙھي ۽ ڪَڙي، پَرِ ۾ پيرُ پُنهونءَ جو،
سِڪَ ٻَڌائِين سَندرو، جانِبَ لَئي جَڙي،
لَڪَنِ سِرِ لَطيفُ، چَي مُنڌَ جهيڙي جَهڙِي،
پَڻِيءَ تان نَہ پَرِي، جي عُمِرِ سَڀَ اِيئَن ڪَري.

بيت - 11

ڪِ ڪِي ڪَڙِيان پير، ڪِ ڪَڙِھان ڪيچَ ڌَڻِين لَئي،
اِيءُ ڏَنءُ ڏيئي ڏيرُ، پاڻان پَراھان وِئا.

بيت - 12

ڪَڙھُہ پُڻُ ڪيچَ ڌَڻينِ لئي، ڪَڙِ پُڻُ پيرَ سَندانِ،
اُنهِين پَرِ اُتانِ، پَوندَءَ مُنڌَ پَهاڙَ ۾.

بيت - 13

سُورَنِ سِجهَائِي، جيلهِہ ٻَڌِئو چوٽيين چَڙھِي،
سَڱَ پِريان جي سَسُئي، ميڙي مِلائِي،
لَڌائِين عَبدالَطِيفُ چَي، لَالنُ لالائي،
ٻانڀَڻِ ٻاڏَائِي، حبَئان وارِئو ھوتَ کي.

بيت - 14

رائي ڪِي رَنجُورَ، ٽَڪَرَ توءِ ٽانڪِئو چڙھي،
لانچي لَڪ لَطِيفُ چي، ھَلي ڏانھن حُضُورَ،
رَھِيا سَڀِ رُڃُنِ ۾، سَسُئِيءَ جا سالُورَ،
ساجنُ ميڙيُسِ سُورَ، سُکَ نہ ميڙئين سُپِرِين.

بيت - 15

مَنجهان پَئي پَرُوڙ، سَڀَ مَ پُڇِجِ سَسُئِي،
ويهي وَڏي ڍِڳَ مان، ڌُڻِي وِجهجِ ڌُوڙِ،
تَہ تون ماڻِيين مُوڙِ، جي پَندِ اِھائِي پارِيين.

بيت - 16

لُڇي ڪِينَ ڪُڇي، آٽي مُنڌَ اندوھہَ ۾،
پَرِ ۾ پيرُ پُڇي، لالنَ جو لَطِيفُ چي.

بيت - 17

ٻَرِيائِي تان ٻارِ، ڦُوڪِ تہ لَڳي اَنبرين،
ھِتي جي ھُئڻَ جُون، وَٿُون سَڀِ وِسارِ،
سَمُوري سَرِڪارِ، نيئِي رَکِجِ ناھِہ ۾.

بيت - 18

قَدُ ٻَڌِي، تُون ڪِينِ، پَهُچندِيئن پُنونءَ سين،
جي سِينو ساھِنِ سَسُئِي، سي تَهابرون ٿين،
مُٺِي ٿِيءُ مِسِڪِينِ، حُجَتَ ھوتُ وِڃايئي.

بيت - 19

ٻَلَرِ لَڳو ٻاڻُ، پَسو، جوءِ جَرا ٿِئي،
سا مُنڌَ مَري نَہ جِئي، پيئِي پَڇاري پاڻُ،
سَسُئِي سُورَنِ ساڻُ، سَنڀوڙِي سَيّدُ چي.

وائي - 1

ٻاروچام ٻاجَهہ گهڻِي، آن ٿِي ڇُلان ڇَپَرين،
آئون پنھنجي پِرِيَنءَ سين، وِيندِيَسِ واڳَ وَڻِي،
آن ٿِي ڇُلان ڇَپَرين.
مَرُ تان بوئِمِ مُنھَن ۾، سَندِي پِيَّ پَڻِي،
آن ٿِي ڇُلان ڇَپَرين.
ڪونهي ھِنَ ڀَنڀورَ ۾، ڌاران دوسَ ڌَڻِي،
آن ٿِي ڇُلان ڇَپَرين،
ھَٿان ھَڏِ نَہ ڇَڏِيان، آرِيءَ جِي پِہ اَڻِي،
آن ٿِي ڇُلان ڇَپَرين.
آھي ھوتَنِ ھَٿَ ۾، سَندِي جِيءَ جَڻِي،
آن ٿِي ڇُلان ڇَپَرين.
ڪِينَ وِرمِيا ڪِٿهين، ڄُلِيا ڄَڻَ ھَڻِي،
آن ٿِي ڇُلان ڇَپَرين.
مُون کي ڪوٺِئو پاڻ ڏي، ھادي ھٿُ کَڻِي،
آن ٿِي ڇُلان ڇَپَرين.
پُنونءَ ڌاران پَٻَ ۾، ٻيلي ناھہ ٻَڻِي،
آن ٿِي ڇُلان ڇَپَرين.
تورِيءَ تيلُ نَہ پائِيان، نَڪا سِينڌِ ڦڻِي،
آن ٿِي ڇُلان ڇَپَرين،
اَدِيُون عَبدُاللّطِيفُ چي، لَڳِيَمِ تَنَ تقنِي،
آن ٿِي ڇُلان ڇَپَرِين.

داستان اٺون

بيت - 1

اَڌَرِ، نِڌَرِ، اَڀَرِي، اَسُونهِين آھِيان،
لُڙِڪَ لَعۡکَ لَطِيفُ چي، وَرَ لَئي وَھايان،
ھيجان ھَنجُون حَبَ ۾ ھوتَنِ لئي ھارِيان
جانِبُ ضَعِيفِيءَ سين، پُنونءَ پَهايان،
پِيهان، پَچايان، جي مون نِئو پاڻَ سين.

بيت - 2

اَڌرِ، نِڌرِ، اَڀَرِي، آھِيان اَسُونهِين،
پَرَ ڏيهي پِرِين ڪِئا، مَرَڻَ لَئي مُون ھين،
سَسُئِي کي سَيّدُ چي، تَنگُنِ ۾ تُون ھين،
ھارِي ڪِينءَ ھون ھين، رِي سَمَرَ سَڌُون ڪَرِين؟

بيت - 3

اَڌَرِ، نِڌَرِ، اَڀَرِي، اَسُونهِين آئون،
چيٽا چورُ جنجُنِ ۾، بَرَ ۾ بَلائون،
موٽُ پُنونءَ پاھُون، مَتان مُحبَ مَرِي رَھان.

بيت - 4

اَڌَرِ نِڌَرِ، اَڀَرِي، اوڳِي اَوائِي،
ڪِينَ ٽِهاري ٽَڪِرِين، سَاڻِس سَڳائِي،
لاڳاپَنِ لَطِيفُ چَي، مَنڌُ رائي رَھائِي،
جَلَڻُ، جَڏائِي، آرِي لاھِہ اَصِيلِ تان.

بيت - 5

اَڌَرِ نِڌَرِ، اَڀَرِي، غَمَنِ گُماٽِي،
سا ڪِيئَن وھي ويسَرِي، جاگهائِي گهُماٽِي،
پيئي پيش پُنونءَ جي، اُسَنِ ۾ آٽِي،
جا لُڪنِ لُوساٽِي سا سيجَ چَڙھَندِي سَسُئِي.

بيت - 6

اَچي عِزرائِيلَ، سُتِي جاڳائِي سَسُئِي،
ٿي دوڙائي دَلِيلَ، تہ پُنوءَ ماڻِهون موڪَلِيو.

بيت - 7

مُنۡڪِرَ ۽ نَڪِيرَ کي، جڏھن ڏِٺائِين،
اَڳِيان اُٿي اُنِ کي، پُنوءَ پُڇِيائِين،
اَدا اِھائِين، ڪو وئو ساٿُ سَڄَڻَ جو؟

بيت - 8

ڀاياڻِي ٿِي ڀورِ، پُٺِي ڪيچِينِ ڪَڪِرا،
رائو مِڙيوئِي رَتَ، ڪارَڻِ ڪانڌَ ڪَڪورِ،
لانچي لَڪَ لَطِيفُ چي، اُٿِي ڏُونگرِ ڏورِ،
جَتُ وَڃي ٿو زورِ، اُپِڙُ تہ اوڏِي ٿِيين.

بيت - 9

پَئِي ٿِي پَئِمالُ، سا مُنڌ مَري نَہ جِئي،
پُري ھِنَ ڀَنڀورَ سِين، ھَڏِ نہَ ڳَرھِي حالُ،
لالنَ جو لَطِيفُ چي، وِساري نَہ وِصَالُ،
ڀِري ڪِجاس ڀالُ، ھِي ڏاھَہ ڏورِيندِي ڪيتِرو.

بيت - 10

جُهٽَ پِٽي، پِهُہ جَهنگِ، ھاڙھي پُڇُ مَ ھوتَ کي،
سُورُ سُٻيلِي سَسُئِي، لَڪَ تَهِين سين لَنگِهہ،
تہ سُپيرِيان جي سَنگِ، مُنڌَ ميڙائو تو ٿِئي.

بيت - 11

ٿِڪِيائِي ٿَرَ ٿيلهہِ، چَڙھُہ چُڪِيائِي چوٽِيين،
ھَلندي ھوتَ پُنوءَ ڏي، ڀَؤ مِڙيئِي ڀيلِ،
اُٿي رائو ريلِ، وِيٺَنِ تان وارِي وَري.

بيت - 12

ھيءُ گِسي ھيءَ گَسُ، ھيءُ پَهَڻُ، ھيءُ پيچِرو،
ويچارِيءَ وَڏو ڪَيو، وِيندَنِ پٺيءَ وَسُ،
لِيڙُنِ جو لَطِيفُ چي، ڏونگرَ اَٿَئِي ڏَسُ،
جَڳَ ۾ رھَيُسِ جَسُ، سَڳَرَ ٿِي سَرِدارَسين.

وائي - 1

ھوتَ سي ھَلَڻَهارا، وو جيڏيُون،
ڪيئن ڪَرِيان آئون اُنِ سين.
کُهِہ پَلَنگَ ٻَنِ ماڙِيُون، کِيَنَ سي ٿِينم کارا،
ڪيئن ڪَرِيان آئون اُنِ سين،
سُونهَنِ سُپَرِينِ جا، آتَڻَ وَٽي اوتارا،
ڪيئن ڪَرِيان آئون اُنِ سين.
ويٺو ڏي ڏُکيَنِ کي، پُنهُون ڄامُ پُوڄارا،
ڪيئن ڪَرِيان آئون اُنِ سين.
آھيان پَرِٽِ پُنوءَ جي، ڪَندِيَسِ ڪُنِرَ ڪارا،
ڪيئن ڪَرِيان آئون اُنِ سين.
پيرُ مَ ڇَڏِجِ پِنوُءَ جو، ھَئي ھَئي! ھَٺ اَسارا،
ڪيئن ڪَرِيان آئون اُنِ سين.
ڪيچِينِ ڪَرَھَہ پَلاڻِئا، مَيا ٿِيا مُون مارا،
ڪيئَن ڪَرِيان آئُون اُنِ سين.
اَنڌَينِ آھِين آسَرو موٽِجِ مُحِبَ موچارا،
ڪيئن ڪَرِيان آئون اُنِ سين.
اَدِيُون عبداللطيف چي، مِلِيا مُحِبَ موچارا،
ڪيئن ڪَرِيان آئون اُنِ سين.

داستان نائون

بيت - 1

وِھُہ مَ وِساري، پُڇا ڪَرِ مَ پَنڌَ جِي،
نِرِمَلُ نِهاري ھَلَندِنِ تان ھَٿِ ڪئو.

بيت - 2

اَوَجَهڙِ اَسُونهِنِ، ڏيهُہ گهَڻوئيِ ڏورِئو،
سَڳورِيءَ سُونهَنِ، پَهُتِي ڪانَ پَنڌُ ڪَري.

بيت - 3

واءَ! وِڃاءِ مَ سو، پُٺِيءَ جَنھِن پَنڌُ ڪَرِيان،
ڇٽا! ڇَپَرِ پِرِينءَ جو، پيرُ پَرنِيا تو،
بَرِ بورائو جو سو، لَڳي متان لَٽِيين.

بيت - 4

واءُ وِڃايُم ڪالَ، پُٺيءَ جَنهِن پَنڌُ ڪَرِيان،
وَڃَڻُ مُون وانٽِي پِئو، ھوتَنِ ڪارَڻِ حالَ،
جَبَلُ ڏورِيان جالَ، ڪارَڻِ پيرَ پُنونءَ جي.

بيت - 5

کُهِجِ مَ، اُجها کيهَہ، گِردَ پَسُ گنگنِ جي،
ڏُکِي! مَنجهان ڏيهہَ، نِڪَرُ نانهِن ڪُلهي ڪَري.

بيت - 6

ڏوورِ مَ تون ڏوريجِ، صَبرُ ڪَرِ مَ سَسُئِي،
پَرَڻُ ڇَڏِ پيرنِ سين، وِھڻُ وِساريج،
سُکَنِ جا سَيَّدُ چئي، لاڳاپا لاھيجِ،
ھيين ساڻُ ھليجِ، تہ پَنڌُ پاسي ڀَرِ نِبِري.

بيت - 7

ويٺِيَسِ، وِکَ نَہ اَپُڙِي، تُون آرِياڻِي آءُ،
چُڪِي توسِي چاءُ، پاسي ڀَرِ پيئِي رِڙھي.

بيت - 8

کُهِي جا کَنيائِين، وِکَ تَهِي ويجهي ڪئِي،
ڇِڪِيءَ ڇِنائِين، پَنڌُ مِڙيوئِي پَٻَ جو.

بيت - 9

سَو ڪوھَہ ڪري سَڀَڪا، تُون کُهِي کَڻِجِ وِکَ،
تاڻِجِ مَنجهان تِکَ، تَہ پَنڌُ پاسي ڀَرِ نِبِري.

بيت - 10

وِئو جاڳائي جَتُ، ويرِي ڪنھِن وِلاتَ جو،
سَندو سُورَنِ خَطُ، ڏِنِمُ ھوتَ ھَٿَن سين.

بيت - 11

ڏُھِلا مُون ڏِينھَن ٿِئا، پييَمِ ڄامَ ڄَيوُن،
ڪَندي پَنڌُ پَهاڙَ ڏي، ٿِئڙُمِ رُوحُ رَيُون،
لُڇِئو ٿِيان لَطِيفُ چي، ڪَارَڻِ دوستَ سَھيُون،
ڀايان لَڪَ لَيُون، جي سُورَ پِريان جا ساڻُ مُون.

بيت - 12

ھيڪِليائِي ھاڻ، پورِيندِيَسِ پُنوُءَ ڏي،
ڪَندِيسِ ڪوھيارَلَ سين، رُچي روح رِھاڻِ،
رُلي ڇُلي ڇَپَرين، ڪنھن پَرِ لاھِيان ڪاڻِ،
آھِيان گهڻو اَڄاڻِ، پَرَ سُورَ پريان جا ساڻُ مون.

بيت - 13

ھيڪِليائِي ھيلَ، پورِيندِيَسِ پُنوءَ ڏي،
آڏا ڏُونگرَ لَڪِيوُن، سُورِيُون سُڄَنِ سيلَ،
تَہ ڪَرَ ٻيلِي آھِنِ ٻيلَ، جي سُور پِرِيان جا ساڻُ مُون.

بيت - 14

دوست ڏِٺائِين دِلِ سين، وِرچي تان نَہ وِھي،
لانچي لَڪَ لَطِيفُ چي، پَهڻَنِ مَنجِهہ پِهي،
سَندي نِينهن نِهي، ڪِي سَرفِرازُ سَسُئِي.

وائي - 1

ڏِيندِيَسِ ماھُ مِرُنِ کي، آئون جيرا جيءُ ڪري.
ڏيئي باھِ ڀَنڀورَ کي، آيَسِ تو ڳري،
آئون ڏينديَسِ ماھُ مِرُن کي.
آءُ اوراھُون سُپرين وَڃُ مَ پِيءَ پري،
آئون ڏينديَسِ ماھُ مِرُن کي.
آرياڻِيَ پُنُوءَ ري، سَرَتِيُون مُون نہ سَري،
آئون ڏينديَسِ ماھُ مِرُن کي.
جَنڊڙِي پايو جانِ ۾، ڏُکِي ڏُکَ ڏري،
آئون ڏينديَسِ ماھُ مِرُن کي.
مون ڏٺي مَ وِسَھو، وِرچي تان نہ وري،
آئون ڏينديَسِ ماھُ مِرُن کي.
ڏُکِيَ کي ڏيکارِئو، ڌاران مُنھَن مري،
آئون ڏينديَسِ ماھُ مِرُن کي.
پِيالي پِرِيَنِ جي، موھِيَسِ ميٺَ ڪَري،
آئون ڏينديَسِ ماھُ مِرُن کي.
آريءَ جي عشقَ جي، اَندَرِي آڳِ ٻري،
آئون ڏينديَسِ ماھُ مِرُن کي.
توکي توءِ نہ ڇڏِئان، جي وڃان ڀونءِ تري،
آئون ڏينديَسِ ماھُ مِرُن کي.
ڌَڙُ وِجهندِيَسِ ڌُوڙِ ۾، مَٿو ڌارَ ڌري،
آئون ڏينديَسِ ماھُ مِرُن کي.
ھَلَڻُ پَسي ھوتَ جو، ڏُکِي پَسُ ڏري،
آئون ڏينديَسِ ماھُ مِرُن کي.
پِرِين کڻجِ پانھنجون، اکيون ٻاجهہ ڀري،
آئون ڏينديَسِ ماھُ مِرُن کي.
اَدِيون عَبدُاللطِيفُ چي، مَنَ مُون مِھَر ڪَري،
آئون ڏينديَسِ ماھُ مِرُن کي.

وائي - 2

وَڃِي وَڇِي ٿِينديَسِ ويجهِي،
پَسَڻَ ڪارَڻِ پِرينءَ جي،
آڏا ڏُونگرَ، لَڪِيُون، موٽِج، مُحِبَ مجيجي،
پَسَڻَ ڪارَڻِ پِرِينءَ جي.
پِرِين، پَنھار تو چُئان، ٻِيَرَ آھِيان ٻي جي،
پَسَڻَ ڪارَڻِ پِرِينءَ جي.
نَمُ گهُرجي نينھن جو، آھِيان آئون آرُيجي،
پَسَڻَ ڪارَڻِ پِرِينءَ جي.
جا نہ ھَلندي ھوتَ ڏي، پِيءُ تَھين جو پيجي،
پَسَڻَ ڪارَڻِ پِرِينءَ جي.

داستان ڏھون

بيت - 1

آءُ اوراھُون، سُپَرِين، وَڃُ مَ آڳاھُون،
ٿَڪِي کَڻِي ٿَرَنِ ۾، ٻاڪارِئو ٻانھُون،
دَردَن جُون دانھُون، مون مارِيندِيُون موٽُ تُون.

بيت - 2

آءُ اوراھُون سُپرِين، وَڃُ مَ پِيَّ پَري،
مُون ڏِٺي، مُون وِسَھو، وِرِچي تان نہ وَري،
ڌاران مُنھن مَري، ڏُکِيءَ جي ڏيکارِيين.

بيت - 3

آءُ اوراھُون سُپِرِين، پَري وَڃُ ۾ پِيءَ،
موٽُ مَرَندِيَسِ ڇَپَرين، تُون جِياپو جِيءَ،
ھوتَ مَ ڇَڏِجِ ھِيءَ، پُنوءَ پِيادِي پَنڌَ ۾.

بيت - 4

آءُ اوراھُون سُپِرِين، ڏُکِيَ ڏيجِ مَ ڏاگهہ،
وَٽِ ڇَڏي مُون واگهُہ، آرِي وِئين عِشقَ جو.

بيت - 5

آءُ اوراھُون سُپِرِين، ڏُکِيَ ڏيجِ مَ ڏيج،
پيھِي گهرِ پُڇيج، تہ ھوتَ ھَلاڪَتَ نہ ٿِئي.

بيت - 6

مَڇُڻ وَرَ! وِسارِئِين، آرِي لَڳِ اَللهَ،
توکي سارِيو ساھَ، اُڪَنڍئو آھُون ڪَريان.

بيت - 7

مَڇڻُ وَرَ! وِسارِئِين، صَبُر نہ سارِيان،
توکي نِھارِيان، آءُ مُنھِنجا سُپرِين.

بيت - 8

ھٿان ھَڏِ نہ ڇَڏِيان، صَبۡرُ شُڪۡرانو،
ذوق زَمانو، مُون وَرَ! وِئو وِسرِي.

بيت - 9

صَبرَ ۽ شُڪرَ کي، ڪاڏي آءُ ڪَندِي؟
آھِيَان جَنھِن سَندِي، سو تہ گهُرجي ساڻُ مُون.

بيت - 10

صَبرَ ۽ شُڪَرَ کي، وَٺِي آءُ ويٺِي،
ڏُکِيَ سِين ڏيٺِي، ڪا ڪَجِ اَچي ڪَڏَھِين.

بيت - 11

صَبرَ ۽ شُڪَرَ کي، ھَٿِ ڪِئو مُون ھاڻِ،
پِريَمِ! اَچِي پاڻ، پيٽِيءَ کي پُڇِيجُ تُون.

بيت - 12

ناھ جَميعَتَ جانِ کي، ھوتَ پُڄاڻان ھاڻِ،
اللهَ سيئِي آڻِ، جَنِ ساءُ چَکايُمِ سِڪَ جو.

بيت - 13

ناھِ جَمِيعَتَ جانِ کي، ھوتَ پُڄاڻا ھِتِ،
پُنُوءَ جِي پيرِتِ، ساءُ چَڱايُمِ سِڪَ جو.

بيت - 14

ناھِ جَميعت جانِ کي، پُنوءَ پُڄاڻان،
سي مُون سيباڻان، جَنِ ساءُ چَکايُمِ سِڪَ جو.

وائي - 1

پَلَڪَ نہ رَھي دِلِ توري، وَرُ مِيان خانُ بلوچا.
اُٺُ چارِينديَسِ اُن جا، مَٿان ٽَڪَرَ ٽوري،
وَرُ مِيان خان بَلوچا.
ڏيندِيَسِ ماھُ مِرُنِ کي، مَٿان ڪُلهَنِ ڪوري،
وَرُ مِيان خان بَلوچا.
ڪانگَ کِيَنَمِ ڪيچَ جا، ماھُ چُنجُنِ سان چوري،
وَرُ مِيان خان بَلوچا.
ڏُکَ لاھِيندِيَسِ ڏِيلَ جا، ساڻُ عَجيبَنِ اوري،
وَرُ مِيان خان بَلوچا.
آرِياڻِي عَبدُاللطيفُ چي، سارَ لَھَندَمِ سوري،
وَرُ مِيان خان بَلوچا.

داستان يارھون

بيت - 1

ڪَنُ ٿِيُ، ڪيچِيَنِ ڪُڇِڻو، ڪُڇُ مَ ٿا ڪَڇَنِ،
اِشارَتُون اُنِ جون، سُڪُوتان سُڄَنِ،
وَٽان ويھِي تَنِ، سُڻُ تہ سوزُ پرائِين.

