ھَنجَڙا ھيلاڊُ ٿِي، گُونُون مَ گهوريجِ،
پَسِي لُڙَ ڊَھڪِيُون، پَکَ مَ لَمائيج،
سو سَرُ ساڱائيجِ، جِتِ پارَکَ ٿيندي پَکِيين.
[ سُر ڪارايل، اڇو آب، 2 ]

وَڃين نَہ پيھِي، پِٿُونءَ لَيءِ پاتارَ ۾؟
ڪَنڌِيءَ ۾ ڪيھِي، حاجَ تُنھِنجِي ھَنجَڙا.
[ سُر ڪارايل، اڇو آب، 4 ]

وَڃين نَہ پيھِي، پِٿُونءَ لَيءِ پاتارَ ۾؟
ڪَنڌِيءَ ۾ ڪيھِي، حاجَ تُنھِنجِي ھَنجَڙا.
[ سُر ڪارايل، اڇو آب، 4 ]

اَڇو آبُ لُڙُ ڪِئو، ڪالوڻِئو ڪَنگَنِ،
اِيندا لَڄَ مَرَنِ، تَنھِن سَرَ مَٿي ھَنجَڙا.
[ سُر ڪارايل، اڇو آب، 10 ]

جَنھِن پاڻِيءَ ۾ پُونئَرا، چِلُڙَ چِڪَ گهَڻِي،
وِئا چِتُ کَڻِي، تَنھِن سَرَ مَٿان ھَنجَڙا.
[ سُر ڪارايل، اڇو آب، 14 ]

ڪارايَلَ جي ڪوڏَ، مُون نَنگَرَ سَڀَ نِھارِئا،
وَرِي واھيري نَہ آيا، لَلا لاکِيڻِيءَ لوڏَ،
ھِينئَڙي جَنِي ھوڏَ، سي ھَنجَڙا ھَلِي وِئا.
[ سُر ڪارايل، پاڙون پاتار ۾، 2 ]

آءُ اُڏامِي ھَنجَڙا، سَرَ ۾ سارِينَئِي،
مَڇُڻ مارِينَئي، پاريڙِي پَھُ ڪَري.
[ سُر ڪارايل، پاڙون پاتار ۾، 10 ]

جِتي ھُئا ھَنجَڙا، اُتِ ٻَگها ٻِئا ٿِئا،
ڪُوڙَنِ ڪانيرَنِ سين، پَسو پَھَ پِئا،
سَھَڙَنِ سانباھا، ھاڻي اُنِهين ڀيڻيين.
[ سُر ڪارايل، پاڙون پاتار ۾، 31 ]

ڪَؤُئا ڪان ڪان ڪَندا، وِھاڻِيءَ وَڻَنِ ۾،
مُون ڏِٺا مُون وِسَھو اَڳي پِيڇي اَنڌا،
اَچِي عَدالَتَ ۾، ويھِي وِٺِ وِجَهندا،
حَلالُ ڇَڏي ھِتَھِين، مَٿي ڍُونڍَ ڍَرَندا،
ڦِٽَلَ ڦَيارِنِ تي، اورِئائِين اڙَندا،
سَڱُ جيڏاھِين سُرَھو، تيڏاھَن نَہ تَرسَندا،
ھَنڌِ ھِدايَتَ جي، اُستَخان آڻِيندا،
چَمڙَنِ جِھَڙا چُھِنبَ وَڍِئا، ھُماءَ سين نَہ ھَلَندا،
طالِعَ طائُوسَنِ جا، پَسِئو زاغَ جَلَندا،
ھُد ھُد پاسي ھَنجَڙا، ويٺائِي وِھسَندا،
ڪُوڙا ڪِرفِتِيءَ تي، سَٽُون ڏِئو سِرَندا،
حَدَ لَنگِهئائُون حَقَ جِي، ٻِنِهِي پيرَ ٻَجِهندا،
پِرَ جي پاڙِيسرَنِ سين، چُڻُو تان نَہ چُڻَندا.
[ سُر پورب، وايون، 1 ]

ھَنجَڙا نَہ پَسان ٿِي سي، جي اُڏامِي وِئا واھيرَنِ تي،
پَکِي جي پَرَڏيھَ جا، ساجُهرِ وِئا سَرَ تي،
موتِي جَنِ ماڳَنِ ۾ لالُون لَھَنِ تِتي،
جَنِ جو عَھدُ اللهَ سين، ڪِيئَن رَھندا ھِتي.
[ سُر ڪارايل، وايون، 2 ]