جاڳِي يارا جيڏِيُون پاڻُ پَرَنِجي،
ھَلَندي حَبِيبَ ڏي، ويلو وِچِ نَہ ڪِجي،
مَٿي اُھِسَ اُسِرِي، پَتَنگَ جِيئَن پَئِجيءَ،
اَڳِئان اُونداھِيءَ جو، سَمَرُ ساڻُ ڪِجي،
ڪِيجي قُوتُ قَبَرَ جي، گهوريون آن گُهرِجي،
آگو عَيبَ اَواھِنجا، ڍَڪِئا ڳُجَهہ ٻُجهي،
جيڪِي وَھي وُجُودَ ۾، صاحِبُ ٿو سَمجهي،
آھي مَوتُ مِڙَنِ تي، گوڙِيُون ڪِئو ٿو گَجي،
اَجَلُ اِيندو اوچتو، سَدا ٿو سُڄي،
ڊِڄِي ڊاءِ اللهَ جي، جيڪو ڀَئي ڀَڄي،
اَمُنُ آھي اُنَ کي، مَنجِهہ اللهَ جي اَجهي،
عَرَضُ اَحوالُ اُنِ کي، چَڱِيءَ ڀَتِ چَئجي،
نِيازُ ڪَري نِڪَڻِي، واحِدَ ڏي وَرِجي.
[ سُر سريراڳ، وايون، 6 ]

ڪُوفِيُنِ خَطُ لِکِئو، وِچِ وِجِهي اللهُ،
اَسِين تائِبُ تُنھِنجا، تُون اَسانجو شاھُ،
ھيڪَرَ ھيڏي آءُ، تَہ تَختُ تابِيني تُنھِنجي.
[ سُر ڪيڏارو، ڪربلا ۽ ڪارا ڪڪر، 5 ]

ھيجُ نَہ ھُوندو جَنِ، سي ڪِيئَن وِندُرِ ويندِيُون،
وِھو وِچِ رَھَنِ، سَھِسين سَڌُنِ وارِيُون.
[ سُر آبڙي، سُک، ڏُک ۽ ارادا، 1 ]

ٻَڌِي سُورَنِ سَندِرو، صُبُوحِ ڏُونگَرِ ڏورِئامِ،
ڪَندي ڪَشالا ڪيچَ ڏي، ويلا وِچِ پِئامِ،
سَوين ساٿَ گَڏِئامِ، پُنهونءَ پارُ نَہ ھِڪِڙو.
[ سُر ديسي، جت، اُٺ ۽ ڌاريا، 17 ]

مُيَسِ مَرُ مَران، سُيَسِ وِچِ سَرَتِيين،
اَدِيُون آرِيچَنِ جي، سُورَنِ مَنجِهہ سَڙان،
پورِھِيَتِ ٿِي پَران پاسي پُنهونءَ ڄامَ جي.
[ سُر حسيني، ووءِ ووءِ ڪرڻ ۽ روئڻ ، 11 ]

سِڪي ھِنيُون سَڌَ مَري، راڻي جِيءَ رِھاڻِ،
موٽائي مَينڌَرو، اللهَ اَڱَڻِ آڻِ،
تان مُون پَئي نَہ ڪاڻِ، صَباح وِچِ سَرَتِيين.
[ سُر راڻو، موٽ ۽ پرچ راڻا، 11 ]

رامَڪَلِي دُکِئا ڪَھي، سُکِئا ڪَھي نَڪو،
ڪو مِٽِيءَ ڪو مائِٽِيءَ، ڪو روچِيءَ کي روءِ،
رامَڪَلِي سو ڪَھي، جَنھِن جي ڀاڳَ وِچِ بَڙا دُکُ ھوءِ.
[ سُر رامڪلي، آديسي ۽ مونا طور سينا، 23 ]

ڪَري ڪانگَ ڪُرنِشُون، پيرين پِرِينءَ پَئيجِ،
آئُون جٖي ڏيِين سَنِيھَڙا، وِچِ مَ وِساريج،
لِلهِ لَڳِ لَطِيفُ چئَي، ڳُجهو ڳالَهائيجِ،
چُئان تِيئَن چَئيجِ، تَہ کِيانتا خُوشِ ھُئين.
[ سُر پورب، ڪانگ، 1 ]

جِيَنِ سي سَنگهارَ، اَجهي جَنِ جي گهارِيان،
مانَ لَھَنِئُون سارَ، وِچِ وِلِهي ڏِينھَڙين.
[ سُر ڏھر، ڪاڇو ۽ سنگهار، 6 ]

جانۡ ڪَتَندِينءَ تانۡ ڪَتُ، ھِيءَ ھَڏِ وِھاڻِي،
ڪو پَنھِنجي عِيدَ لَيءِ، ڀيري ڪِجِ ڀَرَتُ،
مَتان روئِين رَتُ، صُباحَ وِچِ سَرَتِيين.
[ سُر ڪاپائتي، چائت ۽ محبت، 4 ]