بيت - 2

سُڻو تہ سوزُو پِرائِيين، آءُ چيائُون اَڄُ،
ٻولِي ٻِي نہ سِکِيا، ”پاڻا“ چوندَءِ ڀَڄُ،
واڄي وَٽِ مَ وَڄُ، ٻُڌُ تہ ٻِيائِي لَھي.

بيت - 3

ٻُڌُ تہ ٻِيائِي لَھي، ”آئون“ اِتِ نہ آھِ،
ڪُڇَڻَ ڪُنڍِي لاھِ، ڪَنُ ٿي، ڪيچِنِ ڪُڇِئو.

بيت - 4

ڪَنُ ٿي ڪيچِينِ ڪُڇِڻو، ڪُڇُ مَ ڪُڇيائون،
رَھي نہ رَتي جيتِرِي، اُنهن وَٽِ آئون،
وَڍي وِڌائون، ھو جو وَڻُ ”ھُئَڻُ“ جو.

بيت - 5

ڪَڏَھِن پَئجِي ڪَنُ ٿِي، ڪَڏَھِن ٿِيجي واتُ،
ڪَڏَھن ٿِيجي ڪاتُ، ڪَڏَھِن ٿِيجي ٻَڪرو.

بيت - 6

ڪَٽارو ۽ ڪوسُ، اڱڻِ آرِيَ ڄامَ جي،
دِيَتَ آھي دوسُ، مارَڳَ ۾ مُيِنِ جي.

بيت - 7

ڪامُون مُڇِيجاھَ، گهڻِيُون گهُرجَنِئا اوٺِيا،
ھي وَڻ نہ لَھنداھُ، ھو وَڻَ اوڏاھِين گهڻا.

بيت - 8

اَکِيُون لَٽَ اوراٽِيُون، ڪَھِن پَرِ ڪَڙِيان پيرُ،
لَٽَ لاھيندو ڪيرُ، مُون جيھِي مَعذورِ کي.

بيت - 9

اَکِيُون آرِيءَ ڄامَ جون، اَنڌِيءَ سين آھينِ،
ھو جي وَڻَ وِندُرَ جا، سي مُون سُنهائِينِ،
ڏِسِئو ڏيکارِينِ، پيشانِي پُنوءَ جِي.

بيت - 10

اَکِيُون آرِيءَ ڄامَ جُون، آھِينِ اَنڌِيءَ ساڻُ،
پَسِي ڪَندِيُون پاڻُ، پيشانِي پُنوءَ جي.

بيت - 11

سَڏَ مَ ڪَرِ سَڏَنِ ري، ھلَڻَ رِيءَ مَ ھلُ،
جَلَڻ ري مَ جَلُ، رُئَڻَ رِي مَتان رُئِين.

وائي - 1

دَرِدَ مُئيءَ جي جا دارون، وو، موٽُ، سٻاجها سُپِرِين.
مُون لَڳِيُون، مون وِسَھو، مَحَبَت جُون مارُون،
موٽُ سٻاجها سُپِرِين!
مائِٽَنِئان مون سين گهڻا، ڪُسَڻَ ڪِئا ڪارُون،
موٽُ سٻاجها سُپِرِين!
سَکَنِ مون سين ڪين ڪِئو، سُورَنِ لَڌِيمِ سارون،
موٽُ سٻاجها سُپِرِين!
منھنجون شَھَرَ ڀَنڀورَ ۾، پَلِپَلِ پُونِ پَچارون،
موٽُ سٻاجها سُپِرِين!
اَدِيُون عبداللطيفُ چي، لَڳِيمِ تَنِ اَندَرِ تارُون،
موٽُ سٻاجها سُپِرِين!

آبري ڇوٽڪي

بيت - 1

اُٿِئو ۽ اُٿِئاڪُ، ڪالهوڪو ڪاڏي گَيو؟
وِئو جاڳائي جيڏِيون، بِرھُ ھِيُ بيباڪُ،
چُرِپُرِ ڪاري چاڪُ، سُورُ سُمهاري ڪِينَ ڪِي.

بيت - 2

سَنڌِيُون سُورُ ڪَرِين، ھَڏَ پُڻُ ڏُکَنِ ھوتَ لَئِہ،
پِرِيَنِ جي پاڻَ ڏِنِا، سي سُتي سُکُ نہ ڏِين،
جي ماڻهُن کي مارِين، تَنِ سُورَنِ کي سَڏَ ڪَرِيان.

بيت - 3

صدا وِڌِيَمِ سُورَ جي، اڳِيان ڪوھِيارِي،
جو نِجَس نِڪاري، سو پُنُوءَ وجهو پاندَ ۾.

بيت - 4

جان ساسائين سَسُئِي تان ويسُ وَرَنِ جو ڪَرِ،
لاھي لَڄَ لَطِيفُ چي، ٿِي بيکارِياڻِي بَرِ،
تہ وِيندي پَوئي وَرُ، اڳِيان ھوتُ حُضورَ ۾.

بيت - 5

سَسُئِيءَ کي سَڏُ ٿِئو، جنھن پر اولاڻو،
پَنڌُ نہ پُڄاڻو، اَڻَ ڪوٺِي ڪانہ ڪَري.

بيت - 6

پَسو پَرائَنِ، سُورَنِ آڏِي سَسُئِي،
پَراوا پَھنجَنِ، وِجهَنِ ويچارِي تي.

بيت - 7

مُنڌَ نہ مَنجهان تَنِ پَسِي لَڪَ لُڏَنِ جي،
جا پَرِ کاھوڙِينِ، سا پَرِ سِکِي سَسُئِي.

بيت - 8

مُنڌَ مَ مَنھَ ويھُ، اُڀِي اَسُرُ آسَ ۾،
تو سيئِي سيڻَ ڪيا، ڏُورِ جَنِين جو ڏيھُ،
پاڙي پاڙي پيھُ، وَتُ پُڄَندِي پِرِينءَ کي.

بيت - 9

ٻيلي ناھِ ڀَنڀور ۾، تنھن سَسُئي جو سَھِي،
ڏَمَرُ ڏيرَنِ مَنَ ۾، ڪَندا ايئن ڪَھِي،
لَنگهائي لَطيفُ چي، کَڻِجِ ڄامَ کُھِي،
ھِيءَ مَعذُورِ ھَڏِ مُئي، تُون ڪامِلَ وَڃُ مَ ڪيڏَھِين.

بيت - 10

اولاڪَنِ اَچِي، مَعذُورِ تي مارو ڪئو،
مَتان وَرَ وِسارِئين، مَنجهان ڪُرَ ڪَچِي،
سُپَڪِ ٿيءُ سُورنِ سين، پَھُچندينءَ پَچِي،
منجهان راھَ رَچِي، ٿِيندي لَعلَ لَطِيفُ چي.

وائي - 1

ڳالهيون ھوتَ ٻَروچي ساڻُ، منھنجي جيءَ جُون،
جيڏِيُون جيڏِيُون.
ڇُلي پيٺِيَسِ ڇَپَرين، سَڱَ تُھِين جي ساڻُ،
مُنھنجي جيءَ جُون.
چَڙھي ڏاڍين ڏونگرين، پُرزا ڪَندِيَسِ پاڻُ،
مُنھنجي جيءَ جُون.
ھَٿان ھَڏِ نہ ڇَڏِيان، سَندو نيھن نِڌاڻُ،
مُنھنجي جيءَ جُون.
رُلِي ڇُلِي ڇَپَرين، ڄامَ وِڃايُمِ ڄاڻُ،
مُنھنجي جيءَ جُون.
نَصِيبُ ٿئي نسُئي کي، شَل پُنوءَ وٽ وَٿاڻُ،
مُنھنجي جيءَ جُون.

وائي - 2

مون کي تان جهَل مَ پائيِو، جيڏِيُون آئون ھَلَندِي ھوتَ ڏي.
ھِيءُ جو بارُ ڀَنڀورَ جو، لُوٺِيءَ تان سَڀ لاھِيو،
آئون ھَلَندِي ھوتَ ڏي.
آھي عاجزِيَن تي، پَسَڻَ سَندو ساعِيو،
آئون ھَلَندِي ھوتَ ڏي.
ڪِينَ وِھندِيَسِ ڪُنڊَ ۾، نہ مُون ڀؤُ نہ ڀايو،
آئون ھَلَندِي ھوتَ ڏي.
وِھاري وَطنَ ۾، سوداءِ ۾ مَ ستايو،
آئون ھَلَندِي ھوتَ ڏي.
ڪُٺَلِ ڪَجاوَنِ ۾، چاڙھي ھوتَ ھَلايو،
آئون ھَلَندِي ھوتَ ڏي.
منھنجو پَنڌُ پُنُوءَ ڏي، ريبي تان مَ رَھايو،
آئون ھَلَندِي ھوتَ ڏي.
اَدِيُون عبداللطيفُ چي، موليٰ مُحِبُ مِلايو،
آئون ھَلَندِي ھوتَ ڏي.

وائي - 3

ڪَرَھا مَ ڪاھِيو، مِيان ڪيچي، آئون آرِياڻِي عَرضُ چُوندِي،
ڪَري ھوت ھَلَڻ جي، لُوٽي کي مَ لَڇايو،
آئون آرِياڻِيَ عَرضُ چُوندِي.
وَسِيلو وِلَھِيءَ جو، اَئِين آڳانڍو آھِيو،
آئون آرِياڻِيَ عَرضُ چُوندِي.
پاسي ۾ پَرِٽِ جي، جهيڪي اُٺَ جهُڪايو،
آئون آرِياڻِيَ عَرضُ چُوندِي.
وِلَھِيءَ جي وِھانوَ ۾، واڄَٽَ سَڀَ وَڄايو،
آئون آرِياڻِيَ عَرضُ چُوندِي.
اُگهاڙِي آتَڻَ ۾، پنھنجي پاڻَ پھرايو،
آئون آرِياڻِيَ عَرضُ چُوندِي.
سائِينءَ ڪارَڻِ، سُپرِين، صُورَتَ کي مَ سِڪايو،
آئون آرِياڻِيَ عَرضُ چُوندِي.
ساڪِنَ ٿِي شَھَرَ جا، مَعذُورِ کي مَرَڪايو،
آئون آرِياڻِيَ عَرضُ چُوندِي.
پُنُوءَ ڄامَ پَرِٽِ سين، ويھِي سورَ وِراھيو،
آئون آرِياڻِيَ عَرضُ چُوندِي.
لاھي بارُ ڀَنڀورَ ۾، وِيندو گهوٽُ وَنايو،
آئون آرِياڻِيَ عَرضُ چُوندِي.
پُنوءَ ڄاڃيئڙَنِ کي، نيکيٽي نکرايو،
آئون آرِياڻِيَ عَرضُ چُوندِي.
ٻيلِي ٿي ٻانڀَڻِ سين، ڏکي ڏيجُ ڏکارِيو،
آئون آرِياڻِيَ عَرضُ چُوندِي.
اَدِيُون عَبدُاللّطِيفُ چي، سَڄَڻ ساراھيو،
آئون آرِياڻِيَ عَرضُ چُوندِي.

وائي - 4

اداڙي ڏوٿي، آئون پُڇان تو ٿِي، ڪيچِ رَسندِيَس ڪيئن؟
لالَن لايا ڏينھن، آئون ڪيچَ رسَندِيسِ ڪيئن؟
نہ سَمِي نہ سُومِرِي، نہ آئون جَتِ اوٺِي،
اداڙي ڏوٿِي.
آئون اُنِين مان آھِيان، جي ٻانڀَڻَ پَڙَھَنِ پوٿِي،
اداڙي ڏوٿِي.
پَرٽِ ٿيندِيَسِ، پِرِين پُڇَندِيسِ، پَڇاڙينديَس پوتِي،
اداڙي ڏوٿِي.
سَنجهي وِئَڙو سُپِرِين، ساجنُ پُڇان سوٿِي،
اداڙي ڏوٿِي.
ساجهَرِ ساٿُ پلاڻئو، تون پلاڻِين پوٿِي،
اداڙي ڏوٿِي.
ھِتان ٿي ھوتُو وِئو، جَتُ پُڇين جوٿِي،
اداڙي ڏوٿِي.
ھَلِجِ ھوتَ پُنوءَ ڏي، مَنجهان نينھَن نِڪوٿِي،
اداڙي ڏوٿِي.
رويو رُئا رُڃُنِ ۾، ھَئي ھَئي آئون ھِتِ ڪوٿِي،
اداڙي ڏوٿِي.

وائي - 5

ڪِھَڙو سَڱُ سِياڪو، ھارِي مُون ھوتَنِ سين،
آئون ھيڪَلِي حَبَ ۾، نہ مُون مِٽُ نہ ڪاڪو،
ھارِي مُون ھوتَنِ سين.
مُنڌَ پِيادِي، پَنڌُ گهڻُون، نہ مون اُٺُ نہ ناقو،
ھارِي مُون ھوتَنِ سين.
چَڙھي نہ سگهان چوٽيين، ڏُونگَرَ ڪونهي ڏاڪو،
ھارِي مُون ھوتَنِ سين.
پِرِين پُڇَندِيَس پَٻَ ۾، وَڻِ وَڻِ وِجهندِيَسِ واڪو،
ھارِي مُون ھوتَنِ سين.
ھُوءَ جا پِڪَ پُنوءَ جِي، چَٽِئان تَنھن چُئاڪو،
ھارِي مُون ھوتَنِ سين.
پَسَڻَ ڌاران پِرِينءَ جي، فقير پوي مَ فاقو،
ھارِي مُون ھوتَنِ سين.
وِٿ مَ پوءِ وِصالَ ۾، لِکَ مَ پوءِ لِياڪو،
ھارِي مُون ھوتَنِ سين.
آتَڻُ وِجهي آڳِ ۾، پُڇَندِيَسِ پوءِ پَھاڪو،
ھارِي مُون ھوتَنِ سين.

وائي - 6

پانڌِي پِرِيَنِ جو، اي، مانَ ڪو پَسان!
ڀينَرُ ڀِنيءَ اُسَھو، ڏُونگرُ ڏورَڻُ اَسان،
مان ڪو پَسان!
مُندائِتي مينھَن جيئن، ويلو ويلَ ٿِي وَسان.
مان ڪو پَسان!

وائي - 7

آتَڻَ ۾ ويھِي، سَڀِ دُعا ڪَرِيجاھُ، جيڏيُون!
ڪانهي بَسِ بَھيرَ کي، ھَلُ چَلُ پي پيئي،
دُعا ڪَرِيجاھُ، جيڏيُون!
راھَ مُسافِرُ سَڀُڪو، ڪونہ ڏِٺو سُون ھِتِ ڏيھِي،
دُعا ڪَرِيجاھُ، جيڏيُون!
سارِيندا صَلواتَ کي، مَنجهِہ قَبَرَ سَڀِ پيھِي،
دُعا ڪَرِيجاھُ، جيڏيُون!
ڪوٺائو ڪَرِيمَ جو، ڳالِهہ پُڇندُمِ ڪيھِي،
دُعا ڪَرِيجاھُ، جيڏيُون!
نوازِيندو نُورَ سين، ناقِصِ کي اُتِ نيئِي،
دُعا ڪَرِيجاھُ، جيڏيُون!
اللهُ ھڪُ، مُحمّدُ بَرحَقُ، شالَ چُئان مان حرف اِھيئِي،
دُعا ڪَرِيجاھُ، جيڏيُون!

وائي - 8

جيڏِيُون آن نہ، چَوَندِي ڏُکُ ڏوراپو، سيڻَنِ کي صَرِيحَ، وو
سانگِ نہ وَڃَنِ سُپِرِين، مِنتَ موٽَنِ مانَ،
آن نہ چوندي ڏک ڏوراپو.
ڀينَرُ ڀيڻي حُجَ جِي، ڪوھِيارَلَ سين ڪانَ،
آن نہ چوندي ڏک ڏوراپو.
سو تُون صاحِبُ آھيين، جو نہ ڀيرايين ڀانَ،
آن نہ چوندي ڏک ڏوراپو.

وائي - 9

ڪا جا ڳالِهہ ھُئِي، سا جي لوڪَ سُئِي، لو،
ٻاروچي جي مَنَ ۾.
سِرُ سَڳَرِ، پُرُ پيچَري، تون جا ڏيھَ سُئي،
ٻاروچي جي مَنَ ۾.
سَسُئي سَڳَرَ پَٽِيين، ڪيرُ چَوَندو مُئي،
ٻاروچي جي مَنَ ۾.
پَنڌُ ڪَرِيندي پِرِينءَ ڏي، ڪَڏھن ڪانَ کُھِي،
ٻاروچي جي مَنَ ۾.
آن ڪا ڏِٺِي اوٺيا، کيرَنِ پاسِ کُھِي،
ٻاروچي جي مَنَ ۾.

وائي - 10

ويجهِي وِندُرِ جي تہ وَڻَنِ،
اوڏِي آيَسِ جان، پرِيان جي پيچري.
جي تو اوڏا ڀائيا، سي ڏُونگَرَ ڏُورِ ڏِسَنِ،
اوڏِي آيَسِ.
مَدِي نہ ھُيَنِ مَنَ ۾، تہ ڪيچان ڪوھُ اَچَنِ،
اوڏِي آيَسِ.
مَرَڻَ مُنھِنجي کي ڪِئو، ھيُ پَھُ ٻاروچَنِ،
اوڏِي آيَسِ.
سُونھَن سَڳَرَ پَٽِيين، مَنَھَ مَعذورَنِ،
اوڏِي آيَسِ.
وِندُر وائي جا وَھي، مُون کي سا نہ سَلَنِ،
اوڏِي آيَسِ.
آڻي ٻَڌا، اوٺِيين، موتِي کي تہ مَينِ،
اوڏِي آيَسِ.
لاٿائُون لَطِيفُ چي، لَڏُون سِرِ لَڪَنِ،
اوڏِي آيَسِ.

سُر معذوري

داستان پھريون

بيت - 1

ھَلندي ھوتَ پُنونءَ ڏي، کُھِجَن ڪي کوٽِيُون،
پَھَڻُ تَنِين پَٽُ ٿِئي، جي لَئي لالَنَ لُوٺِيُون،
سَڀِ سَھيليُون سِڪَ کي چُنجهُون ۽ چُوٺِيُون،
ٻَانڀَڻِ ٿيُ ٻُوٽِيُون، تہ ڪُتا کِينَئي ڪيچَ جا.

بيت - 2

ڪُتا کِيَنئي ڪيچَ جَا، سَندا جي پُنوءَ،
آڳَهِين ھوندَ اَسُونهَہ، جي جانَارَنِ يادِ پُئِين.

بيت - 3

تَن پيئِي جانارَنِ يادِ، جي پارِئقلَ پُنوُءَ ڄامَ جا،
سندِي لالَنَ لاڌِ، مُيان پوءِ مُنڌَ ٿِئي.

بيت - 4

جاڳايَسِ جَنبُورَ، ڪُتي قَريبَنِ جي،
بَهِي بَهڪي اُٿئو، گِهڏِي مَنجهان گهورَ،
سَڀِ لاھِيندو سُورَ، گِرِي ھِنَ گرِيب تان.

بيت - 5

نَڪِي آھِيوُن چُوھَڙا، نَڪِي آھِيُون چورَ،
ھانگاما ۽ ھورَ، ڪُتا ڪَرِئين ڪِنِ تِي.

بيت - 6

ڪُتو چئي قَرِيبَ جا، آھِيُون ساڌَ سَهِي،
پَهرِين بات بَهي، پُڇون پوءِ پانڌيِن کي.

بيت - 7

ڪُهِينِ تَہ آپُ ڪُهُہ، ڏَسِ مَ چوھَڙِيان،
سَندا آھيڙِيان، آن نَہ سَهَندِي ھَٿَڙا.

بيت - 8

ڪتو طالب ڍونڍ جو، اسين ڪُتي ڪِيڙَ،
چُهِٽي آھي چيڙَ، ڪارايي جي ڪَنَ ۾.

بيت - 9

ڪُتو ڪُرٽِي ھَڏِيُو، پُٺِيءَ پيرُ ڪَڙِينِ،
” اَلدُّنِيا جِيفَتُه وَطُلابُهَا ڪِلابُ“، اِيءَ ھِيين سِين لاءِ.

بيت - 10

جُہ يَارُ ڏِٺائُون يارَ جو، پُٺِيءَ پيرُ ڪَڙِينِ،
ڦِريا نَ فَرمانَ کان، انهِيءَ م آھِين،
ڏِسي نَہ ڏاڙِھِين، شَبانَ جي سَڳ کي.

بيت - 11

سَگِبان سِينڍارِئا، بَڇِئا تي بَهَنِ،
ڦِرِئا نَہ فَرمانَ کان، مُلهُہ نہ موتِيَڙَنِ،
ڪوني ڏوھُ ڪُتَنِ، ڏاڪارِيا ڏاڙِھِين ٿيا.

بيت - 12

ڏَکا ڏُونگرَ جا مَرُ ٿا مُون تي ڪَنِ،
پُڙَندا ڪِينَ پَرِٽِ تي، ھِنَ جا سَڌَرَ ٿا سُڄَنِ
سَڳائِيءَ جي سَيَّدُ چئي، آھي سُڌِ سَڀَنِ،
ھُوندَ نَہ ھِتِ ٽَرَنِ ڌ، پر قَرابَتَ ڪَمُ ڪئو.

بيت - 13

ڪَم قَرابَتَ ڪَنِ جِي، ھِتي آيَمِ ھِيئَن،
رِفاقَتَ راکَنِ جِي، پَهُتِيَسِ پاھَڙَ سِيئن،
ماڙھُو، مُلاحِظو تَنھنجو، ڪيچَ نَہ ڪَندا ڪِيئَن،
ذاتِ نِسورِيائِي نِيئن، پَرَ سَڌَ رَسِين سَڱُ ٿِئو

بيت - 14

سَڌَرَ سين سَڱُ ڪري، پَرَ کَنڊين پِياسِ،
ڪيرَ برھَمڻِ ڪِن جي؟ ڪيرُ ڄاڻي ڪيڻاسِ،
ھُوندَ نَہ سِنڌِ سُياسِ، ھِنَ پُرِئين ڪِيَسِ پَڌَري.

وائي - 1

خُوبِي مَنجِهہ خِفَتِ،اي دوستَ! دِقَتَ،
آھي عَبدُاللّطِيفَ کي.
مَدَحَ مُون کان نَہ ٿِئي، سَندِي سُورَ صِفَتَ،
آھي عبدُاللّطِيفَ کي.
ھِجي ڪَرِيان ھيجَ سين، مُطالِعُ مَحَبتَ،
آھي عبدُاللّطِيفَ کي.
حُزنُ ھوتَ پُنوءَ جو، رُڳيائِي راحَتَ،
آھي عبدُاللّطِيفَ کي.

