پَڳَھَ پاسي گهارِ، آيَلِ سامُونڊِيَنِ جي،
وِجِهي جِيءُ جَنجارِ، جِمَ وَڃَنَئِي اوھَرِي.
[ سُر سامونڊي، پڳھ ۽ سامونڊين سڱ، 1 ]

وَڍي جَنِ وِڌِياسِ، وَرِي ويڄَ ئِي سي ٿِئا،
تُرتُ ٻَڌائُون پَٽِيُون، روزُ ڪِئائُون راسِ،
ھِينئَڙا تَنِي پاسِ، گهارِ تَہ گهايَلُ نَہ ٿِيين.
[ سُر يمن ڪلياڻ، ويڄ ۽ دارُون، 16 ]

ھوئِجِ ھوشِيارِ، خَبَرِدارِ، تِرِڪَڻِ آھي تَڙَ ۾،
کَڏُون کُوٻا چِڪَ چِڪَندِيُون، تان ڪِي نَئِي نِھارِ،
آڌِيءَ سي آکُڙَندِيُون، اَکِيُون جَنِ ڪَپارِ،
مُون سُئو مَلاحَنِ کان، تَڙَ اَڙانگا تارِ،
پَڪو کَڻِجِ پاڻَ سين، پِرِين تُنھِنجو پارِ،
کُوءِ آتَڻُ، ٻَنِ جيڏِيُون، ڏيراڻِيون ڏُئَارِ،
ھوتُ ھَلَندِنِ کَٽِئو، وِھَڻُ مُنڌَ وِسارِ،
ويندي واٽاڙُوئَن کي، پَٽِيءَ ڪِيمَ پَچارِ،
پُوندِيئَن مُنھِن، ميھارَ جي، ڏَمَ وَٽِ ڏِينھُن مَ گهارِ،
ساھَڙَ کي سُڻُ سُهڻِي ٻِڇَلِ آڏِي ٻارِ،
تارِ تَرَندِينءَ لُڙُ لَنگهَندينءَ عِشقَ جي آڌارِ،
پاندُ مَ ڇَڏجِ پِرِينءَ جو، پِھِين جي پاتارِ،
ٿِيندُءِ سَڏُ ساھَڙَ جو، توڏِي ٿِيءُ تيارِ.
[ سُر سھڻي، وايون، 16 ]

جَي ڀانئِين وَسَ چَران، تَہ سَنگهارَنِ سين گهارِ،
جَنِي سَندِيءَ واڙِ، چورُ نَہ اَچي ڪَڏِھِين.
[ سُر ڏھر، ڪاڇو ۽ سنگهار، 17 ]

مَ ڪِي رو مَ رَڙُ ڪِي، هَنجُون هَڏِ مَ هارِ،
جِھَڙا اَچَنِ ڏِينھَڙا، تِھَڙا ويٺِي گهارِ،
ڏُکَنِ پُٺِيِءَ سُکَڙا، سِگها ٿِينِ سَنگهارِ،
لَٿا لوھَ لَطِيفُ چئَي، پَرُوڙِجِ پَنوَهارِ،
ٻيڙِيونۡ نيئِي ٻارِ، تو تان بَندُ بِدا ٿِئو.
[ سُر مارئي، مَ رو، پانڌي پرين پنھوار، 12 ]

ڪَسَنِ ۾ ڪوھُ ڦِرين، گَسَنِ ۾ مَ گُذارِ،
وَڃِي وَحَدَتَ وِيءَ ۾، گُونُون ڇَڏي گهارِ،
شَرِيعَتَ جو سَرُ لَهِي، تَنُ تِئائِين تارِ،
حَقِيقَتَ ھَنجَنِ سين، طَريقَتَ تَنوارِ،
مَنجهان مَعرِفَتَ سين، اَندَرَ جي اُجارِ،
ھِدايَتَ جي ھُوءِ ۾، چُڻِئو تُون چانگاَرِ،
تَہ پاريڙِي اِنَ پارِ، ڪو نَہ ڏسين ڪَڏِھِين.
[ سُر ڪارايل، پاڙون پاتار ۾، 26 ]