داستان ٻيو

بيت - 1

ڏُکِيءَ ڏَمَرُ ناھہ، بُکِيءَ کِلق نَہ اُڄَهي،
اگهاڙِيءَ وھانءُ، وئو ويچاريءَ وِسَري.

بيت - 2

اَدِيُون وَرُ اُگهاڙَ، وِھانءُ جنھِن وِسارئو،
جيڏِيُون ڇَڏي جاڙَ، سَڀِ نَنگِيُون ٿي نِڪرو.

بيت - 3

سَڀِ نَنِگيُون ٿي نِڪرو، لالَچِ ڇڏي لوڀَ،
سُپيرِيان سين سوڀَ، نِنڊُون ڪندي نہ ٿِئي.

بيت - 4

سَڀِ نَنگِيُون ٿي نِڪرو، پَرَھَڻَ ڇَڏي پوءِ،
مَهَندِ مِڙَنِئان ھوءِ، ڪَهِي جا ڪِينَ کڻي.

بيت - 5

ڪَهي جا ڪِينَ کَڻِي، پِرينءَ پَهُتِي سا،
وِھي ويڙھجي جا، وصۡلُ تنھن وڃائِيو.

بيت - 6

وَصلُ تَنھِن وِڃائِيو، سِينڌِ سُرمي سِيئن،
سا مُٺِي لِيلا جِيئن، مَڻِئو جنھن مِٽُ ڪِيو.

بيت - 7

ھُوندِئان ھوت پَري، اوڏو اَڻَ ھُوندِ کي،
ساڄَنُ تن سَري، ”لا“ سين لَڏين جي.

بيت - 8

لائي خَنجَرُ ”لا“ جو، ھَئي! خَچَرَ کي ھَڻُ،
سَڌَنِ جُون سَيَّدُ چئي، وَٿُون سَڀِ وِڪَڻُ،
پيرُ پَرُوڙي کَڻُ، تہ ھَلَڻَ ۾ ھورِي وَھِين.

بيت - 9

ھورِنِ ھاڙھو لَنگِهئو، ٿِيءُ جَرِيدي جوءِ،
”ھوندِ“ جنين سين ھوءِ، ھوتُ نہ ھُوندي تن سان.

بيت - 10

ھورِنِ ھاڙھو لنگِهئو، مُٺِي! مُوسَٽُ ڇَڏِ،
”لا“ سين اُٿِي لَڏِ، ”ڪِين“ رَساڻي ڪيچَ کي.

بيت - 11

ھورِن ھاڙھو لنگهِئو، ڳورِيُون پاسي ڳوٺَ،
ڪيچِ تَنين کي ڪوٺَ، ”ڪين“ جَنِين جي ڪَڇَ ۾.

بيت - 12

ھورن ھاڙھو لَنگهِئو، ڳورِيُون ٿِيُون ڳَمَنِ،
ھاڃي تَنھِن ھَڄَنِ، ڌاران سِڪَ سَيّدُ چَئي.

بيت - 13

نڪا ھِتِ، نہ ھُتِ ڪا، ڳوري سندِي ڳالِهہ،
ڪِينَ پَهُتِي مالِ، حالِ پَهُتِي ھوتَ کي.

وائي - 1

ھَلُ ھوتَنِ ڪارَڻِ حالَ، شَل سَڳَرِ ٿيندينن ساٿ جي،
پيرَ پَنھنجي پرينءَ لئي، ڪوڏِ رَتائِين ڪالَهہ،
شَل سَڳَر ٿينديئَن ساٿَ جي.
چَڙھندي سِرِ چوٽِيين، لَڪَنِ ڪِئَڙُسِ لالَ،
شَل سَڳَر ٿينديئَن ساٿَ جي.
جي ڀائيين جَتَنِ جي، ويجهي ٿِيان وِصالَ،
شَل سَڳَر ويجهي ٿِيان وِصالَ،
شَل سَڳَر ٿينديئَن ساٿَ جي.
پُرِي پَٻَ وَڻنِ ۾، وجِهجِ ڪا وَڙالَ،
شَل سَڳَر ٿينديئَن ساٿَ جي.
ڪيچان آيو قافِلو، مَيَنِ مَٿِي مالُ،
شل سَڳَر ٿينديئَن ساٿَ جي.
اِيندِيَئي بُوءِ بوتَنِ جِي، تُون جَلِهجِ پَٻَ پَيالَ،
شل سَڳَر ٿينديئَن ساٿَ جي،
جِتي جَمازَنِ کي، جَبَلَ ٿِينِ جَنجالَ،
شل سَڳَر ٿينديئَن ساٿَ جي.
پُڇي پِيادِيَنِ کي، اسُتِ آرِياڻِي اَحوالَ،
شل سَڳَر ٿينديئَن ساٿَ جي،
اَدِيُون عَبدُالّطِيفُ چي، سَڄَڻُ مَلَندُمِ شالَ،
شَلَ سَڳَر ٿينديئَن ساٿَ جي.

داستان ٽيون

بيت - 1

ھَلَندي ھاڙھو مَڻِي، ڪَرَڻُ ڪوھُہ پَيامِ،
اَرڏا آريءَ ڄامَ ري، گُندَرَ گُذرِيامِ،
لَڪِيُون لَڪَ لَطِيفُ چئي، اورانگهَڻُ آيامِ،
پُرَڻُ پُنوءَ پُٺِ ۾، اِيءَ سَعادَتَ سَندِيامِ،
مَٿسِ ڪَمَ وِڌامِ، وِھا تان نہ وَسِ پِئو.

بيت - 2

ھَلندي ھاڙھو مَڻي، ڏَڪَنِ مُنھِنجا ڏوھَہ،
ھو اوڇَڻَ سِرِ اُٺَنِ تي، ھِيءَ پَنڌِ پَڇاڙِي پوءِ،
ليڙَنِ رِي لطيف چي، ڪِيئن ڪَرِيندِيَسِ ڪوھَہ،
اَڳِيان رائو سُڄي روھَہ، وِھان تان نَہ وسِ پِئو.

بيت - 3

ھَلَندي ھاڙھو مَڻِي، سِسي ڏِينديسِ ساھُہ،
لِڱَنِ تا لَطِيفُ چي، پاري نِيم پاھُہ،
ڪَندو ٻاجهَہ اَللہُ، وِھان تان نَہ وَسِ پِئو.

بيت - 4

ھَلندي ھاڙھو مَڻي، گَسان تان مَ گُسان،
لَڪَنِ تان لَطِيفُ چَئي، رِڙھي مانَ رَسان،
پُنوُءَ شالَ پَسان، وِھان تان نَہ وَسِ پِئو.

بيت - 5

ڀائِي حال ھَلي وئا، ڪَنھِن کي سُورَ سَلان،
کَڻِئو لَڄَ لَطِيفُ چي، لَڪَنِ مَنجهہ لُڇان،
پانڌِي ڪيرُ پُڇان، وھان تان نَہ وَس پِئو.

بيت - 6

وَڌو ڪِيمَ وَڻاءُ، اُونچا ڏُونگرَ مَ ٿِئو،
ٽِمو مَ نيڻاءُ، تہ پيرُ نِهارِيان پِرِينءَ جو.

بيت - 7

وارو مُون، وَڻاءُ! ڪا سُڌِ سُنهَپَ جي نَہ ڏِھو؟
اِيءَ اِھائِي ڳالهَڙي، شَجَرَ سُڻِيجاءُ،
چوٽِي چاڙھِيجاءُ، تہَ موڙھِيءَ ڪو مُنھن ٿِئي.

بيت - 8

وارو مُون وَڻَراھِہ، ڪا سُڌِ سُونهَپَ جي نہ ڏِھو؟
وِجِهي وَراڪَنِ ۾، مَعذُورِ کي مَ مُنجهاءِ،
مَنجهان پاڻَ پيادِيءَ کي، ھادِي ٿي ھلاءِ،
پِرِان کي پَهُچاءِ، تہ لَڳي لُوٺو نہ ٿِيين.

بيت - 9

وارو مُون وَڻِڪارَ، ڪا سُڌِ سُونهَپَ جي نہ ڏِيين،
آھي اَسُونهِيينءَ جي مَٿي تو مَيارَ،
وِڙھِئا ويراڳِڻ سِين، لَڪَنِ جا لِيارَ،
ڪَرِيان ٿِي ڪوڪارَ، ڪنڊَنِ ڪانڊيرَنِ جي.

بيت - 10

ڪَنڊا مُون پيرَنِ ۾، توڻي لَکَ لَڳَنِ،
آڱُرِ آڱُوٺي نہ مِڙي، ڇِپُون پيرَ ڇِنَنِ،
ويندي ڏانھن پِرِيَنِ، جُتي جاتِ نہ پائِيان.

بيت - 11

جُتِي س پائِيندِيُون، جَنين پيرَ پِرين،
لاٿِيُون سَڀِ پَريِن، سَسُئِي سُپيرِين کي.

وائي - 1

جيڏيُون جا جَڙَ لاتام، جِيءُ جَتَنِ سين جيڏيون،
سا سَرِتِيُون سيباڻِيامِ، تنھن جِئَڻُ جالُ ڪِيامِ،
جِيءُ جَتَنِ سين جيڏِيُون،
مَهَرَ جا مَيَنِ جي، سَجهي ھَٿِ ھُيامِ،
جِيءُ جَتَنِ سين جيڏِيون.
ساجُهرُ سُتي سُکِ ۾، وسُوڙِھي ويام،
جِيءُ جَتَنِ سين جيڏِيُون.
ڪوڙين ڀالَ ڪَرِيم جا، ڪنٺي منجهہ ڪڙيام.
جِيءُ جَتَنِ سين جيڏِيون.
ھَڪَل ھوتَ پُنُوءَ جِي، سَڳَرَ مَنجِهہ سُيامِ،
جِيءُ جَتَنِ سين جيڏِيون.
ڏورِيندي منجهہ ڏُونگرين، ٿوھَرَ ٿوڀَ ٿِيامِ،
جِيءُ جَتَنِ سين جيڏِيون.
ڪِيهُون ڪوھَن پَٽِيين، ڪُو ڪُون جال ڪيامِ،
جِيءُ جَتَنِ سين جيڏِيون.
ڏُکُون بُکُون ڏاکِڙا، ڪارَڻِ جَنِ ڪِيامِ،
جِيءُ جَتَنِ سين جيڏِيون،
اَدِيُون عَبدُالطيفُ چي، اَڱَڻِ سي آيامِ،
جِيءُ جَتَنِ سين جيڏِيون.

داستان چوٿون

بيت - 1

مَرِي، جِيءُ، تَہ ماڻيين، جانِبَ جو جَمالُ،
ٿِئين ھُوندَ حَلالُ، جي پَندِ اِھائِي پارِئين.

بيت - 2

مَرُ تہ موچارِي ٿِيين، اَجلان اَڳي اَڄُ،
جان ڪِي ھُئين جِئَرِي، تہ مُنڌَ ڀَنڀوران ڀَڄُ،
پُنوءَ ساڻُ پَهَڄُ، تہ مَلَڪَ الۡمَوتُ ماڻِيين.

بيت - 3

مَرُ تہَ موچارِي ٿِيين، جِيڻُ آڏو جَتَ،
ھارِي! ڪَرِ ھِمَتَ، تڳ ڏيئِي دَمُ دوسَ لَهِين.

بيت - 4

مَرُ تہ موچارِي ٿِئين، ويهِي وِجهہُ مَ ويرُ،
دِلِ ۾ آڻِ مَ دَؤرُ تُون، ڦِرَڻَ سَندو ڦيرُ،
توڻي لَهِين نَہ پِيرُ، تُوءِ راحَتَ آھِہ رِڙَھڻَ ۾.

بيت - 5

مَرُ تَہ موچارِي ٿِيين، ويهِي جِيُ مَ جوءِ،
مُنڌَ مَرَڻان پُوءِ، پَهُچَندِينءَ پُنوءَ کي.

بيت - 6

اَجَلان اَڳي سَسُئِي، مُنڌَ جيريائِي،
ٽولِيان تنھن مَ ٽَرُ، جنھن رُوحُ وِڃايو راھَہ.

بيت - 7

مَرَڻان اَڳي جي مُئا، سي مَرِي ٿِيَنِ نہ ماتُ،
ھوندا سي حَياتُ، جِيڻان اقڳي جي جِيا.

بيت - 8

جِيڻان اَڳِي جي جِيا، جُڳُ جُڳُ سي جِيَن،
اُوءِ موٽِي ڪينَ مَرنِ، مَرڻان اَڳِي جي مُئا.

بيت - 9

اُونچو اُتاھون گَهڻون، جِيڻَ کي جَبَلُ،
مَرَڻَ! مُون سين ھَلُ، تہَ پُٺِيءَ تو پَنڌُ ڪَرِيان.

بيت - 10

تو سَڱُ ساھُہ کَڻَڻَ سين، جِيَڻَ گوشي جاءُ،
مَرَڻَ! مُون سين آءُ، تہ پُٺِيءَ تو پَنڌُ ڪَرِيان.

بيت - 11

وڏا طالع تَنِ جا، جي مارِڳ مَنجِهہ مَرَنِ،
ٻِيُون ڇا کي ڪنِ، ڪوڙي دعويٰ دوست سين.

بيت - 12

سَڏُ سڃاڻي پِرِينءَ جو، واڪي جي نَڳ وَرَنِ،
ڪڄاڙي کي ڪَن، ڪوڙي دعويٰ دوست سين.

بيت - 13

مُيين جي مارَڳَ ۾، ڇَپر ڇُلي جي،
تہ قدَرُ ڪيچين کي، ھوندَ پوءِ تنھنجي پَنڌَ جو.

بيت - 14

تو سامائِي سَسُئِي، مَرَڻُ ڪِئو مُرِدارُ،
ڪُپَرِ سِين ڪوھِيارُ، لوٺِي! تو لَڄائِيو.

بيت - 15

پَرِ ۾ پَچِي پِرينءَ کي، مَري نہ ڄاتوءِ،
”مُوۡتُوۡا“ مُنڌَ نہ سوءِ، ڪَنڌُ ڪُڄاڙِئان ڪاٽيين؟

وائي - 1

توڏَنِ تان نہ تنوارِيڳ، منھنجو لالَنُ وارِيو،
اَللہَ ڪارَڻِ، مِيان اوٺِيا!
شَرَفُ لَهي سَسُئِي، ڪُٺَلِ کي ڪَمُ ڪارِيو،
اَللہ ڪارڻ، ميان اوٺيا!
ميندِيءِ مورَ مَلِيرَ جا، چانگنِ کي سَڀِ چارِيو،
اللہ ڪارڻ ميان اوٺيا!

داستان پنجون

بيت - 1

ھَٿين، پيرين، مُونڙِيين، ھَلِجِ ساڻُ ھِيينِ،
عِشقُ آرِيَ ڄامَ جو، نِباھي نِيين،
جان جان ٿِي جِيين، تان تان پارِجِ ڪومَ پُنوءَ سين.

بيت - 2

ھَٿين، پيرين، مُونڙِين، ڪَهِجِ ڀَرِ ڪَپارَ،
مَتان ڇوري! ڇَڏِيين، پِرِيتَڻي پَچارَ،
توکي سَنَدق سَسُئِي! سَندِي لَنؤ لَغارَ،
جي ھُوَنَئِي ھوتَ ھَزارَ، تڻ نہ پاڙِجِ ڪو مَ پُنُوءَ سين.

بيت - 3

ھَٿين، پيرين، مونَڙِيين، ڪَهِجِ ڀَرِ قَدامَ،
وِچِ وَسيلو ناھِہ ڪو، اوري آرِيءَ ڄامَ،
ھِيين لائي ھامَ، پاڙِجِ ڪومَ پُنوءَ سِين.

بيت - 4

ھَٿين، پيرين، مونڙيين، پُري ڪَجِ پَرَکَ،
قَدَمَ ڪيچَ ڌَڻِينِ ڏي، پاءِ وَڌَندي وِکَ،
جي ھُوَنئي ھوتَن لَکَ، تَہ پاڙج ڪومَ پُنوءَ سِين.

بيت - 5

ھَٿين، پِيرين، مونڙِيين، سِرِجِ ساڻ پَساھَہ،
ھوتُ گَڏبُئِہ حَبَ ۾، رَھَبَرُ مَٿي راھَہ،
جان جان ساڻُئہِ ساھُہ، تان پاڙِج ڪومَ پُنوءَ سِين.

بيت - 6

ٿَڌي ٿَڪِي نَہ وِھي، تَتِيءَ ڪَري تاڻَ،
وِڌائين وَڻڪارِ ۾، سَسُئِي پاڻُ سُڪاڻَ،
پُڇي پَهہَ پَکِيُنِ کي، پيئِي مُنڌَ پَرِياڻَ،
ڏِنَسِ ڏيهَہ وَڻَنِ جا، اَللہ لَڳ اُھڃاڻَ،
مانَ پَرَچِي پاڻق، اَچي آرِياڻِي وَرِي.

بيت - 7

توڻي وِلاڙُون ڪَرين، توڻي ھَلِين وِکَ،
لِکِئي مَنجهان لِکَ، ذَرو ضايعَ نَہ ٿِئي.

بيت - 8

لِکِئو جو نِراڙِ، سو اَنگُ ڪِياڙيَ نہ ٿِئي،
پاڙِئو ويٺِي پاڙ، جيڪي لالَنَ لِکِئو لوحَ ۾.

بيت - 9

جِتي جيتَرِيُون، لِکِيُون لوحَ قَلمَ ۾،
تِتي تيتَرِيُون، گهَڙِيُون گهارَڻ آئِيُون.

بيت - 10

ڪيائين ڪيچِينِ لئِہ، جُسو جَلاوَتَ،
ڇَڏي پيٺِي ڇَپَرين، ھارِي سَڀِ حُجَتَ،
ھُئي نِماڻِي نِسَتَ، پَنڌُ وِڌائِين پاڻَ تي.

بيت - 11

ڏُکِي ڏورَڻُ پاڻَ تي، ويچارِيءَ وِڌو،
ڏيلُ جَنھِن جو ڏُکَ سِين، سَڀوئِي سِڌو،
ھُئَڙُسِ اَڳُ لِڌو، پوءِ ٿِي ڪَري پَنڌڙَا.

بيت - 12

پَنڌُ نہَ پَنڌَنِ جيترو، ڪِيئن سُڄندِي ڪِيهَہ،
جيڪَسَ ڪَرِيان ريهَہ، پَرَ چوندا مُنڌَ چَرِي ٿِئي.

بيت - 13

چُوَنِم مَرُ چَرِي ٿِئي، پَرَ جي سَڏُ سُڻين،
مَرُ مُهِين کي ڏِين، ماڙھو اَچِئو ميهڻان.

بيت - 14

ماڙھو ڏيئِي ميهڻان، مُون کي ڪَنداڪوھُہ،
جنھن ڇوريءَ ۾ ڇوھُہ، سا پٿُون ٿِيندي پيرَ تي.

وائي - 1

ويهُہ مَ واٽَ وِرچي، اَلا، جيئَن ڪَهنديئن تِيئن لَهندِيئن،
ڪَنين اَچي ڪا ڪَهي، ڪَنين اَچي ڪا چَئي،
جِيئن ڪَهندِيئن تِيئن لَهندِيئن.
اَمُلُ ڀايان اُنَ کي، ساجنَ مُون کي جا چَئي،
جيئَن ڪَهندِيئن تِيئَن لَهندِيئن.
پيرَ پٽائِين ڪُونئرا، رائي ڪِيَڙسِ رَچِي،
جِيئَن ڪَهندِيئن تِيئَن لَهندِيئن.
پير پٽائِين ڪُونئَرا، رائي ڪِيَڙسِ رَچِي،
جِيئن ڪَهندِيئَن تِيئن لَهندِيئن.
مُنھن ڪَرِ مَعذُورِ ڏي، پُنوءَ ڄام پَرَچِي،
جِيئن ڪَهندِيئن تِيئن لَهندِيئن.
مُون کي تَهِين مارِئو، جَتَنِ جا ٿي چَئِي،
وِندُر واٽِڙين تي، ڪانڌِي ٿِيندَمِ ڪيچِي،
جيئن ڪَهندِيئن تِيئن لَهندِيئن.

داستان ڇھون

بيت - 1

جهَلي تان نَہ رَھان، ڌاران پَسڻَ پِرينءَ جي،
اَپَرِ عاجِزِ آھِيان، لالَنُ جان نَہ لَهان،
”فَرِدا“ مون ڦِٽِي ڪي، واعدي ڏي نہَ وِھان،
صُبحَ سِيئنءَ نہ سَهان، خُواھہ ميڙِيين خواھہ مارِيين.

بيت - 2

”فَردا“ مُنڌَ ڦِٽِي ڪي، نَقدُ کَنيو نارِ،
ھِيءَ جا واڳَ وِلَهيءَ جي، ويرَمَ ڏي مَ وارِ،
جيڪِي مُٺِيءَ مار، جيڪي ميڙِ مُٺيءَ کي.

بيت - 3

مُٺِي ٿي مُدَعا گُهري، موتُ ٿئو موجُودُ،
اَچِين تہ اَڄُ ڪَرِيان، سَهَٽَ جو سُجُودُ،
جان ڪِي نين وُجُودُ، جان ڪِي ميڙِي مُٺِيءَ کي.

بيت - 4

جان ڪِي ميرِ مُٺِيءَ کي، جان ڪِي مُٺِي مارِ،
ڏُکِيءَ کي ڏيکارِ، ھيڪَرَ ھوتُ اَکِينِ سِين.

بيت - 5

ڏُکِي ٿي ڏڌورَ، لَهسِي لَئي پُنوءَ جي،
ڏيئِي آگ اَتورَ، سَڀَ نَہ ساڙِي سَسُئِي.

بيت - 6

ڏُکي، ڏِکَ وِسارِ، سيڄَ ڦِٽِي ڪَرِ سَسُئِي،
پَٽِيءَ پيرُ نِهارِ، تہَ آرِياڻِي اُتان لَهِين.

بيت - 7

ڏُکِي ڏُکُ مَٿي ڪَري، وَنءُ ڇَپَرِ پيهِي،
گَڏِبئِي ڏيهِي، سوڌِيُون ڏِيندَءِ خَبرُون.

بيت - 8

ڏُکِي ڏيهاڻِي، مُٺِيءَ مَٿي ھَٿِڙا،
تَنھن پَرِ نَہ کاڻِي، جَنھِن پَرِ جيي جِيڏِيُون.

بيت - 9

ڏِسَڻُ ڏِکان اَڳرو، سَسُئي آڻِ مَ شَڪُ،
ٿِيءُ ٻانِهي، ڀَرِ اوئِيُون، لُڏُ مَ پَسِي لَڪُ،
وَرُ پُنوءَ سين پَلَڪُ، ٻن بارنَهم ماھَہ ٻِيَنِ سين.

بيت - 10

ھَر دَمُ ھوتَ پُنوءَ جو، ڏِسَڻُ ڀائِنجُ ڏِکَ،
وَرُ پُنوءَ ساڻُ پَلَڪَ، ٻَنِ ٻارَنَهن ماھَہ ٻِيَنِ سِين.

بيت - 11

ٿورَ ويرَمِي ٿِيءُ، وَڃَڻُ ويرمَ نَہ سَهي،
ڏيئِي مَرِجِ ڏونگرين، جَتَنِ ڪارڻِ جِيءُ،
ھَڏِ نَہ ھوندو ھِيءُ، ڪير ساھُہ پِرِيان تان صَدِقو.

بيت - 12

ڏُکِيءَ سَندِيُون ڏُونگرِين، آڌِيءَ آھُون پُون،
ڏاري جو ڏونگرَ کي، سو ڪِي چيو چُون،
آرِيءَ جي افسوسَ ۾، ماڙھو مِرُون رُوَنِ،
ان پَرِ سيئِي ھُونِ، ھِنيڙا جَنِ ھَڄِي وِيا.

بيت - 13

ڏُکِيءَ سَندِيُون ڏُونگرين، پَسو پِٽُون پَونِ،
مُئي پُڄاڻان مُنڌَ کي، روجَهہ رُڃنِ ۾ رُونِ،
ڀُڻا اِيهِين چُونِ، تہ مُئي اَسان کي مارئو.

بيت - 14

ڏُکيءَ سَندِيُون ڏُونگرين، اوڇنگارُون اَچَنِ،
ھَڻِي سانگ سَسُئِي کي، ڪِلو ڪِيو ڪيچنِ،
جي ھَٿان ھوتَ مَرَنِ ھوتُ تَنِين جي ھَنجَ ۾.

بيت - 15

ڏُکِيءَ سندِيون ڏُونگرين، وَڻَ ٽِڻَ وايُون ڪَنِ،
وَٽان ويهِي جَنِ، وَڍيءَ سي واڍوڙِيا.

بيت - 16

وَڍِيءَ سي واڍوڙِيا، رَتُ نہ ڏِٺو جن،
موتُ قَبولئو تَنِ، ڏِٺو جن ڏُکِيءَ کي.

بيت - 17

ڪَنھِن جَنھِن ڏُکان ڏي، پارانا کي پانڌِيين،
سُورَ ڀَريائِين، سي ڳالهہ ڪيائِين جَنِ سِين.

بيت - 18

ڪو جو وَڍِيءَ وَڍُ، جِيئَن وَڻ وَڍِيائِين وَڍَ سِين،
ڏُکُ ڏُکِيءَ کي ڏَڍُ، جَنِ ڏِٺي سي ڏُکيا ٿيا.

بيت - 19

وَڍِيَلِ ٿي وايُون ڪَري، ڪُٺَل ڪُوڪاري،
ھِيءَ ھَنجُون ھَڏَنِ لئي ھاري، ھُنَ پَنَ پنھنجا سارئَا.

بيت - 20

ڏُکِيءَ توءِ ڏُڪارُ، توڻي وَسَبِ مِينهَڙا،
صاحبَ ھَٿِ سُڪارُ، ھِنَ وَسِ آھين ھَٿِڙا.

بيت - 21

ڏُکِيءَ توءِ ڏُڪارُ، سيڻَنِ ڏيهُہ سُڪارِيو،
ٻاروچاڻُو ٻارُ، سَڀوئِي سُواءَ سِين.

وائي - 1

اچي لالَنَ لَٽِ، مِيان! مُئيءَ جو لوڙھُہ لَڪَنِ ۾.
ھو کانُ کَٿورِيءَ ھيرَئُون، مُون ۾ صابُڻُ ڇَٽَ مِيان!
مُئيءَ جو لوڙھُہ لَڪَنِ ۾.
آرِياڻِي اَچِي ڪَري، ڪا گَهڙِي مُون وَٽِ جَٽِ، ميان!
مُئيءَ جو لوڙھُہ لَڪَنِ ۾.
کَٿُورِيءَ کَشبوءِ سين، ھارِيائُون ھَٽِ ھَٽِ، ميان!
مُئيءَ جو لوڙھُہ لَڪَنِ ۾.
دَردُ منھنجي دِلِ جو، تُون ڪامِلَ ڪَٽِ، ميان!
مُئيءَ جو لوڙھہُ لَڪَنِ ۾.

داستان ستون

بيت - 1

آئون نہَ گَڏِي پِرينءَ کي، ٿورا ڏِينهَن ٿِئا،
راتين روزَ وِئا، عَبَثُ آرِي ڄامَ رِي،

بيت - 2

آئُون نَہ گَڏِي پِرينءَ کي، سَهَسين سِجَ وئا،
ھَلَڻَ ويرَ ھِئا، ديکي شالَ دَمُ ڏِيان.

بيت - 3

آئُون نہ گَڏِي پِرينءَ کي، تُون ٿو لَهِين سِج،
آئُون جي ڏِيئن سَنيها، نيئِي پِريان کي ڏِجُ،
وَڃِي ڪيچِ ڪَهجِ تَہ، ” ويچَارِي واٽَ مُئِي“.

بيت - 4

آئُون نہ گَڏِي پِرينءَ کي، پويون ٿِئو پَساھُہ،
سِڪان ٿِي سَڪِراتَ ۾، رويو پُڇان راھُہ،
شالَ مَ وَڃيمِ ساھُہ، ڌاران پَسَڻَ پِرينءَ جي.

بيت - 5

آئُون نہ گَڏِي پِرينءَ کي، عُمِر تان ويئِي،
ولهيءَ ڏِينهَن وِڃائِيا، سَرَتيُون سَڀيئي،
پِيرِيءَ ۾ پيئي، اَکِيُون آرِيءَ ڏي کَڻِي.

بيت - 6

آئُون نہ گَڏِي پِرينءَ کي، جوڀَنُ وِيو جاڙَ،
آڏا آرِيچَنِ کي، چاڙھيڪا ۽ چاڙ،
مُون مُٺيءَ کان نَہ ٿِئي، وَڏَپَڻ مَنجهِہ ولاڙَ،
عُمِرِ سَڀِ اَواڙَ، وِيَمِ ٿي واڪا ڪَريان.

بيت - 7

آئُون نہ گَڏِي پِرينءَ کي، ھِيءُ پُڻُ ڏِينهُن وِيو،
نِهوڙي ناڀُنِ سِين، مونکي نِينهن نِيو،
مُٺيءَ موتُ ٿِئو، ” پِيُ پِيُ“ ڪندِي پَنڌَ ۾.

بيت - 8

آئُون نہ گَڏِي پِرينءَ کي، آيو عِزۡرائِيلُ،
جوراڻي سين جيڏِيُون، نَڪو قالُ نہ قِيلُ،
آيو موتُ دَلِيلُ، مارِيندو مُرادَ کان!

بيت - 9

آئُون نہ گَڏِي پِرينءَ کِي، مَٿان آيو موتُ،
واجهائِيندي وَرِھَہ ٿِئا، ھَڏِ نَہ گَڏِيم ھوتُ،
جيڪُسِ ٿيندَسِ فوتُ، فَنا ھِنَ فِراقَ ۾.

بيت - 10

وِلاڙِئو وَڻِين چَڙھي، ڳِجُهنِ ٿِيندي ڳاھُہ،
سَسُئِي سُورِيءَ چاڙھِئو، پُنوُءِ لَئي پَساھُہ،
ھُو مِرون ھِي ماھُہ، ڪِينَ ڪَمِيڻي رَکِئو.

بيت - 11

وِلاڙئو وَڻين چَڙھي، رَئِي پَسئو روءِ،
وِچان جو وِچُ پوءِ، سو ڪَنھن پَرِ ڪَهِي لاھِيان.

بيت - 12

وِلاڙِئو وَڻين چَڙھي، اُونچَنِ مَٿي اَڄُ،
لالَنَ ڪارَڻِ لَڄُ، باسِيائِين بَردارَ جو.

بيت - 13

وِلاڙِيئو وَڻين چَڙھي، ڏئو پَٽولي لانگَ،
ٽاريءَ ٽاريءَ ڇانگَ، سَسُئِي مورَ ٻَچَنِ جِيئن.

بيت - 14

وِلاڙِئو وَڻين پڙھي، ڪي جو ڏِنائين،
موت ماريائين، پاڻِ تنهيِن جي پَتِ ۾.

بيت - 15

وِلاڙئو وَڻين چڙھي، پَسو سَگهہ سَندِياسِ،
آڌِيءَ وَڃئو آکُڙي، نَڪو پِيءُ نہ ماسِ،
سوئِي سو سيڻاسِ، پَري پَڙاڏا ڪَري.

بيت - 16

ولاڙِئو وَڻين چَڙھي، ڏاڍو ڏوي ڏُور،
سُپيرِيان جي سُورِ، پَري پَڙاڏا ڪَري.

بيت - 17

پَري پَڙاڏا ڪَري، اوري نہَ آھي،
ڪَمتَرِ ڪاڪاھي، پَهُچي ھِنَ پَٽِيءَ کي.

بيت - 18

رُڃُنِ ۾ رَڙِ ٿِي، ڪَر ڪووَلَ جي ڪُوڪَ،
وَلَولو ۽ ووڪَ، اِيءَ تان آھِہ عِشقَ جِي.

بيت - 19

رُڃُنِ ۾ رَڙِ ٿِي، ڪَرَ چَتُونءَ جِي چانگار،
اِيءَ عِشقَ جي اُٻَڪارَ، نَعرو آھِي نِينهَن جو.

بيت - 20

رُڃُنِ ۾ رَڙِ ٿِي، جهڙِي ڪَري جوءِ،
اِيءَ نہ عورتَ ھوءِ، اِيءَ تان آھہَ عِشقَ جِي.

بيت - 21

رُڃُنِ ۾ رَڙِ ٿِي، ڪَرَ ڪَرڪي ڪونجَ،
نَعرو منجِهہ نِڪُونجَ، اِيءَ تان آھَہ عشق جي.

بيت - 22

رُڃُنِ ۾ رَڙِ ٿِي، ڪَرَ سارَنگِي سازُ،
اِيءُ عِشقَ جو آوازُ، ماڙھُو رَکَنِ مُنڌَ تي.

وائي - 1

ھيءَ گهايَلِ ھَڏِ گهورِي، اَلا، وو مِيان! ڪچي مُون نَہ سَڱِيڻا.
عِشقَ آرِيءَ ڄامَ جي، ھِيءَ جُهونَڙي ھَڏِ جهورِي،
وو مِيان! ڪيچِي مُون نَہ سَڱِيڻا.
رَھِي جا رُڃُنِ ۾، سا ڇَپَرِ ڇَڏِھو مَ ڇورِي،
وو مِيان! ڪيچِي مُون نَہ سَڱِيڻا.
اَدِيُون آرِيچنِ اَئي، ڏُونگَرِ ٿِيندِيَسِ ڏوري،
وو مِيان! ڪيچِي مُون نَہ سَڱِيڻا.

سُر ديسي

داستان پھريون

بيت - 1

مُٺِيَسِ! جَهل مَھارَ، ڪُٺِيَسِ! ڪاھِہ مَ ڪَرَھو،
مُون نِماڻيَ جي نِجُهرِي، ڀٖيرو ڪَجِ ڀَتارَ!
ساڄنَ! توھان ڌارَ، ڏِٺُمِ ڏِينھُن قَيام جو.

بيت - 2

ڏاگهنِ، ڏيرَنِ، ڏُونگرَنِ، ٽِنهي ڏِنَمِ ڏُکَ،
سي سَڀِ ڀانيَمِ سُکَ، ھيڪاندِ ڪارَڻِ ھوتَ جي.

بيت - 3

ڏاگهنِ، ڏيرَنِ، ڏُونگرَنِ، ڏُکَنِ آئُون ڏَڌي،
پُڇان پيرُ پُنوُءَ جو، وِجهان وِکَ وَڌِي،
لِکِئي آئُون لَڌِي، ناتَ پَٽَنِ ڪيرَ پَنڌُ ڪَري؟

بيت - 4

ڏاگها! ڪيمَ ڏَرو، اَڃا آرِياڻِي اَڳِي ٿِيو،
موڙي مَڃَرَ ٽَارِيُون، چانگا! ٿَا چَرو،
آن تان حَرِفُ ھَرو، مورائِين مُعاف ٿِيو.

بيت - 5

اَڱَڻَ مَٿي اوپِا، جَڏھن ڏاگها ڏِٺئي ڏِينھَن،
وَٺِي سَڙڪَ، سَسُئي! ويهُہ وِھاڻِيءَ سِيئَن،
چوٽي سين چانگنِ کي، جَڙِ زَنجِيرُن جِيئن،
تہ ھوتُ تُنھنجو ھِيئن، ھوندِ پُنوءَ نيائُون نہ پاڻَ سين.

بيت - 6

اَڱَڻَ مٿي اوپرا، جڏھن ڏاگها ڏِينھَن ڏِٺاءِ،
ڪُنجُون جي قُفِلَنِ جون، تان ڪنھن لَلِ لِڪاءِ،
تہ سُڀاڻي سَندِياءِ، ٿِئي سارُوڻِي سَسُئِي!

بيت - 7

اڱَڻَ مَٿي اوپِرا، جَڏھِن ڏِٺَئِي اُٺَ،
ڏايءِ نَہ ڏاگهَنِ کي، اوڳي! ساڻُ اَڳٺَ؟
تہ ھوندَ نَہ تُنھِنجي ھَٺَ، سورَ پِرايا سَسُئِي!

بيت - 8

اَڱَڻَ مَٿِي اوپِرا، جَڏَھِن ڏِٺَئہ توڏا،
وَنگِيءَ نَہ وارَنِ سِين، تَنِ گورَنِ جا گوڏا؟
تہ لَڪَنِ جا لوڏا، ھوندَ نہ سٺہءِ سَسُئِي!

بيت - 9

ڏاگهَنِئوُن ڏيرَنِ، جي آندا ٻَردَ ڀنڀورَ ۾،
ھَڻِي چِيل چَرا ڪيا، وِھَہ پَڻي وَھُڙَنِ،
کُڙِيءَ کُڙِڪُو اُنَ جو، ھوندَ سُتي سُئو سَڀنِ،
ڏاندَنِ ساٿِ، سَيّدُ چي، ڪي پِياديُون پَهچَنِ،
جَنِ جو پيرُ نہَ لَڳو پَٽِيين، تَنِ آيَمِ ساڻُ اُٺَنِ،
گُنگنِ ۽ جُنگنِ، مُنڌَ اَسُونهِين ميڙِئين.

بيت - 10

اَڳي اُٺَ رَڙَنِ، ڀيري ماٺِ ٿِئي،
پَلاڻِيندي، پاڻَ ۾، ڪُڇِيو ڪِينَ ڪُٺَنِ،
ڪا جا مامَ مُٺَنِ، ھِنِ پڻ ھُئِي ھُنَ سين.

بيت - 11

ڇا جي ڏِنگا ڏيرَ؟ مُنھنجو ڏينھن ڏِنگو مَ ٿِيي!
اُٺَنِ، اوٺِيڙَنِ جي، ڇا وَھِيڻو وير؟
ھِيَ ڪَمِيڻي ڪير؟ جا اَمُرَ کي آڏي ڦِري.

بيت - 12

ديسِي سيڻَ ڪَجَنِ، پَرَ ديسِي ڪَهڙا پِرِين؟
لَڏيو لاڏوڻا ڪَيو، پَنھنجي ديسِ وَڃَنِ،
پُڄاڻا پِرِيَنِ، ڪجي بَسِ ڀَنڀورَ کان.

بيت - 13

ڌُرِيان ئي ڌاريا، مِٽَ مُئِيءَ جا نَہ ٿِيا،
مَدِي ڏيرَنِ مَنَ ۾، کِليو کينڪارِيان،
صُبوح ٿي ساريان، تہَ اُٺَ نہَ واطاقُنِ ۾.

بيت - 14

اُٺَ مَ واري آڻِ ڏاگَهنِ ڏَڌِي آھِيان!
ھَڻِي ھَٿُ ھَيَنِ کي، پَري نيئِي پَلاڻِ،
ھوتُ مُنھنجو ھاڻِ، پُنوءَ نِيائُون پاڻَ سين.

بيت - 15

جتا! شالَ جِيئو! جِئو! ٿا جاڙُون ڪَرِيو؟
ٻانڀَڻ کي ٻَروچَ رِي، ٻيلِي ناھِہ ٻِيو،
ڇِنَڻُ تان نَہ پِيو، ھِيُ سَڱ ڇِنَڻَ نَہ جَهِڙو.

بيت - 16

جَتنِ جا جيلا، ٿِي ساٿُ پُڇائي سَسُئِي،
آيَسِ آرِيءَ ڄامَ جا، تَڙِ توڏا تِيلا،
اُن کي ھَڻِو سِيلا، لايو نِينهُن، نِنڊُون ڪَرِين!

بيت - 17

جَتَنُ ڪَجِ جَتَنِ جو، آيا ڪِ اِيندَا،
وَٺِي پُنوءَ پاڻ سين، وَٽان تو وِيندا،
دَمُ نَہ دَمِيندا، سِڌارِييندا ساڻِيه ڏِي.

بيت - 18

جَتَ ھَڏھِين ھُتِ، مُون ھِتِ ھِنئَڙي ۾ حَلُ ٿِيا،
چَنگُلَ جنِين چوڦَرا، راحَتَ تن جِي رُتِ،
گُنگنِ جي گُپُتِ، ڇيڙي وِڌِيَسِ ڇَپَرين.

بيت - 19

جَتَنِ وِڌِيَسِ جارِ، نات ھُيَسي نِماڻِي نِڪَڻي،
ٿِيَڙا پاڻَ قَرارِ، مُون مَنُ گَڏي گونَدرِين.

بيت - 20

جي ڄاڻان جَتَنِ، پوءِ پَٽاندَرِ ھيترو،
آئُون ڪِيئَن مِلان تَنِ، سَرَتِيُون! سورَ پِرائِيان؟

بيت - 21

ھي جي آيا ھير، سي مُون اَڳُ نَہ ڏِٺا ڪَڏَھِين،
آئون تَرِسان، ھو تَڪِڙا، پَٽِ نہَ لائِينِ پير،
ڀَنڀوِليَسِ بَرنِ ۾، پَسي ڀينڊِين ڀير،
آءُ آرِياڻِي! اُسِري، ٿي واھَرَ جي ويرَ،
ھيَ ڪَمِيڻي ڪيرَ؟ تون پارِسَ! رَسِجِ پَٻَ ۾ئ

بيت - 22

جَتَنِ يارانو، ڪيچيُنِ مُون سين ڪونق ڪيو،
نالي سُيَسِ ھوتَ جي، مَٿِمِ ٻارانو،
تيلانهين طعنو، ڏيندا مُون ڏيرَ وِيا.

بيت - 23

گورا وَڃَنِ گامَ، ڏيرَنِ سَندا ڏيهہ تي،
توڏَنِ جون تَڙَ ڀِيرَ ۾، تِريون تِرِڪَنِ تان مَ!
اوٺيَڙا آرامَ، لَنگهي پَٻُ، پَري ٿِيا.

بيت - 24

گَهَہ سِرِ ٿئي مَ گُسق، پَڻي پوءِ مَ پرينءَ تي!
جنھن سِرِ ساجَنُ سُپِرِين، تنھن اُٺَ مَ لَڳي اُسَ!
پُنوُءَ پاڪ پُرِسَ! ھوتَ نَہ ڪَجَنِ ھيڏِيون.

بيت - 25

اُس مَ لَڳي اوٺئين، ليڙان لُڪَ مَ لَڳَ!
اَللہَ! آريچَنِ کي، ڪوسو واءُ مَ واڳَ،
جَتَ جَهجها ۾ جَڳَ، منھنج پِرِتِ پُنوُءَ سين.

بيت - 26

لَڏيندي لِباسُ، جَتَنِ جيڏوئي ڪَيو،
اَچي آريءَ ڄام جو، وَڻَ وَڻَ منجهان واسُ،
مِروُن کِيَنمِ ماسُ، ھَڏَ ھلندا ھوت ڏي.

بيت - 27

اُٺَ ويري، اوٺارَ ويري ٿِيڙَمِ ڏيرَ،
چوٿون ويري واءُ ٿِيو، جنھن لَٽِيا پُنُوءَ پير،
پنجون ويري سڄُ ٿِيو، جنھن لُهي ڪي اَويرَ،
ڇَهون ويري ڇَپَرُ ٿيو، جنھن سَنوان ڪَيا نَہ سيرَ،
سَتون ويري چَنڊُ ٿِيو، کِرِيو نَہ وَڏيءَ ويرَ،
واھيري جي ويرَ، ڇُلون ڪَرِيان ڇَپَرين!

وائي - 1

ڏيگَهنِ، ڏيرَنِ ساڻُ، ڪَرَھَنِ ڪيچِينِ ساڻُ،
مَتان ڪا ٻِي لَنوُ لائي!
آئون سُتِي، ھو ھَلِيا، وِيَڙا ڪَرَھَلَ ڪاھي،
آسَڻَ اَڳِيان چِتَ کي، وِيَڙا ھوتُ ڇَپائي،
جيڪا ھُيَنِ مَنَ ۾، ويڙا پنھنجي پُڄائي،
اَدِيُون! عَبُداللّطِيفُ چي، اِيندَمِ واڳَ وَرائي.

داستان ٻيو

بيت - 1

اَڄُ پڻ وَسائِي اوٺِئين، مَٿي مارڳَ ماڪَ،
پُنوءَ نيائُون پاڻَ سِين، تاڙِيون ڀَڃي طاڪَ،
ھيهاتُ ھيهاتُ لَمّاَ تُو عَدُونَ، سُڃِي ٿِي واطَاقَ،
چُڪِيءَ چوري چاڪَ، ھاڙھي ھوتَ ھلي وِيا.

بيت - 2

مِڙِي مُنڌَ ڏي آئِيُون، ساھيڙِيُون سَهَجان،
”اَلسَّفَرُ قِطۡعَتهٌ مِنَّ النَّار“، ھاريءَ موٽُ ھِتان،
سَڱَ صِراطَ الۡمُسۡتَقِيۡمَ جو، اَٿيئِي تان اڳيان،
سي ڪيچِي نِيندَءِ ڪِيان؟ تُنھنجو نِينهُن نِفاقَ سين.

بيت - 3

جَڏان ڪُنۡ فَيَڪُوۡنَ چَئِي، نِيو آرِياڻِيءَ اَرِواحُ،
اَنگُ اَڳَهِين لِکِيو، مُنھنجو مِيثاقاءِ،
” مَنۡ طَلَبَ شَيۡئاً وّجَدَّ وَجَدَ“ ، اُتو عَلِيءَ شاھَہ،
اَڃان ھن حَدِيثَ جو، مُون آسِرو آہ،
پُنوءَ جي پيغامَ تان، مُنھنجو موتُ مُباحُ،
سَرَتِيُون! دُعا ڪَجاہُ، تہ ميڙائو مُون ٿِئي.

بيت - 4

سَبَهہَ سِياھِي، آھي آرِيءِ ڄامَ ري،
ڪڏھن پَسي ڪا نہ ڪا، رِءَ لالَنَ لالائِي،
دُودُ دِلِ دُور ڪَري، ڪَرِ، ساجَنَ! صَفائِي،
”مَنۡ لاَ شَيۡخُ لَهٌ فَشَيۡخُهُ الشّيۡطَانُ“، اِنَ رِءَ اُونداھِي،
ھُوءَ جا ھَلِي ھيڪِلِي، سا گِيرَبَ گَمائِي،
بِلا شَيۡخِ مَنۡ يَّمۡشِيۡ في الطَرِيۡقِ، اِھڙِي اَوائِي،
تنھن رِءَ تَوائِي، ڪوڙين ٿِيَنِ ڪيتَريُون.

بيت - 5

بَرُ وَڏو، بارُ گهَڻو، ويجهو نَہ وَڻڪارَ،
ليڙَنِ جو لَطِيفُ چَي، کَنيو منڌَ مَدارُ،
وَڻَندُنِ تہَ وَرِ ڪَندَا، ناتَ اَڳِيَن جو اَختِيَارُ،
ڪاڏي ٿِيو ڪوھِيارُ! ڪاڏي ٿي ھَٿَ کَڻِي!

بيت - 6

ڪيڙي ڪيچاينِ، گؤرا گَسِ ھَلائِيا،
لَڙِيو، چوٽِيئن، ڪَرِيو ڪوھَہ ڪَڙنِ،
سُونهَن جي سَردارَ سِين، سي توڏ مَ تَرٽجَن!
لُطفَ ساڻُ، لَطِيفُ چي، لَنگهِيو بَرُ بوتَنِ،
تن ڪَهِڙو عَمُ گَنگنِ؟ ھوت حماتِي جَنِ جو.

بيت - 7

جاڳائي جَتَنِ، گورا گَسِ ھَلائيا،
لَڙِيو، چَڙِھيو چوٽِئين، ڪريو ڪوہَ ڪِڙَنِ،
سُونهَنِ جي سَردارَ سين، سي توڏَ مَ تَرِٽجَنِ!

بيت - 8

جاڳائي جَتَنِ، گؤرا گَسِ ھَلائيا،
پُهتِي رِءَ پَهاڙَ ۾، اُٺَ مَ اَگهٽجَنِ!
لَتاڙي لَطِيفُ چي، لَنگهِيو بَربُو تَنِ،
تَنِ ڪهڙي چُڪَ چانگنِ؟ ھوتُ حِماتِي جَنِ جو.

بيت - 9

ڀِنِيءَ ٿا ڀَرِينِ، ساٿِيُنِ سَندَ ھَٿَنِ ۾،
ليڙَنِ جو، لَطِيفُ چئي، مُون کي منجُهہ نَہ ڏِينِ،
ھوتُ پُنو ٿا نِينِ، اَسُونهِينءَ جو آجِڪو!

بيت - 10

پڻ ٿا پَلاڻِينِ، اوٺِي اَڄُ اُٻاکَرا،
پَهَہ، پاريسِيُون پاڻَ م، ڏير ويهاڻي ڏِين،
ھوت پُنوُءَ ٿا نِينِ، ٻاروچِي ٻولِي ڪَيو!

بيت - 11

پڻ ٿا پَلاڻِينِ، اوٺيِي گهَڻو اُٻاھرا،
ھُوءِ جي ھَلَڻَ سَندِيُون، ڳاھُون ڳالهائِينِ،
مون کي ٿا مارِينِ، سَڄَڻ سانباھي ڪيو!

بيت - 12

اوڳارِينِ نہَ آنِرا، ٻَڌا چَوَنِ نَہ ٻُورُ،
لِيڙَن کي لَطِيفُ چَي، ھَلَڻ جو مَذِڪورُ،
مَيَنِ کي مامُورُ، آھي اُڻِتُڻِ اَڳِئِين پَنڌَ جِي.

بيت - 13

ويٺي ٻُڪِي ٻاڦَ، جهولي جُهڻِڪَ جهُني ڪَي،
آيَمِ تَنِ اُٺَنِ سِين، جَنِ جا پيرَ دُدا ڌَڙق داڦَ،
لَنگهِيا لَڪَ، لَطِيفُ چي، توڏَ تَڙَ، ٻَنگَ طاڦ،
ڪيرَ لَنگهِيندِي قافَ؟ اِيء بَرُ بِرَھَمڻِ پاسِيو.

بيت - 14

دوڪَ دَھِليا جِتِ، گؤرا ھَلَنِ نَہ گَسَ ۾،
چَؤ سالَ ئِي نہ چَلِڻا، ٿِي تَنگَ نِهاري تِتِ،
سُؤڌِي اُنِين، سَيّدُ چي، پوءِ پاڃارِيَنِ پرت،
اِنَ اَڙانگي پَنڌَ جِي، ڪا نيشَنِ پوءِ نِرِتِ،
سَسُئِي وَڏي سَتِ، جا اَھڙِيءَ پَرِ پَنڌُ ڪَري.

بيت - 15

”ھَيءِ! ھَيءِ!“ ڪَيو ”ھاءِ!“، ٿِي پاڻ ھڻي سِرِ پاھِڻين،
لَڌائِين، لَطِيفُ چي، جُوءِ جَتَنِ جي جاءِ،
شُڪرَ بار سَنداءِ، سُٿاڻي ساٿِ مڙِي.

وائي - 1

لالَن آيَڙو پيهِي، ويَڙا سُورَ سَڀيئِي،
جِئسِ! جِئسِ! وو! جيڏِيُون!
ڳالِهيون ڪَندِيَسِ ڳُجهيون، مُنھنِ مقابِلِ ويهِي،
جِئسِ! جِئسِ! وو! جيڏِيُون!
سَرڪَشي سَردارَ سين، مُون ڪَمِيڻِي ڪيهي،
جِئسِ! جِئسِ! وو! جيڏِيُون!
ھُئي شڪَسِتي سَسُئي، رازَ پُنُوءَ جي ريهي،
جِئَسِ! جِئَسِ! وو! جيڏِيُون!
اَدِيُون! عَبدُاللّطيفُ چي، سَڄَڻَ آيَمِ سيئي،
جِئس! جِئس! وو! جيڏِيُون!

داستان ٽيون

بيت - 1

اَللہَ ڪارَڻِ، اوٺِيا! ڪَرَھا مَ ڪاھِيو،
جانِبَ! جَڏي جِيءَ جو، آڳانڍو آھِيو.
لاڳايو لاھِيو، مَتان مُنھنجو سُپِرِين!

بيت - 2

اَللہَ ڪارَڻِ، اوٺِيا! ليڙا نِيو مَ لُرَ،
نيو نِماڻِي پاڻَ سين، ٻانِهيءَ جَهلي ٻُر،
مُون کي ماري مَنجِهہ ٿِي، سَندي ھوتن ھُر،
ڪَچو لايان ڪُرَ، ڪيچان اوري جي وران.

بيت - 3

ڪيچان اوري ڪِٿَهِين، وَڻُ نَہ ويسَانهِين،
ڪَمِيڻِي! ڪيچَيُنِ لَئي، پورِج پَرانهِينِ،
تانِج تيڏانهِين، وارِجِ ڪا مَ وَرَڻَ جِي.

بيت - 4

ڪيچان اوري ڪيتِريُون، مَعذُورِيُون مُيُون،
واٽُون وِيهَہ ٿِيُون، ڪُهُہ ڄاڻان ڪيهِي ويا؟

بيت - 5

اَلا! اچَنِ اوءِ، جَن آئي مَنُ سَرَھو ٿِئي،
پَسان مان پَرِ ڪَنهِين، جَتَنِ سَندِي ٿِئي،
لَنگهي لَڪَ، لَطِيفُ چي، سُنيان ھوتَنِ ھوءِ،
گولِي ٿِيان گُلَبوءِ، جي سُڃاڻان ساٿ ڌَڻِي.

بيت - 6

ڪيچان آيو قافِلو، راتِ موچاري رُوءِ،
بوتي ۽ بَلوچَ جِي، رِڙھي پَسان رُوءِ،
لَنگهِي لَڪَ، لَطِيفُ چَي، پُڇان ڪِيچِيُنِ ڪوءِ،
گولِي ٿِيان گُلَبُوءِ، جي مون نِيو پاڻَ سِين.

بيت - 7

ڪيچان آيو قَافِلو، ڀَليرو ڀايان،
پَڻِي جا پيرَنِ جي، لِڱَنِ کي لايان،
چَنبِيلي چايان، جي مُون نِيو پاڻَ سِين.

بيت - 8

ڪيچان آيو قافِلو، ڄامَنِ سَندو ڄامُ،
پَسندِي پُنوءَ کي، اَکِيُن ڪَيو آرامُ،
ناتَرِ چايان نامُ، جي مُون نِيو پاڻَ سِين.

بيت - 9

ڪيچان آيو قافِلو، جُنگُ سُونهارِيءَ جوڙَ،
تَلِيارا توڏَنِ کي، ڳِچِيءَ سُؤنهَنِ موڙَ،
دَؤلَتَ چايان دوڙَ، جي مُون نِيو پاڻَ سين.

بيت - 10

ڪيچان آيو قافِلو، طَرَحَ موچارِيءَ توڏَ،
سِينگاريائُون سَيّدُ چَئي، ڪَرَھا منجهان ڪوڏَ،
لَکُ لَهي ٿِي لوڏَ، جِيجان! تَنِ جَتَنِ جي.

بيت - 11

ڪيچان آيو قافِلو، ساٿَ ڌَڻِي سَرواڻُ،
وارَ وَڍي واڳُون ڪَرِيان، پُئان ھوندِ پَلاڻُ،
جَهڙو پُنوءَ پاڻُ، تَهِڙي سِٽا ساٿَ جي.

بيت - 12

جهوُڙا جن جُهلُنِ ۾، ھيري لَکَ ھَزارَ،
لَڳا واٽَ وَڻَنِ جا، پُنوءَ کي پالارَ،
آن ڪي ويندا گَڏِيا، اَھڙيءَ سِٽَ سُوارَ؟
لَنگهي ڪالَهہ قَطار، تُون آئِي! اَڄُ نِهارِئين!

بيت - 13

مِزِمانَنِ مَهرِي، آڻي جهوڪِيا جهوڪَ ۾،
جاٽي چَنبَنِ ۾ وِيا، جِئن بازُ سَٽي بَحرِي،
ڪوھِيارو قَهرِي، وِيو نِهوڙي نِنڊَ ۾!

بيت - 14

ڪيچي ڪالهَہ ڪَهِي وِيا، اَدِيُون! آڌِيءَ راتِ،
جَاڳان تان جيڪِي ٿِيو، وِھاڻيءَ پِرڀاتَ
ڦُوڙَائو فَقِيرَ کي، ڏِنو جَتَنِ ذاتَ،
رَفيعُّ الدَّرجَاتِ! پَرَمَلُ پُنوءَ مِيڙِئين.

بيت - 15

مُون ڀانيو مُون وَٽِ، ھَميشه ھُوندا پِرِين،
ويڙھو ڏيئِي ويڪِرو، پَهري وِيا پَٽِ،
ساھُہ جنِين جي سَٽِ، وِڪِيُمِ ٿي وَڻِڪارِ ۾.

بيت - 16

مُون ڀانيو مِزِمانَ، ھَميشهَ ھُوندا پِرِين،
ڪُهِي ڪَمِيڻِي ھليا، ڪَهِلَ ڪَيائُون ڪانَ،
ڏيئِي ويا ڏاہِ کي، سُورَنِ جا سامانَ،
جورو راتِ جُوانَ، جيڏيُون! جَتَ ڪَري وِيا!

بيت - 17

ڀانيَمِ جي سَرِواڻَ، ڇُلائِيندَمِ ڇَپَرين،
کنيَمِ ھوندَ پَلاڻَ، اُٺَ گَڏايَمِ اُنَ جا.

بيت - 18

ڪاڏي مُنھُن مَڪَرانَ جو؟ ڪاڏي پَريون پارُ؟
ليڙَنِ جو، لطيفُ چي، سُونُهون ٿِيو سردارُ،
جو مُلڪَ جو مَهندارُ، سو موليٰ مُون کي ميڙئِين.

بيت - 19

بِرِہق مَڻايُسِ بَرُ، ناتَ سُکِي ڪيرَ سَڌُون ڪَري؟
گَهڻو ڏورِيائِين ڏُکَ سين، ڏيرَنِ لئي ڏُونگرُ،
ورِي آيُسِ وَرُ، سَفَرَ مُئيءَ جا سابِ پِيا.

بيت - 20

وَرَ ۾ ڪونهي وَرُ، ڏيرَنِ وَرُ وَڏو ڪَيو،
نِهارِيندِيَسِ نِڪَري، بوتَنِ ڪارَڻِ بَرُ،
آڏو ٽَڪَرَ ٽَرُ، متان روھہَ رَتِيُون ٿِئين!

بيت - 21

وَرَ وَراڪا وِچَ ۾، لَکين آڏا لَڪَ،
ھُوجي آڏا حَقَ، سي ڪَندا ڪوہُ ڪَندِيُنِ کي؟

وائي - 1

آئون جا مارِي، سَڄَڻَ! تنھنجي نينهن،
وو! ڇَڏي تُون ڪو ڇَپَرِ وِيندين،
لُڪُون لَڳَنِ ڪوسِيُون، ڏاڍا تَپَنِ ڏِينهن،
عِشِقَ آرِيءَ ڄامَ جي، ڪِيَسِ نِماڻِي نينهن،
جهونگاريندي جَهنگَ ۾، ڏوٿيَنِ ڏِٺَڙِي ڏينهن،
آن جا ڇَڏي ڇَپرين، ڪيچ رَسَندِي ڪيئَن؟
وِلَهيءَ ھِتِ وَسائِيا، سَندا مَحَبَتَ مينھن،
اَدِيُون! عَبدُاللّطيفُ چي، پَهُچان سيڻَنِ سِيئن.

داستان چوٿون

بيت - 1

وارو! وَرُ وَٺِي وِيا، آريچا اَظلامَ،
آندائُون آرِيءَ ڪا، پُنوءَ ڏي پيغامَ،
پَهُہ ڪَيائُون پاڻَ ۾، مُنھان مَخِفِي مامَ،
ڪاڪِيُون! راتِ قِيامَ، جيڏِيُون! جَتَ ڪَري وِيا!

بيت - 2

وارو! وَرُ وَٺِي وِيا، جابِرَ ڪَري جور،
بيدِي ٿِيو ڀَنڀورُ، حَشَرُ ڪَري ھَلِيا!

بيت - 3

وارو! وَرُ وَٺِي وِيا، ڪَري ڏيرَ ڏَمَرُ،
ھاڻي ٿِيو حَشَرُ، پُنا قول قِيامَ جا!

بيت - 4

وارو! وَرُ وَٺِي وِيا، ڏيرَ ڪَري ڏورو،
ساڄَن رِءَ سَرَتِيُون! آتَڻُ اَڌورو،
ني سِين نِسورو، حَشَرُ ڪَري ھَلِيا!

بيت - 5

وارو! وَرُ وَٺِي وِيا، جورِي سِين جابِرَ،
صَبُر ڪِئَن صابِر، اَچي عَجِيبَنِ رِي؟

بيت - 6

وارو! وَرُ وَٺِي وِيا، ڏاڙِھِيءَ ڀَنڀا ڏيرَ،
ڏِيندِيَسِ ڏاڍين ڏُونگَرين، اُنِين لَئي اُليرَ،
ڪيچِ پَهُچي ڪيرَ“ وڃڻَ سين وَسُ ڪَرِيان.

بيت - 7

سَنجهِي مُون نَہ سَنڀالِيو، صُبحَ سارِيَمِ سورَ،
جَتَنِ لاِ ضَرورَ، گهڻا گهارِيَمِ ڏِينهَڙا.

بيت - 8

سَنجهِي مُون نہ سَنڀالِيو، صُبحَ سارِيَمِ سُورَ،
آڌِيءَ راتِ اُڌِمِيو، ڏين پَلٽِيو پُورَ،
جَتَنِ لاءِ ضَرورَ، مَادَرِ! مارِي آھِيان!

بيت - 9

سَنجهي مُون نَہ سَنڀالِيو، مارِيَسِ سورَ صُبوحُ،
نيڻَ ھِيرايئي ننڊَ سِين، جَتَنِ لَنگهِي جُوءِ،
ھاڃو ڪَري ھُوءِ، آڌِيءَ راتِ اُٿِي وِيا!

بيت - 10

آڌِيءَ اوءِ راتِ اُٿِي وِيا، ڪَرُ رَکِيائُون ڪِيچ،
ٻاروچاڻِي پيچَ، مُنھنجو مَنُ مُنجهائِيو!

بيت - 11

جَڏِيءِ وَٽِ جالي، مانَ اَللہُ ڪارَڻِ لِکَ سِيئن،
آھي آرفيءَ ڄامَ جي، ھِتِ ھُتِ حوالي،
عَيبَ مُون آڳَرا، مانَ نِرۡمَلُ نِڪالِي!
پَرِٽياڻِي پالي، ڪامِلُ نِيندو ڪيچَ ڏي!

بيت - 12

پَريٽَنِ پالِياسِ، ٻانڀَڻِ ٻيٽِي آھِيان،
حُسنَ ھوتَ پُنوءَ جي، ماري موتِ وِڌِياسِ،
جانڪِي جِنَدِياسِ، پِيَسِ وَرِ وِصالَ جي.

بيت - 13

پَرِٽَنِ جي پاڙي، جاڙَ گُذارِيَمِ، جيڏِيُون!
جنِين مُون کي مارِيو، سُؤرَنِ سين ساڙي،
اِرادي آڻي، سانگِي سين سَڱُ ڪَيو.

بيت - 14

اَسِين پاڻَ پَرِٽَ، پورھِيَتَ پُنوءَ ڄامَ جا،
ھوتُ کَٿُورِيءَ ھيرَئون، مُون ۾ صابُڻَ ڇَٽَ،
آتَڻَ مَنجِهہ اُگَهٽَ، ڪانڌُ ڪنهِين جِي مَ ڪَري!

بيت - 15

آئون تان اَھڙِياءِ، جا ٻانهيءَ کي ٻائي چوان،
مُون ڪَميڻِيءَ لاءِ، پُنُوءَ ٿي پَرِٽُ ٿِيو.

بيت - 16

گَڏيو ڌوٻِيُنِ ڌوءِ، پُنونءَ پارِچو ھَٿَ ۾،
اُتي آرِيءَ ڄامَ جو، قاصِدُ آيُسِ ڪوءِ،
اِيُ، ڪامِلُ! ڪَمُ نہ سَندوءِ، جِيئَن پَهَسَ پَڇاڙِئين پوتِئين.

بيت - 17

نَڪو ڪيچُ ڀَنڀورُ، نَڪو مائِٽُ مُنڌَ جو،
ھورُ مِڙوئِي ھِنَ کي، ھوتَنِ ڪونهي ھوز،
زاريءَ ڌاران زورُ، ھَلي ڪونَ حَبيبَ سين.

بيت - 18

ڇوري نِدورِي، نَڪو مائِٽُ مَنڌَ جو،
سَوِين ھَلَن ساٿَ ۾، ڪَمي ۽ ڪوري،
آئون پُڻ آھِيان اُنَ ۾، لَنگهِي ۽ لوري،
لَنگهائِيين، لَطِيفُ چي، ٿَرَنِ جا ٿوري،
آھِيان آ زوري، تُنھنجِي جوري جَبَلُ لَنگهيان.

وائي - 1

ڇاکي ٿا ڪَرَہَ قَطارِيو واڳ وٺي وَرُ واريو،
وو! مُون نِماڻِيءَ تان ڪِي نَڳ چيو.
رَھو راتِ ڀَنڀورَ ۾، تان ڪا گهڙِي ھِتِ گهارِيو،
سِڪِي جنھن سَڱُ ڪِيو، تنھن معذورِ کي مَ مارِيو،
سائِينءَ مَڃَرَ ٽارِيُون، چانگنِ کي اَئِين چارِيو،
اَڀَري عَبدُاللّطِيفَ ڏي، واڳَ، وَنهيَلَ! اَئِين وارِيو.

داستان پنجون

بيت - 1

جئن سو ھَرَڻُ ھُماءُ، سَر گَردان سَنسارَ ۾،
ھِيُ پَڳُ نہ کوڙي پَٽِئِين، ھُو ڌَڙَ سِرِ ڌَري نہ ساہُ،

بيت - 2

راتِ ڏٺائِين روجَهہ، ڀانءِ ڪِ اوٺِي آئِيا،
پِرِيتَڻي پِرِيُنِ جي، سِڪَڻَ ڪِي سَٻوجَهہ،
ھُئِي گهَڻو اَٻوجَهہ، سُورَنِ سُنهائِي سَسُئِي.

بيت - 3

روجهَہ ڏِٺائِين راتِ، ھوتُ ڳولِيندي حَبَ ۾،
ڪيچِينُ جي ڪَرِي ٿئي، توءِ تَنِين جِي تاتِ،
ٻاروچاڻِي ذاتِ، منا مُئِيءَ نَہ وِسِري.

بيت - 4

جَبَلَ ۾ جانار، سَرھَہ گَڏِبَئِي سَسُئِي!
ڀِنيءَ پوءِ ڀورِئي، ٻانڀَڻ جِي ٻاڪارَ،
ھوتاڻِي ھيڪارَ، موليٰ! مون کي مِيڙِئين.

بيت - 5

سَمَرُ جنِين نَہ ساڻُ، ھوتُ حِماتِي تن جو،
ڪَري ڇيڄَ ڇَپَرَ ۾، پُنوءَ اِيندو پاڻَ،
ٿِيندِي ريجَهہ رِھاڻِ، لَحظي مَنجِهہ، لَطِيفُ چي.

بيت - 6

پَسِي سي سَرَھِي ٿِئي، جي مَيَنِ لَنگهِيا مَسَ،
تِٿُ تَنھِن کي ناھِہ ڪو لَڪَ مِڙِيئِي لَسَ،
حُبَ جَنھِن کي ھوتَ جي، وِندُرَ تَنھِن کي وَسَ،
سَندِيءَ چنگنِ چَسَ، پيرَ ٺَرندَءِ پَٻَ ۾.

بيت - 7

سَسُئِيءَ لَنگِهيو سو، مَردَ جنھن ماتِ ڪَيا،
جَبَلُ وڏو جو، نوُڻِ مِڙوئِي نِينهَم کي.

بيت - 8

جَبَلُ ماري جَکَ، جو آڏو آرِيچَنِ کي،
توڻي لَڪَنِ لَکَ، سَڀِ لَنگهيندِيَسِ سِڪَ سِين.

بيت - 9

جَبَلُ جيڏوئِي، جو آڏو آريچَنِ کي،
وَٺِي وَرُ، واٽَ وِيا، بُرفَتَ بِروھي،
رُڃُنِ ۾ روئِي، پَسان شالَ پُنوءَ کي!

بيت - 10

جَبَلَ سُڄَنِ جالَ، آڏا آيچَنِ کي،
ھاڙھي ڏانھن ھَٿُ کَڻِيو، ڇَپَر مِڙان شالَ!
ڪيچِي وِيَڙَمِ ڪالَ، تي ٿي ڏُونگَرَ ڏورِيان.

بيت - 11

ڇَپَرُ ڇَمَرُ ڀانيان، ڪانڀو ۽ ڪارو،
پَٻُ وِجهندِيَسِ پُٺِ تي، صُبُحَ سَوارو،
وَڃَڻَ مُون وارو، ڪينَ وِھندِيَسِ وِچَ ۾.

بيت - 12

ڇَپَرَ ۽ ڇَمَرَ، ٿا لَڳَهَہ لَڳَنِ پاڻَ ۾،
ڏاڍا ڏُونگرَ ڪَر ڪَرا، ويڌَ، وِنگايُون وَرَ،
آئُون پِيادِي پَٽِئين، نِماڻِي نِڌَرَ،
سُورِيُون جِتِ، سَڳَرَ، سُتِ ٻاتاڙِيءَ ٻيلِي ٿِئين!

وائي - 1

ھِنئڙو ٿو ھُنِ ساري، منھنجو ساھُہ سَيدَ کي ٿو ساري،
جيڏِيُون! آئون ھَلَندِي، ويندِي ھوتَ ڏي،
سَرَتِيُون! آئون ڪَهَندِي، ويندِي ڪيچَ ڏي.
وتَنِ ھَلَڻُ مَنَ ۾، ڪيرَ، گهَڙِي ھِتِ گهاري؟
آسَرَ ڀَرِي آھِيان، مان واحدُ آڻينِ واري!
پَنڌَ اَڙانگا پَٽئين، مون کي ڪوھِيارو ٿو ڪاري،
سَچو سُخُنُ سُپِرِين، مانَ پُنَلُ پنھنجوپاري!
ڄيرو اَندَرِ ڄندَڙي، وِيو ٻاروچَلُ ٻاري!
وِڌا ڪَمَ ڪَرِيمَ تي، ھِنَ ويچارِيءَ واري،
اَدِيُون! عَبدُاللّطِيفُ چي، وِھَندُمِ ڪِينَ وِساري.

داستان ڇھون

بيت - 1

آڏَتِراڇا، آھُڙا، ڏُونگرَ کي ڏاڪا،
ڪَيَمِ آھَہ عَجِيبَ کي، سِڪَ مَنجهان سا ڪا،
پيئِي ھٿِيڪِي ھوتَ کي، سِڪَ مَنجهان سا ڪا،
مُنھنجو وَسُ ھٿِيڪِي ھوتَ کي، ڪُوڪَ وَڃِي ڪَنِ ڪا،
مُنھنجو وَسُ واڪا، ٻُڌَڻُ ڪَمُ ٻَروچَ جو.

بيت - 2

آڏَتِراڇا، آھُڙا، ڏُونگَرَ کي ڏاڪا،
وَٺِي وَرُ واٽَ ٿِيا، بَرُ چَڙھِي باڪا،
ڦَٽِيا پيرَ فَقِيرِ جا، چَڙَھندي چَڙھاڪا،
ھُيَنِ جِيءَ اَندَرِ جاڪا، وِيا پُڄائي پانھِنجِي.

بيت - 3

آڏَتِراڇا آھُڙا، ڏاڪا ڏُونگَرَ کي،
ھوجي وَرَ وِندُرَ جا، مارِيندا مُون کي،
ھاڙھو ھيڻِيءَ کي، لنگهائِجُ لَطِيفُ چي.

بيت - 4

آڏَتِرَاڇا آھُڙا، وندُرَ وَراَڪا وَرَ،
حُبَ جَنهيين کي ھوتَ جي، سا ڏوريندِي ڏونگَرَ،
پُهُچائين پَرِوَرَ! لُطُفَ ساڻُ، لَطِيفُ چي.

بيت - 5

آڏَتِراڇا آھُڙا، وندُرَ وَراڪا وَاڪَ،
اُجهايَسِ اُٺَنِ جي، ڦوڙائِي فِراقَ،
پُنوءَ پَرِمَلَ پاڪَ! واحِدَ لَڳِ، وَرِيجِ تُون.

بيت - 6

آڏَترا ڇا آھُڙا، وِنگا وَرَ واٽُنِ،
جيرا جڳِرَ، بُڪِيُون، آرِيءَ لئي آٽَنِ،
ڪَشي ڪَنواٽَنِ، سَنوڙا سَيّدُ چَئي.

بيت - 7

ڪوڏَرِ نَہ ڪاتِي، جَنھِن سين ٽَڪَرُ ٽاڪِيان،
جيڪو جَبَلُ لَنگهِيان، سو ھيبَتَ جو ھاٿِي،
پِرِيُن جا پاتِي، سا جڙَ جِيئَري نَہ لَهي.

بيت - 8

ڪَرِڙا ڏُونگَرَ ڪَهَہ گهَڻِي، جِتِ بَرَپَٽَ، سُڄَنَ بيرانُ،
ڏاھَنِ ڏاھَپَ وِسِرِي، ٿِيا حَرِيفَ ئِي حَيرانُ،
سَسُئِيءَ لَنگِهيو، سَيّدُ چي، مُحَبَّتَ سين مَيدانُ،
جنهنجو آرِياڻِي اَڳوڻُ، تَنھن کي ڪانهي باڪَ بَهِيرَ ۾.

بيت - 9

ڪَرِڙا ڏُونگَرَ، ڪَهَہ گَهڻِي، جِتِ واٽُنِ تي واري،
آڏا لَڪَ، لَطِيفُ چي، بَرَ سُڄَنِ بارِي،
جا مَنِزلَن مارِي، سا قَادِرَ! ڪيچِ رَساڻئين!

بيت - 10

ڪَرِڙا ڏُونگَرَ، ڪَهَہ گَهڻِي، جِتِ جَبَلَ گُوناگُونِ،
ليڙَنِ جُون، لَطِيفُ چي، تَنگ تَنوارُون پُونِ،
جن ڏِٺو پيرُ پُنُوءَ جو، سي نہ ڪي رُون نہ چُونِ،
ھُوندَنِ مَٿي ھُونِ، لاڳاپا ھِنَ لوڪَ جا.

بيت - 11

ڪرِڙا ڏونگَرَ، ڪَهَہ گهڻِي، جِتِ ماٿَرِ مٿاھِين،
سُڄنِ ٿا، سَيّدُ چَئي، اُت مِرو مَهائين،
تُون، آرِياڻِي! آھِين، مَنَهِن مَعذورِين جِي.

بيت - 12

ڪَرِڙا ڏُونگَرَ، ڪَهَہ گهَڻِي، جِتِ ويا روڏا رِنگائي،
ساڱاپي سيڻَنِ جي، ٿِي وِندُرِ واجهائي،
رَھيَسِ، رَسُ لَطيفُ چي، تنھن ڪَمِينيءَ ڪاھي،
آرِياڻِي آھي، مَنهَنِ مَعذُورِنِ جي.

بيت - 13

ڪَرِڙَا ڏونگَرَ، ڪَهَہ گهڻِي، جِتِ رِڻُ تَتو رَائو،
تِتِرُ ٿِئي مَ تَنِ کي، ڏونگرَ ۾ ڏائو،
جَڏَھِن ڄام پُنُوءَ ڄائو، تَڏَھِن ٿِي وَسَ وَڻِڪارَ ۾.

بيت - 14

ڪَرِڙا ڏُونگَرَ، ڪَهَہ گهَڻِي، جِتِ مِينهَن وَسَنِ ماڪون،
سُڄَنِ ٿِيُون، سَيّدُ چي، ھاڙھي جُون ھاڪون،
جِتِ اَنڌيوُن اوطاقُون، تِتِ ڪاھي رَسج ڪارڻي.

بيت - 15

سِڪِي جان سُتِياسِ، تان سِڪَ سُمهَڻُ نہ ڏِئي،
جاڳي، سُتِيَسِ جَنِ لَئي، آيا تان نَہ اُٿِياسِ،
ڀينَرُ! آئُون ڀُلِياسِ، نہ تہ سِڪَ سُمَهڻُ ڇا لَڳي؟

بيت - 16

ماڻِڪُ مِٽُ سَندومِ، اونداھِيءَ ۾ سوجِهرو،
حَشَرَ ويلَ حِسابَ ۾، ڇَڏي نَہ ويندومِ،
سارِيو سَڏُ ڪَندومِ، ڪوھِيارو ڪيچَ ڌَڻِي.

وائي - 1

ويندِيَسِ ڪيچِ ڪَهِي، سيڻَنِ ساڻُ سَهِي،
وو! ڀينَرُ! آئون جيئَندِيَسِ تان نَہ جَتَنِ ري.
وِھان ڪيئن ماٺِ ڪَري، ھيڏو سُورُ سَهي؟
ھيڏي شَهَرَ ڀَنڀورَ ۾، سارِيان ڪونَ سَهِي،
اَڳِيان آرِيءَ ڄامَ جو، ويڙو ساڀُ وَھِي،
صُبحَ ڏُونگَرُ ڏُورِيان، ڪَنھن پَرِ راتِ رَھِي.

وائي - 2

گُهمان جالَ جَبَلُ، مِيان! جيڏِيُون! جانِبَ جَتَ لَئي،
ڏورِينديَسِ ۾ ڏُونگَرين، ڪَندِيَسِ آئون اُڇَلۡ،
ھيڏي شَهَرَ ڀَنڀورَ ۾، رَھان نا ھِڪُ پَلُ،
پُنُوءَ پاڻَ نَہ وَڃِڻو، ڪو مُنهين ۾ وَلُ،
اوڏي ٿِي، عَبدُاللّطيفُ چي، ھوتَ ڪارَڻِ ھَلُ.

داستان ستون

بيت - 1

پُنُوءَ سين پِرِيتِ جو، ڪو جو پيچُ پِيومِ،
ڀَنڀي ھِنق ڀَنڀورَ ۾، وِھَڻُ وِھُہ ٿِيومِ،
مَتِيُون موٽَنَ سَندِيُون، ڪاڪِيُون! ڪِيمَ ڏِيومِ،
سَرَتِيُون! ساھُہ سَندومِ، ٿِيو حوالي ھوتَ جي.

بيت - 2

ڪُڄَاڙِيا ڪاھِي، شَترَ اُن سِينگارِيا؟
ٽَلِيُون، ٽَونر، ھَلِيِيُون، ويا ڇيرِيون ڇِمِڪائي،
لَنگهِيا لَڪَ، لَطيفُ چي، ڪَرَھَلَ ڪُڏائي،
ٻانڀَڻ کي ٻَروچَ جو، آسِرو آھي،
واڳُون وَرائي، ڦيرينِ مانَ فَقِيرِ تي!

بيت - 3

ڏانجَهنِ تي ڏانجها، ڏِنائُون ڏُکِيءَ کي،
لَڳِي نائُڪَ نِينهَن جِي، ڪُڙِھہ اَندَرِ ڪاجا،
ٿَرَنِ ۾ ٿاجا، ڪَري مُنڌَ مِرُنِ سين.

بيت - 4

ڪو مُنھِن ڪُٺَلِ آئِيو، وَسِ نَہ ويچارِي،
ھوتَ! تُنھنجي ھَٿَ ري، پُهُچي نَہ پارِي،
اَچِين جي، آرِي! تہ پاندَ پُڄِي، لَڪُ لَنگِهيان.

بيت - 5

ڪو مُنھِن ڪُٺَلِ آئِيو، ناھِہ ويچاري وَس،
ھوتَ! تُنھنجي ھَٿَ رِي، گولي ٿِئي مَ گَسِ،
ڏُکُ ڏُکِيءَ ڏَسِ، تہَ موڙھِيءَ ڪو مُنھن ٿِئي.

بيت - 6

ڪَڏھن تان ٻاجَهہ پَئي، ساڄَنَ! مُنجُ سَلامُ،
سِڪَ تُنھنجِيءَ،سُپِرِين! ڪَيو تَنُ تَمامُ،
ھَٿِين حاجَ وِہُ ٿِي، نيڻين نِنڊَ حَرامُ،
دوسَ! نہ سَهان دامُ، تُون وِندُرِ ٿو ويلا ڪَرِين!

بيت - 7

سُرَھي مَنجهان ساڀَ، آئي بُوءِ ڀَنڀورَ کي،
بيٺا بازارِنِ ۾، لائي جَتَ جَباتَ،
سَندِيءَ ھوتَ حِماتَ، ڪيچِ پَهتُو قافِلو.

بيت - 8

بَرُ مِڙوئي بُوءِ، ڇَپَرَ ڇاٽُون مُڪِيُون،
ٻَهِہ ٻَهہِ ٿي ڀَنڀورَ ۾، ھَنڌَ مِڙيئِي ھُوءِ،
راڻِيُنِ وَرِي روُءِ، گُوندَرَ لَٿا گولِئين.

بيت - 10

جَڏَھِن پيئِي باسَ، ڇَپَرھوتَ پُنُوءَ جي،
اَدِيُون! آرِيچَنِ جا، وَڻَنِ مُڪا واسَ،
آيل! پُنِي آسَ، پُنُوءِ آيو ڪيچَ ۾.

بيت - 11

آيَلِ! اوطاقُون، ڪَري ڪيچِي ھَلِيا،
سُڪِيُون نَہ سيڻَنِ جي، ماڳَنِ تان ماڪُون،
نِسورِيُون ناڪُون، سَڃي ھَلِيا سورَ جُون.

بيت - 12

جَتَنِ سان جانۡڪُون، سَرَتِيُون! مُون سَڱُ ٿِيو،
ڪَري ڪوھِيارو وِيو، تَنُ ڇِنِي تانڪُون،
آئُون پڻ تَڏانڪُون، اَڌَ ڏُکوئِي آھِيان.

بيت - 13

مَتان ڪا، ٻَڙي! ٻولَ ٻاروچي وِسَهي،
ھُوندَ نہ سُتِيَسِ، سَرَتِيُو! ويهِي رَھِيَسِ وَڙي،
جَتَ پَنھنجي جُوءِ ۾، گهارِينِ مانَ گَهڙِي!
ڪيچِيُنِ آئون نہ ڪَرِي، ڪنھن ڏُکِيءَ ڏاوَڻُ ڏائِيو.

بيت - 14

ڏيرَنِ ڏوہُ نہَ جيڏِيُون! ماءِ! مِڙوئِي مُون،
آئُون اَسُنهِين، اُوءِ سُونهان، پِرين ڀَلا پَرِڀون،
اَصل آرِيءَ ڄامَ جو، پاندُ نَہ پُڄِتو سُون،
جَنھِن جو تُونهِين تُون، سي پِيادُون پَهُچائيين!

بيت - 15

اَدِيُون! آئُون نَڳ تِيئَن، جِيئَن پِريَتَڻو پِرِيُن سين،
ٻَڌِي سُتِيَسِ نَہ سوگهو، ڇَلۡوَرُ ڇاتِيءَ سِيئَن،
ڪيچِي ڪاھي ڪَرَھا، مُونهان وَڃَنِ ڪِيئَن؟
ڏوہُ مُنھنجي ڏِينهَن، پُنوءَ کي ڪا مَ چَئي.

بيت - 16

وَرَ! مَ وِساريج، آھِيان تُنھنجي آسِري،
ڏاڍو ڏونُگَرَ جو سَڄي، سو لُطفُون لَنگهائيج،
اُسري اُتَهِين، ويرَ! تون، آري ڄامَ اَچيج،
نِماڻيءَ کي نوُرَ سين، لالَنَ! لڏائيج،
ظلمَتَ جا زَمين جي، سا نِرِمَلَ! نوُرُ ڪريج،
ڪامِلَ! ڪَنِ ڪَريجِ، فَرياديُون فَقيرِ جون.

وائي - 1

لَڳَڙِي آھہِ لَغارَ، وو! يارَ! لُنءَ ۾ لالَنَ جِي،
سَنڌَ سَنڌَ ۾ ساڄَنَ جي،
آئون سُتِي، ھُو ھَلِيا، سَنجهي ٿِيَڙا سُوارَ،
جيڪي اورَڻ پِرِينءَ سين، جيڪِي پرِينءَ پَچَارَ،
کوءِ سي جئڻ ڏينهڙا، جي پَونِ پِرِينئان ڌارَ!
لَڳِي آھي، نہ لَهي، سَندِي عِشقَ پَچارَ،
گَهڻُو اُڪَنڍي آھِيان، تَنِ جَتَنِ جي جِنسارَ،
گَڏِي ويندِيَسِ گَسَ ۾، ڪاڪِيُون! ساڻُ قَطارَ،
ميخُون مَحَبَتَ سَندِيُون، ھنڙي مَنجِهہ ھَزارَ،
ڪانگنِ قَطارُون ڪَيُون، چُڪِيءَ کي چوڌارَ،
آئون نِماڻِي نِڪَڻِي، دَمِجِ تُون دِلِدارَ!

وائي - 2

ھوتَنِ بِنا نِي، مِيان! دَرِدَ فِراقَ نِي، ميان!
پُنُوءَ سائينءَ، جيڏِيُون! اَلولو! مارِي آھيان!
اَدِيُون! آرِيچَنِ جي، آئون نِهوڙِيَسِ نِفاقَ،
ڏُونگَرُ ڏورِيو نَہ ٿِئي، مُون وِلَهِيءَ کان واڪ.

وائي - 3

تَنِ پِرِيُنِ کي اُڪَنڍي آئون، لَڪَ لَنگهيائُون،
ڏيرَ قَرارِيا ڏيهَہ ۾، تَنِ اُٺَنِ گهورِي آئُون!،
چَڙھِي ڏاڍين ڏُونگَرين، ٻانڀَڻِ اُڇلي ٻانهُون،
ھُيَسِ پاسِ پَرِٽَ جي، ٻانڀَڻِ ڌيءَ نائُون.

وائي - 4

ڇورِي ڇَڏِ مَ ڇَپَرِين، ٻاروچَلَ! ٻانهِي.
جانِبَ جَهڙو جَڳَ ۾، ناھي ڪو ثانِي،
پُنَهَلَ! نِيو پاڻَ سين، پورِھيَتِ پَرِٽِياڻِي،
پورِھيو ڪَندِيَسِ پِرَ جو، ڀَرِيندِيَسِ پاڻِي،
ھوتَ! مَ ڇَڏِيو ھيڪَلِي، ھِيءَ جاوِندُر وِڪاڻِي،
اَدِيُون! عَبدُاللّطيفُ چي، اِيندَمِ آرِياڻِي.

سُر ڪوھياري

داستان پھريون

بيت - 1

لَيلَ نَہ جاڳِينءَ لِکَ سِيئَن، ڪُلّي نَومُ ڪَياءِ!
قُم ٿِي، پَهُچُ قَرِيبَ کي، اِجلِسَ تو نہ جُڳاءِ،
مُٺِي! مهانَنِ سين، ويهِي راتِ وِھاءِ،
جيلان نِنڊَ ڪَياءِ، تي روزُ رَھِين ٿِي راہَ ۾.

بيت - 2

لَيلَ نہ جاڳِينءَ لِکَ سِيئَن، شام سُتينءَ سڀ راتِ،
اوڳي! اوٺيَڙَنِ جا، ٿِي پَهَہ پُڇِين پِرڀاتِ!
ٿِيُ سَڳَرِتن جي ساٿ، تہ ڀوري! ڪَنھن ڀال مِڙين.

بيت - 3

لَيلَنہ جاڳِينءَ لِکَ سِيئن، سُتينءَ راتِ سَڄِي،
ھِتان ھو تاڻِيُنِ جُون، ويئون خُرِزينُون کَڄِي،
ڀوري! تُون نہ ڀَڄي، سَبب ڪَنھِن ساٿِ مِڙِين؟

بيت - 4

اِجۡلِسۡ ڪَري اُٿِيا، تَنوارِيو توڏَنِ،
نَومَ نَوازِينءَ اُن جي، مَرۡحَبا موڏَنِ،
رِڙھِي رَسُ روڏَنِ، اَلۡيَوۡم سِيرُوا، سَسُئِي!

بيت - 5

غافِل! غَفلَتَ ڇوڙِ! تُون ڪِيئَن، اُڻاسِي! اوجِهرين؟
چُپاتا چَڙھِي ويا، وڃِي پَهُتا توڙِ،
نيڻين نِنڊَ اُکوڙِ، جِمَ وَرَنِ ۾ واڪا ڪَرِين.

بيت - 6

سَنجهي رَھين سُمِهي، غافِلَ! مَنجِهہ گهَرَنِ،
ليڙَنِ جو لَطِيفُ چي، ڪَرِ ڳَلَ سُوءِ نَہ ڪَنِ،
سي ڪِيئَن مُحِبَ مِڙَنِ؟ جي سَنجهي رَھَن سُمهي.

بيت - 7

آلوڙو اکينِ، آيَمِ نِنڊَ اَڀاڳَ کي!
ھاڻي ھِنَ ڀَنڀورق ۾ گهارِيان ڪارَڻِ ڪن؟
اَدِيُون! اوٺِيَڙنِ، ھِنئين سين ھاڃو ڪَيو!

بيت - 8

جَڏَھِن سُتِيُون جي، پَٿَرِ پيرَ ڊِگها ڪَري،
تڏَجِن تَنين کي، ساٿَ سُتيئِي ڇَڏِيو.

بيت - 9

سُتِينءَ پير ڊِگها ڪَري، وَڏِي جاڙَ ڪَياءِ،
دَرَ ڀَرِ اُڀِئين دوسِتَ جي، تہ سُرِ پُرِ ھُوندَ سُياءِ،
اَصلِ آرِيءَ ڄامَ جِي، سَڳِي تُون نہ سِياءِ،
پُنُوءَ سين پِياءِ، ٿِي، نِڀاڳِي! نِنڊون ڪَرين.

بيت - 10

اِيُ ڪَمُ ڪَمِيڻِينِ، جِئن سُمَهَنِ پيرَ ڊِگها ڪَري،
لوچِين ڇو نہ، لطيفُ چي، ھارِي! لَئي ھوتَنِ؟
نِنڊان نِڀاڳِين کي اوڀالا اَچَنِ،
سي پُنُوءَ ڪوہ پُڇَنِ؟ جي سَنجهي رَھَنِ سُمهِي.

بيت - 11

سُتِينءَ سَوارِي، مُنھُن ويڙھي مُئَن جِئَن،
ڏِٺَئي نہ ڏيرَمِ جا، چوڌارِي چاري؟
تيلان، ويچاري! ساٿُ سُتيئِي لَڏِيو.

بيت - 12

سُتِينءَ سَنجهيئِي، مُنھُن ويڙھي مُئنِ جِئَن،
اوجاڳو اَکِيُنِ کي، ڄاتوءِ نہ ڏيئِي،
ھَٿان تو پيئِي، ٿِي ڪَچو ڪيچِيُنِ ڪَرين!

بيت - 13

اوجاڳو، اَڄاڻِ! ڪَيُءِ نَہ ڪَميڻِيُنِ جِئَن،
اَساري! اَھڙيءَ پَرِ ڪيچِيُنِ ڪاڻِ.

وائي - 1

گِلا ڪا مَ ڪَري، لِکِيو تان نَہ ٽَري،
ٻَڙي جيڏيُون! منھنجي، وو! شَهَرَ ڀَنڀپرَ ۾،
جو سينگارُ سَرَتِيئن، سو مون ناھہِ ڳَري،
جَهِڙي تَهِڙي حالَسين، وَڃان پيرَ ڀَري،
جنھن وَڻَ ھيٺان ھَليا، سَڄَ۾َ سانگُ ڪَري،
لامُون تنھن وَڻَ سَندِيُون، لوڏيان، لايان ڳَري،
قَضا جا ڪَرِيمق جي، ڪنھن تان ڪِينَ ٽري،
جيڪي لِکِيو لوحَ ۾، پاڙِيان، سو پَڙي،
اَدِيُون! عَبدُاللّطِيفُ چِي، شَلَ قادِرُ ڪَرَمُ ڪَري!

داستان ٻيو

بيت - 1

ڏُونگرَ! تُون ڏاڍو، ڏاڍا! ڏاڍايُون ڪَرين،
مُون تَنَ اَندَرَ تِيئَن وَھِين، جِئن وَڻُ وَڍي واڍو،
اِي ڪَرَمَ جو ڪاڍو، ناتَ پَٿَر ڪيرَ پَنڌَ ڪَري؟

بيت - 2

ڏونگَرَ! ڏُکَ سَنداءِ، پِرِينءَ گَڏِجان تہ چوان،
ڀِنِيءَ ٿِئين ڀَوارَئون، ٻِيا وِنگا وَرَق سَنداءِ،
جِڱِي ڪانَ ڪَياءِ، پَيرُ وِڃايُءِ پِرينءَ جو.

بيت - 3

ڏُونگرَ! ڏَسُ پِرينءَ جو، قافَ! نَہ ڏِئِين ڪو؟
قَطارِيا ڪالهَہ وِيا، توڏا تُوھِين جهلَ؟
سُڻي ھوتُ ھَڪَلَ ويا، توڏا تُوھِين جهلَ؟
سُڻِي ھوتُ ھَڪَلَ، مانَ ٻُڌِي ٻاروچو وري!

بيت - 4

ڏُونگرَ! ڏَسُ پِريُنِ جو، قافَ! نَہ ڏِئِين ڪَلَ؟
قَطارِيا ڪالهَہ وِيا، توڏا تُوھِين جهلَ؟
سُڻِي ھوتُ ھَڪَلَ، مانَ ٻُڌِي ٻاروچو وري!

بيت - 5

ڏُونگرَ! ڏوراپو، پَهِريون چَوندِيَسِ پِرِينءَ کي،
”پَهَڻَ پيرَ پِٿُون ڪَيا، تِريُون ڇِنيُون تو،
رَحمُ نہ پِيءِ رُوحَ ۾، قَدَرُ مُنھنجو ڪو،“
واڪو ڪَندِيَسِ: ”وو! مُون سين جَبَلُ ٿو جاڙُون ڪَري!

بيت - 6

ڏُونگرَ! مُون نَہ ڏُکوءِ، آئُون اَڳُ ڏُکوئِي آھِيان،
سارِيان ڪونَ سُکوءِ، سورَ گهَڻيئِي سنڀِران.

بيت - 7

ڏُونگرَ! ڏُکويُنِ کي، دِلاسا ڏِجَنِ،
گَهڻو پُڇِجي تن کي، جِن وَٽان ھوتَ وَڃَنِ،
تُون ڪِيئن سَندا تن، پَهَڻَ! پيرَ ڏُکوئِيين؟

بيت - 8

ڏُونگَرَ! ڏُکَ پَئِي، ڪَيَمِ توسين ڳالهِڙِي،
پاڻا آئون مُئِي، سُورُ سُڻائي پِرينءَ جو!

بيت - 9

ڏُونگرَ! مُون سِين رو، ڪَڍِي پارَ پُنُوءَ جا،
سَڄَڻُ ھومِ ھيڪِڙو، وِيو ڦوڙائي سو،
ڪَنھِن کي ڏِيان ڏوھُہ؟ مُون سِين اِرادي ائن ڪَيو!

بيت - 10

ڏُونگرَ! ڏُکوئيُون، تو ۾ اورَڻَ آئِيون،
جي اَچَنِ ڦوڙائِيُون، ڏِجَنِ دِلاسا تَنِ کي.

بيت - 11

ڏُونگرَ! ڏُکويُنِ کي، ڳَلِ نہ سُڪا ڳوڙھا،
ھُو جي پَهَڻَ پَٻَ جا، سي ڀَڄِي ٿِيا ڀورا،
گُوندَرَ جا گهوڙا، وَڃَنِ جانِ جُدا ڪَيو!

بيت - 12

ڏونگرَ! ڏيهاڻِي، پاڻ مَٿان تو گهورِيان،
تو مَنجهِہ رِھاڻِي، سَدا ٻاروچَنِ جِي.

بيت - 13

ڪِي جي ڪَڍِيا پارَ، ڏُکِيءَ ڏُونگرَ پاڻَ ۾،
سُڻي سا تَنوار، مِرُون پِيا مامِري.

بيت - 14

ڏُونگَرَ ڀُونيِنِ ڪِيرَ، سَڄَڻَ ميخُون ڏُونگَرين،
ھَهڙا سيڻَ سُڌِيرَ، ڪِينَ لَهَندِينءَ ڪي ٻِيا.

بيت - 15

ٻَئِي ويٺا رُوَنِ، ڏُکِي ڏُونگرَ پاڻَ ۾،
ڪنھن کپي ڪِينَ چُوَنِ، مَنجِهنِ جو پِرِيتَڻو.

بيت - 16

اَڄُ پڻ ويٺو روءِ، ڏُکِي ڏُونگرَ پاڻَ ۾،
ڪوھِياري جو ڪوءِ، اَچِي سُورُ اُڌَمِيو.

بيت - 17

ڏُونگرَ، تہ ٻيلِي، ڏِجِي ٻَنِ ٻيلِيُن رِي،
ڪانَ ڇُلندِي ڇَپَرِين، ساڻَسِ سَهيلِي،
وَٽِيُون چَنبيلِي، جِئن تِئن جهاڳي اُکَتي.

بيت - 18

تَپي ڪندين ڪوہُ؟ ڏُونُگرَ! ڏُکويُنِ کي،
تُون جي پَهَڻَ پَٻَ جا، تہ لِڱَ مُنھنجا لوہُ،
ڪنھنجو ڪونهي ڏوھُہ، اَمُرَ مُون سين اِئن ڪَيو.

بيت - 19

جئن جئن ڪَڪَرَ اُڀَ ۾، تئن تئن ڏُونگرَ ڏيٺِ،
مُون تان تَنهين ھيٺ، پيرُ نِهارِيو پِرينءَ جو.

بيت - 20

اِئين رَھِيَسِ راہَ ۾، اُھينئين ھَٿَ ھَڻي،
وِيا خيال کَڻي، ماءِ! مُنھنجو ڄِندُڙو.

بيت - 21

ماءِ! مُنھنجو ڄِندڙو، کنيو خيالَنِ،
ڪُوڙَنِ ڪَذابَنِ، ڏاگهنِ ڏڌي آھِيان.

بيت - 22

ٻَڙي! تہ ٻيلِي گهڻا، ساٿِي پُڇِي سُکُ،
رَفاقَتَ رُڃُنِ ۾، ڏُونگرَ ڪاري ڏُکُ،
آرِيءَ جو اَھُکُ، مُون رَھَنُما راہ ٿِيو.

وائي - 1

آھِيا جَنِ سَندي، ڙي! اَڙي! مِيان!
مُون کي تان سي نہ ڇَڏِيندا ھوتا،
پَهائِيندِيَسِ پُنُوءَ کي، آئون ڳِچِيءَ پائي گَندي،
ويٺي آھِيان واٽَ تي، آھِيان آسَرَوَندي،
پِرينءَ پُڄاڻا ھِتَهِين، آئوُن رَتِي تان نہ رَھَندي،
ڪَرَمَ ساڻُ ڪَرِيمَ جي، آئون پِرينءَ مِلَندِي.

داستان ٽيون

بيت - 1

رويو ويٺِي راڳِ، اَمَڙِ! اورِيان نِجهرِي،
لاٿو مُون ڏيهہ وَڻَنَ سان، لاڳاپو ۽ لاڳُ،
ڏُونگرَ سي ڏورِيندِيُون، جَنِ اندَرِ ٻَرِي آڳِ،
ھوتَاڻِي! ھِنَ ماڳِ، مُون کي ڇَڏِ مَ ڇَپَرين.

بيت - 2

مُون کي ڇَڏِ مَ ڇَپَرين، ھِت، ھوتاڻِي! ھاڻِ،
اوڏِي مُنڌَ اُٺَنِ کي، اَللہَ ڪارَڻِ آڻِ،
پورھيو ڪَندِيَسِ پاڻ، اَڳِيان آرِيچَنِ جي.

بيت - 3

مُون کي ڇَڏِ مَ ڇَپَرين، ھوتاڻِي! ھِنَ ھَنڌِ،
توسين پَونديسِ پَنڌِ، ڏِيندِيَسِ باھِہ ڀَنڀورَ کي.

بيت - 4

مُون کي ڇَڏِ مَ ڇَپَرين، ھَاتِڪَ ھوتاڻِي!
توھِين لَئي کاڻِي، ڏُکِي ڏوري ڏُونگرِين.

بيت - 5

مُون کي ڇَڏِ مَ ڇَپَرين، پوءِ رَھايَسِ ” پاڻ“،
جي بُلايُون پاڻِ، تن کي رَسُ، رَسِيلا! راہَ ۾.

بيت - 6

سُتي پُوَنِ ڇِرِڪَ، آيَلِ! ٻاروچَنِ جا،
پُنوءَ جي پَيڪانَ جُون، راسِيُون مَنجهان رُڪَ،
ھَنيَمِ ھوتَ ڪِرڪَ، لوچان، لوھُہ نہ نِڪري.

بيت - 7

سُتي پُوَنِ ڇِرِڪَ، آيَلِ! ٻاروچَنِ جا،
وَمَ وِھاٽِي، وو ڙي ڪوھِياري ڪِرِڪَ،
ڌَڙُ ڌُوڻِيو تنھن ڌَڪَ، جَڏِيءَ جِئڻ نہ ٿِئي.

بيت - 8

جيهِي جي تيهِي، تہ بہ ٻانهِي ٻاروچَنِ جِي،
حُجَتَ ھوتَ پُنُوءَ سين، مُون ڪَمِيڻِيءَ ڪيهِي؟
اَصۡلِ آرِيءَ ڄامَ جي، پَلي آئُون پيئِي،
ھُوءِ جا پائِينِ پيرَ ۾، تنھن جُتِيءَ نہ جيهِي،
وِساري ويهِي، تن ڪيچِيُنِ کي ڪِيئن رَھان؟

بيت - 9

ھُئي جي نہ ھُئِي، تہ نہ ٻانهِي ٻاروچَنِ جِي،
اِنَ سَڱَ مُقابِلِ سُسُئِي، سَندِيَنِ ٿي سُئِي،
ھُنِ تان لَڄَ لُئِي، ھِنَ جو ھَلَنُ ھوتَ ڏي.

بيت - 10

ڪَنِيزڪَ ڪيچيُنِ جِي، ٻانهِي ٻانهوٽِي،
ٻئي ٻاروچي ھَٿ ۾، چَڳُنِ سِر چوٽِي،
ٻانڀَڻِ کي موٽِي، پاڻَهي پُڇَندو پَٻُ ڌَڻِي.

بيت - 11

ڪَنِيزَڪَ ڪيچِيُنِ جِي، ٻانهُوٽِي ٻانهِي،
سي ڪِئَن وَڃَنِ وِسِري، جي جِيءَ اندَرِ جانِي؟
اَڱڻ اَمانِي، شالَ ڪيچِيُنِ جِي ڪا مَ ٿئي!

وائي - 1

مون کي نِيندا ساڻُ، ٻاروچا ٻاجَهہ پَئي، اَلو! اَلو!
ڏيندا مُون ڏُکِيءَ کي اللہ لَڳِ اھڃاڻُ،
لاتَقنَطُو مِن رحمَتِ اللہِ، پِريُنِ چَيو پاڻُ،
اِن اللہَ يَغفِرُالذّنوبَ جَميعاً، سَچو اِيُ پَرِياڻُ،
اَدِيُون! عَبدُاللّطِيفُ چي، اَھِڙو آھي اَڳواڻُ.

داستان چوٿون

بيت - 1

ڳائو نَہ وائو، اَدِيُون! آريچَنِ جو،
لَنگهِي پَٻُ پَري ٿِيا، ڇَڏي رِڻُ، رائو،
ڏيئي ڦوڙائو، ويا ويچاريءَ سُپِرِين.

بيت - 2

ڳائي نہ وائي، اَدِيُون! آريچَنِ جي،
ڪنھ پَرِ ڪَهي لَنگهيان، جَبَلَ جهاجهائي؟
جيڪُسِ واجهائي، ھاڻِي مَرِينديس ھوتُ لَئي!

بيت - 3

ھَلَڻُ سَهان نَہ ھوتَ جو وَڃَڻُ آئون گهورِيان،
ھُوَنِ ھَميشہ ھِتَهِين، تَہ ڏُونگر ڪُوھہ ڏورِيان؟
اَکِيُن سان اورِيان، پَسان شالَ پُنُوءَ کي!

بيت - 4

ھَلَڻُ سَهان نہ ھوتَ جو، وَڃَڻُ مُون نہ وَسِ،
اَللہَ! آرِيچَن جي، گولِي ميڙِئين گَسِ،
پِرِين، پَنوارَ! تو پُڇان، گولِي ميڙِئين گَسِ،
پِرِين، پَنوارَ! تو پُڇان، ڏُونگرِيا مُون ڏَسُ،
اَکِيُنِ جي آرَسِ، مُنڌَ جيهائِي جوڙَ ڪِي!

بيت - 5

ھَلَڻُ سَهان نہ ھوتَ جو، وَڃَڻُ نہ وارِيو،
رَھو راتِ ڀَنڀورَ ۾، گهَڙِي ھِتِ گهارِيو.
مَعذورَ مَ مارِيو، سڪي جَنھِن سَڱُ ڪَيو.

بيت - 6

مُون کي جَنِين مارِيو، آن ڪي گَڏِيا سي؟
تَنَ ۾ طاقَتَ ناہِ ڪا، اَدا! اُنِين ري،
سُورُ سَلِتمِ تي، جيلان ڳالهِہ ڳَرِي ٿِئِي.

بيت - 7

مُون کي جَنِين مارِيو، سُڃاتَمِ سيئِي،
پُنوءَ پيڪانَ، پَڇَنڊِيا، ٻِلَنِ تان ٻيئِي،
ويڄَنِئُون ويئِي، ٿِڙي وَھِيڻِي سَڄَڻين.

بيت - 8

مُون کي جنِين مارِيو، سُڃاتَمِ پاڻا،
لوھُو لِڱَنِ ناھِہ ڪِي، سَنڌ مِڙَئِي ساڻا،
دارُونءَ جا داڻا، ڏِنَمِ ھوتَ ھَٿَنِ سِين.

بيت - 9

پرتوو پُنُوءَ جو، ڪِي ڇانئين ڪِي اُسَ،
قَريباڻِي ڪُسَ، آھي ڪَرَ ٻَڪَرَڙِي!

بيت - 10

پَر تَوو پُنُوءَ جو، سَهائِي، سِياہُ،
مُنهُن ڏيئِي مُون آئِيو، رَنگا رَنگِي راہُ،
پَهرِين ڏِيندا پاہُ، پوءِ رَڱِيندا رَڱَ ۾.

بيت - 11

پَرتَوو پُنوءَ جو، جهُڙ جِئَن جهالا ڏِئي،
آئون تَنهِن آرِيءَ کي، وَٺِيو راہَ، رُئان گهَڻو.

بيت - 12

پَرۡتَوو پُنوُءَ جو، رُڳيائِي راحَتَ،
ڀانئِيان ڏِينھُن ڀوارئون، ساڄَنَ لاءِ صِحَتَ،
مِٺِي مُصِيبَتَ، آھي آرِيءَ ڄامَ جي.

وائي - 1

ٻاروچي ساڻُ، ٻَڙي! اي جيڏِيُون!
ھيڪَرَ ٿِيان ھيڪانِدي.
چَڙھِي نہ سَگهان چوٽِئين، يارَ بنا، دِلِ ماندي!
پَهچائج پُنُوءَ کي، ھِي پِيادَڙي، پانڌي!
ڀينَرُ! ھِنَ ڀَنڀورَ ۾، آئون ارادي آندِي،
پورِھيتَ پُنوءَ ڄامَ جي، بانديُنِ جِي باندي،
ڪَرَمَ ساڻُ ڪَرِيمَ جي، ڪيچي ٿِيندَمِ ڪانڌِي.

داستان پنجون

بيت - 1

رِءِ قَرِيبَنِ قُوتُ ڪَيو، ويٺِي وِرِہَ چَران،
اِنَ عَذابان اَڳَهِين، مادَرِ! ڇو نہ مَران؟
اَدِيُون! جو نہ اوھان، سو مان سُورُ، سَرَتِيُون!

بيت - 2

رِءَ قَرِيبَنِ قُوتُ ڪَيو، وِرِھَہ چَران ويٺِي،
ٻانڀَڻَ کي ٻَروچَ رِي، ٿِي ڏُکَنِ سين ڏيٺِي،
تو پُڄاڻا سُپِرِين، آئوُن سُورَنِ سانڀيٽِي،
جا مَرَضَنِ مَريٽِي، سا، سَرَتِيُون! ڪِيئَن سَگهِي ٿِئي؟

بيت - 3

سَرَتِيُون! ڪِيئَن سَگهِي ٿِئي؟ ويڙھِي جا وِرھَن،
چِتُ جَنھِن جو چُورُ ڪَيو، ڏُکويو ڏُکَن،
پُڄاڻا پِرينِ، اَدِيُون! اَگهِي آھِيان.

بيت - 4

اَدِيُون! اگهِي آھِيان، پِرِيُنِ پُڄاڻا،
سي ڪوھِيارا ڪيڻِ وِيا، ساڄَنَ سِياڻا؟
جي سَسُئِيءَ سيباڻا، سي وڃِي ڪيچِ قَرارِيا.

بيت - 5

حَقِيقَتَ ھِنَ حالَ جِي، جي ظاھِرُ ڪَرِيسن ذَرِي،
لَڳي ماٺِ مِرُوئَنِ کي، ڏُونگرَ پَوَنِ ڏَري،
وَڃَنِ وَڻَ ٻَري اوڀَرِ اُڀِري ڪِينَ ڪِي.

بيت - 6

حَقِيقَتَ ھِنَ حالَ جِي، جي ظاھِرُ ڪَرِيان زَبانَ،
لَڳي ماٺِ مِرُوئَنِ کي، رَسي سُورُ شَبانَ،
ٽاڪَرِ ٽِڪي ڪانَ، جَبَلُ سَڀِ جَلِي وَڃي.

بيت - 7

جي حَبَ نہ ھَلڻُ سِکِيا، سي جَڏا ميڙِ جَلِيلَ!
لَنگهائِي، لَطِيفُ چي، نِجَنِ ڪيچ قَلِيلَ،
وِساري وَسِيلَ! مَتان مارڳ ڇَڏِئين!

بيت - 8

سارِيان ٿي سَبِيلَ، پُرِ تَقصِيرُون پاڻَ ڏي،
مَتان مُون کي ڇَڏِئين، آري ڄامَ اَصِيلَ!
وَرُ، وِلَهِنِ جا وَسِيلَ! رَسُ، رَھبرَ! راھہَ ۾.

بيت - 9

اَچيو اَچيو چَوَنِ، ”وِہُ وِيا تان گهورِيا“،
سَرَتِيُنِ سانگُ سُکَن سِين، مُون جِئَن رَتُ نَہ رُوَنِ،
اُو مَرُ ويٺِيُون ھوَنِ، مُون ساڱاتُو سُورَ ٿِيا.

بيت - 10

سرَتِيون سُوراتنِ جي، ڪوہُ ٿِيُون پَٿَرِ پُوَنِ؟
گهَاءُ نہ لَڳُنِ گَهٽِ جو، رِيا مان ٿِيُون رُوَنِ،
چيتارِيو نہ چَوَنِ، پارَ مُنھنجي پِرِينءَ تان.

بيت - 11

اَڻ ڏکوئيو ڏُکَنِ جي، ڪوہ ٿِيوُن پَٿَرَ پُونِ؟
ناہ اوراتو اُنِ کي، ٿِيون لوڪ رِيائُون رُونِ،
ڀَنَڻَ ڀيڙِيون ھُونِ، پارَ تنيِن جا پَڌِرا.

وائي - 1

توڻي نِينِ، نَہ نِينِ، اَلو! مِيان! آئُون اُنِين جي آھيان،
زورو ھِنَ ضَعِيفِ سين، ڪامِلَ ڪوھہ ڪَرِين؟
جَتَ پَنھنجي جُوءِ ۾، جانِبَ مانَ جَٽينِ!
پِڪَ پَدَمِنئان آڳَرِي، سُرڪِي مانَ سَڏِينِ،
پيرين آئون نہ پُڄَڻِي، ڪَرَھَلَ ھوءِ نَہ جَهلِينِ،
اَدِيُون! عَبدُاللّطِيفُ چي، نِينهن نباھِيو نِينِ.

داستان ڇھون

بيت - 1

ڪَنھِن پَر رُئان پِرِينءَ کي؟ روئي نہ ڄاڻان،
مَٿي ڪيو ڀُڻان، ھَنجُنِ ھاڻا ھَٿِڙا.

بيت - 2

ڪَنھِن پَر رُئان پِرِينءَ کي؟ اَندَرِ ناھِہ اُساٽق،
لوھوڪا لَڪَنِ ۾، ويرِي مَٿي واتَ،
ڇَپَر ۾ ڇُونڇاٽَ، ڏِٺَمِ ڏُکويُنِ جا.

بيت - 3

ڪَنھِن پَر رئان پِرِينءَ کي؟ پَچَڻَ ناھِہ پَچارَ،
اَندَرِ ٿِي آھُون ڪَرِيان، کاڻِي مَنجِهہ خُمارَ،
گِرِيي جي گُفتارَ، ٻِيءَ ڀَتِ ٻاروچَنِ ۾.

بيت - 4

ڪَنھِن پَر رُئان پِرِينءَ کي؟ پارُ نہ ڄاڻان پَنڌُ،
ڪيچِيُنِ ڪارَڻِ ڪَنڌُ، نايوٿي نَعرو ھَڻان.

بيت - 5

ڪَنھِن پَر رُئان پِرِينءَ کي؟ پارِ نہ ڄاڻان پير،
ڀَنَڻُ مُون ڀيو ٿِيو، سُورَنِ لايو سير،
آريءَ لَئي اُلَيرُ، رَقصُ ڀاڱي رَنَ جي.

بيت - 6

ڪَنھِن پَر رُئان پِرِينءَ کي؟ رُئَڻُ مُون رِياءُ،
بَرَنِ مَنجهِہ بُڪاءُ، ٻيءَ ڀَتِ ٻُڌُمِ، جيڏِيُون!

بيت - 7

سُڃَ وَسَندي تن کي، جوشَ جَلايا جي،
طالِبَ جي تَحقِيقَ جا، نِينهُن تنِين وَٽِ ني،
ٽيڏِي پَسي ٽي، ھُو تان آھي ھيڪِڙو.

بيت - 8

ٻِيُون ڏيئي ٻَنِ کي، ھَلِجِ پاسي ھيڪَ،
وَرُ نہ سَهي ويڪَ، تُون ٽيڏِي! ٽِئايُون ڪَرين.

بيت - 9

اَڃا تُون اَواٽ، واٽان پاسي ويسرِي،
سُونهِين ٿِي سُواٽَ، تہ مَنجهان دِلِ دَڳُ لَهِين.

بيت - 10

پانهِين، پسِي پَٻُ، متان ڪا، مُنڌَ! ڏِئين،
اَڳِيان ڪَؤ مَ ڪَٻُ، اِيُ قالي آڏو ڪيچ.

بيت - 11

ڏاڍِي لُڪَ لَڪَنِ جِي، پَٽَنِ پوءِ پَچاءُ،
ڇَپَرِ ڪوسو واءُ، ھرِيا تو نيڻَ ڪَيا.

وائي - 1

زارِي سا زارِي، اَلو! ڀَلو! ڪوھِياري ساڻُ،
آئُون جا ڪندِيَسِ زارِي.
ڪِينَ جِئندِيَسِ، جيڏِيُون! سُورَ پِريان جي آئُون مارِي،
اُٺَ گُنگائي ھَلِيا، بوتا ھُئڙنِ بارِي،
ڪَري ڪوھِيارو، مُون سين قَيامَتَ ڪاري،
مانَ وِرَمَنِ وِچَ ۾، اولاڻي آرِي،
ھِنجڌدُوئَنِ جئن ھولِي ڪَري، مُون ڌُوڙِ مَٿي تان وارِي،
لالَنَ لَڳِ، لَطِيفُ چي، واجهائي ٿِي ويچارِي.

وائي - 2

جنھنجي آھِيان ڏُونگرَ ڏورِي،
تنھن ڪوھِياري کي ڪَهَلَ پَوي!
آئُون تنھن گهوري گهوٽَجِي، ماڻهُو چُونِم ڀوري،
نِيو نِماڻِي پاڻَ سين، ڇَپَرِ ڇَڏِيو مَ ڇورِي،
روئِي رَڱيندِيَسِ رَتَ سين، ساڻُ چُئاڪَن چوري،
اَدِيُون! آرِيچَنِ جو، لهہُ لَڳو مُون لورِي،
ڪَشِي ڪانُ ڪَمانَ مان، لائي ويڙا لورِي،
نالائِقِ ساڻُ، لَطيفُ چي، قَادِرُ ڪَرَمُ ڪَندو ڙِي!

سُر حسيني

داستان پھريون

بيت - 2

لَڙُ مَ، لاڙائُو ٿِيو، ھَلِي ڪَرِ ھِمَٿَ،
سِڄُ سامُهون مُنھَن ۾، مَتان ڪَرِئين ڪَٿَ،
سُپيريان جي سَٿَ، ڳاڙهي سِڄِ ڳالهِہ مِڙِين.

بيت - 3

لَڙُ مَ، لاڙائُو ٿِيو، وَرَ چونڊندي وَڃُ،
آھي ايءُ اُھۡڃ، ھاڙھي ھَلَندِيُنِ جو.

بيت - 4

اُلَهِي سِڄَ اَويرَ ڪي، ڏِٺائِي ڏونگرُ،
سَسُئِيءَ کي سَيَّدُ چئي، سُورَن جو سَمَرُ،
ڪُٺَلِ رَکِيو ڪَرُ، ويچاريءَ وَڻِڪارَ تي.

بيت - 5

اُلَهِي سڄ! اوير، مَ ڪَرِ مَعذُورِينِ تي،
پَسي مَران پِير، ڏونگرَ ٻاروچَنِ جا!

بيت - 6

ويو ٻاروچو نڪري، ھاڻي ڪَرِيان ڪِيئَن؟
سِڄَ اُلٿَي سِيئن، سٽُون ڏِينديَسِ سُڃَ ۾.

بيت - 7

ويٺي مُون وِيو، لَڙِي سِڄُ لَڪَنِ تان،
آئُون ڏورِيندي ڪيترو، پَهَڻنِ پيرُ پِيو؟
سُورَنِ ساڻُ سِهو، اَچي ٿِيُمِ، جيڏِيُون!

بيت - 8

سَرَتِيُون! سُڄي سُڃَ، مَتان ڪا مُون سين ھَلي،
پاڻي ناھِہ، پَنڌُ گهڻو، اَڳِيان رائو رُڳِي رُڃَ،
مَتان مَري اُڃَ، ڪا ڏِئي پاراتو پِرِينءَ کي.

بيت - 9

ويو سڄُ وَڻَنِ تان، راسِيوُن رَتائِينِ،
مُون کي ماريائين، آيَلِ! اونداھي ڪَري.

بيت - 10

وِيو سِڄُ وَڻَنِ تان، راسِيُن ڏيئي رَڱُ،
جنھن سان منھنجو سَڱُ، سو ڪوھِيارو ڪيچ ويو.

بيت - 11

پَٽِيءَ نہ پيرونِ، اوڏيءَ ڇَڪَ نہ ڇَميا،
پويون ھِيُ ڀيرونِ، نِينهُن نِباھي ھليا.

بيت - 12

مَري ٿِينديس مُڃق، جَتَنِ ڪارَڻِ، جيڏِيوُن!
ڪري ڪوھِيارو سُڃَ، ويو ڇُلائي ڇَپَريِن.

بيت - 13

ڏِٺَمِ ڏونگريا، گهوي ھُيسِ جن جي،
مُون لوڏان ئي لکيا، اھڙا ٻاروچا،
آيَلِ! ڪوھِيارا، مُون ڪَرَ لاھو آئِيا.

بيت - 14

سُيءِ ڪا تَنوارَ، ڪي ھُنئين ٿي ھَٿَ کَڻِين،
سَوين رُليون سسئُيون، ھوتاڻَنِ ھَزارَ،
ٻاروچاڻا ٻارَ، توڙان تَرسُ نہ سِکيا.

وائي - 1

جي ھوند ڏٺائُون، وو جيڏِيون!
حالُ منھنجو ھَهِڙو جَهِڙو!
چَڙھي نہَ سگهان چوٽِئين، مارَڳُ مَٿاھُون،
ڏُکيءَ، سندي ڏيجَ ۾، ڏُونگرُ ڏِنائوُن،
وِندي ڪيُون وڻَنِ سين، سَسُئِي سُکائون،
ڏيندِيَسِ شاخ سڀ ڪَنھن، وَڻِ وَڻِ واچائُون،
ھنئڙو ڏَندَڻ پاڙَ جئن، ڇِڪي ڇِنائُون،
ھنئڙو ڏاڙھُونءَ گُلَ جئن، ريهي رَتائُون،
ھوءِ جي پَهَڻَ پَٻَ جا، مَڻِيا مُڪائُون،
ھُونِ سَلامَتَ سُپِرين، گهورِي سا آئُون!
سو جي سُئومِ ڪَنَنِ سين، پَهہُ جو ڪيائُون،
ٻانهُون ٻيلَ نَہ لاھِيان، پُنَلَ کي آئُون،
آيا عبدُاللّطِيفُ چي، پُنِيون مَنَ مُدَعائُون.

داستان ٻيو

بيت - 1

ڪِي ڌَرَتَتِي، ماءِ! ڪِي ڄَرَ سَندِي سَڄَڻين،
ھَلِي ۽ واجهاءِ، ٻِنِين ڄيرَنِ وِچَ ۾.

بيت - 2

مَٿيان مَٿي مَچُ، ٻَرِيُمِ ٻاروچَنِ جو،
مُون کي طعنا ٿي ڏِئين، جئن نہ پَرُوڙِئين سَچُ،
اَمڙِ! اوري اَچُ، تہ سِٽَ سُڻاينءِ سُورَ جِي.

بيت - 3

مَٿي مَنجهان مِينهُن، پَسو! پاڻِيءَ جئن وَھي،
مُون ڀانيو نِينهُن، ڄِڀِيُون ڄيري سَندِيُون.

بيت - 4

مَنجهان مُنھنجي رُوحَ، جي وَڃي ساڄَنُ وِسري،
تہ مَرُ لَڳي لُوھَہ، ٿَرَ ٻاٻِيهو ٿِي مَران!

بيت - 5

لڳي مون کي لُوہ، وِرِہَ واٽون لائيون،
راز جنھن سين روح، سو ڪوھيارو ڪيچ ويو.

بيت - 6

ٽِمَنِ نيڻَ، رَتُ وَھي، چُئاڪا ڪيو،
مُون کي ڏنءُ ڏيو، ائين ٿا وَڃو، اوٺِيا!

بيت - 7

اَمڙِ! وَڃِي آڻِ، چَرخو آتَڻَ وِچَ مان،
ڪَتِيُمِ جَنهِين ڪاڻِ، سو ڪوھِيارو ڪيچ وِيو.

بيت - 8

پَهي ڪامَ پِڃاءِ، اَمَڙِ! مُنھنجي آسِري،
ڏيئي لَتَ چَرخي کي، پُوڻِيُون پاڻيءَ پاءِ،
ڪَتِيُنِ جنهِين لاءِ، سو ڪوھِيارو ڪيچِ وِيو.

بيت - 9

پَهي ڪامَ پِڃاءِ اَمڙ! مُنھنجي آسِري،
ڏيئي ڪي ڪَتاءِ، مون کي نِينهَن نِهوڙيو.

بيت - 10

کوءِ ڪَتڻُ، ٻَن ڪَپاہُ! کوءِ آتَڻُ! ٻَنِ جيڏِيون!
ساڄَنُ مُنھنجو ساھُہ، ھاڃي مَنجهِہ ھَڻِي ويو.

بيت - 11

آتڻ چَونمِ ڪَتُ، تاڻِيان، تَندُ نَہ نِڪِري،
پَاڻَا روئِي رَت، چَرخو مُون چِڪ ڪَيو.

بيت - 12

کوءِ ھاڙھو! ٻَنِ ھوتُ! کوءِ پُنوُءَ، ٻَنِ پِرِيتَڻو!
مادَر! مُون مَوتُ، پَسڻان پِرائيو.

بيت - 13

کوءِ ٻولِي! ٻَنِ ٻَروچُ! گهورِي ذاتِ جَتَنِ جِي!
مُون کي چَئِي ”لوچُ“، پيهي وِيا ڇَپَرين.

بيت - 14

جِئَن جِئَن تَپي ڏِينهُن، تِئن تئن تاڻي پَنڌَ ۾،
ڪو آڳانجهو نِينهُن، ٻانڀَڻِ ٻاروچَنِ سين.

بيت - 15

جِئن جِئن ڀڄي رات، تِئن تِئن تاڻي پَنڌَ ۾،
ڀوريءَ ٻي نہ تاتِ، جيڪا سا جَتَنِ جي.

بيت - 16

نڪو لِيکوئي ٿيو، نَڪو تَتو ڏينھنُ،
تهان اوري نينهن، ڇنو آتَڻَ وارئين.

بيت - 17

جان جِئين تان جَلُ، ڪانهي جاءِ جَلَڻَ ري،
تَتِيءَ ٿَڌِيءَ ھَلُ، ڪانهي ويلَ وِھَڻَ جي.

بيت - 18

تَتِيءَ ٿَڌِيءَ ڪاہِ، ڪانهي ويلَ وِھَڻَ جي،
مَتان ٿِئي اُونداھہ، پيرُ نہ لَهِين پِرينءَ جو.

وائي - 1

شادِيءَ جو سِنگارُ، آيَلِ! مَرَڪُ منھنجو مُون پِرِين،
آھي ڳَهُہ ڳِچِيءَ جو، ڏئي ھالورا ھارُ،
آھي اُگهاڙِيَنِ کي، جانِبَ جو جِنسارُ،
آھئين کاڄُ بُکيَنِ جو، تُون تان طَعامُ تِيارُ،
اَعليٰ اَڇو عِيدَ ۾، دوسِتاڻُو ديدارُ،
حُسنَ ھوتَ پُنهونءَ جي، ڪَڪوريو ڪوھِيارُ،
سُڃَ ڪِيائين سُرَھِي، واسِيائِين وَڻَڪارُ،
ڇَپَرَ ڇاٽُون مُڪِيُون، عَطُرُ ٿِيو آوارُ،
ڪوڙِيين ٿيا ڪيتَرا، نالي تان نثارُ،
سَدا صَلابَتَ جي، گولِي گِرِفتارُ،
گهورِيان گهرُ گهُٽِيءَ تان، اَچي جِئان آڌارُ،
اَدِيُون! عبدُاللّطِيفُ چي، مِلِيو مُون مَنٺارُ.

داستان ٽيون

بيت - 1

ڪو گُهمندي گهورُ، آيُمِ ٻاروچَنِ جو،
ڇَڏِيندِيَسِ ڀَنڀورُ، ھِنئون ھِتِ نہ وِندُري.

بيت - 2

ڀَنڀورَ جَنِ سُکَنِ، مُون کي ساٿان کاريو،
ھاڻي ساڻُ ڏُکَنِ، تان ڪِي ڏُونگرَ ڏورِيان.

بيت - 3

ڀينَرُ! ڀَنڀوران، ڀَڄو تان اُبَهو،
اَڳي اِنَ ماڳان، سَرَتِيُن سُورَ پِرائِيا.

بيت - 4

ڀينَرُ! ھن ڀنڀورَ ۾، دوزَخَ جو دونهون،
سَوارو سُونهون، پُڇي پُورِجِ، سَسُئي!

بيت - 5

ڀينَرُ! ھن ڀَنڀورَ ۾، گهايل ٿي گهاريان،
سَڄَڻَ جي سانگِ ويا، سيئي ٿي ساريان،
سي ڪِيئن وِساريان؟ جي وَٽان مونُ واٽ ٿيا.

بيت - 6

ڀَنڀوران اُجاڙ، سَرَتِيُون! سَکَرُ ڀانئِيان،
مون سين تنھن پهاڙُ، ڏُکان ھَڏِ نہ ڏورِيو.

بيت - 7

اُجاڙان ڀَنڀورُ، سَرَتِيُون! سَکَرُ ڀانئِيان،
آرِياڻِي اَتورُ، ڏِٺُمِ جِتِ اکينِ سين.

بيت - 8

لَڳي لاڳاپي، ڀوري مُنڌ ڀَنڀورَ جي،
پِرين وڃايو تي، ڏُکِي ڏوري ڏونگرين.

بيت - 9

ڀُليو سَڀُ ڀنڀورُ، جو پُٺيءَ ھوتَ نہ ھليو،
شَهرَ سُڃاتو ڪِينَ ڪي، آرياڻي اَتورُ،
ماڻيو تَنين مورُ، ديکيو جَنين دِلِ سين.

بيت - 10

جَنين ديکيو دل سين، پُٺيءَ سي پيئُون،
تَہ پُڻُ ويئُون، جي پُنوءَ پاڻَ لِڪائيو.

بيت - 11

بُرو ھو ڀَنڀورُ، آرِياڻِيءَ اُجارِيو،
لاٿو سَڀَ لوڪَ تان، ھاڙھي ڌَڻِيءَ ھورُ،
ڇورِيُون ڇُرَڻُ سِکيوُن، پُنُوءِ ڪَيائُون پورُ،
آيو سو اَتورُ، جنھن ڏُکيُون ڏِکَ وِھارِيُون.

وائي - 1

لَڳو مَنجِهہ لَڪَنِ، آيَلِ! تازو پيرُ پُنُوءَ جو،
نہ ڪنھن واءَ وِڃائِيو، جهورِيو تان نہ جَهڪُنِ،
کِهہَ کَٿُورِيان اَڳَرِي، ھاڻي جا ھوتَنِ،
بورائو بَرَنِ جو، رِڙھِيو مَنجِهہ رَندَنِ،
لُطفَ ساڻُ لَطِيفُ چي، ڪَندو وَرِ وِلَهَنِ.

داستان چوٿون

بيت - 1

لَڄايا مُونهان، ساجُهرِ تي سيڻَ وِيا،
پِيَنِ ڀَنڀوران، سُڌِ مُنھنجيءَ ذاتِ جي.

بيت - 2

ھُيَسِ جي آئُون، ٻانهي ٻاروچَنِ جي،
ھوند نہ ڇڏيائون، ڏُکيءَ کي ڏُکَنِ ۾.

بيت - 3

آئُون جي سُيَسِ ھَڏُ اَدِيُون! آرِيچَنِ جو،
ساڀَ لَڏيندي سَڏُ، ھُوندَ ڪوھِيارا ڪَرِينِ مُون.

بيت - 4

ھُيَسِ جي سِياءِ، تہ ڪَيُمِ ڏُکُ ڏيرَنِ تي،
اَدَبَ وچان اُنِ سين، ڳالِهہِ ن ڪَيَمِ ڪاءِ،
ذات مُنھنجي، ماءِ! ڪَچو ٿِي ڪيچِيُنِ کي.

بيت - 5

اوٺِيُنِ امارو، مُون جَهليندي نہ رَھيا،
ساٿِيُنِ سَوارو، ڪيو ڪيچَ اَکِيُن ۾.

بيت - 6

ساٿِي توءِ ھَلَنِ، پَٿَرِ جي وارَ ڪَرِيان،
جيڪُسِ ٻاروچَنِ، ڪو ڏِٺو عَيبُ اَکِين سين.

بيت - 7

ساٿِيُنِ سَئِين نہ جاڳِين، پوءِ ڪُڄاڙِيان روءِ؟
اِيَ پَرِ ڪُپَرِ ھوءِ، جِئن ھُو سانگِي، تُون سُمَهِين.

بيت - 8

ساٿي نہ پَسان سي، جي سُئَمِ ھِنئين ٿُوڻِيُون،
ھاڻي ڪِنينِ جي، وَڃيو اَڱَڻ اُڀِيان.

بيت - 9

آن ڪي ساٿي ڏِٺَ؟ جي مون ويڙھہ وڃائيا،
رئان رَتُ مَڃُٺَ، ھاڻي تَنِ پريُنِ کي.

بيت - 10

مُون سَڏِيندي سَڏڙا، ساٿِي نہ ڏِينِ،
وِلَهِيءَ جي وَٿاڻَ تي، توڏَ نہ تنوارينِ،
ھيڏا ھاڃا ٿِينِ، بُري ھِنَ ڀنڀورَ ۾!

بيت - 11

ڪَهان، تان ڪيچان پَري! وھان، تان وَٽِ مُون!
ڀُلي ڏورِيَمِ ڀُون، عَبَثُ آرِيءَ ڄامَ کي.

بيت - 12

ڪَهان تان ڪيچان پَري! سُمهان تان سِرَ ھيٺ!
ٻاروچي سين ڏيٺِ، جيڏِيُون! جيهِيءَ پَر ٿِئي.

وائي - 1

ھوتَ! ھوتَ! اي ھوتا! ڏِيندِيَسِ ماہُ مِرُنِ کي،
آئون جَرا جِيّ ڪَري.
ڏيئي باہِ ڀَنڀورَ کي، آئون آيَسِ تو ڳَري،
آرِياڻِيءَ پُنُوءَ ري، مون کي، سَرَتِيُون! تان نہ سَري،
جنڊي پايو جانِ ۾، ڏُکِي ڏُکَ ڏَري.
آءُ اوراھُون، سُپِرِين! وَڃُ مَ پِيّ! پَري،
مُون ڏِٺي، مُون وِسَهو، وِرچي تان نہ وَري،
ڏُکِيءَ جي ڏيکارِئين، ڌاران مُنھن مَري،
پِيالي پِريُنِ جي، موھِيَسِ ميٺَ ڪَري،
آرِيءَ جي عِشقَ جِي، مون کي اندَرِ آڳِ ٻَري،
توکي توءِ نَہ ڇَڏِيان، جي وَڃان ڀُونءِ تَري،
ڌَڙُ وِجَهندِيَسِ ڌُوڙِ ۾، مَٿو ڌارَ ڌَري،
ھَلَڻُ سُڻِي ھوتَ جو، ڏُکي، پَسُ! ڏَري،
پِرِين! کَڻِجِ پانھنجيون اَکِيُون ٻاجَهہ ڀَري،
اَدِيُون! عَبدُاُللّطيفُ چي، مَنَ ڪا مِهَرَ ڪَري.

وائي - 2

ڏُونگرِ ٿِي ڏوري، وِندُرِ ٿِي ووڙي،
جَتَنِ لَءِ، جيڏِيُون! ڏونگرِ ٿي ڏوري،
سُورَ ڀائِي ٿِيَسِ، سُڃَ ۾، ڄامَ پُنَلَ کان اوري،
اُٺَ چارِيندِيَسِ اُنِ جا، ٽَڪَرَنِ پاسِ ٽوري،
مَهارُون تَنِ مَيَنِ جون، خُوبُ خُوشِيءَ مان جوڙي،
ڪاھي ڪَڍَ ڪيچِيُنِ جي، ڪينَ پُڇي، تَڙَ توڙي،
اَدِيُون! شاھُہ لَطِيفُ چي، آءُ، آرِي ڄام! اوري.

داستان پنجون

بيت - 1

ليڙَنِ لَنگِهي لَسَ، مانباڻِيان مَٿي وِيا،
وَٺي وَرُ واٽَ ٿيا، پُنوءَ ڄامُ پَهَسَ،
ھُئا وَڏي وَسَ، ٻاروچا ڀَنڀورَ ۾.

بيت - 2

وَڏي وَسَ ھُئا، ٻاروچا ڀنڀورَ ۾،
وَڃي ڏور پيا، سانگيُنِ پُٺيءَ سُپرين.

بيت - 3

سانڍِ پَنھنجي ساہِ، ٻانهِين ٿِي ٻورا ڪَرِيان،
واڳِيُون جي وَرَنِ سين، تَنِ سَرَتينِ سيج سُهاءِ،
مون کي طعنا تي ڏئين، مُون جِئَن مُٺِنءِ نہ ماءِ!
آرِيءَ جي آڪاہِ، رُلايَسِ روھَن ۾.

بيت - 4

ماءِ! وِھاڻو وارِ، کَڻُ پَٿراڻِي پانھنجِي،
جيڪي ڏِنُئي ڏيجَ ۾، سو سَڀوئي سارِ،
وڃان ٿِي وَڻِڪارِ، ڏِٺُمِ پيرُ پُنُوءَ جو.